Nuwun, para pepundhen pinisepuh kakung saha putri ingkang satuhu kula bekteni Panjenenganipun Bapak Kepala Desa tuwin para perangkat andhahanipun ingkang jumeneng kinarya pangayoman, ingkang kula hormati. Para kadang werdha, mudha, tan bineda, ingkang tuhu pantes sinudarsana. Mugi Gusti tansah paring kaharjan, ketentreman saha kawilujengan dhumateng kula panjenengan sedaya. Kepareng sumela atur nggempil kamardikan panjenengan sekaliayan, kula minangka sesulihipun Bp/Ibu Purnomo Irianto sakulawarga, ngaturaken sugeng rawuh dhumateng panjenengan sedaya. Puji syukur konjuk dhumateng Gusti Allah ingkang Maha Asih dene sampun lumampah Bp/Ibu Purnomo Irianto anggenipun kagungan kersa ndhaupaken putra-putrinipun ingkang nama Ahmed Zaidan Najib kaliyan Zerlina Chaira Rani rikala dinten Kamis tanggal 13 September 2012 wanci tabuh 10.00 wonten ing Gedung Haji Boyolali kanthi wilujeng mboten kirang satunggal punapa. Dhumateng para rawuh sedaya, mugi kersa paring donga pangestu dhumateng temanten kekalih, saengga tansah pinayungan rahmat saha barokahipun Gusti. Temanten tansah raharja, bagya mulya lan antut runtut. Mboten kesupen mugi-mughi enggal dipunparingi momongan ingkang bekti dhumateng rama-ibunipun, agama, bangsa tuwin negari. Amiin. Para rawuh ingkang minulya, mboten kesupen Bp/Ibu Purnomo Irianto sakulawarga aturaken agunging panuwun awit sumbangsih pambiyantu panjenengan sedaya ingkang sampun rawuh wonten ing pakurmatan menika. Ing wasana, Bp/Ibu Purnomo Irianto sekaliayan ngaturaken pangapunten, menawi anggenipun nampi rawuhipun panjenengan sedaya, nyawisaken papan tuwin palenggahan lan anggenipun caos pasugatan mboten ndadosaken rengganing penggalih. Minangka panutuping atur, saking kula piyambak manawi kathah cicir cewet atur saha kirang trapsila anggenipun matur, kula nyuwun pangapunten. Matur nuwun,