BAHAN KOTBAH JUMAT AGUNG 14 APRIL 2017

NATS : MARKUS 15:22-41

TEMA : JESUS DO NAPALUAHON HITA

PATUJOLO
Hamatean ni Jesus Kristus ido puncak sitaonon napaujunghon panghophp laho
patulushon sangkap haluaon dibahen Debata. Disangkapi Debata dalan laho patuduhon holong
no rohaNa tu jolma naung madabu tu dosa, ai marpangulahi do rohaNa, ndang lomo roha ni
Debata mago, mandao jolma I sian ibana, sai dipanghulingi, dipaingot jala dijou marhitehite
napinabangkit jala disuru angka panurirangNa marsuarahon asa mulak muse jolma I mananda
lomo ni rohaNa, Asa mardalan, mangolu hombar tu lomo ni rohaNa.

HATORANGAN NI TURPUK
Nunga tangkas halak Parise, saduse, siboto surat laho manulak Jesus jala marsangkap
laho mamunu marhite namarpasilanghon, Rencana natersusun rapi do dibahen nasida laho
patangkuphon jala sahat tu di parsilanghon Jesus. Tangkas do diaturhon nasida partingkianna
dohot cara nang inganan naung diparade nasida, Diproses songon terhukum agama dohot
pemerintahan songon tanda penolakan keras jala jelas direkayasa hape soadong dapot
hasalaanNa, hape laos disi do dalan ni Debata laho patulushon sangkapNa laho paluahon jolma I
sian dosa. Ndang adong dalan na asing ia so marhite hite haroroNa tu portibion dohot hamamate
ni Jesus Kristus.
Di padan narobi nunga disuriranghon naingkon masa tu Jesus (Ptds Jes 53:1). Ndang
adong pembelaan, langsung do eksekusi mati jala dipertontonkan tu situan natorop sian mulai
proses pengadilan sahat tu namamparsilanghon. Ndang natubu di dalan, manang sian roharoha ni
Jesus namasa naniadopanNa. Pelaksanaan na panguhuman tu Jesus nangpe so tangkas adong
hasalaanNa diputushon uhum ingkon diparsilangkon, ima tu sada dolok namargoar Golgata.
Di Golgata: Partangkurahan I ma dipasidung Jesus puncak sitaononNa. Anggo di roha ni
angka namamparsilanghon I nunga sidung be panulakhon nasida tu Jesus, ndang margogo be
ulaon ni Jesus, hape laos marhite nadiparsilanghoni do dipatulus Debata sangkapNa. Jala ndada
holan diparsilanghon boti, alai udut dope angka parungkilon namambahen panghilalaan lam
bernit, dilehon anggur namarsaor mir, asa songon naburju idaon hape na lam mambahen
pangaleaon do. Nunga diparsilanghon alai dohot dope namarbagi angka abitna jala dohot cara
namambahen hailaon tu Jesus. Gabe sitonduron do Jesus so marbajubaju dihau pinarsilang I, alai
laos tudutudu doi naso adong siboanon sian portibion.
Portibion pe patuduhon parsidohoton naso satolop tu harohaon ni jolma pardosa, tano ipe
dohot do manghilala naso tarjalosa angka namasa tu Tuhan Jesus, mangholom sahat tu puncak ni
namasa tu Jesus di pukul tolu i. Jala laos diapala puncak sitaonon I dipapuas Jesus panghilalaan
hajolmaon, natutu situtu do Jesus Anak ni Debata naung gabe jolma. Disuarahon do unok ni
sitaonon naung so tardokNa ia so marsoarahon pangkilalaan naung apala bagas situtu naso boi
tarjalosa sitaonon, molo sian dirina, jala pola dihilala naso rap Ibana dohot Debata molo sangkap
ni Debata do na tu Ibana; boasa ditadinghon Debata Ibana. Alai laos pandohan napasahathon
diriNa do i tu Debata, asa margogo Ibana molo di bagasan pandonganion ni Debata, molo rap
dohot Debata.
Soara napabotohon dohot patuduhon hubunganna tu Debata naso holang, alai mansai
jonok jala bagas situtu naso tarsirang Ibana tu Debata laho mangadopi puncak sitaonon, ndang
sian diriNa laho patupa haluaon alai korban pardengganan sian sangkap ni Debata sendiri do.
Asa ingkon dipaujung do di hau pinarsilang I asa mulak mardenggan hita jolma secara vertikal
dan horizontal, mulak denggan hita manghabiari jala manghaholongi Debata dohot
manghaholongi donganta jolma.

SIPAHUSORHUSORON
Nunga singkop dipatupa Debata pardengganan tu Debata dohot jolma marhite silang I,
tuntas sude, ndang adong nahurang, nunga sae digarar. Beha ma hita laho manghangoluhon I
ndada songon mambalikhon tangan I, alai ingkon siauhononta, sipahusorhusoron ni rohanta do I
ganup tingki. Boha do ahu nasai laon ture hata, langka dohot pangalahonku.
 BAHAN KOTBAH PESTA PASKAH I 16 APRIL 2017

NATS : JOHANNES 20:1-18

TEMA : BARITAHON MA HAHEHEON NI TUHAN I

PATUJOLO
Peristiwa haheheon ni Tuhan Jesus sian na mate, adong do tolu halak sebagai saksi di turpuk on na
langsung marnida naung tarhindat pintu kuburan ni Jesus I, I ma:
1. Maria Magdalena na hea dipamalum Jesus parsahitonna dohot sian pitu tondi na hodar (Luk 8:2). Ala
hamamalum ni parsahitonna gabe porsea ma ibana tu Jesus, laos dipangke ibana ma nang hamoraonna
laho melayani Jesus.
2. Petrus, I ma sahalak sisean na hatop jala muramura bertindak. Tarida do I sian sikap ni si Petrus na
pintor masuk tu kuburan ni Jesus laho mamereng na masa disi. Na bertindak holan mamangke logika
(pikiran), alai jotjot ndang diatusi ibana lapatan peristiwa na niida na i.
3. Johannes, sahalak sisean ni Tuhan Jesus na so pola gegabah. Alai manat do ibana marpingkir,
dirimangrimangi na masa I, gabe tarsingot jala diantusi ibana na niida na I, naung hehe Jesus sian na
mate songon naung hea dipaboa Jesus tu angka sisean andorang rap dope nasida.

HATORANGAN NI TURPUK
1. Dung mate Tuhan Jesus di hau pinarsilang didok si Latus do: jamot ma bahen hamu, jaga hamu,
jala disahapi marhite sahap na masa hatiha I, I ma na dibahen sada tali (rante) na ganjang sian
ujung tu ujung, huhut dijaga soldadu. Dung I dibahen ma disi tanda asa unang bungkaon ni
manang ise. Hape di na ro si Maria Magdalena, diida ibana ma naung magulang batu i. Jala on
ma tanda halongangan na masa na dipatupa Debata di haheheon ni Tuhan Jesus. Na marlapatan
do I, na mampu do Debata mamangke sude jadijadian ni tanganNa mambahen tanda
halongangan pasauthon tahi ni rohaNa. Marhite na diparenta Debata tu batu I asa bungka din a
hehe Jesus sian angka na mate, jala lari hatahutan do angka penjaga i.
2. Angka saksi mata do na mamaritahon barita haheheon ni Jesus, na tarsurat di Evangelium si
Johannes on. Diawali sian parnidaan ni si Maria Magdalena naung tarhindat batu na manutup
kuburan ni Jesus na mambahen tamba jut roha ni si Maria. Ai tolu ari dope dung mate Jesus,
hape tarbege muse barita tu angka sisean naung mago bangke ni Jesus sian kuburan i. Ndang
mago dope arsak ni roha angka sisean di hamamate ni Jesus, ditambai dope barita taringot tu
bangke ni Jesus na so adong di ingananna. Ndang tarjalo roha nasida na masa I, siala ndang
porsea dope nasida hatiha I taringot haheheon ni Jesus sian na mate (lupa dihata ni Jesus, na
hehe do Ibana muse di ari patoluhon). Umbahen na masa pe songon I di roha ni angka sisean, ai
peristiwa hamamate ni Jesus dope na manggohi roha nasida.
3. Rangkuman barita na uli dihalak na porsea, I ma naung mate Kristus siala ni dosanta, tartanom,
(tuat tu bonaua toru), jala hehe sian na mate hombar tu na tarsurat I. saluhutna I songon
gombaran hagogoon ni Debata do na patupahon i. Ndang margogo alam laho mambatsi huaso
ni Debata jala ndang marhuaso alam laho pahehehon Kristus sian na mate, justru Debata do na
pahehehon Jesus songon pataridahon huasoNa tu alam paboa na Ibana manompa saluhutna i.
Haheheon ni Jesus sian na mate I patuduhon, laos disi do letak hagogoon ni Debata. Heheon ni
Jesus I do naung mangalehon hagogoon jala paluahon angka na porsea tu Debata. Haheheon ni
Jesus I do nang bona ni Padan Naimbaru ni Debata tu saluhut hajolmaon dohot tu na tinompaNa
di portibi on songon tumbal perdamaian.

SIPAHUSORHUSORON
Haheheon ni Tuhan membawa suatu makna na imbaru tu angka na porsea. I ma songon
jembatan padomuhon jolma pardosa hian gabe boi marsaor dohot Debata dibagasan holong ni Debata.
Dohot mematahkan huaso ni sibolis na laho manegai parasoratnta dohot Debata.
Haheheon ni Tuhan Jesus mentransformasikan jolma pardosa, gabe anak hasian di jolo ni
Debata. Ala ni I, asa hehe ma jolma pardosa I, unang lalap di angka ulaon na manghorhon dosa na boi
manegai parsaoran dohot Debata.
 BAHAN PARTANGIANGAN

NATS : 1 PETRUS 1:3-9

TEMA : HAMONANGAN NI KRISTUS

PATUJOLO
Ala parborathu sitaonon na niadopan ni halak Kristen na parjolo I, adong sian nasida na mandele.
Ala posi dohot jorbut ni pangaleleon na nialaman ni huria na parjolo gabe mandele jala mago
panghirimon sian roha nasida. Diorai panggomgomi harajaon Rom halak Kristen na parjolo I
marsomba tu Jesus. Manang ise na tardapot marsomba tu Jesus dipusa manang dipasiaksiak. Laho
mangapuli dohot paposhon roha ni huria na parjolo I, ditongos surat on, anggiat pos rohanasida jala
marpanghirimon di sitaonon.

HATORANGAN NI TURPUK
Ala borat ni pangaleleon na dialan ni huria na parjolo, mandele jala disoadahon nasida Kristus.
Dipasisi na torop halak Kristen na parjolo iala asing parngoluan nasida sian parngoluan ni na torop. Ala
asing parngoluon nasida sian parngoluon ni na torop diparoaroa Jahudi nasida tu panggomgomi. Alani
ma dipasiaksiak panggomgomi ni harajaon Rom halak Kristen na parjolo i. Laho patoguhon
haporseaon nasida didok panurat on, Pinuji ma Debata, Ama ni Tuhanta Jesus Kristus, naung
manubuhon hita panduahalihon, sian godang asi ni rohana, marhitehite haheheon ni Jesus Kristus sian
angka na mate, asa marpangkirimon na mangolu hita, Ay.3. Diarahon halak Kristen na parjolo I mamuji
Tuhan I ala dipaimbaru panghirimonna marhite haheheon ni Jesus. Disungguli huria na parjolo I asa
unang mandele alai marpos ni roha jala marpanghirimon, ala nunga ditaluhon Jesus hamatean I, ala
nunga monang Ibana maralohon sibolis i.
Sanga do mandele sisean ni Jesus ala mate Ibana. Ala hamamate ni Jesus mago panghirimon
dohot pos ni roha sian sisean i. Alai dung hehe Jesus mulak panghirimon nasida. Panghirimon, I ma
panagamon di angka sijaloon manang siteanon . Alani panagamon di na tinagam I tubu hiras nu roha,
nang pe maol jala borat sidalanan laho mangeahi. Isarana sahalak atlit, ala manghirim di medali dohot
kejuaraan ringgas jala hiras ni rohana mandohoti latihan asa boi monang di pertandingan i. Tudos tusi
do parngoluan ni halak Kristen. Ragam parungkilon bolusonna asa sahat tu hasonangan i. Alai nang pe
ragam parungkilon diadopi mangeahi hasonangan I hiras do rohana mandalani I ala nunga rade di
jolona tumpal hamonangan i.
Mangihuthon sisean I, nunga tammat riwayat ni Jesus ala mate Ibana. Alai dung hehe Jesus
gabe porsea nasida di sude hata ni Jesus naung dipasahat tu nasida andorang so tarsilang ibana. Dung
mate Jesus, sanga do tubu panghilalaan di roha ni sisean I, Ndang margogo Jesus. Moru pos ni roha
nasida di Jesus. I do umbahen maol nasida porsea naung hehe ibana. Alai dung hehe Kristus porsea
nasida na gumogo do Jesus di sasude. Gumogo do Jesus sian sasude ala hamatean I pe boi ditaluhon.
Jesus do na gumogo, ndang portibi on, I do na pinapatar ni haheheon ni Jesus.
Domu tusi do na nidok ni si paulus di Ayat 5, Ai diramoti do hamu hinorhon I gogo ni Debata
marhitehite haporseaon, asa sahat tu haluaon, naung rade sipapataron di tingki na parpudi I. Marhite I
naeng dohonon ni Apostel Paulus tu huria na marungkil I, pos ma rohamu diramoti Debata do hamu
dibagasan hagogoonNa marhitehite haporseaon. Molo porsea nasida di Debata, paluaonna do nasida
sian parungkilon i. Molo pos rohanta di Tuhan I patuduhononNa do dalan paluahon hita. Alani porsea
ma hita.Amen.

SIPAHUSORHUSORON
Sihirimon ni na porsea ndada holan ngolu saonari, ndada hamoraon, hepeng na mura salpu i.
Umbalga jala ummarga sian I do, I ma ngolu na manongtong. Didok Apostel Paulus, Anggo holan di
tano on do hita manghirim di Kristus I, jolma na dumangol do hita sian saluhutna. Jolma na dumangol,
ala pandelean dohot hamatean do dihorhon panghirimon di arta dohot di hasonangan portibi na mura
salpu i. Panghirimon ni halak Kristen,Adong do ngolu di balik ni ngolu on. Ala panghirimon na
songon I, ndang mura mandele, alai benget ala dibalik ni na hansit dohot halojaon I nunga dipadiri
Kristus las ni roha.
 BAHAN KOTBAH, 23 APRIL 2017

NATS : PSAL 16:1-11

TEMA : HUASO DOHOT HAMONANGAN NI KRISTUS

PATUJOLO
Quasimodogeniti, songon posoposo na imbaru tubu ma hamu, uasan di susu na tama, asa lam
magodang hamu; I do goar ni minggu on, minggu dung Parningotan haheheon ni Tuhan Jesus.
Dipangido goar ni minggu on asa lam magodang na porsea I, di haporseaon. Dipangido asa songon
poso-poso I hita sai uasan di susu na tama. Uasan poso-poso disuse na tama ala tergantung ngoluna tu
ASi air susu ibu. Marhite asi do bosur poso-poso, marhite asi do magodang, matoras poso-poso
mangalo bakteri penyakit. Tudos tusi ma na porsea I ingkon tarihot ngoluna tu Jesus marhite hataNa
asa lam matoras haporseaonna jala margogo mangolu musu ni haporseaonna.

HATORANGAN NI TURPUK
Diayat 2 dohot 8 didok, : Ho do Tuhanku, ndang adong hasonanganku dungkon ni Ho. Ho
do Tuhanku, ndang adong hasonanganku Tongtong do hubahen Jahowa tu jolongku, ai molo
disiamunhu Ibana, ndang tagamon humordit ahu. Jahowa do dijolona lapatanna Jahowa partogina,
Jahowa Panguruanna, Jahowa siihuthononna dohot Jahowa na mangatur ngoluna. Ndang dipudi
dibahen Jahowa alai dijolona. Jahowa di siamunna, marlapatan, Jahowa pos ni rohana, hagogoonna,
ulubalangna, haporusanna; Angkup ni I, lapatan ni pandohan di jolo dohot di siamun, tongtong
Jahowa dibahen di jolo dohot di siamun. Ndang holan di tingki ringkot dibahen Jahowa di jolo, alai
torus manorus, ndang marombasombas; ndang holan di arsak ni roha, di las ni roha pe dioloi do Tuhan
I.
Didok ayat 10, Ai ndang tagamon pasombuonmu tondingku di banua toru, ndang tagamon
loasonmu hasianmu marnida habusuhon. Dipatuduhon I do na so holan Tuhan Jesus hehe sian na
mate, alai dohot do angka na porsea i. Ndang hamatean I be ujung ni pardalanan ni ngolu ni na porsea
di Tuhan Jesus. Ndang loason ni Tuhan I bonom di banua toru angka na porsea I, paheheonNa do muse.
Domu tusi do na nidok ni si Paulus, Alai anggo so adong haheheon ni angka na mate, ndang na hehe
nang Kristus. Ai anggo so dipahehe angka na mate, ndang tutu hehe nang Kristus I. Haheheon ni
Tuhan Jesus do Patujolo ni haheheon ni angka na mate. Huaso dohot gogoNa sahat do manorusi ngolu
ni na porsea I nang dung mate jolma I, na pahehehon hita songon Ibana naung hehe i.
Didok di ayat 11, Sai pabotohononmu do tu ahu dalan hangoluan, sun ma las ni roha di adopan
ni bohim, angka hasudungan ni roha masa di siamunmu salelenglelengna. Sada do na sai talului jala
tapareahi i ma hangoluan. Godang do soara di portibi on mandok, On do dalan hangoluan; Disan do
dalan hangoluan. Songon on do bahenon asa dapot hangoluan. Na asing mandok, marhite hepeng
dohot arta asa do dapot hangoluan. Na asing mandok, marhite parbinotoan na timbo do dapot
hangoluan. Hape torop do angka na dapotan na songon I na manghilala na so dapotsa hangoluan.
Godng na hurang di ngoluna.
Na boi haposan mangalehon hangoluan holan Jesus Sipaluai do. Singkop jala rimpas do
hangoluan silehononNa I jala marhaujungan di bagasan las ni roha. Alai tutu, sipata suhar do tu roha
pangalehonNa di dalan hangoluan i. Didok di Mateus 7:13-14, Bongoti hamu ma angka harbangan na
gogot I; ai ruak do harbangan jala lambas do dalan na tu hamagoan, jala torop do angka na bongot sian
I. Alai na hopit do ia harbangan jala gogot do dohot dalan na tu hangoluan, jala otik do halak na
jumangan I.

SIPAHUSORHUSORON
Diarahon Psalm on do asa tapuji Tuhan I ala dipaimbaru panghirimonta marhite haheheon ni
Tuhan Jesus. Disungguli hita asa unang mandele alai marpos ni roha jala marpanghirimon, ala nunga
ditaluhon Jesus hamatean I, ala nunga monang Jesus maralohon sibolis i. Sanga do mandele sisean I ala
mate Jesus. Hamamate ni Jesus mambahen mago panghirimon dohot pos ni roha sian sisean i. Alai
dung hehe Jesus gabe mulak panghirimon I di roha nasida. Panghirimon I ma panagamon di angka
sijaloon manang sitaonon. Alani panagamon I tubu hiras ni roha mangula siulaon, nang pe maol jala
borat sidalanan laho mangeahi i.