Sempama Jaku Iban

Sempama tauka empama nya jaku pandak ti tebilang ti bisi ngundan jaku ajar (Bup
Serba reti:2011), enda terang, belalai, besema,besilup, besuruk tauka beentelah (Jaku
Dalam:2006). Dalam bup Jaku Dalam ti dikeluarka Tun Jugah Foundation madahka
sempama nya sebagi ari jaku dalam.

Penatai Sempama
Nadai udah bisi pansik ti nyata senentang asal penatai jaku sempama Iban lalu
pengelama iya udah dikena dalam jaku Iban. Taja pia sempama jaku Iban ti dikembuan
sereta dikena kemaya hari tu nya endang lanting ari aki ini Iban kelia.
Laban ke suah pindah ari sesebengkah menua lalu betemu enggau mayuh macham
bansa enggau jaku dia orang ke tuai-tuai kelia lalu belajarka gaya bansa bukai ngiringka
rayat sambil meratika chara ngidupka diri ngena jaku ti menyana, ti meruan tuju dikena
nyuluk penyerakup. Belalauka ari pengawa ke meratika gaya orang bukai, dia tuai-tuai
Iban kelia ke tajam runding sereta jauh perening nguji nengkebangka jaku basa ti tau
dikena meri ajar enggau lalau ngagai anak buah.
Nya alai sempama dipelabaka ditengkebang orang kelandik beratika ulah utai idup
lebuh bejalaika pengawa baik iya di babas taukadi rumah. Nitihka bup Jaku Dalam
(2006) madahka sempama tu ditengkebangka mensia ketegal ke begulai dalam mayuh
tingkat pengidup baka orang ke umang, orang kaya, orang ke bepangkat, bala ke
sengapa orang, sida ke nyadi pengarang penemu ke beberita sereta tebangkar sida ke
landik bejaku enggau raban lemambang ke tebilang.
Sempama dalam budaya Iban endang diangkat belalauka budaya Iban kelimpah ari
raban bansa bukai ke diau besaruk pendiau enggau sida. Iya mega tau datai ari penemu
raban bansa bukai ke didinga tauka dibacha. Ketegal ti udah lama dikembuanka bansa
Iban, sempama tu udah nyadi reta tengkira rayat Iban laban nama orang ke
nengkebang, ngemun tauka ngaga sempama nya udah enda ulih temu agi.

Reti Leka Jaku Sempama

Munyi ti udah diterang ba genteran keterubah sempama nya ngembuan jaku ti tebilang.
Dalam jaku Iban, sempama tu siti ari leka jaku ke besai bendar reti, mungkur besai
bendar rampa sereta dalam bendar reti. Iya mungkur leka jaku kelaung tauka silup, jaku
sema tauka jaku banding,jaku tapis, jaku karung enggau jaku dalam rama (Jaku
Dalam:2006).
Jaku sema nya jaku dikena nyema tauka mandingkautai. Leka jaku ti suah dikena ba
pun rambai jaku sema nya baka enda nyalah-nyalah baka, itah enda baka, asai, baka
enggau munyi. Reti jaku sema dikena madah ka ulah mensia ke dikenang. Ambika
chunto asaiti dipandam dada, baka ke enda makaiasi, munyi ke ngempas pitan atap.
Jaku silup tau mega dikumbai jaku kelaung. Jaku tu enda terus tang bekarung
ngambika iya enda mantang lalu manah didinga. Jaku silup tauka jaku kelaung suah
enda berambai, enda betimbal lalu kekadang ngembuan seleka tauka dua leka aja. Jaku
silup tauka jaku kelaung suah dikena bala Iban ba endur tauka menua ti agi latung, agi
kudi. Tuju ngena jaku kelaungnya ngambika pejalai maya nya enda jelungan.

Chunto jaku kelaung matahka lengan, begantung randu

Kadang-kadang sempama semina ngundan seleka leka jaku, dua leka, tiga leka tauka
mayuh agi. Peratika chunto di baruh tu:

Seleka leka jaku ngirit, sarat, kulat

 Dua leka leka jaku achuk rangkang, betubuh bisi,chabi padi

Tiga leka leka jaku angat tai manuk, makai buahemperingat, nganyil baka tawir

Rambai jaku tauka ayat angat asai chabi, asai ti deka tingkil atau, bakake meda
balak mentua, munyi burungmakai buah kara

Segenteran angkat nyeriat baka singut lalat ninggalka idang; angkat bepipis
bakaangkis ninggalka lubang; angkat bejung baka semut lutung niti serambung
jalaipetebang.

Kebuah Orang Iban Besempama

Orang Iban besempama ngambika ngayanka penalam enggau pemesai basa lebuh ke
begulai enggau pangan diri, diri serumah, diri semenua tauka lebuh ngambat penatai
temuai. Sempama tu baju basa ti diajar apai indai ngagai bala anak sida. Adat
besempama nya adat basa ti endang dititi temali ari aki ini raban bansa Iban kelia.
Sempama ulih dikena apai indai ngajar tauka meransang anak sida baik dalam ulah
tauka dalam pelajar sekula. Sekeda chunto sempama ti ulih dikena bala apai indai
meransang anak sida baka genggam bara api datai ke nyadi arang tauka baka tekura
enggai enda tepantup ba bandir. Bala tuai mega ngelalau tauka meri jaku tangkan
ngagai anak nembiak sida ngena jaku sempama. Sekeda sempama tau dijadika jaku
tangkan dikena ngelalauka pendiau, ulah pengawa enggau jaku mensia siku-siku
awakka enda tekelalu lunggar.

Peratika chunto di baruh tu:

1. Anang baka kera naruk
2. Titih ka ulah ti manah baka daun tangkup-daup

Bansa Iban tebilang dipuji bala temuai ti niki rumah panjai. Iban nadai kala enda nuduk
sereta nadai kala enda ngelaluka penatai temuai. Pemanah basa Iban enggau temuai
ulih diperatika ari jaku ti dikena lebuh ngelalu tauka betemu enggau temuai.

Uji peratika pemanah basa Ibanenggau temuai baka chunto rambai jaku dibeurup
chundung ke diberi ditu:
1. Tak salah munyi tanya tu, kati udah ngintu diri kita sebuat tadi punggal?
2. Makai unggal, panjaika jari, anang malu.
3. Uji agi kauk lauk kitai dia Indai Endun, nyau rapas bendar tu.

Sempama mega kadang-kadang dikena nyindir pangan diri. Kadang-kadang sempama

sindir tu tau bendar ngujungka laya kelebih agi ba sida ke indu ke jampat agi bebalas
sindir.

Sekeda chunto sempama ti tau dikena nyindir pangan diri baka:-

1. Nanam tubai langkung
2. Landik ngelamun tai diri baka mayau

Ngagai orang ke enggai mantaika penyumbung diri jaku sempama dikena sida madahka
penadai penemu diri. Sempama ti baka tu selalu dikena orang ke bepenemu madahka
penadai penemu diri.
Chunto:
1. Nibar jala enda betating
2. Baka terebai kubung enda besayap

Lebuh ke begulai enggau pangan diri tentu ulah siku-siku enda sama. Bisi nya rindu
ngemaruhka diri taja pan bisi penemu lalu bisi nya orang ke begah-begah bejaku tinggi
ba mua mayuh. Orang ke suah begah-begah baka tu suah ditelanjaika orang ngena jaku
sempama. Sempama ti baka tu tau dikumbai sempama kelese. Tuju iya dikena ngajar
orang ke begah-begah ngambika iya tau nukar perangai diri dudi hari.
Chunto sempama baka tu:
1. Kemaya kala ninga ingkat ke laut.
2. Enda nemu seling kain

Sempama mega dikena mantaika pengeringat enggau pemedis ati diri. Sempama ti
baka tu dikena mantupka pengeringat tauka pemedis ati ketegal pemalu ari dikelanyai
tauka dikeleseka orang kelebih agi ba mua orang mayuh.
Chunto:-
1. Ketinga aku mih nuan enda umbas
2. Agi bau lia udah nemu ngeninggika diri

Sempama mega tau dikena meri peransang ngagai orang bukai. Semacham agi
sempama nya meransang orang awakka berani ngereja pengawa ngambika nadai
pengekang.
Chunto sempama baka tu:
1. Anang agi ingatka periuk
2. Nadai orang kala beranakka kitai dua kali

Bisi mega sempama dikena ngenakut tauka ngenenduka ati orang ke deka ngereja
pengawa ti disadang tau meri penusah ngagai iya tauka kaban iya ke bukai.
Ambika banding: -
1. Enggai betajauka orang
2. Ngambi kayu dikena mangkung pala diri

Mensia suah bendar nampung berita ngena jaku diri empu. Lebuh ti nampung berita
orang suah bendar ngelangkungka berita ti dikenataika nya ngena jaku diri lalu ditambah
ngambika manah didinga.
Ambika banding:-
1. Ruang belakang tau alai enseluai betanjak
2. Mata nyau baka buah kundung

Kelia menya lebuh menua agi latung, sempama dikena ngelaung nyebut nama jelu,
burung, antu tauka utai bukai ti mangah. Ambika chunto:

Utai ti terebai

Utai malam,

Utai ti panjai enggau ti bukai.

Kelimpah ari nya, sempama mega dikena ngelaungka utai ti bendar. Tuju ngena jaku
kelaung ngelaung nyebut pengawa ti deka dikereja enggaika jelungan tauka puni.
Sekeda chunto tu nyengkaum: bemain di ai, matahka lengan, pansa bulubabas, urat
kayu

Iban mega baka bansa bukai lebuh ti tekelanjur jaku, sida mega minta ampun ngagai
orang ti udah nyima ati ninga jaku sida. Nya alai jaku sempama tau mega dikena
ngampun ketegal tekelanjur kaki tekelanjur jari.
Ambika chunto baka:
1. Baka mulung tau dikuil tau dilinut
2. Baka manuk nyurukka patuk nyurungkka patung

Lebuhbejaku ba mua mayuh raban bansa Iban ngena jaku besebar sebedau mansutka
penemu diri. Kebuah pia laban Iban balat bendar bebasaka peninga sereta suah bendar
ngemaruhka diri ba mua mayuh.
Peratika chunto tu:-
1. Mantap bemban batu ngemaluka mua diri empu, mantap bemban ai ngemalu mua diri
2. Baka buah kubal mansau ulih nenchang, baka buah nangka mansau ulih ngerumbang

Orang Iban mega ngena jaku sempama lebuh ngelaung nyebut pengawa ti deka
dikereja laban enggaika jelungan tauka puni. Jaku ti baka tu suah agi disebut
jakukelaung. Ambika banding sekeda chunto iya nya baka:-
1. Bemaindi ai
2. Pansabulu babas

Sempama mega dikena raban bansa Iban nyemaka gamal, ulah, pengawa enggau
pendiau mensia. Kelia lebuh sempama baka ti dikena terang bendar nandaka budaya
Iban ngemerat adat basa lebuh deka nyemaka gamal, ulah, pengawa enggau pendiau
orangke dipeda sida. Chunto:-
1. Baka kera ke disapi enggau belachan
2. Baka gerama ti ngirit sepit

Sempama mega dikena nunjukka Iban endang bisi pengarap asal. Sebedau datai
pengarap baru baka pengarap Kristian, Bahai enggai Islam, Iban endang udah
ngemeranka pengarap. Pengarap Iban beseruanka burung enggau mimpi. Nya alai
semua pengawa Iban endang bepun ari burung enggau mimpi. Chunto sempama ti
nunjukka pengarap asal nya baka:-
1. Anang mayuh mulut.
2. Antu berumah baruh dagu.

Kepenudi bendar, sempama dikena bansa Iban ngenanka adat bansa diri ngambika
ditemu orang bukai sereta mega nyadika pengelala bansa. Ambika chunto:
1. Biar mati anak, anak mati adat
2. Bejalai betungkatka adat, tinduk bepanggalka pengingat.

Maya Orang Iban Besempama

Orang Iban nadai betatak enti deka besempama. Reti nya sempama tau disebut
sebarang maya. Tang taja pia bisi mega maya orang balat bendar begunaka sempama
iya nya sempama ti dikumbai jaku tapis baka lebuh bisi pengawa melah pinang, gawai,
maya orang bisi rabat lalu lebuh ngambat penatai pemesai baka menteri tauka pengari
rayat.
Ba sekeda endur, orang balat bendar bekenaka sempama jaku tapis dikena bebuti
enggau pangan diri lebuh bisi pengerami baka maya melah pinang. Enti pengawa
tumansau, iya tu tau belabuh ari ngalih hari nyentuk ke dini hari. Sempama karung
dikena maya pengerami lebih agi maya nanya indu enggau melah pinang. Sempama
karung tu panjai. Tuju besempama lebuh nanya indu ngambika pedis diperatika orang ti
dilabanka kitai ke bejaku. Lebuh bisi pengerami bukai, ai ansah nya sebagi ari jaku ti bisi
ngundan jaku sempama. Ai ansah ti dikena bala Iban betundi bebuti enggau pangan diri.
Tuju iya dikena meransang sereta ngelanchamka runding pangan diri awakka enda
sanggu mansutka penemu diri.
Lebuh bisi pengawa begawai, dia lemambang ke diasuh orang mengap tauka nimang
balat bendar betusunka jaku sempama dalam leka main sida. Lebuh ngintu Gawai Antu,
orang ke empu rumah selalu bisi pengari ngetanka ruai lebuh bejakuka kujuk panggang.
Lalai panggang pan balat bendar nguna jaku tapis.
Peratika sebagi ari chunto: -
Nya alai laban kitai diatu udah duduk udah besaruk, udah duduk besila betunga mua,
patut bendar ga kitai ngeleka ka sempama berengkah bungah. ...
Sempama mega dikena orang Iban lebuh ngaluka Petara. Tiap-tiap bansa gawai ti
diintu bansa Iban endang bisi pengawa ke ngaluka petara nya bejalai niti ruai. Orangke
udah dipadu duduk ari atas, nya orang ke dipadu nyadi petara lalu suah nanya orang ke
bejalai niti ruai nya ngena jaku tapis. Siti ari chunto dalam genteran jaku tapis nya baka
tu.
Tang ke tu indah enda baka kitai ke makai buah ilang ilu, enda diempa parai
indai, dipakai parai ga apai...

Sempama mega dikena lebuh berandau ka pemati iya nya lebuh bisi rabat.
Malam ke nyenggai orang lalu bejaku ka pemati. Enti orang ke nemu, jaku ti suah dikena
nya jaku tapis.

Chunto: ...nya alai ke lemai tu naka penusah mih kami serumah, berundingka
penusahke udah nuntung perabung, nuntung pemetung sida sanu tu, putus tali pintu tali
kelambu mih sida tu, pechah benda pechah menaga, karam bangkung rarat bung. ...

Sempama mega dikena bala Iban lebuh ngelantangka ati maya lemai hari, betundi
enggau pangan diri. Kelia menya lebuh radio,televisyen enggau komputer bedau bisi,
pengerindang lemai ti bisi enda baka kitai kemaya hari tu. Siti ari pemerindang nya
beentelah enggau pangan diri.Dulu menya Iban beentelah maya ngereja pengawa
bumai betaun baka maya mantun enggau ngetau tauka maya lepa pengawa lemai hari.
Nyadi entelah tu endang ngipakka sama endang disilupka semua enda milih pemandak
tauka pemanjai.
Nya baka penerang senentang sempama jaku ti peturunka bala aki ini raban bansa
Iban ngagai bala anak, bala uchu ambu kemaya hari tu. Sekeda sempama nya agi
bendar dikena bala Iban lebuh nempa lagu bisi mega dipasukka dalam turai matapelajar
jaku Iban ngambika serak Iban kemaya hari tu sereta jemah ila mengkang nemu jaku
sempama, reti iya sereta jalai iya dikena dalam jaku ngambika bisi lalu terus nyadika
pengelala bansa Iban.