Pag-gising sa umaga,
Pamilyar na ang senaryong hahanapin ang sinag ng pag-asa—
sikat ng araw, may mga sinag na naghuhudyat
upang muling abutin ang mga pangarap,
pangarap para sa lipunan, sa pamilya, sa sarili
pangarap na matamo ang tunay na pagkalinga.
Kailan nga ba makaka-ahon?
Kailan ba makakabangon?—
bukas? Sa makalawa?
Mga katanungang nangangailangan ng konkretong kasagutan,
Tanong ng bawat Juan para sa bayang sinilangan
Pero—
PILITIN MO
Pilitin mong labanan—
Piliin mong umahon sa pagkakabaon sa putik ng kahirapan
Huwag mong sisisihin ang tadhana sa kalagayang mong di mawari kung nasaan ang tama
Kumawala ka, umalpas ka
sa kaisipang hindi na sisilang ang tunay na pag-asa
Pilitin ang sarili na hindi pa tapos ang laban hangga’t may paniwala
Isipin mong hindi mababalewala pagkat
Magbubunga—ang bawat iginawad na pagkakatiwala
Basta’t puhuna’y dugo’t pawis,
pagsusumikap, naglalagablab na pag-asa.
KUMAPIT
Kumapit sa tali ng pagkakaisa,
Kumapit sa habi ng sinulid na bubuo ng iyong pangarap
Kumapit nang mahigpit na ano man ang agos at unos ng buhay
Hindi ka bibitaw sa matibay na pundasyong inanyuan ng iyong kamay
Kumapit sa katotohanang hindi ka nag-iisa
Sa paglinang ng lahat ng iyong makakaya,
Bumangon, magsikap sa pagbuo ng bawat haligi ng tagumpay
Na kikinang sa bawat sulok ng mga barangay
Kaya pagtibayin ang tatag ng puso at sarili—
SA PAG-ASA
Oo.. Sa pag-asa mo itingin ang iyong mga mata,
Huwag mong titigilan ang iyong pagsusulat, pagbabasa
Na siyang unang hakbang ng iyong makinang na bukas
Na sa sakit ng lipunan, ito ang tanging lunas
Dagdag karunungan, susi ng pag-asa—
Walang pera?
Hindi yan problema.
May kasangga ka upang ipagpatuloy ang iyong pangarap
Kasangga mo na magpapadama sayo ng isang tunay na paglingap
Upang marating mo ang kislap ng hinaharap
Kakampi mong mayroong paninindigan
Na ang edukasyon ay di ipinagkakait pagkat ito’y natatanging pamana
Gamit ang lapis, papel at makukulay na krayola
Mumunting mga pangarap ay maiguguhit na
Sisimulang abutin na hanggang maitititik sa kasaysayan nila.
PANAHON NA
Panahon na para magtulungan, magbayanihan—
Kapit bisig—tatak ng tunay na Pilipinong samahan
Hindi susuko, sama-samang lalaban,
babangon para sa maginhawang kinabukasan
Ngingiti ano man ang pagsubok na maranasan
Ibibigay ang kanang kamay ng pakikiisa
Kikilos…para sa kababayang nasalanta—
Sama-sama, tulong-tulong ipapadama ang pagkalinga
Pagmamalasakit sa puso’y hinding-hindi huhupa
Isang pag-asang magbubukas sa panibagong umaga.
Kalinga’y suportahan at ipamalita ng tuluyan upang ang galak, pag-ibig, at kapayapaan ang maghari sa
buong Pilipinong sambayanan.