Anda di halaman 1dari 8

1.

0 PEMUKA JAKU

Psikolinguistik tu siti pampang penemu senentang proses ngulihka jaku ti dipansik


bepelasarka penemu psikologi. Psikolinguistik tu asil ari dua chabang penemu iya nya
psikologi enggau linguistik. William (1960) madahka psikologi tu siti penemu dikena mansik
pemaiulah sereta aktiviti mensia (Mok, 2014). Linguistik tu siti pansik saintifik pasal jaku
mensia. Nya mih psikolinguistik tu dikaitka enggau pansik mekanisme mental tu ulih dikena
mensia ngulihka jaku (Garnham, 1985).

Dalam penemu psikolinguistik tu bisi mayuh teori ti digaga bala anda jaku ari mayuh
macham pupu raban bansa. Kus BIB1064 iya nya Pelasar Psikolinguistik, Semantik enggau
Wachana meri pelasar senentang penemu psikolinguistik. Kereja kus BIB1064 minta kami
beratika Teori Behaviorisme enggau Teori Mentalisme lalu ngiga penerang senentang
bidang penemu nya ari penemu bala anda jaku.

1
2.0 TEORI BEHAVIORISME

James (1990) madahka anda ti sigi dikelala ketegal Teori Behaviorisme iya nya B. F.
Skinner. Skinner madahka jaku tu siti set ari pemaiulah behaviour ti nyadi dalam proses
dikumbai operant conditioning tauka dalam Jaku Melayu pelaziman operan. Operant
conditioning tu nyengkaum ubah dalam pemaiulah voluntari ti diasilka ari sebengkah event.

Chunto ti ulih nerangka konsep Teori Behaviorisme iya nya siku nembiak ti ngangau
indai iya mama maya indai iya merap iya. Indai iya merap iya lalu nyium iya lalu madahka
diri iya mih mama. Penyiru sereta penyinu ke dipandang indai iya udah ke ninga ngangau
iya indai enggau ati gaga nyadika siti pengawa ke meransang anak mit nya tadi nandu
pengawa ti manah tadi baka ke ngangau iya mama. Respon ari indai iya ngemekuhka
pemanah ulah nembiak nya. Ari chunto situasyen nya tadi, anembiak nya ulih ngasilka
pemaiulah nya enti bisi stimulus (indai iya); iya ulih ngaitka entara referen (indai iya) enggau
tukuh munyi (mama).

Dalam Teori Behaviorisme bisi mega nyengkaum proses imitasyen. Imitasyen tu


beguna amat dalam proses anembiak ngulihka jaku. Enti siku orang ti tuai ari anembiak nya
nyebut leka jaku, anembiak nya pan lalu nguji nandu leka jaku nya tadi. Chunto iya, indai
siku nembiak nunjukka bol lalu nyebut bol, anembiak nya lalu meri respon nyebut bo, udah
nya indai iya lalu mandangka pengerindu iya ke anak iya nya baka nyium tauka merap anak
iya (reward).

2
3.0 TEORI MENTALISME

Dalam Teori Mentalisme tu mayuh nerangka pasal penemu dalam (innate knowledge) tauka
struktur dalaman ti dikena ngulihka jaku. Anda ti nengkebang teori tu iya nya Noam
Chomsky. Anda ti nyukung sereta bepegai ba teori tu Jean Piaget enggau E. H. Lennerberg.
James (1990) madahka sida ti bepegai ba teori tu madahka innate knowledge tu siti penemu
tauka pengelandik ti bisi dalam siku mensia ari iya ada lalu ukai dikulihka ari peneleba iya.
Kira ke baka penemu semulajadi. Bala anda ti nyukung teori mentalisme tu madahka jaku tu
siti pengelandik kognitif. Pengerembai pengelandik jaku tu bekabih enggau pengerembai
pengelandik kognitif aja.

Udah ngelansa pelasar teori tu, diatu kitai deka beratika jurai ti dalam senentang
teori mentalisme. Baka ke udah diterangka tadi teori mentalisme tu sigi besangkut-paut
enggau kognitif. Ari aspek psikologi, kognitif tu siti ari chara dikena meretika pikir sereta
fungsyen mental ti dipenyadika siti sifat dalaman (Siti Hajar Abdul Aziz, 2009). Teori tu
nerangka proses ngulihka jaku tu siti aktiviti mental ti sigi bisi dalam tiap iku mensia sechara
semulajadi. Jaku tu dikumbai siti penemu ti diasilka nengah proses dalam untak enggau
saraf.

Teori mentalisme nerangka proses ngemekuhka jaku bekabih enggau penuai pikir
tauka runding. Tiap jaku ti dipansutka bisi tuju tauka objektif iya empu. Owens (2004)
madahka Chomsky bisi pejuraika senentang penuai saraf dalam untak, penuai runding,
sereta penuai aksyen (kematangan tindakan) tu aspek ti amat beguna dalam proses
ngulihka jaku. Nitihka penemu bala anda mentalis, jaku nya siti proses mental lalu ukai
proses mekanikal.

3
4.0 BANDINGBIDA TEORI BEHAVIORISME ENGGAU TEORI MENTALISME

Sebedau tu tadi, kitai udah beratika penerang Teori Behaviorisme enggau Teori Mentalisme.
Diatu kitai deka mandingbida dua iti teori tu ngena penerang ari anda behavioris enggau
mentalis. Raban behavioris madahka bepikir tu siti pemaiulah (tingkah laku) lalu pemaiulah ti
ditekanka ditu iya nya bejaku. Sida iya nyakal penemu orang ti madahka bisi proses mental
ti ulih ngasilka pemaiulah lalu sida ngumbai penemu nya enda relevan (Steinberg, 1990).
Konsep tu tadi disara anda psikologi baka Watson, Skinner enggau Staat, anda jaku baka
Bloomfield enggau anda falsafah baka Ryle. B. F Skinner madahka berunding nya siti
pemaiulah, enda ngira runding nya disadaka tauka enda. Pemaiulah tu disertaka enggau
faktor ti tau nguntrul iya. Faktor nya mensia ti bisi pemaiulah sereta genturung pendiau iya.

Kontra enggau teori behaviorisme tu iya nya teori mentalisme, Lenneberg (1969),
madahka pengerembai jaku nya bepaut ba penuai runding sechara biologi. Ninga munyi aja
enda chukup dikena mandangka reti leka jaku ba anak mit (James, 1990). Nya mih kebuah,
enti siku anak mit deka belajarka jaku, anak mit mesti ninga sampel munyi nya lalu diserta
ke enggau respon ngagai objek, event enggau situasyen. Dua iti bansa peneleba tu bebida,
respon ngagai objek tu iya nya meda, ninga, nyepi tauka megai, event enggau situasyen
dalam dunya enda bepaut ba ninga munyi jaku aja.

Dalam konteks ke mudah agi, behaviorisme tu bekauljaul enggau bidang psikologi,


teori ti madahka pemaiulah nya meri respon ngagai conditioning (pelaziman) lalu nadai
besangkut paut enggau pengasai ati. Tang ba mentalisme, teori tu bepegai ba persepsyen
ari mental sereta proses bepikir ti ulih dipelajar ari peneleba (Owens, 2004).

Nangkanka nya, teori behaviorisme nerangka genturung pendiau ti tau ngasuh


proses belajarka jaku nya tau nyadi. Dalam konteks tu, orang ti belajarka jaku nya mesti bisi
stimulus ti ulih meransang iya tau nemu siti-siti leka jaku. Tang penemu behavioris tu disakal
Chomsky. Chomsky madahka mensia sigi ari ada bisi Perengka Pengulih Jaku (Language
Acquisition Device). Perengka tu dipadah ulih mansang ngerembai baka organ bukai. Reti
nya tadi, teori mentalisme madahka orang ti belajar ngulihka jaku mesti ngena pengelandik
kognitif iya.

Nya mih bida dua iti teori. Dikena nyimpulka agi, teori behaviorisme tu lebih agi
ngagai pengelandik psikomotor tang teori mentalisme tu mayuh agi ngena mekanisme
mental tauka untak.

4
5.0 PENERANG TI NYAKAL ENGGAU NYUKUNG TEORI BEHAVIORISME

Penerang ari John B. Watson (1924), iya nya siku ari raban behavioris, madahka teori iya
nerangka pengeriri gumpal isi (otot) ti bisi maya bejaku sechara lisan tauka ti disadaka
(zahir) nya mih deka nentuka bejaku dalam runding aja. Nyadi, enda ngira kitai bejaku
enggau orang tauka bejaku dalam runding kitai empu, nya sigi siti bansa ulah ti objektif.

B. F Skinner (1957) madahka bepikir nya siti ulah enda ngira nya bejaku enggau
orang tauka dalam runding diri empu. Tu nyukung penerang Watson tadi. Iya lalu madahka
ulah mantaika sepis tu biuh ari dua iti faktor, iya nya, mensia bukai sereta genturung
pendiau orang nya.

Nambahka nya, Gilbert Ryle madah mayuh kitai mensia suah bemonolog (bejaku
dalam runding). Pengelandik bejaku enggau diri empu dalam pikir ukai nya muntang. Reti
iya ditu, dikena kitai ngulihka pengelandik nya, kita mesti udah ngemekuhka chara bejaku
enggau ngembuan reti lalu udah kala ninga orang bejaku munyi nya. Semua penerang tu
diselampurka lalu ke simpul iya, penerang sida iya tu bejaku enggau ulah ti bukai beguna
dikena bepikir.

Steinberg enggau Chen nyakal penemu sida behavioris. Seduai iya nerangka pasal
siku anak mit ti tachat meretika jaku tang iya empu enda nemu bejaku. Bisi siku anembiak
Jepun berumur 3 taun ti bisu ari ada tang iya ulih ninga. Iya mereti nama utai ti dipadahka
ngagai iya. Tu nunjukka anembiak ngelala sereta meretika jaku lalu nunjukka iya ulih bepikir.
Ari pansik tu tadi, runding ti bisi ba dalam untak enda bepegai ba pengulih rengka dikena
bejaku laban anembiak nya nadai rengka ti tau ngasuh iya nyadaka nyawa kena bejaku.

Nangkanka nya tadi, penerang senentang bepikir sereta bejaku seretai mega dikena
nyakal penemu teori behaviorisme. Ambika chunto, siku lelaki benung bejaku pasal gambar
ti dipeda iya tang dalam runding iya mikirka utai bukai. Lelaki nya ulih bula ke pangan ke
enggau iya bejaku nya laban nya ba runding iya empu, semina iya aja nemu. Ari situasyen
nya tadi, dia dua iti proses ti nyadi, lalu isi iya pun enda sebaka tang nyadi seretai. Tang sida
behavioris madahka dalam pikir tu semina bisi bejaku sechara monolog aja, nadai berunding
ke utai bukai. Situasyen nya tadi enda engkeman enggau konsep behavioris. Bula tu mih
nyadika siti penanggul ti ngasuh penemu behavioris tu enda entu ulih diterima.

Ke simpul jaku, teori behaviorisme tu enda salah tang iya nitih baka ni maya kitai tau
ngena teori tu. Iya mesti engkeman enggau konsep teori tu.

5
6.0 PENERANG TI NYAKAL ENGGAU NYUKUNG TEORI MENTALISME

Penerang ti keterubah iya dikena nyukung teori mentalisme tu senentang ngamatka jaku
(kejujuran). Enti nyema aku berutang enggau siku individu lalu madahka aku deka mayar
utang aku pagila. Enti sema aku enda jadi mayar utang aku nya, ketegal aku enda ingat lalu
lebuh aku nyebut madahka diri deka mayar, aku sigi bisi niat deka mayar utang nya. Ba
konsep mentalisme, penyalah tu enda tau dikumbai enda ngamatka jaku (ketidakjujuran).
Taja pia, penyalah tu tau disebut enda ingatka utai tauka enda betanggungjawab (lalai).
Laban maya aku nyebut jaku pagila aku mayar utang ngagai nuan, aku sigi amat-amat deka
mayar. Ari penerang tu teori mentalisme tu sigi bebida ari teori behaviorisme ti madah
pengawa ti enda nyadi mayar utang nya iya nya penyalah enda ngamatka jaku, enda ngira
niat jaku aku ti ka mayar utang nya. (Steinberg, 2004).

Kelimpah ari nya, siti agi chunto penerang dikena nyukung teori mentalisme. Konsep
mentalisme ulih diterang ngena pengawa bakatu. Ini aku siku ari orang rindu nganyam tikai
bebuah. Malam siti, iya bemimpi nganyam buah tikai ti enda kala digaga enggau enda kala
dipeda iya. Lebuh iya dani tinduk, iya ngingatka mimpi nya lalu nganyam buah tikai nitihka
utai diasai iya dalam mimpi iya malam nya. Utai baka tu sigi amat ulih nyadi. Tang utai tu
mina ulih diterang ngena mentalisme tang enda ulih diterang ngena konsep behaviorisme.
Kebuah pia, laban behavioris enda ulih nerang pengawa ini aku ke bemimpi nganyam buah
tikai lalu ulih ngaga nya nitihka utai ti diasaika iya dalam mimpi.

6
7.0 SIMPUL PENEMU

Kita udah terang pasal Teori Behaviorisme enggau Teori Mentalisme. Kena nerangka iya
enggau lebih nyentuk agi, Teori Behaviorisme tu bisi bekait enggau stimulus-stumulus.
Nama respon ti digaga ngena rengka tubuh ngagai siti siti situasyen. Nyadi, enti nitihka
teori behaviorisme, kitai diperatika ari ulah kitai. Niat, pengasai ati tauka nama-nama mih ti
dalam untak kitai sigi enda dikira. Teori tu ngemeratka fungsyen psikomotor.

Taja pia, dalam Teori Mentalis, kitai ngena proses mekanikal ari mental. Nama ti jadi
ba mental nya tau meri biuh ngagai proses belajar tauka ngulihka pengelandik kitai mensia.
Kitai tau mega bulih penemu ti baru enti nitihka teori tu. Teori tu mega madahka niat kitai enti
kitai ngaga pengawa.

7
8.0 KEREBAN SANDING

Steinberg, D. D. (1990). Psikolinguistik: Bahasa, Akal Budi Dan Dunia. Kuala Lumpur:
Dewan Bahasa Dan Pustaka

James, S. L. (1990). Normal Language Acquisition. Wisconsin: University of Wisconsin


System Madison

Mok Soon Sang (2014). Psikologi Pendidikan. Puchong: Penerbitan Multimedia Sdn. Bhd.

Owens, R. E. Jr. (2004). Language Developmet: An Introduction. New York: University of


New York Geneseo.

Siti Hajar Abdul Aziz (2008). Bahasa Melayu 1: Siri Pendidikan Guru. Shah Alam: Oxford
Fajar.