Ahkyak hta grau Ahkyak ai Aten

Daw- (1).

Anhte W-P myu sha ni gaw Mungkan Majan hta Germany hte japan ni hpe pyi gasat awng dang kau lu ai ni rai ga ai.Myen hpyen ni hpe sha wa mi. shingna hte lahkat kabai kau tim pyi lu nga ai

Tsawra hkungga ai, Myutsaw Share Shagan Ningbaw Ningla ni hte,Makyin Jinghku Manaw Manang ni.Hkam ja nga myit ni? Bum Chyangau mung, ya hte gaw Singkaw shamyan- Taxas hkan pyen gawai hkawm, Florida Jacksonville de Kachin American Association kaw nna woi awn galaw ai (17) lang na KCFC Warren W.Willis Camp ni mung sa lawm taw re majaw Laika hkrang mung n-lu shagun,jahta mayu ai lam ni mung nlu tsun jahta rai mat sai le i? S kaba hte sorry rai sai yaw. Gai taw shaloi gaw- AHEM ngu nna mayu sharai la, dung shara, shamyet shara tam la hkra rai nna W-P sha ni a lam yan hte seng nna jahta amya bang mat wa yu saga. GoiSit. Atsawm sha myit yu yang- n,dai ten gaw anhte W-P sha ni a matu Ahkyak hta grau ahkyak dik ai ten rai sai hpe chye na mu mada lu nga ai. Hpa majaw ta?....nga yang, n-dai 2013 ning July (27) ya shani Shanglawt KIO asuya hte Myen ni Naypyidaw e hpang jahtum Magum bu hku na hkrum zup bawng ban na lam chye lu ai. Awng dang ai Simsa lam hpe lu masat shagrin la lu na matu Myen Sumla hkrung hte Yu ngwi shyi shadang ni hkap tau hkalum la na matu Awng san Bawlung Pa e hkyen lajang taw nga ma ai lam chye lu ai.

Anghte mung- ngwi pyaw Simsa ai Madu up hkang Federal Mungdaw lu shagrin la na matu ja ja kyu hpyi shakut lawm na hpe ga saw mayu ai hku re. Hpa majaw ta? nga yang- n-dai ten gaw anhte W-P Jinghpaw myu sha ni a matu sha n-ga, Munghpawm Myen mung ting a matu Ahkyak hta grau Ahkyak ai Ten rai nga sai re. Sai Hka bai n-lwi u ga. Majan nhpan bai n-byin u ga. Ngwi pyaw Simsa ai,Kabu gara awng dang ai Federal Munghpawm Mungdan bai gaw de la lu na matu 2013 ning June (27) ya shani gaw Labau shang n-htoi langai mi byin tai wa sana re.1947 ning Febuary (12) ya shani na Pang Long Ga Shaka laika hta anhte W-P Jinghpaw ni ahkyak madung rai lai wa sai hte maren,dai ni Federal Mungdan gaw de na hta mung anhte gaw npawt tek ai ni re hpe mu mada lu ai.Awng dang u gangu na hta, Awng dang sai ngu nna pyi tsun lu nga sai re.Hpa majaw nga yang., 2013 June (25) ya shani Myen mung de sa du ai Miwa Gumsan Mungdan Council Malawm Mr-Yang Jiechi gaw Myen hte Shanglawt KIO/A ni Simsa lam a matu Myitkyina e hkrum ai Zuphpawng gaw Mahtai kaja lu la ai lam re hte Miwa Mung hku nna mung kabu ai lam, Myen Mung hte Miwa Mung Jarit galu Kaba lam hte Hpaga yumga lam rawt jat galu kaba wa lu na matu Ta hkindun nna galaw sa mat wa na re lam tsun ai. Lachyum gawMyitkyina e hkrum zup hpawng a Statement (7) hpe Miwa ni ngang ngang kang kang madi shadaw ai lam rai nga ai.Myen ni n-kam dik gaw- Mung Masa matut Bawng ban nangu ai Ga Baw rai nga ai.Dai Ga Baw hpe agying agang Chyinghka pat nna (shn) grai machyi shim ai hku tsun dara shagrin la ra ai lam Awng Min wa tsun ai. Hpa majaw dai ram tsun dara hkat ra a ta? Mung Masa bawng ban na lam myit hkrum sai.nga ai gaw- Pang Long Ga Sadi hte maren shanhte Federal State jaw ra sana re.Mung masa n-kam bawng ban tim shanhte Myen ni Sign htu myit hkrum kau ra masai.Dai gaw anhte a Awng dang lam rai sai.U-N lawm sai majaw shanhte Myen ni kajim gajam n-mai nga sai.Ma-un si dang ai hte bung mat masai re.

Bai.lam mi hku tsun ga nga yang- (a). Shanglawt hpe shanhte Hpyen masa hta sum machyi taw sai.Matut nna bai shanang gasat jang Hpyen ma ni nau si ru jawng nna, shanhte a lawu na ni Ga madat sana n-re.Myen Hpyen dap kata e mung Rawt malan ai lam ni byin pru wa na. Dai gaw Ga lahtum n-shut rai nga sai. (b). Miwa a Weigh a majaw Mung Masa bawng ban na Lekmat htu kau ra sai.Shanglawt ni hte Simsa jang she Miwa ni Dap Ba (4) hku Pipe Line lu shalai na. Dai majaw Miwa gaw lawan simsa na Myen hpe shadut tik tik rai taw nga sai. Anhte a matu gaw O-K sha re. Myen a Du hpe Miwa wa law law manat tek shakyin ya na matu Miwa hpe Wan nat galip shaja ya ra na ga ai. (c).U-N lawm ai majaw rai nga ai. Dai Chyinghka pat bawng ban hpawng hta- Du Kaba Gun Maw hte Shanglawt Dat Kasa ni gaw.Mung Masa bawng ban hpawng n-woi galaw na rai jang n-dai Myitkyina hkrum zuphpawng gaw kaman sha re nga na.Hkrum zup ai lam KIO/A kaw nna n-galaw sai nga jang, bai shakrip hkat ga nga ai lachyum sha rai nga ai. Shaloi..Myen ni Lahput gari, salat gali magang sai.Hpa majaw nga yangJinghpaw mung de sa tawn ai Myen Hpyen la ni gaw, Myen hpyen dap nga manga ahpu agung shalun tawn da ai re. Bai galai na Hpyen Ma nnga masai. Mandalay Nandawin Hpyen Dap kaw pyi Balik ni she sa sin ya ra ma ai da. Matsan mayen le i? Dai Balik ni gaw- Lahpaw hte hkan shachyut gap tim pyi hprawng na ni rai nga ai.Lak nak n-lu ai Mung masha ni hpe sha majoi dang sha taw ai ni re. Dai majaw Hpyen la n-re ai Myen mung masha ni (shn) Myen ni mung shanhte Myen Hpyen asuya ni hpe grai n-ju n-dawng matsat taw nga ai ten,Shanglawt KIA ni hpe kam hpa n-gun jaw taw nga ai aten mung rai nga ai. Dai majaw Majan bai matut gasat jang shanhte Myen Hpyen ni hprawng na Lamu ga n-nga sai. Gala Rohingya ni du hkra anhte jinghpaw ni kaw lawm wa na masa rai nga ai.Rakhaing ni chyawm lawm chyalu rai nga sai. Myen ABSDF ni mung lawm nga chyalu rai nga sai le i? Anhte gaw Sinat, Machyu pala law law hte adit shapraw nna Myen hpyen ni hpe Anut shangun hkrai sha rai sai. Re n-rai? Dai hpe chye ai Gen-Myint Soe ni, Zaw Min ni..Lata gari gawa hte.Statement (7) hpe Lekmat htu ra mat manu ai.Ha.HaHa.Ha.

Ya gaw shanhte Mung Masa lam n-bawng ban yang n-mai sai. U-N sakse nga ai. Miwa nga ai. Gap jahkring hpung (9) hte WMR Mung Shawa sakse nga ai.Mungkan ting mung chye sai. Dai Mungkan ting chye ai lam hpe shanhte Sadi hten nna bai gasat jang- anhte a Mara n-rai sai.Anhte Wunpawng Jinghpaw KIO/A ni Munghpawm Myen mung kaw na garan pru mat saingu Mungkan ting n-dau shabra nna Myen Sa Wa Hpyen ni hpe N-hpu hte hput gasat shamyit, gawt shapraw kau na lam sha nga sai. Myitkyina Bawng ban hpawng de Shanglawt Dat Kasa ni du shang wa ai shaloi- Mung masha ni Shanglawt Dawng Hkawn hpai nna wu wu di di hkap tau hkalum la ai lam gaw- Shanglawt KIO/A Asuya gaw W-P myu sha ni yawng a Gawng Malai rengu ai hpe lachyum shaleng dan ai lam rai nga ai. Dai kaw Myen Hpyen ni grau kajawng mat masai. KIO/A hpe matut gasat jang gaw W-P Jinghpaw nga manga Sinat hpai wa sana,Myu kaba,Mare kaba de mung Majan pa byin wa sana re ngu hpe chye na mat masai. Grau nna- U.N Dat Kasa ni nan Shanglawt Dat Kasa ni hpe grai ahkyak shatai nna sa tau la ai lam gaw, Myen hpyen ni Myiman ganang nhpaw lu mat ai lam ni rai nga ai. Lachyum gaw- Nanhte Jinghpaw ni hpang maga anhte U.N ni tsap nga ga aingu ai lachyum rai nga ai. Myen ni pawt gaw nrai,Mani gaw nrai rai, Shakap Mani gying mat manu ai. Shanhte Myen hpyen Du ni hpe gaw Lam makau na Gwi pyi n-kaw wau mat sai re. Katut naw mu ga. Grai kabu ai.Hpang jahtum gaw Jinghpaw ni hpe Madu up hkang Mungdaw n-jaw nan n-mai saingu ai lam sha rai nga sai. Lai wa sai Myitkyina hkrum Zuphpawng hta U-S ni n-sa shang lawm ai mung lam mi gaw masa htuk mat ai ngu tsun lu nga ai.U.S ni lawm na hpe n-ra ai majaw tsun ai n-rai. Miwa ni anhte hpang maga grau madi shadaw lawm na matu mung ahkyak nga ai.Hpa majaw i? nga yang Anhte hpe Hpyen tai na gaw-ni dik ai Miwa ni rai nga ai.Miwa hpe hkrit nna tsun ai n-rai.Moi de anhte a Ji Wa ni Miwa hpe n-hti n-htang gasat shamyit majen je lai wa yu sai re.(Dai Labau ni ka taw nga n-ngai). Tsun mayu ai gaw- Miwa a Weigh hpe mung anhte la ra nga ga ai.Hpa majaw rai ta? nga yang Myen hpe dang ai gaw Miwa sha re.Hpa majaw i? nga yang Miwa gaw Myen a Chyeju Madu mung rai,Myen gaw Miwa a Hka Tsip

mung tai taw nga ai majaw re. Dai majaw Miwa hpe anhte Hpaji hte jai lang chye ra na ga ai. Myit lawm tim, n-lawm tim Hau-law masu n-na Miwa hpe asung jashawn kau ra nga ga ai.Myen gaw U.S maga kap na hpe Miwa ni mu mada taw sai majaw- Miwa gaw Myen hpe loi mi byip, Jinghpaw hpe loi mi sharawt nnaYakhaing Pipe Line Dap Ba (4) hku lu shalai la na hte,Mali Hka Madim lu dim shakre la na Baw nu shakri taw nga masai re. Dai hpe anhte Jinghpaw ni Manya masu nna Nga kaba kapung sha chye ra na ga ai.Miwa hpe Zai Ladat hte n-htang shangun sha chye ra na ga ai. Nga hpe Kajinchyai hte dawn la, myek la kau ai zawn Miwa hpe mung anhte a Buga na,shanhte Miwa ni Hkumbai hte mya rai yu manawn taw nga ai N-hprang sut rai ni hte hkam nna, anhte ra ai ahkaw ahkang lu jang Miwa hpe jut de hkindit matsut kau na maw lanyet chyawm shaw yu saga. Miwa ni a matu- Pipe Line lu len shalai la na matu hte Mali Hka Madim na Myihprap Wan n-gun lu shaw la na matu gaw grai ahkyak kaba rai nga malu ai.Dai majaw.dai majawUm..anhte gara hku Bawnu shachyai na kun?Sanat chyu gap hkat taw nga yang gaw Lata mung tsu wa, jin mung jin wa sai le i? Ya gaw Naw Hpu sha ai Jinghpaw bawnu bai shachyai ra sai le. Anhte W-P myu sha ni gaw Mungkan Majan hta Germany hte Japan ni hpe pyi gasat Awng dang kau lu ai ni rai ga ai. Myen hpyen ni hpe sha wa mi ...Shingna hte lahkat kabai kau tim pyi lu nga ai. Re n-rai?

By-

Bum Chyangau
(Daw- (2) de bai matut hti ga).