BMA AW

An Official Organ of The Bangalore Mizo Association Registered Under Societies Act of Karnataka No.: BLU-S188-2007-08 Date 7 May 2007
Vol. XVIII Issue No.31 Bangalore Mizo Association Pathian Nitin Chhuak Chanchinbu Date: 11th Nov., 2012 Phek Khatna

TUALCHHUNG
$$ Pi Thanchhungi boral BMA President, Pi Lalrinpuii u Pi Thanchhungi kum 59, Aizawl electric veng chu tahrikni 5, November, 2012 zing 8:30 khan mitliam natna avangin Aizawl civil hospital-ah a boral a. A boral tlai dar 3:00 khan Rev. Dr. Sapthanga te inah thlanthut hun hman a ni. Lusun chhungte kan tawrhpui hle. $$ Ruth-i damdawi inah November ni 6, thawhlehni chaw hnu khan Rev. Lalawmpuia fanu Ruth-i chu CSI Hospital-ah admit a ni. Kar hmasa BMA AWa kan ziahlan tawh angin Ruth-i nu Pi Machhuangi dam lo pawn hma a sawn ve zel a. Pu OP-a te chhungkaw tan i tawngtai ang u. $$ Ordination hmu thar Pi F. Lalrotluangi, Pu P.S Chhuasa nupui chuan Reverend ordination a hmu thar. Reverend nihna nei thar Pi Mapuii kan lawmpuiin, Pathian rawng a bawl zelna kawng tingrengah duhsakna kan hlan e. $$ Chhinglung Magazine Chhinlung Magazine 2012-13 atan Editorial Board member-te hnenah thuziak thehluh theih a ni e. Thuziak hi 1st February, 2013 hmaa thehluh tur a ni a. Magazine hi March 2013 thla chawhmaa tlangzarh a ni ang. $$ Insawn dawn Rev. Dr. Sapthanga te chhungkua pawh November ni 15 hian an in tharah (Kristu Jayanti College bul) an insawn dawn.

BMA Hruaitute
Kum danga tih thin angin, BMA 2012-2013 hruaitute chanchin tawi tarlan leh kan tum ang a. Bangalore Mizo te hian hruaitu tha tak tak kan nei thin a, a vanneihthlak hle. Chutih rualin, duhthu an sam tawk lohna te chu a awm ngei ang tih kan ring. Kumin BMA hruaitute hi eng ang mi nge an nih hriat nan an chanchin tawi hi chhiarin hre ve ang u hmiang.

President: Pi Lalrinpuii
Pian leh murna: Pi Lalrinpuii hi Saiha, Chhimtuipui District-a piang niin, a pa hnathawh avangin hmun hrang hrangah an awm kual thin a. An khaw hmun nghet erawh Chandmari, Lunglei a ni thung. Hobby: Social work lam a tuipui hle, tin zin veivah pawh nuam a ti bawk. Nupui tha tih takah, ei leh in siam pawh nuam a ti hle Rawngbawlna: Lunglei Chanmari Baptist Kohhrana a lawi laiin Sunday school zirtirtu bakah, Kohhran hmeichhe Secretary leh Treasurer nihna a chelh tawh thin. Khawtlang: Lunglei chanmari Branch MHIP ah kum engemaw zat Secretary leh Treasurer hna a chelh tawh a. BMCF NPSS Superintendent a ni tawh bawk. Kum 2001 atang khan BMCF-ah thuhriltu atan a awm tan a. BMA Silver Jubillee Secretary 2008-2009 khan niin, kumin hi BMA President hna tumhnih a chelhna a ni. Bangalore Mizo te hnena thuchah: Kan awmna apiangah Zonunmawi hi theihtawpin vawngtha ila; Mizo Kristian kan ni tih mi zawng zawng hnenah a takin lantir thei theuh ang u. Bangalore kan awm chhan, rawngbawlna, hnathawhna, zirna theuh-ah hian midang te entawntlakin awm theuh ila, Pathian ringtu kan nihna hi ringlo mite hnenah lantir thei theuh ila a va lawmawm dawn em! *******************************************************************

Chhinlung Magazine 2012-2013 2012Hriattirna leh Ngenna

BMA chuan kan annual magazine CHHINLUNG tihchhuah leh kan tum a, a duh apiang tan article thawh theih a ni e. Kan thuthlurbing atan "Zofate leh tunlai khawvel" tih a ni. Thupui lam hawi leh hawi kher lo thu chhiar manhla deuh Mizo emaw English emaw a ziak turin mitin kan sawm e. Tin naupang te pawhin, lemziak, painting, thawnthutawi, ldt., thawh theih a ni bawk ang. Rev. H. Lalthlamuana, Chief Editor

Vol. XVIII Issue No. 31 Bangalore Mizo Association Pathianni Nitin Chhuak Chanchinbu Date: 11th Nov., 2012 Phek Hnihna
Editor Dr. Lalhmingmuana Sailo Joint Editors Tv. Lalmuanzuala Tv. MC Zirsangzela Circulation Managers Nl. R. Lalnuntluangi Nl. Laltlankimi Hmar Tv. Samuel Khawlhring Nl. Vanlalnghaki BMA AW lak man: Thla khat Rs.20 Thla thum Rs.50 Thla ruk Rs.90 Thla sawmpahnih Rs.180

Palai Rinawm Ni Turin- II

Carey Sailo
Ka thianpa nen chuan inthlahrung deuhin kan inzui lut dun dan dan a. Tichuan thusawi lam hna leh nungchang mawi zir pahin chu nula in ah chuan kan thu tawm kak ta mai a. Keichu ka hna ah ngaiin titi kan tan chho map map a. Fiamthu leh thu dang dang kan sawi lai chuan ka thianpa chu a kil sirah hian ama hriat tawk leh hian alo khi ve sung a. Tawng na hun ka pek lahin sawi tur engmah a hre si lo. Ka thianpa nikhua lo lutuk chuan, A duh duh lo sawipui ve rawh se. Lo insawi bah nuai rawh se tiin thil tir tur pawimawh dang nei ni awm takin haw san ka tum ta. Ka thianpa a mangang ta! Kan nulai hriat lohvin ka kawr ah a pawt, kei lahin pawh phih sawk pahin din ka rual nghal. Ka thianpa hmel thlabar lutuk khan min hriat chhuah tir, hremhmun hreawm dan tur chu! Mahse a tawn tlang a ngai ve si ale. Tichuan ka haw san ta. In ka thleng, thingpui ka in hah chawl deuh tih ah hian a rawn thleng phei ve leh nghal. Mak ti deuhin Ti nge a, I va rawn haw hma ve tiin tawngka vin tak chuan ka han zawt a. Anil ah tap khi sung chungin, I haw a, titi dan tur vang tawh em lawm. Sawitur ka hre si lova, anin a hre lutuk bik si lova. Ka tlai inkhelh hah chhuanlamin ka rawn haw ve daih lawm anti he mai chu(h)! A hmul thi ding awr awr khawpa hnek ani ka chak ni! Mahse zan dangah chuan a heti reng bik ta lova. A duh ve em avangin zan lam inkawm hun kan nei tlem ta pharh a. A changin ka lengpui ve zeuh tih loh chu an inkar engmah hriat ka nei lova. Min hrilh hma loh chu zawh pawh ka tum chuang bik lova. Mahse zan khat a leng rawn haw chu nidang a ang ta tlat lo mai! A hmel ngui khan a rilru a hah ani tih a entir a. A tawngkam hman leh ri khan beiseina eng a nei lo tih a hriat theih a. Kei chuan amah ngaihsak takin, Bawiha, tinge I nuam sam lo ami zanin chu. I va nguai ve tiin a rilru hriat sak ka tum ve a. Ani chuan aw thap chuai raih hian, Ka bem a, mahse min duh lo. Engmah ka sawi peih tawh lo tiin a vawikhat duh leh hmangaih a tawn chu a tawp berna ni hial ang turin a tawngkam leh a mizia chuan a lantir a. A rilru hah chhawk thei tur khawp tawngkam leh thiamna engmah ka neih bik loh avangin ngawi rengin a bulah chuan ka thu ve ta tlawk tlawk a Hemi zan hnu atang phei hi chuan kan in thian thatna hi a chhe tawh mai emaw tih tur khawpin kan in kawm khat tawh a. Inhmuh chang te chu awm mahse kan tunhma nun kan hlim dun thin ang kha chuan kan awm ta ngai meuh lova. Chu nula alo duhna leh hmangaihna chuan a tlangval tisa zat leh chakna chu lain nun hahna leh beidawnna ruamah a hruai lut ta si a. Ka thianpa nun hman dan ka thlirin khawngaihna alo piang, chumi avang chauh chuan ani a duh leh hmangaih em em chu a tan ka la biak sak fo reng thin ni. Mahse zan khat kan inbiak lai chuan chu nula chuan ka hnenah, Naktuk chu kan in ah lo kal lawk teh aw, lehkha pawimawh pek tur che ka nei tiin min rawn hrilh a. Keichuan ka thianpa tan anih ka rin avangin Aw le tiin kan in mangtha ta a. A tuk zanah chuan chu lehkha pawimawh lam tur chuan ka va phei ta a. Ani chuan an veranda ah chuan mi lo chang a. Bike ah pawh chuan chhuk hman lovin chu lehkha pawimawh chu ka hnenah min rawn pe ta. Nangmah chauhin chhiar ang che aw tiin min mangtha zui ta a. Rang lamin kan in lamah chuan ka tlan haw phei ta a. Mu pahin ka thianpa tana a thilziah ni ngei tura ka rin chu kan pharh ta a. Mahse chu lehkha phek chhungah chuan ti hian a lo inziak ta si a. Khawngaihin I thianpa chungah khan ngaihdam min lo dil sak nghal ang che. Ka zep mahse ka zep tawh dawn lo. In thian duna in tlai inkhel bang dawra thil in lo lei a, kan inkawm atang khan ka mipa duhzawng tak I nia. Mahse nang chuan keichu I thianpa tan I ti zawk si a. Khami tlaia ka phone no ka pekna chhan che pawh kha nangmah zawk emaw ka tih vang ania. I thianpa I lo lenpui zan pawh khan nuam ka ti lutuk a, mahse I thianpa chu hun tha siamin min hawsan ani si a. I haw rual rual khan kei chu ka ruak nghal huai hian ka in hria ani. Min duhloh vanga I thianpa mi tihpui nge I thianpa I duhsak vang zawkin? Ka hrilh tawp ang che, I thianpa kha chuan min duh tih chu ka hria, keipawn duh let ve ka tum, ka thei thlawt lo ani. Chuvangin khawngaih takin nang ka duhtak hi chan che ka in phal lova. Min duhve ani tih hriat nan naktuk tlai in inkhelh leh hunah I kekawr bul sen kha rawn ha la, a dum I rawn ha anih chuan kan in mangtha vek dawn nia. Bye take care. Phek thumnaah chhunzawm a ni

E-mail: bmanews@gmail.com Website: www.bangaloremizo.info

Xw||t Xw||t
Khawvel ram thiltithei ber USA chuan President Obama chu a tumhnihna atan an tling thlang tling leh ta. Sawichhetu leh amah duh lotu tam viau mah se, amah duhtu an tam zawk miau avangin hnehna a chang leh ta. A lawmpuiawm khawp mai Mizote hian hnam naupang kan nih vang gne ni ang, hnehna changtu nih kan thiam lo angin, tlawm zawk nih kan thiam lo fo thin. USA President an han thlang fel a, a tla zawk Romey chuan thinlung taka a elpui a lawmpui thu leh duhsakna sang ber a hlan thu kan hmu a. Kan ram hruaitute ve erawh, a tlinglo zawkin inthlan chungchanga thil dik lo awm anga sawiin, pawh mipuite tan pawh a dik ber hriat har khawpin thu vawrhdarh an ching fo a. Hun a vei deuhin engmah hmuh tur awm lem lova tawp leh ta mai mai a tam thin hle. Midangte nena thawhhova, inngeihtlang taka awm ho tur chuan inngaitlawm leh dawhtheih taka kan nun a tul fo. Chuti ni lova, engemaw hleka kan inkhertawna, dik lohna ringawt inhmuhsak kan tum chhung chuan a nihna tur angin pawlin hma a sawn ngai lovang. Tanrual hi chakna a ni takzet e, I tangrual zel ang u.
BMA AW chhiar nuam le.

Vol. XVIII Issue No. 31 Bangalore Mizo Association Pathianni Nitin Chhuak Chanchinbu Date: 11th Nov., 2012 Phek Thumna

Article chhunzawmna Ka thu chhiar chhuah chuan mi va han barakhaih tak ngai em! Engtin nge ka tih dawn tak? Ka va han buai tehreng em! Dawt sawi lovah chuan khatiang nula kha engtik ni ah mah ka tawng leh ngai dawn si lova. Mahse ka thianpa duh leh hmangaih ber ani si a. Kekawr bul sen nge a dum? Nge kekawr bul ha lovin ka inkhel zawk mai dawn! Ka buai tak meuh ani e. Ka rilru buai a zual zel avangin ngaihtuah chhunzawm lovin ka mutsan ta zawk a. Zing ka tho a, chu lehkha bawk chu ka chhiar nawn leh sak a. Ka tih tur diktak ti tur chuan ka rilru pawh chu ka siam fel ta nghal a. Paper leh pen chu kengin thu ka ziak ta mawlh mawlh a. Ka thianpa ka phone phei tlai inkhel turin. A tui ber leh a thiam ber anih avangin ka sawm chu a hnar ngai lova. Tichuan inkhel tur chuan kan chhuak phei ta. A ngai te bawkin Basketball court chhungah chuan kan han sapatal leh ta a. Tlai banzai ka rel ta. Kan intiam ang ngeiin dawrah chuan chu nula chu alo thu leh. Ka thianpa chuan hmuh a duh tawh loh avangin min kalsan. Keiin thil lei tur chhuanlamin tukin zinga ka thu ziah chu pe turin ka lut phei ta a. Chu nula no hmeltha leh pianthiam chu lehkha ka pek pah chuan, Hei hi ani ka rilru dik tak chu tiin ka lehkha chu ka pe ta, chu lehkha chhungah chuan he thu hi a chuang si a. I rilru diktak min hrilh avangin kei pawn ka hrilh ang che. Nula fel, hmeltha leh pianthiam an sawi zawng zawng neikimtu zawng I ni ngei e. Nang duhtu che pawh keini thian dun chauh lo pawh mi sang tam tak an awm ngei ang. Mahse hei chauh tal hi chu min hriat sak rawh. Ka thianpa hi kei ai tluka hrechiangtu, hmeichhe lamah ngat phei chuan Pathian tih loh chu an vang ngawt ang le. Bialnu a nei ngailo mai pawh nilovin ala nei lo hrim hrim a, a ngaihsak ngai bawk lo. Nang chauh hi ani kan nula za tam tak zinga a ngaihsak hmasak ber che chu ni. Hemi vang pawh hian lawmthu sawi tur zawk I ni asin. Ka hnena nang a duhzia leh hmangaihzia thu a sawi te hi I hnenah chuan alo sawi lo pawh ani thei, mi zakzum leh tawnhriat ala neih loh vangin. Mahse ka hnena aw tham hnuai dap tawha a sawi hi chu kei chuan ka ring mai pawh ni lo, a tak tak anih avangin ka pawmsak mai zawk ani. Nang chuan ani lo duh leh hmangaih ilo nei pawh ani thei, mahse kan hmangaih ai chuan min hmangaihtu hi an hlu zawk si a. Chuvang chuan ka thianpa hi I tan a hlu a ni. A duhna leh hmangaihna che hi khawngaihin chhiar thiam sak hram ang che. Vawiin tlai ah pawh I thu zawm lovin kei chuan kekawr bul dum hain, ka thianpa zawk chu a sen ka hak tir si a. Ka haktir chhan pawh a hre kher lovang, a hriat pawh a ngai lo, I hnenah a nunpui mek zawk ani. Chuvangin ka thianpa tan ka dilsak leh a che. Khawngaihin a duhna leh hmangaihna aw ka hi lo chhawn ve tawh la, tichuan kei chu in inkarah PALAI RINAWM NI TURIN ka lo in buatsaih zawk ange. (Tv. Carey, thuziak ngaihnawm tak min pek avangin kan lawm e. Han ziak zel teh. Editor)

Khawnglung Run
Vanlalpeka
Min la ngai maw, min la vei ve maw, Ka lungdi khan min la ngai ve maw? Film Hlawhtling Khawnglung Run Mizo tawng film buatsaih tawh zinga belhchian dawl ber pakhat Khawnglung Run hi en a manhla hle a, Mizo Steven Spielberg Leitlang Picture neitupa Mapuia buatsaih a nih vangte pawh a ni ngei ang. He film hi Rs. 11, 00, 000 senga buatsaih a ni a, Action Romantic Epic huanga dah tur chi a ni awm e. 20th May 2010-a chan tan a ni a, Khawnglung khaw lem hi Darkhuang tlang, Thenzawl rama din chawp a ni. Tui Rihiauah te, Mat luiah te, Nghasih tlangah te, Kawmzawlah te, Pukthiangah te chan a ni a. Thla thum vel chan a ni a, a endikna atan kum hnih dawn an hmang thung. Chhim leh Hmar Indo (1856-1859) Kum 1857 khan Sailo lal hoten anmahni eptu an hnam unau Zadeng hote an tudawl fel kim a, Lusei awmna tlang dung chu an thut deuh vek tawh. Hnam unau ni mah sela, anmahni khaikhawmtu rorelna pakhat a awm loh avangin an indo fo thin. Lalsavungan chhak a nawr a, a tum angin a hlawhtling lo va, ram luah chungchangah an buai zui bawk. Tichuan, silai pakhat inchuh avangin an indo zui a, Chhim leh Hmar indo chu a lo chhuak zui ta a ni. Vutan khawchhak Pawih Khawtindala a ruai a, Khawnglung chu an run ta a ni. Nunau tam tak an that a, sal tam tak an man bawk. Thlirfimna & Fakselna A script ziaktu (C. Lalengkima) hian tawngkam a hmang uluk hle. Entirnan, Lusei hote zingah chuan thian inkohna atan lawmpa tih a hman laiin Pawih (Lai) ho zingah chuan kawipa tih a hmantir thung. A fiah hle a ni. Thangi (Zoremsangi Hnamte) hi hmanlai Mizopain hmeltha an tih chi a ni, entu tam tak lungawi lohna a ni thung ang. Alex-a hi Apocalypse changtupa anga zuan zang a ni a, hei hian a tihmuhnawm. Kham chawi vel khuaa an lo neih dan erawh phai ram leilet a ang deuh. An hnung lawka ral an awm laia lawi that zan an hmang te, ral rama fungki ruak te hi thil awm lo tak a nih laiin a lemchan kalphung erawh a tihmuhnawm phah thung. History Atanga Thlirna History lama a lan dan chuan Chalthanga hi Chalkunga zawk a ni a, ral hote hi kham bung zung atanga lawn kai an ni a, Thangi hi ral hmaa thi ni lovin tuilianin a lak a ni thung. Pawi khawitu ber anga tarlan chu Pawihho (Laiho) an ni. Mahse, Khawnglung Run hi chhim leh hmar indo si per pakhat ang deuh a ni a, Vuta ruahmannaa Khawnglung run pawh hi thleng niin a lang bawk. Tin, selu phan hi pialral kaina nena inkaihnawih a ni. Sedawi an hman tumin sepatuai an talh a, a lu tarna tur thingse kak mawi tak Sadawt hovin an phun thin a, chu chu selu phan an ti. Thangthar tam tak chuan kan hre tawh awm lo ve. Hnam Nun leh Hnam Kulh Thil chhinchhiah atana tha tak pakhat chu Mizorama inrun rapthlak ber chu, khaw him berah a thleng a ni. Kan chan thatna hian dawngdahna min siamsak chuan kan chan chhiatna bul a ni thei. Tin, hetih rual hian a entu lawmte pawhin mawhphurhna kan nei. Mizo film leh music industry hmasawn thei lo va siamtu chu kalphung fel lovin a hrinchhuah piracy hi a ni. Tute mah indem tur chuang kan awm awm lo. Mahse, hma kan sawn erawh a tha ang.
(Tv. Peka, thuziak belhchian dawl leh fing tak min pek avangin kan lawm e. Han ziak zel teh Editor)

Vol. XVIII Issue No.31 Bangalore Mizo Association Pathianni Tin Chhuak Chanchinbu Date: 11th Nov., 2012 Phek Lina

DANPUIINDIA DANPUI- FUNDAMENTAL RIGHTS HNUAIA ZOFATE CHANVO

K.Remruatfela K.L.E. Law College, Bangalore
Zofate hi Lalpa zawnchhuah ram kan ni tiin hriatna nei sang zualten an sawi thin a. Thenkhat chuan thu tak hla takah pawh kan ngai lo a ni maithei. Amaherawhchu, mak taka maia India Union chhunga duhsak tak leh duat taka humhim kan nihzia han hmuh hi chuan kan chan bik hi kan vannei hle tihloh rual a ni lo. India ram hi khawvela Democracy ram lian ber niin India Constitution hi khawvela Constitution sei bei a ni bawk a. Khawvel ram hrang hrang Constitution nena enrem a nih tlat avangin khawvela Constitution chhuanawm leh rintlak berte zinga mi a ni hial ang. Chu danpuiah chuan Zofate leh hnam hnuaihnung zawkte hian kan hnampuite neih ve loh duhsakna leh hamthatna tam tak chhiarsen loh kan nei a. India Constitution hi ngunthluk taka han zirchian phei chuan kan tan liau liaua duan a lo ni emaw tih theih hial tur khawpa mawi a ni. India Constitution chhunga chang (Provision) pawimawh ber lai, Fundamental Rights an tih mai zinga Art. 14 ah India khua leh tui tupawh inthliarna awm miah lova intlukna thu kan hmu a. Keini, hnam naupang tak leh kan phai vai hnampui, hmakhasang ata tawha khawvel finna lo tem hmasa tawh tute nena inthliarna awm map lova dan pakhat tlawhchhanna hnuaia dikna thuhmun kan neih ringawt pawh a lawmawm tawh tehreng nen Fundamental rights tho Art 15 ah keini ang hnam hnuaihnung leh naupang zawkte tana a tha lama duhsak kan hlawh bikna tur thu kan hmu leh a. Clause 4 ah phei chuan chhiarsen a ni lo. Tin, chumai a la ni lo cheu Art. 16 ah keini Zofate leh hnam hnuaihnung zawkte tana sawrkar hnaah thleng seat hauhsak bik tura dikna kan la hmu leh fo bawk a. A ropuiin a lawmawm tih mai loh chu sawitur dang a awm lo. Tin, heng zawng zawng bakah hian Art 25-28 kan chhiar chuan India khua leh tui tupawhin kan sakhaw duh zawng be tura zalenna kan neih thu kan hmu leh a. Hei hi ngunthluk taka ngaihtuah chuan a ropuizia hi namai a ni lo. Kan hriat theuh angin India ram hi Hindu tamna hmun leh a zikchhuahna hmunpui a ni a. Heng kan hnampui, vai tiha kan koh thinte hi rilru zim leh inhawnglo pu chu ni se an duh chuan he ram, India ram hi Hindu lal ram, Hindu sakhaw chauh biak theihnaah an siam thei tak meuh a. Mahse, keini hnam tlem zawkte hmai eng zaha ram danpuiah meuh zalenna min chhawpchhuaksak hi a ropuizia I chhut ngun fo ang u. Han chhiar phei leh zel ila Art. 29 & 30 ah chuan India sawrkar hian Nationalism pahnih ni lova identity pahnih neih min phalsak thu kan hmu leh a. Kan ram danpui hian thil a lo hawl chikim khawp mai. Art 29 hi keini Zofate tan chuan dan rangkachak niin ka hria a. Hetia India Union chhunga him taka kana wm tawh hnua kan hnamzia a boral mai loh nana kan chibing hnamzia chawinung tura dikna leh duhsakna min pek hi a ropuiin a hlutzia thu leh hlain a puangchhuak zo mawlh lo a ni e. Heng zawng zawng han chhutlet neuh neuha han ngaihtuah chian tak tak hi chuan India Union chhunga awm awm reng kan ni tih hi hmuhmaih chi rual a ni lo. Kan ram danpui, thuneihna sang ber neituin namen lovin humhimna min pe a. Tun thlenga thuneitu sang zawkten chu thuthlung chu vuana raltiang kan kai ve na tura an hnamze pui pu ve miah lo te pawh kan chunga that an chhuah dan han hmuh phei hi chuan hnuk hi a ulh lo chauh zawk a ni. Chuvangin, kan ram hi keini hnam tlem zawkte chunga an thatzia hi hriaiin hnamdangte hmusit mai lovin thianah i siam zawk tawh ang u.

Look Alike!
(Chawngkhum Dan Tlang Huat loh) Thlalakah tarlanah hian, Tv. Hriatkima Chenkual hian kawr-dum nge a hak kawr-var? Hre thei rawh u lemm! Tlangval kawr-var ha nihhlawhzia hi Bangalore Mizo te hian kan hriatpui em aw? Bangalore Mizo tlangval hleitling leh inkhaithli, fel leh zaidam tak, Tv. Hriata a ang an ti, inkhel entu ten! Inkhelh zawh hian a luck zual sawtin kan ring. Tv. Hriata hi, kumina BMA Sport & Games secretary i/c niin, mawhphurhna a neih reng reng phat mai lovin, tha takin a tihlawhtling thin. Ani leh a thawhpuite hmalakna avangin BMA Football Tournament leh Sport Day hlawhtling taka hman a nih kha. BMA hian Tv. Hriata hi a hre reng tawh ang.