Kanjeng Prabu Si Baduga Maharaja, Raja nagara Galuh Pakuan
hiji mangsa kasumpingan utusan ti karajaan Majapahit. Eta utusan teh dipiwarang Prabu Hayam Wuruk pikeun masrahkeun lamaran, keleresan Si Baduga Maharaja kagungan putra istri kacida geulis na jenengana Dewi Citraresmi. Sigana Si Baduga kagungan putra geulis teh geus nepi ka Majapahit. Turug-turug Prabu Hayam Wuruk teu acan ngabogaan pramansuari. Ku sabab eta menehna ngirim utusan pikeun masrahkeun lamaran tea. Sabada dibadantenkeun sareung putra garwana panglamar Prabu Hayam Wuruk ditampi malah sakumaha parentahna, Dewi Citraresmi rek dijajapkeun ka Majapahit. Alam harita mah karajaan Majapahit mangrupa karajaan panggeudena di sakuliah nusantara, anu kiwari Indonesia tea. Sabagian geude karajaan nu aya di Indonesia jadi patalukan Majapahit. Malah kabejakeun kakuasaanana geus nepi ka Malaysia, Singapore jeung Thailand ayeuna, diantara pangikut taluk teh nyaeta karajaan Galuh Pakuan. Ari papatina ngarana Gajah Mada. Saha nu bireuk ka manehna ahli mimpin perang, tukang naluk-nalukeun karajaan. Ku sohor-sohor na Gajah Mada kakara ngadenge ngarana oge loba raja nu ngiring langsung serah bongkokan lantaran paur nyangharepan balatentara Majapahit jeung Patih Gajah Mada tea. Gajah Mada kungsi ngedalkeun sumpah moal ngadahar buah kalapa lamun can bisa nalukeun karajaan-karajaan nu aya di sakuliah nusantara. Ku usaha manehna sumpahna bisa tinekanan. Dina waktuna diberengan para prajurit rombongan, Si baduga Maharaja angkat ngajugjug nagara Majapahit. Sababaraha poe ti harita tepi ka hiji lembur ngarana lembur Bubat. Kabeneran teu pati jauh ti puser nagara. Sabada sarerea reureuh teras Si Baduga miwarang utusan nya eta Ki Pati Madu. Ari maksadna nguningakeun yen anjeuna saputra garwa parantos dugi kalembur Bubat. Sajaba ti eta mundut dipapagkeun sakitu apan ilaharna. Piraku aya awewe datang sorangan ka tempat lalaki. Prabu Hayam Wuruk kacida bungahna, cita-cita palay di garwa Dewi Citraresmi sakedap deui bakal kalaksanakeun. Harita keneh buru-buru marentahkeun Patih Gajah Mada supaya siap-siap pikeun mapag calon panganten istri tea. Naha atuh dasar Gajah Mada sohor sombong ieu aing, parentah rajana langsung ditolak. Ari alesanana dibandingkeun jeung Majapahit nagara Galuh Pakuan ukur nagara leutik. Leuwih hade Si Baduga Maharaja langsung masrahkeun anakna cenah, anggap wae Dewi Citraresmi teh upeti sangkan nembongkeun yen karajaan Galuh Pakuan taluk ka Majapahit saperti nagara-nagara sejenna. Bisa jadi lantaran kapangaruhan, Prabu Hayam Wuruk satuju kana pamadegan Patih Gajah Mada. Tidinya anjeuna ngirimkeun utusan eusina persis sakumaha omongan Patih Gajah Mada. Puguh bae Si Baduga Maharaja kacida benduna, salirana langsung ngagidir , ampir-ampiran teu kiat nahan amarahna. Ari sikep urang Majapahit pangpangna Patih Gajah Mada sarua jeung ngahina kana kalungguhan karajaan Galuh Pakuan. Dewi Citraresmi anak raja, putri anu kacida geulisna kudu dianggap upeti nagara jajahan. Padahal ti iraha karajaan Galuh Pakuan jadi patalukan Majapahit. Si Baduga Maharaja sasauran ka sarerea, pi isukeun urang miang ti Galuh Pakuan pasosore bulan mega langit hurung ngempur siga kahuruan, moal salah eta teh kila-kila. Urang bakal nyangharepan peperangan. Kukituna sarerea kudu taki-taki sabab geude kamungkinan urang Majapahit bakal maksakeun kahayangna. Kasauran Si Baduga eces ngagambarkeun sikep anjeuna. Kajeun kudu kalengitan nyawa tibatan ical kahormatan dirina. Sabalikna pikeun Patih Gajah Mada sikep Raja Pakuan sarua jeung nyieun pucuk tigirang nantang kana kakuasaan Majapahit. Manehna gancang menta ijin Rajana sina ngumpulkeun prajurit pikeun nalukeun Si Baduga sabalad-balad. Sakali deui Raja Hayam Wuruk beunang kaolo ku Patih Gajah Mada. Geus kitu mah deur perang cambuk antara tentara Galuh Pakuan ngalawan para prajurit ti Majapahit. Lantaran indit ti nagara lain ek niat perang, Si Baduga Maharaja henteu nyandak prajurit seueur-seueur. Atuh dina deur na peperangan jumlah na teu saimbang nya kitu deui pakarang perang na teu salengkep tentara Majapahit. Akibatna tentara Galuh Pakuan nuntutan jadi korban malih lami-lami mah Si Baduga Maharaja ku anjeun kasambut di pangperangan maot dikarepuk mangpuluh-puluh prajurit musuh. Atuh kantun Prameswari sareng Dewi Citraresmi ngaraoskeun kasedih dikantunkeun ku kanjeng Raja. Duanana enggal mandi beberesih, sarta saatosna teras nganggo acuk saruabodas. Putri Galuh sareng ibuna ngaweukkeun keris kana salirana nyusul Si Baduga Maharaja nu parantos maot ti payun. Antukna perang bubat beureum ku geutih katambah dua wanita suci ngabayabah dina waruga na. Ngadangu Dewi Citraresmi jadi mayit Raja Hayam Wuruk kacida handeueulna. Cita2-cita ngadahup ka Putri geulis henteu jadi. Gara-gara nurut teuing kana omongan Patih Gajah Mada. Dina ngaraos hanjakal tungtungna breuk bae teu damang parna. Mangpuluh-puluh dukun dikumpulkeun, welas-welas wanita diteang, nya kitu deui ahli panyakit, ngahaja diangkir ti mana mendi tapi kawas lain panyakit biasa, Raja bisa cageur mun obatna ku Dewi Citraresmi deui. Dina tiasa damang na deui oge tangtos teu sapertos bihara-bihari. Geus kitu mah kakara Patih Gajah Mada ngaku kana kasalahanana. Disangkana Raja Si Baduga Maharaja sarua jeung raja-raja lianna, gampang taluk kana kakuasaan Majapahit malah aya leuwihna sumpah palapa Gajah Mada dianggap bubar ku aya eta kajadian. Nagara-nagara ti wilayah sakuliah nusantara anu tadina aya dina kakuasaan Majapahit nuntutan misahkeun maneh.