Siku agi pungka lelaki enda diberi kelala

mySarawak | 12/12/2009 | 0 Comments Email This Post Print This Post (No Ratings Yet) SM (B) Mattew Ijo ngarika sida minta perintah nipak pemedis udah ngadai nyawa ngetan menua MIRI: Perintah sekali agi dipinta ngerembaika japai jari penyiru iya ngagai bala bekau sedadu tauka polis enggau border scout ke udah berambunka nyawa ngetan menua dulu suba, kelebih agi maya konfrontasi.Siku bekau Rinja Sarawak ke mega udah gawa nyadi polis pilpos (PGA) Serjin Mejar (B) Mattew Ijo ak Muyang @Mattew Ijok minta opis perintah anang enda jampat betatika pengelikun enggau pengelantang pendiau bala sekeda urang ke udah ngetan menua ngelaban keminis sereta mega jam konfrontasi kelia. Iya empu madah diri udah ngadai nyawa ngidupka siku komando bansa Australia ba menua Silik semua sempadan Indonesia dalam taun 1962 sereta mega bisi sama enggau ngesah menua Brunei nyaga Limbang ari penyarut kena 11 Nov, 1962 menya. Naka kediatu, aku endang nadai kala nerima pampas tauka kelaie budi udah begadaika nyawa ngetan menua enggau bansa, lalu diatu mina idup bepanggai ba pinchin aku genap bulan, ku Mattew lebuh bejaku ngagai pemberita surat berita tu kemari. Nunda padah Mattew, iya udah gawa dalam servis polis pengelama 23 taun sebedau pinchin kena 31 Dis, 1988 lalu diatu diau di Piasau. Ku iya, nitih rikot, servis iya ba sedadu/Rinja nyengkaum dalam sekeda operasi besai baka Malaya Sigau tauka Malaya Emergency (1948 1960); Konfrontasi Malaysia/Indonesia (1963 1965); Operasi Insurgensi Dalam Sarawak, iya nya Ops Kilong I, II di Sarikei (1968 1969); Ops Lada Pedas I, II di Sibu (1970); Ops Sarak di Sibu (1970); Ops Jala Raja di Nonok/Serian (1971 1972); Ops Makong di Jalai Serian/Kuching dalam taun 19721973 sereta mega enggau sekeda operasi bukai. Ku iya, iya kala enggau urang betimbak ngelaban munsuh maya ke gawa nyadi Iban Iban Tracker enggau Border Scout ke alai sida endang betimbak ngelaban keminis maya operasi ke dipasuk iya. Nya alai kami minta perintah anang enda ibuhka penanggul enggau penudah kami laban kami meh ke ba pun jalai ngetan sereta nyaga menua ari munsuh maya konfrontasi dalam taun 60an menya, ku iya agi. Ka tambah nya, agi mayuh bala bekau sedadu tauka border scout ke nadai ditemu perintah taja pan sida udah ngadai nyawa ngetanka menua enggau bansa dulu menya. Aku ukai nganu tauka ngutuk sapa-sapa, tang opis perintah ke relevan, patut anang enda balat agi beratika penanggul enggau pengelantang pendiau bala bekau sedadu tauka polis ke udah berambunka nyawa ngetan menua ari dialahka munsuh, ku Mattew ke mega ngayanka midul ulih iya ngagai pemberita The Borneo Post/Utusan Borneo. Lebuh ditanya komen pasal pengawa enggau budi diri ngagai menua enggau bansa, iya madah, ukai pekara ti mudah, laban kelimpah ari kala engkerau perut laban lapar, sida endang genap jam nangika diri kena timbak, lebuh ke bejalaika pengawa dalam babas tauka dalam kampung dalam maya sida ke bisi operasi dalam babas enggau ba nengeri semak sempadan. Asai ke semampai bisi seterum ngelimpas mua, ku Mattew lebuh ngenang pasal penangi nya. Ada di menua Jambu, Nanga Delok, Lubok Antu, dalam Sri Aman, Mattew agi mengkang ingat lumur polis iya RF/45320. Iya madah diri berengkah gawa kena pangkat Koperal enggau polis pilpos di Simanggang (diatu Sri Aman) dalam taun 1962, tang iya enggai madah enggau silik pasal pemerinsa sereta pemedis maya ke agi gawa kelia kena nentuka Menua Sarawak enggau Malaysia tu likun ari munsuh dalam taun 60an enggau 70an suba. Aku ngarapka udah pekara tu dibantai ba surat berita, opis perintah ke relevan ulih mansang ngagai pun menua tauka ba sebarang alai endur, ngiga bala pungka lelaki ke nadai kala dikelala tauka ditemu, taja pan sida udah ngadai setengah ari umur sida idup belaban enggau munsuh ngetanka menua enggau bansa, ku iya nampung jaku.

Sebarang sapa bala pemacha mayuh ke deka nemu enggau silik agi pasal sida ke belaban enggau munsuh rambau konfrontasi menya tau ga nanya lalu ngiga iya ba lumur talipaun 085-659148.