Anda di halaman 1dari 5

1.

0 Pun Jaku

Jaku tu siti chara dikena kitai bekomunikasyen enggau pangan diri. Nitihka penemu Baker
enggau Galansinki (2001), jaku tu siti tanda tauka kelai nggau munyi ti dikena mensia ngulihka
juluk ati ti dikumbai ‘goals’. Nitihka penemu Chemaline (2011), jaku nya munyi unit jaku ti
disadaka nyaawa kitai. Nya alai, jaku nya siti medium ti ngembuan struktur ti unik lalu tiap
bansa ngembuan jaku diri kelebih agi jaku Iban. Jaku kitai bisi ke enda sebaka laban nitihka
asal penatai kitai empu. Bisi raban linguistik madahka jaku Iban nya seperugan enggau jaku
Austronesia. Pansik tu mega disukungka Asmah (2008) ke madahka jaku Iban ti dikena
besehari-sehari nya endang bisi kaul enggau jaku Iban. A. A. Cense enggau M. Uhlenbeck
(1958) mega madahka jaku Iban nya pampang ari dialek Melayu.

Nitihka penemu Neilson (2015), dalam daya idup bansa Iban, jaku ti dikena besehari-
sehari nya begunaka beribu-ribu leka jaku dikena berandau enggau pangan diri. Jaku nya siti
chara kena mantaika penemu enggau runding siku-siku mensia. Jaku mega dikena kitai
begulai enggau orang bukai. Ambika chunto, lebuh betanya saut tentu kitai bekenaka jaku.
Jaku mega dbekaul enggau runding enggau daya idup siku-siku mensia. Nya mih kebuah jaku
dikena dalam idup besehari-sehari. Asmah (2013) madahka jaku Iban tauka dikumbai Dayak
Laut sigi datai ari raban jaku ti dikumbai Austronesia. Penemu tu disukung Steinmayer (1999)
madahka jaku Iban tu siti chabang ari raban jaku Malayu-Polynesia, iya nya raban jaku
Austronesia nya tadi.

Jaku Iban nyau majak mansang sereta ngerembai seraris enggau pemansang dunya
kemaya hari tu. Kelebih agi, mayuh amat isu enggau chabar ti benung nyadi dalam
ngemansangka sereta ngerembaika jaku Iban. Taja pia, kitai enda patut nyrutka diri tajapan
pengawa ngerembaika jaku Iban tu sigi mar. Tang enti kita sama begempung sereta besaup
enggau pangan diri, jaku Iban deka mansang setapak agi ke depan lalu ulih besemekih
enggau jaku bansa bukai.

1
2.0 Isu enggau Chabar Jaku Iban

2.1 Jaku Iban ba Pelajar, Pengawa Perintah, Ekonomi Menua

2.1.1 Pelajar

Jaku Iban kemaya hari tu udah mansang ba tikas pelajar. Ukai semina nya aja, jaku Iban udah
dipelajarka ba tikas pelajar ti tinggi agi baka ba universiti sereta palan pelajar ti bukai. Ambika
chunto, Universiti Perguruan Sultan Idris (UPSI) bisi ngambi jaku Iban nyadika minor sereta
Palan Pematih Pengajar Kampus Rajang mega nyediaka jaku Iban nyadika mata pelajar
major. Taja pia, kur tauka chabar ti ditapi ba tikas pelajar jaku Iban tu iya nya kurang kereban
sanding. Kereban sanding baka bup, majalah enggau ensiklopaedia jaku Iban agi kurang enti
dibanding enggau jaku bansa bukai. Pengurang tu mai penusah ngagai bala nembiak ti agi
belajarka jaku Iban. Kebuah pia laban sida enda chukup kereban sanding lebuh ke mansik
siti-siti pekara, kelebih agi lebuh nembuka kereja kus sida. Pia mega, pengurang kereban
sanding tu tau nyekat pansik ti benung dipejalaika laban nadai sumber ti ulih dipechaya.
Kereban sanding baka bup sigi mayuh dijual ba kedai. Taja pia ukai semua kitai tebelika bup
ti mar rega.

Nangkanka nya, chabar ti ulih nyekat pemansang jaku Iban iya nya kurang pengajar
jaku Iban. Kelebih agi ba dunya jeman diatu, nembiak nyau majak mayuh-semayuh. Pengajar
jaku Iban ba sekula mega agi mimit enti dibanding enggau penyampau pengajar mata pelajar
bukai. Bala pengajar ti endang ngambi major jaku Iban jarang amat bisi ngajar di sekula.
Ambika banding, kepala pengajar suah ngasuh pengajar ke bebansa Iban ngajar jaku Iban
tajapan penemu pengajar nya enda dalam. Pengajar tu enda ulih ngajar enggau lenak laban
iya nadai peneleba taja nemu bejaku Iban enggau manah.

Nambahka nya, siti ari isu ti agi nekul iya nya jaku Iban nadai ba genap iti sekula.
Kebuah pia laban jaku Iban semina diajar ba sekeda sekula aja nitihka peminta bala apai indai
sereta nembiak ke keran deka ngambi jaku Iban kelebih agi di sekula primari. Enti dipeda
endang mimit aja sekula ti bisi nyediaka pelajar jaku Iban. Lebuh ba sekula sekondari jaku
Iban diajar ba luar sidang tauka di luar taga jam belajar selama. Kebuah pia laban jaku Iban
semina nyadika elektif. Nya alai, penyampau sekula ti mimit tu nyekat pemansang jaku Iban
kitai ari terus ngerembai.

2
2.1.2 Pengawa Perintah

Dalam aspek pengawa perintah tu, chabar ti agi malut pendiau orang Iban iya nya penanggul
maya bekomunikasyen. Bala pemesai-pemesai Iban tauka orang ke gawa perintah empu
endang bisi agi ke napi penanggul maya bejaku. Kebuah pia laban jaku Iban enda ulih dikena
lebuh bekomunikasyen ba endur gawa. Kelebih agi orang ke gawa perintah laban sida begulai
sereta suah betunga mua enggau pupu bansa bukai. Lebuh begulai enggau bansa bukai, jaku
Iban enda ulih dikena laban nangika sida enda meretika jaku nya. Nambahka nya mega, jaku
Iban ukai jaku entarabansa. Nangkanka nya mega, dokumen-dokumen tauka keretas-keretas
kereja semua dichelak ngena jaku rasmi menua kitai laban nitihka atur ti udah ditetapka dalam
pengawa perintah. Nya alai, jaku Iban enda ulih dikena dalam pengawa perintah.

2.1.3 Ekonomi Menua

Ekonomi menua kitai sigi begunaka jaku rasmi kitai empu iya nya jaku Melayu lalu enti ba
tikas entarabansa, jaku ti dikena nya jaku English. Jaku Iban sigi dikelala tang jarang dikena
dalam pengawa ekonomi. Kebuah pia laban enda semua orang mereti sereta belajarka jaku
Iban. Nya alai, jaku Iban agi tinggal dalam aspek ekonomi. Jaku Iban semmina dikena dalam
pengawa ekonomi diri empu aja. Ambika chunto baka aktiviti bedagang sechara mit-mit aja
jaku Iban bisi dikena. Taja pia, bisi mega maya jaku Iban sigi enda ulih dikena laban lebuh
bedagang, kitai ukai semina begulai sesama Iban tang enggau raban bansa bukai.

2.2 Bilingual

Jaku Iban mega napi isu nembiak rebak baru mayuh enda nemu sereta landik bejaku Iban
tajapan bebansa Iban. Kebuah pia laban nembiak nya kurang latih ari apai indai. Apai indai
kemaya hari tu nyau nadai hari deka bekomunikasyen enggau bala anak. Mayuh bansa Iban
endang udah bisi pemansai dalam jaku bansa bukai. Ambika chunto, baka jaku ribai iya nya
jaku English. Bala anak tu tadi lalu dibai bejaku ribai di rumah. Nya alai, anak sida nyau teleba
bejaku ribai lalu ba sekula sida nadai belajarka jaku Iban. Tu ngujungka anak kitai Iban lalu
enda nemu jaku Iban ti betul sereta engkeman.

Chabar ti bukai ti ditapi bansa Iban iya nya jaku bukai udah lama ngerembai. Bala
nembiak rebak baru lebih rindu belajarka jaku bansa bukai. Dalam runding sida, sida sigi udah
bisi penemu senentang jaku Iban pemai ari ada. Jaku Iban majak ditinggal ketegal bansa Iban
empu nyanggup agi belematika jaku bukai. Nembiak rebak baru nyau alah panjuk jaku bansa
bukai.

3
2.3 Matematik, Sains enggau Teknologi Ngena Jaku English

Ba jeman gloalisasyen diatu, mata pelajar ti beguna endar iya nya Matematik, Sains enggau
Teknologi. Semua mata pelajar nya diajar ngena jaku English. Dia kitai ulih beratika jaku Iban
agi jauh tinggal enti dibandingka enggau jaku English. Tu meri empas ngagai nembiak bansa
Iban empu. Kepuas-puas sida udah belajar ngena jaku English, jaku diri empu nyau majak
lenyau. Kebuah pia laban peneleba sida ngena jaku Iban nyau majak dialahka jaku bansa
bukai. Jaku Iban enda ulih dikena dalam mata pelajar Matematik, Sains enggau Teknologi
laban mata pelajar nya dipelajar sechara entarabansa. Taja pia, di Malaysia jaku Melayu udah
mega dikena ngajar mata pelajar nya. Dia kitai meda chabar ti patut ditapi iya nya peninggi
tikas jaku bansa bukai patut dialahka. Kelimpah ari nya, jaku kitai mega agi bisi pengurang ari
terminologi. Bisi leka jaku ke nadai ba vokabulari jaku Iban. Ambika chunto baka terminologi
sains iya nya ‘photosynthesis’. kitai nadai leka jaku dikena madahka terminologi nya. Nya mih
entara chabar ke deka ditapi kitai dalam ngemansangka jaku Iban.

2.4 Pemansang Teknologi Pemadah enggau Komunikasyen

Ba jeman kemaya hari tu, teknologi pemadah enggau komunikasyen dalam jaku Iban tu sigi
udah mansang enti dibandingka enggau taun-taun ti udah. Teknologi pemadah enggau
komunikasyen tu nyengkaum radio, surat berita sereta majalah ti dikeluarka dalam jaku Iban.
Ambika banding, Iban bisi agensi radio iya empu baka Wai FM sereta Iban Radio Malaysia.
Taja pia, chabar ti ditapi kitai iya nya jaku ti dikena ukai jaku Iban ti standard. Ambika chunto
pembacha berita agi mayuh ngena jaku pijin. Pia mega, teknologi pemadah ke bukai enggau
komunikasyen ke bukai mayuh enda ngena jaku Iban ke standard enggau nemban. Publisiti
ti dibantaika ba media mega agi ngena struktur jaku enggau sepil jaku Iban ti salah.

3.0 Simpul Penemu

4
Jaku Iban sigi udah jauh mansang bepun ari jeman perintah Rajah Brooke kelia. Taja pia,
mayuh amat isu enggau chabar ti meseti ditapi ngambika jaku bansa kitai enda midang
disegang gelumbang pemansang. Nadai pekara di dunya tu ti enda ulih ditapi kitai enti kitai
nyanggup betulung sereta ngambi bagi dalam pengawa tu. Nya alai, semua raban ti
ngembuan tanggungpengawa ngemansangka jaku Iban patut kih senentang chara dikena
napi chabar ti semampai nekul pengawa kitai ti deka ngerembaika jaku Iban. Ngarapka jaku
Iban tau dikerembaika ngagai tikas ti tinggi agi lalu ukai semina dipelajar nembiak bansa Iban
aja tang semua pupu raban bansa kelebih agi di Malaysia. Begempung kitai teguh, bepechah
kitai runtuh. Awakka kitai sama bela begempung ngemansangka bansa diri lalu nanka identiti
jaku bansa diri.