Anda di halaman 1dari 4

1.0 Tempalai Pengelandik Mending enggau Bejaku.

Pengelandik sanggah dilah ngembuan dua iti komponen. Dua iti komponen nya pengelandik
mending enggau pengelandik bejaku. Nitihka tusun kronologi, nembiak mit dulu agi belajar
mending sebedau sebedau sida iya belajar bejaku (Asmah Haji Omar, 2004). Penemu tu
disukung Chomsky (1986) ti madahka mensia endang dulu agi belajar mending dulu, udah
nya baru mensia belajar bejaku, macha enggau nulis (Chemaline, 2011). Berindik ari nya,
pengelandik mending mai reti pengulih mensia belematika sereta meretika utai ti didinga
dalam situasyen ti bekaul enggau bejaku. Chunto iya, becherita, bekomunikasyen sereta
bejuraika siti-siti pekara. Kelimpah ari nya, pengelandik bejaku tu mega besangkut-paut
enggau pengelandik mending. Kebuah pia laban definisyen pengelandik bejaku iya nya siti
operasyen mental dikena siku-siku mensia ngambika ulih meri respon ngagai peransang
(stimulus) lalu ngayanka pemereti ngagai peransang. Pengelandik jaku mega mai reti
ngemansutka munyi jaku ti diasilka ari rengka artikulasyen (Chemaline, 2011). Nya alai,
pengelandik mending enggau bejaku bisi dipasukka ba dalam Turai Pelajar Jaku Iban
Sekula Primari.

2.0 Pengelandik Mending enggau Bejaku dalam Turai Pelajar Jaku Iban Sekula
Primari.

Nitihka Turai Pelajar Jaku Iban Sekula Primari, pengelandik mending enggau bejaku
dikemekuhka bepun ari tikas sekula primari ngambika nembiak sekula primari ulih ngayanka
pemereti diri lebuh mendingka teks tauka randau. Sida mega tau ngelala munyi, nyebut leka
jaku, frasa enggau ayat ngena intonasyen ti engkeman nitihka konteks. Ba tikas satu sekula
primari, nembiak deka belajar mending lalu meri respons ti engkeman enggau stimulus.
Beduduk ari nya, nembiak ulih nyebut, nyerenih sereta nemu midaka munyi leka jaku.
Nembiak ditagaka deka nemu nyebut leka jaku ngena intonasyen ti betul kena ngenataika
reti leka jaku nya enggau betul. Chunto iya nembiak ulih midaka leka jaku ti bisi ngembuan
glotis baka mata (rengka tubuh) enggau mata (bedau mansau). Nangkanka nya,
pengelandik mending enggau bejaku dipasukka ba Turai Pelajar Sekula Primari awakka
nembiak tau ngambi bagi ba kaul besehari-hari. Ambika chunto, nembiak nemu ngena jaku
tabi basa sereta ngenataika tuduh penemu tauka peminta enggau siru. Nya mih pengelandik
mending enggau bejaku tu nyadika pelasar kena ngemekuhka pengelandik jaku ba nembiak
berengkah ari sekula primari.

1
3.0 Tisih dalam Pengelandik Mending enggau Bejaku

Pengelandik jaku tu begunaka siku-siku individu nyengkuran runding senentang nama ayat ti
deka dipansutka sechara spontan ti engkeman enggau pekara ti deka dikenataika (Yahya,
2007). Pengelandik sanggah dilah tu nyengkaum pengelandik mending enggau bejaku.
(Mahzan, 2003). Individu ti ngembuan dua iti pengelandik tu tau nyebut munyi jaku enggau
betul nitihka nada enggau intonasyen ti engkeman enggau konteks situasyen. Bepelasarka
dokumen prestasi sekula primari, bisi ngembuan band, deskriptor enggau instrumens. Band
tu siti label dikena nentuka tikas pengelandik ti udah ditusun sechara berurun. Dalam
pengelandik mending enggau bejaku bisi enam iti band. Deskriptor tu nerangka senentang
tikas pengulih nembiak bepelasarka standard ngambika ulih dijapai sereta ditisih. Dokumen
prestasi tu mih nyadika malin pengajar deka nisih tikas pengelandik mending enggau bejaku
nembiak.

Berindik ari nya, pengajar ngena tes dikena nisih pengelandik mending enggau
bejaku nembiak. Tes tu dikena nentuka tikas pengelandik nembiak. Pengajar lalu deka
nguse asil tes kena nentuka pengawa telusur sekalika iya nyeridi tauka nginsur ngagai tikas
ke tinggi agi. Tes ti dikena nisih pengelandik mending enggau bejaku sechara kasar tauka
selampur ulih dipejalaika pengajar ngena aktiviti baka berandau, becherita, main kelulu,
ngena leka main enggau ngaga penerang bepelasarka gambar. Pemanah tes tu iya nya ulih
dikena dalam taga timpuh ti panjai. Aktiviti tu mega ulih dikena nentuka pengulih nembiak
dalam raban tauka sechara selampur. Kelimpah ari nya, tes bukai ti ulih dikena nisih
pengelandik mending enggau bejaku kena nentuka pengulih siku-siku nembiak iya nya
nipak saut ti engkeman, mutarka penanggul, meretika audio, simulasyen enggau projek. Tes
tu seriran agi dikena nisih siku-siku nembiak. Pengajar ulih bemalinka dokumen prestasi
kena nentuka tikas pengulih siku-siku nembiak enggau nemban.

Nangkanka nya, pengajar ulih ngatur tes bepelasarka kereban ti bisi ba internet kena
nisih nembiak baikka iya sechara beraban tauka siku-siku. Tes nya dikumbai tes mendingka
audio. Pengajar deka masang audio leka main nitihka siti tema ti udah dipilih bepelasarka
turai Pelajar Jaku Iban. Sebedau tes dipejalaika, pengajar deka nyediaka siti langgur ti
ngundan strategi, langkah rapat sereta teknik pelajar ngambika ulih objektif dijapai nengah
tes. Penemu tu disukung Tuan Jah (2011) ti madahka strategi ngajar dikena ngelanggur
chara ngajar ngambika ulih nyapai objektif pelajar. Keterubah iya, audio ti dipilih pengajar
mesti engkeman sereta narit ati nembiak. Kebuah pia, awakka nembiak bisi motivasyen
ngaga tes. Keterubah iya, pengajar meri penerang senentang pekara ti patut digaga
nembiak. Pengajar deka masang audio. Udah nya, pengajar nyadung keretas ti ngundan

2
genteran audio ti dipasang. Nambahka nya, sekeda entelian dalam audio dipuangka
ngambika nembiak ngisi endur puang nya. Ba dalam kereja latih aktiviti, pengajar nyediaka
tanya bekaul enggau audio ti dipasang kena nentuka nembiak ulih mendingka leka lagu
enggau manah tauka enda. Udah tembu kereja latih, nembiak lalu dipinta nyebut audio
ngena intonasyen ti betul. Ke simpul jaku, pengajar mesti beambi ulih ngena mayuh
macham teknik belajar tauka tes ngambika tikas pengelandik mending enggau bejaku ulih
diangkatka ngagai tikas ti lebih tinggi agi. Chara nisih mega mesti relevan lalu bisi meri
empas ngagai tikas pengelandik nembiak.

3
Kereban Sanding

Asmah Hj. Omar. (2004). The Iban Language of Sarawak: A grammatical description. Kuala
Lumpur: Dewan Bahasa dan Pustaka.

Chemaline Osup. (2011). Pengelandik Jaku. Bintulu: Pegari Iban Production.

Mahzan Arshad. (2003). Pendidikan Literasi Bahasa Melayu. Sungai Besi: Utusan
Publications & Distributors Sdn. Bhd.

Tuan Jah Tuan Yusof. (2011). Kaedah Pengajaran Bahasa Melayu. Puchong: Penerbitan
Mutimedia Sdn. Bhd.

Yahya Othman. (2007). Mengajar Membaca: Teori dan Aplikasi. Kuala Lumpur: PTS
Professional Publishing Sdn. Bhd.