Thuhmaihruai. Kum 2002 ah America ka tlawn hnuah kum 2010 ah ka tlawng sal.

A karlak ah kum 8 lai a rak rei men. Mirang pawl in time fly an ti vekin can hi a zuan in a zuang. Ka thei man lo. America ka tlawng thlang hnik ke ti ih ka ruah rero lai fang ah,BWA Congress Hawaii ah a um ding ti ka thei ih a remcang zet. ZBC ah kusale dingin Rev. Thawng Kam ( Van Qha pa), ZBC GS in ka hmin cazin MBC ah in kuatsak ruangah ka lung a awi zet. Cuticun MBC Kusale ah ka cangthei ve thlang. A rei hlanah BWA in sawmnak capi ka hnen a thleng ve in Pathian ka thangqhat. Pathian zangfahnak in Baptist World Alliance khawmpi Hawaii kan fehhnu ah America ramsung tamnawn ZBC palai in kan tlawng. Kan khual tlawnnak thuhla pawl, Diary ka ngan vivo. Kan Diary cu Kawlram ih ummi ka nufa pawl hnen ah ka kuat qheu. Cumi ka Diary cu remsal ( edit) in cabute ah suah thei sal siseh la tiah saduh ka that. Kan khual tlawnnak thuhla pawl le culai fangih America a thlengmi kan Laimi pawl ih dinhmun tla kan mipi in thei haiseh la, a qha dingtin ka ruat. Kum 2011 thawk hrawng ah suah theiding ka tum lawknan, ka suahman lo. Kum 2012 lawngah kan suah thei a si hi. Tufang, Kum 2012 ih America um kan Laimi pawlih dinhmun le Kum 2010 ih dinhmun ka nganmi cu tampi a dang aw zo men ding. A hleice in, mipum, Kawhhran tampi a karhzo tin ka thei,

A ziang khal le himi World Baptist Alliance Khawmpi le ZBC Palai Pawl America Kan Tlawnnak Diary cabu hi, mi hrekkhat hrangah bawmtu le, thuhla zingzoi duhtu an um leh tikah bawmtu a si ah cun nganman ka nei ka ti ding. A siartu hmuahhmuah Pathian in malza lo sawm cio hram haiseh.

Rev. Thang Tin Sum ( Ete pa) September 19, 2012. Yangon.

WORLD BAPTIST ALLIANCE KHAWMPI le ZBC PALAI PAWL AMERICA KAN TLAWNNAK DIARY. (2010)

Rev. Thang Tin Sum .

Online Visa. Kum 2010 April thla thok ihsin online in America VISA siauhdan malte an thleng deuh. Pungsan(Form) 156 ai ah, Pungsan(Form) 164 tin a number tla an thleng. Pungsan sung ih thuhla khal malte cu a dangdeuh. An siqik (strict) deuh vek a bang.Keimah te online in ka tuah zik lawk nan, internet connection qhat lo thawn ka thiam tuk lo thawn, ka tuah suak lo. MBC ih cazii pa ka fial men. Keimah vekin Pastor midang tamzet in an fial cio ve. A buai nasa. Sunah Internet connection a qhat lo ruangah, zanah hna a quan ciamco qheu tin ka thei. Pungsan sungah kan kut in ka ngan khum thluh hnuah kan pek at men. Internet connection a qhat tikah a mahte a run ngan qheu men. Cuticun online in ka pungsan cu zarhkhat hnu lawng ah a thun lut thei. Ka tuahter caan cu Internet conection a siat bik caan ah a si ngelcel. Online in Visa siauhnak Form a lut thei veten a cahnah pawl cu suah (print) theih a si thlang.Cuhnu cun visa ziangtik lut a theih timi America councilor zungah telephone in kawhnak (apointment) dil a theih thlang. Telephone ka set ih June 23 zinglam Nazi 8:30 ah visa lut ding in in cah. Keimah vek BWA Congress kai duhtu MBC kusale minung 120 lenglo lai kan si. MBC EC kan tuah qumah MBC GS Rev. Dr. Zaw Win in hitin thu a than. MBC President Rev. Saw Mar Gay Gyi thawn America Councilor pa kan tong ih a qha thei bik in ka lo ruat sak ding in ti ti a si. Intarviu (Interview) kan tuah ding ih, pek cuang cu kan pe ko ding tinak a si. Kan zate cun pek ding a ol lo an ti. Kei cu MCC Staff ka si ruangah Convention le Association GS tluk cun thupi ah in ruat ding ka zum aw lemlo. Mithupi deuh (Priority) cazin ah cun ka tel ding ka zum aw lo. Ka ngah lo khal le ka lung a kim ko ding, Baptist staff ka si lopi tin ka hnem aw cia. Ete nu cun na ngah ko ding in ti. Viza(visa) khaan sungah Cuticun ni cu a tlan zutzo ih June 23 a kim thlang. 8:30 AM khel dingin kan inn in Taxi ka sang ih ka pok. June 22 sunah MBC GS , President le mi hrekhat cu an ngah zo tin ka thei. A ngah lo khal a um ruri tin in sim.Viza khaan sung lut hlan ah Security pawl in in cek ciamco ta. Visa khaan sung kan thleng. Minung 40 lai to theinak khaan a si. Kan hmailam ah TV an piah phahphah. Kan kehlam cu an zung khaan a si. Hmaisa bik sangka te zawn cu paisa peknak a si. A sangtu khaan cu Concilor pawl ih interviunak khaan a si. A sangtu cu kutzung namnak khaan a si. Cumi sangtu khal concilor interviunak khaan a si qhiamqhiam.

Thlalang sunglam khaan in hmin an ko. Qhaten ngai lo ah cun hmin a fiang thei lo. Paisa thun a cu .. Rak thun aw.. Tivek, na kut zung rung nam aw.. Interviu ding in rung thlang aw tivek ..hmun dangdang in an au celcel ih qhaten ngai a qul.Visa luhman cu $ 140 ah an kai zo. Ngah lo khal ah an khirhsalnawnlo.Sun lakmen a si ko.Kei ka luh zing ah cun Concilor pahnih an to. Pakhat cu Saping (Spanish) lam mivek a bang. Pakhat cu Mirang a si ko. A aw a fate zet. Mipa a si nan, nunau aw a bang. Mirang pa cun cahnah a kim ah cun olten a pe men. Thuhla tampi a sut lem lo. Saping pa cu a sual pam. Reipi thu a sut. A pek lo mi a tam. Pakhat pa tla cu ; Ziang na tuah ding tin a sut Hla ka sak ding a ti.Asile tu ah sak aw a ti.Cupa cu a mang a bang nawn. Ka sak ngaingai ding maw a ti Sak e a ti. Fingkhat a sak. Mipi in kan zoh thluh. Kan mang a bang ve.Sak hrih aw a ti sal. Fingkhat a sak lala. Councilor pa cu a za a beng sapbai.Nasa ngaingai in thuhla a sut hnuah VISA cu a pek ve ko. A dai(Aircon) khaan ah kan um nan, hlasak thiampa cu a thlan hmuah a pawt thluh vekin ka thei. ( Cupa cu Thawn Kham a si an ti) Himi councilor pa cu a va har ve aw.. .. mirang pai hnenah ciah sehla a va qha ding ve tiah keimah te saduh ka that rero. Lamlam.. A rei hlan ahTang Ten Sam.. Ti ih kawhnak aw ka thei. Zoha in ko tin khawdang ka tang. Saping pa(Spanish) a si aw.. A hmai ah ka ding. Sangka te, thlalang ong in kan bih aw. A aw cu a fiang ko. Asinan qhaten ngai a qul. Mirang qong na thiam maw? tin i sut. Ka thiam ko ka ti. Ziang na tuah ding? i ti. BWA ka kai ding ih cumi hnuah Mainland lan dingin in sawm tiah ka sim. Ramdang na fehdah maw? tiah in sut lala. Veitam pi ka feh. Nan ram khal ka feh ringring. Ka fehnak tetti ka lo hmuh ding maw? tiah ka sut.

In hmuh aw a ti. 1985 in America ka fehnak Visa in pekmi pawl copy ka hmuh ciamco. A zoh ve ko. Ziang tluk na rei tiah in sut lala Veihnih khat cu thlaruk tla ka rei ka ti. Ziang ah cu tluk na rei i ti lala. Training ka kai, Calai (Literacy) training tiah ka bet MCC ih ka hnaquan tla ka sim. Aw tiah ka qong cu in let. Zo in ticket a lo kuan sak ding in tiah in sut lala. MCC tin ka sim. MCC cu ziang a si? A ti lala. MCC ca tla a um kha ka ti. Khui si? MCC ka thei lo a ti. Malten ka ca pawl cu a vun kau. A hmu lo. Ka zoh sak ve. Tawkfang in a hmu, ih himi maw tiah in sut sal. Si ka ti. MCC hman thei lo, Khristian cu a si lo hi teh tiah ka thinlung ten ka ti rero. Thudang tla i sut ruri sal. Computer a zoh phahphah. Ca a ngan phahphah. Tawkfang in Tangka na thun thei, Passport cu ni hnih hnuah ra la leh aw i ti ih Visa cu i pek. Pathian ka thangqhat. Ka rualpi pawl in kha pai hnen ih Visa ngahtu pawl cu ngah tlak rori an si. Kawlqong cun, qhaihqhaih qaanqaan... an si tiah an ti . Titlak cu a si ngai. Thuduh, thutam, mi pontam thei zet, miharsazet..Councilor a si ko. A hnenih Visa ngah cu an malte. ZBC ihsin minung 6 in Visa kan ngah. A tam sawn cu mirang pai hnen in an ngah hai tin ka thei.

Visa ngahtu ZBC Palai pawl

1. Rev.Ngun Thawng Mang 2. Rev.Thawng Kam 3. Rev. Khaw Lian Hre 4. Rev. La Hoe 5. Rev. Mike Zung Ceu 6. Rev. Thang Tin Sum tla kan si. MBC zaten minung 50 lai lawng in VISA kan ngah. 50% hnak ih mal in kan ngah tinak a si MBC Kiang Lakphakdawr ah zingtin te; BWA Congress kan fehdan ding Vanzam ticket ziangtin kan lei ding? Ziang ni kan lei ding? Ziangtikkan pok ding? Honululu hnu mainland US ziangtin kan feh ding? Khuitawk ah kan qum ding? ZBC delegate zaten hmunkhat ih feh a qulmaw qul lo, mainland ah hmunkhatte ih meeting tuah a theih pei maw? Zo pawl thawn kan tong aw hmaisa ding ti pawl ruat ding tampi a um.Visa kan ngah veten zing tinte ZBC upa pawl riahnak MBC khualbuk ah kan feh. Thuhla kan rel khawm. Zinglam can tamnawn, MBC zungkiang lakphak dawr tharte ah kan feh ih, lakphak in phah in thuhla kan ruat khawm qheu. ZBC hminin US um hotu pawl hnenah ca kuat ding tin kan rel. A rei hlan ah ZBC cun kan duhdan pawl cu an ngan ih ca cu an kuat. A tlangpi thu in;America kan thlen tikah tonkhawmnak a um thei pei maw? Khui ah kan tong aw ding..ti pawl.Ramsung ram leng Kawhhran pawl hmunkhat ah Pathian hna quan tlang theinak a um thei pei maw? ti pawl rel khawm kan duh bik.America ram kan um sungah Kawhhran pawl thawn fellowship a cang thei pei maw? ti pawl ca kan kuat.

Van Lian pa in ca in let. Cui ZBC ih kan cakuat cu zamrang ten in let saltu an um lemlo. Hruaitu hrekkhat pawl ih hmin bun cu a sinan, a fiang deuh lo tivek tla thu kan thei sal. Kannih direct ih in than ual lo tivek in kan thei ruri.Van Lian pa in kan ca cu in letsal(reply). Nan duhdan kan rak rel leh hnik pei cu tiah in ti.Cuticun a ca khirhsal mi kan hngak cuahco. A ca thlen ti a nei lo.Kanmahte (private) in program kan suai men le a qha pei maw? tiah thu kan ruat rero thlang. Culai fangah a email a thleng. Indianapolis ah ra phawt u la.. Cui hnuah nan fehnak ding pawl cu kan ruatsal leh ding a si tiah in ti. Indianapolis ih kan caan hmandan ding program pawl tla in than cih. August ni 15 tiang Indianapolis Church dangdang ah thu sim ciar dingin program qha zet an rak suai ih kan lung a awi zet. Cuvete cun, kan vanzam ticket lei dan ding pawl, kan fiang thlang. Indianapolis thawn a naibiknak ih qum ding kan si ti kan fiang. Vanzam ticket agent pawl hnen kan feh thlang. Columbus Agent pawl in Chicago tiang vanzam kan nei an ti. A qha kan ti ih, cumi cu kan ham(booking) ter thlang. Honululu tiang cu a man fiangten kan thei nan, mainland tiang a man in sim thei lo lala. Email an kuat ih an sut. Ni hnih thum hnu ah a man in sim thei. Vanzam buking (Fly Booking) khal kan tuahter law law.

July ni 27 zan ah Bangkok in Honululu lam zam dingin kan nemhnget (confirm) ter. Roundtrip Ticket ah US $ 2000 lenglo lai a cem ding ti a si. Thla 3 lawng nan Ticket cu a nung ding in ti. Nan zam dan ding (Fly Connection) nan thleng duhle $ 90 hrawng nan liamsal a qul ding ti a si. Kan lung a kim. Paisa khal kan pek thluh mai.

Tim kan tuah. America tlawn caanah cun sungkhat thil kuattu hi an hnihthum zet thlang. In kuat duhtu pawl, kan el siang lem lo. Ca uk tivek a rit tuk pawl siar lo cu kan phur tum ko. Can a rei cun, kan thil phurh ding cu a tam sinsin. Dippi pahnih phurh theih, dip khat ah pawng 50 veve ti a si. Kan thil phurh ding cu pawng 100 hnakin a luan thlang. Packing tuah ah ka nufa pawl cu an buai zet. Ete nu tla a hngawng na te thawn a buai nasa. Taimak ten packing cu in tuahsak ciamco. Ete khal kan thil a rit tuk pang maw .. tiah in helh kam zet. Pawng thlainak a lei ih ka thil pawn a thlai rero. A luan zo. Tamtuk bet nawn hlah in ti. Bet lo awk le a qha lo. Khirh sal ding cu hmaisong an um tuk. Asinan cabu in kuat mi hrekkhat cu kan thlak sal. Ziangahtile carek in kuat a theih pam kan ti. Kan rualpi dang pawl thawn kan thil phurh dingmi kan sut aw cio. Zohman a zaang cuang kan um tuk lo. Kan zaten a rit thluh. Saya Pa Lian lawng dip khat lawng a phur. Midang cu dip hnih thum kan si thluh. A phurh in sian lo le ziang ti qha. Airport ah kan thlak thluh men a si kei cu kan ti. Paisa kuan a theih ah cun poi ka ti lem lo. Ka phurh sak thluh ko ding tin ka ruat cia. Veihnih khat fehsun teih rinsannak thawi thil in kuatmi phurhsak thei lo ding cu ka duh lo. A cang thei tawkin phurhsak thluh ka tum. Yangon Airport lamah July 27 zanlam Nazi 8 hrawng ah TG thawn, Bangkok ih zam ding kan si. Bangkok ah zan khat kan riak ding ih, cuisin Honululu lan ding kan si.A tlaibik Nazi 6 ah Airport thleng dingin ZBC GS Mawite pa in in cah thluh. Kei khal Ete le a nu, Hlawnte, Ruth in in thlah. Taxi 2 kan sang. Minung lawng siseh la, Motor pakhat ah kan tlem ding nan, kan thil a tamtuk ruangah Motor 2 kan sannak a si. Nazi 6 hlan deuh ah Airport kan thleng. Kan hlanah Rev. Thawng Kam ( Van Tha pa) a rak thleng cia zo. Tawkfang in Wah Saya kan hnaquanpi 2 an thleng. Saya Kyaw le Saya Ainap an si. An thil kenmi a malte. Ka dip tumpi pakhat in phurh sak le a qha ding ka ti ih, annih khal le in el lo. A man an lo dil le keimah in ka kuan mai ding ka ti. Kan hnipuan sannak handbagpi pakhat ka kuat vuarvi. A remcang zet. Pawng 50 lenglo lai a rit mi a si. Ete in a luhpi hai. Buainak um lo ten ka thil cu Wah kan Saya pawl in in phurh sak thei. Tuan deuh ih kan thlen cu a qhahnem zet. A sung ih ka thil phurhmi Laithuam pawl le MBC pawl ih in kuat mi Tapes pawl khal an cek(check) lem lo. Lehhnu ih rung lut pawl cu maltete an cek phahphah ih an thu a tam deuh. Asinan buainak ngaingai cu a um tuk lemlo.

Kan rualpi dang kan hngak ih a rei hlan ah an thleng thluh. Rev. Thawng Kam tei milai in kan thil thlai in bawm. Dip khatah rit tuklo dingin a tleng rero. Keimai ta tla a rit tuk deuh a ti ih, Mawite pa ih handbag ah malte a tleng sal. Cuticun kan thilri thawn a sungah kan lut thluh.Kan thil a tamtuk deuh a si hmang. Reinawn kan hngak. Neta bik lamah kan thilri an thlai thluh ih, Honululu Airport ih kan thil tlennak ding ticket tla in pe thei thlang. Vanzam kainak ding cahnah khal kan ngah thluh. Kanmah 6 kan neta bik. A zamrang theibik in a tlunah kan kai. Vanzam zamnak ding Gate kan thleng. Nan va tlai ve in ti sapbai. Vanzam sungah luh a cuzo tin an than. Mi hngahnak gate ah to man lo in Vanzam sungah kan lut mai. Tawkfang a rei cun, Bangkok lam pan in kan zuang. A zan cu Bangkok Airport ah kan riak. Hawaii lam pan in. July 28 zing cu thawhhlam kan ei thluh hnu ah Japan Airline kan to dingmi sangka kan hawl. Kan riahnak hmun ihsin a hla nawn. Ke in rei nawn kan feh hnuah Gate, Sangka cu kan thleng. Kan to dingmi Vanzam nambar pawl Sangka ah an ngan mi kan hmu. Asinan a tuan deuh ih Sangka cu an rak ong hrih lo. Tawkfang kan hngak hnuah sangka cu an ong ih a sungah kan lut. Kan Air Ticket le passport tla malte an cek. Cumi qheh cun, tohkham ah kan to ih Vanzam sung lut ding lawng kan hngak. Tawkfang a rei cun Vanzam sungah kan lut ih mah le tohkham ciar kan hawl. Kan 6 pawl cu a dangdang ah kan to. Hmunkhat ah in toter lo. Kan Vanzam cu a tum zet. Minung tampi kan to. Tawkfang a rei cun ei in ding in pe mai. In pekmi cu rawl pham deuh hrangah cun a mal deuh. Kei khal pawnghmuk pakhat cu ka dil sal. Global Position System ( GPS) Tuiqum Vanzam kan tomi cu ni dang ih ka khualtlawn vek a si lo.Vanzam sungin kan vanzam fehnak fiangten a lang thluh. Hmailam a fehlai, a zam lai khal kan hmu thluh. Pilot tonak ih tovek kan si.Ni dang bangin Sangkate lam ham a qul lo. Nidang ah cun sangkate lam ka dil qheu.Ziangahtile alenglam khawcon tla ka duh phahphah. Tuiqum cu Sangkate ih to tengteng a qul lo. A lenglam kan hmu thei thluh ih mak ka ti nasa. Hitivek ih lang thluh thei ding in, Van ih a zam rero mi, Cuquh thawn an pehzom ti a si. Cumicu Global Position System ( GPS) an ti. Nazi 6 lenglo lai kan zam hnu ah Hawaii, Honululu International Airportcu damten Pathian bomnak in kan thleng. Hawaii can cu July 28, zinglam Nazi 9 AM hrawng lawng a rak si lai. Ziangahtile International dateline kan lan veten ni a thleng aw. Kan Kawl ram hnakin nikhat zikte a rak hnu deuh tinak a si.

Immigration Checkpoint kan lut. Vanzam parah kan hmin le Passport number pawl ngannak form cu in pe ih kan ngan thluh. Cumi Form le Passport a qul dingmi document pawl ralring ten kan keng. Minung tam nawn a tlar a tlar in kan ding. Nuamte ten Checkpoint lam kan naih deuhdeuh. Thin a phangnawn. Ziang in sut ding? Thlaziat um theinak in pe ding? Ka cahnah teh a kim maw? Form teh ka ngan sual pang maw?.. tin thuhla a phunphun ka ruat rero. Kan hmai ah pakhat hnu pakhat an lut. Ziang an sut ti cu ka thei ban lo. Kan zaten (group) kan ding ih, kan nai deuh deuh thlang.

Tawkfang ah kan MBC group can a cu thlang. Kachin nubu pawl kan hmaiah an lut. Form an nganmi a kim lo an ti ih, an nganter sal. Checkpoint sangka 3 lai a um. Concilor 3 an to. Nunau 2 le mipa 1 an si.

Saya Mike in Kachin nubu pawl in Form cangan cu a bawm rero. Malte ka zoh sak ve. Culai fangah Saya Pa Lian a lut. Mipa hnen a pam. Zianghman a qong ka thei lo. Reilote ah a Passport a pek ih a lan mai. Khatlam ah Rev. Ngun Thawng Mang a lut ve. Nunau Mirang a si. A qong ka thei. Mirang nu cu a qong tam nasa. Ziang a qong ti cu fiangten ka thei lo. Mawite pa cun a sawn sal rero ti cu ka thei nan ziang thu an rel ti ka thei lo.. Mawite pa suttu hnen ka pan ke maw ka ti lawk nan, a qong a tam deuh ih ka pan duh lo. Ka dung ih dingmi Japan pa lut men seh tiah ka kian men. Khatlam Wa Saya Kyaw ih luhnak khal ka duh lo. A hmuihmel ka zoh ih mi tluangtlam tuk ding a bang lo. Nunau dumnawn a si. Dum taktak cu a si lo. Cutin ka lutnak ding sangka cu theih thiam lo ding ten ka hril rero. Manlo zet vekin Saya Mike ih Form ngan rero mi tla ka zohsak phahphah. Aa.. Tawk thlang seh ka lut ve thlang ding. Saya Pa Lian suttu pa hnen si mai seh ka ti. A hnen ka thleng. Zianghman a qong lo. Ka kutqial in namter sal. Yangon ih kan nam mi thawn a kaih maw kaih lo ti a zoh. Camera hmaiah fiangten in dingter. Yangon ih in zuk zo mi le ka passport thawn a kaih aw maw kaih aw lo tilawng felten a zoh men. Form ka ngan mi qhaten a siar. A thuailam te ih ka hminngannak zawnah a tacikte a cuk. A hmin a qhu. Ka passpot parah a ben. Feh aw in ti mai. A hmel cu kanmah Asia lam hmel deuh a keng. Kahpia a si men thei. Mirang cu a si lo law law. A hminqhutmi cahnahte cu fiangten ka zoh. VISA thla ruk ka lo pe tiih nganmi a si. Ka hril fuh riai tiah Pathian ka thangqhat. Pa Lian khal thlaruk a ngah. Mawite pa khal thla ruk a ngah.

Mawite pa , Ziang saw a lo sut ciamco kan sut sal. Kan BWA khawmpi thu tla in sut. America ramsung ah nuamzet in tlawng vivo aw tvk..pawl.. Thupi tuk lo a rel rero men tiah in sim sal. Aw..duhdawtnak na parah a nei zet a si cu tiah kan ti cio hngehnge in ZBC Delegate kan 6 ten thla 6 Visa kan ngah thluh. Kachin nubu pawl khal 6 ngah an um ve tin kan thei. Wa Saya 2 sung in Saya Kyaw lawng thla 1 lawng a pe. A luh ka duhlonak nu kha a si. Ka ti tho lo maw ka ti. Kan thil an check nawn lo. Thilri laknak hmun kan thleng. Kan thil pawl kimten a thleng thluh. Ceknak hmun a um nawn lo. Eicop cephnep (Food) kan keng tiah kan form ah kan ngan nan, in cek cuang lo. Pagoda Hotel lam panin Cuticun a lengah kan lan mai. A leng kan thlen cun Kachin pa, Hawaii ih hna quan, a nu rak hmuak ve pa thawn kan tong aw. Taxi san in bawm ih, Pagoda Hotel timi lam pan in kan feh. Kan thlil a tam tuk ruangah minung 6 kan si nan, Taxi tum pipi 2 kan sang ih Pagoda Hotel cu a rei hlan ah kan thleng mai. Taxi pakhat ah $ 30 lai kan pe. Minung kan tam ih a kaih ko. Pagoda Hotel. Honululu vanzam cawlhnak ih sin kan riahnak ding Pagoda Hotel cu a hla lemlo. Minute 30 tluk ah kan thleng mai. Taxi driver pa in a hmun olten in thlenpi mai. Kan Bag pawl a rit tuk ih Hotel sung luhpi dingah zawnawk ciamco a qul. Hotel counter kan pan. Kan hmin an rak ngancia thluh zo. MBC unau pawl in Hotel booking in rak tuahsak zo tinak a si. Kan Passport kan hmuh. Kan hmin cazin an khumsal. A man cu charkha ah $ 80 in la. Minung 2 fingfing kan riak ruangah pakhatah $40 cio kan liam tinak a si. Kei cu saya Mike, Ceupi pa thawn khaankhat ah kan riak. Saya La Hoe le Saya Pa Lian hmunkhat ah, Saya Ngun Thawng le Saya Thawng Kam hmunkhat ah tin mah le khaan cio kan pan. Kan thil a rit tuk ih Hotel hnaquan pa in leng in a khaan tiang in thlah. Paisa malte kan qhen. A khaan cu a kau pam. Ihkhun lawngte pakhat a tum ih pakhat a fate. A fate deuh ah Saya Mike a it. Kei cu ihkhun tumdeuh ah ka it. A zan cu kan it that thei tuk lo. Ziangahtile Kawl ram ih ra pekte kan si tikah kan ihcaan a bang aw lo. Honululu ih zan cu Kawl ram ah sun a si. Can a thleng aw zet.

 July 28 in August 1, tiang BWA khawmpi thu.

MBC Kusale pawl.

BWA Congress kaitu cazin. A vei 20 nak Baptist World Alliance Congress cu Honululu, Hawai ah, July 28 in August 1 tiang sunglawi zetin tuah a si. ZBC kusale minung 6 kan kai thei ve. MBC ih sin Kusale zaten, minung 50 lenglo lai kan kai. ( Zuk zoh aw) Leitlun ram 105 ih sin minung 4000 lenglo lai kan suak thei. Minung 1000 lai in Visa an ngah lo tin an than. An thu tlangpi cu; Hear the Spirit Luke 4:19 ti a si. Congress Zaal. Zaal in pek mi in thuanthu a nei. Kolkata, India ramsung ih nunau zuar aw pawl, bawmnak ding ih tuahmi Zaal a si. New Zealand ram in Kerry le Annie Hilton timi cu kum 1999 ah Kolkata ah an thleng ih Himi nunau zuar aw pawl hrangah ziang kan tuah sak le a qha ding tin thu an ruat. Netabik ah himi Jude ih tuahmi Zaal hi ram leeng ih zuar theih ding rorin tuah ding in anrel cat. Kum 2001 ah nunau 20 thawn hna quan an thawk. A hlan ah cun Zaal tuah an thiam tuk lo ruangah nikhat ah Zaal malte lawng an tuah thei. Asinan tuah cun nikhat Zaal 1000 hrawng an tuah thei ih minung 150 in hna quan an ngah thlang. Convention Center. Honululu khawlipi ih um mi Convention center an timi ah kan khawm. Convention center cu an Town Hall phun khat a si ve. A kau ngaingai. Khaan tam zet a um. Khaan ih kip ah khawmnak program phunphun an nei cio.

BWA Civu kan kainak Hawaii Convention Hall. BWA Congress Hmin cazin kan pe. July 28, sun cu khual thlen ni a si. Zanlam nazi 3 ah BWA Congress hmat-pung-qin hminkhumnak( rigister) ah kan feh. Ke ih feh theih a si. Saya Mya Min Lwin in in feh pi. An nih cu kanmah hnakin ni 2 tuan deuh ah an rak thleng zo. Kan hmin le kan orh dingmi kan hmin Card pawl, Zaal le, khawm caan program phunphun an ngan mi cauk in zem. Kan hmin pawl an rak ngan cia thluh zo. 7 PM ah zan khawm kan thok. Kalakaua Ballroom an timi ah BWA President David Coffey in thusimnak ( keynote address) a nei. Hawaii qong in ,cibai buknak le hmuaknak tla an tuah. Khawmpi kan thok. July 29 zing cu Nazi 8:30 in International praise in an thok ih Pahlo Deiros timi Argentina, Baptist Theological Seminary ih President in thusimnak a nei. Himi can ah WCC in siseh, WEA le Pntificial Council for Promoting Christian Unity in siseh cibai buknak capi an siar cio. Nazi 11: AM ( khawm qiak hnu ah) Tuluk, Japan, Spain, Korea, French, Portuguese le English qong in Bible zirnak khaan dangdang ah an tuah. Kannih cu miring qong hmannak khaan ah kan lut. Luke 4 : 18-19 cu hrampi ah bun tahrat in an zirh cio. Mithli dawk thlohthlo ih zirhtu tla an um. An nunnak in a ciah zet tinak a si.

Mino khawmnak, nauhak Sunday school khawmnak le International Music Fest, ramtin ih sin hla phunphun in Pathian thangqhatnak, tin mai duh naknak ah, caan a phunphun hman theih a si. Kum 1999 ih Hakha ih khawmpi, Chin Evangelical Centenary vekin khaan ih kipah khawmnak a um tinak a si. Tonak ngah lo ding an phang ve. Zinglam khawmpi cu Nazi 8: 00 AM in an thok. Zaan khawm khal Nazi 8 : 00 PM in an thok. Tonak ka co lo pang ding ti phangah, khawm hlan can rei nawn in minung tam nawn cu sangka kiangah an ding qhepqhep zo. Sangka an on veten luh khulkho a si. Laitlang khawmpi ka vun mang thluh. Kan civui pi caan ih, kan mipi pawl, tonak ham ih tuanten mandat khat qhepqhep ih an rak tocia pawl tla ka vun mang ruangro. BWA khawmpi zawh pawl khal cuvek kan sive. Khawm an paih ngaingai ve tinak a si. Khawmpi Program. Khawmnak Program an suai mi an thiam zet. Nin ding mi ziang hman a um lo. Phur zet in can kan hmang cio. Praise and worship hruaitu pawl an thiam nasa. An aw a qha. Hla hruai an thiam. Lam dutdo phah in hla in hruai. Mipi tha an tho ter thei zet. Cu a si ih mipi lam khal in an sup aw thei ve lo. A hrek cu an khawt nasa. African unau pawl tla cu za beng men lawng hman an lung a kim thei lo. An lam rori a si mei. An do a fawng cuang deuh hmang.

BWA Civui, President pawl hrang pum ap thlacamnak

Choir sak pawl khal an thiam cio. Aih.. Ka lak sual.. Kan sak sal ding.. an ti dah lo. Aw rualzet, mawizet..ngai nuamzet..in hla an rem. Mipi an hip thei zet. Praise and worship hla hruaitu pawl khal. an aw a qha. hlasak an thiam. Thungai thlakin, lungzur duahdo in Pathian an thangqhat ih, mipi lung a la zet. Khawm karlak ah sullam nei zetmi, Drama tawite tla an hun piah duak qheu ih, mipi an hip theizet. Sermon tuahtu, Pathian thuthang qha simtu pawl khal an tifuh riai. An sim duhmi fiangten an phuang suak thei ih, mipi thin lung an qhangphawk thei zet. Hear the Spirit timi Thlarau in ziang in sim, kan nunnak ah ziang vek hmuh tonmi kan nei, ziang in fial..ti pawl fiangten anlang ter thei. Pathian Thlarau kan hnenah a tlak taktak a si ah cun, A rundamnak thuthangqha cu nasa zetin phuang tahrat in, nuncih tengteng ding a si tin, an au pi nasa. ( proclaiming and living the gospel of Jesus Christ in the power of the Holy Spirit before a lost and hurting world.) Mirang an mal. Khawmsuaktu mipi kan zoh rero tikah mirang cu duh ai in an mal nasa. USA rori, mirang ram kan ti qheu mi ih khawm kan si nan, kanmah Asia mi le African, kan tam bik. Asia mi hnak in Afican an tam deuh hmang. Can hmangtu khal African timi midum Pastor an tam. Kan BWA GS khal midum a si. Midum pawl in, in rawt thlekthlek thlang a si hi ka ti rero. America ram hruaitu le kan theih cio vekin Obama khal midum, a si fawn. Mirang qong le an thiam zet ih in neh nasa. Khawm khal an phur vutvo. An lam dutdo mei.. Thusim lai ah an lungkim tuk cun an au an kio. An ding ih an za an beng. Kiangkap hmaisawng tivek cu a um lo law law. Cucu kan unau African zumtu pawl ih cangvaihdan a si.

Janet Clark timi, Dean of Tyndale Seminary, Toronto, Canada nu in Pathian thu a sim ah hitin napin in forh. . weastern society timi, kan Leilungpi saklam umpi mirang pawl lakah, thlarau lam qhansonak mision hnaquan a qul zet. Cumi hna quan suaktu dingah, kan Leilungpi thlang lam um pawl, Asia mi le Africa zumtu pawl hnen ah Pathian in quanvo tumpi a lo pe zo a si a ti. BWA Civui pi pelh dah lo an um. BWA Civui pi hi kannih cu kan veikhat telnak lawng a si. Mi tampi, nutar patar kan ton mi sung in BWA khawm zawh pelh dah lo tampi kan hmu. An mawh lo ka ti. Keimah ih ZBC Triennial civui ka pelh dah lo vek an si hi ka ti rero. Zumtu pawl unau vek ih hmunkhat ih khawm a nawmdan an tep ve a si hi ka ti rero. Kei tla i lem zo. Kan Asia ram ah tuah sal hai seh la khawm zawh sal ka cak nasa. Leitlun huap ih Khrih ah kan unau pawl thawn hmun khat ih khawm luihlo ih, Pathian thangqhat tlang hluarhlo cu a nuam law law a si. Khawmpi a cemnak. August 1, Sunday zingkhawm qiak caan cu kan khawmpi a cemnak a si thlang. Ram tinkim zumtu miphun tinkip kan qhen aw cio thlang ding. Cu a si ih, khawm qiak vete cun pakhat le pakhat cibai buk aw in, Aloha..damten maw ti aw phah in kan hnok rere. Mihrekkhat cu address dil aw na, hmun khat ih zuk khawm aw na.. tin siang aw lo zet in mipi cu khawm tual ah kan her celcel. Sunday zingkhawm cu a hmaisa bik lamah tonak ka cuh ve. Khawmqiak veten, upa pawl cibai ka buk ve hai. Ka kiangah Rev. U Win Tin tla a rualpi pawl cibai buk ding in a hngak ve. BWA General Secretary Callam tla kan kiangah a um. Mi tampin an be celcel. Kei khal malte ka beve. Culai fangah MBC ihsin kan unau pa, Saya Mya Min Lwin a ra ngelcel ih kan kutkaih awk lai in zuk hngehnge. Cuisin leng ka suak ih midang thawn kan pawlkom aw sal. A leng ah reipi can kan hmang.

BWA GS le ZBA Palai pawl. BWA GS pa cu reipi hnu ah leng a ra suak ve. ZBC delegate pawl thawn hmunkhat ah zuk tlangnak tla kan nei sal lala ih di a riam zet.Cuticun kan khawmpi cu siang lo cingten kan qiak vuarvi. Convention center a lenglam, tualrawn, zinkap lam pan in, dathlekha sangzet in kan qum suk vivo. A leng ih an bunmi dathlekha a si ruangah, kiangkap khawsung pawl kan cuan phah thei. Honululu khua a kulhtu tlangtluan pawl tla fiangten a lang. A lenglam cuan phah in, nuamteten kan qum vivo ih khaan netabik ( ground floor) hmai, tualrawn ah kan vung qum sutsi. Kan khawm qheunak tlunta bik hall pi cu kan hun cuan sal. A qhing reprep thlang. Minung a qum le a kai qhing dah lo, tong aw supso ih, zarhkhat sung kan kai qheunak Dathlekha pi tla zohman a kai le a qum hmuh ding an um nawn lo. Aw.. Leilung tlun cu kan khual tlawnnak ram taktak a si hiteh Leitlun ram tinkim ih a ra suak tu zumtu pawl thawn hivek in hmuhawksalnak cu a um nawn lo ding sikhaw.. Asinan zumtu pawl cu Vanram ah kan tong aw sal pam ding tin thuhla a phunphun ruat phah in ZBC Delegate pawl cu kan riahnak Pagoda Hotel lam pan in ke in kan tlung. Zumtu pawl unau bang ih hmunkhat ih um khawm hi a va nuam sotimi Ps.133 ka vun mang sal lala. BWA civui pi ah hin, a langte ih kan um sungnak kan Leitlunah, Vanram nundaan, kan cawng ngah ve riai, a si hiteh ka ti ih Pathian ka thangqhat . Thlarau nun nei ih Pathian thuthangqha phuangtu le nuncihtu kan si cio theinak dingah thlaza ka cam phah. President thar. A thuailam ih ka nganmi President le Vice President 12 pawl hi, July 31 zingah nemhngetnak in tuah ter. Central Committee pawl ih hril cia mi an si. A lung kim hmuahhmuah ding uh.. In ti ih kan ding thluh men. John Upton .. President A mah cu, Baptist General Association, Virginia Mission Board, USA ih hna quantu a si. President hlun David Coffey thlengtu dingah hril a si. 2010-2015 tiang a quan ding. Vice president 12 1. Daniel Carro Argentina 2. Joel Sierra . Mexico 3. Regina Claas .. Germany 4. Nabil Costa .. Lebanon 5. Harry Gardner.. Canada 6. William Epps .. USA 7. Olu Menjay . Liberia

8. Paul Msiza .. S. Africa 9. Victor Samuel..Cuba 10. Burchell Taylor ..Jamaica 11. John Kok .. Malaysia 12. Ross Clifford .Australia pawl tla an si. Cuisin Rev. Kim, Korea mi, President hlun in thlacamsaknak a nei. Mipi pawl khal kan kut an mai lam ah in hawi ter thluh. Thlawsuah in pek pi cio uh tinak a si pei cu ka ti. Mipi kut an mai lam hawi in kan thlir ih, pumpek thlacamnak a nei. Thuhla funkhawmnak ( Thuhla funkhawmnak ca an ngan mi a thuailam vekin Laiqong in a nai thei bikin ka let) Avoi 20 nak BWA Congress, civui pi, July 28 in August 1 tiang Honululu, Hawaii ah;- Thlarau thianghlim in ziang in sim ti kan thei. - Leitlun huap ( Global Baptist Family) Baptist unau pawl thawn Pathian hmin ih pawlkomawk a nawm zia kan tep cio. - Hawaiian minung pawl ih Aloha timi an cibai buk awknak qong kam kan thei. An thin lung put qhatzia in thei ter. - Kan thuthangqha cu thlengawknak suahpitu a si ti in thei ter. - Leitlun ramkip harsatnak phunphun a tuartu pawl ih tetti khannak tla kan thei. - Ziangtin hivek leitlun harsa pawl hi Bawi Khrih hmin in kan bawm ton aw thei ding timi sawmnak tla kan thei. - Pathian sersiammi ram mawi ram nuam kan mit in kan hmu. - Miphun dangdang hnipuan cei awk daan siseh, Pathian thangqhat daan siseh kan hmu. - Khrih ah pumkhat sinak ih a nawmzia le global family kan si timi kan hmu thei. Cu a si ih, zo vek miphun khal Pathian ih hmui hmel keng ih tuahmi kan si zia, Pathian ih Rundamnak bangrep ten cotu kan si zia phuang hrimhrim ding a si. Cuiruangah hitin pumpekawknak a thar in tuah cio u si. Bawipai Thlarau cu kan parah a um ruangah, - Khrih ih in zirhmi ziang a si ti thuk deuh in ruat u si. - Taimak ten thlacam u si - Khrih Rundamnak thuthangqha cu tetti khaan cio u si. - Bawipa ih zirhmi thunung hi nunpi zuam cio u si. - UN Millennium Development tla bawm cio u si. Ziang ah ti le Bawipai Thlarau cu kan parah a um ruangah; - Leitlun farahnak le rilrawnnak pawl mal sinsin ding in zuam cio u si.

- Zirsang pawl bawm cio u si. - Kiangkap boruak qhattheinak zuam cio u si. ( environment) - Gender bangrannak, equality qanpi cio u si. - Harhdamnak lam khal bawm cio u si. - HIV/AIDS, malaria le natnak dang pawl do cio u si. - Global partnership timi, leitlun huap ih qan rualnak nei cio u si. Minung qulnak pawl bawm theitu si ding in kan umnak ciar ah Pathian ih duhdawtnak cu tleu ter cio u si. Hawaii kiangkap kan leng. Mainland ihsin Laimi kan unau Stanley Hram Uk, ungcung nu le pa, Saya Thlaawr pawl an thleng ve. Stanley Hram Uk in a kiangkap leng dingah in sawm. Hmun tamnawn kan leng man. Ralpi veihnihnak ah Japan pawl in Pearl Hobour Bom an thlaknak hmun tla kan leng. Tourist tampi kan hmu ve. Thil umtudan kan zoh hlan ah Bom an thlak lai an Tinbaw a kang rero lai pawl Biscope hlunpi in piah sak. Minung 10000 lenglo an thi ti a si. Arizona timi Lawngpi tla pil ih tilawng ralkap 1000 lenglo an thi thluh. An ihthat qhat zet laifang a si ruangah a leng an suak man lo. Lawngsung ah an ruak a tang men. An Lawngpi cu an thlan ah a cang an ti. Cumi Arizona Tinbawpi Khawngtaining an timi meikhu suahnak cu a leng ah malte a lang. Cumi a langnak zawn ah hngilhlonak innte vek in piahqaih (musuem) phun an sak. Minung tampi in an zoh cio. Khatlam ralah a um ih, Tinbaw fate in feh theih a si. A karlak ah malte lawng a rei. Tinbaw par cu kan to ve ih Arizona Tinbawm pil cu kan zoh ve. Minung malte lawng an nung ti a si. A nung mi pawl in ziang ruangah kan nung a si pei? Kan rualpi pawl vekin thi ve ding kan si nan tiah an nunnak thu mangbang zet in ca an nganmi tla siar ding a um. Hawaii timi cu; Hawaii tikulh cu kum 1959 ah America ram ih State pakhat ah a cang. America rampi thawn a peh aw lo mi Pacific tipi thuanthum parih ummi tikulh a si. Tikulh 8 a um.Oahu tikulh parah Honolulu a um ih an khawpi asi. BWA civui pi kan tuahnak khua a si. Hawaii ah minung 1.3 million hrawng an um. Philipino 13 %, Japanese 12% le Native Hawaii or Polynesian cu 9% an si. Tlangqong cu Mirang qong a si lo le Hawaii qong (Polynesian qong) an hmang. Christian 30 % an um. 51% cu ziang biaknak hman ah an tel lo. 9 % cu Buddhist an si.

Hawaii pawl ih an cibai kuknak qong cu Aloha ti a si. Na dam maw? Damten..ti ai ah Aloha an hmang. Hawaii tikulh cu Leilung tlun ih Beach hmin thang zet pakhat umnak hmun a si ruangah, Leitlun hmun kip ram kip ih sin khualtlawng ( Tourist) an tam ngaingai. Kawlram Ngapali hnak in a nuam deuh. Hawai miphun pawl cu an pupa san ih sin tisuar to thiam zet miphun an si. Tisuar to in leh zuamnak nasazetin an tuah qheu. Tufang ih TV sung ih kan hmuh qheu mi tisuar to ih an zuam awknak pawl hi, Hawaiian pawl ih an zirhmi a si an ti. Clifornia lam, Australia ram lam ah himi tisuar todan hi an zirh vivo ih, tu-ah cun, Leitlun lehnak zuamawknak hminthangzet pakhat ah a cang. Tlangpar in khua kan cuan.

Hawaii cu tikulh 8 a um ti a si. Tlangpar in khawconnak hmun qha zet tla a um. Honululu khawpi tla fiangten kan hmu thei. Vankau tlang in Falam zoh vek a si. Fiangten a lang. Tipithuanthum tla fiangten a lang. Tipithuanthum kap in Mawqaw zin a um ih, zohphah vivo a theih. Canada Navascotia kan um lai ih a kiangkap Tipithuanthum pawl in zohpi tla ka vunmang sal ruangro. Chicago lam pan in August 2, Honululu International Airport lam pan in Taxi thawn kan feh. Taxi par ah kan thilri cu a khat liailiai. Kan to dingmi vanzam cu Alaska Airline a si Taxi Driver pa in a luhnak zawn tiang in thlah. Kan thilri cu nuamte ten kan hnuk. Kan zawn aw. Alaska gate cu kan thleng. Food Checkingnak ah kan thil hmuahhmuah cu kan qhum. A sungah kan thun lut. Computer in a zuk. Handbag pahnih tawh in ongter. Pakhat cu kemai handbag a si. Malte anzoh. Kaikuangcar pawl an hmu. Dry prown an ti ih ka hnadbag an khumsal. Tape in ka nufa pawl ih an qemmi tla an tan thluh. Cumi cu Tape thar in qhaten in qemsak sal. An qha zet. Zianghman an pon tam lo. Saya Thawng Kam (Van Tha pa) bag tawh in ong ter. A handbag sungah a phurhmi sapherh lung an vak rero. Hmul hman an nei zo. In cektu nu in kaihci vekin cumi lung cu a cep. A poi lemlo a ti ih Bag cu tawh in hrenter sal men. An va qha lawmam ve ka ti. In cektu an hmuihmel qhaten ka zoh. Kanmah Asia mi, Hawaiian an si hmang. Mirang an si lo. Annih khal kanmah vekin sapherh an hmang ve ti a si. Cuiruangah, Kawlqong in sim seh la, naa-lee ..hmuh.. an nei ve tinak a si. A va remcang lawmam ve. Mirang si hai sehla kan ol riai lo ding. Kan thil in hlonsak tengteng ding. Pathian hi a qha tuk. Honululu ih kan thil kan qhumsal mi hi Pathian remruat a si tin ka zum. Kanthilri kan phur thluh. Kan thil an khai. Rit cu an ti deuh hmang. In zoh sal. Kan vanzam ticket le kan passport pawl in dil sal. International Flight a to mi kan si ti an fiang. Cui ruangah olten kan handbag rit zetzet pawl cu phurh an siang mai. A thlaitu in paisa in dil. Kan hotu pa in a pek. Ziangzat na pe tiah kan sut. $ 10 a ti. Na pe mal tuk lo maw tiah kan ti rero. A si ngai tamdeuh pektlak an si ngai nan.. a ti ve Ziang ti qha..kan pe sal thei nawn lo. Kan lan zo. Tawkfang a rei inVanzam sung kan lut. Kan Vanzam cu Chicago lam pan in tipithuanthum tlunin kan zam vivo. Vanzam sungah ei ding zianghman in pe lo. Hmuk pakhat te le a dai khuat khat lawng in pe. Kalemyo kan tlun hman an bang ual lo kan ti rero. Thil ei duh le lei ding cu a tampi. Honululu in Sheattle tiang Nazi 5 le minute 15 lai kan rei. Sheattle ah kan cawl man lo. Chicago lam pan in kan zam lala. Nazi 3 hrawng kan rei.

Chin Baptist Church Pastor Danny Bawi Thian Hlun le an mino

PastorDannyleZBCPalaipawl.Chicago Chicago cu an zan Nazi 11:30 hrawng ah kan thleng. CBC Pastor Danny le a mino pakhat in in rak hmuak ih kan lung a awi zet. Kan thil tam daan cu ka sim zo vekin, a mak. An motor pahnih ah tlem ko an san thei. Minung khal kan 6 in in phur thei. Pastor Bawi cu mino te a si. Tlangval a si. A virvat a qha zet. Dutdawtnak zangfahnak neizet mi a si ti a hmuihmel ah a lang. Kan thil amah rori in a cawi. A mawqaw ah tlem ding in heh tiah a ben. Tlemthluh ko in a san thei. Hitluk thil tam an mawqaw ih a tlem thluh cu ka mang a bang ngaingai.

Motel ah kan riak.

Cuticun kan riahnak ding Motel, Hotel Church in in ngaituah sakmi lam pan in kan feh. Motel kan riahnak ding hmun kan thlen ah cun, zinglam a si zo. Kan thilri kan suah nawn lo. A qultuk mi lawng kan suah ih, kan riahnak khaan ciar kan pan. Kei cu Mawite pa thawn khan khat ah kan riaktlang. Pahnih pahnih in kan riak tlang lala. Kan thil pawl cu an mawqaw sungah kan ret men. An vahnak kip ah an phurh phah rero men. Saya Mawi in Hambergar in lei sak ih thaw zet in kan ei hnuah kan it men.

Pu Ngun Thawng Mang pa tei inn ah thlacamnak kan tuahsak. Ngun Thawng Mang pa cu Zung Ceu Lian a si. Rev. Ngun Thawng Mang le Saya Mike an si lo. Hmin bang aw an tamtuk ih kan hni rero. Hotel ah rawl in do. Vietnam rawl a si. Cuisin Saya Bawi inn ah malte kan lut. A internet kan cuh aw ciamco. Ziangahtile Internet dawr ti a um lo ih, Kawl ram lam thuhla zohman in kan than thei hrih lo. Internet hmang thei dingah Lap Top neih cio a qul. Private in Internet an hmang thluh. Inn ih kipah olten hman theih a si. Kan kawl ram vek in Internet Caf ih lut rero a qul lo. A zanlam cu Pu San Aung, an Church President inn ah rawl kan ei. Papulian pa tla a ra leng ve. 8:00PM; Zankhawm cu Pu Ram Hnin tei inn, Thet Thet Win tei inn ah kan tuah. Kan zum hnakin minung an tam zet. An inn an khat thluh. Mi 40 lai an ti ding. Kan 6 in thusimnak tawite kan nei. Mawite pa in netabik ah thusimnak tawite a neisal.

Zankhawmnak ih a ra suak tu pawl.

Aug.4, Wed. Sincaw cu Pa Hrang ten in do. Hotel ah in hruai lala. Vietnam rawl a si. Hotel rawl kan ei lai ah Wheton ih United Chin Christian Church an pastor Thawng (Lian Do Dal) a ra thleng. Rawl malte a ei ve. Capoh hmang mi a si. An capoh aw phahphah. Rawl kan ei thluh hnuah Wheton lam pan in kan feh.

Billy Graham Center kan lut phah. Kei cu aveihnihnak ka luhnak a si ih tampi ka zoh nawn lem lo. Zanriah cu Pu Peng Thang tei inn ah kan ei. An kawhhran hotu a si. Biakinn ah kan khawm thei lo. Ziangahtile zinglam ah qek a rak tla ngelcel ih a biakinn meisa a siat hluh. Hilam cu hitivek in cyclone, thlisia a hrang phah. Thli le ruah in inn a siat suat can a um ti a si. Qeektla a tla qheu a si hmang. Curuangah inn ih khawm ding in thu zamrang zet in an than aw sal. Van Qha Thang nu le pa tei inn ah kan khawm Minung 40 lai an suak. Kan 6 in thutawi simnak kan nei cio. Ramthlo mi sungkhat hrekkhat tla an ra khawm ve. Kan zuk tlang rero. Zan Nazi 10 hrawng ah Chicago ah kan kir sal. Pastor pa in in thlah lala. Wheton le Chicago cu an nai aw te. A peh aw thluh. Aug.5, Indianapoli lam pan in Pastor Bawi le an mino in an mawqaw in in thlah. Lamzin ah Nazi 3 hrawng kan rei. A hlatuk lo tinak a si. A reihlan ah Indianapoli khua cu kan thleng zik tin Van Lian pa kan than. Hmunkhat ah tonkhawmnak kan nei ding ih cumi hmun ah ra uh in ti. Saya Bawi cun tonkhawmnak ding hmun ah in hruai. Pu Than Hre ih Chin Brother Hotel ah meeting kan nei.

IndianapolisKhawhranupapawlthawnmeetingkantuah.

A reihlan ah Indianapolis cu kan thleng mai. Chin Brotrher Hotel kan pan. A sung kan vung lut. Van Lian pa cu phone a kai ih mi a be rero. Kan kut kan kai aw. Saya Thawng Ling ( Biakku pa) le Saya Ci Kap ( Na Than pa) pawl tla an rak um. In rak hmuak, Kan bang a reh rori. Tawkfang in rawl an cah . Mesa tla a tel. Nanmah kan lo thah mi a si in ti. Pathian hmin thangqhat in lungawi ten kan hmang tlang. Kan Programme pawl in sim. October tiang an suaimi a si. Nan duh le nan rem thei in ti. Rem ding kan nei lo.A thuai lam vekin, Programe qhazet in in rak suaisak ruangah kan lung a awi tuk kan ti. Zomi Baptist Convention kan pale pawl hrangah suaimi prokrem (Indy khua an cam sung) AUGUST 08, 2010 SERMONNAK HMUN Thang FCCI, 1:30 PM Tin (Rev. Hre Mang) AUGUST 15, 2010 SERMONNAK HMUN NAMCC, 10:30 am (Rev. Dr. Henry Thang) Val

HMIN Rev. Sum

THUTUL DANG

CEBC, 2:00 PM (Rev. Thawngling Mualhlun) ICBC, 1:00 PM FCCI, 1:30 PM Rev. Ngun Thawng (Rev. Dr. Stephen Hre (Rev. Hre Mang) Mang Kio) CEBC, 2:00 PM ZCC, 2:00 PM Rev. M. Thawng (Rev. Thawngling (Rev. Thlaawr Bawihrin) Kam Mualhlun) Battle Creek Battle Creek Rev. Mike Zung Ceu BCI, 1:00 PM ICBC, 1:00 PM Rev. Khaw Lian (Rev. Ci Lian Kap) (Rev. Dr. Stephen Hre Hre Kio) NAMCC, 10:30 am CLC, 12:00 PM Rev. La Hoe (Rev. Dr. Henry Val (Rev. Robert Biak Cung) Thang) CCC, 2:00 PM (Pu Shwe Myint) Note; (A quldan in rem sal theih a si.)

Tlun inn cu mahle hamtu inn ah tlun ding in suai a si. August 7, 2010 (Saturday) zanriah cu nupi qhitnak ah eipi ding in Pu Zapeng Sakhong in sawm an si August 8, 2010 (Sunday) zanriah (Falam pastor poahpaoh) cu BCI Khrifabu in an sawm hna. (Rev. Ci Lian Kap quanvo) August 9, 2010 (Monday 2:00 -9:00 pm) cu Indy um pastor le upa sawmmi thawn thurel khawmnak, rawl ei khawmnak, le thlacam khawmnak neih ding a si. (NAMCC biakinn ah, Rev. Dr. Henry Val Thang in Pathian hna kum hra a quannak camah, thlacam duhsak a nei ih, zanriah khal do a tum.) August 14, 2010 (Saturday) cu Columbus, OH ah Rev. Val Thang hruainak in civui meeting telpinak a um ding. A man mi in thlun ding a si.

ZBC PALE PAWL KHUAL TLAWNNAK PROKREM (A HRAN) August 22 NAME Rev. Thang Tin Sum Rev. Ngun Thawn g Mang Rev. Khaw Lian Hre Rev. Mike Zung Ceu CEBC Rev. (Indy) La Hoe ICBC Rev. (Indy) _ BCBC (Battle BCBC (Battle MCBC (Milwauke ECBC (Columbu SCCC (Springfiel DCBC (Dallas CBMC (DC) LBC (Frederic k) FBC (Marylan d) Lai ACBC kumtha (Atlanta) r (DC) CBC (Baltimore ) CCBC (Atlanta) DCBC (Dallas) CRC (Texas ) TCBC (Texas ) August 29 Sept. 5 Sept. 12 Sept. 19 Sept. 26 Oct. 3

LBC (Frederic k)

GCBC (Atlanta)

CEBC (Texas)

FBC (Marylan d) -

CBMC (DC)

CCBC (Atlanta)

ACBC (Atlanta)

TCBC (Texas)

CEBC (Texas ) -

M. Thawn g Kam Theihternak:

Creek)

Creek)

e)

s, OH)

d, MO)

ZBC kan pale hi an can neihsun, kan miphun Khrifabu hnen ah hmang thei cio hai seh la, ti duh saknak thawn kan suaisak mi a si. Indianapolis khualeng an fehnak ding hi cu kan mahlei in hitin a qha pei maw tiah kan rak suaimi a si. Khrifabu hrekkhat in in sim zo tu, nan um ruangah, nanmah telhcih in kan rak suaimi a si fawn. October 3, 2010 tiang lawng kan suaimi a si i, cumi hnu cu anmah le Khrifabu cio i rel leh ding a si. Rev. Mike Zung Ceu le Rev. La Hoe cu suai sak cia mi a um zo ti kan theih ruangah, kan suai sak lo. A qulmi a um le a tanglei ah pehtlaihnak nan tuah thei. Rev. Dr. Stephen Hre Kio (hrekio@gmail.com) Rev. Thawngling Mualhlun (biakkupa@yahoo.com)

Zo ih dawr a si tiah a kiangkap ka zoh. Mi ngo vurvi ka hmu. Ka hmuh dah mi a bang vek tiah ka zoh sal. Anih khal in in zoh ve. In thei mai. Ka hnen ah a ra. Kan kut kan kai aw. Than Hre timi Thangthang pa, Rev. David tei ih rak finkhawi dah mi a si. Hakha an inn tla ka rak leng qheu. Thangthang pa cun a rualpi pawl hnenah sungkhat kan si thu a sim rero. Rinlopin hi hmun ah kan tong aw sal a si hi. Tawkfang a rei in kan riahnak ding sungkhat pawl an ra thleng ih in hmuak cio. ( Chin Brother dawr neitu Thang Thang pa thawn kan zuk aw.)

Pa Hre tei inn ah

Kei cu ka tupa Pa Hre tei inn ah ka feh. Pa Hre in in hmuak. A thau nawn ih ka palh zik te. Pa Tai tla a ra ve. Pa Tai ih Mawqaw ka to ih, Pa Hre tei inn lam pan in kan feh.

August 7, (Sat) Nupi qhitnak ah ka tel. Pu Za Peng tei tufa qhitnak puai a si. Kei tla thlacam in fial ve.

Zankhawm cu BCI ( Bethel Church of Indianapolis) August 7, zancu BCI ah caan ka hmang. Zaan khawm a si nan, ka zum hnakin minung an tam pam.. Hnaquan bang cio an si nan Pathian duhzet mi an si ti a fiang. Fanau tampi ka tong ruri hai ih ka lung a awi zet.

BCI cu tuah cun Falam Baptist Church tiah an run thleng zo. US kan Falam Baptist sungih rinsantlakzet Kawhhran an rung cang ih Pathian ka thangqhat. Rev. Ci Kap cu an pastor a si.

August 8. FCCI ah can ka hmang. Upa pawl ih in suaisakvek in, August 8 ( Sunday) zanlam 1:30 PM ah FCCI ah Pathian thuthangqha phuannak ka nei. Zirhawknak tla an nei hmaisa ih, keimah in can ka hmang. Cuisin Pathian thuthangqha simnak in can ka peh vivo. Saya Albert Kap (Afia pa) in khawm hotu a quan.

FCCI khawm suaktu mipi hrekkhat. Saya Hre Mang ( Gynny pa) le Afia pa, Saya Albert in Pastor quanvo a haha in an la tin ka thei.

ZBC le US Pastor hrekkhat meeting.

 Aug.9 cu ZBC palai 6 le, US ummi Chin Pastor hrekkhat, Indy pastor pawl minung 20 lenglo lai meeting kan nei. Matupi unau pawl ih leimi kawhhran, NAMCC, ah sunvu, nazi 8 sung lai thu kan rel khawm. Rev. Dr. Val Thang cu an pastor a si. America ramsung Laimi pawl lakah Biakinn lei hmaisa bik lam an si tin ka thei. ZBC in a tumtah mi cu, ramsung ramleng zumtu unau pawl thawn lungrualten Pathian hna quan tlang ding ti a si. America ramsung ummi zumtu pawl thawn ziangtin hna quan tlangnak a um thei ding ti kan ruat khawm. GCCF thu tampi kan rel. USA ramsung ah Chin Christian Fellowship cak nawn a um hlan sung cu Global Chin Christian Fellowship cu a cak thei ngaingai lo ding tiah ruahnak kan suah cio. USA ramsung Kawhhran hruaitu tampi an tel thei hrih lo ruangah, kan thurel mi pawl cu saduh thah ngaingai a kim thei lo. Forhfialawk ding tampi a qul lai tin kan hmu. Hmailam ah Pathian in a mai duh zawngin in hruai vivo hramseh. Rev. Dr.Val Thang (Tin Jubilee) Rev. Dr. Val Thang Kum 10 tiang Pathian hna a quan lungawi thusimnak ah keimah in can ka hmang. Mtt. 5:13,14,16 sungih, Tleunak le Cite nan si ti ih kan Bawipa ih in simmi ka siar ih forhfialnak ka nei.

Rav. Dr. Val Thang Tin Jubilee khawm ( NAMCC) Aug. 9 zanlam cu FCCI pawl in zanriah in do lala. Saya Albert tei inn ah zan Nazi 11 tiang thurel tlangnak kan nei. Kan phur cio.

Albert Kap (Afia pa) te inn ah thuhla relkhawmnak kan nei.

Aug. 13 (Fri) Livai nu le pa in thlacamnak in tuahsak.

Kum reinawn hnu ah ka tufa , Ngun Hre te ( Livai nu le pa) pawl thawn kan tong aw sal ih Pathian ka thangqhat. Kan tufa pawl khal an lung a awizet. Pathian hnen lungawi thusimnak ah tiah. Kel in thah. Sungkhat hrekkhat an sawm ih kan nuam zet. Pa Hre le a rual, Nguna timi Cekan khua mi in rawl an suang. Kelsa suan an thiam zet. A thaw nasa. Keimah in lungawi thu ka sim. Pa Hre khal in thlacam duhmi pawl a sim ve. Thla ka cam sak hai. Na Than pa in thlawsuahnak a pe. Aug. 14 Sat. Thawhhlam cu Chin Brother ah hmang khawm ding in Roda pa in in sawm. Plaqa le lakphak kan cah. In petu cu Ngun Za Bor timi Chuncung Pastor pai fanu a si. In thei zet. Mawite pa tla a thei sinsin. Keimah in ka lo do ding a ti. Roda pa a luat. A reihlan ah Pa Quan le a nufa pawl an thleng lala. Roda pa thawn nel aw zet an si. Rinlopi ih tong aw an si. An lung a awi veve. Hmunkhat ah kan zuk khawm. Zanriah cu Piangte in in do.

Aug. 14 Sat.Zankhawm cu ICBC nubu khawmnak ah thu ka sim. Inn ah kan khawm. Zingzing pa in Chairman a quan. Innteek te cu Zophei lam mi an si. Himi vengah an khawlam mi inn 30 lai an um. Khawkhat an si ko. An inn dunglam hmuan sungah hanghnah hangrah tampi an cing. Khawm a suak mi cu minung 30 luan hrawng an si ding. Thlakhat veikhat nubu khawm an nei qheu. Khawmqiak ah Sabuti in do. Laitlang hmuah ka ngai thluh.

Aug. 15 Sunday. Chin Evangelical Baptist Church.

Kan Program vekin caan kan hmang thei ih Pathian ka thangqhat. Zing khawm cu Matupi unau pawl hnenah caan ka hmang. Minung an tam ve ko. Zanlam cu CEBC ah caan ka hmang. An Pastor cu Rev. Thawng Ling, ( Biakku pa) a si. An biakinn ah minung an tlem tuklo. A khawm mi hi 400 hrawng an si men ding. An member cu 700 luan an si. Pathian thuthangqha phuannak caan qha ka ngah ruangah ka lung a awi tuk. Pathian ka thangqhat. Pathian qhatzia phuang in, tetti ka khan. Khawmqiak in Pu Za Peng in in thlah. An inn kan lut. Rawl in do ih malte ka ei. Cuisin ka riahnak ka tupa tei innlam ah in rak thlah. Aug. 16 Mon. .. Pa Tai tei inn ah ka leng. Ka tupa Pa Tai tei inn ah ka leng ih thla ka cam sak.Rawl ka ei ta. Nu Thawng tla ka tong. Hmunkhat ah an um khawm hai.

Pa Tai thawn a inn sungah. Aug. 16 Zanlam cu Eddy ten rawl in do.

Eddyteinupathawn.

Aug. 17, Tue. Diary ka ngan . Zinglam cu lan ka siauh. Zingpit ah cun inn lenglam dai a tla. Khua a sik pam. Indianapolis an tikcu hi a thleng aw ol tuk a si hi ka ti rero. Sun ah cun ti qha lo in a sa fawn. Thaisun Kansas kan feh thlang ding. Ka tim ka tuah rero.

Kansas lam panin; 18-8-2010, 4:30 AM ah Pa Hre nupi, Hleihte, Livai nu in in qhang. Kansas City, MO.ih um Sapte tei hnen feh ding in ka tim ka tuah. Thawhhlam malte ka ei. A rei hlanah in thlahtu ding, Ginny pa ( Saya Hre Mang) a rung thleng mai. Thla ka cam hnuah Airport lam pan in kan pok. Ka feh pi ding Saya Pa Lian le Mawite pa cu midang in an thlah ve. Indianapolis Airport cu a nai te. Minute 20 hrawng cun kan thleng zik mai. Mawite pa te cu an thleng zo. A sung in kan lo hngak ding in ti. Online Air Ticket A rei hlanah kan thlengve. Kan to dingmi Vanzam. Air Tran Airway Ticket laknak ding computer umnak kan hawl. Tawkfang in kan hmu mei. Ticket petu ding minung ka hmu lo. Ziangah ti le kan Ticket cu online ih leimi a si ih, Ticket cu mahte Computer cuk ih suah ding a si. Ginny pa cun a ti qhang ruangah a hrangah a har lo. Thilri thlaisaktu Staff pakhat kan hmu. Cupa cu, kan sut. Kan rualpi an lut zo ih kan lethmat ziang tin kan tuah ding? Kan ti. Na hmin zo a si? tiah in sut Sum.. ka ti. Computer ah a vun hawl ih a hmu mai. Nan Ticket cu nan rualpi pawl in an keng zo in ti. DC tiang ka phurh ding ka thingkuangpi cu kan thlaiter. A rit zet. Pawng 50 a luan. Na kuan ding maw? in ti. Ka kuan ding ka ti. Ka thingkuang phurh man thawn, pawngluan thawn $ 64 a cem a ti. Paisa fai in ka pek. $ 4 a nawi ka nei lo ih Ginny pa in a tangka i pek sak. Ai ze.. cu lala.. I thlah sapbai ih ziangahsaw i pek sak..Paisa fang 5 ka pe sal nan a duh lo. Ka lung a awi ka ti ih a sung ah kan lut. Pawng a luan lo khal le Thingkuang phurhter hnuhnu cun pek tengteng a qul. A malbik $ 15 in $ 40 tiang an la thotho. Kawl ram ah Pawng a luan lo le kan Thingkuang phurh man in la dah lo. America Domestric Flight timi, ramsung Vanzam to cu thilri phurh ding nei hrangah cun a hlawk lo riai a si hi kan ti rero. Hivek ih thil phurh man an laknak hi a rei hrih lo an ti. An Financial buaihnu in an sungtuk ih cumi remqhatsalnak ding ih an lak mi a si in ti. Mai kutken theihmi dip phurhman cu an la lo. Kawlram vek a si.

Kan rualpi pawl cu lakphak an rak in rero.. In thlahtu nau le pawl tla an um lai. Tawkfang in kan zuan ding caan 6:30 AM a kim zik mai. Gate ah kan lut. Gate cu a hla lem lo. Kan thleng mai. Ceknak kan thleng. Kan Ticket an cek. Kan Passport in cek. Cumi hnuah kan lut. Kan kut ken mi zaal, kan taikhap, kan kedam tiangin in hlitter ih Computer ih zoh dingin kan thunlut. Kan minung khal felten in cek. Kan thilri a ra suakmi kan hngak. Kan BWA zaal lak ka hngilh. Mi thil in kuatmi tamnawn ka khai liailiai. Cui pawl cu cetsungah an thun ih a suak ding kan hngak rero. Midang ih in kuatmi thilri pawl dip 2 lai a ra suak. Ka khai lohli. Ka rualpi pawl ka cuan. Saya Pa Lian le Mawite pa an rak feh zo. Anmah man ding in ka dawi hai. Ka thilri hnuk phah in, Kansas khua fehnak vanzam sangka lam panin kan feh. Tawkfang ke in kan feh hnu ah kan luhnak ding Gate kan thleng. Luh a cu hrih lo ih kan to sung. Ka BWA zaal a um lo ti ka vun mang lohli. Gate hngaktu mirang pa ka sim. Telephone setnak ding number i pek. Phone ka set lohli. America ramsung vanzam ih phurhmi bag pawl a kimlo mi zingzoitu zungpi , Headquarter, hmun a thleng. Khui tawk Airport ah na um ? tiah in sut. Indianapolis Airport tiah ka sim. Aw Number ka lo pe ding in ti. Indianapolis Airport number in pek. In pekmi number ah phone ka set sal. Aw.. Na thil kan lo hawlsak ding, rak kai hrih in ti. Tawkfang in ka BWA zaal himten a um a si tiah in than. Cumi ka zaal cu Gynny pa ( Saya Hre Mang) in in laksak ih, Maryland ah in kuat sal pan lo maw. America pawl cu an fel lawlaw a si hi ka ti rero.

A rei hlanah Vanzam sung kan lut ih mai tonak ciar kan hawl. Keicu Sangka te kiang ka ngah ih a tizia zet. Tawkfang in Kansas City lam pan in kan zuang. Sangka te in khua ka cuan phahphah. Kan thuailam khua le ram mawi zetzet ka cuan vivo. Ka Cemara ka phawrh ih ka zuk rero. Atlanta ah malte cawl phah ding kan si. Atlanta le Indianapoli cu nazi 2 hrawng a rei ding an ti. Vanzam parah rawl in pe lo. Hmuk malte le, thingtheiti lawng in pe. Kawlram Kalemyo kan tlun hman an bang ual lo tiah kan phun rero. Kawlram Air Bagan sung in pekmi a tam deuh. Atlanta ah malte kan cawl. Kan Vanzam an thleng. Asinan Air Transit thotho cu a si. Cuisin Kansas City lam pan in kan zam. Nazi 1 lenglo lai kan zam hnuah Kansas City cu damten kan thleng ih Pathian kan thengqhat. Airport ih in hmuaktu ding ah Sapte in an rualpa Robin ka thlah ding tiah in sim. Robin cu mirang a si ih khansangpi a si ding. A kut ah Sum timi cangan mi a keng ding a ti. A rei hlanah cupa cu Sum timi ka hmin nganmi keng phah in a runglut. Amah cu Holand ram mi a si. Missionary hnanquan a si ve. Mawqaw tumpi a rak keng ih a remcang zet. Kan thilri a tlem thluh. Sapte tei inn lam pan in kan feh. Lam zinah minute 30 lenglo lai kan rei. International House Of Parayer(IHOP)

Sapte te thawn an thlacamnak Hall, IHOP hmaiah. Minute 30 hrawng kan feh hnu ah Sapte tei thlacamnak hmun International House Of Prayer ( IHOP) hmun cu kan thleng. IHOP hmai an tualrawn kaupi cu Mawqaw a khat liailiai. Lenglam ah Sapte a rak ding. Mawqaw in kan qum. Kan cibai aw. Kan zuk aw. A kiangkap ih Mawtaw hizat hi zo pawl an si? tiah kan sut. Thlacam duh ah hmuntin in a ra mi pawl an si a ti. Tawkfang a rei in a sungah kan lut dingih nan thei mai ding in ti.An thlacamnak khan cu kan vunglut. Minung an tam zet. Hla an sak, thla an cam. Bible an siar. Pathian misa tampi ka hmu ih ka lung a kim zet.

Tawkfang kan to ih, Sapte Pasal Daniel Lim a rung. A man lo zet nan, kanmah ton duh le rawl hmunkhat ih ei duh ah a run venak a si. Cucun kan tho ih thlacamnak khaan in kan suak. Thaisun sunvu nan um pam ding.. in ti. Khaan dang ah in luhpi. Daniel Lim (Excutive Director) ih tonak tla kan hmuphah.Cuisin lengah kan suak ih rawleinak hmun lam pan in Mawqaw in in phur. Suncaw kan einak ding hmun cu a hla lo. Tuluk dawr a si. Samuel pa cu meeting nei ding qepqep a si ruangah reipi rawldawr ah kan um man lo. Samuel pa hi Pathian hnaquan lawng si lo in a mah hrimhrim hi miqha, mi zawnruat thiam, mi tlawmngai, sungkhat duhdaw thiam zet mi a si. Hitluk man lo cingten kan mah tong ding le rawl eipi ding ih a run hi porhtlak ngaingai a si. Pathian mi ( Man of God) a sinak a mithmai ah a lang nasa. Rawl kan ei thluh veten kan suak sal mai. Sapte in Mawqaw a mawng ih an inn lam pan in in phur. An inn cu tlangpar vek nawn ah a um. A cuang nasa. A tum remrem. A mawizet. Hrampi hmuan kaupi an nei. An kiangte ah Kansas City Governor tla a um tiah in sim. An nai aw te. Hrampi hmuan kauzet nei hlir an si. An in sung kan lut. Inn thuai khaan ah an mikhual Robin tei sungkua an riak lai. In tek tei cu a laifang khaan ah an riak. Kan nih cu a tlunta bik khaan ah in riakter. Ihnak khaan tampi an nei. Himi hmun tiang lam in hruaitu Pathian hmin kan thangqhat.Cawl huahhi in kan it men ding kan ti nan, thuhla phunphun kan rel rero ih, kan ihhmuh hmuah a qha sal. Thlacamnak nei ta tahrat in thu kan rel rero men. Zanriah khawhhnu khalah an zaute ah tophah in thu kan rel sal lala. An zaute ih khatlam hla nawn an hmuan leng cu thingrulpi a si. Sakhi tla an um tiah in sim. Cui Sakhi cu an ngam zet. Lailam bang in zohman in an kap lo. A kah khal an siang lo. An tlang men ti a si. Zan 12 PM ah kan it. Zinglam thawhhlam kan ei thluh hnu in IHOP kan feh. Thlacamtu minung an tam zet. Pulpit par in hlasakthiam pawl in music thawn hla an sak. Thlacamnak khaan ih mipi pawl cu, a hrek in thla an cam, a hrek in Bible an siar rero, a hrek in an hlasak mi phur zet in an bawm . Cuticun thlacamnak Hallpi sung cu mah duhduh ih um theih a si. Kei cu daiten ka to ih thla ka cam. IHOP thuhla pawl tla ka siar phah. Misty Edward an timi nu tla cu America ramsung ih hlasakthiam hminthang pakhat a si. Pupit parah hla a sak rero. A hlasak zo mi tape khui tla tampi a zuar zo ih millionair a si zo an ti. Pathian hnenah pumpe aw in hla a ra sak ve. Nazi 2 sunglai hla a sak. Reideuh hla a sak in a aw a qha sinsin. Kannih si seh la reideuh hla kan sak cun kan aw a pit mai ding nan, anih cu aw pit ti a nei lo. A hlasak thiamdan le a aw qhatdan cu mangbangza a si. Tufangah amah cu Cancer natnak a nei ti a si. Operation an tuah. Asinan kum reipi cu a dam lo ding an ti. Hivek natnak a nei ti an thei ko nan, tlangval tampi in an nupi dingah an dil nan, a duh lo tiah Sapte in in sim. Hitivek America rampum huap ih hlasak hminthang pawl tla himi IHOP ah ra tahrat in Pathian hna an ra quan. Anih cu lakkha cu an pe lo. Ziangahtile milian tukzo a si ruangah paisa a qul nawn lo. Asinan, hla a sak ding caan ah cun IHOP riahbuk ah a riak qheu tiah in sim. International House Of Prayer ( IHOP) IHOP timi cu, Mike Bickle in kum 1999 ah a rak din mi a si. An din pek ah cun a cangvaitu hi minung 200 lai an si ti a si. Kum 2002 ah Rev. Danial Lim, Sapte ih pasal, hi IHOP hi CEO timi, hotu dinhmun in nasa zet in a bawm ih, Pathian in nasa zet in thlawsuahnak a pek. Tuah cun, Full time staff , hman hi minung 500 lenglo lai an kim zo an ti. Khawm a suaktu, thlacam in

hmunkip in a ra mi hi nikhat ah a zaza a thawngthawng in an kim. Thlacamnak lawng si lo in, Bible tlawng tla an phuan. Bible tlawngta minung 1000 lai an kai rero. Mino tamzet Pathian lam ah an kai hruai sal. Himi hmun ih a ra thlengtu pawl hi America hmun dangdang in an si. A beidongmi ruahsanak a nei nawn lo mi mino tampi an tel. A hrek cu nunau qha lo a zuar aw pawl an ti mi tla an si. A hrek cu nu le pa nei lo, nu le pa ih hlonta mi, ka nu ka pa zo an si ti thei lo mino tampi tla an tel. Cuvek mi harsa beidong mi tampi in Pathian an hmu ih beiseinak, ruahsannak tumpi an ngah sal. Nuntharnak an co sal. Himi thu a theitu America ram sung um nu le pa hrekkhat pawl khal in an fa le pawl Pathian thawn an naihdeuh theinak dingah tiah himi IHOP ah an thlah rero tin Sapte in in sim. A zan cu Awakenning zan an ti ih an khawmnak hmun ah cun kan feh. Tuandeuh ih kan feh lo le tonak kan co lo ding ti a si. Nazi 6 PM in kan pok. A hmun kan thlen ah cun minung an rak khat thluh zik ngaingai. Tonak ngah a har zet. A khawmmi ka kiangkap pawl ka zoh tikah mino hlir deuh an si. Tlawngta an tam zet. Phur zet in Pathian an thangqhat. Thla an cam. Khawmsuaktu minung cu a thawng lai an kim men ding ka zum. Zan Nazi 12 tiang tla an khawm qheu ti a si. Kannih cu tuandeuh ah kan tin.. America ramsung ah hivek mino tampi in Pathian an duhdawt ih an thangqhat ka hmuh tiakah ka lung a awi tuk. A hleice in Sapte ih pasal Daniel Lim, Malaysia Baptist Pastor rori in America ramsung ah hivek in missionary hna an quan thei hi ka hmuh tikah Pathian thangqhat lo in ka um thei lo. Mirang pawl lak ih Pathian hna quantu dingah kan Asia mi Pathian in in hmang ngaingai a si hi tin ka thei sinsin. Amah Rev. Daniel Lim khal in hitin in sim. IHOP hmun a ra thlengtu mi tampi in IHOP kai hruaitu lu le ban cu, mirang lawng an si ding tin an ruat qheu. Asinan keimah Asia pa in hmuh tikah an amang a bang nawn a ti. A mai lut hlanah minung 200 lai lawng an si qheu nan, tuah cun Pathian in a hmang ih minung a thawng an kim thlang. Hitivek an hnaquannak parah Pathian in lam hruai in kilveng vivo hram haiseh tiah thla ka cam. IHOP hnaquannak ih an tumtah mi an Vision cu; Bawi Khrih ah pumkhat kan si ti thei in, Pathian ih Thupek le Thukham thlun ding. Pathian duhdawt hmaisa ih kan inn hnen khal duhdawt ding ti a si. To work in relationship with the larger Body of Christ to serve the Great Commission, as we seek to walk out the two Great Commandments to love God and People. Himi an tumtah kan zoh tikah kan taksa lam harsatnak poimawhnak khal an thupi ter ve ti a lang. Cuiruangah, Children Justice Initiative timi nauhak parih dingthluk lairelnak a umtheinak ding ah nasazet in an zuam pi. Zung ah an fehpi ih Sihni pawl in an thu an simsak. Thlacam lawng silo in, himi IHOP in program dangdang khal a nei ve ti ka sim duhmi asi. Himi IHOP cu Pawl tinkim ih dinmi a si. Zo pawl ti a um lo. An Founder pa cu Methodist a si. Sapte pasal Daniel cu Baptist Pastor a si. Cutivek in an hnaquantu midang pawl khal Pawl tinkim in a ra mi an si tiah in sim. Pathian in a ram kauhnak dingah hmang vivo hram haiseh.

Pa Khup le a motor July 20 Firday, Zinglam Nazi 9 ah Kansas timi khua ih um Pa Khup in in rung hruai. Amah cu Saya Pa Lian tei Church El-Bethel Baptist Church member a si dah. Kalemyo kan hung tlawn tinten, Pator pawl parah duhdawtnak thawn in rak tuamhlawmtu, Airport sung rori in in rak hmuak ringringtu a si. Tu cu Kansas ah a nufa pawl thawn a um ve zo. An umnak cu kan umnak in nazi pakhat lai lawng a rei ti a si. A Mawqaw sungah kan lut. A Mawqaw thu malte in sim. Himi ka Mawqaw hi, RCM Refugees hnaquan pawl in laksawng ah in qhen mi a si. Ka rualpi pawl in an zum thei lo. An mang a bang nasa. Kei khal ka mang a bang zet. Pathian ka thangqhat a ti. US $ 7000 man lai a si. Pathian a qha kan ti. Sapte tei inn in kan suak veten a GPS timi cu a bun ve. GPS in kan fehnak thu a than vivo. GPS ( Global Position System) timi cu, vantlun (Satellites) ih sin an run control mi, an kilkhawi mi a si. Kan fehnak zin khuitawk a si ti a sim vivo. Hloh a theih lo. Aw..minung thiamnak himi GPS hman in Mawqaw pakhat te a hmu ih a control, a fehnak a thei a si ah cun, ziangtin saw, Pathian ih hmuihmel keng ih tuahmi kannih a minung pawl in theih lo ding..tin thu ka ruat phah rero. Pathian in ka umnak a thei ti ka fiang sinsin. Ka harsat caan khal i hmu, i thei. Cuiruangah phan ding zianghman a um lo. Ka hlo ve lo ding.GPS ka zohphah, Pathian ih in hmuhtheidan ding thu ruat phah in Pa Khup tei inn lam kan pan vivo. Nazi pakhat hrawng kan rei hnuah Pa Khup tei inn kan thleng zik. Pa Khup in a phone in Laimi unau pawl hnenah thu a than cia hai. Kan thleng zikte thlang. Kan inn ah rak suak khawm thlang uh a ti.

PaKhupteiinnsungah

Tawkfang a rei cun an apartment inn cu kan thleng mai. Laimi nau le pawl hrekkhat in a leng in in rak hngak. Pa Khup tei inn ah cun kan lut. Falam Baptist Church a rak bawmdahtu nau le pawl thawn kan tong aw. Cumi pawl cu; 1. Tluang Kip Thang ( Tashon) 2. Cung Nawl Thang ( aal) 3. Hram Nawl ( Mang Kheng) 4. Thang Hre Lian (Falam) 5. San Tawng ( Thlanrawn) 6. Thawm Lian Thang ( Qiahdai) 7. Pa Khup ( Inn tek pa) 8. Ca Zam ( Tlauhmun) .. pawl an si. Rev. Zulte in Falam Church hrangah in rak bawm a ti qheu mi cu anmah hi an si. Tawkfang a rei in an inn kiangkap ih ummi Laimi pawl tla an ra suak ih kan kut kan kai aw cio hai. Khawdangdang ihsin a ra ve mi an si. A hrek cu Thlantlang peng, a hrek cu Hakha Cawbuk lam mi tla an tel. Van Cung pa timi cu Aive khuami a si. Cuisin thlacam khawmnak kan tuah. Saya Pa Lian. Mawite pa le keimah in thu tawi simnak le forhfialnak kan nei cio. Kan khawm qheh in mi hrek cu hnaquan ah an feh sal. Khawm kan qiak hnu in Pa Khup ( Luaite pa) thawn thuhla a phunphun kan rel khawm. Himi Kansa ah hin Laimi 100 hrawng cu a mal bik kan um ding a ti. A thuailam ih ka nganmi Church pawl tla a um. 1.Chin Evangeligal Church ( Nunu Kap Pasal Saya Chan Cung Mang in a hruai.) 2. Myanmar Christian Church. Saya Run Tho ( Falam) . Kawlqong an hmang.

3. Zotung Christian Church 4. Zo, Tedim Church. Note; Pa Khup tei in kan Falam mi pawl hruai in Baptist Church din thei sehla tiah saduh kan that. Tuah cun minung kan maltuk ih kan din thei hrih lo a si hi a ti. Anmah cu CEC ah an khawm ve. Tawkfang in rawldawr ah in hruai ih thaithawh kan ei. Vokthahnak Company Pa Khup in an Vokthahnak Company thu in sim. USA ramsungah Vokthahnak company cu 7 a um ti a si. Voksa cu; Japan ah 65% ah an kuat. Korea, Taiwan, Thai..ah 35% an kuat. A tangmi 7% cu America ah ramsung ah an ei. Kansas ih Vokthahnak Company, Pa Khup ih quanak ah, nikhat ah Vok 24000 an that ringring. Lailam bang ih ngek curco ih vuak that a si lo.A zak ih dawt ciamco tla a um lo. Cet in an thah thluh men. An thahmi Vok pawl cu Cetpi in a kuat zutzo mei. Hnaquantu minung pawl ih an hnaquan mi cu; - A kehlam ke a rak khit tu an um - A ek a kop maw kop lo ti ih a rak bihtu an um - A cancia mi a rak fun tu .. ti-in cet ih a run kuatmi cu a sangsang ten minung pawl in an rak quan cio. Cet ih pek zutzo mi a si tikah, zamrang zetin mah le quanvo cio qheh ding in quan a qul. An qheh lo le an Supervisor pa in ol ten a thei mai ti a si. Netabik ah Cet ih a can ciami pawl cu an fun ih hmun tinkip ah an kuat ciamco.

Pa Khup in an hnaquan thuhla in ruah ciamco hnu ah khawsungah zanriah ei ding in kan feh. Suncaw tamtuk kan ei zo ruangah rawl tampi kan ei thei nawn lo ding kan ti. Hmuk vek ei men sehla a qha sawn ding kan ti. Ham Bergger dawr ah in fehpi. Lamzin kan feh lai ah ruah a sur, qek tla a tla rero. Mak kan ti nasa. Rawl khawh in an inn kan pan ih kan thilri kan la. An veng hmuahhmuah meisa a rak siat thluh. Internet tla a ngah nawn lo. Inn sung khua a thim. An venghnen pawl in Phazawngdaing vang in in rak hmuak. America ram ih meisa siat tete..tiah mak kan ti nasa. Chicago kiang Wheton kan thlen ah veikhat a siat zo. Tu a vei hnihnak a siat kan tong lala. Kanmah in ruah le thli kan run keng a si hi tiah kan capoh aw rero. Saya Pa Lian cu riak ta mei aw tiah an kai rero. Pa Khup ih nupi Hoite timi tla cu Pa Lian ih tunu a si. Pa Lian cun, ka vanzam ticket ka la laklawh zo. Ziang ti qha ka feh ve mei ding a ti ih in thlun. A tunu Hoite cu riahsia nawn ten a um. A mithmai a nuam lo. Riahter a duh tuk ti ka thei. Can malte sung lawng kan tong aw ih an khop lo nasa tin ka thei thiam. Ziang tiqha. Ka feh ve ko pei..tiah Pa Lian in a ti ih, siang lo cingten an qhen aw.. Kansas City lam pan in Pa Khup thawn in thlah sal. Lamzin tluan ruah a tak ngaingai. Zan nazi 9:30 hrawngah Kansas City cu kan thleng. Sapte tei sangka kan lut zawng hman ah kan ciar thluh zik te, Thawng kan khum nan, a qhahnem tuk lo. Thli a hrang phah. Zamrang zet in inn sungah kan lut. Damten.. tiah kan kut hman qhaten kan zap aw man lo. Ruah sur lak ah Pa Khup tei nupa cu an kir sal. Kannih khal kan hni puan kan thleng. Sapte thawn tawkfang thu kan rel khawm. Thlacamnak kan nei taih ihnak lam kan pan sal. Tuan deuhih ih a qul. Ziangahtile kan vanzam zingten suak ding a si. Samuel pa in in thlah ding. Zinglam nazi 4:00AM ah ka lo qhang ding tiah Sapte in in tiam ta.

July 21, Sathurday. DC lam pan in. 4 :00 PM. Mawite pa in ka sangka a king. Ka tho. Ka tim ka tuah qheh veten inn thuai ka qum. Coka ah Samuel pa in thawhhlam a rak suang rero. Tawkfang in a suanmi khohsuai a hmin. Kei cu hmuk le lakphak malte ka in. Ka ril a rawng hrih lo. A zingtuk ih ka ka a thaw lo. Mawite pa le Saya Pa Lian cu an qhua nasa. Kan thilri a mawqaw ah kan san. A tlem thluh. Airport lam pan in kan feh. Peng 30 lai a hla ding ti a si. Minute 30 lai kan rei. Kan thilri kan luhpi. Kan Ticket Computer ah kan hawl. Kan hmu. Handbag 2 ka nei. $ 40 na kuan a qul ti a si. $ 40 ka pek hnu ah ka Ticket cu kan print thei. Ceknak kan thleng. Ka hmaiphiahnak, ka hmaihnih pawl le ka sahriak pawl an duh lo. An lak thluh. Indianapolis um Thang Thang pa ih in qhen mi samthih, India tuah sahriak hmui vurvo tla an lak mi ah a tel. Pamhmai ka ti zet. Vanzam feh cu hitivek in mi an tibuai ringring ih a poi zet. Checking nasa tuk in in tuah qheu ih a nuam lo. Mawqaw, Bus ih feh a nuam sawn men in ka thei. Vanzam sung kan lut. A caan an khiah zo mi vekin Atlanta lam pan in kan zuang. Tawkfang ah Atlanta Airport ah kan qum sal. Malte kan cawl. DC ih in rak hmuaktu ding Rev. Duh Kam malte ka hun phone ta. Kan thlen ding tikcu ka hun than sal. Airport in ka lo hmuak ding in ti. Zalam Nazi 2 :30 PM ah Baltimore Airport kan thleng. Rev. Duh Kam, Rev. Rolind Van Bik le Pu Lal Nei Mang ih fapa, Cungte in in rak hmuak fingfing. Kei cu Rev. Duh Kam in i phur. Pa Lian cu Cungte in a phur. Mawite pa cu Rev. Rolind Van Bik in a phur. Kei le Rev. Duh Kam ( Van Bawi Lian pa) cu an kawhhran nauhak thlacamsaknak hmun ah kan feh. Thlanrawn mi Pu Hram Cin fapa tei inn, Mercy nu le pa tei inn ah kan cawl ta. A caan a kim tikah naute thlacamnak inn ah kan feh. Naute hmin cu Calvin an ti. Thla 2 lawng a si lai. Thau khua mi an si. Himi kiangah Thau khua an tam nawn tin ka thei. Pastor pa in Pathian thu a sim. Kei in thla ka cam sak. Khawm kan qheh hnu ah zanriah in do ta. Minung an tam pam. An inn kan khat thluh. Himi inn in Ami thawn telephone in kan be aw ta. Thlanrawn ih kan naupa in in set sak. Kawlqong in kan be aw. Tawkfang in Nubu khawmnak hmun, Baltimore ah kan feh sal. Nubu khawmnak ah Pa le tla tampi an tel ve. Sayamah Sui Hliang in thu a sim. Khawm qiak in, kan tunu Zing Zing tei inn ah kan lut phah. Rawl an rak ei lai. Kan to man lo. Kan tlan sal mai. An inn cu kan khawmnak hmun thawn a nai te, ke ih feh theih a si. Cuisin Rev. Duh Kam inn umnak Frederick lam pan in kan feh. Nazi 10:00 PM hrawng ah an inn kan thleng. Ka khawlh awk thluh hnuah, ihnak khan in pekmi ah nuam zet in ka it. Rev. Duh Kam nupi cu Nu Ci ti a si ih, kan theih dahmi a rak si. Amah khal in in thei tuk ve.

22/7/10 Sunday Zanlam Nazi 3:00 PM, Chin Baptist Mision Church ah.

CBMC an khawmnak cu Luther Rice Memorial Baptist Church an ti ih, mirang Baptist khawmnak a si. Thlakhat ah $ 1200 in kan sang an ti. Anmah te biakinn nei thei dingin thla an cam lai fang a si. DC kiangkap cu inn hmun man a khung tuk ih a harko tiah an pastor Rev. Duh Kam ( Van Bawi Lian pa) in in sim. Nazi 3: 00 PM a kim hlanah Biakinn kan thleng. Rualpi hlun pawl tla ka tong sal hai. Rolind pawl tla an Kawhhran upa an si lai. Kan ton awk sal cu a lung a awi zet ve. Caan a kim in Pupit parah kan kai. Khawm suakmi minung 200 hrawng an si ding tin ka ruat. Kan Pathian qhatzia tetti ka khan sal. Nazi 5 :30 ah khawm kan qheh. Khawm qiak veten rualpi hrekkhat pawl thawn kan zuk aw. Bawi Cung nau Pa Kep tla a rak khawm ve. Pu Van Ling in a Mawqaw in in phur ih kan tlung. Pastor tei inn ih ka thilri kan la phah. Pu Van Ling tei an inn ah zanriah in do. Cuisin U Luai tei inn ah in thlah ih ka riak. U Luai cu amah kelte a si lai. A tar hrih lo. Amos nu khal a mah kelte a si. Hlan ih ka rak riahnak khan ah ka it sal.

July 23 Monday U Ling le Cungte nu in an inn riak dingah in hruai sal. Cuticun sungkhat inn ah cer dualdo dingin ka pok lala. Cungte nu tei inn kan thleng. Cungte le Siangte tla an rak tlangval in an rak fala zet zo. Laiqong an thiam nasa lai. In hngilh riai lo. Pu le duhdawt an thiam zet. Cungte cu High School a ong zo. Kan lam cun phun 12 a si. Senior an ti. Tu hi College kai a tum rero. Computer Networking zir a tum. Hniangte cu High School phun 10 a kai rero. Certe tla a rak um. Kan tong aw thei sal ih Pathian kan thangqhat. Thu kan rel khawm. Kan thurel le kan qong tla a cem thei lo. A zan cu keimah hmuaknak ah tiah, Hotel ah rawl in do. Mirang rawl a si. An sungza in Restaurent ah kan feh. Japan Rawldawr.

July 24, Tue. LBC Church upa pawl in zanriah kan ei khawm ding in ti. Rawl in donak ding hmun lam ah in hruai. Baltimore ah a si ding in ti. Tawkfang ah an dawr cu kan thleng. Japan rawldawr a si. A neitu cu Laimi LBC Secretary, Pu Thawng Za Lian ti a si. Mak ka ti nasa. A dawr hmin cu Nichi Beichi Kai ti a si. Tonak in pe. Kan hmaiah rawlsuannak thir phengpi phah aw demdem a um. Lai nu te a ra. Lai qong in ziang nan cah ding tiah in sut. Nangmah in a qha na timi kha si ko seh tiah Van Biak pa, Rev. Rolind Van Bik in a ti. Aw.. a ti. Rawl thlen hlanah ei ding qukqak tampi an rak keng. Salat tla in pe ih a thaw zet. Octopus an timi ngasa kio tla in pe sung. Lakphak tisen ( Zii-nui-kyan) thawn kan in sung rero men. Tawkfang in Rawlsuang tupa, an Chef cu kan hmai a ra thleng. A bizu, cabuai a rak hnuk runro. A sungah suan ding mi tampi a ret. Arti a lak. A darhai in a khirh. A tlak hlan ah a vuak kuai. A rang taktak. Ziangtin a vuak kuai man ti hmuh man ding a si lo. A rang lawlaw. A kut hawi dan, a Arti khirh dan mangbang zet in kan zoh. Cun Buh a lawk. Kan hmai ah a kio curco. Voksa, arsa, ngasa kio ding a phunphun a lak ih, kan hmai ih an rawlsuannak, thirpheng demdem parah cun a bur.. Khasuan rang tumnawn.. phelcia a

ret. Asungah siti a si hmang ..a paih..a ur ih zian nawk bang in a kang puppi.. Kan hmaiah meisa a hliau vutvo. Tawkfang in a mit mai. Hmeh a thlah. A cawk..A kut cangvaih dan, a randan, a mak..Mitqhep lo in kan zoh cuahco.Japan rawl suan dan a si an ti.An Chef cu, Vietnam mi a si. tin in sim.( Dalas lam ah, hivek Chef hi Laimi 10 lai an um ve ti a si) A rawl suan a qheh thluh in kan pakan cio ah a burh thluh. Kan pakan cu a khat liailiai. Kei cu ka ei cawk lo. Hivek rawl hi a man a khung cuang an ti. Rawl cu a bangrep nan, hmai rori ih suan ciamco a si tikah cumi cun a man a khun ternak a si an ti. Mirang pawl in an duh zet. Kan kiangkap cu mirang an khat vialvial. Laimi pawl in himi dawr an pan tuk lo. Ziang ah ti le a man a khung tuk deuh tiah in sim. Minung pakhat rawl eiman cu, $ 30 tluk lai a si qheu ti a si. Himi dawr neitu cu Thawng Za Lian ( A Bik pa) an ti. America a thlennak hi Kum 1998 a si. Amah cu kum note a si. Lai Baptist Church ih an Secretary a si. Pathian lam ih pumpe aw zet a si. Himi dawr hi Japan pawl hnen ta US $ 500,000 in a leimi a si tiah in sim. A neitu te cu an tar thlang ruangah an kil khawi thei nawn lo ti a si. Dawr dang khal tampi an nei. An fa le pawl in an kil men tiah in sim. Himi dawrneitu te hi an umhar caan ah cun in ra leng qheu tiah A Bik pa in in sim. Rawl khawh veten, an inn ah thlacamnak kan nei ta. Laitlang ihsin an pu le an pi tla an rak thleng ve. An thlennak a rei zet ve zo. Suisui nu le pa an ti ih ka theihthiam zet mi an rak si. Apple Hmuan 25/8/10 Apple hmuan kan zoh. Khuanga in Thur Mont khua ih hmuan ah in fehpi. Saya Pa Lian le U Ling thawn 4 kan si. Apple le Mekei tivek an cinnak hmuan a si. An Apple cu a rah nasa. A bawr in a bawr. Mekei cu an reh zo. Laitlang ah cin theih an si ve ko lo ding maw kan ti rero. Apple hang rialnak cet tla a um.

Kan kirlam ah, Hrang Bik le Pa Siang ih thlan kan hal phah. America ah kan tufa pawl an rak phum aw rero zo a si hiteh. America ram khal thihnak in luat a theih cuang lo ee Pathian kan theih a qul tuk. Pathian lo cu nunsantlak ziang hman a um lo. America ram nomnak, lennak le ropitnak an Super power sinak khalin mi a run thei cuang lo a si hiteh. Thihnak ram, sualnak ram a si thotho. Zanriah cu Pu Aye Maung ( Maungpa) te in in do. Mawite pa thawn. Khuitawk khal ah Laimi unau pawl an rak thleng thluh ih a mak lawlaw. Pathian ih Laimi parih a khawkhan nak hi mangbangza a si ko. An umnak cio ah Pathian ram karhtertu si hram haiseh tiah thla kan cam. Aug. 26 2010 Frederick, U Ling tei inn.

U Ling tei sungkua thawn. U Ling thawn sungkhat inn ah kan leng. Mite pa tei inn kan thleng. Mite pa cu an fapa upa deuh San Uu ih fapa te Van Dam Za, kumkhat luan deuh a um rero. An inn luanglu, ( Khawngmuu) tla Spanish pawl an sang ih an rem ter rero. $ 7000 kan pe ding tiah Mite pa in in sim. Hitivek inn remsal ding ah thuneitu pawl hnen ih permit lak tengteng a qul. Inn sii tla mah duhduh ih a rawng (colour) thleng a theih lo. America daan cu a fek ngaingai tiah in sim. An inn cu a tum zet. An leimi a si. Nuam teten a man an kuan rero. Cucu hilam daan a si ko. Rockys New York Pizza & Italian Restaurant Tawkfang kan len hnuah Mang Bawi Lian nu ( Pu Mang Bur ih nupi) ih dawr lam pan in kan feh lala. Kum 2007 ah himi Italian Rawldawr hi mirang pawl hnen ta $ 200,000 in Mang Bawi nu in a leimi a si. Inn sanman ah thlakhat $3500 a pe ringring. Hnaquantu minung 4 ( Fulltime) a nei. A langten quantu (partime) 2 a nei. Saya Lan Thuan ih naunu Sui Par tla himi dawr ah a quan ve. Mirang hnaquan tla a nei. Himi dawr tuah thei dingin cozah hnenah Licence lakta a qul. Licence nei thei ding ih Dawrtuah thei an si maw si lo timi camibuai on ta a qul. Hitivek rawl pawl a suang thiam ngaingai maw timi nasa zet in an sut hnuah camibuai an ong a si le licence pek a si. Mang Bawi nu cu himi Italian rawlsuan daan a thiam zet zo ruang ah camibuai olten a ong mai. Cuticun Licence an pek ih rawl dawr a tuah theinak a si. Ziangtin saw himi rawlsuandan na thiam

ti ah ka sut. Ka zir ve in ti. Hivek dawr ah kum rei nawn hnaquan ih zirta a qul. Mang Bawi nu cu hi tivek hi a thiam zawng a si. Mi zaran ih thiam thei mi cu a si lo. Mang Bawi nu hi thil thiam zet pawl a si. Thildang kutzung thiamnak lam khal a phunphun a thiam tiah U Ling in in sim bet. An dawr cu; Monday in Thursday tiang 11 Am 10 PM Friday 11 am -11 p.m Sunday Noon -9p.m an ong. www.rockysnyp.com ah zoh a theih. Phone cu 301-698-0181 a si. A rawl pawl cu mirang rawl deuh a si ruang ah a eitu pawl khal mirang an tam. A kiangkap ih zungkai pawl in an ei tam bik.

Mang Bawi nu thawn a dawr hmaiah. An dawr kiangah Cozah zung innpi a um. Ralkap pawl ih cancer research an tuahnak hmunpi a si. Cozah hnaquan minung 4000 hrawng an um tiah in sim. Laimi hrekkhat khal himi cozah zungah hna quan tu an um ve tin in sim. Research tuah ti fam cu, Zinghnam tla tampi an zuat. Zinghnam zuattu ih an hmanmi Laimi an um ruri tin ka thei. Amos nu in himi hmun ah ka rak quan dah ve nan, Zinghnam ka qih tuk ih ka suak sal in ti. Himi zung ih u pa lam hnaquan ngahtu cu, Dr. Hlawn Lal fanu a si. Anih cu Computer Science ih Master Degree ngah zomi a si ih hnaquan saang a ngah thei tin ka thei. Ka sim duhmi cu himi cozah zungpi ih hnaquantu mirang pawl in suncaw an einak ah Mang Bawi nu ih dawr an hmang bik. Zanlam zungqum hnu khal ah inn ih ken ding rawl an cah qheu. Cuti a si ruangah Suncaw ei caan le Zungqum caan karlak ah cun an hnaquan an buai thei zet. Biakawknak caan a um lo ti a si. U Ling thawn an hnen kan thlen cu zanlam Nazi 3 hnu deuh a si ruang ah an man caan bik ah a cang. Thu tampi kan ruah aw thei. Rawl ei ta uh in ti nan, kan ei thei nawn lo. Lehhnu na man tik caan pohpoh ah kan dawr ah Italian rawl na ei tengteng ding tiah in cah ta. Siseh kan ti. An Rawl cu a thuailam vekin phun tampi a si; 1. Appetizers ah phun (12) 2. Salads ah phun (8) 3. Vegetables phun (5) 4. Soup phun (3)

5. In ding phun 2 6. Dessert phun 1 7. Pasta phun (15) 8. Baked Dishes phun ( 8) 9. Entrees phun (10) 10. Seafood phun ( 5) 11. New York Style Pizza phun (7) 12. Gourmet Pizza phun (7) 13. Sicilian Pizza phun (3) 14. Stromboli/Calzone phun (3) 15. Hot Submarines phun ( 8) 16. Cold Submarines phun (6) Hitluk mirang duhmi rawl phun tampi Mang Bawi nu in duhtawk a suan thiam ih a tawlrel thei ( management) hi ka mang a bang ngaingai. Zaran ih quan thei ding rual a si lo. Kan Lainu khal hi an duai ve lo a si hi ka ti. Hivek dawr neitu Laimi sung in midang an um tuk hrih lo hmang. Shushi dawr cu tampi a um ko. Shushi timi cu phun tampi a si lem lo. A zan cu U Luai tei inn ah ka riak lala. 27/8 10 ( Friday) Thawhhlam cu Amos nu in in tuah sak. Lakphak le pawnghmuk le arti kio kan ei. Cumi qheh in LBC Pastor Van Biak nu le pa tei inn ah kan leng duak. Cuisin U Ngo Nang nupi Vungbawi nu hnenah thlacam sak ding in kan feh. Vungbawi nu le pa tei thawn duhdaw aw zet cia kan si. Vungbawi pa in in feh san zo ruangah minung kan sivek in kan riah a sia zet. Asinan Vanram ah kan tong aw leh ko ding tiah ruahsannak kan nei. An inn thlenhlan ah Htwe timi Shan pasal nei tei inn ah kan lut ta. Rin lopin Pa Hram tla a rak leng ve. N. Carolina in ka rung tlawng duak in ti. Thangpi timi Taingan ih kan rualpi hlun Sizaang mi tla a rak leng ve. Rinlopin kan tong aw ih an mang a bang zet. Reipi kan to lo. Vungbawi tei in lam pan in kan tlan sal. Tawkfang in Vungbawi tei inn kan thleng. Khaipi timi a fapa te pawl thawn an um tlang. Khaipi cu, inn zuar, innlei in a pum cawm mi a si. An nung thei zet tiah Amos nu in in sim. An inn cu a tum zet. Vungbawi nu lawng a rak um. Thla ka cam sak. Ka thlacam qheh hlanah Khaipi tla a rung thleng. Khaipi cu a lung a awi zet. Tenis tla a lek lai. Tenis a thiam zet. Kawl ram a um lai tla a lek ringring. Pa Ro khui ah a um tiah in sut rero. Malaysia ah a nufa pawl thawn an um tiah ka sim. Pa Ro thawn an thei aw zet ve. An inn hmai ah kan zuk aw ih Suncaw kan einak ding hmun Lai Lian pa tei inn ah in thlah. Pa Lian le Mawite pa tla Lai Lian nu le pa in thaithawh ei in sawm. Lai Lian nu in rawl a suang rero. Tawkfang in rawl kan ei. Laisuan tla a tel. Arsa laisuan in a suang. A hangthau adang ten kheng in a ret. Tihang vek a bang. Arsa pawng mi hang vek a bang. Ka in zik nan a thau hang a si ih ka in sal lo. Antam, kawpi, tivek hanghnah pawl kio mi tampi ka ei. Laisuan ten Lai Lian nu in rawl in suan sak. thaw zet in kan ei cio. Maryland FBC Deacon pawl thawn Rawl kan khawh tawkfang cun, Maryland Falam Baptist Church Deacon pawl an thleng phahphah. Lai Lian pa tei ( U Phun Kar Thang ) inn ah tonkhawmnak, thurel khawmnak nei ding in program suai zo mi a si. A ra suaktu an Pastor le deacon pawl cu; 1. Rev. San No Thuan. Pastor 2. Pu Phun Kar Thang President 3. Pu Lal Nei Mang Secretary 4. Pu Khuah Ling Mang Tresurer 5. Pu Sui Luai . .. Member 6.

Pu Khuang Lian Mang .. Member 7. Salai Ngun Thawng . .. Assist. Tresurer 8. Pu Than Kip Luai Auditor 9. Pu Huk Luai .. Auditor . pawl an si.

FBC, Maryland, Pastor le Deacon pawl thawn. A tel thei lo Deacon; Sai Aung Aung ( Parte Pasal) le Mite pa an si. Theihthiam cia sungkhat hlir an si. Hivek in Kawhhran hruaitu dinhmun an rak lak thei ruangah Pathian ka thangqhat. ZBC kan rat sannak thuhla ZBC GS Mawite pa in a sim. Kei in ka sim bet. Pa Lian in LBA thu tla a sim. FBP thu tla kan sim. Kawl ram in mission hnaquan a qulzia kan rel khawm. Mission hnaquan an phur zet ih lungawi a um zet. Thuhla phunphun nuamzet, phurzet in kan rel hnuah Nazi 5:30 ah kan bang. Kan thurel a cem lo nan, zankhawm a um, rawl ei khawm ding ti a si fawn ih kan bang men. Kawhhran nubu Cungte nu, Ni Hniang le Zi Zi Par( Pa Quan ih tunu) in, Ni Hniang tei inn ah an suang. Laisuan ten an suang ih thaw kan ti zet.

27 Frid. Zankhawm ah Pathian thu ka sim.

Zanriah kan ei qheh veten, Zankhawmnak hmun, Pi Sui Par, Sangte ih nupi tei inn kan pan. N. Corolina in an hung cer pek te tin in sim. Parte timi cu Khuanglung khua mi an si. Minung 40 lai khawm an suak. Mino khawmzan a si an ti. Nu le pa tla tampi an khawm ve. Keimah in Mangza kan Pathian thu ka sim lala. Kan Pathian a qha. A thuphuan cawk ding a si lo. Kan hrang ih qhatnak a tuahmi zoha a rel cawk ding.. Relcawk le simcawk ding rual a si lo Saam. 106. Aye Cin nu in ka Bible simmi catlang pawl in sut sal. Midang ka hlawm ve ding a ti. Ka duh tuk a ti. Keicu thlaici vorhtu lawng ka si. Pathian in a thlaici keuhter in qhangter vivo hram seh tiah thla ka cam. Pathian thungai le rel kan paih cio. Kan khop lo. Asinan, zan cawlh a qul. Siang aw lo cingten khawm kan qiak. Mino pawl cu Saya No Kolh in hla a zirh. An rung tang hrih. Kei cu Huk Luai in an inn riak ding in i phur ih kan tlung. 2002 ih ka thlen dahnak hmun a si. An inn a kau zet. Huk Luai cu a fanu te Mawite timi thawn an um tlang. Nupi a nei hrih lo. Ihnak khan lawng an nei. Mawite pa tla a zan a riak ve. Mawite pa hi Falam Youth Director a quan lai, Mawite nu thawn an neih awk pekte ah Huk Luai tei inn ah a rak um dah. An thei thiam aw zet. An inn riak ding in an sawm ve. Kan thlen tawkfang in ka it mai.

28/8/10 (Sathurday) Zingten ka tho mai. Zanvar nuamzet in ka it thei. Huk Luai in thawhhlam in tuah sak. Pohsi a lei. Lakphak thawn kan in. A hmuan thilcin mi pawl kan zoh. Purawng tla a cing. Laitlang ih a kenmi ci a si. A rah ngaingai. An rah a tum cuang. Laitlang ah cun hitluk an tum lo. America ram a qha, a ngaihcuang tinak a si. An inn kiang cu Tute a um. Sakhi tla an hmuan ah an ra thleng qheu tiah in sim. Kawl ram phone ka set thei. Huk Luai in kan ei ding rawl a suang rero. A unau pawl tla a sawm ih, hmun khat ah rawl ei tlang ding in a cah zo. Rawl qawm aw ding an si. Nizi 11 ah rawl ei ding ti a si. Tawkfang cun unau pawl an suak. An suan mi rawl phunphun an rak keng cio. 1. Ko Ni Cem and Family 2. A Thlia tei sung

3. Pi Khit tei sung ( Vietnam pasal thawn an qhen aw zo.) An fapa te Sami thawn an ra. Laitong a thiam 4. Sen Cin tei sung. ( Kawl pasal thawn an qhen aw. Tin Cung thawn an nei aw. 5. Huk Luai le a fanu Mawite, ( Huk Luai cu nupi a nei hrih lo.) 6. Sui Dim te an ra lo.

Mawite pa in Kawltong in thla a cam hnu ah rawl kan ei khawm hliarhlo. Bufe system a si. A fa le pawl thawn kan hnih thum zet. Huk Luai tei sung in a pa ih keneh an thlun rero ih ka lung a awi zet. Sungkhat duhdaw an thiam zet. Rawl kan khawh veten, U Luai tei inn ah Tin Cung in i thlah. U Luai tei inn ka luh veten phone a ra. U Luai in phone i pek. Saya San No in a lo be duh i ti. Saya No Kolh a tlawng in a rak thleng pekte a si. U Luai te thawn an inn a nai te. Tawkfang ah ka hnenah a hung mai. Ka tim ka tuah thluh veten, No Kolh ka thlun. An inn ah ka cawl. Tim a tuah ve. Thla ka cam sak. Nupi qhitnak hmun kan feh. An khawhran member, U Luai tei khua ( Zathlir ) mi le Tlangpi mi qhi aw ding an si. Qialte le Pa Kulh an ti. Malaysia ih thei thiam aw zo mi an si. CBMC Pastor Rev. Duh Kam in kut a sih. Cumi qheh in Tuluk rawldawr kan feh ih zanriah in do. Rawl kan ei thluh hnuah Frederick tlang saya No Kolh in in kai pi. Mawite pa thawn kan thlun. Pa Lian cu a kai zo ih in thlun nawn lo. Frederick khua a lang thluh. Hmun nuam zet a si. Vankau tlang in Falam khua zoh vek, con vek a si. Cuisin zanlam nazi 8 PM ah nupi nei tei inn ah thlacamnak kan tuah. Mawite pa in thu a sim. Kei in thla ka cam. Nupi qhi tei sung cu, an pa cu Qaal khuami, Nei Iang pai farnu ih pasal ih u pa a si. Pa Hre an ti. Pa Hre ( Qaal pa) ih nupi cu Iang Ku an ti ih Tlangpi mi a si. Mo neitu pa Kulh thawn sungkhat an si. Tlangpi mi le Zathlir nu an qhi aw lala a si hi. Tlangpi le Falam karlak ah peh tlaihnak a fek sinsin ding a si hi tiah Mawite pa in thu a sim. Pa Hre tei inn ah an um khawm ding. A zan khal U Luai tei inn ah ka riak. 29/8/10 Sunday 1:00 PM, Lai Baptist Church ah

Rev.RolindVanBikthawn.

Pu Maung Tin ( Thomas pa, LBC Chairman in in sawm. An Church cu minute 30 hrawng mawqaw in kan feh hnu ah kan thleng. Lai Baptist Church an ti. An Pastor cu Rev. Rolind Van

Bik a si. Nazi 2 PM in Sunday School thok ding a si. Minute 20 sung zirnak an nei qheu. Nangmah in Sunday School khal caan na hmang ding tiah pastor pa in in sim. Na duhduh na sim thei in ti. ZBC Delegate kan ratnak thu, MCC thu le thudang dang ka sim ih minute 20 a kim mai. Peh hrih ko in ti ih malte ka peh.Laimi in kan duh mi pohpoh tuah theilo kan nei lo timi thu tla ka sim. Salurop thu in ramleng feh tiang, Khuangcawi ih sin Jubili tuah tiang Ziangzat paisa kan cem? Ka-lah- poh- zii in Dollar ziang zat ? Kan innhnen duhdawt ding timi kan Bawipa ih in fialmi ah ziang tivek in qan kan la? Ziangzat kan thawh khawm? Ziangtin kan thawh khawm ding? Na innhnen duhdaw aw timi ziangtin kan ruat? Mtt. 22: 37-40. Mtt. 25 : 34-45 ziang tin kan ruat? Dungthlun tu pawl nundaan ziang vek a si. Tirh 2: 44-47, 4:32-35 Sunday School caan cu thusuhnak, relkhawmnak phunphun thawn, nuam zet in caan kan hmang. Pathian kan thangqhat. Nizi 3:00 PM hrawng in khawm kan thok. LBC hi member 250 lai an nei. Ka theihciami sungkhat tam nawn an khawm. Laitlang vek a si lala. Pathian lam hruainak hi mangbangza a si ko. A Do in hla a hruai. Mah Par in a hlu hrang thla a cam. Pi Hlei Qial (Colin nu) in Chairman a quan. Ka rak tlanpi mi sungkhat hlir le rualpi an si. A khawmmi sungin kan tunu Zingzing tla ka hmu. Pulpit par in ka vun cuan ih ka theihthiam cia mi an tam zet. Pathian cu a qha tuk. A qhatnak in duhdawtnak, in rundamnak thu pawl relcawk ding a si lo. Bawipa cu sunglawi koseh. Amai hnenah upat sunlawihnak hmuahhmuah cu pek si ko seh. Na duh poh in caan hmang ko tiah Chairman in in ti. Nazi 5 : 00 PM hrawng ah khawm kan qheh. Thomas pa in in thlah. U Luai tei inn kan pan. Saya No Kolh in in hngak. Nupi qhitnak tei inn ah rawl ei ding kan si lala. Ka tim ka tuah. Kan feh mai. Khawmnak kan tuah, Rawl kan ei. Zan nazi 9: 00 PM hrawng ah ka tin. Pa Hre in in thlah. Mawite pa cu Lai Lian pa tei inn ah a riak. Pa Lian cu U Sui Luai , Ni Hniang tei inn ah a riak. Kei cu U Luai tei inn ah ka riak. Pa Lian le Mawite pa cu a thaisun zingten New York, Bus in feh an tum. Kei cu ka feh lo ding. New York side seeing cu ka qul nawn lem lo. Tu le tu ka feh zo ruangah hi kiangkap ummi sungkhat pawl ka tlawng sawn ding ka ti.

30/8/10 ( Monday), FBCM khawmnak ding hmun kan hawl.

Mirang Baptist Pastor zungkhan ah.

U Ling thawn an inn ah kan feh. Internet ka cek. Ca ka ngan. Tawkfang in Lai Lian pa in U Ling a ko. FBCM khawmnak Biakinn zoh a sawm. Tufang ih an khawmnak an Biakinn cu a fate deuh ih Biakinn tum deuh an hawl lai fang a si. Mawqaw retnak tla a um lo ih an harsa deuh. U Ling tei inn kiangte ah Baptist Biakinn pi a um. Cumi cu san an siang ke maw tiah an Pastor ton an tum. Kei khal U Ling cu ka thlun ve. An Biakinn pi cu kan thleng mai. A tum zet. Khaan tampi a um. U Ling tei inn in ke ih feh theihnak hmun a si. Tawkfang in an Pastor pa a ra thleng. Miqha zet a si. Siauhlua ngan dan a sim. U Ling tei inn ah kan kir sal. Saya No Kolh le Lai Lian pa in Siauhlua an ngan. Internet in an kuat mai. An Pastor pa cun ngah lonak lam cu a sim lo. Midang ka ron ta ding a ti. Thlacamsak cio uh si. Suncaw cu Mang Bawi nui dawr ah U Ling thawn kan ei. Italian rawl in do. A thawzet. Sui Par tla hna a quan rero. U Ling cu a ei thluh thei lo. Kan qheh in inn lam pan in kan tlung. Zing Zing ka phone rero nan a ngah lo. An inn feh kan tum lawk nan, kan feh sal lo. U Ling tei inn ah ka riak. Zanlam ah Zing Zing thawn Internet ah kan tong aw. An dam deuh lo ih sizung an feh. Cuiruangah ka phone theilonak a si. September 1 zan ( Wed) zan cu Zingzing tei inn riak ding in kan tiam aw ta.

31/8/10 ( Tuesday)Cungte nu in thawhhlam, Breakfast in tuah sak. Lakphak le pawnghmuk kan ei. Ca ka ngan. Internet ka cek. MCC zung hnaquan ka cem phah. Lahu Literacy thu Mark thawn ca kan kuat aw rero. Mark cu Chiangmai ah a um. Saya Noel khal in internet in ca in kuat ve. A nih cu Shan ram ah a um.Cu lawng a si lo. Hakha Text Book thu, Martin pa le Saya Khua Kam thawn kan rel khawm. Martin pa cu Norway ah a um. Saya Kam cu Rangoon ah a um. Hakha Text Book PDF in in rak kuat uh ka ti. America ramsung khal in kan zunglam hna quan ka cem phah thei thotho tinak a si. IT san ti fam cu khui tawk hmun khal in ol ten kan peh tlai aw thluh thei. Hna kan quan thei. Internet thawn hnaquan tlang a theih ringring tinak a si. 11 : 00 AM a kim mai.

Asian Supermarket ( A Thlia tei dawr)

A Thlia tei dawr zoh dingin U Ling kan feh. An inn thawn a nai te. Mawqaw thawn minute 5 hman a rei lo. An dawr kan thleng. An dawr hmin cu Asian Supermarket ti a si. Keimai daan ten ka Camera cu ka lak. U Ling, An dawr hmin lang ding in in zuk aw ka ti. U Ling cun a thiam tawkten in zuk. Ni a sa tuk deuh ih fiangdeuh in a hmu thei lo a si hmang. Rei nawn in bih. Ka tuar nawn lo ih zuk thlang mai ka ti. U Ling cun, Kha..zoh hnik he tiah Camera in pek. Ka zoh. An dawr nganmi cu a lang tuk lo. Poi hlah. Ni a sa tuk aw. Tawk thlang mai seh kan ti ih, a sung kan lut. Ko Moe Zaw timi A Thlia ih pasal kan hmu lohli mai. Kan kut kan kai aw. Kan qong thawmvang thei in, A Thlia khal a zungkhan in a ra suak. Nan Dawr zoh duh ah U Ling in in thlah si hi, ka ti. Kan dawr in rung zoh sak ih kan lung a awi tuk tiah A Thlia cun lungawi thu in sim. A Dawr sung thil pawl kan zoh. Asia ramkip ih sin a thlengmi ei-in phunphun in a khat. Tuluk ram le Thailand ram ta a tam bik ti a si. Asia pawl duhmi ei-in a kim nasa. Butlak sa tiang in an zuar. Kawl ram thil lawngte a um lo. Kan theih cio vekin America pawl in Kawl ram thilzuar an kham. Culo si sehla, Kawl ram ei-in khal a tawr ding nan.. Ziang ti qha. Hmailam ah kan thil suak pawl kan kuat thei caan a um leh hram ke cu.. Kan um sungah Japan ramin an cahmi Fangdip tla a thleng. Mawqaw tumpin an run phur.An Mawqaw par ah JFC International tin an ngan. Japannese Food Co-orperation ti a si. Japan rawl phurtu

mawqaw a si. Fangcang dip pawl cu Leeng in an dawrkhan sungah an luhpi. Kan Kawl ram bangin Kuli pawl in thlanhri baksen thawn, zaang ih phurh ciamco cu a um lo. A Thlia in a cahnak, a order nak ca thawn a kaih maw kaih lo tiah a cek. A kaih ko a ti ih hmin a qhu. Tuiqum Japan in Fangcang na cahmi cu ziangzat man hrawng ha? tiah ka sut. A cazin felten a zoh. $2776 man lawng a si a ti. Company 20 hrawng in thilri $ 35000 man thlakhat voikhat kan order qheu tiah in sim bet. Hivek order tuahtu hi A Thlia a si. A Thlia in Admin lam a kai tinak a si. A Thlia in a zungkhaan ah in luh pi. Computer thawn hna a quan rero. An zungkhaan kiangkap ka zoh. A cabuai par ah Business Development Advisory Council, Board of County Commisioners hmin in sunlawihnak Capi tla an retmi ka hmu. An phar parah , Frederick County News paper in, an dawr thu an nganmi pawl tla qhaten an ret ih midang siar thei ding in an tar. Laksawng an pek lai zuk pawl tla ka hmu. Frederick khua ih Business tuah pawl sung in hminqhatnak laksawng tla an ngah. Kan lam ih Minta (Actor) pawl Academy laksawng an pek vek nawn in an hril mi a si tin ka thei. Hitin sunlawihnak Capi an ngan; Small Emerging Business AwardIn Recognition of Your Significant contribution to industry and Society and Your Entrepreneurship in Frederick CountyBarbara A MikulskiUSA SenatorOn June 5, 2005. Ziangtin saw hivek sunlawihnak nan ngah thei? tiah ka sut. Pathian zaangfahnak le umpinak a si ko tiah A Thlia in ka thusuhmi cu in let. Na pasal in teh Pathian zaangfahnak a si ko tin a ruat ve ke maw tin ka sut lala. A Thlia cu a hni nawn.. A pasal Ko Moe Zaw a zoh. .. Ko Mo Zaw in ka sutmi cu a thei ve. A nih khal in Pathian zaangfahnak a si ko a ti ve. Pathian rinsan ten an nupa in an um ka hmuh tikah ka lung a awi sinsin. Pathian ka thangqhat. Ko Mo Zaw cu California ah Baptisma, tipilnak a lak zo. A nu le pa cu Kyihmindaing ah an um. Budhist an si. An fapa Khristian a can cu an lung a kim ko tiah in sim. America an hnenah an ra tlawng zo. America um cu an paih lo. Nutar le patar an si zo. Zo in an lo hril ih ziang tin an lo hril ti na thei maw? tiah ka sut lala. Kris nu A Thlia in ka thei lo. Kan dawr ah minung lutsuak cu an tam zet ih zo bik in hivek laksawng pe dingin a zingzoi rero ti ka thei riai lo a ti. A thupten an rak zingzoi rero cu a si hmang. A tlangpi thu in hivek laksawng hi kum 3 voikhat an pe qheu an ti. An nupa ih sim zo vekin Pathian zaangfahnak a si ko. America ram ah cun sunlawih tlak pawl an timi cu zovek ram in a ra mi an si khal le sunlawihnak an pe ringring ti a si. An ram qhangsotertu cu zo vek miphun khal an si le an duh zet ih tha an pe tinak a si. Himi dawr hi Kum 2003 February 9 ah Rev. Moses Thawng Cung thlacamnak in an rak thok mi a si. Thilri malte thawn harsa zet in an rak thok mi a si nan, tuah cun Pathian in a thlawsuah ih, Frederick County sung in laksawng ngah thei dinhmun, a hlawhtlingmi dawr ah a rung cang.

Hitivek in dawr tuah ding ih a rak forhfialtu bik a pa ( Mang Bur) tla an hngilh thei lo. Ka pa in dawr tuah ding rori in forh nasa. Amah in in forh ciamco lo sehla dawr kan tuah lo men ding tiah A Thlia in in sim. Na pa cu ruahnak kau taktak a rak nei cingcing a si cu ka ti. Sumpai lamin a rak qanpitu sungkhat unau pawl tla an hngilh thei lo. Qanrualnak an rak neih ruangah hivek dawr a can theinak a si fawn. Tufang ah nan dawr hi zuar sehla ziangzat man hrawng a si ding? tiah ka sut lala. US $ 500,000 in $1,000,000 man cu a si ding in ti. Nitin ten $ 4000 man hrawng thil an khawng . Fulltime Staff 3 an um. Part time Staff 1 an nei. Full time Staff timi sungah an nupa, Khris nu le pa, A Thlia le Ko Moe Zaw, an tel. Pakhat cu A Thlia a nu lam sungkhat Sai Lian Mang ti a si. An zungkhaan te ah thlacamnak ka nei ih U Ling thawn kan suak sal. Sangka leng tiang in rak thlah. An dawr hmai ah kan zuk aw lala. Nurshing Collage-ah

Zanlam cu Pu Lal Nei Mang ih fanu Aye Cin, Nursing Assistant Cerfiticate la ding a si ih, an laknak ding college ah tel ve ding in in sawm. 5 :00 PM hrawngah ka lo sawm ding tiah in tiam cia. U Ling tei inn ah Aye Cin pa a ra thleng mai. Tuluk rawl dawrah in fehpi hmaisa. Kan pahnih in zanriah kan ei khawm. Cuisin an inn kan feh. Lethmat lak ding tikcu zanlam Nazi 7:00 PM khel in an inn in kan pok. Mite nu tla an sawm ve. Sungkhat dang an um lo. In sawm mi cu Mite nu le keimah lawng kan si. An College kan thleng. Midang an thleng ruri zo. Aye Cin cu a rual pi pawl in an rak hmuak. An kuah aw celcel. Mirang an tam. Laimi an um lo. Thla 4 hrawng an kaimi course a si tin ka thei. Minung 42 in lethmat an la. Aye Cin cun RN (Ristered Nurse) peh thei ka zuam ding a ti. RN cu kum 4 course a si. Lethmat lak hnuah an inn ah in phur sal. Thlacamnak ka nei. Pathian hnenah lungawi thu ka sim.

Zinghnam zuatnak le Aye Cin nu

AyeCinnulesungkhatdangpawlthawn.

Aye Cin nu cu Zinghnam zuatnak ah hna a quan. Sizung lam tivek, hmun dangdang research tuahtu pawl in Zinghnam an qul zet ih Zinghnam zuat hi sipuazi tumzet pakhat a si tin ka thei. Zinghnam tampi an zuat thei le paisa tampi an ngah tinak a si.Aye Cin nu in hitin in sim. Tufang hi Pathian hnenah hitivek in phun hnih in thla ka cam a ti. Hitawk ih kan zuat rero mi Zinghnam pawl cu nungter aw. Asinan Kawlram ih lorawl siatsuah thluhtu Zinghnam pawl cu thiter thluh aw ka ti, ti a si.A si ngai lo ziang. Kannih Kawl ram Laitlang ah cun, Zinghnam ruangah mi tampi cu rawl ei ding nei lo an si ih, America Zinghnam ruang ah mitampi pum cawmawknak a si. Kan va bang aw lo ngai ve.. Pathian in na thlacamnak lo sang hramseh ka ti. Zinghnam zuat teh a har maw tiah ka sut lala. Aye Cin nu in, kei cu ka nauhak lai in Zinghnam cu ka rak duh tuk. Kan lo ah Zinghnam kua laih tla ka thiam ngaingai. An hlet khui ah a um ding ti tla olten ka thei thei. Zianghnam tampi ka kai qheu. Zinghnam qih nei pawl ka si lo ih harsatnak ka nei lo tiah in sim. Tufang ka hna quan bikmi cu Zinghnam fa hrinter a si. Zinghnam fahring thei a pinu le a pacang 250 lai ka kil khawi. Zinghnam in fate ziangzat an nei zo, a nu maw a pa timi, Zinghnam suahnak cazin pawl ka tuah ciamco, tiah a hnaquan pawl tla in sim sal ih theihnak thar ( new knowledge) ka ngah sal lala. Ka thlennak kip ah thilthar ka zir ngah vivo ih Pathian ka thangqhat. .Aw.. Aye Cin nu cu, Lai lam a um lai ah, zianghnam kua laih thiam, zianghnam tampi kaithei ringring, a sinak cu, mirang ram a thlen hnu ah, Lailamih a rak thiam mi tla mirang fimthiamnak thawn a kom khawm ih a qhathnem vekin, midang teh Lailam ih kan rak thiamnak hi hman ding kan nei ve maw? tin thuhla a phunphun i ruat ter. Zanlam Nazi 10:00 PM a luan thlang. Thaizing le Baltimore lam feh ding kan si ih U Ling tei inn ah in thlah mai uh ka ti ih, Aye Cin tei inn ah riak ta lo in a pa in in thlah sal.

Sept.1 ( Wed) U Ling tei inn ah ca ka ngan. Rev. Moses Thawng Cung ( Miaha pa) tla kan leng. Pathian thu le America ram thuhla tam nawn in sim . Bawi Jesuh ra kirsalnak ding a nai tuk zo timi thu a buaipi nasa. Zakhariah sungthu tampi a rel. A hleice in Zak. 2:8 sung ummi hi thupi zet in a la. Israel cu Pathian ih Mitfang a si zia, Israel ram a daitu pohpoh an ol lo zia thu tampi a rel. America ram a tlaksiatnak thu pawl tla tampi in sim. Cauk a siarmi pawl sung in siseh, TV ih an than mi pawl in siseh, amah ih a hmuh tonmi pawl sung in siseh in sim ciamco. Amah rori ih tuahmi CD le Pamphlet tla in qhen. Thlacamnak kan neih hnuah kan tin sal.

Sep. 2/10. (Thur)8:00 AM Baltimore lam pan in,

KantunuZingzingteiinnah.Baltimore.

Salai Ngun Thawng in in thlah. Cungte nu le pa an tel ve. Baltimore cu Frederick ihsin minute 30 hrawng feh a si. Kan tunu Zing Zing tei umnak a si. A rei hlanah an inn kan thleng. Thlacamnak kan neih hnuah Cungte nu le pa cu an kir sal. Lengah kei khal malte lan ka sioh. An veng ah Laimi tampi an um. Kiangkap ih a vak sukso mi pawl tla ka zoh. Laimi tampi ka hmu. A hrek cu Laimi an si ko ding tiah zumnak in ka biak. An si ngaingai. Pakhat cu Mara ka si a ti. Hitawk an thlennak a rei hrih lo. Lungcawipi, Thlantlang peng in a ra mi an si. Na nuam maw tiah ka sut? Nuam hlah i ti. Laitlang in an thlennak a rei hrih lo ih a mawh lem lo. Laitlang a ngai lai fang a si. Zotung Christian Church tla a um. Member 200 ziklai an um men ding tiah in sim. Baltimore cu America ramsung ih Zotung tamnak bik veng an ti. Zotung lawng si lo in Tedim lam khal an um ve. Zomi Community Christian Church timi tla a um. Mara Church khal a um ve. America ramsung ah kan Laitlang hmunkip in kan a thlengmi hi kan tam zet tinak a si. Mara le Zotung lam tiang in tampi an rak thleng ve ih ka mang a bang zet. Zotung Baptist Pastor Rev. Yan Naung tla Visa ngah ve sehla a va qha ding ve aw.. Hitawk ih a um mi Zotung kan unau pawl ziangtluk in ha an nawm ding tiah thu ka ruat rero. Mara Pastor Siama timi kan rualpa cu

kan dung naite ah hihmun a rak thleng ih Mara unau pawl hnenah Pathian thu a sim rero zo tin ka thei. Zingzing tei inn ah ka kir sal. Ti ka kholh. Zanriah kan ei. Laisuan ten Zingzing in in suan sak ih thaw zet in ka ei. An inn ah Zotung lam an sungkhat minung 2 tla an um ve. Inn man an kuan bawm ih a tizia nasa. Baltimore hi DC thawn a nai ruangah Frederick hnakin inn man a khung deuh ti a si. An inn sanman cu thlakhat ah $ 700 lai pek a qul. Ihnak khan 2 lawng a um. Frederick le Indianapolis lam ah cun hizat pek a qul lo an ti.

Sept. 3 (Frid). 9:00 PM . Thawhhlam kan ei thluh hnu in, Pa Lai ( Zingzing pasal) in Frederich ah in thlah sal. Zingzing tei nufa hnih te tla an tel ve. An fanu te cu qah a nei lo. Duh a nung zet. Pa Lai cun a hnaquanmi tla in sim phahphah. Thingthei zuarnak company ah hna a quan. Hnaquan cu a har lem lo a ti. A nufa an thlennak 4 lawng a si lai ih, Cozah bawmnak an ngah laifang a si. Ei-in ding hrangah thlakhat $350 Food Stamp an ngah. An leiter mi ei-in pawl lawng lei theih a si. Thildang lei a theih lo. Paisa khal thleng a theih lo. Bingbel vek khal lei a theih lo. Rawl liolio leinak a si tiah in sim. Ei-in lam cu an har hrih lo tinak a si. Cozah in a lak in an cawm. Tax an pekmi tangka an khirhsal. America ram ah hin kumtinten, December thlacem zawngah Tax an pekmi pawl tla sioh sal a theih tiah in sim. Kumkhat ih paisa lut a mal pawl cu hlawknak an ngah nan tamzet paisa a ngahtu pawl cun Cozah hnenah an bur sal qheu ti a si. Thuqhimnak ah Kumkhat ih $20000 hrawng ngah mi an si le, fate 2, 3 hrawng tla an neih ah cun laksawng ti phun in, $ 10,000 tiang hrawng an khirh sal. Kumkhat ih $ 40000 hrawng ngahtu pawl cu nan paisa ngah a tam pam, cozah hnenah nan pek sal a qul tiah $ 2000 tivek tla an hnuk sak lala ti a si. Hitivek ih mi neinung deuh pawl ih an bur khawm mi cu mi harsa deuh pawl hrangah siseh, anmai hrang lala siseh qhathnemnak a um sal, tin in sim. America ra thleng pek kumkhat sumpai lut mal deuh pawl hnenah laksawng an pek sal mi in mihrek cu Mawqaw tla olten an lei thei mai tiah in sim. Cucu paisa lut a malmi America thlengpek pawl hrangih an hlawknak bik pakhat a si tin ka thei. Kumtin ten laksawng tampi cu an pe sal nawn lo. Kumkhat lawng an pe ti a si. America pawl hi, Capital ram kan ti nan, a ngaingai ah cun Socialist ram pawl ih saduh an rak thah mi pawl kimtertu sawn an si lo maw? ka ti rero. Hivek ih an sumpai controldan hi cawng thei ve seh la a va qha ding ve ka ti. Pa Lai in hitin in sim bet. Kei khal December thlacem cu Tax ka sioh sal ve ding. Tui kum ka paisa lut hi $ 20,000 a kim thei a si le, ka nufa tla an thleng ve fawn ih laksawng cu malte ka ngah thei men. Asinan, fate pakhat lawng nei ka si hrih ruangah $ 10,000 tiang cu ngah ding ka zum lo tiah in sim. Laksawng tampi ngah ve hram hai seh tiah saduh ka thah sak hai. 7:00 PM. U Ling tei in ah Maryland FBC pawl zankhawmnak an nei. Saya Pa Lian in thu a sim. Saya Pa Lian thusimnak caan a co hrih lo ruangah special in an khawmpi mi a si. An thiam zet ka ti rero. Mawite pa le kei khal in forhfialnak malte veve kan nei. Kei ka forh mi cu, Tangdor ten um ding ti a si. Tirh. 2: 35, 1 Pet. 5:6. Qong ol luplo in qong mai ding a si lo zia, napin ka sim. Dungthluntu pawl tangdor ten an um ih, khawmtlang, eitlang in nuam zet in, duhdaw aw zet in an um, cu tivek ih an um tlandan a hmutu pawl in an daw tuk. Cuiruangah an pawl sung ah mi tampi an lut ciamco thu tawiten ka sim. Solo sak tla request in tuah ih Salurop ka sak. Aye Cin ih pasal Ma Ruat in tingqang in tum sak. An za an beng durdo. A zan cu Lai Lian tei inn ah ka riak.

3/9 (Frid.) 9:00 AM. Pa Lal tei in mirang thawhhlam in do. Mawite pa, Pa Lian le Lai Lian pa pawl kan si. Dawr ah kan ei. Phunkhat cio kan cah nan, a tam nasa. Kan khop zet. Mirang pawl ih an khop tawk fang ih an tuah mi a si. Suncaw cu Rev. Duh Kam in Tuluk dawrah in do sal. Kan pum a puar zet lai ih kan ei thei tuk lo. A pamhmai zet kan ti rero. Titi kan phunphun kan rel khawm. Chin Kum Thar Puai

September, 3 zan cu Falam Kumthar khualthlen zan a si. Hmun dangdang ihsin mikhual an thleng rero. 7:00 PM ah khawmnak a um. Saya San No ih khawm a hruai. Phurzet in hla tla in hruai. Inntek mino pawl in hmuahnak hlarem tla an sak. Theihthiamawknak tla in tuah. ZBC ih sin, Saya Pa Lian, Rev. Ngun Thawng Mang le keimah kan si. Kan tel thei ve ruangah lungawi thu an sim ciamco. A sunglawi kan ti cio. Pathian in tel thei dingin caan qha in pek ve ruangah kan lung a awi. Pathian kan thangqhat. Mawite pa in Pathian thusimnak a nei . Rinsantlak kan Laimi pawl ih nundaan tampi a sim. Rukru an rak um lo thu pawl tla a sim. Khawmsuaktu cu 200 hrawng kan si. Ka theihmi sungkhat tufa an tam zet. Kan FBCY mino hlun pawl tla tampi an

telve. Kan Homecell ihsin Khim Khim le Saw Saw tla ka tong sal hai ih lunglen a um nasa. Nite tei pawl tla an thleng ve. Kan zuk aw rero hai.

FBCYMemberhlunpawlthawn.USAChinKumtharpuaiah.(2010)

Zanlam nazi 9:00 PM hrawngah khawm kan bang. A zan cu Mite tei inn ah ka riak. Mite pa tei inn cu Frederick khua ih a hlat biknak lam ah an um. Minute 20 zik lai kan rei. Hmun dang um pawl cu a rei bikah minute 10 ih thlen theih hlir an si. An nai aw te. Mi hrek inn cu ke hman in feh a theih. Mite pa tei inn ah a pa a nu, San Uu, a nupi le a fapa te, Za Lian Maw pawl an um. An inn a tum zet ih a lawng rialrial.U Ngun Hlei, Sapte tla ka riah zan cu an riak ve. Thunuam, titi kan rel khawm ciamco lala. Zan nazi 12 hrawng ah kan it. Sept. 4 (Suthur)Mite pa tei inn ah thaithawh kan ei. An hmuan cinmi hanghnah hnagrah pawl an suang. An hmuan ah samqok le ka-zun-zuat tla an cing ve. Sun 1:00PM ah Chin (Falam )Pawlpi EC pawl hrilnak Mite pa tei inn ah an tuah. Observer in kan kai ve. Pu Fung Dun President, Pu Van Tuah Piang , Secretary ah an hril lala.

Chin (Falam) Pawlpi thawhdaan. Himi Chin ( Falam) Pawlpi a thawhdaan cu hitin a si. Lailun Foundation in Kum 2002 July 5-6 , Atlanta khua ah Calai Seminar an tuah. Keimah in onnak ka tuahsak hngehnge. Cumi Calai Seminar kaitu pawl in July 5 zan ah Pu Ngun Lian tei inn ah tonkhawmawknak an nei ih, America a thlengmi kan Chin ( Falam) mi pawl hrang ah pawlkom dinsuah ding timi thu an suahpi. Cui Pawlkom hmin cu, Chin Community of USA ( CCBUSA) tin hmin an sak cih. Cuti cun himi Pawlkom pi hi tui sun tiang an rung nung ta. Pawlkom tumtah mi cu; 1. Fimthiamnak lam qhansonak ding. 2. 3. 4. 5. Calai le nunphung kilkhawi ding Siat/qhat ton tikah bomawk ding Khat le khat duhdatnak le theihthiamnak karhter ding Thlarau lam khal qhanso ding.

Sept.4 (Satur) 6:30 PM ah zan program an thok lala. Hlazuamawknak phun an tuah. Dr. Abel Lian Za Uk Thang Awng, Dr. Nai Sang pawl in thucahnak tawi an nei. Solo zuamawknak an tuah. Hmatpetu dingah, ZBC mikhual Saya 3 in fial. Saya Mike, Saya Pa Lian, Keimah in fial. FBCY ka vun mang thluh. Mikhual an si le a fair deuh ding tin an ruah a si hmang. US Miss hrilnak le zuamawknak tla an nei. Zuamawknak hmuahhmuah kan qheh thluh hnuin Pa Quan ih tupa Kunrirak in hlasak in a phiophi ciamco. A au thei nasa. An Music a ringtuk ih U Luai tla cu a cem tiang a um thei lo. An tlung mai. Tlawnginn an sang. Tlawnginn Hallpi sung ah kumthar puai cu tuah a si. Zan Nazi 10:30 PM hrawngah kan qheh. A zan cu Pu Lal Nei Mang tei inn ah ka riak. Sungkhat pawl in a ram ih kip ah in hruai vivo. Inn ih kip ah ka cer vivo. Sungkhat parah duhdawtnak an nei cio ih Pathian ka thangqhat.

Sept. 5, ( Sunday) Saya No Kolh thawn dawr ah lakphak kan in. Thunuam, titi malte kan rel tlang. Thaithawh cu Parte tei in in do. Saya Biak ih farnu dang Zingte, tei sung tla an um. Liante le a pa tla an sawm ve. Yangon 36 str. Kan um khawm lai pawl tla ka vun mang sal. Pa Bi tla an sawm ve. Thunuam kan rel celcel. 2:30 PM Chin Kumthar Pathian thu ka sim.

Mirang fala nu in Laihla a sak ve cuteh. Rev. Sanno in khawm in hruai. Saya Pa Lian in thucahnak tawi a nei. Keimah in Pathian thu ka sim. Laimi kan pupa Pathian thu ka sim. Minute 20 hrawng lawng caan ka nei. Thlarau in in um pi ti ka thei. Pathian ka thangqhat. Aye Cin nu in a fanu vekih a zohmi Mirang nu tla a khawm ve. Laiqong a thiam zet ih ka mang a bang. An inn ah thuhla tampi kan rel zo. Lai tlangval ka duhzet nan tutiang ka tong hrih lo tiah ningzak loten a qong hluahhlo men. Lai hla sak tla a thiamzet. Zanlam thu ka sim can le Solo sak ding in rak ralring cia aw tiah ka cah ta. Ka thusim sungah Laiqong in Solo a sak ih a ngaitu pawl in mak an ti cio. Mirang nu hman in hitluk Laiqong a thiam ah cun, ziangah saw Laimi kannih pawl in the Laiqong kan thiam lo ding tin ruat cio uh tiah forhnak ka nei phah hngehnge.

5:00PM Hmunkhat ah rawl ei khawmnak an tuah. Innteek ten in do. Sungkhat tamzet kan tong khawm aw. Pu Hlawn Mang tei sung tla ka tong hai. U Ngun, Pa Fung tin an unau thum in hmunkhat ah an zuk aw. Pu Hlawn Mang cu Laikor a nei lo ih keimai hruh mi in sang duak. A tum tuk deuh, a kut tla a lang lo. A phor hliamhliam. Kan hnihsan rero. Lai kor hruh lo hnak cun a qha thotho an ti.. A fa le Guam ih thleng pawl in an sawm thei zo tin ka thei. 6:30 PM Zaan Program. Mai Ruth Mang Cin Thluai ( Saya V.H.Sum fanu) in master of Ceremony a quan. Mirang qong in a sim phahphah. Kan fanau pawl an duai lo. Rinsan an tlak zet. Ralqha zet in an qong fuahfo mai. Maryland State cozah lam hruaitu pawl tla an sawm ve ih thusimnak tawite an nei. Lailam zuamawknak an tuah. Goergia, Maryland(MD), N. Carolina pawl an zuam aw. MD, inteek tei in pakhatnak an ngah. Secretary, Van Tuah Piang le President Pu Fung Dun pawl in reportnak an nei. Saya Mike in thucah tawi a nei ve. Cutin kan khawm program cu kan bang. Cu qheh in Pa Quan in hla phunphun a sak. A tupa Kunrirak thawn an au nasa. Music awn thawn Hallpi cu a hrum in a hrum. Upa deuh pawl cu tuar lo in an suak phahphah. Kei khal a hlat deuhnak ah ka cer. Zan Nazi 10:30 hrawngah kan bang. Nazi 11 tiang lawng hman theih a si. A leng ah kan zuk aw celcel. FBCY hlun pawl thawn a bur in ka zuk aw. Kan tam pam. Mi hrek cu kan zuk aw ding ti an thei lem lo ih an tel lo. Rinlopi ih a tong aw khawm vial kan zuk awk men mi a si. Cuisin hmun dangdang ih tlung ding an si. A hrek cu a zan ih tlung ding tla an um. FBCY kan fanau pawl cu an mithli an hal qiamqi hai. Pathian in tonsalnak in pe leh hramseh law. A zan ka riahnak ding cu Saya San No le U Ling tei an lawng aw ciamco lala. Cungte nu in Saya San No a neh deuh ih, U Ling tei ka thlun. U Ling tei inn ah ka riak. A thaizing Sept. 6, Mon. cu nazi 7:00 AM Huk Luai tei inn ihsin Atlanta ih suk ding kan si. U Ling tei inn ah mikhual 6 lai an riak ve. New Bern lam ih a ra mi tla an um. Battle Greek lam ih a ra mi tla an um. A hrek cu a zan ah an tlung. Thlacamnak ka tuah sak hnuah ihnak kan pan cio. Cungte in a ihnak in kian lala. Netabik zan an hnen ka riahpi ruangah an lung a awi cuang. Kei khal ka di a riam zet.

Sept.6, Mon.Nazi 6:00 AM ah ka tho. Cungte nu in buh le pee-piuh kio in do. A thaw nasa. Kan inn ka vun mang ruangro. Huk Luai tei inn ih riak Ko Tin Ko tei cu an tho hrih ding ka zum lo. Ka zum lo vek ngaingai in an tho hrih lo timi thu Sui Luai in phone in hun set. Saya Pa Lian, Sui Luai tei inn ah a riak ih Huk Luai tei inn ah an hi thlah. An thawh hnuah in phone sal uhla, nuamten kan rung men ding tiah thu kan cah. Nazi 8 zik hrawng ah Huk Luai tei in tiang U Ling in i thlah. Ko Tin Ko pawl cu an rak tho pek te, tim an tuah rero. Saya Pa Lian cu mileng khan ah a rak to huahhi men. .. Kei cu tuanpin ka thleng zo si maw i ti. Ka hnih san Kei cu ka zum tuk hai lo ih tulawng ka rung . A tawk ciah a si hi .tiah kan capoh aw rero. Atlanta lam pan in;

KoTinKolenaulepawlthawn.,Atlantapandingintimkantuah.

Sept. 6, 8:30 AM a kim thlang. Mawqaw kiang kan pan. Thlacamnak keimah in ka nei ta. Ko Tin Ko Fapa Lal Ci in Mawqaw a mawng. .. Pu Sum nang cu hmailam ah khan to aw.. tiah Ko Tin Ko in in ti. A dunglam kawm ah, Ni Chin Sung, Tin Za Hniang le an rual nu Rebecca timi Airibual khua lam mi, an to. A lai tluan ah Saya Pa Lian le Ko Tin Ko an to. Minung 7 kan si. Aircon daizet ih phuan cu Ko Tin Ko in a duh ve lo ih fanau pawl an phun zai phahphah. Dunglam ih to pawl tla cun a sa tuk, tiah an au phahphah. Lal Ci in Aircon a phuan sal. A pan a phitter sal tivek in lam tluan kan feh vivo. Unau vek in a pa thawn an um khawm huahho hai. Sun nazi 12 hrawng ah hamberca dawr kan lut. Suncaw kan ei ta. Suncaw khawh hnu in Ni Chin Sung in Mawqaw mawn a sawng. Tonak malte kan thleng aw sal. Pa Lian hmai ah a to. Kei dungah ka to. Ko Tin Ko dungta bikah a to. Kei Lal Ci thawn kan totlang. Lai Ci cu a ih a hmu tuk ih a it that. Qhanglo dingten a lu ka dawm phahphah. Tawkfang in datsi thannak kan thleng. Datsi an than. Ko Tin Ko in ka mawng ding a ti. A fa le pawl in a nih ih mawn cu an duh lo. .. Pu.pu Sum. In sim sak aw. Papa in mawng hlah seh.. tiah in simter. Kei khal in ka qhohkhaan. Mawng hlahseh. Ni Chin Sung in mawng ko seh ka ti. Hmai ah ka cer sal. Saya Pa Lian dungah Tin Za Hniang thawn an to khawm. Lal Ci cu a pa thawn dung ta bik ah a to. Pathian lam hruainak in tluagnten kan feh vivo.

7:30 PM ah Atlanta kan thleng. Ko Tin Ko tei inn ah zanriah kan ei ta. Saya Pa Lian cu a riahnak ding te Pa Rin in a ra hruai. Kei cu ka fapa Van Van in i ra hruai ve. Van Van mawqaw cu hmailam ah minung pakhat lawng to a theih. Sport car a si ih dunglam ah tonak a um lo. Ka thilri phurhmi malte lawng kan san thei. Minute 30 hrawng a rei hnuah an umnak Clarkston cu kan thleng. Thluai Cin in sangka a rak ong. Pa Thawm tla a it hrih lo. Ka ihnak ding tlunta khan ah ka thil cu Van Van in a thiar. A ihkhun ti hnelhni ah it ding ka si. Ka kholh aw ta. Cuisin thlacamnak ka nei ih kan it. An inn cu a hlunzet thlang. Asinan man olte ih an san thei ruangah le an umnak a rei zo ruangah himi veng in cer an tum hrih lo. An um qhangnak a si ruangah himi veng ih um hi nuam an ti men.. Inn thar kan lei thei hlan sung cu kan cer lemlo ding tiah Thluai Cin in in sim. An inn kiangah Tlangleng tla a feh. Bus tla a um an ti. Mipi Mawqaw lei thei lo pawl feh sukso a ol tin ka thei. 5. Sept. 7 (Tues.) 8:00 AM Rev. Biak Ceu in an inn ah i hruai. Thawhhlam kan ei tlang. CCBC Church ah i feh pi. Lutherance Biakinn a si. Saya Biak in ni 19 zan a Jubilee thlacamnak hrangah an Hall san a tum. An inn ah suncaw kan ei ta. Zanlam cu ka riahnak Thluai Cin tei inn ah in thlah sal.

Van Van thawn dawr kan feh. Ka thilri qulmi in leisak. Fapa neih man ah tiah thlawsuah ka pek. Sept. 8 ( Wed.) Pastor Khaw Lian Uk ( Thein Boih pa) in Suncaw ei in sawm. Saya Pa Lian tla a tel. Tuluk rawl kan ei. An Church Chairman Pa Hau pawl thawn kan si. Rawl khawh in an inn kan lut phah. Tawkfang in Pu Hu a ra.

Jimmy Carter Center .

Pu Hu in Jimmy center in fehpi. Jimmy Cater ih hnaquan mi pawl tampi zoh ding a um. Pathian zumzet mi ( A man of faith) a si zia tla a zuk thawn an tarlang. A zumnak pawl ca in an ngan. Pathian a zumnak cu, nitinte a bawmtu, a nunlam hruaitu,a thazaang le a ruahsannak a si. Jimmy Carter cu a nauhak tet lai ihsin Baptist inn sungsang in a thanglian ih, biaknak lam zuamzet mi a si. Bible thunung a duhzet. Holyland tla a uarzet. Governor cuhnak ah naza zetin a sung nan, zumnak thawn hmailam a nor thotho ih, America Predident dinhmun tiang a ngah sal. tin an ngan. Ram dangdang ih mi harsa a bawmmi le remdaihnak a tuah mi pawl thuhla tampi kan hmu. Norble Peace Prize a ngahmi tacik pi tla kan zuk rero. Tawkfang in leng kan suak ih, kan umnak ciar ah Pu Hu in in thlah sal. A zan cu Saya Biak tei inn ah ka riak. An hnenah zanriah ka ei.

Sept. 9 (Thur.) S/M Htwe in Plata thawhhlam in pe. Cuisin Thluai Cin tei inn ah in thlah. Tawkfang in Ko Tin Ko in i ra sawm. Pi Than Vel dawr.

Pi Than Vel tei dawr, Grace Oriental Market tla kan leng ta. Kawl ram thilri le Thailand ram suak thil tampi a dawr ah a zuar. Asia duhzawng ei in phunphun a zuar. Kawl ram lam thilri khal tampi ka hmu. Laihni puan tiang in a zuar. Kawl duhzawng Laphettuk tiang in a dawr ah a um. Thailand ihsin Vanzam in an cah tin ka thei. Hivek dawr 2 an nei. Dawrkhat San Luai nu, Ni Man in a kil sak ve. Ni Man cu mirang qong a thiam tuk hrih lo ih a harsa pam. Kan ram zalennak kan ngah tik canah cun, Pi Than Vel pawl hi kan kawlram thawn hlehka in dawr an tuah ciamco leh ding ih kan miphun qhansonak an suahpi thei leh ding tiah saduh ka that rero. Kan Laihnipuan pawl tla man a nei sinsin leh ding. Pathian in cumi can thleng thei ding in in hruai hramseh. Tawkfang in Ko Tin Ko tei inn ah kan lan. A zan cu khawmnak kan tuah. Leitlun nun hi, mikhual kan si zia, kan nun a tawi zia ( Ps. 90 :12), Bawi Jesuh zumtu pawl nunsalnak kan neih ding thuhla pawl tampi ka sim ciamco. Lal Ci in a ihnak khan i kian.

Sept. 10 ( Frid. Jerimiah ( Pu Khaw Tin Lal) ten thaithawh ei in sawm. Thlacam khawmnak ka tuahsak sal. Thihhnu nun salnak thuhla thawn thapeknak ka nei sal. Thla ka cam sak. Nazi 1 PM a kim. Greenville ,S. Corolina in Rev. Tin Lal ( Chan Chan pa) a rung thleng. An khawlam pan in kan feh mai. Lamzin ah nazi 2 hrawng kan rei ih an khua kan thleng mai. An inn ah kan thil kan ret ta.

Chanchanpatesungthawn.

Tawkfang in Lal Ce nu kan veh. Lal Ce nu cu ka zum hnakin a rak cak. A to thei. Kan be aw thei. Thla ka camsak ta. An inn ah zanriah kan ei hnuah Chanchan pa tei inn ah kan feh sal. Chanchan nu zan nazi 10 hrawng ah a thleng.

Sept. 11 ( Sat.) Ca ka ngan. Internet ka cek. Zankhawmnak kan tuah. Pathian thuthang qha ka sim. Ka zumhnak in minung an tam pam. An hna quan bang thawn khawm an taima zet. Laimi kawhhran an dinnak a rei tuk hrih lo tin ka thei. Saya Tin Lal ( Chanchan pa) in pastor a quan. An kawhhran cu anmah tawkten qhanso lam an pan rero. Mirang kawhhran pawl in khawmnak tla an tawlrel sak tin in sim.

Chanchan pi in Zankhawmnak ah Hotu a quan.

Sept. 12 ( Sun) ACBC ah can ka hmang. Zingten, Thu Mawi ih fanu, Thiangte in Atlanta lam pan in a motor thawn i phur. Nazi 6:30 AM in kan pok. Nazi 9:30 hrawng ah Atlanta kan thleng. Thluai Cin tei inn ah i thlah. Ka tim ka tuah. Khawmnak ah Ko Tin Ko in i ra hmuak ih ACBC ah kan khawm. Pathian thuthangqha ka sim. Minung 50 luan hrawng an khawm. An pastor cu Rev. Khaw Lian Uk a si ih, Pathian hmanzetmi a si tin ka thei.

ACBC Biak inn ah Kawhhran upa pawl thawn khawmqiak ah thurel khawmnak kan nei. An Kawhhran sungah qhenawknak a rak um ih minung lam ruahnak cun a poi zet. Remdaihnak ziangtin tuah sal sehla a qha ding tiah kan pol rero. Asinan, Pathian cu kan ruahnak hnak in thil qhadeuh a theitu a si ruangah, a qhabik in Pathian in lam a hruai sal ko ding tin ka ruat. Pathian in a ram kauhnak ah hmang cio hram haiseh tiah thlaza ka cam sak.

Rev. Dr. S. Hre Kio hmuaknak, CCBC ah Sept. 12 zan lam ah, Van Lian pa hmuahnak rawlei khawmnak cu CCBC ah an nei ih kan feh ve. Rawl ei kan khelh fangfang. A zan cu Liante tei inn ah ka riak.

Van Lian, Rev. Eng,Rev. Zulte pawl thawn, CCBC hmaiah. Saya Zulte tla SIFAT training a kainak in a hung tel thei ve. Rawl khawh hnu ah Vanlian pa le pawl thawn kan zuk aw ta. Liante pa te pafa tla an tel. Sept. 13 ( Mon.) Van Lian tei inn ah ka riak. Saya Pa Lian thawn kan si. An inn cu a kauzet. Innsak le zuar in Van Lian cu a hna quan a qhazet tin kan thei. Pathian in thlawsuahnak pe vivo hramseh tiah thlaza kan cam sak. Van Lian nu le pa pawl thawn zan var thuhla a phunphun kan rel khawm. Hmailam ih kan Laimi kawhhran pawl ziangtin lungrualten hna kan quan khawm ding timi thuhla pawl tampi kan rel ciamco.

Van Lian ih inn

Sept. 14. N. Carolina ah Saya Pa Lian thawn kan feh.

Zalanteisungkuathawn,Chalot.N.Carolina

Pu Qha Nei Luai fapa Zalan in a motor thawn in hmuak. Kan lung a awi nasa. Hivek rinsantlak fanau kan neih cu Pathian kan thangqhat. Zanlam ah N.Carolina, Chalot khua kan thleng. Kei cu Zalan tei inn ah ka riak. An inn hmun a kauzet. An kiangkap cu tupi vek, zanthing a rul liailiai. Sakhi tla kan tual kiangah an ra tlang qheu tiah in sim. Saya Pa Lian cu, Tahan ih an kawhhran upa rak quandah te, Moe Moe pa tei inn ah a riak. Moe Moe nu in an umnak mirang pawl an qhatzia tla hitin in sim rero. Kan umnak State hi an qha zet. Mizangfah an thiam. Upa tardeuh lam pawl, hnaquan harsa tuk kan quan tikah in zaangfah ih hna quan oldeuhnak company ah in qhawn sal a ti. A va lungawi um ve kan ti rero. Aw..Hnaquan ol le har hi an State par khalah tampi a qhum aw. North Carolina lam ka thlen tikah, kan unau thlengthar pawl ih sim mi ka theih tikah ka lung a awi zet. Cutluk ih mizawn ruat thiam an um cu a qha zet a sisi tiah Saya Pa Lian thawn kan ti rero.

A zan cu Pu Kei Bawi tei inn ah khawmnak kan nei ih Saya Pa Lian in thusimnak a nei. An inn khat in an ra suak khawm vialvi hai. Hmailam can ah tonsalnak um hramseh tiah thla kan cam.

SayaPaLianinPuKeiBawiteiinnahcanahmang.

N. Carolina khua khalah Laimi kawhhran 3 lai a um tin kan thei.

Billy Graham suahnak khawlam ah.

N.Carolina ih hminthang pakhat cu Billy Graham suahnak khua a si. Zalan pa te in in hruai ih kan thleng thei. Billy Graham a rak thanlennak inn pawl kan zoh. Qhaten an fingkhawi. A kiltu qhaten an ret. A sung kan lut ih a thuhla in sim ciamco. A nupi thlantla kan hal. Pathian thuthangqha a phuannak thuhla pawl zoh ding khan tampi a um. Cabu qha phunphun le , Billy Graham hngilh lonak ding thil tekrek phunphun tla an zuar. Sept. 15 ( Wed) Atlanta ah kan kir sal. Atlanta kan thlen veten GBC ah kan lan ih Pathian thu ka sim. Kawlqong an hmang. A zan cu Saya Zul tei inn ah ka riak. Sept. 16 ( Thur) Saya Zul te thawn, thaithawh kan ei khawm. Thluai Cin tei inn ah in thlah. Zanriah cu Than Vel tei in rawl in do. Mirang rawl kan ei. Indianapolis ih nubu hruaitu Pi Van Cer a thi timi thuthang kan thei. Kan rawl ei hmuah a nuam tuk nawn lo. Than Vel cu a qap rero. Sept. 17.( Fri) Ni Luai in thaithawh ei i sawm. An inn ah ka ei. Saya Mike tla a sawm ve. Saya Mike thawn kan tong aw sal. Rawl khawh in Liante tei inn ah in thlah. Ca ka ngan. Zanlam cu Ngun Thawm tei in zan riah ei in sawm. Suite tei inn ah kan lut phah. Thla ka camsak ta hai. Fate 2 an nei. A zan cu Thluai Cin tei inn ah ka riak. Thluai Cin tei inn ah khawmnak an rak tuah. Saya Pa Lian in thu a sim. Minung 20 lai an kim. Tisawp an do. Thluai Cin in tisop a suan sak hai.

Sept. 18, Satur. Van Van thawn kan vak. Thu tampi kan rel tlang. Facebook in a cangan mi pawl in hmuh rero. Pathian thu a ngan mi tampi ka siar. Thla ka cam sak. Zanlam cu Saya Biak ih Silver Jubilee ka feh. Mawite pa, Saya Pa Lian, Saya Mike, Saya Zulte pawl kan si. Kawl ram in a quanpi pawl kan tel thei cu sunglawi kan ti cio. Thusimnak caan tawite kan ngah fingfing.

Silver Jubilee tiang Pathian ih lam a hruainak parah lungawi thu kan sim cio. Atlanta khua ih ummi Kawhhran dangdang Pastor tam nawn le hruaitu dangdang pawl khal in an telpi ve ih sunglawi kan tizet. Falam Church ih Youth Director quandah mi minung 4 an tong khawm aw ih mak kan ti cio. 1. Mawite pa, 2. Saya Biak, 3. Saya Mike 4. Saya Zulte pawl an si. Laisuan zanriah in do ta. Van Van in khawm qiak in i ra hmuak.

FBC Youth Pastor pawl USA ah an tong khawm.

19/9 Sunday Chin Comunity Baptist Church

CCBCahthukasim.Hlaanrem.

September 19, Chin Community Baptist Church ah Sunday sunhnu, Pathian thusimnak can qha ka ngah sal ih Pathian ka thangqhat. Himi Church cu a dinnak a rei hrih lo. Van Lian pawl in an hruai. Pastor an nei hrih lo. Rev. Biak Ceu in a bawm phahphah.Minung 50 luan an khawm. Mirang biakinn an sang. Pathian thu an duh zet. Vinay tla a pasal thawn an ra khawm. Theih thiammi tampi hi hmunah ka tong sal ih ka lung a awi zet. Kan FBCY member hlun hrekkhat tla ka tong sal hai ih Pathian ka thangqhat.

Florida,Tampa lam pan in, 20/9 Mon. Khuang Lian Ruang in an umnak khua Tampa timi Florida State ah in hruai. Lamzin ah nazi 7 lai kan rei. Zan nazi 9 hrawngah an inn damten kan thleng. A nupi Qial Nei ( Certe) nu tla kan tong aw. A mang a bang zet. (A pa cu Pu Than Kip Sawn) a si. 21/9 Tue. Tampa khaw kiangkap kan zoh.

Tipi thuanthum parih an don mi Lilawn parah, kehlam vorhlam tipi hlir in a khat. Tipi thuanthum kap a si ih a nuam zet. Tikulh pakhat le pakhat karlak peng 20 zikte hla tla leilung an silh khat ih zin tumpi an tuah. Ka mang a bang nasa. Thir lilawn a si lo. Ziang tin saw hivek ih zin an tuah thei tiah mangbang zet in khatlam khat lam umpi tili pi cu ka cuan rero. An lilawn donmi pawl hi an mawi ngaingai. Zoh tlak ngaingai a si. America ram sungah Sanfrancisco lam hi hmun mawi, hmun nuamzet ka rak ti dahmi a si. Tampa kiangkap, Frorida lam ka thlen sal tikah, Sanfrancisco lam thawn khui a mawi deuh ding ti hi ka sim thiam nawn lo. An mawi dan, an nawmdan a phun dang veve. Thlatang canah cun America saklam cu a dai tukih, a hlum deuhnak Florida lam ah minung tampi an rung cawl qheu. Cuiruangah Hotel man tla a khungzet tiah Pu Khuang Lian Ruang in in sim phah rero.

Tampa Chin Christian Fellowship.

Pu Khuang Lian Ruang ih hohanak in Tampa khal ah Laimi khawmnak an tuah thei zo. Tampa Chin Christian Fellowship an ti. Pastor ngaingai an nei hrih lo. ZTC tlawng suak, Sayama Khe Khe tla hmun hla nawn in a ra khawmve. Minung 40 lai khawmsuak an kim thei. Hmun dangdang ah an um cio tin ka thei. Laimi pawl hi kan thlennak kipah khawmnak kan nei hliarhlo ih lung awi a um nasa. Pathian ka thangqhat.

ECHO kan leng. 22/9 Wed. Ft. Myer khua kan feh. ECHO timi kan zunglam kan hnan quannak thawn peh aw in, Agriculture hnanquannak lam kan zoh phah. Himi khua ah Pu Val Lal Thang fanu le pawl an um. Mawite le a u nu kan tong. Pa Hre hna a quan. Thla ka cam sak ta hai. Tawkfang in Tampa khua ah kan kir sal. Peng 130 lai a hla. Zan khawmnak kan nei sal.CCF ah in khawmpi lala. Minung 40 lai an suak khawm. Khawm tiak veten, Greyhound Bus thawn Atlanta ah ka kir. 23/9 Wed. zinglam ah Atlanta ka thleng sal. Bus cawlhnak ka thlen in Tlangleng thawn Thluai Cin tei umnak Clakston lam pan in ka feh. Tlangleng Ticket leidan Palik pa in i zirh hngehnge. Keimah te cu lei thiam ka siak lo. Mi qha palik ka tong ih a zia a um zet. Aw.. America Palik pawl cu mi an bawm taktak a si hiteh ka ti rero. Clarkston khua ka thlen in, Taxi ka to ih, Thluai Cin tei inn ka thleng mei.

Dallas lam pan in. ZBC Program vekin Taxas State feh in Pathian thuthang qha phuang hrih ding kan si. Kan khual tlawnnak Program pawl cu suaicia thluh a si. Kan thlennak khua Kawhhran pawl in kan fehnak ding khua tiang in tum sak thluh. Atlanta Kawhhran pawl in Dallas tiang kan fehnak ding Air Ticket khal in leisak thluh tinak a si. Kan mai kuan qul loten, Kawhhran in in tum sak thluh. Pathian in malza sawm cio hram hai seh tiah thla kan cam sak. Sept. 24, Frid. Dallas zam ding in tim ka tuah. Thluai Cin in Buhkio rawl in pe ta. Saya Biak in Airport ah in thlah. Saya Pa Lian, Mawite pa thawn kan si. Airport ah Van Lian in hmuk le lakphak in do.

Atlanta Airport. Van Lian in thawhhlam in do. Atlanta Airport cu zum hnakin minung an tam. Ceknak hmun ah reituk kan hngak. (Kan taan si. ) Kan to ding Vanzam kan khelh nawn lo. Neta deuh Vanzam in toter. Nazi pakhat hrawng kan hnu. Dallas ah kan phone ih kan thlen ding tikcu kan than sal. Zanlam Nazi 3 hrawng ah Dallas Airport dam ten kan thleng. Sungsung nu, Thluai Thluai , Pastor Chan Chan , Rev. Tial Lian, Rev. Zam Mang pawl in in rak hmuak. Saya Pa Lian cu a riahnak ding Rev. Qial Lian te in an phur. Mawite pa cu Rev. Zam Mang in a phur. Thluaithluai te inn ah ka qhumaw. Kei cu ThluaiThluai te le Pa Chan ten in phur. Thluai Thluai tei ( Pu Lal San ih fanu) inn ah ka qhum aw. Kan tufa pawl thawn hmunkhat ah kan tongkhawm aw sal ih Pathian ka thangqhat. Sungkhat pawl khal an lung a awizet. Sungsung nu khal ka zumhnak in a dam zet. Tufa le pawl a kil khawisak ih a qhahnem zet. Sungsung le Thluaithluai fale cu duh an nungzet. Sungsung nu, a pi in qhazet in a kil khawi. A pi cu,tufa kilkhawitu dingah Pathian in a lo hmang a si hi tiah ka sim rero.

Thluaithluai tei inn sungkhat pawl thawn. Tawkfang in CBC Senior Pastor Rev. Van Ni in ra leng. Ka caan hmandan ding thu pawl kan rel tlang. Malte a rei in a tin sal. Kei khal ka cawl.

September 25, sun cu Mang Mang ( Sayama Mang Qiak) ih naupa Van Ling timi, Dawt Hmunpa umnak sizung ah thlacam khawmnak ka tel. Hall an sang. Stroke a ngah. A tong thei lo. A caang thei lo. Kan tong cu a thei. Keimah in thu ka sim. Ziangruangah harsatnak kan tuar timi ka sim. R. 8:28 . Phi. 1:29. Mtt. 26:39, Eph.5:20 le a dang in tha zaang peknak ka nei. Hivek can qha Pathian in in pek ruangah ka lung a awi zet. Pathian ka thangqhat. Rinlopin Mang Mang le sungkhat dang pawl kan tong aw sal ih Pathian hnenah lungawi thu kan sim.

Sept.26 Sunday, Chin Baptist Church, Dallas.

CBC, Dallas ah Pastor Chanchan thawn. Sept. 26.Sunday. CBC ah thu ka sim. Pastor Chanchan hotu a quan. An pastor pawl cu, Rev. Van Ni, Pastor Pa Chan, Rev. Ngun Awi le Rev. Chum Awi an si. Member 1000 zik lai an nei tin ka thei. Kum 2002 ah himi kawhhran ah thu ka rak sim zo. Culai ah cun mi malte lawng an si. Tuah cun tampi an qhangso zo. Pathian thuthangqha phuan theinak can qha ka ngah sal ruangah Pathian ka thangqhat. Khawm a ra suaktu pawl cu Pathian thungai an paih zet. Kei khal reinawn, phurzet in, Pathian a qhatzia ka au sal lala. Sungkhat, hnaquanpi pawl thawn pawlkomnak phunphun kan nei

Dallas kan cam sung khalah sungkhat quanpi hlun pawl thawn Bawi Khrih hmin in tonkhawmnak, rawl ei khawmnak kan nei thei ih, Pathian ka thangqhat. Hmunkip kan tlawnnak ah Pathian an duhdawtnak an langter cio. Pathian sunglawi sin ko seh kan ti. Rev. Ngun Awite, Suipi nu te, Rev. Ceu Lian Thangte, Rev. Chum Awi te, Rev. Van Ni te siseh, Pastor Chanchan te siseh, Marrylin nu te, Cungcung te, Thluaithluai le a nute pawl, Billy pa te le an hmin ka sal cawklo mi sungkhat dangdang pawl in Bawi Khrih hmin in duhdawtnak a phunphun an langter.Pathian in thlawsuahnak pe cio hramseh.

Japan rawldawrah. Cungcung te thawn. Dallas.

Sept. 29 Wed. Homecell Khawmnak. Dallas.

Homecell khawm a suak tu pawl. Rev. Ngun Awi te veng. Rev. Ngun Awi ten rawl in do. Homecell khawmnak an nei. Keimah in thu ka sim. Minung an tam zet. An inn an khat qheh. A zan cu Rev. Ngun Awi tei inn ah ka riak.

Houston lam pan in

ThangthangleBawiIapthawn.

Oct. 1 Frid. Chin Christian Church ah

Thang Thang le Bawi Iap thawn Hauston kan tlawng. Rev. Van Thawng ( Isacc nu le pa) te inn ah kan riak. Chin Christian Church ah zan khawmnak kan nei. Keimah ka thlen ruangah in khawmpi. Minung 40 zik hrawng an suak thei. An pastor cu Pa Thawng, ( Isacc pa, Rev. Van Thawng Lian) a si.

Rev.VanThawngthawn.

CCCHomecell.

Oct.2, Zingpit ten kan tho ih, tipi thuanthum kap. Tourist pawl an len qheunak hmun kan zoh ta. Tawkfang a rei in Houston ah kan kir sal. Suncaw cu U Qial Ling (Ceu Bik pa) te in do. Pathian in thlawsuahnak tampi pe sal hramseh tiah thlaza ka cam sak hai..

Rawl kan khawh veten, Dallas lam pan in kan feh sal. Thang Thang le Pa Bawi in Mawqaw an mawng. Nazi 4 sung feh a si. Dallas khua cu zanlamah ah kan thleng. Kan thlen tawkfang in zanriah kan ei.

Cowboy Rangtonak RODEO, hmunah.

Sungsung nu pawl thawn Cowboy, RODEO ah, TAXES. Kan khawh veten Cowboy, Rangto nak hmun ah in fehpi. An rangto pawl kan zoh. A luhman cu US20 hrawng a si hmang. Tufa pawl in Ticket in lei sak. Rangto an thiamdan cu a mak. Cawcang hrangzet tla Cowboy pawl in an sual ciamco tla zoh a nuam zet. Caw fate tla an tlan ter ih Cowboy pawl in a tlan lai hridai ih awk an zuam aw ciamco. A rang theibik in an awk, hridai in an khit. A rangbik in pakhatnak an ngah ti a si. An thiam lawlaw.

Cowboypancawfateaawklaizuk.

Oct. 3 Sunday CRC ah thu ka sim. Pathian an duh zet. Pathian qhatzia kan thangqhat. A khawmmi an tamzet. An hotu cu Sui Sang ( Billy pa) a si. Hlan ihsin a nel aw zet ciami kan si ih, an Church ih quanvo ka ngah cu an lung a awi zet. Kei khal Pathian ka thangqhat. Laitong in ka sim. Billy pa te in zanriah in do.

CRCanPastorthawn.

CRCBiakinnakhawmmipawl.

October 3 cu ZBC Program a cemnak a si. Kan program vekin Pathian in tluangten lam in hruai. Pathian cu thangqhat in um koseh. Himi hnu cu mah duhduh ih feh a theih thlang. Kei cu California le Sheattle lam fehding in sungkhat pawl thawn program kan suai. Hitin hna quanpi pawl hnenah ca ka kuat. Bawi Khrih ah unau pawl, ZBC Delegate Pastor (6) pawl cu August 2 in October 3 tiang a thuailam ih kan nganmi USA ramsung Kawhhran pawl hnen ah thusimnak le thuzirhnak nei in can qha kan hmang thei ih Pathian kan thangqhat. Chicago ah cun hmunkhat ah can kan hmang khawm. Chicago Church siar lo, hmun dang Churches pawl ah cun, a dangdang ah can kan hmang cio. Kan theih zo vek in Saya Mike cu kan Falam kan misa pawl umnak deuh ah can a hmang. Cuvek in Rev. La Hoe khal an mah Matupi unau pawl umnak deuh ah can a hmang. Rev. Thawng Kam ( Thaq Van pa) khal a dang deuh in can an pek. Saya Pa Lian, Saya N.T.Mang ( Mawitepa) le keimah cu hmunkhat deuh ah kan feh ih Churches dangdang ah can kan hmang. October 3 tiang Program in suaisak mi cu Pathian kilvennak in tluang ten kan qheh zo. Tuhi kan nih 4, Rev. Thawng Kam, ( Van Tha pa), Rev. Khaw Lian Hre ( Saya Pa Lian) Rev. Ngun Thawnng Mang ( Mawite pa) le keimah cu kan qhen aw thlang ding. Kei cu Dallas in California lam pan in ka zuang ding. California ah San Diego lam pan in ka zuang thlang ding. Ni Li Lian tei hnen lam zan hnih ka cam ding ih, Pathian thusimnak tla ka nei hrih ding. Cuisin Oct. 6 ah Sheatle ah ka zam ding ih, October 10 Sunday tiang ka cam ding. Pathian thusimnak tla ka nei hrih ding.

October 11 cu Chicago ah ka zam ding ih Papulian pa ( Rev. Dr. Biak H. Mang) tei hnen ah ka riak ding. October 13 cu Bangkok. Yangon lam pan in ka zuang thlang ding. Kan rualpi pawl dangdang khal hmun dangdang ah Pathian thusim ding an si lai. Saya Pa Lian le Mawite pa cu, October 5 sun hi Indianapolis lam pan in an zam ve ding. Saya Mike cu Falam misa pawl lak ah Patian thu a sim rero lai fang a si. Saya La Hoe khal Matupi unau pawl le hmun dangdang ah Pathian thu a sim rero ve. Van Qha pa khal cuvek thiamthiam in Pathian thu a sim rero ve. Kan zate hrangah tlacamnak in in mang hrih hram uh tiah ka lo sawm sal hai. August 2 in October 3 tiang kan thusimnak Churches cu a tlangpi thu in Kawhhran 40 lenglo lai a si men ding tin ka zum.. Note; Saya Mike le Saya La Hoe, Saya Thawng Kam ( Van Qha pa) ih thusimnak Churches pawl cazin a kim hrih lo. Kan ti thei tawk ih thlaici kan vorhmi a keuh ih a qhanlen theinak dingah Pathian hnenah zaangfahnak dil cio u si. Bawipai hnaquan thiangah Ete pa Dallas.

Sandiego lam ah Oct. 4 Monday. Dallas in San Diego, California ah Alaska Airline in zam ding ka si. Rev. Dr. Chum Awi ( Cungcung pa) in Airport tiang in thlah.

Online Air Ticket, Cungcung pa thawn kan check rero. Alaska gate. Hlan ih Ai Ticket kan ken qheumi vek a sin awn lo. Online Air Ticket an timi cahnah le number lawng kan nei men. Airport computer umnak ih feh hnu ah check ter sal a si men. Cungcung pa in a check dan in bawm. Bawmtu neih lo khal le a poi tuk lem lo. Kiangkap um mi pawl hnen ah bawmnak dil theih a si ko. Zan nazi 8:30 ah San Diego khua damten ka thleng. Ni Lian in i ra hmuak. Pa Siang ih fanu 3 tla an um. Oct. 4 sun lawngah vanzam peng 2500 lai ka to. Nazi 7 zik lai ka rei. Dallas in Sheattle ah transit ka tuah.Cui sin San Diego timi Los Agelis khua thlanglamah kan zam. Sheattle in Peng 1050 a hla. Nazi 3 zik lai a rei. Sheattle in Dallas cu peng1500 lai a hla .

A zan cu dawr ah a nufa le an Pastor thawn rawl ei khawmnak kan nei.

Oct. 5 sun cu San Diego khawsung ah Nilian ( Sansan pa) in in lenpi.

Tin Em thawn Sandiego tlang zim ah. Vankau tlang in Falam con vek a si. Pu Za Hre Lian fanu Tin Em ih inn tla kan leng. Pacific tipi kapah inn tum pi a nei. Amah te lawng a um men. Amah cu rang in a tlak hnu a tai thlang lam a zeng ih a qhaten a feh thei nawn lo. Asinan Pathian a thei ih a hnangam daihnak a ngah tin ka thei. A nute umnak First Baptist Church ah hitin a thuhla an nganmi ka siar dah. Hmuh theih mi ka ke cun ka feh thei nawn lo nan, nan mai thlaza camsaknak ruangah ka Thlarau ke a cak zetzo ti a si. Thazaang ka ngah zet. Special ih an tuahsak mi a Mawqaw in in phur ih, hmun tampi kan leng sal. San Diego khawlipi fiangten hmuhtheinak an khawlu tlang Mount Soledad ah kan kai. Van kau tlang vek a si ko. Vankau tlang in Falam khawsung vun con vek khi a si. Hmun tampi a lang

Tlang luzim ah Thinglamtah tumpi an phun. Pathian zumlotu pawl ( Atheist) pawl in an duh lo nasa tin in sim. Thinglamtah bal sal dingin taza an cuai. A va mak ve ka ti rero. Asinan tui tiang cu an neh hrih lo. America ram khal hi a buai thei zet ve a si hi. Thlacam sak an qul nasa. San Diego khawsung a lang qheh. Mecixo ramri tla kan hmu thei. An ramri cu peng 30 lai lawng a hla. Ka zuk ciamco hnu ah kan qum sal. Tipi thuanthum kap ih a tlang rero mi, Phian, (Seal ) timi kan zoh. Pacific tipi kap a si. Cuisin Tin Em in Italy rawl zan riah in do. Myanmar Community Church Zanriah kan ei thluh veten, Maynmar Comunity Church khawmnak Biakinn lam pan in kan feh. Nazi 8 :00 PM ah khawmnak kan thok. Saya Ukte timi Pa Sang tei tupa in Chairman a quan. Amah cu California ah Bible tlawng a kai lai mi a si. Pastor dinhmun in a bawm rero hai. Kawlqong an hmang. Karen malte an khawm ruangah a si. Laimi an tam bik. Thantlang peng lam an tam. Member 50 lai an nei tin ka thei. Saya Za Qhelh Lo tla a rak quan dah nan, a rem cang deuh lo ih hmun dang ah a qhawn. Kawlqong in Pathian thu ka sim.

Zan 9:30 PM hrawng ah khawm kan bang. Kan zuk aw ta hai. Cuisin kan umnak inn lam pan in kan tlung cio.

Sungrual zuk a har. Oct. 6 zing lam 6:00AM ah ka tho. Ka tho qha. Pathian ka thangqhat. Pa Siang ih fa le tlawng kai dingin tim an tuah cio . Nilian tei an fapa upa deuh khal ,San San khal zingten tlawng kai ding a si ve. Nazi 7 AM ah an feh . Family group in kan zuk thei lo ruangah pakhat pakhat cio in ka zuk hai. Hilam lifestyle a si ko. Keikhal zinglam nazi 10:30 AM ih Sheattle lam pan ih zam dingin ka tim ka tuah ve.

Shettle lam pan in, Oct. 6 Wed. Zinglam nazi 10:30 AM in Sheattle lam pan in ka zam. Sheatle khua kan thlen zik in a thuailam ka cuan ih, meisa tlang tla mawizet in a lang. An khawsung pawl tla vanzam parih vun concu a mawi nasa. Ka zuk rero.

Sheattle khua kan thleng zik. Zanlam nazi 1:30 hrawng ah Sheattle ka thleng. San Diego in Sheattle tiang cu Peng 1050 a hla. Vanzam ah nazi 3 zikte kan rei. Thang Thang tei pafa in in rak hmuak. Mathew tla a qhang zet thlang. In theithiam lai. A zan cu Biak Hre pa tei inn ah ka riak. Sheatle ih um mi Kawhhran pahnih, Chin Christian Church le Myanmar Christian Fellowship ah thusim ding ka si.

Oct. 7 Thur. Pukpuk nu, Pu Fung Dun nupi kan to pi. Pukpuk pi in Yangon ah in thihsan thu kan thei. Pukpuk pa tei inn ah sungkhat dang pawl thawn kan tong khawm aw celci. America kan Laimi pawl hi thih le hloh can ah an thei aw zet ih uar an umzet. Khawdang hla pipi in thi an ral aw. Mithi an neih khal ah an pan aw vialvo ih qha ka tizet. Kan laidan qha an cawng lai tinak a si.

Cuisin dawr ah malte kan leng. Thil qukqak ka lei. Ka cawl. Ca ka ngan. Research malte te ka tuah phah. Biak Hre pa te an san lai thu ka sut. USA a rak thlengdahtu pawl thu in sim. ( Himi ka diary cemnak lamah, thu tlangpi dangten ka tar lang)

Oct. 7 zan cu Van Za nu te inn ah ka riak. Hlan ih ka riahnak hmun a si lo. Hmundang ah an rak cer zo. An inn a nuamzet. Van Za ih nufa pawl tla ka tong ih ka lung a awizet.

Oct. 8 cu Zingzing tei inn ah thaithawh ka ei. Zingzing in i thlah. Zingzing te thawn damten kan tong aw sal ih Pathian ka thangqhat. A nu le a pa tla ka zum hnak in an rak damzet.

Cungcungteiinnahthaithawhkaneitlang.

Cungcung cu Myanmar Christian Fellowship ah Pastor a quan rero.

Oct. 8 zanlam cu Tin Mawi nu tei inn ah ka riak. Pu Za Hre tei inn hi voi tamnawn ka riak zo. A inn khan a tamzet. Ka riahnak khan a bang aw dahlo. Tuiqum khal khaandang ah ka riak lala. Tin Em ih khan ah in riakter. A nuamzet. Oct. 9 zing cu nazi 4:30 ah ka tho zo. America ram tla nazi 3 lai in a dang aw ih, ih tikcu a bang aw thei lo.

Tin Mawi nu, a nau nu, a fapa Mang Tin Sia le a fala nu thawn Atlanta lam thawn nazi 3 a dang aw. Zing nazi 5 ah cun Atlanta nazi 8 a si zo. Cu asi ih keicu ka it thei nawn lo. Midang cu an it rero lai. Keicu tuanten ka tho ih, thla ka cam. Bible ka siar. Pu Hre ih fapa Mang Tin Sia cu Boeing company ah hna a quan rero. Tin Mawi nu in a hmuansung in zoh pi. Hmuan kauzet an nei. A nuamzet.Thingthei phunphun an cing. Sheatle khawsung hmun dang tla in lenpi. A hna quannak clinic tla kan thleng. Tin Mawi nu cu Pathian duhzet a si. Midang bawm tla a paih zet. A clinic zungsung in zohpi. Hminqhatnak lethmat tampi a ngahve nan a langter duh lem lo. Pathian ih pekmi hmin qhatnak a thupi deuh a ti men. Porh awk duh pawl a si lo ti a fiang.

Chin Christian Church ah thu ka sim. Oct. 9, zanlam cu Chin Christian Church ah Laiqong in thu ka sim. Minung 100 hrawng an kim ding. Kan phurzet. An Pastor cu Saya Lal Nei Thang a si ih Pathian duhzetmi a si. Pu Fung Dun cu an hotu a si.

Sungkhat tampi ka tong lala ih Pathian ka thangqhat. Khawm qiak in kan zuk aw ciamco. A kawhhran member cu Laimi peng dangdang in an si. Falam mi an tambik tin ka thei.

Oct. 9 zan cu Pu Fung Dun( Pukpuka pa) tei inn ah ka riak ih thuhla phunphun kan rel khawm. Can reinawn hnu ah kan tong aw thei sal. Pukpuk pa khal mi tlawm ngaizet a si. Midang hrangah a can a siangzet. Guam an um lai khal ah Laimi thleidannak um loten a rak bawmtu a si tin midang in in sim qheu. A hnen ah lungawi thu an sim ringring.

Pu Fung Dun sungkua pawl thawn, Sheatle.

Myanmar Christian Fellowship ah thu ka sim. Oct.10 Sunday cu Myanmar Christian Fellowship ah thu ka sim. Myanmar Christian Fellowship ah Pathian thu ka sim. An pastor cu Pastor Cung Cung a si. Kawlqong in thu ka sim. Kawlram ih khawm zuam tuk lemlo, sungkhat tampi, phur emem in an khawm ve ka hmuh tikah Pathian ka thangqhat. First Baptist Church ah khawmnak kan nei.

Tuiqum America kan khawmnak a tam sawn cu, Baptsit pawl ih kan hman qheumi pupit vek an si lem lo. Kan khual tlawn a netnak, Pathian thu ka sim canah, Baptist pulpit parin thusimnak can ka ngah ruang khalah a sunglawi sinsin ka ti. Pathian ka thangqhat.

A zan cu Ni Siang tei inn ah ka riak. Mang Lian le Ni Siang thawn rawl dawr ah zanriah kan ei ta.

Tufang khal ah Sheatle khua cu ruah a sur ringring. Laitlang vek a dai qiamqiam. Tacoma khua October 11 zinglam cu Tacoma khua lamah Mang Tin Lian in in lenpi. Tacoma khua cu USA ramsungih motor hloh tamnak bik hmun a si tiah in sim rero. Japan motor an ruk ih, an kaih man hlanah, Canada lam ah an mawn hlo qheu a ti. Cu kel tete, America tla motor ru an um ve maw si ka ti. Mang Lian in; Um tuk e. Hi ram khal misual an tam zet ve si maw tiah ka qong in let lohli.

Chicago lam pan in; October 11 cu Chicago ah ka zuang sal. Papulian nu le pa in in rak hmuak. An inn ah ka cam. An inn kiangah samqok tampi an cing. Laitlang hmuah i vun mang ter thluh.

Rev. Dr. Biak Hlei Mang tei inn hmai ah. Saya Mike, Saya Laisum thawn. October 12 sun cu Chicago biakinn tumzet, Willow Greek Community Church ah in lutpi. Minung 4000 lai an khawm qheu ti a si. America ramsung hi a kau tuk khaw hmun khat le hmun khat a bang aw lo. Hivek Church ah minung tampi khawm an um ve vekin hmun hrekkhat ah cun, khawmtu hman um lo in biakinn khar rero tla an um ti a si. Hihmun ah zumtu tampi khawmnak a um ti ka theih ruangah Pathian ka thangqhat.

 Minung4000laitlem,Willow Greek Community Church Bishop Mawia le a nupi tla in ra leng. Dawr tla in lenpi ih, thil tla malte lai kan lei. A zan cu Saya Lai Sum( Davinis pa) le Saya Mike ( Ceupi pa) tla, ka thleng ding ti an theih ruangah, an ra ve. An umnak Battle Creek khua thawn a hla tuk lo. Hmunkhat ah kan riak ih, zanvar thunuam kan rel celcel. Papulian nu cu ka tim in tuah sak ciamco. Kawlram phurh ding thilri in san sak rero. Bangkok lam pan in October 13 cu Bangkok in Yangon lam pan in ka kir. Kan ZBC Delegate unau dang pawl khal a hrek cu October sungah an kir ve. A hrek cu November sungah, A hrek cu January lam ah an kir.

January 27 tiang Visa in pe nan a tam sawn cu hnaquan nei cio kan si ruangah cu tiang cu kan um man lo ding. Visa cem hlan ah kan kir cio ding. Kan khual tlawnnak hrangah thla in cam sak cio ti kan thei ih kan lung a awi tuk. October 13, ah Yangon dam te in kan thleng Bongkok ih sin TG thawn zinglam ah kan zam ih Yangon dam ten ka thleng ih Pathian ka thangqhat. Ka nufa le hnaquanpi sungkhat pawl in Airport in in ra hmuak. Ete nu thawn kan tonawk veten, Hawaii pangpar ka orh hngehnge ih in hmuaktu pawl an lung a kimzet. Ete nu khal a lung a awi ko ding ka zum.

Kan inn kan thlen veten Pastor Mang Cuai in thlacamnak in neihsak. Hmunza ramkip ih in hruaitu, in khaltu, in kilvengtu, Pathian hnenah lungawi thu kan sim

US Chin Dinhmun khaikhawmnak. Pathian bawmnak le zaangfahnak le nanmai thlaza camsaknak in America ram cu Kum 2010 July in October tiang ka tlawng thei lala. Ka ngan zovek in, BWA Civui pi Hawaii ah kan zawh phah. Hawaii in Chicago, Indianapolis, Maryland, Atlanta, N.Carolina, S. Carolina, Kansas, Florida, Taxes, California, Washington State, Sheattle lam ah tin hmun tampi ka tlawng thei. Sungkhat Laimi minung tampi thawn kan tong aw. Pathian thangqhat tlangnak hmun tampi ah kan nei. Tuiqum America ka tlawn cu Laitlang thleng vek rori ka bang. Laitlang ihsin kan rinsan mi minung tampi America an rak thlen thluhawk cuteh. Tuiqum ka tlawnnak pawl ah kan Laimi(Chin) dinhmun malte research ka tuah phah. A fam kim lo zet nan, hivek research a tuah duh tu an um leh pang le, bawmtu a si leh men ding tin ka ruat. Kum 2010, July thla in October tiang America kan tlawnnak khua pawl le Vanzam in peng ziat a hla ti pawl cu a thuailam vekin a si. Yangon in Bangkok tiang Peng 379 Bangkok in Tokyo tiang . Peng 3264 Tokyo in Honululu ( Ka hminsin lo. Peng 1000 hrawng a si men ding)

Honululu to Sheattle . Peng 2677 Sheattle to D.C .. Peng 2306 Sheattle to Miami .. Peng 2724 a hlat ruangah Sheattle in Chicago tiang estimate theih a si)

Sheattle to San Diego . Peng 1050 Atlanta to Dallas Peng 1000 hrawng

Dallas to Sheattle

Peng 1500 hrawng

Indianapolis to Atlanta, Kansas . Peng 1500 hrawng Kansas to Atlanta, DC . Peng 1500 hrawng.

Note; Chicago in Indianapolis tiang motor in kan feh. Maryland in Atlanta tiang motor in kan feh. Atlanta in N. Corolina tiang motor in kan feh. Atlanta in Florida, Tampa tiang motor in kan feh. AMERICA LAIMI ( CHIN) DINHMUN. Kum 1950 hrawng in America ram ah Laimi pawl hi kan rak thleng zo. Culai san ah cun minung malte lawng an si. Asinan tui kan san ah cun America ram sungah Laimi kan tam ngaingai thlang. 1950s ihsin tui kan san tiang America Laimi dinhmun a dotdot in malten tarlang ka duh. 1950 hrawng ih a rak thleng mi kan Laimi thu thawn peh aw in Pu Ngun Lwai in a theih ban tawk in sim ih ka lung a awi zet. Octber 6, 2010 sun ah a umnak khua Sheattle ka thleng ih an inn ah ka riak. A hnen ah an mai san thuhla pawl ka sut ih hitin in sim.

Kum 1950s to 1960s Kan Laimi sung in Secular tlawng taktak kai ding in America a rak thleng hmaisa bik tu cu Kapve Taikwel a si. Kum 1948 hrawng ah undergraduate tlawng kai ding in America ah a rak thleng zo. America ah kum 7 lai tlawng a kai. Oregan State ah Engineering in Master a ngah. Pu Ngun Lwai cu 1958 in 1960 tiang California ah Agriculture tlawng a kai ih Master a ngah. Dr. Nai Sang khal Medical lam zir ding in a thleng ve tiah in sim. Dr. Saw Kulh tla Arizona ah Civil Engineering a zir ve. Hakha ih sin Lian Hai khal Engineering kai ding in a thleng ve nan a dam lo ruangah qheh suak tiang a kai thei lo. ( A mah cu Zipeng Za Hu tei sungkhat a si ih a thiah tik khalah Zipeng Za Hu te in an tuam hlawmtiah Yangon um mi, Pu Thla Peng in in sim bet.) Tedim lam khal in 1950s ah a thleng mi an um ve nan, an hmin ka hngilh tiah Pu Ngun Lwai in a ti. Pu Sai Ling khal 1959 hrawng ah America a rak thleng ve . 1964 ah Pu Thla Khar cu America a rak thleng . Rev. Hau Go khal Bible tlawng kai in kum 1958 hrawng in a rak thleng ve ih MRE degree a ngah hnu ah Kawlram ah a kir sal.

Kum 1970s Kum 1970s ah cun America ramah Nurse quan ding in Pi Ngun Zing a thleng. A pasal le a fa le tla a hruai hai. Cuvekin Engineering quan ding in, Pu Ni Thang tei sung tla an thleng. Pu Khuang Hlawn le a nau le pawl tla an u Dr. Nai Sang in a ko ih America an thleng qheh. Falam khua mi Man Va tei sung pawl tla an thleng ve. Pu Zahre Lian tei sung tla Nepal ram lam in an thleng ve. Kum 1980s Kum 1980s hrawng ih a thleng mi pawl cu Pu Ral Lian Sum, Pu Ngun Lwai le Pu Mang Bur tei sung pawl tla an si. Rev. Dr. S. Hre Kio tei sung tla Bible tlawng kai ding in kum 1979 ah an thleng. Kum 1983 hrawng ah Rev. James Tial Dum tla Bible tlawng kai ding in a thleng ve. Pu Kawl Lian tla tlawng kai in a thleng. Cumi hnu ah Rev. Dr. R. Thawng Hlei tla Youth Meeting kai phah ah America a thleng. Kum 1985 ah himi cangan tu keimah khal New York ah biaknak lam meeting kai ding in ka thleng ve. Cu a si ih kum 1980s hrawng ih America a rak thlengmi Laimi pawl hi mimal te lawng an si hrih. Laiqong qhimnak cun Bapi rawh zat lo fangte lawng an si. Kum 1990s Kan theih cio vek in Kum 1990 hnu lam ah cu America ram ah ti cawk lo kan thleng ciamco. Kum 1998 hrawng in Guam lam in USA a thleng tu cu minung 1000 hrawng an si. Kum 2000s Kum 2000 hnulam Malaysia ihsin USA a thlengmi kan Laimi hi ziangzat cekci a si ti sim a har. Kum tinte tam zet an thleng ringring.

Cu a si ih tufang Kum 2010 ih USA um mi kan Laimi hi kan tam zet thlang. Indiapolis khua pakhat lawng hman ah Laimi ( Chin) 5000 tlun an um ti a si. (Mihrek cun 7000 kan um ding an ti.) Kan Lai khawpi cu Indianapolis ah a qhawnzo ti theih tluk a si thlang an ti.

Fimthiamnak ( Education) 1960-1990. Kum 1960 - 1990 karlak ih America a rak thleng hmaisa tu tefa pawl a tam sawn cu Degree an ngah. A ngah lo tla an um. Degree cu an ngah lo nan mirang level in hna quan qhaqha an quan thei cio. Boeing Company le hmun dangdang ah hna quan qha te an nei thluh ih an harsa tuk lo. America pawl ih dinhmun an ban ve kan ti le ka sual lemlo ding. Mirang pasal nei na, mirang nupi a nei na tin, an um culci. Cu a si ih a tam sawn cu America mi taktak ah an cang qheh zo. America siatnak rel cu an duh lo nasa. America a rak thleng hmaisa pawl an tufa sung in biaknak lam hna quan an um tuk hrih lo. Pu Ni Thang ih fapa David lawng New York khawlipi mirang qong ih khawmnak ah Youth Pastor a quan rero tin ka thei. Himi sansung 1960-1990 ah kan Laimi sung in zirnak sangzetzet a thleng thei mi tla an suak.MD ngah ih sibawi hna quan rero tla an um. Engineering lam ih Ph.D ngah thei tla an um. Thuqhimnnak ah Steve Thuah Nei, Abel Lian ZaUk Thangawng Ph.D tivek pawl.. 1990 hnu lam India in Indianapolis ih tlawngkai ding ih a rak thlengtu hrekkhat pawl khal rinsan tlak zetzet an si thlang. Thuqhimnak ah, Van Tuah Piang, Hre Mang, Sante, Albert Kap pawl le mi dangdang. Education Kum 2000 hnu lam. Kum 2000 hrawng Guam in a ra thlengtu te le fa pawl a tam sawn cu ca an zir laifang a si. High School qheh an tam zet zo. An high school timi cu phun 12 tiang a si. Mi tampi in Collage an peh rero. Mi malte sung in Degree ngah ih hna quan qha deuh ngah thei tla an um ve zo tin ka thei. Thuqhimnak ah,VanDong MD, Chit Chit, R.N, Ni Luai Engineering le midang hrekkhat pawl.Asinan mirang vek dinhmun thleng in an saduhthah hna quan ngaingai cu an ngah thei deuh hrih lo. Pathian in bawm vivo hram hai seh tiah thla ka cam.

Guam in a ra thlengtu nu le pa pawl cu hna quan hlir in an can a cem. Cazir thei nu le pa an um tuk lo ti theih a si. Sumpai hawl in an can an hmang tam. An tefa pawl ca an thiam theinak dingah nasazet in an zuam pi rero. An tefa pawl tlawngkai an tam zet. Malaysia lam ih a ra thleng thar pawl khal zirnak sang ngaingai an thleng thei hrih lo. An zuam laifang a si hrih. Te le fa pawl fimthiamnak a thupit zia nasazet in an forh fialawk laifang a si kan ti le a sual lo ding. ( Frederick ih um nu le pa hrekkhat pawl hnaquan an baan ter sung ( layoff) ruangah, tlawngkainak can an ngah ih a remcang zet. Tlawngkai rero nu le pa an um ruri ih an hna quan layoff khal an qhatnak ding a si sawn tiah kan ti rero. Upat hnu tlawngkai khal a qhahnem zet. Hna quan qha ngah theinak a si ti an thei nan remcan lonak ruangih kailo an rak si. ) America ram khal ah Degree menmen ngah cu hnaquan qha ngaingai ngah a har ve tiah in sim. Kan Kawlram vek a si cu ka ti rero. Hnaquan qha ngah thei dingah zir dingmi hril thiam, lak thiam a qul zet ve tinak a si. Professional line an lak thei le hnaquan qha ngah a ol tinak a si. Professional line ngah thei dingah nasazet ih zuam a qul ti a si. Thuqhimnak ah Mang Tin Lian cu Guam in a thleng mi a si. Renton Technical Collage ah kum 2 sung thizik in hna quan phah in tlawng a kai. Ca a zir ih Degree a ngah hnu ah tuah cun a mah ih duhmi line Motor company ah hna a quan thei zo. A zirmi a qheh veten, hnaquan a ngah cih mei. Cuvekin mai duhmi hnaquan quan thei ding in tlawng khal hawl thiam a qul zet. Degree ka ngah men tak ah ti men ih tlawng kai ding a si lo. Tlawng ka qheh le ziang ka quan ding timi napin ruat ta hnu ah zirnak neih ding a si.Pu Than Kip Luai tla a upat hnu ah computer a zir ve ih cabuai ah hna a quan thei ve zo.Mino pawl in nan quan dingmi nan quan duhmi ziang a si tin an hril thiam a qul. America ah cun zir dingmi tampi a um ko. America thlen veten, motor qhaqha le inn qhaqha lei mei lo in, ziang tin tlawng ka kai hmaisa thei ding timi nasa zet in ruat ta a qha. Zirnak neih hnu ih hna quan a si le, lakkha tla a tam ih hna quan tla a nuam cuang. Zirnak nei ta lo cun, thih tiang kuli quan a qul ding ih a zon zaih thlak tuk. Ramleng um kan Chin mino pawl taimak suah qenqo cio hram uh. Ralkap le fimthiamnak

A hrekkhat tefa pawl cu ralkap ah an lut mei. Kum 5 lai an quan hnu in, cozah pawl in Degree an ngah thei tiang a lak in an cawm. Cutivek ih tlawng kai sal ih Degree tla ngah thei an um ruri thlang. Nu le pa hrekkhat, te le fa tlawng a ret thei lo pawl hrang ah Ralkap lut hmaisak cu a qha zet ka ti rero. Kum note ih Ralkap an lut ah cun kum note in Degree an ngah man thotho tinak a si. Tufang an hna quan. Kum 1960s 1970s hrawng ih a rak thleng zo tu kan Laimi pawl cu America ram san qhat laifang a si ruangah, hna quan anmah America pawl vek in hnanquan qhaqha an quan thei ve kan ti le a sual lem lo ding.. Kum 1980s le 1990s hrawng ih a thlengtu pawl khal anmah tawkzawn ten hna quan an ngah cio. Fimthiamnak lam khal a tlangpi thu in an tawk zet ko.A hrekkhat cu Boeing company ih quan tla an um. An quanmi ziang vek cekci a si ti cu in sim duh lo. Sim an siang lo. Midang theih ter an duh lo. Cuvek hmun ih quan rero tu fanau pawl ka ton tikah ka uar zet hai. America ram hrangah santlaizet, mi qhahnemzet an si zo ti ka thei thiam. Charity Organization hna quan; Leitlun ram dangdang ihsin harsatnak phunphun ruang ih America a thlengtu pawl bawmnak lam hnaquannak zungpi hi hmun kip ah a um. Catholic Charities siseh, Protestant pawl ih dinmi siseh, Biaknak dangdang ih dinmi siseh, Jews pawl ih dinmi siseh tin a phunphun a um. Cutivek Refugees a bawmtu pawl zungih hna quantu, te le fa Laimi tampi an um ve ih lung awi a um nasa. Mi harsa tampi an bawm rero ti ka thei ih uar an um zet. Indianapolis ah, Na Than nu, Richel nu ( Siangte), Atlanta ah Thluai Cin, Cin Mang, Dallas ah Vai Thluai Par, Sheattle ah Ni Oo Cin. N. Carolina ah .. le mi dangdang pawl an si.

Thluaithluai a hnaquannak Charity zung ah. Thluaithluai tei Charity zung ka thlengve. Catholic pawlih dinmi a si. An hnaquannak ih tumtahmi tla mitampi siar theih ding in an ngan. Midang harsa bawmnak, ruahsannak, dingfelnak thu pawl an uarzia an langter. America ram a thleng tu ram tinkim ih mi harsa thuhla pawl theih tikah a beidong thlak zet. Thailand ramri ihsin Karen unau pawl thuhla siseh, Iraq ram ih sin Muslim le Christian harsa pawl thuhla siseh, kan Laimi hrekkhat pawl ih thuhla siseh thinbangnak thuhla tampi a um. Mi tampi in Cultural shock timi, mai daan thawi bang awk lo ruang ih harsatnak tumpi an tong cio. Karen unau hrekkhat tla cu America ram um dan an thiam lo ih, an Camp ih kuat sal hman an duh sawn men tin ka thei. ( Mah le mah that aw, suicide, tla an um zo ih a poi nasa) Sathahnak Company Tufang America thleng thar pawl ih hnaquan cu ziang pohpoh a si mei. Shusi dawr ih quan an um vek in, company phunphun ah hna quan khunghar deuh pawl an quan cio. Tong thiam lo deuh an tam ruangah, Vok, Ar, Caw thahnak, Sathat cetzung ih quan tla an tam tin ka thei. Cabuai par ih cangan in hna quan thei ngaingai an um tuk hrih lo. America le samqok.

America ram khal ah kan Laitlang ih samqok cingtu tampi an umzo. Battle Creek ih ummi Pu Thawng Hmung te tla samqok tampi an cing tin ka thei. Hmundang kan tlawnnak inn kip ah samqok an cing cio. Samqok lawng a si lo. Hanghnah, hangrak phunphun an cing. U Luai tei inn khal ah Sabit an cingve.

Indianapolis khua Zophei lam unau pawl ih cin mi samqok.

U Than Kip Luai, U Luai tei inn kawtka ah Sabit an cing. America hi ramqha a si ruangah thingthei, thlaici an cinmi pawl a qha theizet. Huk Luai khalin Laitlang ihsin purawng ci a phur ih, an hmuan ih a cinmi cu, Laitlang hnakin a let 3 lai in a qhasawn. Ni Cem khal in hmekphek le hanghnak hangrak tampi a cingve. Apple hmuan ih hna a quan rero Laimi khal an um tiah, Sheatle ka um lai ah, Mang Lian in sim. Can kan nei lo ih, an hmuan kan zoh man lo. Laimi a tamsawn cu lothlo kan si ruangah, America ram a thleng mi Laimi hrekkhat hrang khal ah thingtheicin le hanghnah hangrah cin hi a kaih aw zet leh men ding tin ka ruat rero. Kan ngan zovek in Pu Thawng Hmung ih samqok tla cu tampi an zuar ih paisa khal tawkfang an ngah rero

zo tin ka thei. Amah vekin Laimi thingthei le thlaici cing in pum a cawm aw thei an suak leh men ding tin ka ruat rero. Nam zuar phah ih tlawng kai. Frederick ih um tlawngkai phah ih hna a quan rero tu kan tupa Cungte ( U Ling ih fapa) ih hna quan mi cu nam zuar a si. An nam zuarmi hi mak ka ti tuk ih hitin ka ngan khum. Cungte ( Pu Khuah Ling Mang fapa) cu high School a qheh zo ih tucu Collage tlawng kai ding a si thlang. Tlawng kai phah ah hna quan pakhat a nei. A hnaquannak company cu Namzuarnak Company a si. Cutco Company an ti. Leilung tlun ih Namqha bik an ti. The Worlds Finest Cutlery ti a si. Kum 1949 in himi nam tuah an thok.

Cungte in a nam zuarmi thuhla in sim rero. One set ah nam 28 tluk a um. $ 1000 a man. Nam pakhat man cu a tlangpi thu in $ 90 in $ 150 a si. An nam hriam dan cu a mak ngaingai. A malbik kum 10 tiang tat a qul nawn lo. Sandaih nam a si. Himi nam pawl hi dawrah an ret lo. Kusale lawng an nei ih inn ih kip ah an zuar rero. Tamdeuh an zuar thei a si le laksawng tla an pe bet tin ka thei. Nam pakhat man $ 200 a si. Nam lawng si lo in Beel tla an zuar. An Beel man cu pakhat ah $ 100 in $ 200 a si. An zungpi cu Baltimore ah a um. Japan rawldawr le Cell phone company

Dallas lam ih kan unau pawl cu, Cellphone company ih quan an tam. Japan rawl dawr ih quan tla an tam ve. Japan rawl dawr ih Chef tiang a quan thei tu minung 10 zikte an um zo tin ka thei. Japan rawl suandaan cu mirang pawl in an duh ngaingai. An rawldawr ih a ei tu minung tam sawn cu mirang pawl an si. Mithmuh lai rori, kan tonak cabuai tlun ah rawl an suang vutvo ih zoh a nuam zet. Rawlsuangtu Chef pawl cu porh tlak taktak an si ka ti. An thiam, an rang taktak. Zohnuam ding in Arti tla a tlun ah an khirh ih a tlak hlan ah namten an khuai thei. Rawl cahtu pawl in mitqhep lo in kan zoh cuahco qheu.An rawl man cu a khung zet. Cuvek dawr ih quan thei kan Laimi an tam ruri thlang. Shushi le Laimi America hmunkip ah Shushi dawr ih quan Laimi tampi an um. Hna quan nei lo pawl pakhat le pakhat bawmawknak ah an hmang ih a rem cang zet. Shusi dawr neitu Laimi sungin an tamzet zo tin ka thei. Lungawinak ngaingai a si.

CungcungthawnaShushidawrah.Dallas.

Asia Market Asia ram thilsuak pawl zuarnak, Asia Market dawr le, Rawldawr tete a ong theitu tla an um rero zo. Pu Mang Bur ih fanu A Thlia tei Asia Market dawr, Pi Than Vel tei Grace Oriental Market dawr pawl tla tla a ropi zet ve. Mang Bawi nu ih Italy rawldawr tla mirang tampi einak hmun a si ve. Pu Than Hre ( Thang Thang pa) ih rawldawr, lakphakdawr pawl tla an tawk zet ko. Kan ram a qhat tikah anmah pawl hi kan rinsan dingmi an si leh ding. Dawr tampi an tuah dingih, Laimi kan farahnak pawl in qhumsaktu sileh hram haiseh tiah thlaza ka camsak hai. Kan ram thilsuak pawl tla America ram tiang in zuar saktu an sileh ding tin ka zum. Kum 2007 Financial Crisis hnu America dinhmun le Laimi. Kum 2007 Financial Crisis timi, sumpai lam tlaksiat hnu America dinhmun cu kum dang vek a si nawn lo. Harsatnak phunphun in a tlun. Ralpi voihnihnak, hlan deuh te ih harsatnak an rak ton mi, the great depression, an timi, beidongnak ropi an rak ton mi vek a si ko lo maw an ti rero. Lutheran World Federation ih mi harsa pawl a bawm qheutu pawl in hitin an sim. Tufang ngelcel ih nan miphun pawl America ih nan ra thlen hi a poi tuk. Kan ram harsat laifang a si ih saduhthah vekin kan lo bawm thei lo a si hi an ti. America cozah leiba an neih mi hi, kumtin ten a qhang vivo. Kum 2002 ih an Cozah Deficit cu 6.2 Trilion a sinan Kum 2009 ah cun $12 Trilion a thleng. Kum 2007 ah minung pakhat ih an leiba an quat tikah $ 29000 a si nan, Kum 2009 ah cun an leiba minung pakhat ah $ 38000 a thleng. A hleice in Tuluk le Japan hnenah leiba tamtuk an nei. Trade deficit an timi khal hi kum 2009 ah cun $ 340 Billion a thleng.

Kum 2009 G8 pawl meeting an tuah tikah America Dollar par ih an rinsannak a tlak niam vivo thu an lang ter. Dollar aiah Global Currency System tuah seh la a qha ding tiah an rel. UN Conference on Trade and Development khal in hivek thu an suahpi lala. Dollar parah leitlun mipi ih rinsannak a qumsuk vivo tinak a si. ( Ref. Book Can America Survive? 2010 By, John Hague)

Hnaquan nei lo khal a qhang deuhdeuh. Tufang cu 9.5% tluk ah a thleng zo. Himi pawl parih Cozah tangka bawmnak a pekmi hi billion tampi a si fawn. Cozah tangka decifit a tam ter deuhdeuh tinak a si. Leitlun ral an kahnak khal ah tampi an cem fawn. Cumi khal in decifit a cang ter. Obama in a tiamkam zo vekin zianghman a tuah thei lo ti- ih an phun zai rero lai fang a si. Kan Kawl unau pawl cun, Obama Aa-luu, tin an cam rero men. Pu Khuang Lian Mang pawl tla Frederrick ah ka tong ih, Obama kan thlak rori a qul tiah a au rero ve. America minung tam sawn hi politic lam ziang hman an ngaihven duh fawn lo. High School tlawngta 80% in an President zo a si ti hman an thei lo ih ka mang a bang tuk tiah in sim rero. Obama parih an lungkim lo thu in sim ciamco. Tufang America ram ah hnaquan a har laifang a si. Hna quan a harnak hi thuhla aphunphun a um an ti. Cumi sungin Asia ram ah America Company a cer tamtuk ti a si. Kan theih cio vek in Asia ram ah cun minung pakhat hna quan man tampi pek a qul lo. America ah cun hna quan niam bik pawl in Nazi pakhatah $ 8 hrawng an ngah. Kan nih Asia ram ah cun sunvu quan khal sehla, $ 8 hman pek kan qul lo. Cuiruangah, America company pawl Asia ram ih an cer thluhnak a si. Cu asi ih America dawr cu Asia ram thil lawnglawng in a khat thluh. Made in USA timi hmuh ding a mal nasa. Hitivek in tufang hi America ram cu an tlaksiat can a si ngelcel. Himi can sung ih a theng thar pawl cu hlan lai vek in hna quan ding duh tawk in an ngah thei lo. Hmun tinkim kan khawmnak ih thlacamnak an dil mi cu an kawhhran sung ih hna quan nei lo pawl hrangah .. timi an sim ringring. Hnaquan thleidaannak malte a um ve. A tlangpi thu in America ram khal hi mah le miphun qan duhnak cu a um ve hmang. Miphun thleidannak cu malte a um hrih tiah in simtu an um. Thuqhimnak ah mirang thawn hnatuan dil (siauh) tlang tikah, anmah hnakih tampi thiam lo ah cun, mirang thotho in hnaquan an ngah deuh tinak a si. Tlawng kainak khalah thleinak mal tete cu a um tiah in sim. Mi ze, daithlang pawl le America. America ram um cu mi ze le dai thlang pawl hrang ah cun a ol riai lo.

Thi zik ih hnaquan a qul. Hna quan can ah cawlh huahho a theih lo. Zingpit ten thawh a qul. Sunvu cawl lo in hna an quan. Kan Bible ih in zirh vek rori a si. Gen. 3: 2Thes. 3:10. Kan Bible sungah thlanhri pawt ih hna quan ding kan sizia kan hmu. Hnaquan lo cu rawl khal ei lo ding ti a si kha. America dinhmun cu kan Bible vek rori a si. Han quan lo cu umnak nei lo (Homeless) an cang mei. An ram a nuam. An inn lo aqtha. An inn le an lo qha thawn mil aw ding in nun a qul. An inn a qhat vekin a man khal a khung. Kawlram vek in phit-ta-lu ih nun a theih lo. Thlatin te inn man kuan ding a tam. An ram hrang ah tax tampi pek a qul. America ram ah Mawqaw lo in um a ngah lo. Mawqaw man kuan a qul ringring. Kuan tikcu ih pek thei lo pang le paisa qhang ticawk lo kuan a qul lala. Kawlram vek in duh poh ih hnawm hlawn a ngah lo. Duhnak poh ah zinpawng tlan khal a ngah lo. Felzet ih um a qul. Daithlan a ngah hrimhrim lo. Kawlram vekin, naa-le-hmuh le pi-le a ngah lo. Daan tlangpi an neih mi vek rori h nun a qul. Daan leng ih nun a ngah lo. America cu an daan in mi a uk. Daansung ih nun a qul. Cuiruangah America ram cu mi law pawl le daan sung ih um thei pawl hrang lawng ah a nuam. Hnaquan ol le har hi an State par khalah tampi a qhum aw. North Carolina lam ka thlen tikah, kan unau thlengthar pawl in hitin in sim. Kan umnak State hi an qha zet. Mizangfah an thiam. Upa tardeuh lam pawl, hnaquan harsa tuk kan quan tikah in zaangfah ih hna quan oldeuhnak company ah in qhawn sal tiah, Elbethel Baptist Church upa rak quandah, Moe Moe nu in in sim. A va lungawi um ve. Cutluk ih mizawn ruat thiam an um cu a qha zet a sisi tiah Saya Pa Lian thawn kan ti rero. Kawhhran thu America ramsung ah kan Chin mi pawl ih dinmi Kawhhran le Fellowship cu 80 tlun a um zo ti a si. Mi hrekkhat cun cumi hnak in a tam deuh ding an ti. Cazin felten lakmi a um hrih lo. Kan ZBC Delegate minung 6 ih October 3 tiang kan pal dingmi kan tlawn dingmi Kawhhhran hminpawl ka siar ih a zaten 40 hrawng a si. Indianapolis khawkhat lawng hmanah Kawhhran le Fellowship 16 a um zo. Hihnak in a tam lai hrih ding .

Maryland DC kiangkap kan thlennak ah Churches ( ) a um. Atlanta ah Church and Fellowship pawl cu; Atlanta Chin Baptist Church ( Falam) Chin Community Baptist Church ( Falam) Goergia Chin Baptist Church ( Hakha) Zotung Christian Church Atlanta Matu Community Church First Zo Christian Church Zomi Laizom Christian Church Gospel Baptist Church North Carolina Charlot khua ih Chin Churches pawl cu; Charlot Chin Baptist Church Charlot Chin Christian Church Falam Baptist Church Zo Christian Church . Tla an si. Kawlqong khawmnak khal ah Laimi hrekkhat cu an tel ve tin ka thei.

Taxes State kan thlennak Churches hrekkhat pawl cu; Chin Baptist Church, Dallas Taxes Chin Baptist Church Chin Evangelical Baptist Church Chin Revival Church ..pawl tla an si. Kawlram kan kawhhran pawl in qhenawknak ci hi America khal ah a keuh vivo ih poi ka ti zet. America cu sumpai neihlo le farah ruang cu a si lo nan, qhenawk duh pawl miphun kan si ve hmang. Remdaihnak um thei ding in napin thlacam cio u si. U.S ah Chin Unity a mal lai. Rev. Biak Ceu in hitin in sim. America ram ra thleng thar Karen pawl ih Kawl pawl an huat dan hi a mak lawlaw. Karen ramsung ih an tuardan pawl an ruat sal tikah Kawl pawl parah an lung a kim thei hrimhrim lo a ti. Kan Laimi ( Chin) pawl cu Karen le Kawl vek law mam cun kan that aw lo nan, America ram a thleng tu Laimi unau karlakah remawk lonak tete a umlai hrih. Thuqhimnak ah kan ZBC ramsung ah miphun tampi kan um. Association 28 lai kan si. Kan qong a dang cio. Asinan, tuah cun, ZBC miting kan tuah tik ah Unau vek in thu kan rel tlang thei. Zianghman remawklonak thupi ngaingai kan nei lo. Duhdaw awten kan um thei. Asinan America ramsung um kan Chin mi pawl hi hmunkhat ih cangvaih tlangnak Unity an nei thei hrih lo ih poi ka ti zet. An karlak ah healing process tampi tuah a qul lai tinak a si. Pathian in remdaihnak suahpi hramseh tiah thla kan cam.

Malaysia ih a miphun a miphun zawng ih rak din cio mi khal in U.S an thlen tikah qhenak a suah pi lala a si hmang. Mah le tlang, khua cio ih qan duhnak, um duhnak a suah pi ve. Cumi cun Pawl phunphun Fellowship phunphun a hring suak fawn. Hmailam ah ziangtin kan Chin miphun pi lungrualten kan cangvai khawm ding timi hi napin ruahkhawm a cu thlang. America ramsung um kan Laimi ( Chin) karlak ah lungrualnak,remnak, daihnak an qul nasa. America ramsung a thlengmi kan Laimi kan remawk taktak ih hmunkhat hna kan quan khawm thei ah cun, kan Pathian hrangah, kan ram hrangah tampi hna kan quan thei ding a si. America Jews pawl in an ram hrang tampi an quan thei vekin Pathian le kan ram hrang ah thazaang qhabik pakhat an si ding.. Miphun, a peng, a tlaang, a khua, a qong, politic dinhmun in Chin mi karlakah, rual remnak um thei lo hman seh la, Remdaihnak a simi kan Pathian in kan karlak ah remdaihnak taktak suahpi hram seh tiah thla ka cam. Judah le Zentail miphun phun 2, phunkhat ih a cangtertu kan Pathian kan qul tuk. Rev. Thang Tin Sum Oct. 2010. Sheattle