Kum 23 Issue No.22 Missionary Tlngau October 2011 Editor 2342250 (O) 9615344234(M) Asst. Editor : H.

Zadingliana 2342294 (R) 9436157190(M) Cir.Manager : K.Lalremsanga 9436370298(M) Member : Rev.Dr.K.Lalrinthanga 9436158852 (M) : L.H.Liandinga 2342667 (O) Email Address : angelzaiteibh@Gmail.Com Address Baptist Church of Mizoram Office Serkawn, P.O. Zotlang - 796691 Lunglei, Mizoram Ph.Off - 2342250 A man kum khatah - Rs 40 : HS.Lalhmingthanga

Thuchhuah rng rng hi a ziaktu mawhphurhna a ni a, Editor leh BCM ngaihdn a ni vek kher lo.

A CHHUNGA THU AWM TE

Sl.No 1. 2. 3. 4. 5. 6. 7. 8. 9. Editorial Ka hman loI hman Padu Biak In hawn Report Krista Rimtui kan ni si a Missionary Furlough kaihhruaina Lawmthu sawina leh Furlough Report Lawmthu sawina Nyishi kan thleng ta Assam Bengal Field Lamtluang 1

Phk 1 2

Editorial Editorial LAL ISUA LO KAL CHHAN Boralte zawnga chhandam turin Mihring Fapa hi a lo kal a ni reng a ni. Luka 19:10 Ni khat chu Lal Isua chu a zirtirte nen rawngbawlin Jeriko khuaah a lut a, chhun pelh a tum a. Nimahsela chumi khuaah chuan chhiahkhawn hotu hausa tak pakhat Zakaia a awm a; chumi chu a Juda-puiten Rom sorkarin a phut aia tam mipuite hnen atanga chhiah khawna intihausa anih avangin misualah an ngai a, tual thattu leh nawhchizuarte nen in ang khatah an ruat hial a ni awm e. Zakaia hi Abrahama fapa Juda pa dik tak a ni a. Eiruk vanga hausa ni mahse, a thinlung chhungrilah Pathian thianghlim ngaihna, rilru khawharna a nei tlat a. Chuvang chuan Nazaret Isua, zawlnei la naupang tak, damlote tidam a, ramhuai sualte hnawt chhuak thintu chu inhmachhawna hmuh a chak a. An khuaa cham tum lo, rawn kal tlang mai tur anih avangin theipui kunga lawn meuhvin Isua chu a lo chang a ni. Pathian Fapa Isua, van Missionary chuan amah hmuh chak ngawih ngawihtu, midangten an kawm serh mi sual an tih chu a kal pel thei ta lo! A lawnna theipui kung hnuai a thlen chuan, Zakai, lo chhuk thuai rawh; vawiinah i inah ka thleng tur a ni, a ti a. Zakaia chu a lo chhuk a, hlim takin Isua nen chuan a inah an inzui lut ta a ni. Hemi zana Zakaia chunga thil thleng hi a chipchiar hriat a chakawm. Pathian Fapa, mi thianghlim famkim nen an han inhmachhawn meuh chuan, Electric eng uara kan hmai bal te, kan thawmhnaw bal te a lang fiah aia fiah hian Zakaia sualna chu a lang ta. Sima nun thara nun chakin Lalpa Isua hmaah chuan a sual a puang ta a. A lo hlepruk tawh zawng zawng a lehlia rulh a duh a; 2

chumai a la ni lo, a sum zatve chu mi retheite hnena pek a tum ta! A thinlunga a inchhirna leh a tawngka ngeia a inpuanna chu Isuan ban phara lo pawmin, chhandamna a pe ta. A van vannei em! Sim ula, Chanchin Tha hi ring rawh u, (Marka 1:15) titu Isua chuan, Zakaian a sim veleh a sual chu a ngaidam a, chatuana nunna hlu tak chu a pe ta a ni. Lal Isuan Zakaia ina a rawn kal chhan a puan boralte zawnga chhandam hi Amah zuitu Kristiante dam chhan, an hnapui ber chu a ni. BCM chuan he Chanchin Tha hi mi tin hnena pek tumin kan Thupui (Motto) atan Chanchin Tha mi tin tan, tih neiin; kan Kohhran tih hlawhtlin tum (Mission Statement) pawh : Pathian ram a lo zau a, a lo ngheh a, a lo lan fiah deuh deuh theih nan tih a ni a. Kan hruaituten Lal Isua rilru pua he khawvela a lo kal chhan tihlawhtling tura BCM an lo din hi a lawmawm tak zet a ni. Hei vang hian Lal Isua la nei lo- boralte zawna chhandam hna hi kan hna pawimawh leh hman hmawh thlak ber, thildang zawng aia kan dah hmasak tur a ni a, kan ngaihtuahna, thahrui leh sum (Budget) hmanna tur pawimawh ber a ni. Lal Isua lo kal chhan Mission tihlawhtling tur hian tan i la sauh sauh ang u. Kumin Beiruala kan thuzir ang khan he hna ropui thawk tur hian Siam Thar leh kan ngai hle a ni. Pathian thuin min hrilh angin (Galatia 6:15) kan rilru, taksa leh hnampum nun Pathian duh anga siam thar tur chuan sim a, Lal Isua Krista hi kan nuna Lal leh Chhandamtua kan lawmluh theuh a, he Siam Thar Lehna nun hi a taka kan nun chhuahpui a ngai a ni. Thlarau nun siam tharna atanga in tan mimal, chhungkua leh khawtlang siam tharna kan va mamawh em! Isua lo kal chhan tihlawhtling tur hian hawh u, tawngtaiin thahnem i ngai tlang ang u.

*****************

KA HMAN LO . I HMAN! HC Lalhmunliana & Laltlanmawii Tochhawng, Baptist Mission School, Longpuighat Baptist Mission School (BMS), Longpuighat hi 2011 atang hian tan a ni a. English Medium sikul niin K.G leh Class I IV thleng kan hawng nghal a. Helai hmun Tongtongia Chakma hnam hmunpui, bazaar lian tak awmnaa BCM-in sikul dina rawngbawlna kan tan hi Pathianin min hriatpui a niang, sikul naupang 70/80 vel kan beisei laiin 190 zet min pe ta a; zirtirtu 7 in kan theih tawkin hma kan la mek a ni. Hun rei lote chhunga Pathian malsawmna kan dawn hrang hrangte chu hun remchang dangah kan la rawn ziak dawn nia. Kan sikul awmna hmun hi Longpuighat tia hriat leh sawi thin a nih laiin a hmun tak hi Betbonya Village Council chhung a ni a, chuvangin BMS, Betbonya ti tein sawi leh Chanchinbua lang nawk nawk anih pawhin, kohhranten in lo hre dawn nia. Kan sikul hi sikul thar a nih angin thawktute pawh hmun hrang hrang atanga lo kal kan ni hlawm a, a boruak lum leh Malaria tam avangin kan dam thei lo hle mai. May leh July, 2011 chhung khan helaia thawktu mi 5 lai Serkawn Damdawi inah kan lut tawh a ni! Hetia dam lohnain min tlakbuak nasat avang hian sikul lamah indaih lovin kan buai hle mai a, zirtirtu pahnih khat leka sikul (Class 5) kal ni a tam a, a luhai thlak thei ngei mai. Chuti ang taka kan buai leh indaih loh lai chuan ka khua a sik ve ta tlat mai le! Pathian hnenah, Lalpa, sikul lamah kan indaih lo em mai, eng natna pawh ka taksaah hian awm se, mi chelhsak rih la, sikul kal thei tawk talin mi damtir rawh, ka hman lo a ni, tiin ka tawngtai a. Lalpan ka dilna min chhang a, kar hnih lai chu khawsik lovin sikul ka kal a. A kar thumnaah chuan ka khawsikin min tham leh tan tlatin ka hria a, Lalpa, ka hman rih lo, ti bawkin ka 4

tawngtai leh a. Mahse ka khawsik chu a reh duh ta mai si lo. Damdawi zuar hnenah kalin ka thisen ka entir a, engmah a hmu lo. A, khawsik satliah a ni ang e, tiin ngaihngam deuh hleka ka awm laiin, ka khawsik chu a reh mail oh avangin June 18, 2011 khan ka thisen chu ka test leh a, Malaria PF ka nih hriat chhuah a ni ta. Damdawia inenkawl vat tul ka tih avangin Damdawi zuar hnenah kal nghalin Artesunate injection ka la a, tlai dar 4 velah Taxi-in kan haw a. In ka luh rualin ka tlun nghal a, khuma ka mut atanga rei loteah nikhaw hre lovin ka lo awm zui ta a ni awm e. Kan thawhpui hetih laia Compound-a awm chhun Pu H. Lalhmangaihsanga te nupa leh an nau Tv. Romawia (damlo enkawl dan thiam tak) leh Matlani (ka nupui) ten min buaipui a, kan thenawm hnai Chakma a hria apiang an rawn kal khawm bawk a. Serkawna kan hotute nen inbe rawn pah zelin min buaipui a, a zan a zan chuan motorin Serkawn min panpui ta a ni. Zing lam dar 1:30 velak Khawmawi-ah chiang lo ruaiin ka harh a, Khawiah nge ka awm, eng nge kan tih ? tia ka zawh chuan Serkawn kan pan mek tih min hrilh a, mak ka ti ngei mai! Hemi tuk June 19, 2011 Pathianni zing dar 7:30 ah Serkawn thlengin, Rev. R. Lalrintluanga, Mission Coordinator-in min lo hmuak a. Motor atanga thawha chhuk mai ka tum a, ka thei lo nasa mai a, Damdawi inah chuan min zawn lut a, Special Care Unit-ah min dah a. A tawi zawngin Damdawi inah ni 13 ka awm a, kohhran leh mimal thahnemngaiten Pathian hnena min tawngtaisakna leh Doctor leh Nurse-ten duat taka min enkawlna Lalpan mal a sawm a, July 1, 2011 khan dam takin damdawi fun lian tawk nen ka chhuak ta a ni. Damdawi ina kan awm chungchangah hian lawmthu sawina tur kan ngah hle mai a. A hmasa berin min hmangaihtu Pathian hnenah lawmthu kan sawi a. Kan thawhpui Pu H. Lalhmangaihsanga te nupa leh Tv. Romawia te, Pu P. Lalrinsanga, E/T Nghalimlui te chhung (an fapa Duata phei chuan a zin haw chauh nimahse Serkawn thleng min kalpui) te, hmun hrang hranga 5

kan Missionary thiante leh kohhranho ka dam loh hriaa min lo tawngtai saktute, kan thawhpui Nl. KL Lalrinzuali, ET, a Damdawi in chhuaha Longpuighat-a a haw hnuah kan in chhung min tih felsak a, ka luak kai puante min lo suk saktute hi kan theihnghilh thei lo vang. Kan Mission Coordinator Rev. R. Lalrintluanga leh a chhungten min ngaihsak hle mai a, Serkawn damdawi ina ka awm chhung zawng ka nupui Matlani an lo mikhual a, ka ei chak zawngte min siamsak a, ka chhuah hnuah pawh an inah ni li lai min mikhual a, keimahni avangin an insengso nasa hle a ni. Hruaitu nih an va tlin em! (Matthaia 25:35) An chungah kan lawm tak zet a ni. Hei mai hi a la ni lo. Min tawngtaisak bakah thilpek kan dawng nasa em em mai a, mimal min kantu tam tak an awm a, an hming tarlan duh lote an awm avangin mimal hming chu sawi lang lo law law mai ila, min lo hriat thiam ka ngen e.Kohhran leh FOD hrang hrang atanga thilpek kan dawnte han tarlang ila : 1. BCM Hqrs.Serkawn (Serkawn Longpuighat motor hire-na) Rs 12,000/2. Mission committee, Chanmari, Lunglei Rs 1,000/3. MTKP(Relief) Rs 3,000/4. Mission committee, Kikawn, Lunglei Rs 300/5. KNP, Kikawn, Lunglei Rs 200/6. Zotlang kohhran, Lunglei Rs 300/7. TKP, Farm Veng Unit, Lunglei Rs 3,000/8. Mission committee, Zotlang Bial, Lunglei Rs 400/9. Mission committee, Serkawn Rs 500/10. Buarpui Pastor Bial Rs 625/11. Mission committee, Bazar Bial, Lunglei Rs 300/12. Mission committee, Pukpui Rs 300/13. Mission committee, Bazar kohhran, Lunglei Rs 500/14. KNP, Bazar, Lunglei Rs 200/15. BMP, Bazar, Lunglei Rs 200/16. R & D committee, Venghlun, Lunglei Rs 200/17. Shalom kohhran, Chawngte P Rs 1,000/18. Mission committee, Shalom, Chawngte P Rs 500/6

Damdawi ina ka awm laia thilpek pawisaa ka dawn zawng zawng hi Rs 16,300/- lai a ni a; BCM Hqrs. in motor hire-na min peksak nen chuan Rs 28,300/- zet a tling. Ei tur min pe tam tak an awm bawk. Heng zawng zawng hi kan phu loh, Lalpa hmangaihna luangliam a mit kal tlanga kan dawn a ni a, a va ropui em! Kohhran, pawl leh mimal min tawngtaisak a, thilpek min petu leh, min ngaihtuah a Telephone-a kan chanchin min rawn zawt reng thintute, Serkawn damdawi ina Doctor leh Nurse duty te duat tak leh zam tha taka min enkawltute u, Pathian hmingin lawmthu kan hrilh a che u. Heti hian kan ngaihtuah ta a. Rawngbawlnaa thahnem kan ngaih ve avanga Lalpa, ka hman lo, kan tih chu min pawmsakin chawlhkar hnih lai hna kan thawk thei a. A kar thumnaah Lalpan, I hman! Chawl hahdam la, ka hmangaihna thlum tak hi tem rih teh, min ti ve ta thung a lo ni. Lalpa nen thata inlawm chu a va nuamin a va thlamuan thlak em! (Sam 34:7-10) Hei hi kan hla tur a ni e : Isu, ka hmangaih che, ka ta i ni e, . Hmanah aiin tunah ka hmangaih zawk che.

**************************

PADU BIAK IN HAWN REPORTS

Upa K. Zozamliana, BCM Bazar, Lawngtlai Inbuatsaihna : Arunachal East Field huam chhung Siang District chuan chung (Upper Siang) Padu khuaa Adi Baptist Union (ABU) member te chuan Biak in sak that an duh a. Helai bialtu Missionary 7

Pu C. Pachhunga kal tlangin tanpuina min rawn dil a. BCM Lawngtlai Bazar Mission committee chuan Rs 30,000/- kan pe a. Kan thilpek hi Lalpan malsawmin a tipung a, Padu-a Kristiante chuan Biak in tha tak an sa puitling thei ta a. He Biak in hawng tur hian min rawn sawm a. Thlasik khaw vawh lai anih avangin kan Upa senior ten kal an huphurh a, kan Unit TKP President Rbt. C. Lalhmangaihkima, kan Unit BMP President Pu J. Rohlupuia, kei leh Kohhran Zaipawl member 22 te chu kal tura ruat kan ni ta a. Padu khua hi Lawngtlai atangin (by Road) kms. 1616 zeta hla a ni a, kan phur rualin a huphurhawm viau bawk. Kal Kawng : December 1, 2009 tukah chhuakin December 4, 2009 zing dar 9-ah Arunachal East Field Hqrs. Pasighat kan thleng a. Music Teacher Pu LH Lalnghakmawia leh a thianten min lo hmuak a, Field Director Rev. R. Lalthangliana Quarter-ah luta kan tawngtai zawhin, chawhlui min lo buatsaihsak chu kan kilho a, a hlimawmin a thlamuan thlak hle mai. Hemi ni Chawhnu dar 1-ah Sumo 2 hmangin Padu khua chu kan pan chho a, Siang luipui kana kawng kual a sir kham sang pui pui tlan pelin, Arunachal ramngaw dur hring nghulh mai leh lui luang ham ham te thlir chung zelin dar 2-ah kan tum ram chu kan thleng ta a. Pu C. Pachhunga leh Padu Kristianten nghak hlel takin min lo hmuak a, nui var var chunga kan han in chibai chu kan hlim kher mai. An Vantlang In (Zawlbuk) thuk paruk neiah chuan lut khawmin kan tawngtaiho a. Thuk 6 lai an neih chhan hi Adi hnam peng (Clan) tin puala thuk an neih vang a ni tih min hrilh a ni. Padu Biak in kan hawng ta : Padu khua hi khaw lian vak lo, tlang pang pera awm a ni a. Kohhran member te an fel em em a, kan thlen in turah min hruai nghal sang sang a, keini chu a changtupa Pu C. Pachhunga inah kan innghat a. Padu kohhran member te hi za an la tling lo deuh. Mikhual min duat hle a, kan chaw ei lai pawh min vil reng a, thuthmunah kan kut min siltir thlap a ni. A khaw nawtin an lo pung khawm a, Pathian faka inpawlhovin 8

hlim takin kan zai a, zanlai dar 12-ah kan tin thei chauh a ni. Isua a ropui ngei mai! A tuk khua a lo var chuan an Kut sa ngaihsan ber Sial min talhsak a. December 5, 2009 zing dar 11-ah Padu Biak in a dung ft. 36 leh a vang ft. 18, a chung rangva leh a bang Tile chu, Hindi-in Pa leh Fapa lehThlarau Thianghlim hmingin ka hawng ta a ni. Hetiang duhsakna min petu Lalpa chu ropui ber rawh se! Pu C. Pachhungan inkhawm a hruai a, Pe rawh u, tichuan pekin in awm ang, tih thupui hmangin Biak in hawn thuchah ka sawi nghal a, an ngai thla tha hle. Pathianin a Fapa mal neihchhun min pek avanga Krismas thlir chungin, kan tual chhung kohhran thilpek tlemte leh Padu Kristiante sum, tha leh tawngtaina senso avanga he Biak in hi ding a ni tih sawiin, thilpek hlutzia ka uar a, an beng an dawh tha hle mai. An Biak in sak dan reports te, kan zaipawl zai te, Sunday School leh Group hlarem te kan ngaithla a. Min ti lawm em em chu Rev. Mikim Perme, Executive Secretary, ABU, kan FD Rev. R. Lalthangliana leh Pu LH Lalnghakmawia, Music Teacher ten min rawn ho thei kha a ni. Nuho kum 50 60 bawr vel, ha nawt fai uluk lo tak tak, an Biak in sak laia lui hla tak atanga lung, rawra leh balu hah taka phur chho va, Rs 1,000/- lai thawhtute zai chuan rilru a fan ril ngaih mai! Praise the Lord tih duh vein an lam fiah tha thiam si lova, Pet da Lawt an ti pap pap mai a, hlimawm ve tak a ni. Inkhawm chhung hian damlo te an lo kal khawm a, Lal Isua hmingin tihdam rawngbawlna te kan nei thei bawk a, a lawmawm hle. Kham lo taka darkar 4 vel kan inkhawm kan ban hnu chuan Sialsa ruai kan kilho a. Inpawlhona te kan nei chhunzawm a, a va nuam em! Lalpa, kan fak a che! Zan inkhawmah kan BMP President Pu J. Rohlupuian thuchah thiam takin a sawi a, Pu Manghakan Adi tawngin nal takin a lehsak a. Inkhawm boruak a nuam kher mai! Kan zaipawl bakah Group zai leh Solo te kan ngaithla a, darkar thum kan inkhawm chu ning hmel pakhat mah kan hmu lo. A tuk Pathianni zing inkhawmah kan TKP President, kan zaipawl Conductor ni bawk Rbt. C. Lalhmangaihkiman thuchah a sawi a. Mipa zawng chu Adi 9

Galuk (an Hnam kawr Coat ang deuh), kan nulaho zawng chu Adi puan min pe a; kan Biak ina zar tur puan hlai tak 2 min pe bawk a, kan lawm tak zet a ni. Pathian fakhona boruak a nuam em em a, kan thinlung leh kan programme-ah Lal Isuan hmun sang ber a changin ka hria. A va hlimawm em! December thla zing thawh hlima Upper Siang khaw vawta khawlai tui khawhthlaa (pipe) kan han inbual phar phar chu a vawt kher mai, min thlir thup zel maw le! Kan haw kawng : Chawhnu dar 2-ah Pasighat-a haw thla turin kan insiam a, Padu kohhrante chu tawngtaipuiin ngai tak chungin kan bye bye ta a. Lalpa, heng Arunachal Kristiante hi malsawmna vur mawlh ang che! Remchang lai laiah thla te kan la zawk zawk a, Siang luipui thlengin thla te kan la leh a, Pasighat chu kan thleng leh ta a. Tlaiah chuan kan beisei loh tak ABU hotupa Mikim Permean ruai min lo buatsaihsak chu hlim takin kan kilho a. Zanah Pu Manghaka te inah kan inpawlho a, FD reports pek te kan ngaithla a, zinglam dar 1-ah kan bang thei tawk a ni. A tuk zingah Guwahati panin kan chhuak a, Guwahati-ah leh Aizawl Bawngkawnah hian Baptist House-ah kan thleng zel a, thawktute an felin min duat thei hle, a thlamuan thlak tak zet a ni. Shillong Baptist House-a zan dar 10:30 a tuivawta ka inbual zet chuh! vawt ngat ngat tak a ni ringawt. Duhsakna changa VIP room min chantir kha ka phu lo, ka lawm lutuk. Tluang takin Lawngtlai chu December 12, 2009 khan kan thleng leh a ni. Padu kohhranten serthlum, buhfai leh Sialsarep min hawntir chu kan kohhran in tinah kan sem chhuak vek a, an mi hmangaihna thilpek kha thlarau lama kan in-unauna tinghettu, Krista hmangaihna hruia min phuar zawmtu, an tana vawiin thlenga min tawngtaitirtu a la ni reng a ni. (He reports hi hlui tawh deuh mahse Mission Field lam ngenna avangin Upa K. Zozamlianan a rawn ziak a, kan han tarlang a ni. Ani hi Police S.I, BCM Lawngtlai East Bial Sunday School Vice Chairman, Senior B zirtirtu, BSI Collector leh an District-a Makedonia Promoter ni lai mek a ni. Reports ngaihnawm tak a rawn thawh a, kan lawm e. Editor) 10

******************** KRISTA RIMTUI KAN NI SI A Hmingtea, Mission Promoter THU HMA : Tirhkoh Paula chuan Pathianin Krista zara hnehnaa a hruai fo thu min hrilh a (I Korinth 2:14-17). He thu hi Rom lal ram ropui vanglaia Rom Sipai General ten hmelma an hneh a, an rallak sum tam tak leh an hmelma indonaa an hneh sala an rawn hruaite nena Rom khawpui an lo luh duah duah dan mitthlaa hmu chunga ziak niin a lang. Hetiang Hnehna Kawngzawh hi a ropui thei ang bera buatsaih a ni bawk a, Rom lal ram thiltihtheihzia pho lanna atan an hmang a, thlirtu mipui tan pawh a mittlai thlak hle thin a ni. General hnehna changtu chu sakawr tawlailir cheimawiah a chuang a. A sipaiten sipai thuam famkim nen an zui duah duah a. A hnung berah an sal mante chu saruak deuh thawin khaidiata thlun chungin an lo kal nghuai nghuai a. Chu hnehna chu lawmin zai thiamte an zai a, lam mite an lo lam suau suau a, rimawi chitin an tum ruai ruai a. An hnehna avanga an Rom pathian hnena lawmthu sawi nan rimtui an hal a, a khu luih luih a, chu rimtui chu an vai vel a, kawtthler pumah a nam rum rum thin a ni. Chu rimtui rim chu pawl hnihin an hip lut a : pakhat chu General leh a sipaite leh Rom khawpui mipui kawngsir tuaka lawma ban lo vai suau suautute an ni. An tan chuan hnehna rimtui a ni. Pawl pahnihna chu an sal man khaidiata an thlun kea hnung bera lo kal te chu an ni a; an tan chuan chu rimtui chu thihna tur rim a ni. An dam dawn nge, an thi dawn nge, sal atan hreawm takin dam chhungin chhawrin an awm dawn tih an hre lo! An hmabak a thim a, a beidawn thlak ngawih ngawih a ni. He Hnehna Kawngzawh hi Missionary ropui Paula chuan a hmu fo va. A rawngbawlnaa Pathianin Thlarau Thianghlim hmanga damlote a tidam a, ramhuaite a hnawt chhuak a; mi tam tak Lal Isua 11

hnena hruaia an awm te; ring lo zinga chapo deuhte Pathian thiltihtheihna hmaa an tlawm dan te a ngaihtuah a. Pathianin Krista zara hnehnaa a hruai fo dan chu kan Bible chang tarlanah hian a rawn sawi chhuak ta a ni. Hetiang deuha Pathian hnathawh chi hrang hrang tlem kan han tarlang dawn a ni. TUI LIANIN A DANG THEI LO : July 1980 Fur ruahtui tlak lai, Chhimtuipui nu paw phut mai a kuang khata a luan hum hum lai a ni a. Evan. Upa C. Lalthlamuana (RIP) leh a thiante Evangelistic Team, Mizoram ten S. Vanlaiphaia Salvation Camp nei turin an kal a, Darzo kai tuipui an han thlen chuan a lo lian nasa hle mai a. Lawngpu chuan a kaipui ngam ta tlat lo mai! Pu Muana chuan kaipui hram turin a ngen a. Lawngpu chuan tui liana inkar kai chu a hlauhawmzia sawiin a theih loh thu a sawi nawn leh a. Tui lianin hlauhawm chin chhin chhiahna a pel thui hle a, thih vek mai theih a nih thu pawh a sawi nghe nghe a ni. Pu Muana chu luiah chuan a chhuk thla a, lui tui rap chung chuan Pathian hnenah a tawngtai ta a. A lo let chho leh a, lawngpu chu lawnga hruai kai turin a ngen leh ta a. Lawngpu chuan, Chhiatna eng pawh thleng se, a mawh i phur ngam dawn em ni? a ti a. Pu Muana chuan mawh a phurh ngam thu a hrilh a. Chuti na nana chu tiin lawngpu chuan an Team member-te leh an thawmhnaw chu lawnga hlangin a hruai ta a. Tuipui khaw mipui zawng zawng chuan an thlir thup mai a. Tichuan a chhiahhlawh tawngtaina chu Lalpan a chhang a, lawngpu chuan lawng chu a han thai ta a, thal lai tui ang main lawng chu ngil takin a kaina pangngaiah chuan him takin a kai thei ta mai a ni. Hlau suh u .Tui te in dai kai lai pawhin kei in hnenah ka awm ang a; luite in dai kai lai pawhin a chim pil lo vang che u (Isaia 43:2) titu Pathian chuan, thlarau bo tam takte chhandama an awm theihna tura a chhiah hlawhten mihring ngaiha atthlak tak anga langa tuipui tui lian nu phut maia lawnga an inkar lai chu him takin a hruai kai ta a ni. Lalpa chu fakin awm rawh se! RAMHUAI PAWHIN A HLAU : Tum khat chu Pu Muana te Team chu Haulawng, Mualthuam leh Zotui lama Salvation Camp 12

nei turin an thawk chhuak a. Haulawng an Camp chu Pathianin mal a sawm a, mi tam tak an piangthar a. Nimahsela Haulawng A.O nupui chu a inpe duh tlat lo mai a. Mualthuamah in sawn pheiin, chuta tang chuan Zotuiah an phei leh a. Haulawng an chhuahsan hnu khan an A.O nupui kha ramhuaiin a man a, an mang a ang hle mai a, chuvang chuan Zotuiah an rawn zawn phei a, tlang chhipa in pakhatah an dah a. An Bialtu Pastor leh Pu Muana chu tawngtai turin an lo chho va. Ramhuai man nu chuan, Khu ta khu Zama leh Zamlova an lo kal e, a lo ti a. A lo hlau hle mai a! Pu Muana chuan a lu chunga kut nghatin Pathian hnenah a tawngtaisak ta a. A lu chunga a kut a nghah veleh chuan chu nu chu hlauvin a rak tuar tuar mai a. Pathian thiltihtheihna chu ramhuai chuan a ngam ta lo va, chu nu kawchhung ata chu a chhuak ta a ni. Pathian thuin a sawi angin (Tirhkohte 19:11-17) ramhuai pawh hian Pathian rawngbawltute hi a lo hre hle mai a, an mahni ni lovin, an thinlunga Lal Isua, Pathian Fapa mal neihchhun chu an hlau va, an khur thin a lo ni. Arunachal East Field Mebo khuaa nu pakhat ramhuaiin a man pawh Revival kohhran member-ten an va tawngtai ve a. A lo hlau lovin a lo nuihzat hle mai zuk nia! A hnuah Baptist kohhran Upa leh nu pahnih an va kal ve a, an tawngtaina Lalpan a chhang a, ramhuai chu a chhuak ta a ni. He Field chuan chung Upper Siang-a Gobuk khuaa an Pastor (Pathian thu zir ni lo Local Pastor-a an hman) pa te teng tawng pawh kha a ke zeng dam nana Missionary-te kum 3 zet kan tawngtaina Pathianin a chhang a, a lo dam ta a. Chumi hnu chuan an kohhran te reuhtea Pastor a ni ta a. An khuaa ramhuai tihbuaiten an koh chuan a ipteah Bible a ak a, tawngtai turin a kal hna hna thin a. Pathian Thlarauvin a thuam tha khawp a, ramhuai zawl in a thlen hma te hian mihring kawchhunga ramhuaite chuan an hlau va, an lo chhuak lawk dawr dawr thin a nih chu! Lalpa mite lo hlutzia hi. Rawngbawltute u, zam reng reng suh u. Thlarau Thianghlim Pathian Kutin a hruai che u a, a hming ropui nan leh a ram zau nan a hmang dawn che u tih hriain, huai 13

takin ke pen rawh u! Indona chu Lalpa indona a ni a, hnehna chu Lalpa ta a ni si a. SIRO RAMHUAI : Arunachal West Field Ziro phaizawl chhak lam Siro khua, Bethel Baptist church kan neihnaah pawh pa pakhat ramhuai engemaw zatin an man a. Kristianten an tawngtai a, a thut hual taih a. Ramhuai 10 dawn lai chu an hming an zawh chhangin an chhuak tawh a. A tawpah ramhuai luhlul zet mai, a hming pawh sawi tha duh lo a la tawm tlat mai a. A hming an zawh sek sek avangin, an rap ber tur nia a rin, Siro khaw bul lawk Hong khua, Apatani thingtlang khaw lian bera pa pakhat, a sual leh ruk ruk chin avanga an khuaten an sah hlum hial, a thlahrang Apatani Kristian lo ten an hlauh ber mai hming chu a rawn inchhal ta. Mahse khami ni kha chuan Kristian rinawm tak tak, Lal Isuan krawsa a thihna leh thlan atanga thihna hneha a thawhlehna hmanga Setana a hneh tawh hretuten an thut hual a ni si a. An hlau ta aw zawng si lo! Tu pawh ni la Isua hmingin chhuah thu kan pe a che, tiin tawngtainain thu an pe a, a chhuak lo ngam ta lo a ni. Lalpa chu fakin awm rawh se. Kohhrante u, kan Missionary te tana in tawngtaina hian thil a tih nasatzia hria in, Isua hminga hnehna puang zel turin, in ai awha in tirh Missionary te leh an kohhran dinte tan hian lo tawngtai sauh sauh zel teh u. TLANG KAWMNA : Isua ringtute chu Pathian tan Krista rimtui kan ni a. Chhandam mekte tan chuan Nunna tur rim kan ni a. Boral mekte, Pathian sawmna ngainep a, Thlarau Thianghlim meuh ngaisang lo va, a mite hmanga a sawmna aw nem tak hnawl lui tlattute tan erawhchuan Thihna tur rim kan ni tlat. Lalpa aw hria a, awih duh lova an thinlung an tih khauh luih tlat chuan an boral ngei ngei dawn. Pathianin a khawngaihnain Thuthlung Thar rawngbawltuah te min tlintir a, he Chanchin Tha hril hna hi khawvela Pathian ram dinna atan a pawimawh em avangin Amah kan Lalpa Isua ngei hian Thlarauvin min thawhpui a, kan thu hril hi chhinchhiahnain min tih nghehsak zel a ni. He hna hi hna ropui, Pa leh Fapa leh Thlarau Thianghlim an chetho thawt thawtna a ni tih i 14

hria ang u. Upa C. Lalthlamuana te, Missionary-te chauh ni lovin, Pathian chunglam kohna chhanga Chanchin Tha hril a, Lalpa zema thlarau bote sengkhawm tura pen chhuak apiangte chu Pathianin Krista Rimtui atan a buatsaih a, a hmang thin si a.

*************************

MISSIONARY FURLOUGH KAIHHRUAINA K.M.S.Dawngliana Ni khat mah missionary la ni lo pui hian missionary furlough-a rawn chhuakte hun hman dan thuah hian sawi tur nei ve tlata inhriatna ka nei a. Ve mai mai a, min ti anih pawhin a awm lo lem lo va. Amaherawhchu kan missionary zawng zawngin an mamawh niin ka hre tlat a, ka insum zo ta bik lo a ni. Ka ziak chhan ka sawi hmasa phawt ang, pahnih a ni nghe nghe. Pakhatna: Tunah hian BCM in Mizoram pawna missionary kan tirh chhuah, furlough hmanga eng tik hunah emaw Mizorama rawn furlough tur za nufa zet kan nei a. Kum 5 dan zelah rawn furlough pawh nise, kum tin missionary 20 vel chu rawn furlough tura ngaih a ni a. Mi pakhat (or chhungkaw khat) furlough hian Pastor bial 3 zel an tlawh thin a. Hetiang khawpa missionary Kohhran, a khat tawka anmahni (missionary) ngei hmai hmaa hmua, nung taka rawngbawlho kan nih avang hian Mizoram Baptist Kohhrante thinlungah eng ti kawng mahin missionary-te hi an la nep lo. An kalna Kohhran apiangah chief guest an ni a, an ni reng bawk ang. Tu pawh ni rawh se, missionary furlough a nih phawt chuan headquarters hotute an lo kal dawn tih aiin Kohhrante thinlungah an tla na zawk hrim hrim. Kan lo tawiawm danah leh kan lo dawnsawn danah duh thu sam chiah lo mahse, mipuiin kan chhoh en hle si a, chu laiah chuan kei, mi a zawnga hnaisai lo ber mai hian 15

tun aia kan furlough programme a hlun zawk theih nan leh Kohhranten kan hlut lehzual theih nan kan missionary-te kaihhruaina kan ziak ta teh tlat a nih hi. Pahnihna: Missionary thenkhat chu inbuatsaih tha leh thusawi inphaman tak an awm laiin inbuatsaih lo emaw tih mai tur khawpa che nawi, Kohhrante tana chhinchhiah leh hriat reng tur awm mang lova thil sawi ve \euh an awm leh tlat thin-an tam zawk mah maithei! Chuvangin ngaihthlak nuam deuh, inphaman deuh zawka report pek dan ngaihtuahpuina a ni bawk. Kan missionary-te chauh hriat tur chu ni se, lehkhathawna anmahni hrilh pawh ka inhuam reng laiin kan zavaia tan a pawimawh niin ka hre bawk si a, chanchinbuah ka ziak ta mai a ni e. Tin, Kohhran Bengah chauh ni lovin Missionary Tlangau-ah pawh min lo chhuah sak turin ka ngen bawk a, a pahnihah a chhuak kawp anih pawhin in lo hrethiam dawn nia. Kan missionary chhuanawm tak tak ten Furlough programme-a Kohhran an tlawh huna an hriattur pawimawh (an hmaih miah loh tur a ni zawk awm e) te chu chu hengte hi a ni. Missionary-te address-in ka sawi ang. Missionary-te u, 1. Kan lo tawngtaipui fo tawh in ni nain kan la hre chiang lo che u a. Chuvangin lawmthu leh chibai bukna in sawi rualin in hming, chhungkaw chanchin, in chhuahna Tualchhung Kohhran te sawi hmasa ang che u. 2. Missionary in nih lan dan- engtia missionary ni ve ta mai nge i nih, in inpek tirha in testimony tlem sawi bawk rawh u. Tichuan, in thawh tan kum, in thawh tawhna hmun leh tuna in thawh mekna hmun sawi leh rawh u. 3. Tuna in thawhna hmun in thlen tawh chuan in awmna khaw chanchin tlem, in inthenawm khawven dan, eng hnam nge an nih leh an chanchin tlangpui tak tak chauh tal sawi bawk ang che u. 16

Mizote nena inanna riau emaw, inan lohna riau emaw a awm chuan sawi tel zauh rawh u. 4. Tin, in thawhpuite chanchin chhia tha tlem tal sawi ula, an chanchin lawmawm lam sawi tel hram tum ang che u. (Heti chin hi minute 5-10 ah khunglen vek tum tur. Tichuan, sawi zawm zel . . . ) 5. A hmuna in rawngbawl dan. Hei hi in furlough chhan tak kha a ni ta. Pulpita tu emaw hun luahlan hlauh khawpa an ken nachhan che u kha tihtakzetin sawi ang che u. Rawngbawl dan pawh hi sawi thiam tum tur, sawi tur hre lo deuh anga inlan khan Kohhranhote thinlung a thlep thei a, an ngaih a tha lo thei bawk. Chuvangin he laiah hian hun ren lem loh tur. Mahse thu inluhkhalh deuh deuha in sawi chuan dawnsawn thiam a har. Ni tina in rawngbawlna hmun kha an la kal ngai miah lohna, a awih nge a zawl pawh an mitthla thiam loh a nihziate kha hre reng la, fiah takin sawi tum rawh. 6. In rawngbawlna rah lawh tur awm apiang Kohhranhote lawh sak hun a ni tih theihnghilh miah suh u. Chumi rual chuan lawmna in neihte, harsatna in neihte sawi ula. In lawmnate chu ti lua awm lovin sawi a pawi lo va; in harsatna erawh Kohhranten harsatna ni ngeia an hriatpui tur chin chauh sawi ang che u. A tawi zawngin in harsatna chu in sawi hmain thlifim hmasa rawh u aw. 7. Tuna in rawngbawlna mek bakah hmachhawp (project) in neih ang angte mipuite hrilh hre nghal u la, mahse hun in hman rei tawh deuh avangin chipchiar lutuk a tul lem lo. 8. Headquarters hotute hriaptuinaa appeal in nei anih pawhin inthlahrung tak, zawldawh takin in appeal tulna leh mamawhna chiang taka tar langin a tawp lamah sawi ang che u. 9. Tichuan, thuchah a ni tawh mai. Mahse loh theih loh anga ngai lovin aw. Hei hi ka ngaipawimawh khawp mai. Missionary thenkhat chuan thuchah sawi tel phet in tum a, a tul lem lo. Sermon 17

pangngai hi chu keini Mizorama kristiante hian kan ngaithla tam tawh lutuk a, sawi loha ram pawh kan nei tawh lo. Kan hre fe hlawm mai tih hi hria ang che u. Chuvangin testimony thar in nei anih lem loh chuan report kha duh tawk mai rawh u. Kha kha BCM in a fa duhtakte kum 5 dana a chah chhuah chhan bul ber a ni tih pawm thlap mai tur a ni. 10. A tawp berah chuan Kohhranho zingah furlough programme tha tak in hman chuan in hnunga mite tan kawng insial a ni tih hria ula; buh deuh nuai, ninawm deuh, ngaihawm loh deuha in hman chuan in hnunga lo furlough turte tan a zia lo hle thei a ni tih hriat tel ve pawh a tha. Khai le, hre ber angzia zangin ka ziak leh ta ngawt mai. Tu man, eng nge ni na vei ti lovin, kan Mission rawngbawlnain hma a sawn zel theih nan ka tih theih tawk ka ti ve a nih tih min pawmsak a, malsawmnaa min chan sak turin chhiartute ka ngen a che u. Kohhranho tan Lalpan malsawm rawh se.

****************************

Lawmthu Sawina Leh Furlough report

L.H. Lalnghakmawia te chhung Model Villege, Arunachal West Field 21st July, 2011 Furlough hmang turin kum 2010 May ni 21 khan Serkawn kan rawn thleng a, lawmna leh hlimna leh chona kan dawng in kan hmu tam hle mai. Headquarter-in Arunachal-a thawk Thalai Entu laksak hmasabertu (1991-atangin) leh Missionry Tlangau min laksak hmasabertu, tlawh ka chak leh duh em em thin, tuntum atana ka/kan thlan luih ve ngat, Paithar Bial bakah, BCM-a kan 18

Mission hnuk, Lawngtlai Area-a ka la tlawh loh awm chhun Lawngtlai E Bial te, Pu Darphawka sulhnu hlui awmna Theiriat Bialte min tlawhtir-a, Official programme piah lamah, Upa Dengthanga (Zotlang) leh Pu Ramdina (Zotlang N) ten Chawlhni zing an hun min pek bakah Chanmari bial - Lungleiin Convention-a thusawi turin leh BCM Bazar - Lungleiin Missionary Sunday-a thu sawi tura min rawn sawm chu (hun hmanna tur ka lo neih tawh avangin ka hmang thei lo vek) a mak ka ti zawk hle mai. Tin, Serkawn BMP-te, KNP-te, Upa R.Laihnuna (v-3 min pe tawh a, v-1 ka hmang)te, Bazar bial BKHP-te, Pu Thuamtea (Zohnuai) te, Pu. Buangthanga(Zotlang N) leh Rev. B.Lalramhlunan (Martarte Ni/Sunday pawh min pe-a, ka hmang thei lo tawh), an hun hlu tak min hman tir a, heng bakah hian Chanmary (bialtu Pastor Rev. Chuaukailiana te nupa leh kohhrante thahnem ngaihna) leh Salem (Lawngtlai ve ve) in hun min siam sak a, an thahnem ngaihna leh duhsakna kha a ropuiin a thlamuanthlak hle mai, insit erawh a na duh hle. Kawmzawl leh Khawiva kohhran in chawlhni zing min pe a, kan biala kohhran zawng zawng-ah Arunachal-a Pathian-in BCM mi dah/koh dan/chhante ka sawi kim ve thei ta a, ka lawm tak zet ani. Tin, official programme kan hman chhunga min tawngtai saknate Lalpan a hria a, Nikir khawchen hunlai leh Vawk hniakzawn thla(16th June 8th July) ni mah se, zan khat chiah nihliap khum ngai-a kan han tluan chhuak thei te kha a mak ani. Tin, kohhran kan tlawh hmasak berah Pu. Ruata Kawlni, Headquarter-a kan AV hotupa-in min ho thei a, tin, Pu KMS Dawnga(kohhran beng) leh Pu Hamletan a projector min hman tir mai bakah(kan tih chhiat sak leh nghal a), an fate damlo chung chung-a an chhungkua-in min la tawiawm zuite, Upa Zozamlian(Rosy-i pa)an Lawngtlai-a min tawiawm reng bakah, a motor thar nikhat min han pe tawp-te, Pu. H.Lalruatkiman(Lawngtlai-Electric) Paithar Bial fan nan a motor min han pe tawp-te, Pu. Vanlalhlun (Lawngtlai Salem)-te, Pu Dika 19

(BCM motor khalhtu) Chawntlangte, Pu Zualte-a ten Missionary thlah an han hauh tlatte, Thianpa Zira leh Makpa Ruata Kawlniten Missionary tan an motor an han dah tawpte kha.rilru hi a thlamuang veng veng ani. Tin, bial kan tlawhna zawng zawngah(Theiriat Bial, Lawngtlai E Bial leh Paithar Bial) bialtu Pastorten min ho tluan parh bakah, Lawngtlai ES, Rev Lalbiaksanga Chinzah-in a nupui leh fate nen Lawngtlai area-ah min ho/uap tluan parh bakah, Lawngtlai Bazar Thalai 30 chuangten an kohhran piah lam thlengin min tawiawm-in hlate an rem a, an BKHP-te leh upa leh rawngbawltuten min ho reng bawk a, a thlamuan thlakin a lawmawmzia kha kan sawifiah thiam ngai awm love. Tin, BCMElectric, Lunglei-in Missionary an thlah dan kan zuk hmu ve a, an entawn tlak hlein ka hria. Heng bakah hian July ni 16 (zirtawp) khan kan Kohhran Hruaitute (Serkawn) leh FOD ten Kan kohhran atanga Missionary kal awm chu tiin, chawhlui/ruai leh in pawl hona hun an/min buatsaih te kha, kan khua Serkawn leh Mission Headquarter dintu, Pathian hmarua Sap Upa leh Pu Buanga leh, hmangaih tak leh duhsak taka min lo awmchilh-a min lo enkawl thintu Missionary-te pawh an lawm ve ngawtin ka ring. Heng bakah hian he rawngbawlnaah hian an tel ve ani tih hriat ngawih ngawih, report ngaihthlak chaka rawn lenglut zawng zawngte leh, inah pawh chaw ei hman lova min siama chaw ei-a min sawm tute avang hian Pathian hi fak loh theih a ni lo. Heng zawng zawng bakah hian, sum leh pai min paitu kohhrante leh mimal-te avangin kan Furlough chhunga kan ha siam/hnawh mante, kan fapa tarmit thlak ngei ngei ngaite kan thlak thei a, mi neih ang zawng zawng nei lo mah ila, mawnglang leh tawp chhe lutuk-a kan awmlohna tur kan nei a, mahni pawisa cheng singkhat hmu ngai lovin kawl rei lem lo mah ila sing khat mai nilo kan han chhiarve a, a lawmawm danglam ve riau nia. Kum 1991-a 20

Arunachal kan kal dawn khan, kan pawisa neih zawng zawng thawhlawm chi hrang hrang leh rawngbawlna hrang hrang-a ka hman vek avangin(ka chhungte hriat lohvin) ka hlawh lak hnu hnung ber atanga sawma pakhat kan pek hnu-ah leh mamawhzual kan lei hnuah, cheng sangkhat pawh nei lovin ka nupui leh fate ka chhuahpui-a(kan pawisa neih loh tuman an hre lo), Chhangchhe thuamhnaw si kha Pu China leh Pu Chhunga bag leh Pate-a suitcase nen Gypsy hnung-ah a la leng vek nia, Lalpan retheih bik loh hmel takin min siam tlat ani, in thil pek(Pathian in hmangaihna leh nangmahni hmanga Pathianin min pek) azara hian kawl nei lo mah ila, leiba kan nei bik miah lo nia !! Lalpan malsawm vek che u sela, Lalpa hi i chawimawi zel ang u. Tichuan lawmnn tamtak nen, kan awmna hlui Arunachal E a Pasighat ni lovin, Aruanchal W field pan turin, hnam hrang leh tawng hrang, ze hrang leh mi hrang zinga thawk turin thlakhat leh a chanve kan hman hnu-in July ni 30-khan kan awmna thar tur chu kan chhungkuain kan thleng leh ta ni, min lo tawngtai sak mawlh mawlh the u. Lalpan BCM hi a din chhan ang ni chhuak turin min tichak thar zel theuh sela, Arunachal hi Kristian Ram lo ni thuai thuai rawh se.

**************************** LAWMTHU SAWINA. F.Lalzidinga, Principal Huto English School, Nirjuli (A.P) Kum 3/4 vel chhung khan, Huto English School chuan kan mamawh tak tak, Budget a khung chiah si loh, mi thahnem ngaite hnen atang a thil pek dawn kan nei nual mai a. Zoram lam a 21

Kohhran Mipui ten in lo hriat ve ngei hi a thain kan hria a, kan han tar lang ang e. 1. Puanthui khawl: Hostel Naupang kawr leh thawmhnaw dang tet te hi Puan thui hnenah kan pe hnawk hnawk thin a, kan chawi ve nual thin a ni. Kan mamawhna hriain Lungsen Mahannaim Kohhran ten Rs.3,000 (Sangthum) man Puanthui khawl min lei sak a, kan Lawm tak meuh a ni. Kan hmang tang kai hle mai. Mahannaim Kohhran chungah kan lawm tak meuh a ni. 2. Sound System: Aizawl South Pastor bial kha, bial 2(hnih) a an lo inthen dawn takah khan an Bial M & E Committee khan an sum hman tangkaina tur an zawng a. Keiniin Sound System kan lo mamawh em em mai si a. Tichuan, Rs.15,000(singkhat Sangnga) min rawn pe a. Guwahati ah Rs.16,000/- man Sound System tha tak mai kan lei ta a. Kan hman tang kai em em dan hi rawn hmu sela chuan , "Rs.15,000 kha kan va han hmang tangkai em em ve le" an ti ngei ang. 3. Building sakna: Class 7 - 10 room tur kan sa a, kan budget nen a inmil ta lo riau mai a, Luah hun tawhah kan luah thei dawnin a lang ta mang lo tlat mai a, kan mang a ang hle mai a, kan tawngtai tlut tlut mai a ni. Mak deuh maiin Serchhip lam atangin, Upa Hrangalha'n kan zawh fel theihna tur tawk vel Rs.60,500/- (Sing ruk leh zanga) lai mai min rawn pe leh ta hlauh mai a. Chumi azarah chuan kan zo fel thei ta a, a hun takah kan Luah thei ta a ni. Marble Plate ah mawi takin kan ziak a, a nupui Pi Lalnunmawii hriatreng nan a Upa Hrangalhan Pawisa a pek atang a sak zawh anih thu hi bangah kan tar kalh a ni. A chungah kan Lawm tak meuh a, A rilru a thu sawitu Lalpa Pathian chungah pawh Lawmthu kan sawi a ni. 4. Key board: Ramzotlang lam atangin Pi Tluangpuiin Keyboard leina tur Rs.18,000 (singkhat sangriat) min rawn pe leh nawlh mai a, kan phur tlang hle mai. Model Village Kohhran Pastor hluite 22

chhungkuain, an fapa neih chhun thi ta hriatreng nan Keyboard leina an lo pe ve a, Chumi lei tur a Pu Lh.Lalnghakmawia fapa Lalthlamuanpuia te Guwahati kal remchang kan chah ve nghal a, Yamaha PSR 1425 tha deuh mai an rawn lei a, Zai pawh a nuam tan ta hle mai. Heng bakah hian Kan mamawh em em Khuang leh Type Writer leh Cyclostyle te min petu Serkawn leh Ramzotlang Kohhran leh Shalom Kohhran Aizawl te, chungah pawh kan lawm em em tak meuh a ni. Tin, Sikul kan din tirh a Gilgal, Theiriat ho Sanapui min pek leh Bethsy nu Pi Pari Sanapui min pek pawh kan la hmang reng mai. Mak ve deuh mai chu; heng thilpek hlu tak tak kan dawnte hi keimahni dilchhuah anni hauh lo hi a ni. Lalpain kan mamawh dik tak a hria a, Mi thahnem ngaite thinlungah thu a sawi mai thin a ni. Lalpa programme zelah kan la kal tih hi a chiang thinin ka hria. Kan mamawh chu kan Pa van amiin a hria e. Mamawh chu kan ngahin kan inhria; mahse sawi vak vak emaw khawn emaw lam kan tum hran lo. Kan mamawh tak tak chu, Kan Pa van amiin a hria a, mi thahnem ngaite rilruah thu sawiin min pe zel mai ang tih hi kan ring tlat a ni. Kan Lawm em em e.

NYISHI KAN THLENG TA

Lalnghakmawia Lianhna Model Villege, Naharlagun, Arunachal Ngaihtuah pawh ka ngaihtuah ngai loh, Nyishi zinga thawk tura tihna chu, kum 2010 Missionary Conference khan inhrilh lawkna 23

leh sawi thawi chhina awm miah lovin kan han hre thut mai a, kan hriat zan hian kan mikhualna-ah kan nu a tap tlaivar zak a, conference-in rilru ala leh thei tawh lo, tichuan kum 2010 May ni 13-khan kan fate exam zawh veleh (may ni 11-ah an zova) kum sawmhnih dawn lai kan lo khawsak ve tawhna, Adi Field chu chhuahsanin Nyshi zinga kan thawk turin zanlai dar sawm pahnih rik dawn tepah, min lo hmuaktu Field Director leh thawpuite nen Nyishi Baptist hmunpui-a Field Director quarter chu kan thleng a. kan bungrua kan dah fela Furlough-in Mizoram panin may ni 15-ah kan chhuak leh a, July ni 30-ah kan let leh ta ni. Kum 1991 kumtir-ah Arunachal-a thawkturin Serkawn kan chhuahsan a, kum 1992 kum tawp-ah tuna min transfer-na Nyishiho zing-a thlakhat lek tal thawk turin Nyishi(a Gen.Secy. hlui nita) in min rawn sawm a, mahse, Adi ho zinga kan programme neih san en a hun ainan bakah, BP stoke ka neih avangin ka kal thei ta lova, Dibrugarh-ah ka in entirta zawk a, kum 1996 khan Adi-aiawhin President nen, Treasurer leh General Secretary nen Nyishi Silver Jubille-ah ka kal a, kum 2000 khan Nyishi thalai khawmpui-ah Naharlagun zaipawl(Pu. Marina naute) nen kalhovin, Adi tawngin Adi report ka pe tawh a, Apatani khawmpui kan kal lam leh haw lam Naharlagun thalaiten min buaipuia, tin kum 2001 khan tuna an Gen.Secy ni mek hian Thuthlaung Thar a lehlin laiin Itanagarh-a awm turin min rawn sawm a, Rev, V.Laldingliana nen kan hnial hnu-ah headquarter hruaitute remruatna leh tirh-in thla li (4months) Itanagarh-ah chuan ka zuk awm a, (kan TV neih chhun pawh hi min leisak a ni), heng hi Nyishi-hi nena kan khawsakho tawhna te a ni. Tichuan, Nyishi-ho zingah kan han tal tan ta a, a dan a lo dang hle mai, an aw(voice) a dik tlangpuia, tin an thil phal hle bawk a, Pi Chhawnin min advertise tha-in, Field Director-in min lawmluh niah min present tha bawk-a, kan lawina tualchhung kohhran chuan/hian min duat thiamin min ngai pawimawh der ve hle, mahse, tawng kan thiam lohavang erawh chuan a buaithlak deuh. Khawpui chhung-a kohhran upa ber ah kan lawia, (Capital complex ah hian kohhran sawmhnih vel lai a awm a), mahse an 24

chhangchhe hle mai, a te ber pawl leh a rethei bte zinga mi an lo ni tawh hial a, tihtur a tam hle dawn mai. Pi J.Chhawnkimi thahnem ngaihna azarah Baptistma programme vawi li zet kan tel ve ta a, a lawm awm hle. Adi ho zingah khan Thalai leh Sunday School rawngbawlna ka phak tawkin ka ngaihtuah ve hle a, Adi ho Pathian Thu hriat nan, Rev. V. Laldingliana hovin Sunday School Campaign vawi li(4tines) kan nei hman a, a tawp ber kum 2005 kum tawp atanga kan neih chu a hlawhtling chho zel a, a lawmawm hle a, kan chhuahsan lai khan Pasighat kohhran ringawt-ah pawh chawlhni-in mi 150 atanga 200 in regular takin Sunday School an kai ta a, an tawngin zirlai bu (bu thum) kan siam hman a, a tangkai hle in ka hria. mahse, zai lampangah erawh chuan, Adi chu an aw a lai tlangpui deuh ani(aw lai lo pawh an awm ve tho), mahse ka mitthla leh suangtuah ber thin, tui takin Pathian kan fakin mittui nen hla kan sa ve tan a, ka lawm hle, ka suangtuah thin leh tawngtainate hmu hman tho mah ila, an zinga tel leh awm rih kha ka khamlovin ka thlahlel ani; Missioanry viak tha Manghakan(C. Lalramnghaka) min rawn thlaka, tin, Adi-a thawktu zinga taima lawtlak Chhunga(C. Pachhunga) a la awm a, tiin ka thla amuang deuh; Lalpan Adi-ho malsawm zel rawh se. tawngtainaah i hre reng ang u. Nyishi ho chu an lo dang deuh, an sual lova, mi ngaihsak em em laiin, kan tel lovin thil an ti thei khawp mai, kan tel a tul tih an hre lo hi kan awm leh tel a tulna ber niin ka hria, First Generation Kristian an la niin(an President thlak tak pawh kha kum 1999-a ringtu nia Baptistma chang chauh a ni) an rinna a chak hle a, chuvangin tawngtaina hi an ring em em a, thlarau mi hmel taka che thiam leh peih tan chuan hruai kual mai mai theih tur hlir an ni ang a tih awl tak an ni, ngaihtuah an ti tam veleh chhawng khawp mai; chutih lain an Pathian Thu hriat a la tlemin, Kristiante Thurin tlangpui Bible-in min zirtir pawh hi an hre lo hle thung. Chuvangchu nge ni an Thalai inkhawmpui lian[Nyishi MTKP inkhawmpui mi sangngate an kal thin]-ah chawhnu zawng zawng Volley Ball khelhnan zuk hmang deih a. 25

Thuthlung Thar an nei tawh a, Thuthlung Hlui an letling mek-a kum 2020 hma chuan neih theih kan in beisei, Hla Bu hi Living Word(Dr. Thangi)-in an siamsak an nei a, hla erawh chu midangte aw(voice) atanga an zir chhawn vek niin, kohhran zawng zawng deuhthaw-ah an zaiin vuak mumal an nei lova, thawk chham hun kha lak leh hun a ni tlangpui, thluk in ang deuh, sakpui theih meuh si loh an ni fur a, Music Teacher awmna kohhranho erawh chu an zai a dang zaih thung; Kristian lehkhabu dang chu an nei meuh lo; tawngtai nain lo tang zel teh u. Hetiang an nih lai hian, BWA ahte, APBF-ahte, APBF-Youth etc ahte kalin foreign an kal ve reng a, Kristian inzawmkhawmah National level thlengin nihna an chelh ve tawh a, khawvel tihdan changkang ber berte, khawvel-a workshop changkang taktakte pawh an copy-in an tihpui ve reng a, mahse an chhungah chuan a tuate pawh hian(i ti mai ang) zirtirna dik leh tluantling hi an mamawh ngawih ngawih ani; mitthi an tawngtai sak dan te, Baptistma Certificate an ngaih dante, midangte tan a sual inpuanna an neihsak dante, natna leh vanduaina an hmuh leh thlir dante en hian tih tur a la tam hle a tih theih erawh chu a tlem hmel khawp mai, hun a duh deuh dawn ani. Music-ah bak min mamawhin inhre lo mahse(music-ah pawh hian an duh danin min hruai an tum tho a ang hle), tihtur a tam hmel hle mai; (keini Mizote pawh Bible kan neih hnu pawhin, Sunday School-a kan insawhngheh hma kha chuan, Mizoram kohhrante zirtirna dang dangin min su nasa-in pawl a piang/chhuak tam hle a nih kha, heath chuan Sunday School chu sawi loh Bible pawh kan la nei lo ani) i tawngtai fan fan teh ang u. Hetiang hi ni mahse Training nei/pe tur in mi dang an sawm ngai lo hle a, Field Director pawh training pe turin an sawm/hmang ngai lo, thu sawi-ah erawh chuan an sawm thin. January thla 2011 khan American(anmahni enkawltu) hovin training an rawn pe a, an pastor senior thenkhatte leh Full Time-a thawk-te, Evangelist ho zawhna mak tak tak an zawh han hriat chuan thaw a ipik duh hle, zawhna an zawh an hriat hnu chuan zirtir tur ber pawh an hre bik 26

lo; chutih lain Charismatic movement-in [Namanan Pathian dihdamna turin beisei a neih ang kha ani be rang chu, rau riau anga lang chi hi] a chiah a, an Pathian Thu hriat a la tlem si a, ngaihtuah a ti tam duh khawp mai. Kristian kan tam tawh hle a, rintlak/rintur an tlem hle, mipa ngat phei chu an vang ani; tawngtai pui kan va ngai em. Hetiang an nih lai hian Theological College (Bth. zir theih nan siam an tun mek)pakhat, Sikul pangngai pathum, puanthui zirna(Pi. Chhawni hovin) pakhat leh Book room pahnih, tin thuamhnaw zawrhna dawr an nei bawk. Khawmpui lian vawi-hnih leh Bial khawmpui vawi-3 leh, Special programme tlem ka hmang/tel ve tawh a, Zai an ngainat hmel em em laiin, Praise and Worship-ah KNP hla ni awm tak tak zangkhai deuhvin kan sa-in kan zuangin kan lampui suau suauva, kan au dual dual a, a nuam phian, tawngtai laiin music thiam vak lovin an tiri reng bawk a, a dangdai khawp mai, a bak chu Lalpa Zanriah anih loh chuan tan hnuah hla kan sa tawh ngai lo, tam tak chuan an tawng aiin vai hla an ngaina zawk nghe nghe; Pathian Hla-a (Thlarau mite hmanga phuah) Thlarau lam chaw ei leh Pathian pawl hi chu kan la hlat deuhin ka hria, Mizote, sapten-a hla hmanga Pathian nena inpawlna kan neih ang hi chu kan la pawh lo deuh; lo tawngtai mawlh mawlh teh u. Adi ho zingah khan kum ruk kan awm hnuin an mahniin hla an zirin in elna te kan nei thin a, zaipawl inelnaah tumah zirtir turin sawm kan phal ngai lova, anmahniin an rawn inzirtir chawp ve a, a hmuhnawmin a ngaihnawm duh hle, mahse kum 2002 atang khan thalai hruaitu lu ber pahnihin harsatn an siam ta tlat mai a[ka langsarin ka lar ve em a ni, thalai leh kohhrante pawhin thu ber emaw min ti ve hial thin nia], kum 2008 thleng khan zaipawl inelna kan nei leh thei ta lova, kum 2009 khan kan chhunzawm leh thei chiah ani; ABU Choir[an BCM Choir] boruak nuam tak leh hla thar leh nung tha kan inzirtir tih loh chu, Adi ho kha Music a an thang pawh khami kum sarih chhung khan a tawp nghal hmiah ani bre 27

mai, Thalai khawmpui-a kal leh sum leh pai lakluh pawh a pung lo mai nilovin a tlahniam nasa hman hle a a pawi hle. Nyishi-ah pawh Music an ngaina viau-va, BCM kan luhtheihna leh Field Director hial kan neih theihna pawh Music vang chauh ani, mahse an hruaitute ngei pawh hian Music Teacher an beisei dan hi zaipawl neia zaipui tur ringawt hian an beisei niin ka hria, anmahnia sol-fa/staff notation thiam a zaipawl leh music hi anmahnia neih hi an ngaihtuah phak/thleng lo em ni aw ka ti, a chhan chu an hlabu neih lai chhut leh [re-print] a sawi remchang a la a, Solfa awm Hla bu siam/ Solfa nena dah thu leh sol-fa/Staff Notation zirtir tura training neih leh pek kual a pawimawhzia ka han sawipui phei chu, music teacher sawmluttu ber leh tuipui bera kan hriat meuh pawhin a ngaithla ringawt a, a awmzia leh pawimawhna a hre miah lo aniin ka hria. Music Teacher tam tak awm mah ila Hlabu music note awm [Sol-fa Hlabu/Staff Notation] kan neih hma chuan Nyishi hi nangmahniin in ding thei loving a, Music Teacher chhuah hun hun hi zaipawl in neih loh hun ani mai ang.., ka han tih pawhin, a ngaithla mawl ringawt ni berin ka hria, rin aiin hma a chhah dawn a ang hle. Lo tawngtai ngat ngat mai teh u, Nyishi ho hi Arunachal Khawpui thut tute an niin, hnam thilphal tak, rilru khermei nei lem lo, induh ve tak tumah chhoh en bik lo, aw[voice] dik leh zai thiam tak hnam an ni a, Sol-fa[staff notation hi chu a la tul lovin ka hria]te han thiam se, Pathian faka zai nuam an tih dan tur hi aw[an hlabu ami ka han zirtir-a zai/sak nuam an ti khawp mai] Kohhran nung tak-a thang chho tur niin ka hria, Hla hi Pathian pawlnan tak tak an hman hun hmuh thuai thuai a chakawm hle mai, Lalpan BCM mal sawm zel se, Arunachal hi kan Lalpa leh Krista Isua tana siam turin BCM hi Pathianin a tha lama a hmanrua lo ni zel rawh se.

*****************************

28

ASSAM BENGAL FIELD LAMTLUANG (Field tlawh report)

H.K. Lalremliana Secretary Bazar Bial M & E

A hun : Ni 23 March 2011 - 1st April 2011 ( 10 days) Members kalte : (1) Upa H.Lalliana (2) Upa Khualkamlova (3) Upa C.Lalpianga (4) Upa H.Lalbiaksanga (5) Upa Lalkhama Sailo (6) RBT H.Vanliana (7) RBT P.C Lalchawimawia (8) RBT H.K.Lalremliana (9) Driver Madina BCM Bazar Pastor Bial rorelna chuan Mission field a bik takin Mizoram pawn lama kan rawngbawlna khawi field emaw tlawh nise, hun hmasa lamah Home-Mission field te tlawh a lo ni tawh bawk a, hun a lo rei a, BCM Hqrs. lamte khawi field nge tlawh ila tha ang tiin a rawn a, BCM Hqrs. a mission lam hotu te min rawn angin hun remchang te ruat in Assam Bengal field hi tlawh a lo ni ta a. Ni 23 March 2011 (Wed) : Bial hruaitute lo ruahman ang in zing dar 6-ah Upa H.Lalliana Venglai Bial Chairman in ah kalkhawmin bialtu Pastor Rev.K.V.Thangan tawngtaina a neih zawhin Bial hruaitu thenkhatte leh Venglai Upa te leh kal turte chhungkhatlaina ten min thlah liam a.Tlai dar 3-ah kolosib kan thleng a. Bialtu Pastor Qrs. ah thingpui te in in, kan chhuak leh ta a, Vairengte 5 P.m ah lutin chaw te kan ei a, chaw eikham ah BCM Vairengte Kohhranah inkhawmna-ah kan tel nghal a. BCM Vairengte Biakin ah thlamuang tak leh tui takin kan riak ta a,an chungah kan lawm hle a ni.

29

Ni 24 March 2011 (Thurs) : Zing dar 5-ah Vairengte a tangin kan chhuak a, Zan dar 9:30 ah Gwahati kan thleng a. Director Rev.F.Ramdinmawia te awmna hmun Baptist Hqrs. Gwahati ah kan thleng ta a. Rev.F.Ramdinmawia leh a thiannu te, Isak R.Chinzah leh thawktu dang ten minlo dawngsawng tha hle a, kan lawm takzet ani. Ni 25 March 2011(Fri) : Gwahati atangin zing dar 6:30 ah Dhubri lam panin kan chhuak a, tlai dar 3 ah kan thleng ta hlawl mai a, Missionary (1) R.Nghaksanga Headmaster (2) K.Zosangliana E.T (3) Remlalpari chawngthu (4) Nl.Ramnunmawii (5) Pi F.Lalnunthari (School Support) (6) NL.K.Laldinthari (School Support) te leh field Director Rev.Joseph Vanlalruata leh missionary chhungkua te nen kan in chibai a, chaw-te eiin zan te kan riak a, Field Director Joseph Vanlalruata leh a thawhpui missionary ten zanriah tuihnai tak min lo buatsaih sak avangin an chungah kan lawm takzet ani. Zanriah eikham-ah Field Director leh thawktu dangte nen inpawlhona kan nei a, hlim takin hun kan hmang. Tawngtaipui an ngaihnate: 1. Adivasi ten an mite veina tak tak thinlung an neih theihna turin. 2. Adivasi leh Rajbongshi hnam atangin hruaitu tha lehkha thiam an lo chhuah theih nan. 3. Hostel naupang harsa zual 5(panga) ten support-tu an hmuh thuai theih nan. 4. Ringthar mi 50 tal Pathianin a pek theih nan. Target ah an nei mek a ni. 5. Naupang pakhat support na tur atan hian thla tin Rs.1000/- ani. 6. Native Pastor B.D. or Bth mi 3 tal an neih thuai theih nan. 7. Bethel English School a awm zat hi 560 vel an ni, an tan i tawngtai ang u. DEBITOLA KAN TLAWH A : Dhubri dar 2:30 p.m ah thlengin tlai lam dar 3:30-ah Debitola panin Sumo-in kan chhuak a, Debitola 30

hi Rev.Rokhama te chhungkuain kum rei tak an lo thutchilh tawhna hmun kha ani. M.S H.Lalrinpuii principal Mt. Olive School leh M.S Esther Zothansangi ET te leh Pi F.Kawlmawii EN te nupa leh thawktu dangte leh an chhungten min lo dawngsawng a, thingpui in hona te leh tawngtai honate kan nei a. Hun hlimawm tak kan hmang. Mt. Olive School Building te, Hostel te, Biak In te leh hmun pawimawh te kan tlawh a, hun a chep tawh avangin in pawlhona kan neih zawhin Dhubri-ah kan kir leh ta ani. Tawngtaipui an ngaihnate : 1. Thuthlungthar lehlin fel ani tawh a, Bible thuthlung hlui lehlin mek a ni a, Bible translator te tan. 2. RBE leh BCM ten thawh hona tha tak kan neih theih nan. 3. Pi F.Khawlmawii pasal Pu Vanlalliana a nerve lam tha lo a lo dam theih nan. 4. Ringthar 200 tal pek an nih theih nan. 5. Mt. Olive School naupang hnam hrang hrang te zingah ringthar an lo awm belh zel theih nan. 6. Principal H.Lalrinpuii (Tetei) tan. 7. Hostel naupangte zingah ringlo mi awm ten Lal Isua an lo rin a, Kristian an lo pun zel theih nan leh result tha tak an neih theih nan te i tawngtai sak zel ang u. Ni 26 March 2011 (Saturday) : Dhubri atangin zing Dar 6:30-ah Birpara panin Sumo in kan chhuak a, Birpara Mission compound hi chhun dar 12:30 ah kan thleng a, Missionary te leh thawktu dang ten hlim takin min lo hmuak a, chaw te kan ei a, kan in silfai a, hahdam takin kan chawl a. Chawhnu dar 2:00 ah Mission compound chhung a Missionary te thlan kan tlawh a, Pi C. Laldinpuii leh a fapa Theodore-a leh Pu K. Lalnuntluanga te thlan kan tlawh a, hetah hian heta lo thawk tawh thin hnam dang thlan te pawh a awm a, kan tlawh nghal a ni. Mission rawngbawlna atana an nunna leh an theihna zawng zawng natna leh harsatna sawisen loh an tawh thin lai te leh misual rual ten 31

min suam leh angem tia rilru thlabar taka an awmlai te min ngaihtuah tirin rilru a kal thui duh hle mai. An lu phum meuhva chatuan khawvar hun nghaka Misssion Compound an thutchilh tlatna hi helai rawngbawlna a tan a tih nghet leh a ti ropui tu an va ni tehlul em !! Tawngtaipui an ngaihnate : 1. BASRA ah Kohhran din a nih theih nan. 2. RYDAK hmunah Biak In sak anih thuai theih nan. 3. Ringthar mi 100 tal kumin chhunga an neih thei nan. 4. Thlaithar thawhkhawm hun October 2011 atan. 5. BCM Convention October 2011-a Birpara hmuna neih tur hi hlawhtling taka neih a nih theih nan. 6. Bible track semin an chhuak dawn a, hei hi ringthar siam nana tangkai tak a hman a nih theih na turin. 7. Land lease tun thleng a la fel theilo hi a lo fel thuai theihna turin leh Sikul recognition an hmuh thuai theih nan. 8. Sikul building extension estimate siam vek tawh ani a, BCM Hqrs.-ah thehluh ani. Hei hi thil tangkai tak tur anih avangin a lo hlawhtlin ngei theihna turin. 9. Evangelist teacher volunteer-a inpe English zirtirtu tur an hmuh thuai theih nan. Tlai dar 3:00-ah Birpara atangin Sumo in Birpara area a Kohhran te kan tlawh kual a, (1) Muchnai (2) Bangabari (3) Debopara te kan tlawh a, Debopara ah hian Youth Conference hman naah kan tel a, tlaiah ruai thehna ah kan tel nghal a, zan lamah inkhawmna (Worship service) hlim takin kan hmang a, Speaker Missionary C.Thangzela a ni a, Bial M & E aiawh ten hla kan rem a, khulai hmuna thalai ten item chi hrang hrang zaipawlte leh Group zai te, Duet te, Solo te nen hlim takin hun kan hmang a ni. Ni 27 March 2011 (Pathianni) : Zing tawngtaiah Bethel Baptist Church Birpara-ah kan kal a, chaw eikhamah inkhawmna (worship service) kan nei a, thuchah sawitu Upa Lalkhama Sailo a ni a, Missionary F.Lalsawmlianin tawng a leh saka, Bial M & E aiawh a 32

kal zawng zawng te Stage-ah min ko chhuak a, Diar (Khada) Birpara BKHP ten min awrhtir vek a, kut an beng dur dur mai a, kan hlim takzet a ni. Upa Khualkamlovan thusawina tawi a hmang a, Missionary Siamkima Khiangte in tawng a leh sak a, inkhawm banin Biak In kawtah kan ding tlar vek a JAI MASIH tiin chibai kan in buk vek a ni. Inkhawm programme te a felin hun tha tak kan hmang thei a, kan lawm hle a ni. Tlai dar 2:30 ah Bhaghatpara tlawhin kan chhuak leh a, Pastor ten chaw eia min sawm a vangin zanriah kan kil hova, Bhaghatpara ah hian kan inkhawm nghal a, zan dar 10:00 ah Birpara ah kan let leh a ni. Ni 28 March 2011 (monday) : Birpara atangin tukthuan eikhamah CHANNA-PATTI Kohhran kan tlawh a, Channa Patti Biak In hi Hnahthial BMP ten Work Camp-a an sak zawh hlim hlawl a ni. Hemi ni hian Channa Patti kiang a luiah Baptisma mi 11 in an chang a, Missionary ho pawh an hlim tak zet a ni. Baptisma chan zawh hian Biak In ah kan inkhawm leh a, chumi zawh ah chuan baptisma chang ta te Hindu an nih laia an inthawina hmanrua leh an hmunhma te, lungphun te kan ti chhe veka, hemi zawh hian Tulsipara Biak In Pu C.Thangzela te awmna kan tlawh leh a, thingpui in ho nate kan neia, Garghanda Biak In kan tlawh hawng leh nghal a, hetah hian member 132 zet an awm a ni. Missionary C.Thangzelan min hruai a, hemi zan hian Birpara-ah a thiannu Tete-i nen an rawn riak a, hlim takin hun kan hmang ho a ni. Ni 29 March 2011 (Tuesday) : Birpara atangin zing dar 6:00 -ah chhuakin mi paruk (6) Sumo in kan chhuak a, midang panga (5) leh Pu Thangzela te Train in an kal a, Mendaveri Nl.Zoramthangi Senior Missionary kan hriat lar em em leh kan tawngtai pui reng thin awmna chu chhun dar 11:00 ah kan thleng a, a ni hian tukthuan min kilpui a,kan tlai hle mai. Nl.Zoramthangi pawh hna alo thawk mawlh mawlh a, an hmel hmuh a nuam hle mai. Nl. PT. Zonunmawii Head Mistress in a awm meka,an school hi DIPSING ACADEMY tih a ni. School naupang 100 vel neiin Hosteller 27 an awm mek a ni. Mendaveri-ah hian Kohhran nghet tak a ding a, 33

member 700 - 800 vel an awm. Biak In thar an sa mek bawk. Mendaveri hi Jalpaiguri District West Bengal a awm a ni a. a hmunhma a nuam in thawktute pawhin tan an la nasa hle. Chawhnu lam dar 1:00-ah chhuakin PHUENSHOLING BHUTAN panin Mendaveri atangin Sumo in kan chhuak leh ta a, Bhutan ramri JAYGAON kan thleng a, thingpui in ho na te kan nei a, tawngtai rualna te kan nei a, Jaygaon atangin dar 2:00 p.m ah Phuensholing Bhutan kan thleng a, Duty te pawhin harsatna engmah an lo siam lova, mak kan ti hle a ni. Tlai dar 4:30 ah Bhutan Phuensholing atangin Birpara-ah kan let leh ta a ni. Bhutanah hian Bhudist Monastaries te leh hmun pawimawh hrang hrang kan tlawh a, mit a tlai hle mai. Ni 30 March 2011 (wed) HAWN KAN TUM TA : Birpara-ah zan riakin a tuk zing dar 5:00-ah Missionaryte leh thawktute nen in thlahlel tak chungin kan in thlah liam ta a. Shillong zan dar 9:30-ah kan thleng a, Baptist house ah kan riak a, a tuk zing dar 5:30 ah chhuak in kolosib zan dar 9:30 ah kan thleng a, Kolosib ah hian BKHP te bialtu Pastor te chhungkua leh Kohhran member thenkhatten min lo buaipui a, kan riak nghal a. Kolosib atangin zing dar 6:00 ah chhuakin Lungdai-ah chaw kan ei a, tluang takin Lunglei lam panin kan kal ta zel a, tlai dar 3:45-ah dam tak leh him takin Lunglei kan thleng ta a ni. Kan zin chhung zawng hian Pathian min hruaina kan chang nasa em em a, hmun hrang hrang a min lo buaipui tu leh kan mamawh apiang min buaipui tu zawng zawng te leh Kohhran ho min tawngtai saktu zawng zawngte hnenah Pathian hmingin lawmthu kan sawi tak zet a ni. BCM Bazar Bial hming a Assam Bengal Field kan tlawhna hian rah tha tak a chhuah ngei kan beisei tlat a ni.

34