Hadih Maja (panton Aceh) keuneubah Indatu Aceh.

1. Adat bak po teumeureuhon, hukom bak syiah kuala,

kanun bak putroe phang, reusam bak laksamana.

2. Bubei dua jap, seureukab dua muka,

keunoe toe keudeh rab, man dua pat meuteumee laba.

3. Buya krueng ka tahe teu dong dong,

buya tamoeng ka meu raseuki.

4. Lam hudep ta meu sare, lam meugle ta meu bila,

lam lampoh ta meu tulong alang, lam meu blang ta meu syedara.

5. Mate aneuk meupat jeurat,

gadoh adat hana pat tamita.

6. Nyang sulet krehkroh,

nyang toh boh mirah muka.

7. Pat boh panah nyang hana getah,

kecuali boh mirah ngoen boh keuladi,
pat tuto atawa but nyang hana salah,
kecuali firman Allah ngoen hadih nabi.

8. Pat ujeun nyang hana pirang,

pat prang nyang hana reuda.

9. Tajak beutroh takaloen beudeuh,

bek rugoe meuh saket hate.

10. Ureung saba luwah lampoh,

peng siribee tinggai sireutoh.

11. Ampoen na di idi cut, pocut na di samalanga,

peureulee breuh jak u tangse,
peureulee pake troen u banda,
peureulee keubeut jak u seulimum,
peureulee putroe na di keumala.

12. Bak jieduk teu leumiek-leumiek,

muka tubai teu seunyom-seunyom,
watei ji jak teubungkok-bungkok,
hate kurok jie publoe ngoen-ngon.

13. Bak peng duroeh janggoet,

bak butt aleh doa

14. Lagee ta meukat sira lam ujeun,

masen keu tabeu hanjeut ta peuteun.

15. Lagee u meunan minyeuk,

lagee ma meunan aneuk.

16. Leungoe oen kayee ka meu teupeu cicem,

teuseunyom neukhem ka meuteuho makna.

17. Meunyoe jeut ta peulaku,

boh labu jeut keu asoe kaya,
meunyoe han ta teuoh peulaku,
aneuk teungku jeut keu beulaga.

18. Meu riri uroet ta ikat keu beunteung,

meuriri ureung jeut ta boh keu raja.
19. Nibak ta asek get ta anggok,
beu that brok brok asai kana.

20. Tajak beu laku lienggang,

tapinggang beulaku ija,
tangui beulaku tuboh,
tapajoh beulaku atra.

21. Asai cabok nibak kude,

asai pake nibak meu dawaa.

22. Bak ie raya bek ta theun ampeh,

bak ie tarek bek ta theun bube,
bek ta meurakan ngoen si paleh,
hareuta habeh geuta nyoe binasa.

23. Barangkadum raya ie krueng nyang geubileung(ie kuala),

barangkadum buet rakyat nyang geubileung buet raja.

24. Buluen peungeuh takawe eungkot,

watei ie surot takoh bak bangka,
tasuet glueng meuh sok glueng balot(ganja),
buet han patot bek takeureuja.

25. Di cong bak manggeh ji meulot siwah,

di cong bak lawah umpueng seureungga,
hate uloen nyoe cukop that susah,
bak peutimang gah peureulee keu cinta.

26. Hina bak donya hareuta teuh tan,

hina bak tuhan ileumei hana.

27. Khem meuhah-hak saleuek iblih,

khem meuhih-hih saleuek guda,
khem teuseunyom saleuek bak teungku,
khem sigeutu saleuek ulama.

28. Lampoeh meupageu,

umong meuateung,
uteun meutaloe,
nanggroe meuraja.

29. Meunyoe ate hana teupeh,

pade bijeh di peutaba,
meunyoe ate ka teupeh bu leubeh han ta teume rasa.

30. Meunyoe hana angen di pot,

pane patot suwe meu puta,
meunyoe hana sapeu nyang di tot,
pane patot asap meubura.

31. Abeh nyawoeng tuhan tueng,

abeh hareuta hukom pajoh.

32. Adat meukoh reubong,

hukom meukoh pureh,
adat jeut beu rang kaho takong(peu muen-meuen),
hukom hanjeut talanggeh.

33. Di laot ka saboh pakat,

troeh u darat laen keunira.
34. Hak buya di dalam krueng,
hak rimueng bak bineh rimba.

35. Meu nyoe get lam hatee,

lahee bak ie rupa,
meu nyoe brok lam hatee,
lahee bak peugah haba.

36. Pat ranub nyang hana mirah,

pat peuneurah nyang hana bajo,
pat tuto nyang hana salah,
hana bak teunte na bak dudoe.

37. Ta hemat yoh mantoeng na,

beu teugoh that yoh goh(golom) cilaka.

38. Teungoh teuga ta ibadat,

tahareukat yoh goh(golom) matee.

39. Udep saree matee beu syahid

40. Uleue bah matee ranteng bek patah,

but beu jeut geu tanyoe bek leumah.

41. Bek harap pageu keubee lam padee,

bek harap jantong peu reuloh hate,
jeut leumiek tanoh keubeu keu meubang,
leumiek go parang gob mat kuasa.

42. Beuhe rimueng di dalam uteun,

beuhe buya di dalam krueng.

43. Gob pajoh boh panah,

tanyoe yang meu geutah.

44. Lam geurupoh meubek ta peuleuh musang,

lam raga pisang bek peuleuh tupe.

45. Meunyoe pijet taboh bak sapai,

ka teun tee gatai ta teu mee rasa,
meu nyoe sulet ta boh keu pangkai,
ka teu ntee kanjai ta coek keu laba.

46. Na gle ji peugoet keu blang,

na rumoh ji peugoet keu rangkang

47. Ta meueen cato bek leupah-leupah,

meunyoe roh boh 14 matee u punca,
ta meu tuto bek leupah-leupah,
peulara lidah yoh goh(golom) binasa.

48. Teungku jameun pijut-pijut,

gadoh kaluet bak baca doa,
teungku jinoe tumbon-tumbon,
gadoh ek troen rinyeuen istana.

49. Tulak tong tinggai tem.

50. Wajeb uroe jumat, sunat uroe raya,

meu utang bak judi, meujanji ni bak cinta,
me ucap oh bala, meu rateb oh ka geumpa.