Ranuangan Pambukaan

Ambo yakin iyo subana yakin, dunsanak sadonyo ndak akan mambantah pernyataaan ambo
bahsonyo Muhammad Hatta, proklamator nan juo Wakil Presiden Indonesia nan partamo, adolah
urang nan dapek awak jadikan tauladan nan elok, ilau adolah urang nan disiplin, jujur, berdedikasi,
rasional , kritis , basadio bakorban untuak urang lain ,sangaik cintonyo ka rakyat Indonesia, bervisi
untuk kemajuan Indonesia dan sifaik rancak lainnyo walau ado juo nan kurang-kurang tapi masih
labiah banyak nan elok-eloknyo. Kalau awak hanyo mancaritokan baa baiknyo Hatta, tantulah indak
ka banyak gunonyo bagi awak. Awak mangatokan Hatta itu adolah tauladan nan baiak, tantu dari
parangai jo tindakan-tindakan ilau nan awak katokan baiak dan ikolah yang paralu awak caliak,
parangai-parangai jo tindakan-tindakan ilau, nan ka babakeh ka awak untuak nan ka awak inok
manuangkan dan cubo tiru.

Namun, sayang nan subana sayang, mudah bana rasonyo awak mangatokan “ ambo indak ka
bisa sarupo Hatta parangainyo”. “ Ambo masih paralu banyak bamain-main, ndak bisa ambo disiplin
doh ”. “Ambo paralu basantai-santai, jo basantai-santai sajo lai cukuik untuak manyalasaikan karajo
mah, apo bana paralunyo paralunyo basungguah-sungguah, latiah awak jadinyo”. “Ambo paralu
dapek pitih banyak ko, buliah sanang urang tuo, ndak bisa panuah ambo mangusahokan karajo ambo
ko untuak kemajuan Indonesia doh”. Baa kok sarupo itu awak banyak bersikap ?

Nan manulih subananyo indak lah tahu panyababyo, nan manulih pun indak babeda dari
urang nan banyak dan indak pulo ka malanjuikkan mambahasnyo di siko. Kok dunsanak harok
dengan kelanjutannyo, lanjuikkanlah dalam paranuangan. Paranuangan sajo indak pulo cukuik kalau
indak ado hasianyo dalam buah pikiran. Buah pikiran sajo indak pulo cukuik jikok indak ado nan
tapakaikan.

Kok ado dalam tulisan iko nan jangga taraso dek nan mambaco, eloklah ditanggapi dan
dikritik tulisan iko sarato argumen-argumen nan manguekkan, jan hanyo tanggapan tanpo penjelasan.
Harok ambo kelanjutan tulisan iko dalam kritikan dan tanggapan akan mambaok elok ka UKM
khusunsyo nan manulih.

Ditulih dek urang nan alun mandapek gala, kecuali Ibos