Bismillairrahmanirrahim Assalammualaikum wr.wb Alhamdulillah hirobbilalamin wassholatu wassalamuala asrofil anbiyai wal mursalin waala alihi wasshobihi wassalim wabarigh ajmain amma badu
Nuwun kawula nuwun
Dumateng panjenenganipun Bp. H. Sugeng soho Ibu Sri Widji Lestari ingkang paring kinurmatan, para sesepuh lan pinisepuh dalah sedoyo kadang para undangan ingkang kawula trisnani. Saderengipun kula ngaturaken punapa ingkang dados wigatosipun pisowan kulo sekadang wonten ngarso panjenengan, kaparengo kulo hangauraken puji syukur soho matur nuwun ingkang tanpa upami kunjuk ngarsanipun Gusti Allah SWT ugi junjungan kito Nabi Muhammad SAW, awit sampun kapareng paring pangayoman soho panuntun ing mangke lampah kulo sakadang pinaringan wilujeng boten kirang satunggal punopo. Panyuwun kulo mugi-mugi rahmatipun Gusti Allah SWT ingkang Maha Mirah lumintu kaparingaken dumateng kito sedoyo. Wondene sowan kulo sakadang puniko saperlu kautus dening Bapak soho Ibu Slamet Rahariyanto sekalian hanglarapaken Penganten Kakung Nakmas Ganda Sari Husada ingkang miturut sarujuking rembag sakmanunggaling karsa ing ari ingkang piniji kalenggahan puniko sampun anglajengaken akad nikah kaliyan Nakajeng Aniek Rahmawati ingkang puniko Bp. Slamet Rahariyanto sakaluwarga ngaturaken salam taklim lumantaring kawula katur panjenengan Bapak soho Ibu Sugeng sakaluwarga. Soho nderek amemuji mugi-mugi hajat ing dinten puniko saget kalampahan kanthi wilujeng nirboyo nirsangsoyo. Saklajengipun mugi-mugi pinanganten kekalih pikantuk berkahing ingkang Maha Agung Gusti Allah SWT sageto andadosaken keluarga ingkang sakinah mawadah warohmah tansah sasarengan lir kadyo mimi lan mintuno ambabaraken putro putri ingkang soleh lan solehah. Amin ya Robbal Alamin Kulo sakadang saestu angleggono ing manah, bilih sowan kulo satuhu katah kekiranganipun, katah tuno dungkakipun kirang ing subasito soho galap gang suling tumindak soho kladuking atur ingkang sedoyo kolo wau saestu saged damel kirang sarju tuwin kirang renaning penggalih, kulo sakadang namung saged dheko- dheku mari kelu cumadong hanyenyadong lumunturing agunging samudro pangaksami. Bp. Sugeng ingkang kinurmatan ambok bilih sampun dumugi titi wancinipun ingkang prayogi, inggih mugi-mugi linepataken saking sapu dendaning pangeran, tinebihno ing goda rencana, cinaketno ing karahayon sang pinanganten Nakmas Ganda Sari Husada kanthi sawetahipun kulo aturaken mugi keparengo nampi kanthi prayogi. Minongko pungkasing atur mbok bilih wonten kalepatan anggen kawula matur kulo nyuwun sih agunging samudro pangaksami. Makaten atur kawulo nuwun Wabillahit Taufiq wal Hidayah Wassalammualaikum wr.wb