DINDANG

1. PENERANG
Leka main tu dikena mantai sereta nguji penalam penemu orang ke bedindang
enggau iya ke didindang. Dindang dibagi ngagai dua bansa iya nya dindang dua baris
enggau dindang empat baris.

1.1 Dindang Dua Baris

Pengajar Kami

1. Pengajar kami nama Bangga,

Iya nagajar Primari Tiga.

2. Pengajar kami udu beresi,

Kelas diperesa tiap-tiap hari.

3. Pengajar kami udu mangah,

Nembiak nadai tau salah patah.

4. Pengajar kami balat rajin,

Iya enda rindu meda nembiak bemain.

5. Pengajar kami pandai bekira,

Landik ngajar nulis enggau macha.

6. Pengajar kami tebilang amai,

Enda sanggu magi semua pemandai.

Apai Aku

1. Apai aku nama Digon,

Iya ada ujung taun.

2. Tubuh iya tinggi giai-giai,

Perening iya udu tajam amai.

3. Tumu pagi iya nurun nangkal,

Mai upih tungkus bekal.

4. Pagi nangkal lemai bekebun,

Nanam sayur ke dempa daun.

5. Asil sayur dibagi dua,

Dikena melanja aku sekula.

6. Besai meh pengarap iya ke aku,

Bulih pemandai penemu baru.
7. Ngamatka sempama leka jaku,
Nyamai dudi pedis dulu.
1.2 Dindang Empat Baris

Bukit Stulak

1. Bukit Stulak di Ulu Entabai,

Tinggi gegiai nyuluk remang.
Endur Iban rarika chukai,
Diuluka tuai benama Ngumbang.

2. Bukit Stulak tanda pesaka,

Mar ditiki tusah dialah,
Alai Ngumbang nan ngelaban Rajah,
Ke tanda Iban bisi pemegah.

3. Bukit Stulak balat betebiang,

Dipagar enggau kuta buluh tesap,
Enda alah timbak enggau senapang,
Kuta batang meruan tegap.

4. Rajah alah undur kili,

Ngumbang manjung tiga telian,
Ukai main jaku ransi,
Agi idup agi ngelaban.

5. Rajah mudik mai berunding,

Ngumbang betesau sereta bepadah,
Penemu dudi mai miting,
Badu beperang badu betachah.

6. Penemu udah sama selubang,

Mai bebaik badu bebunuh,
Rajah betabi enggau Ngumbang,
Ke tanda menua badu sabuh.

7. Ngumbang besetuju ngejangka Stulak,

Nitihka danji jaku geran,
Ngiring bala indu nembiak,
Netapka pendiau di Bawang Assan.

Entelah nembiak
1. Patahka kaki,
Patahka jari,
Simpan dalam sentubung.

Ulu lungga: semin china Saut: cheremin mata

2. Pantap enda putus,

Tunu enda angus,
Tumbuk enda ga tekebus.

Ulu lungga: kelai Saut: ai

3. Bunut bebukut,
Tambi ke mutah.

Ulu lungga: burung kubuk Saut: tudung periuk

4. Agi mit bekain,

Udah besai telanjai

Ulu lungga: beluh Saut: buluh

5. Ke ruai mukut apai,

Ke bilik numpu indai.

Ulu lungga: pasu Saut: pintu

6. Mansang begendang,
Pulai ngulit.

Ulu lungga: kayu Saut: labu

7. Bejambul baka china,

Betisik baka naga,

Ulu lungga: getah panas Saut: buah nanas

8. Maya mit mesai sumpit,

Maya ngerembai mesai terabai.

Ulu lungga: bilun tambang Saut: daun pisang

9. Siang begitang di puchuk jarau,

 Malam merembam ba batu anchau.

Ulu lungga: terung Saut: kibung

10. Asi mansau, periuk pechah.

Ulu lungga: basah kening Saut: buah kemunting

11. Segana segitu, belanda tinggal baju,

Ni nuan, tu aku.

Ulu lungga: periuk Saut: ayuk

12. Ada duduk di bangku, ada duduk di bangku.

Ulu lungga: belah batang Saut: buah senggang

13. Pichit di perut, melut mata.

Ulu lungga: sugu pisit Saut: lampu pichit

14. Mulut betemu mulut,

jari enda jenuh ngiga lubang,.

Ulu lungga:Urang nyapu siling

Ngelalaika: Urang nyepu seruling

15. Batang galau mikai,

Langgar akar kemedu tuai
Pagi hari dinga nyawa rangai-rangai,
Munyi dedumbak tawak besai,
Kena ngangauka Ribai,
Betandai mansang ngabang,
Batang tapang chundung,
Dilanggar akar beruru nyengkong,
Tengah hari dinga nyawa kaung-kaung,
Munyi panjung niang Belayong,
Kena langgar batang galau gerunggang,
Batang tapang berdiri,
Dilanggar akar beruru nyadi,
Lemai hari dinga nyawa raie-raie,
Munyi sampi niang Ngumbang gawai kelingkang,
Batang tapang puguk,
Langgar akar beruru bingkuk,
Bedenjang enggau batang galau penduk,
Siang hari dinga nyawa retuk-retuk,
Munyi tutuk indu rajang,
 Batang tapang meragai,
Langgar akar kemedu tuai,
Tawas hari dinga nyawa rangai-rangai,
Beaih apai, beakai indai,
Munyi pemarai niang Badang,
Nyadi menua iya di tanah nempuah,
Baka rumah langkau umai,
Di emperan nyapan mayuh Iban,
Bisi ke mansang bisi ke pulai,
Di kerapa madang bunga
Bisi kayan bisi ga bansa bukai.

Ulu lungga : SAWIN TINGKIL

Ngelalaika: INJIN SAWMILL

16. Panas perenching ujan berenaing

Namaka diayu ka nuan aya?
Kada enda ngayuka aka nuan Keling,
Datai ari tebing ninding,
Banding perenching panas nyang,
Panas bisa ujan nyaya,
Namaka diayu ka nuan aya?
Kada enda ngayuka aka nuan Laja
Datai ari Nanga Temaga Gelang.
Nyadi menua iya
Di tanah kampung jerung
Di serungap batu nudung
Baka kepit langkau kajang.

Ulu Lungga: Enggai makai

Ngelalaika; kesulai temuai

17. Jengayang bujang melisa,

Nangkin berangin perapang pedang
Mata changka,
Nyan lunju sangkuh ganja,
Mansang ngerandang selang remang jera,
Lalu belaban enggau kayan nanga Pila,
Pantap rawai empat,
Mati tubuh tiga,
Semuka duduk berintai,
Jengayang bujang ganggam,
Nangkin berangin perepang pedang tajam,
Nyan lunju sangkuh itam,
Mansang ngerandang selang remang redam,
Lalu lebuh iya datai ba menyaung tuchung
 Bukit Guram,
Dia iya lalu bejamah enggau Kayan bansa Iban,
Pantap tubuh empat,
Peda mati tubuh lapan,
Bekarentam duduk berimbai.

Ulu lungga; Ubong Manuk

Ngelalaika: Tugung panduk.

18. Jerepang enggi Endun Kumang,

Ditaruh iya teguh-teguh,
Disimpan di bungkan buluh balang,
Dia ribut enda diasuh muput,
Ujan enda diasoh ninggang,
Laban nya ke dikena iya numbuk
Gemian ikan labang,
Tang enda ga nya ditumbuk ka iya ngagai
Mengadai karung menimang,
Kena rusuk nyau lempuang,
Ke chinang-chinang mandang mua.
Pendawan enggi Endu Kumang dayang Ilam
Ditaruh iya teguh-teguh,
Disimpan dalam bungkan,
Dia ribut enda diasuh muput,
Ujan enda diasuh ninggang,
Laban nya ka dikena iya numbuk,
Gemiak ikan tuman,
Tang enda ga nya ditumbuk,
Ka iya ngagai gemian ikan tuman,
Ngasuh tak ditumbuk ka iya
Ngagai mengadai karung menyiman,
Kena rusuk pansut lintan
Ka demeran mirah jera.
Nyadi menua iya di bilik penaik,
Baka pechik alun gelumbang,
Di ruai besai selalu nunga temuai,
Datai pulai belelang.

Ulu lungga: Mati abis

Ngelalaika: Api Manchis.
19. Kumang nampuk di batu galang,
Ngiga pemandang jampat belaki,
Jawai nampuk di batu chanai,
Ngiga ubat pandai pemalit jari.
Nyadi menua iya di tatai panjai,
Endur ruai beanjak-anjak,
Diemperan nyapan,
Endur sengayan bekupan ngiring anak.

Ulu lungga: sarung tunjuk

Ngelalaika: sintung penuduk

20. Anak bayak menarat,

Udah lesi bebadi laya ruat,
Lalu dipelian ka jaban,
Manang Rechap,
Tau ga iya angkat,
Ngerayap empakap tiang,
Anak bayak serunai,
Udah lesi bebadi laya sulai,
Lalu dipelianka jaban
Manang Gendai,
Tau ga iya pulai,
Ke balai bilik lantang.

Ulu lungga: Keli batu

Ngelalaika: gari baju

21. Tuai sida sebuyau,

Ngumbai diri ngiga leka lingkau,
Nepan sengkayau udah digitang,
Tuai sida Lasi,
Ngumbai diri ngiga jani,
Nemu diri tak tengali,
Telentang buang.

Ulu lungga: Singkang agi rapat

Ngelalaika: manang ngambi semengat
22. Aya simpang-impang,
Bejalai di tatai tanah ngeruang,
Nadai iya nangkin berangin, mai senapang,
Tang iya dikumbai orang
Munuh Jengkang Batang Kayan,
Aya Sabit Bekait,
Bejalai di tatai tanah bukit,
Baruh batang ensilup kemibit,
Nadai iya megai sumpit ngesan berayang,
Tang iya dikumbai orang munuh Ukit Bala Punan,
Anang ka iya tebunuhka Ukit Bala Punan,
Enti orang mansa ngasuh iya bebelit rarika nuan.

Ulu lungga : akit sadau

Ngelalaika : sumpit lachau

23. Dan berangan teberingkas,

Sangka aku nyau, sangka aku lepas,
Nemu iya bedau leludas
Baka mas mau setekang,
Dan berangan teberingkas,
Sangka aku lepas, sangka aku nyau,
Nemu iya bedau dedugau
Baka surau langkau kajang.

Ulu lungga : Beji nikal

Ngelalaika : Ati kesal

24. Angkat deh Kumang Dayang Tipong,

Nyabak seringak ransing rerengung,
Dia iya ditepanka di luan kapal Lambung,
Lalu ditandangka orang ngagai
Batang negeri Sadong
Lalu agi megga iya naya di ai mata,
Sereta dua labuh ngerunung,
Belemati ka diri bebadi lesi laya chundung,
Dia iya ditikam ka Renggan
Seduai Kumbu Rayong,
Amat meh iya bebadi lesi laya chundung,
Ngagai menua orang di lepung nyaru adong,
Munyi ketimbung mandi melenang.

Ulu lungga : malam

Ngelalaika: garam.
25. Lelabi nadai kaki,
Bejalai ngasur-sengasur,
Tekura nadai pala,
Bejalai dagul-dagul

Ulu lungga: pelaman

Ngelalaika : penganan

26. Nibung bingkuk kandung,

Baka jerumat jarum kawat,
Kumang belang belakang,
Baka kengkang ukir surat.

Ulu lungga: busung

Ngelalaika: lusung

27. Batang purang semut,

Kering dijeput lembut digelam,
Ai ensunut anyut,
Tau pansut enda tau tengelam.

Ulu lungga: buluh

Ngelalaika: peluh

28. Aku bisi kaku empat iti,

Kaki aku lunchik juring,
Enti aku lelaki bisi taring,
Gamal aku enga besai,
Aku tegar bejalai,
Pemakai aku buah kayu sebansa,
Ke luar daun,
Suah aku bisi tanduk,
Suah ga nadai,
Tanduk aku besai guna.

Ngelalaika : Pelanduk

29. Deka aku ngumbai diri jelu,

Aku tau ga terebai,
Deka aku ngumbai diri burung,
Aku beranak baka jelu.
Aku tinduk siang, makai malam.

Ngelalaika: Semawa.
30. Aku bisi rekung tang nadai pala,
Aku bisi berang enggau lengan,
Tang nadai jari.

Ngelalaika: Baju

31. Aku bisi punggung,

Tang nadai perut,
Aku bisi kaki,
Tang nadai tapa enggau tunjuk.

Ngelalaika : Tanchut

32. Enti aku tingkap,

Aku kenyang,
Tang enti aku telentang,
Aku lapar.

Ngelalaika : Tanggui / tanggi

33. Enti lebuh nuan ketawa,

Aku pan ketawa,
Enti nuan nyabak,
Aku pan nyabak.

Ngelalaika : cheremin

34. Lebuh nuan bejalai,

Aku pan bejalai,
Lebuh nuan ngetu,
Aku pan ngetu.

Ngelalaika :mata panas

35. Lebuh hari udah siang,

Aku dani,
Lebuh hari udah malam,
Aku tinduk.

Ngelalaika: mata panas.

36. Malam hari aku idup,
Tang maya hari udah tawas,
Aku mati.

Ngelalaika: lampu kelita

37. Lebuh siang aku begari ngena baju

belachu,
lebuh malam aku begari ngena kain
kanggan.

Ngelalaika: tawas enggau malam.

38. Kami menyadi tubuh lapan,

Tau bejaku betangkan-tangkan,
Duduk berintai atas papan,
Nadai besai, nadai mit ari pangan,
Ka guna pesaka anak Iban,
Belakang ditenchang enggau luntang kayu buan.

Ngelalaika: Engkerumung

39. Aku bisi kerubung, belakang aku munchung,

Bejaku ingar manjung,
Ka guna anak mensia macham kereja ni maya,
Datai nuntung,
Tau bepadah maya penusah,
Nesau sida di Panggau enggau sida di gelung.

Ngelalaika: setawak

40. Jari aku tiga, mua aku segala lalu bisi

Dua belas leka mata,
Bejaku madahka maya,
Tau idup tau mega mati
Sebarang maya.

Ngelalaika: jam
41. Kenyau ari mit, aku bekulit sereta bisi puak,
Nyau tengan umur aku bisi ai, bisi mega lemak,
Lebuh aku tuai, aku bisi isi enggau minyak,
Tang enti parai, makin dibuai makin nyadi biak.

Ngelalaika : Buah nyiur.

42. Lebuh baru ada, semina siku-iku segala-gala,

Udahnya kami menyadi pan ada semua,
Gamal kami dipeda sebaka-baka,
Lebuh nyau tuai kami beserera,
Enggau mengua tangkai mengada,
Kami diiru orang kira seminggu,
Sebedau kami mati,
Tama batu lubang gua,
Pulai ngagai menua pendam seribu.

Ngelalaika : buah pisang

43. Tubuh aku segala lalu kulit aku burak,

Bisi perut siti pansut chukak-chukak,
Aku tau meri penerang enggau penampak,
Aku tau bediri taja nadai kaki dua piak.

Ngelalaika : dian.