Anda di halaman 1dari 13

Naskah Drama Musikal Natal P2RBIT 2011

WAY BACK INTO LOVE (Kembali Kepada Kasih)

Narasi

Masa yang penuh gejolak, masa yang penuh dengan pencarian makna kedewasaan. Itulah masa muda. Cinta kasih antara sejoli adalah racikan yang membumbui kehidupan masa ini. Dan tak luput pula mereka diombang-ambingkan oleh gelombang jiwa dan pemikiran yang serba tak tentu. Sarat dengan senyum, dan sekaligus bercitarasa kecemburuan. ADEGAN 1 Baby melangkah dengan cepat menuju ke tengah pentas sementara Leon mengikutinya dari belakang. Baby menoleh dan cerita pun dimulai. Baby : Ta so nda tahan deng ngana pe model! (sambil menunjuk pada Leon) Butul komang! Leon : Sayang, kita da beking apa so? Masa langsung batuduh bagitu? (membuka tangannya dengan raut bingung) Baby : Batuduh? Ngana pikir ni dua biji mata so buta dang? (menunjuk kedua matanya dengan dua jarinya) Na bilang da iko latihan singers, kong sapa dang tu kita da lia deng parampuang di Mantos? Kira kita anak-anak kong bole mo se bodok! (memalingkan badan dan pandangannya dari Leon) Leon : Hei hei hei, dengar dulu kwa. (memegang bahu Baby) Kan nembole langsung menghakimi bagitu toh? Baby : Ehehe, ta nemau tau! (menutup kedua lubang telinganya seolah-olah tak mendegar) Leon : Jadi dang bagimana? Baby : Bagimana jo? Leon :

Ya kalo kita..... Baby : Sudah, putus jo. Lebe bae bagitu. Leon : Hii, tunggu dulu kwa. Ngana blum dengar apa-apa mate. Baby : Hmm, ngana pulang jo kong suru na pe Ma dengar na pe cerita. So nemau pusing kita pa ngana. Leon : Mar sayang? Baby : Nda mangarti le? Pigi jo sana! (mengacungkan tangan dan mengusir Leon) Leon meninggalkan pentas dengan kepala tertunduk. Baby menatap kepergian Leon dengan raut kesal. Baby : Ahhhhh, samua laki-laki kurang sama! Mempastiukan!

ADEGAN 2 Di sebuah sudut gereja taman, Juan perlahan-lahan memasuki pentas sambil menyapu kotoran. Dengan gembira ia mengerjakannya sambil menyanyi dan bersiul. Juan : {Bagi Yesus semuanya, pun waktuku miliknya. Tanganku kerja bagiNya, kakiku mengikutnya. Mataku memandang Yesus, yang kupuji Dialah} Wuuuiiihhhh, so ini dia pe ena kalu jomblo. Mo beking apa suka-suka gue, terserah gue. Ohh, makase jo Yesus. Hehehe..... Baby dan Enda memasuki pentas sambil berbicara tentang masalah Baby dengan Leon. Enda : Oh, jadi na so se putus dang? Kasiang eh. Kurang kage katu bukang bagitu kwa yang sebenarnya, ngana so laju-laju se putus. Baby : Mar kita memang da lia. Dia baku bawa deng cewe laeng tu hari. Co ngana yang jadi bagitu. Paling deng ngana cuma mo nae dara.

Baby dan Enda mengambil tempat duduk di sisi pentas sambil melanjutkan pembicaraan. Enda : Mmm, mar kan lebe bagus kalu baku dengar toh? Ngoni lei kan batona bukang baru kemarin? Baby : So itu tu kita heran. Masa so dua taon baru skarang dia batowo akang bilang da pi warnet mar ternyata kote da bajalan deng tu manusia tu dia. Enda : Ya betul juga sih. Mar dari yang kita lia, dia katu memang bae-bae noh slama ini. Baby : Mar ngana nenatu dia pe dolong. Tiba-tiba Juan tidak sengaja menyentuh kaki Baby dengan sapu yang dipegangnya. Juan : Eh, minta maaf neh. Qt nda ta lia akang. Nda apa-apa toh? (sambil menyandarkan sapunya) Baby : Aapa de? So itu kwa mata taru di kapala, jang taru di kaki! (dengan nada membentak) Enda : Baby, sudah jo. Cuma itu lei katu. Nda sengaja. (menasihati Baby) Baby : Ah, rupa soe kita blakangan ini. Tiap bakudapa deng laki-laki nda perna mo ada dia pe snang kamari. Enda, manjo pi di ruma. Somo pica ta pe kapala ini. Samua beking soe. Enda : Iyo, iyo, iyo. Enda dan Baby meninggalkan pentas. Juan masih termenung setelah kejadian tadi. Juan : Ampun jo dang kong dapa meitua bagitu. Bota kwa. Oh, jauhkan, jauhkan! (sambil menggeleng-gelengkan kepala) Juan mengambil sapunya lalu meninggalkan pentas.

Narasi

Sandaran yang umum digunakan adalah segala yang tampak. Tempat pelarian yang terlalu mudah untuk ditemui. Tapi apakah semua itu? Tanpa Tuhan yang memegang, apalah artinya? ADEGAN 3 Leon mengambil tempat duduk di tengah pentas sambil mengamat-amati botol minuman keras yang dibawanya. Eka kakanya menghampiri dengan segera. Eka :

Leon, kiapa ngana? Leon : Kiapa tare. (dengan nada tinggi) Eka :

Hii, kiapa na pe muka rupa nda beres bagitu dang? Eka :

Ahh, mo cari-cari tau kwa. Urus jo diri sandiri! Eka :

Heh, kalu kita ini birman stow, ta nda mo peduli. Mmm, paling perkara batona lei kang? Leon : Co kwa Ka yang mangada tu masalah rupa bagini. Kita nentau sala apa, kage-kage Baby so babilang putus. Kita mo jelaskan, dia nemau mo dengar. Apa so maksud samu ini? Eka :

Sabar. Samua ada maksudnya. Tuhan mo pake samua perkara for torang pe kebaikan. Mungkin ini ujian pa ngana noh, eh. Bukang cuma pa ngana, mar pa Baby lei. Leon : Jadi dang Ka, Tuhan sengaja beking kita deng dia putus? Pe ena dang Tuhan, sukasuka jo Dia beking cerita kong torang tu kasana kamari? Eka :

Bukang bagitu. Tuhan itu memang sama deng sutradara. Mar bukang berarti dia da stir kiri kanan. Tuhan pe rancangan pa torang itu jangka panjang; lebe dari samua yang torang lia deng rasa skarang. Leon :

Iyo, itu idealnya. Mar kenyataannya kita skarang bagini. Kalu stow kita memang da beking apa yang Baby da se tuduh, kita pasrah. Eka :

So itu jangan ja menyalahkan Tuhan kalu dapa masalah. Jangan pasrah deng keadaan noh. Berserah pa Tuhan itu jalan paling bagus. Masa ngana di muka orang ba-singers melayani Tuhan kong lari di barang-barang bagini Leon : Cuma kwa susa Ka. Eka :

Kan ngana bukang orang asing deng firman toh? Kalu na pikir samua cuma gampang-gampang iko mau, brarti torang nda perna blajar toh? Leon : Mmm, butul noh. Mudah-mudahan jo kita mo dapa jalan for mo se tau pa dia yang sebenarnya noh. Eka :

Yakin jo kwa! Eh, mar lapas dulu tu botol. Leon : Oh, iyo kote. Tnang jo kwa Ka. Kita nda riki minum jo tadi. Untung pas Ka datang. Somo buang jo dang! Kedua pemeran meninggalkan pentas.

ADEGAN 4 Juan memasuki pentas dengan santai. Juan : Adooo, rupa sepi ni taman ni hari. Nda biasa. Hmmm.... Enda : Hei cowo! Ngana yang kemarin toh? (menunjuk pada Juan) Juan : Iyo noh. Kiapa kang? Enda : Nda kiapa-kiapa. Cuma pas da ngana sini, kita se akang undangan ibadah natal tre noh. Napa, ambe jo satu.

Juan : Gereja Imanuel? Oh, kita pe tamang SMP lei ba greja situ. Eh, iyo. Sapa nama kote? Enda : Oh, kita Enda. Ngana dang? Juan : Kalu kita kwa jurus andalan. Hehehe.... Enda : Maksud? Juan : Juan katu. Hahaha.... Enda : Oooo, pe lucu lei na pe nama pe kepanjangan. Eh, mar datang neh! Amper lupa lei kote mo bilang sorry karna ta pe tamang pe model kemarin. Juan : Ah, nda apa-apa. Mungkin katu ada masalah. Apalagi perempuan kan lebe gampang tertekan. Iyo toh? Paling kwa dia pastiu lia laki-laki gara-gara da masalah deng lakilaki. Nda mungkin kalu masalah deng kangkong kong dia mo mara pa kita. Enda : Iyo noh. Memang bagitu. Dia kwa baru da se putus dia pe peitua dari dia da lia bajalan deng cewe laeng. By the way, pe pengertian skali do ngana. Salut! Juan : Haha, nggak segitunya kok. Kong kiapa dang na bajalan sandiri di sini? Nda ada yang batamang akang so? Enda : Cuma sandiri sih. Kalu ngana dang? Cuma ngana so tu ja bakerja di sini? So lama? Juan : Nda eh. Kita da ganti ta pe Opa ja basapu di sini karna dia masih kurang sehat. Paling satu minggu baru dia ganti ulang. Pas-pas nentau mo beking apa di ruma. Kong ngana dang bakerja skarang ato kuliah? Enda : Oh. Kita skarang kuliah. Mar libur toh ini. Jadi, bantu-bantu pa panitia natal di greja. Juan :

Nice! Kita lei suka mo kuliah tu hari. Mar karna nda da doi, pikir-pikir nanti taon depan jo. Enda : Nda apa-apa biar blum kuliah. Yang penting ada tu mo beking kong rasa enjoy. Daripada kuliah mar hati nda beres. Lebe-lebe lei kalu gara-gara mo cari kesibukan for pelarian. Hmmm..... Juan : Setuju skali. Mar rupa ada yang laeng waktu na bilang soal kuliah. Ada apa so sampe ngana kuliah? Enda : Ah, nda eh. Cuma masalah spanggal kwa. Juan : Hati-hati jang tu spanggal bagitu kong jadi besar. Kalu kita bole tebak, paling masalah di ruma kang? Enda : Nda juga. Ih, rupa tu tukang baca pikiran jo ee. Kita kwa happy trus coy. Hahaha.... Juan : Mmmm, brarti kote masalah deng cowo kang? Enda : Mmmm, nda eh. Nda mungkinlah. Eh, kita somo pigi dulu neh. Somo lat mo bale di greja. Enda dengan tergesa meninggalkan pentas. Juan : Aha, aneh ni cewe. Tadi angka cerita, kong pigi kage-kage. Penasaran kita. Juan berjalan perlahan meninggalkan pentas dengan senyum penasaran.

Narasi

Pengharapan kita konon lebih cenderung kepada apa yang bisa kta lihat dan kita raba. Tapi kebenaran bukanlah sekedar acuan inderawi. Kesejatian kasih ada di dalam Dia yang mengaungerahkan, bukan di dalam mereka yang menerima. ADEGAN 5 Baby terlihat sedang termenung. Tampaknya dia sedang gelisah dan putus asa dengan apa yang terjadi. Lalu Enda masuk ke pentas.

Enda : Baby, tong bajalan skarang minjo. Daripada ngana tinggal-tinggal di ruma. Tong pi makang ato refreshing di mana ke. Baby : Haah, malas kita. Nda war samua orang di luar sana. (menggelengkan kepala) Enda : Tuang dang. Nda musti bagitu toh? Biar Cuma ka Mantos kong nongkrongnongkrong deng tamang-tamang kampus. Baby : O Tuhai Enda. Stop ngana bilang-bilang tu tampa tu dia. Seumur-umur ta so nda mo injak-injak tu tampa tau! Enda : Oh, dia pe TKP di Mantos dang? Bilang kwa. Lagian apa tu Mantos pe sala pa ngana so? Nda usah beking na pe diri talalu tertekan kwa. Kalu ngana babagini trus, brarti ngana kalah deng keadaan. Baby : Ngana babilang ena. Mar kita da rasa, kita da lia itu bukang mimpi. Bayangkan ta pe saki hati itu. Enda : Kita kan so bilang pa ngana, sebelum tau jelas tu perkara, jangan langsung menghakimi. Ngana perna nda kase dia kesempatan for bicara? Nda toh? Jujur jo kwa na masi sayang toh? Baby : Iyo, memang. Mar...... Enda : Eh, rupa da orang bapangge. Nanti kita pi lia. Eka :

Shalom met malam. Baby ada? Enda : Oh, Ka Eka kote. Maso jo Ka. Napa dia da di dalam da murung-murung. Eka :

Baby. Ada bae-bae jo De? Baby :

Ka? Minta maaf ka kita nentau kalu ka mo datang. Eka :

Nda apa-apa. Kita memang sengaja basingga kamari. Kiapa reen ngana deng Leon? Baby : Kita kwa ka nda trima. Masa dia batowo pa kita. Eka :

Itu wajar kalu na cem noh. Brarti memang na sayang. Asal jang berlebihan. Mar kita mo bacerita di sini lantaran mo bela dia sebagai kita pe ade. Yang ngana musti tau kalu waktu itu yang da sama-sama deng dia itu torang pe anak basudara dari Jakarta. Dia da balatihan singers kong dapa telepon dari torang pe Tanta supaya bole mo batamang akang dari dia somo brangkat bale ulang Jakarta tu malam tu dia. Enda : Butul toh? Kita s bilang kwa pa ngana. Mustinya katu na da dengar dulu. Baby : Jadi dang Ka? Kita so bingo ini mo bagimana. Eka :

Setelah kita lia ngoni pe hubungan selama ini, sebenarnya ngoni blum kuat. Makanya cuma perkara bagini gampang skali beking ngoni tagoyang. Baby : Iyo dang Ka. Kita mengaku so sala. Eka :

Tu paling pengaruh kwa karna ngoni pe hubungan cuma for ngoni dua. Paling penting kalu ngoni baku sayang karna da Tuhan yang arahkan. Itu dia! Enda : Dengar itu Baby. Eka :

Sudah. Ka somo pigi dulu. Pikir-pikir jo noh mana yang bae. Ngoni kan bukang anak kacili lei. Yang pasti, kalu ngana suka kaluar, Tuhan sadia akang jalan. Enda : Manjo Ka skalian deng kita jo. Biar dulu pa dia kase tenang pikiran. Eh, Baby, jangan lupa tu acara natal pemuda remaja so beso malam neh. Nanti kita singga. Baby : Iyo, kita usahakan mo pigi noh. Makase lei Ka so repot-repot datang kamari.

ADEGAN 6 Juan dan Leon masuk ke pentas dari sisi berlawanan dan berpapasan di tengah pentas. Juan : Adoo kawan, kiapa baru skarang ta lia pa ngana? So lama nda baku dapa noh. (mengankat tangannya) Leon : Hei, ngana kote. Iyo kang, so lama. (mengangkat rendah tangganya) Juan : Mo ka mana ngana tole, so pe rapi bagini? (menatap Leon dari ujung kepala sampai ujung kaki) Leon : Mo pigi acara natal di greja. Ngana dang so bastan bagini mo ka mana? Juan : Aha, kita lei mo pigi tu ibadah natal pa ngana pe greja. Ada kwa tu cewe da kenalan deng kita tu hari da undang. Leon : Oh, sapa dia? Paling ta kenal. Juan : Enda dia pe nama. Ta masi penasaran lei mo lia ulang pa dia. Eh, kong na pe meitua dang skarang sapa? Leon : Yah, itu kasiang kita pe pergumulan skarang. (menundukkan kepala) Juan : Oh weta eh. Sabar jo. Memang batona nda segampang yang tong kira. Leon : Iyo noh. Mar memang stow musti banya cek diri sandiri kita noh. Mungkin kita talalu peduli deng ta pe mau sandiri daripada Tuhan pe mau slama ini. Juan : Bagus noh kawan kalu ngana mangarti. Lebe bae ngana blajar daripada nda sma skali.

Leon : Itu lei noh. Adoh, ta pe tali spatu lei so talos ini. Ika di situ jo (pergi mencari tempat nyaman untuk mengikat sepatu) Tiba-tiba Enda muncul berbarengan dengan Baby. Enda : Eh Juan, ngana mo ka acara natal toh? Eh, ini Baby. Baby, ini Juan. Yang tu hari dang. Baby : Oh, sorry neh tu hari. Juan : Sudah kwa. Aman. Leon selesai mengikat sepatu dan menghampiri mereka. Leon : Wei bro, minjo! Enda : Leon? (dengan raut terkejut) Enda mengerling kepada Juan, memberi tanda untuk meninggalkan Baby dan Leoan. Eh Juan, nda lama dang antar akang pa kita mo lia tisu di warong. Enda dan Juan langsung bergegas pergi meninggalkan Baby dan Leon. Leon : Baby, he,he,hei. Baby : Hei... Baby dan Leon :

Mo pigi lei? (serentak menucapkan dengan malu-malu) Baby : Ngana dulu jo. Leon : Nda, ngana jo dulu. Baby :

Kita, kita minta maaf neh. Semestinya kita badengar dulu. Kita mengaku sala. Memang stow karna nda ja inga Tuhan sampe kita bagitu. Leon : Nda apa-apa sayang. Kalu nda lewat tu bagini, kita nentau bagimana mo jadi lebe bae. Tuhan tau ta sayang pa ngana. Baby : Makase jo dang. Tuhan memang nda sala da kase ngana for kita. (tersenyum lebar sambil merangkul Leon) Leon dan Baby meninggalkan pentas. Kemudian Enda dan Juan kembali mamasuki pentas. Narasi :

Demikianlah kasih bukanlah apa yang kita kecap sekejap, tapi suatu sumber kesukacitaan yang kita nikmati dalam segala perkara. Kembalilah kepada kasih yang benar. Bukan manusia, bukan benda, tapi Tuhan; kasih yang sejati. ADEGAN 7 Juan : Ih, mana stow dong dua kang? (menengok ke seluruh sudut) Enda : Iyo kang? So trus ka greja sama-sama stow. Ya baguslah, brarti dorang so dapa jalan bale ulang pa dorang pe baku sayang katu noh. Juan : Kong ngana dang? So dapa tu jalan? Enda : Kalu kita kwa...... Juan : Kalu na masi bingo, mari kita antar. Suka? Enda : Mmm, mau. Mau; kalu bukang deng ngana. (tersipu malu) Mereka pun meninggalkan pentas. Drama berakhir.