"SO KIYATIMOWA SII KO QUR-AN NA MIYAKATLO MIPANGKAT"

PAGANAIRON: SO KIYATIMOWAON SII KO MASA O RASULOLLAH (SAW) SII KO

KIPZORATNON:

>komokowa so Rasulollah (saw) sii ko mga sahaba niyan sa mga panonorat iyan, go aya olaola
niyan na igira a adn a initoronon a nganin a pd sii ko Qur-an na ipphando iyan sii ko isa kiran a pd ko
mga panonorat iyan a kisoratn iyanon, go miyakilala siran sa aya ipmbtho kiran na (mga panonorat
sa wahi o Rasulollah s.a.w) sa pamakinugun tano so dowa katao a pd sii ko mga sahaba sa
kiniropaan iran mipantag sangkaiya paganay a kiyatimowaon:

(1) Pitharo o Zayd bin Thaabit (ra): skami sii ko masa o Rasulollah (saw) e pzorat go pthimo sii ko
Qur-an, go ipzorat ami skaniyan a Qur-an sii ko mga kobal a pangangayamun (a pmbthowan sa
riqa') sa aya maana niyan na pthimoon ami go ipzorat ami sii ko okit a kapakatotondo-tondog
iyan sii ko mga kobal a pangangayamun...

(2) Piyanothol o Uthman (ra) a mataan a so Rasulollah (saw) na aya olaola niyan na igira a adn a
initoronon a nganin a pd sii ko Qur-an na pthawagun iyan so sabaad ko mga panonorat iyan sa giiniyanon tharoon: tagowa niyo angkaiya ayat sii sangkaiya Surah a pagaloinon o Nabi (saw) a
manaya manaya dn a Surah... giyanan a dowa a Hadith na khatoon anan sii ko Mustadrak Al-Hakim.

>go so kadaklan ko mga panonorat sa wahi o Rasulollah (saw) na pmbagakaniranon sa kopya so

Nabi (saw) go komokowa siranon mambo sa kopya iran, go ugaid na giyangkaiya a kapthimowaon
na da midaptar sa satiman a Mushaf sa makambblablag a kisosorat iyan sii ko mga kobal a
pangangayamun,

>go sii ko mga oolad a tolan a pangangayamun, go sii ko mga opis a kayo a korma, sa lagid o
kiyatharowaon o Zayd bin Thaabit (ra) go so kipakalalangag a mga sahaba sii ko Qur-an, go so mga
panonorat sa wahi o Nabi (saw) a milalahar iran so kiyapaka tondo-tondog o mga ayat go so mga
surah sii ko Qur-an.

IKA-2 PANGKAT: SO KIYATIMOWAON SII KO MASA O ABU BAKR (RA) SA SATIMAN A MUSHAF:

>sii ko oriyan o kiyawafat o Rasulollah (saw) na miyawa sii ko agama so sabaad ko pitikaloksan sii
ko mga arab, na siyogo o Abu Bakr (ra) sii ko kiyapakasambi iyan a Khalifah so mga Sondaro o
Islam a makipmbonoay sii ko miyamangawa sii ko Islam (sa kiyasangka-a iran ko kabgay sa zakat)
na pd sangkoto a mga Sondaro o Islam a siyogo o Abu Bakr (ra) so mga Sahaba a khipaka-lalangag
sa Qur-an, go sabnar a madakl a miyanga-Sasahid kiran sangkanan a kiyathidawa, na inikawan o
sabaad ko mga Sahaba oba madadas so Qur-an sabap ko kiyada o madakl a khipakalalangagon, sa
miyapikir iran a kathimowa sii ko Qur-an sa satiman a Mushaf sa kapakamamasa pn o sabaad ko
mga Sahaba a khipakalalangagon.

>go so thotolan san na miyapanothol sii ko Saheeh Bokharie, miyakathitayan sii ko Zayd bin Thaabit
(ra) mataan a Pitharo iyan: piyakisongowanako o Abu Bakr (ra) sii ko oriyan o madakl a miyatay a
mga Huffaz ko kiyatidawa sa Yamamah, na miyaoma ko roo so 'Umar bin Al-Khattab (ra) sa Pitharo
o Abu Bakr (ra): mataan a so 'Umar na somiyong rakn sa pitharo iyan: mataan a madakl a miyatay
sii ko kiyathidawa sa yamamah a khipakalalangag ko Qur-an, go ipkhawan akn so kadakl a
pphamatay a khipakalalangag sa Qur-an sii ko phamakatalingoma a mga kathidawa a khasabapan
sa kakhada o madakl a khipakalalangag sa Qur-an, go mataan a aya ilayanaknon na miyapatot a
kipandoon ka sa matimo so Qur-an. pitharo akn a tigo Abu Bakr sii ko 'Umar: andamanayai
kapnggolaola-angka ko nganin a da nggolaola-a o Rasulollah (saw)? pitharo o 'Umar: ebt ko Allah
giyaya e mapiya, sa matatatap dn so 'Umar sa giiniyan raknon kakhasokasoya sa taman sa
liniwanagan o Allah so rarb akn sangkoto a pamikiran o 'Umar sa miyaka-ayonakoron. sa pitharo o
Zayd: a pitharo o Abu Bakr: mataan a ska (hay zayd) na mama a kangodaan pn a mapasang a
mapiya e tanod go dadn a miniziyanta ami rka, go sabnar a ska e panonorat o Rasulollah (saw) sa
wahi, sa pakapamagomana-angka so Qur-an sa katimo iyan, go miyatharo o Zayd: ebt ko Allah!
kaso inisogo rakn o Abu Bakr na mapnud sii rakn a diso kitogalinungko sii ko satiman a palao a pd
sii ko mga ala a palao a diso inisogo rakn o Abu Bakr sa katimowako sii ko Qur-an. sa miyatharo akn
a tigo Zayd: andamanayai kapnggolaola-aniyo ko nganin a da nggolaola-a o Rasulollah (saw)?
pitharo o Abu Bakr: ebt ko Allah ka skaniyan e mapiya, sa matatatap dn so Abu Bakr sa giiniyan
raknon kakhasokasoya sa taman sa liniwanagan o Allah so rarb akn sa lagid o kiyaliwanagi niyan sii
ko rarb o Abu Bakr, go so 'Umar (ra) sa piyakapamagomana-akn so Qur-an sa tinimo akn phoon sii
ko kikasosoratanon a mga kobal a pangangayamun, go sii ko mga opis a kayo a korma, go
makapopoon sii ko mga tao a khipakalalangagon, sa taman sa miyatoonakun so mori-pori a ayat sii
ko Surah Taubah sii ko Abu Khuzaymah Al-Ansarie a dako matoon ko salakao rkaniyan, na
giyangkoto a Mushaf na tiyangan o Abu Bakr sa taman sa miyawafat, oriyan iyan na miyakowa pman
o 'Umar, na sii ko oriyan o kiyapatay o 'Umar na sii minibagak ko Hafsah a wata iyan, a inao
miyamaratiyaya (ra).

IKA-3 PANGKAT: SO KIYATIMOWA KO QUR-AN SA KIYAADN O MGA KOPIYA NIYAN SII KO

MASA O UTHMAN (RA):

>gowani dn a makaolad so kapphanaban o Islam na minipayapat so mga Sahaba (ra) sii ko mga
ingud a pkhataban iran sa ipphangundao iran ko mga tao ron so Qur-an goso mga sogowan o
agama, go aya miyaolaola na oman e sahabi na pmbatiyaan iyan so Qur-an ko lagid o
kiyanuganiyanon sii ko Rasulollah (saw) sii ko isa ko pito a okit a kapmbatiya-a ko Qur-an a phoon ko
Rasulollah (saw) goso sabaad a kapmbatiya-airanon na kna ba lagid o kapmbatiya-aon sii ko mori a
kinitoronunon o Jibrel (as) ko kalangowan o Qur-an, sa giyoto e aya miyaolaola naso mga tao sii sa
Shaam na pmbatiyaan iran so Qur-an sii ko okit a kiyasowa-airanon ko kapmbatiya-akiranon o Ubay
Ibn Ka'b (ra) goso mga tao sa 'Iraq na pmbatiyaan iran mambo sii ko okit a kiyasowa-airanon ko
kapmbatiya-akiranon o 'Abdullah bin Mas'uod (ra) sa kapakay aso okit a kapmbatiya-aon o mga tao
sa 'Iraq na makambida sii ko miyanug a okit a kapmbatiya-aon o mga tao sii Shaam, sa aya
miyaolaola na phagongkirun o sabaad so sabagi sa pphakaribatun o isa so salakao ron.

>so 'Uthman (ra) na mismo dn sa Madinah Al-Munawwarah na kiyasaksian iyan a adn a

pphamangundao sii ko Qur-an sii ko isa a okit a kapmbatiya-aon, goso salakao ron mambo na
ipphamangundao niyan sii ko salakao mambo a okit a kapmbatiya-aon, sa aya miyaolaola na igira a
miyakatotoona angkoto a mga morit o oman e isa kiran balabao ron so mga kangodaan kiran na
pphakaribatun o isa so salakao ron, sa oba di aya mataan na palaya siran dn makaoontol.
>naso kiyangolaola oto na tominindug so 'Uthman sa mimbar go migay sa padoman sa Pitharo iyan:
skano dn mismo a zii sa tangan akn na giikano makazosopaka o antaay makaoontol rkano e okit e
kabatiya sii ko Qur-an, na mararani a mapngolaola dn mambo sii ko mga wawatan a darpa so sobra
saya pn a kazosopaka, sa pagisa-isa kano hay mga sahabat o Muhammad (saw) sa sorat niyo so
Qur-an sii ko satiman a okit a kapmbatiya-aon a maisa-isaon so mga tao.

>go sabnar a miyapanothol sii ko saheeh Bokharie makapantag sangkanan a kiyatimowaon a

miyakathitayan sii ko Anas bin Malik (ra) a pitharo iyan: a mataan aso Khudhayfah Ibnul Yaman (ra)
na miyakaoma sii ko 'Uthman (ra) go pd iyan so miyakithidawa a mga tao sii sa Shaam ko
kiyatabana iran sa Armenia go Adrabijan (pd anan sa ingud a Russia) a pd o mga tao sa 'Iraq sabap
ko tanto a kiyatkawi sii ko Khudhayfah (ra) ko miyailay niyan a giiran kazosopaka makapantag ko
kapmbatiya-a ko Qur-an, sa pitharo o Khudhayfah sii ko 'Uthman: hay Datu o miyamaratiyaya: na
sambotangka angkaiya ummat ko onaan o dairan pn kazosopakai sii ko Qur-an sa lagid o
kiyazosopaka o mga yahodei goso mga kristian, sa giyoto e sabap a somiyogo so 'Uthman sa tao a
phakasongun sii ko Hafsah (ra) sa piyakitharo iyanon: pakiwitun ka rkami so Mushaf (Qur-an) ka
kopiya kami ron sa madakl a Mushaf na oriyan iyan na ipphato ami rka bo sa inipakawit o Hafsah
(ra) so Mushaf sii ko 'Uthman (ra)... go giyangkaiya kiyatimowaon na sii dn ko kakhapopos o ragon a
24 H. a kazold o paganay a ragon ko 25 H. sa lagid o kiyatharowaon o Ibn Hajar Al-'Asqalani "ra"...
go sabnar a pinili o 'Uthman (ra) so 4-ka tao sii ko mga sahaba a atastanggoniran oto siran so: Zayd
Ibnu Thabit, 'Abdullah Ibnu Zubayr, Said Ibnul 'As, 'Abdulrahman Ibnul Hisham, go giyanan a 3-ron
katao sa oriyan na palayadn makapopoon ko tribo a Quraysh.

>go giyangkaiya kiyatimowaon pharoman sii ko masa o 'Uthman (ra) a piyagolowanan o Zayd bin
Thabit (ra) na giyaya dn e piyakadayamang a Mushaf sii ko mga ingud a Muslim ipoon sangkoto a
masa iran na taman dn imanto, giyoto e a aya ipmbtho ko Mushaf tano (Mushafo 'Uthman).