OSO BERANDU IRITSI DA ETA MESFIDANTZA HANDIA SORTZEN DU BEHIN ETA BERRIRO HITZA BETE EZ DUEN UDAL GOBERNUAREKIKO Donostiako EAJ-PNV udal taldeko bozeramaileak, Eneko Goiak, nabarmendu du udal Gobernuak aurkeztu duen udal aurrekontuarenproiektua oso beradu iritsi dela, beste urte batez ere epetik erabat kanpo eta gainerako erakunde guztiek aurrekontuen inguruko eztabaida izan dutenean, eta mesfidantza handia sortzen duela orain arte aurrekontuen inguruan hartutako konpromisuak neurri handi batean betetzeke utzi dituen udal Gobernu honekiko. Bilduren Gobernuak, protagonizatu duen bezalako kudeaketa pobrea protagonizatu ondoren ez du jadanik batere krediturik, adierazi du Goiak. Udal Gobernuak aurrekontua parte-hartzaile delako egiten dituen aipamenak ez datoz bat Bilduk Legealdian zehar izan duen ibilbidearekin; izan ere ez baitu ezertarako aintzakotzat hartu herritarren partaidetza egin dituen hiru aurrekontu proiektuak egiteko garaian. Laugarren aurrekontura iristean -hauteskundeen aurretik, hain zuzen- gogoratu da Bildu herritarren partaidetzaz. Horrek pentsarazten du aspaldidanik irudian erabat zentraturik dagoen Gobernuaren beste argazki bat besterik ez dela, baieztatu du Eneko Goiak. Edonola ere, talde jeltzale donostiarrak Legealdi osoan egin duen bezala jokatuko du aurrekontuen inguruko eztabaida honetan ere: erantzukizunez eta Donostiako interesak buruan. Horretarako, gure jarrera mugatu aurretik, sakon aztertuko dugu Bilduren Gobernuak proposaturiko 2015eko aurrekontuen proiektua. Legealdi osoan zehar egin dugun bezalaxe erantzukizunez eta Donostiaren interes orokorrak begibistatik galdu gabe jokatuko dugu oraingoan ere, baina ahaztu gabe Bilduk bete gabe utzi dituen konpromisoen zerrenda luzeak aspaldidanik agortuarazi zuela udal Gobernu honen kreditua , amaitu du Eneko Goiak.