Nama NIM

: Samuel Sitompul : 08.2388

Mata Kuliah : Bahasa Batak Dosen : Pdt. B. H. Lumbantobing, M. Th

Pangantusion ni na Monding Hombar tu Hakristenon

Sude do hita jolma ingkon mate molo jumpang tingkina. Sada pe sian hita ndang adong na boi pasidinghon i. Alai pangidoanta, molo tung marujung pe nian ngolunta sian hasiangan on, asa jolo sahat ma nian hita tu na saur-matua. Ima Songon pangidoan dohot elek-elekta tu Tuhanta. Alai molo tung masa pe na masa i, asa dapot ma di hita Songon hata ni endentaBuku Ende nomor 539: 4 Di ngolu ni hakristenon, dung mate daging i, gabe sirang do tondi i sian daging i. Jala tondi i, na paimahon ma i muse di ari haroro ni Jesus i, i ma di ari panguhuman i. Jesus i ma na gabe Tuhan ni angka na mate dohot na mangolu. Ai jumpang do muse sogot angka naung jumolo monding i dohot sude na mangolu dope di ari ni Tuhan i. Ndang adong na tading sad ape, jala naingkon parsidohot do hita sudena disi. Jala ndang adong na bunu sian Ibana, na papataron na ma saluhut naung taula na di portibi on. Ai Jesus i ma na gabe panguhum di hita angka jolma manisia. Tung balga di nian holong ni Tuhan i tu portibi on, tung so olo do Ibana pasudahon aha naadong di portibi on, holan ala ni dosa na binahen ni jolma manisia. Dibagasan parngoluan on adong jala ringkot do hita mangantusi angka adat nang hasomalon na adong di luatta, tarlumobi ma I songon hita bangso batak. Tung mansai godang do ragam ni adat na adong di hita, boe do I di las ni roha nang habot ni roha. Nasa na adong di bagasan parngoluan on na laho salpu do sude. Suang songon I nang ngolu on, na ingkon marujung do, i ma na nidok na Hamatean. Dang adong na boe sian hita jolma na laho pasidinghon i. Di bangso batak andorang so sahat/masuk dope hakaristenon adong pangantusion ima songon falsapah dihalak batak na mandok; daging gabe tano, jala tondi na gabe begu. Tung mansai tangkas do pangantusion I tarida molo di halak batak, jala sahat tu saonari pe, adong dope hita bege taringot tu pangantusion/hata na sisongoni di halak Batak. Nian, molo sian pardagingon, maol do tarjalo hita hamatean manang parmonding ni dongan na tahaholongi. Alai, ndada adong na tarbahen ni jolma laho paulakhon i. Jala di halak batak molo nunga marujung ngolu ni natoras manang angka oppung (leluhur) ni nasida, sai olo

dope nasida mamele, ala di rimpu nasida do tindi ni natoras manang oppung (leluhur) ni nasida I boe mangalehon manang mangalehon angka pasupasu. Alai asing do pangantusion ni na monding dung sahat hakristenon i tu tano Batak. Ia jolma I, natinompa ni Debata Jahowa do. Singkop do di tompa, nang pe ditompa sian tano, alai dilehon do hosa dohot tondi tu bagasan daging on. Tung uli situtu do nian panompaon i. alai, ala pangalaho ni jolma i na so mangulahon na pinatikhon ni Tuhan i, gabe mardosa ma jolma i hinorhon ni na niula na. Gabe dapot mara ma jolma i, jala gabe manghorhon hamatean. Tung borat do uhum ni na mangulahon dosa i di bahen Tuhan i, na manompa saluhut na adong. Dung ro Jesus tu portibi on, ndang gabe habiaran be hamatean i. Ai dung tuat ibana tu portibi on, jala mate ibana dungi hehe ibana sian na mate i, gabe patar ma saluhut na huaso na mangalo hamatean i. Jolma na dibagasan linggoman ni dosa hian, gabe di patiur jala dipabali Jesus do jolma i sian linggoman ni dosa i. Gabe adong ma dalan naimbaru na binoan ni Jesus i. Dang be tu parmaraan manang gabe hamatean na saleleng ni lelengna angka na ro mandapothon Jesus i. Pola sihabiaran be hamatean i? Ai nunga Jesus nampuna hita angka halak Kristen na porsea jala mangolu di bagasan ibana. Tama situtu di hita mandok mauliate tu Tuhan Jahowa, ala ibana do na papunguhon hita, jala dilehon di hita anakNa na sasada i. Ai tung saluhut na mangolu do ingkon mamolus hamatean i, alai ganup na porsea jala mangula jala ala ni Tuhan Jesus Kristus, ndang mate ganup na porsea i, alai na dapotan do di hangoluan naung pinarade ni Tuhan i tu angka huriaNa, sogot. Rura na ni linggoman ni hamatean i, gabe padosdoson ni Tuhan i ma di ari hasusuda ni portibi on. Gabe tardas nama sude, ndang gabe sihabiaran be hamatean i, alai gabe dalan ni halak na porsea nama i laho manopot Tuhan na, jala pajumpang dohot Tuhan na. Asa songon na nidok ni apostel Paulus, Kristus do hangoluan jala laba nang hamatean. Jadi songon naung gabe halak Kristen hita, naung tinobus ni Kristus di hau pinarsilang, sian angka dosanta, naung pataluhon hamatean, ala hehe Ibana sian hamatean i jala manaek tu Surgo, na ingkon marpos ni roha jala mangolu di bagasan tangiang na gomos ma haporseaonta songon halak Kristen hita, tu Ibana. Unang pola managm hita tu hamatean i, alai managam ma hita di haroro ni Tuhan i. Ai na ingkon sibolusonta di hamatean i, jala ndang adong na tuk huaso ni portibi on na boi laho pasidinghonsa. Martingki do saluhut na na diportibi on, alai anggo huaso dohot hata ni Tuhan i, tung so mansohot do i jala ro di saleleng ni leleng na do i. Holan paposhon rohanta do hita tu Ibana na marhuaso i.