RIPOT PBS

Peneleba bepelasarka sekula tu siti pengawa ti endang digaga semua pengajar pelatih ba
semua menua Malaysia. Aku enggau bala kaban aku bejalaika pengawa peneleba
bepelasarka sekula tu ba SK Rantau Panjang, Sibu. Tuju kebendar peneleba bepelasarka
sekula iya nya meri peneleba ngagai bala pengajar pelatih senentang chara bala pengajar
ngajar nembiak enggau pendiau bala pengajar ba sekula. Sekumbang ti bejalaika peneleba
bepelasarka sekula tu, dia aku ulih meda sekeda langkah rapat, ripih jalai enggau teknik ti
dikena bala pengajar ngajar pengelandik mending enggau bejaku.

Langkah rapat ti dikena pengajar ngajar pengelandik mending enggau bejaku ba sekula SK
Rantau Panjang iya nya langkah rapat komunikatif. Kebuah pia laban bala pengajar dipeda
mayuh agi bekomunikasyen enggau nembiak lebuh ngajar. Langkah rapat komunikatif tu siti
langkah rapat ti ngemeratka komunikasyen, interaksyen ngerembaika pengelandik bejaku.
Langkah rapat komunikatif enda ngemeratka pemanah jaku tang ngemeratka reti leka jaku.
Nembiak bisi peransang lebuh belajar laban sida iya nemu langkah rapat komunikatif tu
ngajar jaku ti dikena ba pengidup besari-sari. Aktiviti ti bekait enggau langkah rapat
komunikatif tu iya nya betanya saut. Lebuh ke betanya saut entara pengajar engau nembiak
nya tadi, dia proses interaksyen enggau betukar penemu pan nyadi. Nembiak belajar
mending lebuh ke ditanya pengajar, sida belajar bejaku lebuh nguji nyaut tanya pengajar.
Kelimpah ari nya, pengajar mega bisi ngajar pengelandik mending enggau bejaku nengah
teknik kelulu. Nembiak diberi siti baga lalu diasuh ngelakun ke baga ti udah diberi ngagai iya
nya. Nembiak diasuh ngerundingka diri sida iya empu benung ba situasyen baga iya nya
tadi. Chunto, siku nembiak diasuh nyadi jelu burung. Iya pan lalu ngaga diri terebai baka
burung. Teknik kelulu tu bebida agi ari teknik belakun tauka drama. Drama tu meseti ka
nemu semua situasyen dalam drama. Ukai semina nemu baga diri empu aja. Langkah rapat
komunikatif ukai semina ulih narit ati nembiak, tang mega ulih ngasuh pengajar ngajar
pengelandik mending enggau bejaku enggau lebih senang.

Ripih jalai ti berupai mayuh agi dikena bala pengajar lebuh ngajar iya nya ripih jalai terus.
Ripih jalai tu tebal agi dikena lebuh ngajar mata pelajar Jaku. Baka Jaku Melayu, Jaku Iban
enggau Jaku Inggeris. Kebuah pia laban ripih jalai terus tu ngemeratka siti jaku aja dikena
lebuh proses ngajar enggau belajar dipejalaika. Tang, pengajar ti ngena ripih jalai tu meseti
ka pengajar ti endang bisi dilatih laban mayuh penanggul lebuh ngena iya. Kebuah pia laban
enda semua nembiak nemu ngena jaku kelimpah ari jaku tangkai mengandai sida iya empu.
Ripih jalai tu amai manah enti dikena ngajar mata pelajar jaku tangkai mengandai bala
nembiak. Kebuah pia nembiak ulih mending lalu nemu reti leka jaku ti disebut pengajar.
Nembiak ba sekula SK Rantau Panjang nya endang mayuh nembiak bansa Iban. Nya

1
kebuah bala pengajar ti ngajar mata pelajar Jaku Iban nadai penanggul lebuh ngajar Jaku
Iban. Kelas Jaku Iban bejalai lanchar nitihka langgur ngajar ti udah digaga pengajar.
Pengawa ngajar enggau belajar dalam kelas dipejalaika ngena siti jaku aja ngambika
nembiak ulih mending lalu mereti ke utai ti disebut pengajar.

Teknik ti suah agi dikena pengajar lebuh ngajar iya nya teknik tanya saut. Teknik tanya saut
tu siti teknik ti begunaka interaksyen entara pengajar enggau nembiak. Pengajar nerangka
topik ti diajar, udah nya, iya lalu meri tanya ngagai nembiak laban deka nemu nembiak nya
mereti tauka enda senentang topik ti udah diterangka pengajar. Ari saut nembiak nya tadi,
dia pengajar nemu nembiak nya mereti tauka enda. Teknik tanya saut tu mega ulih nemu
naka ni tikas penemu enggau pengelandik nembiak dalam pelajar.kelimpah ari nya, kaul
nembiak enggau pengajar mega betambah manah laban semampai bisi interaksyen ba
dalam kelas. Baka siti kelas ti alai aku tama, dia aku beratika pengajar ngajar senentang
pengenap tesa. Pengajar nerangka guna pengenap tesa ba bungai. Chunto, sepating
bungai. Pengudah nya, pengajar lalu nanya guna pengenap tesa ke bukai. Nembiak berupai
amai rindu ke pengawa betanya saut, sida iya berebut deka nyaut tanya pengajar taja pan
bisi sekeda nya tadi nyebut saut ti salah. Pengajar enda nganu nembiak ti nyaut tanya
enggau salah. Kebuah pia laban nembiak enda tentu tau dianu enggaika sida iya enda rindu
nyaut tanya pengajar. Pia mega, pengajar enda tau bechiping lebuh betanya saut enggau
nembiak. Nembiak meseti ka mending enggau manah tanya ti ditujuka pengajar ngagai sida
ngambika nembiak ulih nyaut enggau betul. Ari nya tadi sida iya ulih belajar mending
enggau bejaku nengah siti aktiviti aja.

Langkah rapat, ripih jalai, enggau teknik ti dikena bala pengajar ngajar nembiak pengelandik
mending enggau bejaku ti udah dipeda aku ba SK Rantau Panjang endang ngasi laban
nembiak rindu ati sereta jampat bulih penemu. Aku berasai temegah ati laban udah milih
sekula ti ngemeratka pelajar bala nembiak taja pan mayuh amai pengurang sekula ti jauh ari
pasar tu. Ngarapka semua penemu ti diulih ari peneleba bepelasarka sekula tu ulih dikena
nyadi siku ari pengajar Jaku Iban ti lati dudi hari ila.