KETEGAL ANAK INDAI MERINSA

Jango o Jang. Kini penunga nuan tadi,ku indai Langup. Baru ka lelap mata
Langgup. Nama nya indai? saut Langup enggau ati ngeransi. Apu! Jang nadai indai ngajar
nuan bejaku tinggi baka nya. Nama utai pinta nuan indai? Tak mali meda aku jenuh mimit.
Baka ke enda meda aku gali ga nuan,timbal Langup. Jang, aku semina ngasuh nuan
engkani manuk ba sangkar belakang din, ku indai Langup. Cheh! nyamai aja nuan ngasuh
aku. Lapa nuan enda dih? Nadai mih pengawa nuan tak semina dedugau aja, ku Langup.
Langup angkat tang angkat ukai meri manuk. Enda disadang Langup tak ngejuka
indai iya ti benung duduk ba atas bangku. Tudah indai Langup nyau begaring labuh ari atas
bangku.
Akai! Nama nuan ngaga aku baka tu? Kempang ga nuan anak. Enda kasih ke
aku ke enda ulih bejalai tu, ku serabana indai iya sambil nyabak. Langup enda bedulika
indai iya. Iya pulai ke bilik pangking lalu ngempaska tubuh iya gali ba peninduk.
Langup angkat baru lalu duduk ba atas katil. Iya nyengkau beg gari lalu besikap
nyimpan semua gari. Enda tentu ditikal manah lalu dipasuk ke dalam beg. Berumban. Enda
lama udah nya Langup pansut ari pangking ngerinan beg gari. Indai, aku enggai diau
enggau nuan agi. Jari nuan tachat, pejalai nuan enda menyana baka orang bukai. Malu. Aku
malu begulai enggau nuan, ku Langup bejaku melakangka indai iya ti agi ngenatka diri
pedis bekau ti labuh ari bangku dijuka Langup tadi. Kasih mih ke aku anak. Anang nuan
ninggalka aku. Sapa ti enggau aku ditu enti nuan mindah? ku indai iya. Langup ngaga diri
enda ninga. Nyingkangka kaki bejalai ninggalka indai iya ti sabak-sabak nagang iya mindah.
Tiga minggu Langgup udah ninggalka rumah panjai sida lalu nadai didinga berita. Ati
indai iya amat tusah. Nyawa enda masuk makai. Iya mega enda dapat laban tebunsa
ngenang Langup anak tunggal ti enggai begulai enggau iya agi. Nama mih pengawa Jang
diatu? Makai ke enda iya? ku indai iya bejaku kediri sambil jari iya mutik leka asi ba atas
tikai. Lemai nya indai iya makai beengkayuka anak impun diberi ibu Langup ari bilik sepiak.
Sekumbang Langgup nadai di rumah, bala ibu bilik sepiak mih ke meri indai iya utai dempa.
Malam nya sida serumah begau laban indai Langup enda mukai-mukai luput. Udah
diurut, diuntus, diunsut enggau mayuh bengkah ubat enda ga iya ngeleda. Manang Jelepa
udah ga nenggauka semengat iya ba batu ilau. Tesat jauh semengat iya tu, ku manang.
Parai mih indai Langup lemai nya. Parai nengali lemai mati nengali hari.
Pagi hari siti, Sadang ti nyadi tuai rumah undur ke pasar lalu ngetu ba opis radio
ngenataika berita pemati indai Langup. Aku Tuai Rumah Sadang, ari Tembawai Kapok
madahka pemati indai Langup. Pesan tu ditujuka ngagai Langup minta iya pulai ke menua
enggau lengkas. Seninjik bendar pagi nya Langup bedau nurun gawa. Lebuh ninga pesan ti
dikenataika tuai rumah sida iya, Langup temati kutu. Nadai daya sereta enda nemu utai patut
dikereja enda nyalah-nyalah baka pitak ke dibuai mata.
Angkat Langup lalu ngelawa opis kerani endur iya bekuli. Pelanda uduk tudah
Langup ngambika jampat datai. Langup diberi peremisi seminggu pulai ke menua. Langup
pulai ke menua nepan van Ah soy. Sekumbang ke dalam van nya, Langup endang enda
bejaku. Mati runding. Iya enda nyangka indai iya ngenyampat nya ninggalka iya. Tambah
mega iya agi ingat jaku indai iya ti nangang iya mindah. Bekerenjui ai mata masahka dagu.
Indai anang nuan ninggalka aku. Nadai orang berandau enggau aku enti nuan
nadai. Bai aku indai..indai, ku leka sabak Langup nunga bangkai indai iya.

Jang, nadai guna nuan nyabak agi. Diatu indai nuan udah nadai agi,ku jaku bala
sekeda sida serumah.
Indai .. ampun mih penyalah aku. Angkat nuan indai, aku deka meda nuan
ketawa, bejaku enggau aku. Indai......indai, serebana Langup. Badu agi nuan nyabak, Iya
ga udah nadai. Disabak ke nuan enda mih iya ulih idup agi, ku jaku Tuai Rumah Sadang
sambil jari kiba iya murus belakang Langup.
Aku ninggalka indai laban aku nyangka indai nyamai agi enti aku nadai. Nadai aku
nyangka indai nyau danjan sebedau aku pulai ke menua, ku Langup bejaku enggau Tuai
Rumah Sadang.
Tuai, diatu aku bedanji deka ngubah pengidup aku. Aku deka nyadi anak ke
menyana ngambika indai badu irau sereta lantang ba menua baru iya, pia ku Langup.
Manah mih nya Jang, timbal Tuai Rumah Sadang.
Sekumbang indai iya udah nadai, Langup mih ti mekuh semua pengawa ba bilik sida.
Kebun, temuda dikereja enggau bebendar. Diatu iya udah nanam getah lalu besawit mega
baka sida serumah ti bukai. Pegung ikan bisi tiga iti lalu manuk nyau penuh sangkar sereta
enda ngetu betelu. Berupai lantang pengidup Langup. Pemati indai iya ngasuh iya ngelala
gaya pengidup ti mayuh leman.
Terima kasih ke nuan indai udah nyaga aku ari mit sampai diatu. Penyanyau enggau
pengasih nuan enda ulih dibayar enggau duit ringgit tauka intan belian. Aku minta ampun
laban aku selalu ngemediska ati nuan ngelama tu. Pemanah budi nuan tetap dikingat aku
belama, ku jaku Langup lebuh iya ngusung kubur indai iya.

Ditulis,
Calaudyear (3B)

Pelandai Terima Kasih Apai Indai.

Apaiindai terima kasih ngagai seduai,

Ngadaka aku enggau menyana
Enti ukai apai engau indai,
Aku enda meda dunya ngelala mensia
Terima kasih apai..indai,
Nempara aku ari mit,
Ngintu aku sampai ke besai,
Bekikis bulu betis bebuai bulu gundai,
Nyengula ke aku.

Terima kasih ke nuan apai.. indai,

Meri penyanyau,
Meri pengasih ke aku,
Ari seduai aku ngasaika penyamai.

Apai.. indai,
Seduai nyemaka bintang,
Nyemaka bulan,
Bekebelik di langit,
Meri penampak maya malam.

Ditengkebang,
Jessyca Sindong (4B)

Enda Aku Nyangka

Hello Umang. Nama pengawa nuan? Udah Makai? Kati asai ba menua orang?
pia ku tanya indai iya lebuh ti telefon ngagai Umang.
Baru pulai belajar aku tu indai. Ka nurun makai mih tu. Anang irau ke aku seduai
apai, saut Umang liut baka daun dipuputka ribut. Chelap asai ati indai Umang ninga saut
Umang.
Nama kebuah nuan telefon, indai? Umang nanya. Nadai, deka nemu berita? Gerai
nuan? tanya indai iya baru.
Seminggu udah ke berandau enggau Umang ba telefon, dia indai Umang ninga rita ti
nyelai bisi mansa pending iya.
Hello..Umang, nama ulah nuan baka nya? Enda aku nyangka nuan sanggup ngaga
kami baka tu. Amat nuan tu semina nemu ngemaluka kitai sebilik, ku indai Umang.
Indai.Nama utai ku nuan nya? Enda aku nemu, saut Umang.
Nama aku bisi ninga rita nuan betaban enggau orang lelaki. Amat nya?
Aku
ngasuh nuan besekula ba Australia ukai ngasuh nuan ngaga ulah enda menuku, pia ku indai
Umang. Enda aku nemu utai ke disebut nuan nya indai, timbal Umang seraya lalu madam
randau seduai ba telefon. Indai Umang nyabak ngenang pengawa ti udah digaga Umang.
Udah ga pengidup sida sigi merinsa, selalu nyadi buah mulut orang lalu tu tambah ga enggau
ulah Umang. Sema ke jaku, pemerinsa ti ditapi sida indai Umang sebilik udah labuh
dipanggung ga lesung udah aruk dipukung ga enggau alung.
Lemai nya, apai Umang enggau anak lelaki iya Ambat Kalong pulai ari kebun. Dia
seduai meda mata indai Umang bangkung baka ke baru udah nyabak. Lapa mata nuan
bangkung indai Umang? tanya apai Umang. Ohh.apai Umang. Anak tua Umang ngaga
ulah ba menua orang, saut indai Umang sambil nyabak sikuk-sikuk. Ahh lapa Umang
baka nya? ku apai iya. Ambat, uji nuan telefon ngagai Umang, ku apai iya ngasuh anak
lelaki iya telefon ngagai Umang.
Umang, apai enggau indai ngasuh nuan pulai dulu ke menua. Bisi utai deka
dikerandauka enggau nuan, ku Ambat. Aku mayuh pengawa ditu Igat. Ukai baka kita
semina makai tinduk aja, saut Umang. Umang mutuska randau seduai. Apai Umang enda
puas ati ninga tusi Ambat.
Umang, pulai, Aku ngasuh nuan pulai diatu, perak apai Umang ba telefon.
Apai.. Gawai ila aku pulai, ku Umang.
Nasib aku ulih bedalih. Enti enda pia angat pending aku ninga jaku anu apai, ku
Umang bejaku kediri. Runding Umang beba laban iya endang nemu diri salah lalu enda patut
ngaga ulah ti ngemaluka diri empu enggau apai indai iya. Iya ngetanka jaku diri nadai
ngereja ulah ngagai apai enggau indai iya. Tang ngelama tu iya baka mayau ke ngelamunka
tai diri. Ditungkus pan abu tekebu mih abus, dibalut pan buah rian pansut mih bau.
Umang pulai ke menua sida di Tanjung Reba mai ati ti malu. Malu ke ulah diri enda
sebaka enggau indu ti serambau enggau iya. Berasai lubah singkang kaki lebuh tama ke bilik
laban iya sigi ngadang apai enggau indai iya endang nganu. Semua sida serumah bela udah
nemu pendiau tubuh Umang. Udah seminggu di rumah, seleka asi pan enda dijeput. Nyawa

enda masuk taja pan lauk manah dinahka indai iya. Tubuh Umang berupai kurus. Umang
nadai ati ngereja pengawa. Semampai lembau. Tulang berat deka angkat. Tinduk nya mih
pengawa iya besehari-hari.
Pagi nya, semua kaban belayan udah ditesauka awakka datai magang. Bela ngajar
Umang. Nuan anak sanggup ngemaluka mua kami. Kempang nuan ngulah diri. Ni juluk
ati nuan ngelama tu? Uji nuan berunding, sapa lelaki deka ke nuan ke udah ngandung baka
tu? pia ku indai iya bejaku sambil nyabak. Apai iya enda bebunyi. Agi nejuka sida bukai
ngajar Umang.
Umang, aku ke indai nuan berasai pedis maya ngadaka nuan. Taja pan meruan laki
ba tisi. Anang ke nuan Umang, ku indai iya. Jaku indai iya ngasuh Umang balat agi
nyabak.
Sayau mih pemajik diayahka nuan ba lelaki sengapa. Enti nuan agi tuchi beresi
mayuh amat orang lelaki berebut ke nuan. Diatu nadai siku deka malik ngagai nuan, ku
apai Umang baru nimbal jaku sida ti bukai.
Umang nyabak sesikuk ba tisi dinding ninga jaku sida sebilik. Enda tepansutka jaku.
Ngenung baka empelekung mabuk ambuh baka puyu mabuk keruh. Mati kutu. Ai mata
seruran naya nerutu dagu masahka kuyu ti endang udah bisi berupai ngeruang. Enti suba,
semampai pelu-pelu kuyu Umang.
Enti aku enda baka tu, enda apai seduai indai nganu aku ngemalat tu. Aku anak asi
seduai. Aku sayau ke apai, aku kasih ke indai. Penyanyau aku ke kita endang ngelui
peninggi bukit, enda alah disukat. Enda alah disema. Tang nama mih daya semua udah
nyadi, pia ku dalam ati Umang.
Aku nemu aku.salah. A..ku min..ta ..am.punapaiindai,
ku Umang Deka iya bejaku tang semua nya tak semina bebital ba ujung dilah. Ai mata iya
bekerenjui naya. Jaku ajar enggau jaku siru sida sebilik udah ngasuh iya ngelala daya idup ti
lebih manah. Umang besampi ngagai petara ngarapka anak iya ila menyana pendiau.

Digaga,
Rosmiati (5E)

Janting
Ba sebuah rumah panjai ti benama Buluh Engkalat bisi siku nembiak ke benama
Janting. Janting diau begulai enggau apai seduai indai iya. Rumah sida Janting enda
betampung enggau orang bukai. Pengidup sida sebilik disemaka baka kair pantuk manuk.
Suah suntuk pemakai.
Enti hari manah apai Janting nangkal getah. Indai Janting nyaup muat ai getah.
Kadang-kadang sida suah begantung senduk maya hari belunggur ujan sereta enggau maya
getah nadai rega.
Janting besekula ba SMK Ulu Rian. Taun tu Janting pom lima lalu deka napi peresa ti
pemadu beguna ba pengidup iya. Taja pan sida suntuk tang Janting enda beduli ke
penyuntuk. Penyuntuk enggau pemerinsa ke ditapi sida nyadi ke peransang Janting ngulihka
juluk ati iya deka ngubah pengidup sida sebilik.
Janting mega semampai nyulut ba pelajar. Iya selalu bulih lumur satu maya peresa.
Taja pia iya enda sumbung. Janting siku nembiak ti enda ngambi ati. Iya mentas sereta enda
tinggi jaku. Iya mega enda ngular maya gawa. Ba sekula, iya dikelala semua pengajar. Iya
nyamai enggau begulai. Iya mega enda rangka penemu. Iya bekunsi semua penemu enggau
penau diri enggau bala nembiak bukai.
Janting ukai semina nyulut ba pelajar tang mega mujur ba aktiviti kokurikulum ba
sekula. Iya nembiak ti landik sereta sikar ba main bol. Iya suah ngarika sekula bemain bol.
Raban sida Janting suah menang ba pekit main bol. Nambahka nya, Janting mega aktif ba
raban Pengakap.
Kelimpah ari mantu nembiak bukai ba pelajar, Janting mega lempung tulang nyaup
bala pengajar. Iya dipaduka bala pengajar nyadi tuai nembiak . Janting ukai semina bagas
tang mega kemerah sereta chakah ngereja pengawa. Nya alai, iya selalu diasuh pengajar
ngulu ke nembiak ngemujurka semua pengawa ba sekula.
Janting enda bemalam ba sekula. Iya berundang ari rumah. Enti di rumah, iya ngiruh
ke diri nulung indai iya ba dapur tauka ba bilik. Iya enda nejuka indai iya ngereja semua
pengawa ba rumah. Tembu bekemas enggau ngintu diri, iya ngulang pelajar sampai jauh
malam. Ba runding iya, iya patut belajar bebendar lalu enda patut masau jam sereta
empelitaka diri ngambika mujur ba peresa enggau pengidup.
Hari maya peresa pan nuntung. Sebedau tama ngagai bilik kelas, Janting besampi
minta diri diberekat petara. Janting duduk ba penuduk diri nganti pengajar nyadung keretas
tanya.
Kita diberi awak dua jam. Diatu kita tau berengkah nyaut tanya, ku pengajar meri
lalau ngagai bala nembiak. Semua sida sekelas bela sengian. Janting macha tanya lalu
belabuh nulis saut. Iya nadai beleman nyaut semua tanya.
Udah ke abis peresa, iya mantu apai enggau indai iya ngereja pengawa di rumah.
Berasai lempung semua pengawa ari saup Janting. Untung tua bisi anak baka Janting.
Nadai nejuka tua ngereja pengawa, ku indai Janting lebuh ti berandau enggau apai Janting
lemai nya. Nya mih, nemu ga petara meri Janting ke tua, timbal indai Janting. Maya nya
Janting benung manjah sayur ba ujung bilik lalu enda nemu randau apai enggau indai iya.

Hari beganti hari, bulan beganti bulan. Diatu nyau ujung bulan tiga. Pemutus peresa
sida Janting pan udah temu. Pagi nya Janting tumu dani laban deka ngambi pemutus peresa
iya di sekula. Apai enggau indai sama nyempulang Janting ke sekula. Sida tiga bejalai
belubah-lubah sambil berandau diri. Janting enda tentu nimbal randau apai seduai indai iya
laban runding iya bebalut. Ati iya kesal. Nyema pemutus peresa aku enda berapa manah,
tentu asa ati apai enggau indai, ku runding Janting. Kepuas ke bejalai alai sida tiga datai ba
sekula.
Janting, jampat ke agi nuan kitu, ku pengajar John sambil jari iya ngepai Janting.
Janting malik ngagai apai enggau indai iya. Janting merening pengajar John enggau bala
pengajar ke bukai. Nama utai deka dipadah pengajar John,? ku ati Janting.
Meri tabi puji ngagai nuan Janting. Nuan bulih 9A+. ku pengajar John sambil jari
iya nabi Janting. 9A+ puji ke berekat nuan petara, ku Janting. Enda berasai iya lalu
merap apai enggau indai iya. Ai mata labuh bekeberai masahka kuyu. Ai mata gaga. Gaga
ke diri mujur ba peresa.
Aram Janting ngagai opis aku, ku pengajar John. Datai di opis, pengajar John lalu
nyua ke selambar keretas ngagai Janting. Nuan diasuh Opis Pelajar nyambung pelajar
ngagai menua New Zealand. Nuan anang irauka duit laban semua ungkus belajar dibayar
opis pelajar, ku pengajar John. Taja pan Janting ulih nyambung pelajar ngagai menua luar
tang ati iya sinu deka ninggalka apai enggau indai iya di menua.
Anang nuan irau ke kami duai indai nuan anak. Belajar mih nuan. Ukai semua
nembiak bisi peluang diberi perintah belajar ba menua ribai, ku apai Janting. Kati ke aku
enda irau ke seduai indai, ukai nya biak seduai. Indai ga enda tentu pengerai, saut Janting.
Lemai nya sida tiga menyanak nyikap semua perengka ti deka dibai Janting. Pagi siti
sida tiga tumu ngintu diri. Begulai manah enggau orang anak. Anang irau ke kami duai
apai nuan di rumah. Nadai berasai lima taun nya anak, ku indai iya lebuh ti berandau
enggau Janting pagi nya seraya ke nganti penatai pengajar John ti deka nganjung iya ngagai
padang bilun Kuching. Sebedau Janting berangkat, apai iya nyua ke Janting sampul surat.
Tu belanja nuan anak, ila kami duai indai nuan ngirum ke nuan baru, ku apai iya. Janting
labuh ai mata maya ti nerima jaku lalau apai enggau indai iya.
Lima taun belajar di New Zealand, Janting mujur nembuka pelajar lalu bulih degree.
Iya diterima nyadi menijar sebuah kompeni ti besangkut paut enggau perengka pengangkut.
Janting bekereja sambil belajar. Iya beniat deka ngambi PHD. Gambar Janting ayan ba surat
kabar mandangka siku anak orang bumai ti liat ati mujur nembuka pelajar tikas PHD. Diatu
Janting nyadi buah mulut orang ukai semina ba rumah panjai tang ba serata menua Malaysia.
Nyau pengelama iya kereja ba menua luar, diatu iya mulai ke diri ke menua lalu
bekereja ba menua diri. Taja pan gaji mit tang iya enda sanggup agi beserara enggau apai
seduai indai iya. Diatu juluk ati iya ti deka ngubah pengidup sida sebilik udah nyadi nyata.
Taja pan sida tiga idup enggau lantang tang Janting enda buai batu ngagai sida serumah ti
selalu nulung sida sebilik. Janting mantu sida serumah ti begunaka tulung.

Ditulis,
Monica Sura (5SN)

Pejuraika Kebuah Enggau Chara Napi Penusah Gian Dadah Ti Nyadi Ba

Nembiak Kemaya Hari Tu
-Pemenang Pekit Nulis Esei Minggu Anti Dadah SMK Lubok Antu 2016
Ramos Ukar (5SN)

Kala kita ninga bansa dadah baka syabu, pil psikotropik, heroin enggau morfin? Nya
mih bansa dadah ti pemadu tebilang sereta mudah ditemu ba menua kitai. Nyau deka tiap
hari kitai ninga penusah gian dadah baik ba radio, televisyen, internet tauka ba surat kabar.
Pemayuh nembiak ti gian dadah majak betambah ari taun ke taun lalu tu ngirauka kitai laban
tau ngeruga pengelikun menua. Taja pan kitai nemu dadah tau ngachau untak, runding
enggau pikir kitai mensia tang nama kebuah kitai malut pengidup diri enggau dadah?
Mayuh kebuah nembiak kemaya hari tu teparuk enggau dadah. Siti ari kebuah iya
nya alah umbuk bala kaban tauka nitihka ulah bala kaban ti udah gian dadah. Nembiak
kemaya hari tu tebal agi rindu nguji utai ti baru. Ambika banding, makai dadah laban deka
nguji ke penyamai enggau asai ia.
Kelimpah ari nya, raban nembiak ti enda chukup perati enggau penyanyau ari apai
indai mega mayuh bekempit enggau dadah. Apai indai jarang berandau sereta bekunsi
penanggul anak diri. Utai tu nyadi laban sida kelalu kiruh enggau pengawa diri empu
nyentukka sida nadai hari beratika ulah anak diri sereta orang ti begulai enggau anak sida
besehari-hari. Apai indai mega enda ngajar sereta ngelalau anak lebuh sida di rumah. Mayuh
apai indai endang enda kala nusika penyai enggau empas negatif gian dadah ngagai anak diri.
Nya alai, anak ti enda dikibuhka apai indai sepeneka ati ngereja pengawa ti enda manah
nyengkaum ngambi dadah.
Nambahka nya, daya pengidup ti nadai besekat mega siti ari kebuah nembiak kemaya
hari tu gian dadah. Bala nembiak ti nadai penanggul ba duit endang mudah bulih dadah.
Nembiak ti ditejuka ngati kediri ngereja pengawa mega mudah teparuk enggau dadah laban
sida tu enda milih orang enggau bebakih.
Mayuh mega bala nembiak ngembuan ulah enda menuku ti gian dadah ketegal ari
runding sida empu. Sida ti napi penusah beba tauka charut runding ngambi chara ti muntang
makai dadah kena nyeliahka penusah diri. Nya alai, ari niat ati raban nembiak ti napi mayuh
penanggul mega ngasuh runding sida tekuing ngambi enggau makai dadah.
Penusah gian dadah ba raban nembiak kemaya hari tu patut diputarka. Chara
keterubah iya nya ari apai indai. Apai indai ti nyadi tuai bilik ngembuan tanggung pengawa ti
berat ngemataka ulah anak diri . Sida patut nemu penunga sereta orang ti bebakih enggau
bala anak. Apai indai mega patut seruran meri lalau sereta ngajar anak. Beri teladan ti
manah ngagai bala anak. Sida enda patut kelalu kiruh enggau pengawa diri sereta angkunka
pengeraja dunya ari anak sida. Nya alai, ngajar sereta ngelalau enggau beratika anak diri
endang tanggung pengawa apai indai lebuh ba rumah.
Chara ke bukai iya nya numbuhka Kelab Penagang Kriminal ba semua sekula enggau
ba institute pelajar tinggi. Ari pending enggau berita ti didinga, penusah gian dadah udah

ngerekai ngagai IPTA enggau IPTS. Enti Kelab Penagang Kriminal ditumbuhka ba sekula
sereta aktif enggau aktiviti, raban nembiak nadai hari ngereja pengawa ti enda menuku.
Nambahka nya, penerang enggau licha pasal pengerugi gian dadah patut bendar
dipejalaika ngagai raban nembiak ti benung mansang kemaya hari tu. Agensi dadah patut
chakah agi sereta bekempit enggau raban pengereja pengawa enda begaji munaska dadah.
Kitai sama nemu nembiak ti mayuh gian dadah iya nya nembiak ti enda nemu ngena
maya lepa ngereja pengawa ke mai penguntung. Nya alai, perintah endang patut nyediaka
mayuh agi palan sereta perengka main ti chukup. Ambika banding, padang main bol,
gelanggang futsal enggau gelanggang badminton sereta pegung endur nyemerai. Ari nya
nembiak ukai semina bisi endur bemain ti lantang tang mega bisi palan endur betemu enggau
pangan diri. Nya alai, nembiak ti nemu ngena maya lepa enggau menyana enda mudah gian
dadah.
Chara kepenudi iya nya ngiri sereta ngembing nembiak enggau jalai pengarap. Ngiri
sereta ngembing nembiak enggau jalai pengarap tu ukai semina ungkup bala paderi tang
mega sida ti nyadi apai indai. Nembiak ti ngemeratka pengarap ukai semina nadai ati deka
ngereja pengawa ti salah tang mega meretika tuju pengidup sereta ulih napi mayuh leman
penusah enggau kur ngereja pengawa. Nya alai, ngembing nembiak enggau jalai pengarap
tau bendar dikereja ngambika nembiak taluk ngagai petara lalu enda mudah malut diri enggau
dadah ti nyadi munsuh menua.
Ke simpul jurai, ulah nembiak ke gian dadah bepun ari mayuh kebuah kelebih agi ari
apai indai ti kelalu angkunka pengeraja dunya sereta enda kiruhka anak diri, ari gaya
pengidup ti nadai besekat, enda ngira orang bebakih enggau ketegal bai ati ti deka nguji utai
baru. Nya alai, apai indai, sekula, opis perintah patut bekempit enggau pangan diri sereta
chakah agi ngereja pengawa munaska dadah munyi ku sempama berat sama ngangkat
lempung sama nanggung. Raban nembiak ke diatu nya ke pesaka menua dudi hari ila. Sida
tu mih orang ke niri sereta negika menua. Nya alai, menua kitai deka mansang sereta pegari
enti penusah gian dadah enda nyadi ba raban nembiak kemaya hari tu.