An Official Organ of The Bangalore Mizo Association Registered Under Societies Act of Karnataka No.

: BLU-S188-2007-08 Date 7 May 2007

Vol. XVIII Issue No.23 Bangalore Mizo Association Pathian Nitin Chhuak Chanchinbu Date: 02nd Sep., 2012 Phek Khatna

BMA AW

TUALCHHUNG
$$ Tv. Tete-a Sailo Ctore-ah: BMA executive committee member Tv. Lalhruaitluanga Sailo (Tete-a Sailo), BMA AW Editor hlui leh Bangalore Mizo tana mi tangkai tak chuan, a hnathawh avangin nimin khan Coimbatore-ah min pem san ta. Tv. Tete-a Sailo hi BMA chuan kan uiin, a hnathar zawm tur atan duhsakna sang ber kan hlan a ni. $$ BMA Executive committee member thar: Nimin khan Mizoram house-a BMA executive committee meeting vawi 4-na chuan BMA Executive Committee Member leh Rokunga section ziaktu atan Tv. BC Lalremruata a ruat. $$ BMA-in a tanpui Pu Peter Lalpiandenga, Aizawl chandmari veng, Bangalore-a awm thin chuan a mangan tawpah Mizorama a hawn theih nan Bangalore Mizo Association tanpuina dil a. Mizoram a hawna tur ticket man leh a ei leh in lei nan BMA chuan sumin a tanpui a. Mi chanhaite tanpui thei tura BMA-Bangalore Mizo kan awm hi a lawmawm ngawt mai. $$ . BMA Telephone Directory BMA Telephone Directory 20122013 siam turin, sub-committee ten chak takin hma an la zel a. Ni 9 september 2012 Pathian ni hian, inkhawmnaah member inziaklut-te hming, chenna, zir/hnathawh, adt., endik tura tarchhuah tum a ni. Directory hi Vangpui kut Mizo Cultural Nite-a tlangzarh a ni ang.

BMA ANNUAL FOOTBALL TOURNAMENT

Bangalore Mizote inhmelhriattawnna leh inunau zel nan

Thlalak: (Diakonos FC Vs Mandya FC)

Bangalore Mizote leh tlai! Bangalore Mizo thiltih reng reng hi tan hun dik taka tan a awm ngailo ti ila, min hnial thei in awm kher lovang. Thla hmasa lawka kan Health minister zahawm tak Pu Lalrinliana Sailo-in hmaichhanah, in lo kal tlai hlawm em mai an tih khawl khan hmai a uang lem lo. BMA Football tournament thawh hnihna pawn Bangalore Mizote hun hman dan bawk zuiin, tan hun tura ruat atang darkar khat hnuah tan theih a ni chauh. Team tel kim lo an awm avangin beisei aiin kan zo hma ta zawk a. Hei hian, kan thian te kan ngaihpawimawh lohzia a tarlang chiang hle. Kan inhkhelh hun thleng lo mah se, kan thiante tawiawm kha Mizo nun dik tak a ni. BMA football tournament hi football thiamte inelna ringawt a ni lo. He hun pawimawh tak hi, BMA member zirlai, hnathawk leh inchhungkhura buai em em te inhmelhriat nan leh inunauna kan neih zel nan tia buatsaih a ni. Hawh u, inngaipawimawhin, intawiawm dial dial ang u. Fak loh theih loh Hetia kan insel lai mek hian, nula leh tlangval nu leh pa fel tak tak, mahni tha leh hun senga, an tana hlawkna tur awm miah si lova phur tak maia mawhphurhna an hlen sang sang hmuh kha a hahdam, fak an phu tak zet. Pawl sum tuakna tura thahnemngai taka, inkhel ber pawh en hman miah lova nilenga buai an awm nual a. An thiltih kha an chak avanga ti an ni bik hauh lovang le. Englekhawle, Kumin BMA football tournament atang hian thian thar emaw hmelhriat thar engzat nge I neih tawh le? Nangman I hrechiang e.

Vol. XVIII Issue No. 23 Bangalore Mizo Association Pathianni Nitin Chhuak Chanchinbu Date: 02nd Sep., 2012 Phek Hnihna
Editor Tv. Lalmuanzuala Joint Editors Dr. Lalhmingmuana Sailo Tv. MC Zirsangzela Circulation Managers Nl. Lalchhanhimi Nl. Lalngaihsaki Hnamte BMA AW lak man: Thla khat Rs.20 Thla thum Rs.50 Thla ruk Rs.90 Thla sawmpahnih Rs.180

Panlai nun Lirthei ngaihsan lai

Dr. Mahminga Sailo Hmui tuvu Kan khuaah lirthei a lut lova. Lirthei kan hmuh theih chhun chu thlangra/kho leh belval a ni mai. Diesil/petrol rim kan hriat chhun pawh buhherkhawla buh kan her laiin a ni mai. Mahse, lirthei rik dan leh, an hma mite kawng kian tura an hriattirna ri piiiit piiiit dan kan hre ve chiang! Tin, heti hi a ni a. Sikul chawlhlawk/banlawk a thlen meuh chuan, sikul kal paha mi huan pal (mau phel) kan phawi ruk ngei kha kan thian pahnih pathum-in a rualin kan vuan a. Lirthei ri ang ni ngei kan hriat, chil phuan suah suaha hmui tuvu hlurh hlurhin, kan han vunnnn vunnn.. ta thin a. Hmui tuvu hlurh hlurh chunga, theihtawpa chaka han tlan phei kha chuan, hah a na thin asin. Thian thenkhat, khawpuia zin thang deuh leh lirtheia chuang zing deuh kha chuan a gear thlak nachangte kha an hria a, kan ngaisang thei teh a nia. Jeep tlanliam thlirin Kan khuaa lirthei hmuh tur a awm tlat loh avangin, kan khaw thenawma zin changin lirthei (Jeep leh TMB) kan hmu thin. Tin, kan khaw thenawma kan zin phak tawkna khaw kawngpui lah kha alkatra luan loh; fur laia diak kawi nuai, thlasik laia khu em em si a ni. Tawng miah lo leh nunpui ngailo tan chuan, kan nun hi nuihzatthlak leh mawlmang tak pawh a ni ngei ang. Mahse, kan tan chuan hlu ve tak a ni. Ralkhata jeep tlan ri vang vang kan hriat tawh ngat chuan, jeep tlan thlir liam ringawt tur khan theihtawpa chaka tlanin kawngpui kan pan thin! Eng teh ual hlawkna kan neih erawh kan hre lo, mahse a thlawn erawh kan ti phal lo. Kan khuaa haw hunah jeep engzat nge ka hmuh, TMB rik dan chu hetiang hian tia TMB rik dan hmui tuvu thova kan han zir thei te kha thiante ngaihsan hlawhna a ni. Computer games neih thar lam kan buaipui lo, mahse kan hlim ve em em si. Jeep-ah ka chuang ve Kan khaw thenawmah pawl li board exam kan zawh ni chuan, Lunglei zinna remchang a awm tiin ka pin min hruai hlauh mai a. (Ka thu ziah hmasaah, pawl li exam laia ka thiante nen Lungleia zin kan tum, kan thlen hman tak loh kha.. DMS) Lunglei atang kan haw ni chuan, chhumliamkawn kan pel tihah jeep pakhat a lo tlan vang vang a. Rin loh tak maiin, kan bula thlen chuan a ding a, rawn chuang ve ru an ti hlauh mai. A rang a rangin thatho takin ka pi nen chuan jeep hnungah chuan kan thulut ve ta. Ka veng ka haw hun chu sawi tur ka van ngah dawn rua em tiin jeep hnungah ka khi var var. Ka pi an nuih Kawng a chhiat avang leh, lung hraw pui pui (boulder) an phah avangin, jeep tawng deuh tawha han chuan zet chuan a sawh nghawr a lo na khawp mai a. Ka pi, tar chak tawh lo chu, kan chuang fel chiah tihah a inchelnghet thei si lo, tawng an tum ngawt a (Phek thumnaah chhunzawm a ni)

E-mail: bmanews@gmail.com Website: www.bangaloremizo.info

Xw||t Xw||t
Zonunmawi par ang vul zel se

Kan pi leh pu te khan thil an lo chik em em a. Zonunmawi kan tih fo pawh hi kan nundan changkang chho zelah hian a pawimawhin zel a ni. Kan thian, chhungte, zirpui leh thawhpuite chungah tawngkam hman kan fimkhur a tul hle. Nimina Mizoram house-a kan thianzaho kan titi laiin, mikhual pakhat chu a lo ang deuh bawrh bawrh a. TUNLAI THANGTHAR NUN PAWLAWH LEH AIA UPA ZAHNA CHANG HRE LO LUTUK HI CHU AW! tiin. A mak ka ti lem lo, ka tawn fo a ni tlat! Kan nu leh pa, pi leh pute avangin sum leh pai neiin, midang kan awt lovin, an tanpui mamawh lo hialin inhre mah ila; mihring hian kan hun tawn tur kan hrelawk miah lo. Chuvangin, hawihhawm takin I nung ang u. Khawi hmunah pawh awm ila, mahni chauhin kan khawsa reng thei lo.Tawngkam mawi leh hawihhawm hi sen hreh ngai lo ang u, a dawngtu tan hriat a nuam a, a sawitu tan lah a channa a ni ngai lo. Kan nunah hian Zonunmawi vul zel rawh se.

Vol. XVIII Issue No. 23 Bangalore Mizo Association Pathianni Nitin Chhuak Chanchinbu Date: 02nd Sep., 2012 Phek Thumna

MIZO KHAWTLANG NUN

CHHIATNICHHIATNI-THATNI
(Thulakna: C.Y.M.A website)
Khawhar lenpui: Khawhar lenpui hi thil hlu leh thil mawi tak, Mizo nunphung a ni a, khawhar chhungkua thlamuan tur kan nih avangin an mahni chhawk zangkhai zawnga kan awm a pawimawh hle. (a) Khawhar kan inlenpui hian Mizo chu khawhar hla sain kan zai ho thin a, khawhar hla thiam lo nula emaw, tlangval emaw nih hi thil zahthlak tak a ni. (b) Khawhar lenpuina boruak tichhe khawpa thusawi thin hi chin loh a tha. Khawhar In riah: (a) Khawhar chhungkua tanpui leh thlamuan turin tlangval tlawmngaite khawhar inah an riak thin a, zing meichhem, tuichawi leh thing senghawi velah khawhar chhungte an chhawk zangkhai a, a tha em em a ni. Zan hnih khat chhungkhat hnai leh thian tha, nula tlawmngai an riak thin pawh hi thil tha tak a ni. (b) Khawhar in-ah hian a nawlpui chu zan 3 (thum) riah ni sela, khawhar chhungten thian tha leh ngam tlak tlawmngai tura an chelh duh chuan pawi lovah ngai ila. (c) In riak tlangvalten mutna hmun bik neih hi a mawi lova, a remchan dan ang anga haw hmasate lo siamna hmun apiang lawm taka pawm thiam a tha. (d) Thiante puanthuah sawisa a phawk thawh te, puanthuah nei lova riah ve ngawt te, khawhar riahpuinaa zu ruih te, khawhar chhungte mitmei hmu lem lova lehkhaden lakluh te, thu bawlhhlawh pui puia hram te,bengchheng siam te ching lo ila. (e) Khawhar riahpuitute leh khawhar chhungte mut hun chungchangah mitmei inven tawn thiam a tha a, mut hmaa tawngtaina hman kan ching ta hi thil tihawm tak a ni e. (g) Branch hruaitute leh rual u ten khawhar in riak te hnena nunphung tha leh awmdan mawi an sawi thin hi a tha hle.

(Article chhunzawmna ) A tawng khur ta dawt dawt mai. A sawi tum reng a sawi chhuak thei ta lo. Chutia ka pi tawng khur hlawk hlawk chu, Jeep-a chuang te chuan an lawm phian a. Nui hawk hawk pahin, ka pi vawikhat chiah han tawng leh teh an ti ta chhen a. Ka pi lah a nuih a za ve bawk si; nui chunga tawng an tum phei chuan, a ha bal then tawh nen, nuih a tiza tual tual. Minute sawm chuang zet chu lirthei sawh hrehawm pawh hrechang lek lovin kan nui.

Enge an sawi?
Semi final kan thleng hi a mak mang e!
Rev. Hruaia

Vawksa thau ei zawh chiaha football khelh

zet chu, luak a chhuak hlui mai. Mahse, kan khelhpuite team hming kha ka hre miah lo! Dr. Mahminga Sailo

Penalty kan pet goal lo kha chu aw, ka ui

mang e, nizanah ka khel veilam ka delh dik loh vang a ni. Tv. El-a

Football official-ho phakharzia hi! Rs. 50

nawi I nei em? min ti a. Ka neihchhun ka pe ve bawk a. Man of the Match I sponsor a ni mai min ti daih! - Nl. Vee Elli

Dawn tisei
Kham sang tak leh chhengchhe tak kara kawngpui bumboh leh zimte zawha Bus tawng tawh taka kan chuan lai chuan, vawilehkhatah kan chuanna bus chuan lung a rap pial a. Kawng thlang lamah a awn thut mai! Bus-a chuang tam tak te chu, hlauthawng lutukin an au dual a. Ka thutna hnung chiahah chuan putar pawr hrip hrep, zing zu a ruih vanga thle bak bak, inchelh nghet thei mang lo chu, bus-a chuang an han au dual takah chuan a lo hawichhuak he haw a. Muang changin, In va piangthar tha lo hlawm ve maw le a ti chhar chhar a. Ringtu (inti) tam tak, van nun thlahlela insawi chamchi zingah hian, thih hreh tak tak hi an tam awm mang e tiin zuruipa tawngkam chu ka ngaihtuah mai mai a. Dawn a tisei phian

YMA chu tanpui ngaite tanpuitu a ni

Vol. XVIII Issue No.23 Bangalore Mizo Association Pathianni Tin Chhuak Chanchinbu Date: 02nd Sep., 2012 Phek Lina

HVLT MAWIA MEMORIAL TROPHY BMA ANNUAL FOOTBALL TOURNAMENT LEAGUE TABLE Ni Hnihna
1st September, 2011; Inrin ni: Nimin khan Bangalore Mizo Association Annual Football Tournament thawhhnihna chu khelh a ni a. Tournament hi hluttu an thahnem viau zelin, inkhel pawh a hmuhnawm khawp mai. A hnuaiah hian team hrang hrang te dinhmun tarlan a ni e. Group A Team Mandya FC Diakonos FC AIT FC Bangalore Seniors Group B Team KLE FC Grace Home FC Chingsui FC The Krups Group C Team FC Josephites RAD BZ Memorial FC St. Anthonians P 3 3 3 3 W 3 1 1 0 L 0 2 2 3 D 0 0 0 0 Pts 9 3 3 0 GD 6 -2 -4 -7 P 3 3 3 3 W 2 1 1 0 L 0 1 2 1 D 1 1 0 2 Pts 7 4 3 2 GD 3 0 0 -3 P 3 3 3 3 W 3 2 1 0 L 0 1 2 3 D 0 0 0 0 Pts 9 6 3 0 GD 4 2 0 -6

BMA Football Tournament Ni Hnihna

Group A He group-a team Mandya FC, Diakonos FC, AIT FC, Bangalore Seniors FC te hi an mahni tawka thiam inti leh thawm na an ni. A tir atangin inkhel hmuhnawm min entir tura beisei an ni a, beisei ang ngeiin an khel tha hlawm hle. Inkhelh kual hnuah Mandya FC hi group champion an ni a. Semi finals an lut a ni. Group B Group B-ah hian kum kaltaa team champion team pahnih Grace Home FC leh Chinggsui FC an tel bakah, team thar pahnih, khelh tan nia beisei aia khel tha tak tak KLE FC leh The Krups FC an ni a. Vanduaithlak takin kum kaltaa team champion te hian beisei an phak lova; beisei san vak loh, a taka belchian dawl tak si KLE FC group champion an ni a. Semi finals an lut. Group C FC Josephites, RAD FC, BZ Memorial FC leh St. Anthonian FC awmna group hi group dang nena khaikhin pawha nep bik chuang lo; team member naupang te te ni si a, team inman tak a ni hlawm a. An khel pawh a hmuhnawm reng a ni. Group Champion FC Josephites niin, semi final an lut. Tlawmna nun nena inkhela tlawm tum miah si lo team: Diakonos FC ten kum danga an tawn ngai loh an tawng tlat. Runners up team zinga point hmu sang ber an nih avangin, Semi finals an lut bawk. Anmahni pawn he dinhmun an thleng hi mak an ti hial a ni awm e! Semi-finals leh final hi Sept 15 2012-a khelh tura ruahman a ni a. Amaherawhchu rokhawlhna dangte a awm a nih chuan, remchan angin a hun hi sawn a ni ang. Tin, Final khelh ni hian ruahthamloh Exhibition match leh Hmeichhia Penalty Shootout a awm bawk ang. A en lo chu lenlai chan in ni mai