Rabu, 24 Desember 2008 (Malam) Prolog Liturgi IA : Saluhut do ditompa Debata, langit, tano laut dohot na sa isina. Ditompa do angka suansuanan, pahanpahanan, dungi jolma. Saluhutna i manjadi do marhite hagogoon ni Debata di bagasan huasoNa na badia i. Nuaeng tabege ma pangantusion na sintong taringot tu panompaon ni Debata. Liturgi IA No. 01. (Kel. St. M. Sinaga/br. Siregar) Mansai uli saluhut na tinompa ni Debata, angka dolok dohot rura, angka suansuanan na rumatarata, saluhutna i patuduhon hinauli ni panompaon ni Debata, tung na so hadodoan do parbinotoanNa. Boha do ulaning i? Songon dia do dibahen Debata manompa nasa na adong i? Sian dia do bahan manang alat ni Debata laho manompa saluhutna i? Liturgi IA No. 02. (Kel. St. M. Sinaga/br. Siregar) Ia panompaon na pinatupa ni Debata songon on do i. Ndada marhitehite alat manang ulaula Debata manompa, ai ndada songon pande Debata manompa nasa na adong, alai lobi sian i do. Holan marhite hataNa sambing do. Molo didok Debata jadi ma ho na tiur, jadi do. Songon i do sude. Sandok molo didok Debata jadi, manjadi ma songon na nidokNa i. Liturgi IA No. 03. (Kel. St. M. Sinaga/br. Siregar) I do tutu, tung halongangan do panompaon ni Debata, ai ndang sian na adong Debata manompa, alai sian naso adong do gabe adong. Ndang adong na so tarpatupa Debata. Angka dia ma na tinompaNa i? Liturgi IA No. 04. (Kel. St. M. Sinaga/br. Siregar) Di mula ni mulana ditompa Debata ma langit dohot tano. Ditompa ma muse na tiur. Digoar Debata ma na tiur i arian, jala dibahen Debata ma parsirangan ni na tiur sian na holom, goar ni na holom i borngin. Liturgi IA No. 05. (Kel. J. G. Girsang/br. Siahaan) Di ari paduahon, ditompa Debata ma hajanghajang diparsitongaan ni angka aek, baen parsirangan ni aek tu aek. Dungi, digoari Debata ma hajanghajang i langit. Liturgi IA No. 06. (Kel. J. G. Girsang/br. Siahaan) Di ari patoluhon, ditompa Debata ma tano asa tarida na mahiang. Jala parpunguan ni angka aek, digoari laut. Jadi, di patubuhon tano i ma duhutduhut dohot suansuanan na marparbue tudos tu mansamna. Liturgi IA No. 07. (Kel. J. G. Girsang/br. Siahaan) Di ari paopathon, ditompa Debata ma panondang hajanghajang ni langit, baen parsirangan ni arian sian borngin; jala na gabe tanda paboa titik ni padan dohot angka ari dohot angka taon, asa disondangi tano on. Liturgi IA No. 08. (Kel. R. Purba/br. Sinaga) Di ari palimahon, ditompa Debata ma angka dengke, dohot nasa na marhosa, angka na manjirir di bagasan aek, ro di nasa pidong na martongatonga langit na marsiboan mansamna. Liturgi IA No. 09. (Kel. R. Purba/br. Sinaga) Di ari paonomhon, ditompa Debata ma jolma tumiru rupaNa, tudos tu pangalahoNa, baoa dohot boruboru nasida ditompa, asa dirajai sandok tano on. Dungi diida Debata ma sude na tinompaNa i nunga denggan situtu.
Liturgi IB No. 01. (Kel. W. Hutagaol/br. Sinaga)
Dung i dijadihon Debata Jahowa ma jolma i sian orbuk ni tano on jala diullushon tu bagasan bungbung ni igungna hosa hangoluan i, gabe martondi na mangolu jolma i. Liturgi IB No. 02. (Kel. W. Hutagaol/br. Sinaga) Dung i tarlalap modom ma si Adam dibahen Debata Jahowa, jadi dienet ma sada sian rusukna, jala dilangkophon sibuk tu pambuatanna i. Dung i dipauli Debata Jahowa rusuk na binuatna i sian si Adam, bahen boruboru, jala ditogu ibana tu si Adam. Liturgi IB No. 03. (Kel. M. T. Purba/br. Simangunsong) Alai asing do dibahen Debata manompa jolma sian na manompa angka na asing. Ia angka na asing i holan hatana do dibahen Debata mandok jadi gabe manjadi do saluhutna. Alai laho manompa jolma, ndada holan hata i be didok. Jumolo do dibuat Debata tano i, ditompa suman tu rupaNa. Suman tu rupa ni Debata dijadihon jolma i hape, angka na asing ndada suman tu rupaNa i ditompa. Asa andul do sumurung jolma i suman tu Debata. Liturgi IB No. 04. (Kel. M. T. Purba/br. Simangunsong) Alai tahe dia do lapatan ni i, boasa didok suman tu rupa ni Debata do jolma i ditompa. Ai songon dia do rupa ni Debata, ai songon rupa ni hita jolma on do rupa ni Debata? Ala ditompa Debata jolma i tumiru rupana berarti songon rupa ni hita jolma on do rupa ni Debata. Ndada songon i tahe angka dongan? Liturgi IB No. 05. (Kel. J. Simajuntak/Pak. Lesman) O o o o ..ndang songon i antong daba, toho do ditmpa Debata jolma I tumiru rupaNa, tudos tu pangalahoNa. Ai ndada rupa pardangingon disi. Ai Tondi do debata, jala rupa ni Debata I ma: dame, holong, hasintongan, i do rupa ni Debata. Asa pardame, parholong, huhut marhasintongan do debata. Asa manang ise pardame jala parholong, na olo manghatindanghon hasintongan, i do songon tiruan ni Debata, laho mangarajai nasa na tinompa. Liturgi IB No. 06. (Kel. J. Simajuntak/Pak. Lesman) Dungi patorang ma jolo antong daba, boasa ndang sian holiholi ni patna, manang sian hau tanggurungna, manang ndang sian holiholi ni ulu ni si Adam ditompa boruboru i? Liturgi IB No. 07 (Kel. J. Simajuntak/Pak. Lesman) Songon on do i, umbahen na sian rusukna ditiompa Debata si hawa, na marlapatan:pendamping do boruboru i. Alai nang pe didok pendamping, setarap do baoa dophot boruboru i. Ai ndang sian holiholi ni pat ni si Adam ditompa Debata boruboru i asa degedegeonna, jala ndang sian hau tanggurungna asa tuganonna karejo. Manang ndang sian holiholi ni uluna, asa huntihuntionna, manang junjungonna boruboru i. I do maksudna umbahen na sian rusuk ni si Adam ditompa borubopru i. Lapatanna, ingkon rap berdampingan do nasida na dua, setarap marsihaholongan. Liturgi IB No. 08 (Kel. J. Marpaung/br. Sidabutar) Nunga sun denggan situtu diida Debata sude angka na tinompa na i, maradian ma Ibana di ari papituhon i sian nasa ulaonNa. Dungi dipasupasu Debata ma ari paradiananna i jala diparbadia i. Alai tahe, songon dia do lapatan ni i didok maradian. Ai naung maradian do Debata sahat tu nuaeng? Manang ndang adong be ulaon ni Debata dung panompaon i? Liturgi IB No. 09 (Kel. J. Marpaung/br. Sidabutar) Ndang songon i lapatan ni i. Bege hamu asa hupatorang. Dung sun ditompa Debata nasa na adong, maradian do Ibana tutu sian nasa ulaon panompaon, alai ndang maradian Ibana sian ulaonNa, torus do Debata mangulahon angka na denggan na ringkot di ngolunta, dipasupasu do hita saluhutna. Tapuji jala tapasangap ma Debata naung manompa hita dohot na ringkot di hita jala dipasingkop do marhite pasupasuNa di ngolunta. Liturgi IB No. 10 (Kel. J. Marpaung/br. Sidabutar) Antong molo songon i patut ma hita mamuji Debata ai diparmudumudu do hita sahat ro di nuaeng. Dilehon do gogo tu hita ganup ari, dilehon hahipason dohot nasa na porlu di hita di hangoluan on. Ala ni I tapuji ma goarNa, jala taooloi na nidokna. Amen. PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog liturgi II : Diginjang ni roha i do marhabangsa sibolis i laho mangelaela jolma i asa lam tangkang jala mangalaosi Patik ni Debata, panghorhonna gabe uhum ni Debata ma. Tapaihutihut ma liturgi on. Liturgi IIA No. 01. (St. T. Purba) Di mula na i tung mansai denggan saluhutna ditompa Debata, laos dibahen Debata ma aturan dohot patik siihuthonon ni jolma i, asa denggan sude. Alai ndang puas roha ni joma i, ndang adong hasabaron, pintor dilaosi jolma i do patik dohot aturan na binahen ni Debata. Liturgi IIA No. 02. (Ny. St. T. Purba/br. Panggabean) Mansai sonang jala denggan do inganan ni jolma na parjolo i dibahen Debata di porlak Eden i, jala tusi ma dibahen jolma na jinadihonna i. Ndang adong na hurang, singkop do sude diparade Debata di jolma na tinompaNa i. Liturgi IIA No. 03. (Kel. H. Samosir/br. Silalahi) Nuaeng tabege ma mula ni dosa dohot pangonai na tu jolma na parjolo i. Didok di Bibelta i; ala habisuhon ni ulok na paotootohon jolma i gabe dibuat jala dipangan si Hawa ma parbue ni hau i, laos dilehon ma muse tu si Adam. Liturgi IIA No. 04. (Kel. H. Samosir/br. Silalahi) Nunga madabu jolma i tu dosa. Anggo di Bibel I, didok do ala na dipangan si Hawa i do parbue ni hau na diparsitongaan ni porlak i, naung ni oraan ni Debata mandok: alai anggo parbue ni hau na diparsitongaan ni porlak on, ndang jadi panganonmu, jala ndang jadi jamaanmu sian i, ido didok Debata. Liturgi IIA No. 05. (Kel. H. Samosir/br. Silalahi) Ia parbue ni hau i, i ma parbue ni hau na diparsitongaan ni porlak i, na so boi jama on apalagi ma panganon. Didok Debata do : unang pangan hamu sian i, jala unang jama hamu, asa unang mate hamu. Alai tung mansai bisuk do sibolis mangelaela jolma i asa manundali Debata. Disuanhon sibolis ma roha diri tu jolma i gabe pia matana marnida, laos dipangan, gabe mardosa ma. Liturgi IIA No. 06. (Kel. T. Samosir/br. Sianipar) Ai mansai godang do aturan dohot patik ni Debata na nilaosan ni jolma. Dosa na parjolo I ma: nunga diaturhon Debata ingkon berdampingan do nasida na dua, marsisungkunan. Hape dang jolo marpanungkun si Hawa tu sinondukna si Adam, nunga pintor dibuathon, jala diallanghon parbue ni hau i. Hape nian sian rusuk ni si Adam do ibada ditompa. Nda une ma jolo martungkar pingkiran jala marpanungkubn ibana tu sinondukna si Adam? Ai baoa i do ulu ni pardihutana di rumah tangga songon Kristus ulu ni Huria i. Liturgi IIA No. 07. (Kel. T. Samosir/br. Sianipar) Antong hape angka dongan dung taboto songon i, ndang boi holan sabola manang holan sahalak hape mambuat keputusan di parrumatanggaon, ingkon jolo marsisungkunan do jala marsitungkaran pingkiran. I do dosa parjolo i, ala ndasng oo ibana manungkun tu sinondukna. Ai boasa gabe tuminggil si Hawa tu husiphusip ni sibolis i, sian tu sinondukna? Antong tumagon do na marsaripe marsisungkunan soal rumah tangga dari pada tangihonon hata ni sibolis. Amen.
PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Liturgi IIB No. 01 (Kel. Drs. J. Marpaung/br. Sinaga) Ai nang si Adam pe mardosa do. Ai boasa dipasombu ibana sahalakna ni si Hawa mardalan ditonga ni porlak i na gabe pulik nasida na dua marsubuat dalanna be, gabe adong ma antong kesempatan ni sibolisa i mempengaruhi boruboru i? aut sugari ma nian torus didamnpingi, jala dihaholongi si Adam si Hawa i tontu nbdang sempat sibolis i manghusiphon na so hasea tu jolma ni si Adam i. I pe, nang tu tingki saonari on, mardosa do angka baoa manang angka ama, molo dipasombu ripena pulik mangula ulaonna sandiri dohot dipasombu holan parompuan I marnatal di hurianta on. Liturgi IIB No. 02 (Kel. Drs. J. Marpaung/br. Sinaga) Dungi muse na mangihut, baoa dohot boruboru do jolma i ditompa Debata. Molo baoa antong, tingkos ma ibana songon baoa na tinompa ni Debata, martanggungjawab dikeluargana dohot tu ngolu ni angka ianakhonna, martanggungjawab dingolu partondion, manguluhon keluarga di angka ngolu partondion i do baoa na gabe ama na raja. Dungi, boruboru i gabe ina na marpanarihon di rumah tangga na. Asa baoa dohot boruboru do jioma i ditompa Debata, ndang adong di tongatonga ni i, manang parlobian sian i. Mangalanggar tu panompaon ni Debata do molo ndang hombar tu pangalahona songon angka baoa dohot boruboru. Liturgi IIB No. 03. (Kel. Drs. J. Marpaung/br. Sinaga) Angka i ma dosa ni jolma na parjolo i. antong molo songon i, holan gombaran ni dosa na sederhana do molo didok parbue ni hau na binuat ni si hawa i. anggo na nidokna I ma: dilaosi jolma angka hatontuan dohot patik nang aturan na binahen ni Debata. Asa ndada holan si Adam dohot si Hawa na mardosa dohot do angka hita di tingki si nuaeng on. Liturgi IIB No. 04. (Kel. Drs. J. Marpaung/br. Sinaga) Alai anggo nuaeng ndang adong be songon ulok dohot parbue ni hau songon na tarsurat i. Alai, panginona ni dosa i do di hajolmaon sahat tu tingki on, na mambahen uhuman ni Debata. Ia gombaran ni parbue ni hau na di parsitongaan ni porlak Eden i nuaeng, i ma : hisaphisap manang hinagiot ni pardagingon na sai tongtong mangalaosi Patik, aturan dohot Hata ni Debata. Liturgi IIB No. 05. (Kel. J. Gultom) Olo toho do i. alai songon parbue ni hau i, adong do dilehon Debata tu hita angka aturan. Adong do aturan diparrumahtanggaon, manang parsaripeon, adong do aturan ni parartaon, adong do aturan ni parhuriaon, parnegaraon dohot na asing. Di sude i adong be do aturanna manang ise na na mangalosi aturan, mardosa do i tu Debata, songon pardosaon ni si Adam dohot si Hawa na jolo i. Liturgi IIB No. 06. (Kel. J. Gultom) Antong molo songon i angka dongan taihuthon ma angka aturan na denggan. Ai dang dihalomohon Debata na so maraturan, ai molo so maraturan, hagaoron dohot parbadaan do ujungna. Molo so olo si Hawa manungkun tu ripena, ala tagian ibana tu hata ni si bolis, ndang na maraturan i, jala dosa na balga do i. Molo ndang holong roha ni si Adam tu ripena, so parduli ibana di inantana, gabe ro ma sibolis i mempengaruhi, na so maraturan do goar ni i, jala dosa do i. alani i, diigil Debata ingkon hot jolma I di aturan tinontuhonna mulai sian panompaon i. Liturgi IIB No. 07. (K. br. Silalahi/Op. Pebri) Ia gombaran ni parbue ni hau na di porlak Eden i nuaeng, i ma: hisaphisap manang hinagiot ni pardagingon na sai tongtong mangalaosi hata, aturan dohot patik ni Debata, nang aturan dohot peraturan Huria i pe. Alai tandap do parulaon ni daging, i ma : parmainanon, hahodaron, pargadombuson, hasipelebeguon, hadatuon, parmusuon, parbadaan, pangiburuon, lessem, teal, rimas, ungutungut dohot angka na so tama diadopan ni Debata. Amen.
PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog liturgi III : Ragam cara dibahen sibolis i laho mangago jolma i, alai ndang dipasombu Debata songon i masa sahat tu ujungna, ai Parasiroha godang do Ibana, alani i diparbagabaga do laho paluahon jolma i sian dosa. Liturgi III No. 01 (Kel. St. W. Simarmata/br. Siregar) Anggo ninna rohanta nian pintor diuhum Debata ma jolma i saleleng ni lelengna ala nunga mardosa; alai ndang songon i sangkap ni rohaNa, ai so tardodo holong dohot asi ni rohaNa i. dilehon dope tingki parasian laho paubahon roha. Liturgi III No. 02. (Kel. St. W. Simarmata/br. Siregar) Songon sintong na mangolu Ahu, ninna Jahowa; tung so lomo do rohangKu mida hamatean ni parjahat, na lomo do rohangKu mida hamumulak ni parjahat i tumadinghon dalanna, asa mangolu ibana. Liturgi III No. 03. (Kel. St. W. Simarmata/br. Siregar) Parasiroha jala Pardenggan basa do Jahowa,lambat tarrimas jala parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Songon asi ni roha ni amaama mida angka anakna, asi ni roha ni Debata di angka na manghabiari Ibana. Liturgi III No. 04. (Kel. A. Sirait/br. Sianipar) Ro ma hamu tu Ahu, asa mangolu tondimuna, ninna Jahowa. Tung sura rara dosamuna songon abit bunga dapdap, bontar do bahenonKu songon itak, nang pe rara songon abit hasumba gabe songon hapas do muse. Liturgi III No. 05. (Kel. A. Sirait/br. Sianipar) Songon on do Hata ni Jahowa : nunga pola hupasisi angka pangalaosim songon ombun, jala songon ombun manorop angka dosam. Sai mulak ma ho tu ahu, ai Ho do sipalua ahu. Liturgi III No. 06. (Kel. A. Sirait/br. Sianipar) Ai songon on do holong ni rohaNa mida portibi on, pola do AnakNa na sasada i dilehon, asa unang mago ganup na porsea di Ibana asa hangoluan na hot ro di saleleng ni lelengna di Ibana. Liturgi III No. 07. (Kel. E. Pasaribu/br. Gultom) Molo tongtong do hita mangolu di bagasan Hata ni Debata, pos ma rohanta, sai na donganan ni Debata do hita laho mangalo hisaphisap ni daging dohot maninggalhon dosanta. Liturgi III No. 08. (Kel. E. Pasaribu/br. Gultom) Antong rap ma hita manjanghon Sipalua i, taungkap ma rohanta asa bongot Raja i di rohanta. Lam marsihohot ma hita umbege, mangguruhon dohot mangulahon hataNa jala dapotan upa ma hita di haroroNa i. Amen
PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog Liturgi IV A: Begeonta ma joujou ni Debata manosoi angka jolma asa mangarade manjangkon haroro ni Sipalua I, ai nunga jonok tingkina na ro Sipalua i tu portibi on, tudushon binsar ni mata ni ari di na laho buha ssiang ari. Liturgi IV ANo. 01. (Kel. D. Sihombing/br. Manalu) Soara ni na joujou di halongonan: Pauli hamu dalan di Jahowa; patigor hamu di adaran dalan balobung di Debatanta. Ingkon gohan do nasa rura, jala parejeton nasa dolok dohot buntulbuntul, jala gabe na hornop do na marnangkok tuat, jala gabe rura tanggurung ni dolok. Liturgi IV A No. 02. (Kel. D. Sihombing/br. Manalu) Bangso na mardalani di bagasan haholomon marnida sada panondang na bolon. Binsar do sada panondang di angka na mangingani tano linggoman ni hamatean. Nunga dipatorop ho bangso i. Nunga dipadiri ho di ibana halalas ni roha na bolon: Marlas ni roha nasida di jolo ni bohim, songon las ni roha di gotilon, songon parolopolopon di na marbagi tabantaban. Liturgi IV A No. 03. (Kel. D. Sihombing/br. Manalu) Ruar ma hamu, ruar ma hamu sian angka harbangan! Sai pahornop hamu dalan di bangso i! Palentes, palentes hamu dalan balobung i, paduru hamu angka batu, patindang hamu ma partonggol di tongatonga ni angka bangso. Liturgi IV A No. 04. (Kel. B. Pakpahan/br. Siahaan) Ida ma, nunga pola martingting Jahowa ro di ujung ni tano on: Paboa hamu ma tu boru Sion: Ida ma, nunga ro hatuaonmi! Ida ma, ihut tu ibana do upana, jala pamaloshonna di jolona. Jadi goaron ni halak ma nasida: Bangso na badia, angka na pinalua ni Jahowa; jala ho targoar na hinaholongan, huta na so sitadingkononhon be. Liturgi IV A No. 05. (Kel. B. Pakpahan/br. Siahaan) Hehe ma ho! Marsinondang ma ho! Ai na ro ma panondangmu, jala hamuliaon ni Jahowa binsar di atasmu. Ai ida ma, haholomon do manghungkupi tano on, jala hagolapon angka bangso; alai na binsar ne ma Jahowa di atasmu, jala marsinondang hamuliaonna di atasmu. Liturgi IV A No. 06. (Kel. R. Siahaan/br. Saragih) Laos ahu sandiri marsaro humongkop jorongku maralohon parangan angka na marmeang muli, jala ndang be boluson ni halak pangarupa nasida, ai nunga marpangulahi rohangku mida hamu anggo nuaeng.Mariaia situtu ma ho, ale boru Sion, marolopolop ma ho ale boru Jerusalem! Ida ma, na ro ma rajam tumopot ho, partigor ibana jala siparmonang; na serep do rohana jala marsihundul di halode dohot di anak ni halode inaina. Liturgi IV A No. 07. (Kel. R. Siahaan/br. Saragih) Jadi dapothonon ni angka bangso parbegu ma panondangmu dohot angka raja mandapothon sinondang naung binsar di ho. Patonggor matam mamereng humaliang! Luhut ma nasida marrongoman ro mandapothon ho. Angka anakmu ro sian na dao, dohot angka borum abingabingonna. Liturgi IV A No. 08 (Kel. H. Marpaung) Ala ni Sion ndang tarbahen ahu sip, jala ala ni Jerusalem ndang olo ahu pompoman, paima binsar hatigoranna songon sondang ni mata ni ari, jala hatuaonna songon sulusulu na marsigorgor. Jadi idaon ni angka bangso parbegu ma hatigoranmu, jala saluhut angka raja hamuliaonmu, jala ingkon margoarhon goar na imbaru ho, sipaboaon ni pamangan ni Jahowa. Liturgi IV A No. 09 (Kel. H. Marpaung) Ida ma, suruanku ma suruanku, asa dipadiri dalan di jolongku. Dung i tompu ma ro tumopot jorona Tuhan, na niluluanmuna dohot suruan ni parpadanan na hinalungunhonmuna. Ida ma, na ro ma ibana, ninna Jahowa Zebaot. Alai tung ise ma manahan di ari harorona i? Jala tung ise ma manahan jongjong, molo dipataridahon ibana dirina? Ai songon api na panopa do ibana, jala songon sabun ni panunsi. Amen. PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog liturgi IV B : Lam dipatuduhon Debata do tu jolma i, holong dohot asi ni rohaNa, diparbaga do haroro ni Sipalua laho paluahon jolma I sian ihotihot ni sibolis i. Liturgi IV B No. 01. (Kel. St. P. Sinaga/br. Sibarita) Nunga mandate roha ni bangso paimahon haluaon sian Debata, ai tarbuang do bangso Israel ala ni dosana, masihol bangso Israel mulak tu bona pasogitna tu huta Jerusalem, asa sumuang muse marsaor nasida di Bagasjoro. Sai hira na ditadinghon Debata do panghilalaan nasida, alanii maimaima do bangso i di haroro ni Mesias Sipalua i. Liturgi IV B No. 02. (Kel. St. P. Sinaga/br. Sibarita) Ro do Hata ni Debata tu Panurirang Jesaya mandok; apuli, apuli hamu ma bangsoKi, ninna Debatamuna. Hata apulapul ma dok hamu tu roha ni isi ni Jerusalem, jala jouhon hamu ma tu nasida Nunga marujung parungkilonna, ai nunga salose dosana i, ai nunga dijalo sian tangan ni Jahowa silompit dua singkat ni saluhut dosana. Liturgi IV B No. 03. (Kel. Ir. G. Simangunsong/St. br. Siahaan) Ro do Hata ni Debata tu panurirang Jesaya mandok : tung sura rara dosamuna songon abit bunga dapdap, bontar do bahenonku songon itak; nangpe rara songon abit hasumba, gabe songon hapas do muse. Di ari na sasada i sogot, uli jala marmulia tunas ni Jahowa, gabe huhut uli parbue ni tano i di angka na malua sian Israel. Liturgi IV B No. 04. (Kel. Ir. G. Simangunsong/St. br. Siahaan) Molo ringgas hamu tumangihon dohot mangihuthon, sai panganonmuna do hinadenggan ni gogo ni tano i. Alai molo manjua hamu jala mangalo, sai na panganon ni podang do hamu sogot, ai pamangan ni Jahowa do palumbahon. Liturgi IV B No. 05. (Kel. Ir. G. Simangunsong/St. br. Siahaan) Ai ndada pingkiranKu, pingkiranmuna i, jala ndada dalanmuna angka dalanKu, ninna Jahowa. Tagan diparpiar ni murukKu Hutabunihon do bohingKu satongkin maradophon ho, alai marhitehite denggan basa salelenglelengna asianKu ho, ninna Jahowa sipalua ho. Liturgi IV B No. 06. (Kel. Ir. G. Simangunsong/St. br. Siahaan) Alai anggo ho huta Betlehem Eprata, mametmethu do ho nian anggo tung pola jujuron tu angka huta marriburibu di Juda, hape sian ho do haroroan ni na gabe panggomgomi ni Israel, jala angka haroroanna sian nahinan, sian angka ari na robi salelenglelengna. Liturgi IV B No. 07. (Kel. L. L. A. Pasaribu/br. Sinaga) Ida ma, gabegabean ma sada na marbaju jala tumubuhon sada anak, jala bahenonna goarna : Immanuel. Hehe ma ho, marsinondang ma ho, ai na ro ma panondangmu, jala hamuliaon ni Jahowa binsar di atasmu. Alani pauli hamu dalan ni Jahowa, patigor hamu di adaran dalan balobung ni Debata. Ingkon gohan do nasa rura, jala parejeton nasa dolokdolok dohot buntulbuntul, jala gabe na hornop do na marnangkok tuat, jala gabe rura tanggurung ni dolok. Liturgi IV B No. 08. (Kel. L. L. A. Pasaribu/br. Sinaga) Di ari na sasada i sogot, uli jala marmulia ma tunas ni Jahowa, gabe huhut uli parbue ni tano i di angka ma malua sian Israel. Jala targoar na badia sogot angka na teba di Sion dohot di Jerusalem, nasa na tarsurat goarna di Jerusalem dapotan hangoluan. Liturgi IV B No. 09 (Kel. U. N. Siregar/br. Gultom) Ai nunga tubu di hita sada posoposo, dilehon tu hita sada Anak, pampe tu abaraNa do sogot harajaon, jala bahenonna goarNa : Sipartahi halongangan, siulubalang ni Debata, Ama saleleng ni lelengna, Raja Hadameon. Liturgi IV B No. 10. (Kel. U. N. Siregar/br. Gultom) Alai jongjong anggo Ibana, jala marmahan mangasahon gogo ni Jahowa, marhitehite hamuliaon ni goar ni Jahowa Debatanta; jadi maringan ma nasida, ai timbul ma ibana disi ro di angka ujung ni tano on. Amen. PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog liturgi V : Nunga jumpang tingkina hombar tu bagabaga ni Debata taringot Sipalua, na tinubuhon ni si Maria, na gabegabean sian Tondi Parbadia di huta Betlehem. Liturgi V No. 01 (Kel. St. M. Simanjuntak/br. Napitupulu) Dungi ro ma uju i parenta sian Kesar Agustus, ingkon suraton nasa jolma di gomgomanna. Pamilangan parjolo ma i, uju digomgomi si Kirenius tano Siria. Liturgi V No. 02. (Kel. St. M. Simanjuntak/br. Napitupulu) Jadi borhat ma sasude, asa disurati, ganup tu bona ni pinasana. Borhat ma nang si Josep dohot si Maria, na sian Galilea, sian Nazareth, nangkok tu luat Judea tu huta ni si Daud na margoar Betlehem, ala sian pomparan jala marga ni si Daud ibana. Pasurathon dirina rap dohot si Maria, oroanna i naung gabegabean. Jadi di na disi ni nasida, gok ma ari ni hangoluanna. Liturgi V No. 03. (Kel. St. M. Simanjuntak/br. Napitupulu) Ditubuhon ma anak buhabajuna, diborhos ma, dipeakhon ma tu bagasan panggagatan, ala so adong inganan na asing di parmianannasida. Jadi adong ma marborngin di ladang na disi ni angka parmahan, mangingani pinahan nasida. Jadi didapothon sada Surusuruan ma nasida, jala marsinondang ma sangap ni Tuhan i humaliang nasida, gabe mabiar situtu ma. Liturgi V No. 04. (Kel. St. K. Sijabat/br. Gultom) Alai didok Surusuruan i ma tu nasida ; unang mabiar hamu, ai barita halalas ni roha godang do huboan tu hamuna, parsaulian ni sandok bangso i. ai naung tubu do di hamu saborngin on, di huta ni si Daud, Sipalua i, i ma Kristus Tuhan i. on ma partinandaan di hamu: posoposo do dapotonmuna, na binorhos peak di panggagatan. Liturgi V No. 05. (Kel. St. K. Sijabat/br. Gultom) Hansitna i tutu na tinaon ni si Josep i, tarlumobi ma si Maria naung gabegabean, alai ingkon oloan nasida ma parenta ni Kesar, jala mardalan mansai dao jala maol situtu sidalanan i. Boasa ingkon songon i? Liturgi V No. 06. (Kel. St. K. Sijabat/br. Gultom) Ai toho do i hansit, alai unang alo tu haporseaonta, molo ingkon songon i sitaonon ni si Josep dohot si Maria. Ai laos disi do sangkap hatuaon ni Debata. Dipardalanan na tu Betlehem i do masa hasasaut ni bagabagaNa marhite hatutubu ni Jesus, Tuhan Sipalua hita. Liturgi V No. 07. (Kel. St. T. Panggabean/br. Simanungkalit) Sasintongna mansai maol do siat tu pingkiran jala ndang tarjalo roha. Hape laos songon i do dibahen Debata dalanNa jala hurang tarjalo roha do, boasa diinganan na lea hatutubu ni Sipalua i, di bara ni pinahan. Liturgi V No. 08. (Kel. St. T. Panggabean/br. Simanungkalit) Ai songon timbo ni angka langit sian tano on, songon i do tumimbo angka dalanKu sian dalanmuna i, jala angka pingkiranKu sian pingkiranmuna i, ninna Jahowa. Alani unang manigor maralo tu rohanta, molo pe songon i dalan dibahen Debata. Nang di pardalanan ngolunta on pe, molo masa pangunjunan dohot parungkilon, unang pintor mandele, atik dalan ni Debata do i laho mambahen hasonangan di hita. Tapuji ma goarNa na marmulia i. Liturgi V No. 09. (Kel. St. T. Napitupulu/br. Simatupang) Ai songon hadadabu ni udan dohot ambolas sian langit, jala ndada mulak boti tusi, nda jolo dibornohi tano i jala dipagabe, asa martumburi, jala dilehon boni tu halak panabur dohot roti tu halak na manganhon. Ingkon songon i do hatangki na ruar sian pamanganku: Ndang mulak boti tu ahu, ingkon bahenonna do lomo ni rohangku, jala manjadi tu na hutongos. Liturgi V No. 10. (Kel. St. T. Napitupulu/br. Simatupang) Marolopolop ma hita ala haluaon na binoanNa i marhite naung tubu di Betlehem. Tajangkon ma hata ni surusuruan i na mandok Hasangapon ma Debata di ginjang, dame ma di tano on, di angka jolma halomoan i . Amen PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog liturgi VI : Nunga ro rajanta Sipalua i, ndada holan hita dipalua, alai dohot do nang portibi on. Sude ma na sa na manggulmit, na sa ulu ni tot marsomba tu Ibana, Raja Hadameon i. Liturgi VI No. 01. (St. D. br. Hutauruk) Hamu angka donganku, bohanunga torang di hamu aha na masa i? Tangkas do dibege hamu tahe ende ni pardisurgo i na mandok; naung tubu do si palua i, i ma Jesus Kristus Tuhan i? I ma na tinongos ni Ama i sian banua ginjang ro tu portibi on manaon, na sa haleaon. Liturgi VI No. 02. (Kel. H. P. Sinurat/br. Sitorus) Toho do, au pe tangkas hubege ende ni pardisurgo i, didok; unang hamu mabiar, ai barita halalas ni roha godang do huboan tu hamu, parsaulian ni sandok bangso do hape hatutubu ni sipalua i, parsaulian ni hita jolma, parsaulian tu ahu nang tu hamu angka dongan. Liturgi VI No. 03. (Kel. H. P. Sinurat/br. Sitorus) Tingkos do nanidokmuna i, alai mulak ma jolo hita tu panghataion sian mulana, ai dongan na parjolo mandok sadarion na marpesta natal do hita; aha ma lapatan ni natal i; i do nangkin sungkunsungkun ni dongan, didok ma mangalusi; ima haroro ni Jesus gabe jolma. Jala didok dongan muse ala ni dosa i do umbahen na masa natal. Ia tung patorang hamu ma jolo muse asa tung tangkas di iba aha do natal i, jala boasa masa natal? Liturgi VI No. 04. (Kel. B. Simanjuntak/br. Sitinjak) Ia anggo di mulana mansai uli do tutu sude ditompa Tuhan i, jala sude natinompa i di pasahat Tuhan i do tu jolma na tinompaNa i, alai ala hagaleon ni jolma i, madabu ma jolma i tu dosa. Jala dosa i mambahen jolma i sirang sian Debata, jala ingkon hamatean saleleng ni lelengna hian nama jambarta. Liturgi VI No. 05. (Kel. B. Simanjuntak/br. Sitinjak) Toho do tutu na nidok ni dongan on, ai pola do dipabali Debata nasida sain porlak Eden na uli i, jala pola mandaodao nasida ala ni dosa i, alai marpangulahi ma muse roha ni Debata mida jolma na tinompaNa i tudos tu rupaNa i, asi rohaNa mida jolma. Ala ni i ma disuru Debata angka naposoNa mandok: paubahon roha, hape ndang ditangihon jolma i. Liturgi VI No. 06. (Kel. B. Simanjuntak/br. Sitinjak) I do tutu, nga saut na binagabagahonNa i, di lobi hurang di 2000 taon na salpu, ama na tubu i Jesus sipalua i, di bara ni pinahan, na pola muse mate di hau pinarsilang, asa malua hita sian uhum ala ni dosa i, asa upa tinuhor ni dosa do hamatean i, alai basabasa ni Debata do hangoluan saleleng ni lelengna. Liturgi VI No. 07. (M. Br. Simarmata) Toho ma tutu, patut ma marlas ni roha hita marningot holong ni roha ni Tuhan i, jala tama ma ingotonta na nidok ni surusuruan i, asa unang be mabiar hita di ngolunta on manang aha pe na masa di ngolunta on, ai adong do sipalua di hita jala na tau pangurupi ima Jesus Tuhan i, na tapestahon di borngin on, jala ninna rohangku i ma barita las ni roha di hita di ari natal on. Jala na huantusi molo tadok tu donganta Selamat ari Natal on ma tadok disi : Syalom unang mabiar hamu, ai nungga tubu Sipalua i. Amen.
PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog Liturgi VII : Tapuji ma Ibana na badia i disiala denggan ni basaNa tu hita na manuru AnakNa gabe haluaon di hita.
Liturgi VII No. 01. (Ir. T. L. Tobing/br. Napitupulu)
Patut do tapuji jala ta pasangap goar ni Debata Jahowa ala saut sangkapNa di portibi on. Marhite haporseaonta be di Jesus naung ro i, gabe dohot hita tu haluaon na pinatupaNa tu hita. Antong boha do pamulianta di Ibana? Songon on do. Puji ma Jahowa, ale tondingku, jala unang tung halupahon denggan ni basaNa sudena. Liturgi VII No. 02. (Ir. T. L. Tobing/br. Napitupulu) Puji ma Jahowa ale tondingku, jala nasa rohangku dibagasan mamuji goarNa na badia i. Ibana manesa dosam sudena. Ibana pamalum angka sahitmu sudena, Ibana paluahon ngolum sian hamagoan, Ibana martumpalhon denggan basa dohot asi ni roha. Liturgi VII No. 03. (Ir. T. L. Tobing/br. Napitupulu) Puji ma Jahowa, hamu ale surusuruanNa, hamu ale angka ulubalang na gogo, angka na patupahon hataNa, di natinagihonmuna soara ni hataNa. Puji ma Jahowa, hamu ale angka paranganna i sudena, hamu angka parhaladoNa, angka na pasauthon lomo ni rohaNa. Liturgi VII No. 04. (Kel. M. Simanjuntak/br. Hutajulu) Puji ma Jahowa, hamu ale angka jadijadianNa sasudena, hamu sude angka bangso na marserak marsadaroha ma hamu mamuji Debata, ale tondingku puji ma Jahowa. Liturgi VII No. 05. (Kel. M. Simanjuntak/br. Hutajulu) Puji ma Jahowa ale tondingku, dipamahap do rohangku marhitehite denggan basa, Ibana do patupahon angka pambahenan hatigoran, Ibana do pabotohon angka dalanNa. Liturgi VII No. 06. (Kel. M. Simanjuntak/br. Hutajulu) Puji ma Jahowa, hamu angka parrangan parbanuaginjang, na mangoloi angka parentaNa, na sai tongtong tangi tu angka hataNa. Hamu angka naposoNa na mangulahon lomo ni rohaNa. Liturgi VII No. 07. (Kel. J. Panggabean/br. Simamora) Puji ma Jahowa, hamu ale angka na tinompaNa, di sude inganan ma hinarajaanNa. Puji ma Jahowa, ale tondingku. Jahowa do nampuna sude portibi on dohot nasa isina. Liturgi VII No. 08. (Kel. J. Panggabean/br. Simamora) Ibana do nampuna portibi on dohot nasa na mangolu di bagasanna. Ai Ibana do paojakhon i di bagasan ni aek na bagas di toru ni tano on, jala pahothon i di atas ni laut angka na bagas i. Liturgi VII No. 09. (Kel. P. Panggabean/br. Hutapea) Puji ma tuhan i, Debata ni Israel, ala ditopot bangsoNa jala dipatupa haluaonna. Dipatindang do di hita tanduk haluaon, di bagas ni si Daud naposoNa i. Hombar tu na hinatahonNa marhite soara ni angka panurirangNa na badia i sian na robi. Liturgi VII No. 10. (Kel. P. Panggabean/br. Hutapea) Ari on do najinadihon ni Jahowa, marolopolop jala marlas ni roha ma hita disi. Iale Jahowa sai manumpak ma Ho! Iale Jahowa sai Ho ma mambahen manjadi! Pinasupasu ma na ro marhitehite goar ni Tuhan i. Liturgi VII No. 11. (Kel. P. Panggabean/br. Hutapea) Beta ma hita saluhutna mamuji Goar ni Jahowa na marmulia i, ai Parasiroha bolon jala Pardenggan basa, hamoraon dohot hasangapon dohot hagabeon na salelenglelengna dilehon tu hita. Amen
PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog liturgi VIII :
Nuaeng begeonta ma hatorangan na dumasip taringot tu Jesus Sipalua
i. Ibana do Sipalua naung ro tu Portibi on manaluhon dosa dohot hamatean, asa malua jala mamora saluhut angka na porsea di Ibana.
Liturgi VIII No. 01. (Kel. L. Simanjuntak/br. Panggabean)
Dung i toropan do nasida na gabe porsea ala ni Hata ni Jesus. Gabe didok nasida ma tu boruboru i; ndang be ala ni pandokmi, umbahen na porsea hami; ai nunga hubege jala hutanda hami sandiri, Ibana do tutu Sipalua portibi on. Liturgi VIII No. 02. (Kel. L. Simanjuntak/br. Panggabean) Dung i ninna si Petrus dohot angka apostel i ma mangalusi : Ingkon oloan do iba di Debata asa di jolma. Di pahehe Debata ni angka amanta do Jesus, napinusamuna, uju digantung hamu Ibana tu hau. Tu siamunNa do dipabankit Debata Ibana gabe Partogi jala Sipalua, laho mangalehon tu halak Israel hamubaon ni roha dohot hasesaan ni dosa. Liturgi VIII No. 03. (Kel. L. Simanjuntak/br. Panggabean) Mandok mauliate ma hamu di Ama i, naung patauhon hamu, manjalo tohap na di bagasan hatiuron i, siteanon ni angka na badia i. Ai nunga diroro hita sian gomgoman haholoman i, jala dipaunsat hita tu bagasan harajaon ni Anak, haholongan ni rohaNa. Liturgi VIII No. 04. (Kel. L. Simanjuntak/br. Panggabean) Di bagasan Ibana do adong di hita haluaon i, i ma hasesaan ni angka dosanta. Ibana do suman ni Debata na so tarida i ; na parjolo tubu sian na sa na tinompa dohot andorang so haoojak ni tano on. Liturgi VIII No. 05. (Kel. Op. Risna br. Sibarani) Ai marhite sian ibana do ditompa saluhutna, na di banuaginjang dohot na di banua tonga on, na tarida dohot na so tarida i, angka habangsa, angka harajaon, angka gomgoman, angka parhuasoon, saluhutna i do ditompa marhitehite Ibana, jala marhapatean tu Ibana. Liturgi VIII No. 06. (Kel. Op. Risna br. Sibarani) Jala di jolo ni saluhutna do Ibana, jala saluhutna i do hot di bagasan Ibana. Ibana do ulu ni pamatang i, i ma huria i. Ibana do parmulaan, naung parjolo tubu sian angka na mate, asa Ibana parjolo di na saluhutna. Ai ditontuhon Debata do naeng maringanan di bagasan Ibana sandok hagogokna i. Liturgi VIII No. 07. (Kel. Op. Risna br. Sibarani) Nang sian Jesus Kristus, sitindangi haposan i, na parjolo tubu sian angka na mate sigomgom angka raja ni tano on! Ibana do manghaholongi hita jala dipalua hita sian angka dosanta marhitehite mudarNa na badia i. Liturgi VIII No. 08. (K. br. Sihotang) Dijadihon do hita gabe harajaon hamalimon ni Debata, AmaNa i. Di Ibana ma hasangapon dohot hagogoon ro di salelenglelengna. Ida ma, na ro ma Ibana di bagasan ombun! Idaon ni nasa mata do Ibana, nang angka naung manullang Ibana, gabe mangangguhi be ma saluhut bangso ni tano on mida Ibana. I ma tutu. Amen.
PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog liturgi IX : Parbuehon ma haporseaon dohot pamujianmi tu Debata di bagasan ngolum marhitehite parange na tama, daulat, burju mangula jala masihaholongan. Liturgi IX No. 01. (Kel. B. Panggabean/br. Nainggolan) Diungkap Sipalua i do pintu harajaon ni Banuaginjang laho mangarahon angka na niasianNa, asa malua nasida sian gomgoman dosa jala maringan di huta na pinauli ni Debata. Liturgi IX No. 02. (Kel. B. Panggabean/br. Nainggolan) Didok Jesus, Sipalua i do; Ahu do pintu i, paluaon do ganup na bongot sian Ahu, na laho bongot jala laho ruar ma ibana, dapotan jampalan, asa adong hangoluan di nasida. Liturgi IX No. 03. (Kel. B. Panggabean/br. Nainggolan) Nunga taboto jala nunga diungkap pintu i tu hita, alai mansai dao do i sian portibi on, sian roha ni na so tumanda Ibana. Hita pe soratan jala loja digosagosa portibi on dipardalananta laho manjumpangi pintu i, antong boha na ma? Liturgi IX No. 04. (Kel. B. Panggabean/br. Nainggolan) Didok do muse : Ro ma hamu tu Ahu, hamu angka na loja jala na sorat asa hupasonang hamu Ahu do panondang ni portibi on, naso tupa mardalan di na holom na mangihuthon Ahu. Liturgi IX No. 05. (Kel. C. Sihombing/br. Simanjuntak) Haporseai ma na tutu do Ibana pangapul na sumurung dohot pandaoni bolon di angka na marsak dohot na marsahit, dilehon do tu hita aek dohot roti hangoluan asa ndada be mauas dohot male angka na manganhon sian i. Liturgi IX No. 06. (Kel. C. Sihombing/br. Simanjuntak) Dung i dipaborhat do hita tu portibi on laho mangarahon angka donganta, ai ddidok do : Ahu do mamillit hamu jala Hupadiri hamu, asa laho hamu marparbue, jala asa mian parbuemuna i. Alani i dungo jala hobas ma hita mangulahon tona parsuruonNa i, hohosi ma gontingmu jala pagalak ma palito di tanganmu. Liturgi IX No. 07. (Kel. S. Simatupang/br. Aritonang) Beta hamu dongan laho mangula di porlak ni Tuhan i, asa dapotan na tama hita, jala parangehon ma na tama jala marroha na daulat ma hita asa masihaholongan sama hita songon Kristus i manghaholongi hita. Liturgi IX No. 08. (Kel. S. Simatupang/br. Aritonang) Antong solukhon hamu ma holong na sian Kristus Jesus, Tuhanta i. Ai i do patukhon hita laho manghaholongi dongan jolma. Amen
PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog liturgi X : Dibagabagahon Debata do haluaon diangka jolma na manghabiari Ibana jala na mangulahon na ni dokNa antong boha do panghorhonna molo sai burju hita mangihuthon Ibana dohot mangulahon lomo ni rohaNa? Tangkas ma tapaihutihut liturgi on. Liturgi X No. 01. (Kel. M. Siagian/br. Tampubolon) Munsat pe angka dolok jala humuntal angka robean, alai anggo parairohaonku na so tupa munsat sian ho, jala padan ni hadameonKu na so tupa humordit, ninna Jahowa si asii ho. Liturgi X No. 02. (Kel. M. Siagian/br. Tampubolon) Songon sintong na mangolu ahu ninna Tuhan Jahowa, tung na so lomo do rohangku mida hamatean ni angka parjahat, na lomo do rohangKu mida hamumulak ni angka parjahat i, tumadingkon dalanna, asa mangolu ibana. Liturgi X No. 03. (Kel. S. Napitupulu/br. Siringo-ringo) Parasi roha jala pardenggan basa do Jahowa, lambat tarrimas jala parasiroha godang. Ndang dibaloshon tu hita hombar tu angka hajahatonta. Songon asi ni roha ni amana mida angka anakna, asi ni roha ni Jahowa di angka na manghabiari Ibana. Liturgi X No. 04. (K. br. Hutajulu) Songon on do hata ni Jahowa: nunga diarsahi ho Ahu marhite sian angka dosam, jala nunga dilojai ho Ahu marhite sian angka hajahatonmu. Ahu tutu Ahu sandiri manelesei angka panagalaosim ala ni hadirionKu, jala ndang be Hupaingotingot angka dosam. Liturgi X No. 05. (Kel. R. Panggabean/br. Hutagalung) Songon on do hata ni Jahowa: unang ho mabiar, ai Ahu do siluluhon ho; nunga pola hujou goarmu Ahu siluluhon ho, asa mangolu ho dohot pinomparmu sogot. Satongkin do hutadingkon ho, alai papunguonKu ma ho muse marhitehite angka asi ni roha godang! Tagan di parpiar ni murukHu hutabunihon bohingKu satongkin maradophon ho, alai marhitehite denggan basa saleleng ni lelengna asianKu ho, ninna Jahowa sipalua ho. Liturgi X No. 06. (Kel. R. Panggabean/br. Hutagalung) Humongkop hita, gabe dosa do ibana na so tumanda dosa hian dibahen Debata, asa gabe hatigoran ni Debata hita, marhitehite ibana. Jala asa malua hita sian dosa gabe tu hangoluan na so ra suda. Liturgi X No. 07. (Kel. St. T. Sitorus/br. Siahaan) Ala ni panghaholongion ni Debata di Portibi on, dilehon do tu hita anakNa, gabe jolma, na tubu dibetlehem! Antong sa tarpuji ma goarmu, ala naung ditingkir hita bangsoNa. Ditogutogu tu hatiuron dipadomu Ho do hami na holang sian Ho, gabe saor muse dohot Ho, gok halalas ni roha do hami ala ni i. ala ni hasangapon ma di Debata na diginjang dame ma dia tano on diangka jolma halomoan i. Amen.
PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog liturgi XI : Nunga ro jala nunga marsaor Ibana di hita nang di rohanta, aha do panghorhonna molo sai burju hita mangihuthon Ibana dohot lomo ni rohaNa? Tangkas ma tapaihutihut liturgi on. Liturgi XI No. 01. (Kel. St. P. Situmeang/br. Silalahi) Martua ma na pogos tondi, ai di nasida do harajaon banua ginjang . Hatuaon na tutu do binoan mi Tuhan, harorom tu tano on, ai di ho do na palua au, sipalua sian dosa i, halongangan bolon do pambahen mi o Debata, Anakmi di suru Ho, ro tu atas tano on paluahon hami on sai pinujipuji Ho, Tuhan si parasi i, na pangolu hami, pinuji pinasangap Ho, sangapsangap di Ho, Hasangaphon ma di Ho ale Jahowa sangap ma. Liturgi XI No. 02. (Kel. St. P. Situmeang/br. Silalahi) Martua ma na marsak roha, ai siapulon do nasida. Hatuaon na tutu do binoan mi Tuhan, harorom tu tano on, ai di ho do na palua au, sipalua sian dosa i, halongangan bolon do pambahen mi o Debata, Anakmi di suru Ho, ro tu atas tano on paluahon hami on sai pinujipuji Ho, Tuhan si parasi i, na pangolu hami, pinuji pinasangap Ho sangapsangap di Ho, Hasangaphon ma di Ho ale Jahowa sangap ma. Liturgi XI No. 03. (Kel. Pak. Rut Adelweis Situmeang/br. Pane) Martua ma na lambok roha, ai teanon nasida do tano on. Hatuaon na tutu do binoan mi Tuhan, harorom tu tano on, ai di ho do na palua au, sipalua sian dosa i, halongangan bolon do pambahen mi o Debata, Anakmi di suru Ho, ro tu atas tano on paluahon hami on sai pinujipuji Ho, Tuhan si parasi i, na pangolu hami, pinuji pinasangap Ho sangapsangap di Ho, Hasangaphon ma di Ho ale Jahowa sangap ma. Liturgi XI No. 04. (Kel. Pak. Rut Adelweis Situmeang/br. Pane) Martua ma na mauas male mida hatigoran, ai sipabosuron do nasida. Hatuaon na tutu do binoan mi Tuhan, harorom tu tano on, ai di ho do na palua au, sipalua sian dosa i, halongangan bolon do pambahen mi o Debata, Anakmi di suru Ho, ro tu atas tano on paluahon hami on sai pinujipuji Ho, Tuhan si parasi i, na pangolu hami, pinuji pinasangap Ho sangapsangap di Ho, Hasangaphon ma di Ho ale Jahowa sangap ma. Liturgi XI No. 05. (Kel. R. Pangaribuan/br. Purba) Martua ma na asi roha, ai si asi on do nasida. Hatuaon na tutu do binoan mi Tuhan, harorom tu tano on, ai di ho do na palua au, sipalua sian dosa i, halongangan bolon do pambahen mi o Debata, Anakmi di suru Ho, ro tu atas tano on paluahon hami on sai pinujipuji Ho, Tuhan si parasi i, na pangolu hami, pinuji pinasangap Ho sangapsangap di Ho, Hasangaphon ma di Ho ale Jahowa sangap ma. Liturgi XI No. 06. (Kel. R. Pangaribuan/br. Purba) Martua ma sibahen dame, ai goaron do nasida anak ni Debata. Hatuaon na tutu do binoan mi Tuhan, harorom tu tano on, ai di ho do na palua au, sipalua sian dosa i, halongangan bolon do pambahen mi o Debata, Anakmi di suru Ho, ro tu atas tano on paluahon hami on sai pinujipuji Ho, Tuhan si parasi i, na pangolu hami, pinuji pinasangap Ho sangapsangap di Ho, Hasangaphon ma di Ho ale Jahowa sangap ma. Liturgi XI No. 07. (Kel. H. Sinaga/br. Purba) Martua ma na pinaburuburu ni halak ala hatigoran, ai di nasida do harajaon banua ginjang i. Hatuaon na tutu do binoan mi Tuhan, harorom tu tano on, ai di ho do na palua au, sipalua sian dosa i, halongangan bolon do pambahen mi o Debata, Anakmi di suru Ho, ro tu atas tano on paluahon hami on sai pinujipuji Ho, Tuhan si parasi i, na pangolu hami, pinuji pinasangap Ho sangapsangap di Ho, Hasangaphon ma di Ho ale Jahowa sangap ma. Liturgi XII No. 08. (Kel. H. Sinaga/br. Purba) Martua ma hamu molo marhapantunon hamu tu sasude, haholongi ma angka dongan, habiari ma Debata jala pasangap ma angka raja. Liturgi XI No. 09. (Kel. M. Siregar/br. Simanjuntak) Martua ma angka na mamio angka na pogos, angka na martihas, na pangpangon dohot na mapitung asa lehononmu mangan, ai baloson ni Debata ma di hamu rap mangan di harajaonNa i. Liturgi XI No. 10 (Kel. M. Siregar/br. Simanjuntak) Antong paserep ma roham jala parbadia i laho manjanghon hata ni Debata dohot mangulahon, dingolum. Amen. PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog Liturgi XII : Tajanghon ma panondang I dohot haluaon I, jala taparangehon ma marhite na marnatal on hita. Gabe angka siboan haluaon ma hita tu na humaliang hita. Liturgi XII No. 01. (Kel. M. Simangunsong/br. Parapat) On do barita, na hubege hami sian Ibana gabe binaritahon tu hamu: Panondang do Debata; ndang adong di bagasan Ibana manang aha na holom. Taparangehon ma hatiuron, songon Ibana na di bagasan na tiur, saor do hita sama hita, jala dipaias mudar ni Jesus, Anakna i, do hita sian nasa dosa. Liturgi XII No. 02. (Kel. M. Simangunsong/br. Parapat) Alai molo taparangehon hatiuron, songon Ibana na di bagasan na tiur, saor do hita sama hita, jala dipaias mudar ni Jesus, Anakna i, do hita sian nasa dosa. Ibana do pardengganan pasaehon angka dosanta; alai ndada holan dosanta, tung dohot do dosa ni sandok portibi on. Liturgi XII No. 03. (Kel. C. Situmorang/br. Sitinjak) Unang ma haholongi hamu portibi on, nang angka na dibagasanna! Anggo dihaholongi halak portibi on, ndang di bagasan ibana holong ni roha ni Ama i. Ai nasa na di portibi on, i ma lomolomo ni roha ni daging, giotgiot ni roha ni mata dohot na manenganengahon sinadongan, ndada sian Ama i anggo i, tung sian portibi on do. Liturgi XII No. 04. (Kel. C. Situmorang/br. Sitinjak) Jala na laho salpu do portibi on rap dohot na pinarhagiotna; alai na mian ro di salelenglelengna do na mangulahon lomo ni roha ni Debata. Nuaeng pe, angka anaha, mian ma hamu di bagasan Ibana, asa marhiras ni roha hita, di na gabe patar Ibana, unang tarila hita maradophon Ibana di harorona i! Liturgi XII No. 05. (Kel. E. G. Panggabean/br. Sitorus) Ida hamu ma godang ni haholongon na binasabasahon ni Ama i tu hita, ai targoar do hita angka anak ni Debata, jala angka i do hita tutu. Dibahen i, ndang ditanda portibi on hita, ai ndang ditanda anggo Ibana. Hamu angka haholongan! Anak ni Debata do hita nuaeng, jala ndang dope dipapatar, manang na gabe aha hita sogot; alai taboto do: Anggo dung patar Ibana, gabe suman ma hita tu Ibana, ai idaonta do rupana sandiri. Liturgi XII No. 06. (Kel. E. G. Panggabean/br. Sitorus) Alai marga na pinillit do hamu, hamalimon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronna halongangan i. Hamu, angka na so bangso najolo, gabe bangso ni Debata nuaeng; angka na so niasian hamu najolo, gabe niasian do nuaeng. Liturgi XII No. 07. (Kel. E. G. Panggabean/br. Sitorus) Ringkoti hamu ma, asa mardame hamu tu saluhut halak, huhut asa badia hamu; anggo so i, ndang adong idaonta Tuhan i. Matahon hamu ma, asa unang adong na paholang dirina sian asi ni roha ni Debata, unang i gabe urat na paet na martumbur, sihorhon hasusaan, gabe hodar maon torop bahenon ni i. Liturgi XII No. 08. (Kel. E. G. Panggabean/br. Sitorus) Onpe, hamu angka naung pinillit ni Debata, angka na badia jala hinaholongan, solukkon hamu ma parasirohaon situtu, habasaron, haserepon, lambok dohot lambas ni roha! Masipauneunean jala masisesaan dosa ma hamu, jumpa marpangkurangi na sada dompak donganna; songon panesa ni Kristus di hamu, songon i ma nang hamu! Amen.
PROLOG LITURGI PESTA NATAL UMUM
HKBP RIAMA PPM RESORT MARIHAT
Rabu, 24 Desember 2008 (Malam) Prolog Liturgi XIII: Marhite haporseaonta tu Tuhan Jesus Sipalua naung ro I, gabe dohot ma hita parjambat di hangoluan sogot jala patut ma hita marsomba tu Ibana sian las ni rohanta. Liturgi XIII 01. (Kel. L. Aritonang/br. Simanjuntak) Ai beha nama, ia so porsea na deba? Tung tarbahen nasida na so porsea i ma manegai haburjuon ni Debata Sihaposan i? Dao ma i! On do tahe: Parsintong do ia Debata, alai pargabus do nasa jolma, songon na tarsurat i: "Asa pintor ho di angka pandohanmu jala monang di panguhumonmi!" Liturgi XIII. 02. (Kel. L. Aritonang/br. Simanjuntak) Alai anggo so marhaporseaon, ndang tarbahen halomoan; ai halak na mandapothon Debata, ingkon dihaporseai: Adong Debata; laos Ibana do silehon upa tu angka na manjalahi Ibana. Hinorhon ni haporseaon do dijalo si Noak poda taringot tu na so dapot idaon dope, gabe mabiar ibana, jala dipauli parau i, bahen haluaan ni nasida na sajabu; marhitehite i diuhumi ibana portibi on, jala gabe sitean hatigoran, na marguru tu haporseaon. Liturgi XIII. 03. (Kel. L. Aritonang/br. Simanjuntak) Ai malua ma ho, molo diparhatopot pamanganmi Tuhan Jesus i, huhut dihaporseai roham, naung dipahehe Debata Ibana sian angka na mate. Ai roha i do porsea, asa tu hatigoran; pamangan i do mangkatindangkon, asa tu haluaon. Ai didok surat i do: "Ndang sipailaon nasa na porsea di Ibana!" Liturgi XIII. 04. (Kel. D. Sidabutar/br. Manurung) Asa dung dipintori hita dalan haporseaon, mardame ma hita dohot Debata marhitehite Tuhanta Jesus Kristus. Laos marhitehite Ibana do saut masuk hita tu asi ni roha, hajongjonganta nuaeng dalan haporseaon, jala taparhatua do dirinta marningot hasangapon ni Debata na itahirim i i. Liturgi XIII. 05. (Kel. D. Sidabutar/br. Manurung) Puji ma Jahowa, hamu ale angka na niasianna, jala endehon hamu ma barita ni habadiaonna i! Ai tongkin do panombo ni rimasna, alai saleleng mangolu do ianggo asi ni rohana; botarina i sorang partangison, hape manogotna i masa parolopolopon. Liturgi XIII. (Kel. K. Dongoran/br. Saragih) Halleluya! Mandok mauliate ma hamu di Jahowa, ai na basa do Ibana, ai ro di salelenglelengna do asi ni rohana i. Tung ise ma tuk mangkatahon angka hagogoon ni Jahowa, patubegehon baritana i sudena? Martua ma angka na mangaradoti uhum, na tongtong patupahon hatigoran. Liturgi XIII. 07. (Kel. K. Dongoran/br. Saragih) Martopaptopap tangan ma sude hamu angka bangso! Puji hamu ma Debata mardongan soara olopolop! Ai Jahowa do na tumimbul, na songkal, Raja bolon do Ibana gumomgom liat portibi on. Papatuonna do angka bangso tu hita dohot angka marga tu toru ni patta. Sai endehon hamu ma Debata! Sai endehon hamu ma Rajanta i! Endehon ma tutu! Ai Debata do Raja ni liat portibi on, endehon hamu ma ende sipodaon. Amen.