Anda di halaman 1dari 24

1.

O ABSTRAK

Jaku Iban naka ke diatu majak terus kukuh sereta deras angkat ngerembai mansang
nyerumba ubah pemansang dunya, menua enggau bansa tang ke nyengala agi nya
pemansang dalam sistem pelajar sekula. Jaku Iban endang udah bisi bagi dalam kurikulum
pelajar sekula di menua tu kenyau ari terubah sekula misyen bisi dibuka undur jauh ngagai
taun 1853 kelia tauka dulu ari nya. Iya ukai semina bisi dipelajarka nyadi pelajar vernacular
tang ba sekeda sekula ke majoriti diwan bansa Iban iya nyadi medium dikena ngajar subjek
bukai sebedau ti ngena jaku English. Pemansang pelajar jaku Iban di sekula kemaya hari tu
bepanggai ba pengentap Sistem Jaku Iban ti dikemisi. Berindik ari ansak, sungkak sereta
segang pemansang dalam jaku Iban, dia sapa-sapa ke bisi kuasa enggau autoriti seruran
besak bekiraka atur enggau chara ngasuh juluk ati ti deka ngembuan siti dokumen Sistem
Jaku Iban ti entap sereta menuku. Sistem Jaku Iban ti diterekun, dikembuan sereta dikena di
sekula diatu udah umbas dikena ngasurka pemansang Pelajar Jaku Iban belabuh ari sekula
primari nyentuk ke manggai ba tikas institut pelajar tinggi. Naka ke diatu, Sistem Jaku Iban
Di Sekula tu nyadi pugu kereban sanding ukai semina dalam pengawa ti ngajar enggau
belajarka Pelajar Jaku Iban di sekula tang mega dikena lalu dikeengkuka sekeda opis enggau
agensi perintah ti bukai dalam pengawa sida ti ngaga lalu nyelak kereban bacha dalam jaku
Iban. Jaku Iban ukai semina diajar sereta dipelajarka bansa Iban tang mega ampit dipelajarka
mayuh raban bansa bukai sekali ke ba tikas sekula nyentuk ke universiti. Dikena napi segang
pemansang enggau ubah tu, dia sistem jaku Iban begunaka paradigma baru enggau
transformasyen ti lebih sistematik, lebih realistik sereta menuku.

2.0 NYERATAN PEMANSANG SISTEM SEPIL JAKU IBAN

Jaku Iban tu siti ari jaku bansa asal di Pulau Borneo lalu ti nyemetak agi nya di Sarawak, ti
dikeangkunka raban bansa Dayak kelebih agi bansa Iban kenyau ari rangkat Niang Begiling
Ke Nyadung Ai kelia nyentuk ke sehari tu. Nitih ke pansik, jaku Iban tu sebansa jaku ti nubu
ari perugan jaku Austronesia dalam ampar Pulau Tanah Melayu. Penyangkai jaku Iban di
Sarawak sama nyerumba alun penatai bansa Iban ke angkat beranyat ari tanah Kalimantan
maya urung taun 1540 kelia. Dulu menya kenyau ari jeman Sultan Berunai enggau jeman-
jeman ti nangkan nya, iya udah mujur nyadi siti jaku lingua franca ti kala dikena bejalaika
pengawa perintah kelimpah ari ti dikena bekomunikasyen entara bansa Iban enggau bansa
Iban tauka entara bansa Iban enggau raban bansa bukai ti meretika jaku Iban.

Jaku Iban tu sebansa jaku ti ditemu lalu dikena mayuh raban bansa kelimpah ari bansa Iban
empu ke endang dominan. Nitih ke angka ari Opis Statistik Sarawak ti diambi ari census taun
2010, bisi 713,421 iku bansa Iban bejaku dalam jaku Iban. Dianggarka lebih sejuta mensia

1
nemu bekomunikasyen ngena jaku Iban ti mungkur raban bansa bukai baka Melayu, China,
Melanau, Bidayuh, Orang Ulu enggau semua raban bansa Dayak Kalimantan ti endang
tangkai penatai bansa Iban.

Kenyau ari maya jeman Sultan Berunai ti ditangkanka Rajah Brooke ke merintah menua
Sarawak, dia jaku Iban endang udah dikarapka nyadi lingua-franca dikena mayuh pupu raban
bansa di Sarawak bekomunikasyen enggau pangan diri dalam pengawa sida besehari-sehari.
Jaku Iban masai sereta chakah dikena bejaku, bejalaika pengawa perintah, bedaja
bedagang, dikena nudukka aum, dikena ngerembaika pengarap Kristian enggau dikena nyadi
ke jaku tauka medium dalam pelajar sekula ke lebih agi ba sekula-sekula misyen enggau
sekula-sekula ti di menua pesisir. Maya jeman Rajah Brooke ketebal agi sekula di dipejalaika
orang Putih seraya sida ke ngerembaika pengarap Kristian ngagai raban bansa Dayak ti diau
di menua pesisir. Nya alai maya jeman tu ketebal agi kereban bacha endang ditulis bala
orang Putih ke benung bejalaika pengawa sida ba sebelah endur dalam bap menua Sarawak.
Dalam pengawa betulis, maya jeman tu apin tentu mayuh orang ke dulu mereti, dulu bisi
pemandai ngengkahka penemu sida dalam pengawa betuliska bup. Tambah mega, maya
jeman tu bansa Iban apin mayuh ke beseling kain.

Dalam taun 1948, iya nya udah ampir tiga taun perintah Jipun nyerah alah, dia perintah
Koloni British lalu betapak di Sarawak. Maya jeman tu, guna jaku Iban udah ngerembai lalu
betambah besai agi. Kelimpah ari guna ti udah diterangka ba maya jeman Rajah Brooke tadi,
jaku Iban nyau dikena ngatur pechara, dikena naburka program ari Bagi Iban, Radio
Sarawak, dikena ngarang mayuh bup ti dikeluarka ari Borneo Literature Bureau (BLB) ti
ditumbuhka dalam taun 1958 enggau karang ti bukai baka Surat Pemberita ti dikeluarka ari
Opis Pemadah.

Maya Sarawak merdeka udah ti numbuhka serakup Malaysia dalam taun 1963 suba, dia
penegap penuduk jaku Iban nyau majak entap, majak kukuh. Jaku Iban mayuh dikena
ngerembaika berita pemansang menua lalu dikena bejalaika atur perintah. Kelimpah ari
perintah, keminis mega bisi naburka propaganda sida dalam jaku Iban ba sebelah menua ti
diwan bansa Iban dikena sida mantah pengawa perintah sereta ngerachun runding rayat
ngambi ke sida nyukung penemu keminis.

Jaku Iban taja iya diaku nyadi sebansa jaku tuai, jaku lama tauka jaku kelia-menya tang kenu
ku sida ke kala mansik madahka iya endang nadai kala ngembuan URUP enggau SISTEM ke
diri empu. Berindik ari tu sekeda bala ke dulu bisi belajar lalu ngaga pansik sentang jaku Iban
mudah ngaga simpul penemu sentang penuduk tauka status jaku Iban ti bendar. Keba kenu
ku Cense enggau Uhlenbeck,(1958) seduai madahka jaku Iban nya siti ari dialek jaku Melayu.

2
Taja pia, penemu seduai tu disangkal Jensen (1974) ke madahka bansa Iban endang bisi
batang jaku kediri empu ti dikumbai Jaku Iban. Nyadi penemu Jensen tu lalu bisi dikelakika
Prof. Dato’ Dr. Asmah Hj. Omar. Kenu ku pagah Prof. Dato’ Dr. Asmah Hj. Omar (1988) ke
ningkah penemu Cense enggau Uhlenbeck, dia iya madahka seduai nya enda chukup sidi
laban ke enda ampit neresapka diri ke dalam pendiau enggau gaya idup bansa Iban. Berindik
ari nya, kenu Prof. Dato’ Dr. Asmah, penemu seduai nya berupai semina nyangka aja.

Nambahka nya, Prof. Dato’ Dr. Asmah Hj. Omar (1985) mega bisi madahka jaku Iban ulih
diperatika ari dua sukut peda ti bebida, iya nya ari segi sinkronik enggau diakronik. Enti ari
segi sinkronik, jaku Iban endang meali-ali sebansa jaku lalu ukai dialek jaku Melayu. Taja pia,
enti diserenih ari segi diakronik, jaku Iban tau dikumbai dialek jaku Melayu laban sejarah
penatai enggau kerembai jaku Iban ke dulu menya endang bisi ngabih variasyen jaku Melayu.

Jantan Umbat dalam keretas kereja iya ‘Iban Language and Orthography’ maya Iban Cultural
Seminar 1993 bisi mansutka jaku tu.

“Although Iban is an old language, it does not have its own alphabets. The papan turai
cannot be used as it can be understood only by the bards (lemambang) who learn the
pengap or renong while the alphabets invented by Dunging was not known by many. As
such, Iban language orthography is based on the Roman alphabets”.

Tang ke endang nyengala, jaku Iban tu endang sebengkah tauka sebansa jaku ti endang
sama sebilik, sama seperugan lalu sama serumpun enggau jaku Melayu. Jaku Iban endang
sebengkah jaku asal ti tulin, ti lati, ti dititi, ditali siti bansa ti dikumbai Iban.

Jaku Iban nyangka amat nadai kala nyengala bisi URUP tauka SISTEM ke diri empu. Taja
pan pia, bansa Iban bisi ngembuan akal enggau kira dikena sida ngelai tauka ngingatka
sesebengka pekara ti nyadi dalam pendiau enggau gaya idup sida. Siti chara nya bemalinka
Papan Turai. Nyadi guna enggau tuju papan turai tu enda chukup dikena nangkup guna
enggau tuju urup lalu enda mega engkeman diangkat nyadika siti sistem laban iya semina
dikelala, ditemu lalu dikena semina bala lemambang aja. Nyadi papan turai semina dikena
bala lemambang ngingatka nama Petara enggau menua ti bisi kena tujah, kena kenang
dalam leka main Pengap enggau Renung aja.

Kelimpah ari nya, siku penengkebang bansa Iban ke benama Dunging Anak Gunggu bisi
udah kala buya engkurah runding bekiraka jalai ngaga urup Iban lati dalam taun 1947
nyentuk ngagai taun 1962. Urup ti ditengkebang iya tu tebilang dikumbai Urup Dunging. The
Borneo Post dalam berita ti dikeluarka kena 20 Jun 2012 bisi ngenang enggau ngelansa
sentang Urup Dunging tu. Urup Dunging asal iya ngundan 77 igi simbol tauka urup

3
(alphabet). Nyadi lebuh urup tu udah diaduka baru ulih Assoc. Prof. Dr. Bromeley Philip, dia
semua Urup Dunging semina bisi 59 igi simbol tauka urup (alphabet) ti nyerangkung 16 leka
konsonan enggau 43 leka vokal, turu vokal enggau patah sebut (syllable). Urup Dunging kala
disebut, kala dikenang dalam mayuh bengkah randau taja iya enda kala dibantaika sechara
eksklusif dalam seminar, forum, kus enggau ti bukai. Iya semina bisi buya dibantaika enggau
ngelansa dalam siti Forum Jaku Iban ti diatur Opis Menteri Pemansang Sosial enggau
Urbanisasyen begulai enggau Utusan Borneo kena 17.9.2011 tu tadi. Naka ke diatu, Urup
Dunging udah tembu dipelajarka 15 iku raban keterubah sepengelama 32 jam licha nengah
program ti dikumbai TULIS. Berindik ari nya, Urup Dunging lalu bedau bedau entap, bedau
tegap laban bedau ditemu genap rengkap bansa Iban empu.

Nyadi pemansang dalam sistem sepil jaku Iban endang lama udah dipanggul, lama udah
diatur taja pan sekeda orang madahka jaku Iban nadai ngembuan sistem jaku kediri empu.
Pemansang tu ulih diperatika ari segi kereban bacha ti kala diasilka ari menya nyentuk ke
diatu. Entara bup ti keterubah dichelak nya baka Dictionary Iban-English ti ditulis D.J.S Bailey
seduai W. Howell dalam taun 1900 enggau Tangga Serega ti ditulis dalam taun 1936. Kedua-
dua iti bup tu nadai ngembuan sistem sepil enggau jalai jaku ti menuku tang semina
bepanggai ba penau penulis tu empu. Sekeda kereban bacha ti diasilka nangkan tu mega
endang nadai meruan bepelasarka sistem sepil.

Penumbuh Borneo Literature Bureau dalam taun 1958 bisi meri pangka enggau ubah ti besai
ngagai sistem sepil dalam jaku Iban laban sida mayuh nyelak kereban bacha. Bepuluh-puluh
bup ti dichelak BLB berupai ngembuan sistem sepil ti menuku laban bisi meruan diedit
sebedau iya dichelak. Taja pia, sistem ti dikena BLB bisi ditambah manah ulih N.C. Scott
ngena sistem sepil ti dikena iya dalam bup ‘A Dictionary of Sea Dayak’ (1956) ke alai iya
mantaika tuduh penemu ngena ‘q’ nyadi simbol glotal ba semua leka jaku ti ngembuan patah
sebut vokal pandak. Nangkan tu, Anthony Richards nengah diksyenari iya ‘An Iban-English
Dictionary’ (1982) sama ngena sistem sepil tu tang bisi ditambah ngena ubah guna urup ‘C’
nganti ‘Ch’. Lalu pia mega Hussein bin Jamil seduai Henry Gana Ngadi dalam bup seduai
‘Kamus Bahasa Iban-Bahasa Malaysia’ sama ngena sistem sepil N.C. Scott tang seduai
betumbuh ngengkahka penambah ‘ka’ ba leka jaku pengawa. Nyerumba maya tu mega bala
Komiti Penempa Turai enggau Malin Pengajar ti benung chakah ngaga Turai enggau Malin
Pengajar dikena nangkup penumbuh KBSR selubang penemu setuju bepelasarka sistem
sepil N.C. Scott tang enda setuju ngena tuduh penemu Anthony Richards enggau Hussein
bin Jamil seduai Henry Gana Ngadi.

Komiti Penempa Turai enggau Malin Pengajar enggau Panel Penulis Bup Teks Pelajar Jaku
Iban KBSR enggau KBSM ti ditumbuhka Opis Menteri Pelajar Malaysia mekuh siti sistem

4
sepil jaku Iban ti menatika sebut dilah bansa Iban ari ti ngena sebut dilah bansa bukai ti
ditelah sida ATUR SEPIL JAKU IBAN. Mayuh kereban bacha ti diasilka maya tu bepelasarka
sistem sepil tu kelebih agi kereban sanding ti dikena ngajar enggau belajarka jaku Iban di
sekula maya tu. Sistem sepil tu mujur dikena ba sekula laban ketebal agi sida tu endang
mekuh pengawa dalam Opis Pelajar. Sida bisi ngaga kelai dikena jampat ngingatka sistem tu
nya ngena tukuh seremang tapa jari ti dikena ngemudahka orang ngingatka chara ngena ‘o’,
‘u’, ‘au’, enggau ‘iu’ ba patah sebut ti kepenudi dalam leka jaku. Amat atur sepil udah bisi
maya tu, tang bala tuai Iban ngasaika sistem nya bedau entap, bedau tegap laban enda
sampal ditemu, enda sampal diterima lalu enda sampal dikena. ATUR SEPIL JAKU IBAN tu
bedau chukup kukuh dikena napi pemansang jaku Iban ti majak deras.

Dalam Seminar Budaya Iban II ti diatur di Sri Aman kena 11.12.1993, Resolusyen 2 bisi
ngenang pekara tu;

Opis Menteri Pemansang Raban Bansa enggau Dayak Technical Committee patut numbuhka Komiti
Tetap awak ke mekuh pengawa nyemakaka ortografi enggau sistem sepil Jaku Iban. Komiti nya deka
nangkup tanggung pengawa mutarka isu sepil, morfologi enggau sintaksis, enggau jalai jaku, lalu
beratika bansa bukai ti patut diiru nyadi Jaku Iban. Komiti tu deka berandau enggau Opis Pelajar,
Dewan Bahasa & Pustaka enggau Majlis Adat Istiadat, tang ukai ngandalka pengereja pengawa ari
opis-opis nya tauka agensi bukai lebuh gawa awak ke penemu enda betelisih lalu asil enda betandu.
[DCF: 1995:12]

Betumbuh ari tu, dia bala pemesai ke benung mangku pengawa ba opis-opis perintah lalu
berunding mutarka pekara tu ngambi ke bisi mekuh pengawa nya. Berindik ari langgur
penemu tu tadi, dia sida lalu numbuhka Komiti Ortografi Jaku Iban. Kaban panel tu udah
bebendar bejuraika atur ti engkeman sereta menuku ngambi ke sistem sepil jaku Iban ulih
entap dikena. Beduduk ari pengeliat ati sereta bebekalka peneleba enggau penemu, dia
panel tu udah mujur ngaga sistem ti dikumbai ATUR SEPIL JAKU IBAN, sama ngambi nama
sistem sepil ti dikena dulu ari tu. Belabuh ari taun 1995, sistem sepil tu nyadika pelasar,
nyadika malin, nyadi pugu kereban sanding dalam sepil jaku Iban. Mayuh kereban bacha
dichelak bepelasarka sistem sepil tu. Taja pia, ketegal sekeda penekul ti ampir sama enggau
penekul ti kala kena teresa enggau tujah sistem sepil ti dulu ari tu, dia sistem tu mega enda
mega entap. Nambahka nya, sekeda bala ke ari opis enggau agensi perintah ti bukai bisi
beteraju, bisi belampung ati besukung bebantu ngenegapka sistem tu ti ngujungka sida enda
bepelasarka sistem tu taja pan sekeda sida nya endang tukuh ke sama enggau ngaga sistem
tu.

5
Kelimpah ari nya, ba pengawa ke ngajar enggau belajarka jaku Iban di sekula, agi mayuh
pengajar bedau meretika sistem tu. Enti penyampau pengajar agi mayuh bedau meretika
sistem tu, udah tentu lebih mayuh agi nembiak ke agi tesat. agi betekalat, agi bebesap, agi
rerangap enda ulih ngapal sistem sepil ti engkeman dikena diri ukai semina lebuh sida belajar
dalam kelas tang ke lebih agi maya sida nyaut tanya lebuh ke duduk peresa.

Segang pemansang jaku Iban dalam abad ke-21 kelebih agi dalam pemansang pelajar
sekula udah ngubah runding (paradigm shift) ti deka ngaga siti Sistem Jaku Iban ti dikira
stindid. Sistem ti ulih dikena ngajar enggau belajarka Pelajar Jaku Iban ngelui ari tikas
Penilaian Menengah Rendah (PMR) baka ti ngelama-lama tu. Maya tu tachar runding enggau
tampai perening endang udah jauh deka mai Pelajar Jaku Iban manggai ngagai tikas Sijil
Pelajaran Malaysia (SPM) ba taun 2008. Chuan sistem tu belabuh digaga urung taun 2001
dikena napi pengawa ti benung besak nulis bup teks jaku Iban ke sekula primari enggau
sekondari. Sistem tu semina ulih dipenyadi lima taun udah nya lebuh Opis Menteri Pelajar
netapka jaku Iban mesti bisi dokumen Sistem Jaku Iban ti entap enti deka ngasurka
pemansang jaku Iban ngagai tikas ti tinggi agi. Dokumen tu balat beguna ngambi ke bisi
dikena nisih (evaluate) lalu meri gred enggau sitipikit ti dikena mandingka pengulih nembiak
siku-siku enggau lebih menuku agi. Berindik ari tu, nya ti ngasilkan siti dokumen ti dikumbai
Sistem Jaku Iban Di Sekula ti mungkur Sistem Sepil enggau Sistem Jalai Jaku dalam
taun 2006.

3.0 SISTEM SEPIL JAKU IBAN DI SEKULA

Komiti Pemansang Pelajar Jaku Iban ti dipegai Pusat Pemansang Kurikulum, KPM udah
netapka penemu deka ngembuan siti dokumen dikumbai Sistem Sepil Jaku Iban Di Sekula
ti digaga bepelasarka sekeda sistem sepil ti dikena di sekula ke ngelama tu dikena napi
pekara tu:

3.1 Nyemaka kodifikasyen dalam atur ti ngena urup enggau tanda bacha dalam kereban
ti dikena belajar enggau ngajar jaku Iban di sekula.
3.2 Menatika pemanah enggau pemujur pelajar macha enggau nulis dalam jaku Iban ke
jemah ila seraris enggau jaku bukai.
3.3 Nyungkak pemansang enggau pengerembai dalam pelajar, kelebih agi ba bidang
penemu bahasa ti ulih seraris enggau segang pemansang dunya sains, teknologi
pemadah enggau komunikesyen.
3.4 Manggaika juluk ati Kementerian Pelajaran Malaysia ti ngaku jaku Iban nyadi siti ari
jaku etnik ti chakah mansang sereta regas ngerembai ngambi ke ditemu mensia di

6
serata dunya sekali ke dalam aspek pelajar sekula tauka dalam aspek bukai ti bekaul
enggau jaku Iban.

4.0 KRITERIA SISTEM SEPIL JAKU IBAN DI SEKULA

Nitih ke jurai penemu Profesor Dato’Asmah Haji Omar dalam keretas iya “Pandangan
Terhadap Sistem Ejaan Bahasa Iban Yang Disediakan oleh Dayak Cultural Foundation: Atur
Sepil Jaku Iban” (1995) ti nyadi ke pelasar lebuh ke ngaga sistem sepil tu bisi menatika
kriteria tu:

4.1 Prinsip Linguistik

Prinsip linguistik tu pelasar ti pemadu beguna lebuh merambu siti-siti pengawa ti ngasuh jaku
nya standard baikka ari aspek sistem enggau struktur fonologi tauka ari aspek struktur jalai
jaku (grammar). Taja pia, pengentap sistem sepil jaku Iban enda ulih beduduk penuh ari
prinsip tu ketegal ti bisi ngembuan pengaya jaku enggau penyelai enti dibandingka enggau
jaku bansa bukai. Berindik ari nya, kriteria ti bukai mega bisi dikenatika dikena napi pekara tu.

4.2 Penulin

Sistem Sepil Jaku Iban di Sekula tu ngembuan tukuh penulin kediri empu ti mandangka jaku
Iban endang ngembuan chuan diri lalu ukai beduduk ari chuan jaku bukai. Taja pia, chuan
sistem sepil jaku Iban enggau jaku Melayu bisi bekabih ketegal kedua-dua jaku tu ti sebilik
dalam jaku seperugan.

4.3 Penyedang

Jaku Iban sekalika jaku asal tauka jaku injau endang ditulis ngena urup Roman. Berindik ari
tu, sistem sepil tu digaga lalu ditaga ngena lambang ti enda kelalu lebih ngambika mudah
dipereti lalu dikarapka chukup dikena napi pelajar jaku Iban ti disadang deka dipelajar sereta
dikerembaika ngagai bansa bukai.

4.4 Pengelentur

Dalam sistem pelajar sekula, jaku Iban agi ba tikas ti benung ngerembai mansang ari semua
aspek. Berindik ari nya, sistem sepil jaku Iban digaga enggau naka ulih ngambika setipak
enggau pemansang jaku Iban kemaya hari tu ngena chara berinjauka jaku bansa bukai
dikena napi segang pemansang dunya sains enggau teknologi.

7
4.5 Praktikal

Sistem sepil ti standard, tegap sereta entap mesti praktikal dikena ba sebarang alai enggau
maya lalu diterima semua orang ke belajar enggau pengajar ke ngajar jaku Iban sereta
nemban dikena lalu nadai pulai ke penanggul Sistem Sepil Jaku Iban di sekula tu ngembuan
taga kediri empu nya alai sistem sepil tu mesti bepelasarka jaku Iban ti dikena dalam
kurikulum sekula ti ulih ngayanka SITI BANSA, SITI JAKU ke jemah ila.

5.0 TRANSFORMASYEN SISTEM SEPIL JAKU IBAN DI SEKULA

5.1 Urup

Jaku Iban ditulis ngena dua puluh enam urup Roman. Semua urup besai enggau mit
dikena magang lebuh nulis jaku Iban ti asal enggau jaku injau.

5.1.1 Konsonan

Jaku Iban ngembuan dua puluh tiga urup konsonan. Ari dua puluh tiga urup
konsonan, enam belas nya urup konsonan tulin: b,d, g, h, j, k, l, m, n, p, r, s, t, w, y
enggau dua urup konsonan turu: ng, enggau ny dikena ngelai munyi asal dalam jaku
Iban. Dalam jaku Iban, konsonan c dilambang ngena konsonan turu ch ti dikena
ngayanka identiti enggau penulin jaku Iban. Kelimpah ari nya, konsonan c, f, q, v, x
enggau z ditaga kena nyepil jaku injau.

5.1.2 Vokal

Jaku Iban enti diperatika ari segi linguistik ngembuan enam urup vokal: a, e (pepet), e
(taling), i, o enggau u. Taja pia, enam urup vokal tu semina ditanda ngena lima iti
lambang aja laban e (pepet) enggau e (taling) sama ngena lambang e. Semua
lambang ti dikena ngelai munyi vokal nya tau dikena magang lebuh nyepil jaku Iban.

5.1.3 Diftong

Diftong nya urup vokal berimbai dua ti disebut nyadi siti munyi. Jaku Iban semina bisi
ngembuan tiga leka diftong: ai, au enggau ui ti diengkah ba ujung leka jaku. Taja pia,
dalam jaku injau sekeda diftong tu bisi ditemu ba pun tauka tengah leka jaku.

8
5.2 Jaku Injau

Jaku Iban tu siti ari jaku ti benung mansang sereta ngerembai nyerumba singkang
pemansang dunya kemaya hari tu. Dikena napi pemansang tu, atur ti ngumpul, nuru
lalu ngemasukka jaku injau ari jaku bansa ke pengaya jaku sigi chakah dipejalai
ngambi ke jaku Iban ulih seraris enggau jaku bukai ti udah tegap. Bisi tiga chara
nginjau jaku ti nyadika pelasar lebuh ti ngaga sistem tu.

5.2.1 Polisi Nginjau

a. Nginjau ari jaku English

Jaku English nya sebengkah jaku bansa bukai ti chakah diinjau ke dalam
jaku Iban dalam semua bidang pelajar berindik ari jaku tu udah entap dikena
sereta ngerembai serata dunya ti ngujungka iya diaku nyadi jaku
antarabansa. Proses nginjau jaku English endang diatur enggau cheremat
ngambi ke iya entap lalu nadai menyati jaku Iban empu. Gaya jaku injau ari
jaku English ti dikemisika dalam jaku Iban tau dibagi ngagai beberapa
kategori.

b. Nginjau ari jaku Melayu

Jaku Iban mayuh baka ti nginjau leka jaku ari jaku Melayu laban jaku dua iti
tu endang seperugan. Taja pan pia, sistem sepil ti dikena diatu enda
ngemeranka jaku Melayu nyadika batang pelasar jaku injau dikena
ngelipakka jaku Iban mudah diteresap, mudah dibungkur jaku Melayu ti tau
ngujungka jaku Iban mudah dikumbai nyadi dialek jaku Melayu.

c. Nginjau ari jaku seperugan (nusantara)

Jaku injau ari jaku seperugan ketebal agi jaku Melayu ti bisi diserapka ngagai
jaku Iban mayuh enda disepil nitihka jaku asal. Sistem Sepil Jaku Iban Di
Sekula netapka chara nginjau jaku ari bansa bukai enda bepelasarka sistem
sepil jaku asal ti alai nginjau tang nitihka sistem sepil jaku Iban ti nginjau jaku
nya. Taja pia, bisi mega leka jaku ti diinjau nya agi mengkang serupa. Gaya
jaku injau ari jaku English ti dikembuan dalam jaku Iban tau dibagi ngagai
tiga kategori.

9
5.2.2 Sistem Sepil Jaku Injau

a. Injau terus

Leka jaku diinjau, diambi sereta diterima enggau silik ari jaku asal. Reti nya
iya nadai berubah ari segi sepil enggau reti taja pan disebut nitihka kaul dilah
Iban.
Chunto:
karya vokal bebas (Melayu)
visual bank hotel (English)

b. Injau salin

Dalam proses nginjau ti bansa tu, leka jaku ti diinjau disalin lalu dibali ngagai
jaku Iban. Taja pia, reti enggau konsep leka jaku nya agi mengkang sama
enggau jaku asal.

Chunto:
honey moon - bulan madu
night market - pasar malam

c. Injau pengasai

Dalam kategori jaku injau ti bansa tu, leka jaku ti diinjau diserasi lalu disepil
nitihka pengentap sistem sepil jaku Iban ti udah ditetapka. Sekeda urup
dalam leka jaku ti diinjau berubah nitihka penemban urup lebuh disebut tauka
disepil dalam jaku Iban.

Chunto:
bomb - bom - tingkil konsonan sengian b
computer - komputer - c berubah nyadi k nitih ke sebut (konsonan)
dobby - dobi - konsonan berimbai bb betukar nyadi siti b
system - sistem - y betukar nyadi i nitih ke sebut (vokal)
telephone - telefon - phone nyadi fon nitih ke patah sebut
prism - prisma - ism nyadi isma nitih ke penemban sebut
(semua leka jaku ti beujungka ism dalam jaku Inglish
betukar nyadi isma

10
d. Injau serap

Dalam kategori ti bansa tu, leka jaku ti diinjau endang udah entap sereta
masai dikena dalam jaku Iban. Berindik ari nya, semua leka jaku ti diinjau
serap enda nyengala menatika gaya tukuh visual leka jaku nya ditulis dalam
jaku asal ti alai nginjau. Sepil iya ditulis ketebal agi nitihka munyi ti disebut
ngena kaul dilah Iban.

Chunto:

Jaku English Jaku Iban


apple ipul
appeal apil
cancel kinsil
driver deriba
doctor lutur /doktor
fashion pisin/ fesyen
free man periman
foul pawal
go-astern gustan
go-ahead guhit
hospital sepital
museum mijum / muzium
number lumur /nombor
plan pelin
slipper selipar /selipa
zinc jing/ sing/ zing

v. Injau penakan

Dalam jaku injau ti bansa tu, leka jaku asal ti diinjau ditawingka enggau jaku
Iban ti mai reti enggau konsep ti sebaka enggau jaku asal lalu disepil nitihka
sebut Iban.
Chunto:
gown - baju gaun
boot - kasut but
gate - pintu get

11
c. Jaku injau ari jaku bansa bukai

i. Injau terus lalu leka jaku ti diinjau ditulis chundung (italicised)

Dalam proses nginjau ti bansa tu, sekeda jaku bansa bukai ti diinjau, diambi
sereta diterima enggau silik ari sepil, konsep enggau reti tang ditulis
chundung. Ketebal agi jaku injau ti bansa tu dikena dalam laras jaku ti
spesifik.

Chunto:

Penatai Leka jaku Reti


Latin ultra-vires ngereja pengawa ngelui tikas kuasa
ti patut
Jerman Weltanschauung perening/ tampai dunya
Peranchis coup d’ etat ngerampas kuasa sechara kasar,
pejal sereta enda beradat
espirit de corps semengat begempung

ii. Jaku injau serap

Proses nginjau serap jaku bansa bukai sebaka enggau atur nyerapka jaku
English. Leka jaku bansa bukai ti udah masai dikena dalam jaku Iban disepil
enda nyengala menatika gaya tukuh visual leka jaku nya ditulis dalam jaku
asal ti alai nginjau tang ditulis ketebal agi nitihka munyi ti disebut ngena kaul
dilah Iban.

Chunto:

Jaku Iban Asal jaku


serega, neraka Sanskrit
kedai Tamil
seleju Arab/Parsi
tauke, pangking China
mija, gerepu Portugis
sepatu Belanda
karaoke Jipun

12
6.0 POLEMIKS NGENTAPKA SISTEM SEPIL JAKU IBAN

Jaku Iban ti kemaya hari tu udah majak mansang, udah majak ngerembai ukai semina ba
menua tu aja tang nyau jauh ngerekai ngagai menua bukai. Berindik ari nya jaku Iban enda
tau enda digaga standard ari semua segi ti tau ngasuh iya entap, ngasuh iya kukuh. Dalam
atur ti deka ngentapka siti sistem dia iya enda tau enda dulu betempuh enggau sekeda
penanggul. Mayuh amat penanggul ti bisi ngasuh pengawa ti deka ngentapka sistem sepil tu
tejanggal. Sekeda ari sida nya baka tu:

6.1 Kurang Daja (Promosyen)

Udah manggai tujuh taun Sistem Sepil Jaku Iban Di Sekula udah dikeluarka, enda
bulih 50% bansa Iban ke nemu macha enggau nulis kala meda bup atur sepil tu.
Semina bala ke mekuhka pelajar Jaku Iban dalam Opis Menteri Pelajar ke nemu
sentang Sistem Sepil Jaku Iban Di Sekula. Kelimpah ari sida tu, semina mimit aja
bala ke ukai dalam sistem pelajar sekula nemu sistem tu udah bisi. Baka ni ku sida
ulih nemu ngena sistem enti sida nadai ngembuan tauka nadai kala meda bup tu?

Opis Menteri Pelajar ti nyelak sistem tu semina nagaka guna ngagai bala nembiak
enggau pengajar ke belajar enggau ngajar subjek Pelajar Jaku Iban di sekula aja
setipak enggau topik iya Sistem Sepil Jaku Iban Di Sekula. Berindik ari nya,
bungkur daja, sadung enggau promosyen iya mega semina menatika opis pelajar
menua, pelilih menua enggau sekula aja lalu enda ngerembai ngagai bala bukai.

Taja pia, sekeda opis perintah, agensi perintah, kompeni penyelak kereban bacha
dalam jaku Iban enggau siku dua bala bukai ke angkunka sistem jaku Iban ti betul
bisi sama buya nyimpan lalu ngena sistem tu. Tang ke mayuh agi bala bukai nadai
sistem tu. Bup Sistem Sepil Jaku Iban Di Sekula tu nadai dijual ba kedai ti ngujungka
sida nadai kereban tu. Reti nya, sistem sepil tu enda chukup dibantai, enda chukup
didaja lalu enda chukup promosyen ngagai mensia mayuh.

6.2 Tatak Kuasa enggau Autoriti

Naka ke diatu, semina raban ke dalam Opis Menteri Pelajar ke udah ditetapka mesti
bepelasarka sistem tu dalam semua atur ti belajar enggau ngajar jaku Iban. Kebuah
pia, laban sistem tu endang ari pun semina nangkup kena enggau guna dalam sistem
pelajar sekula. Tuju ti ngaga sistem tu endang meali-ali dikena nisih pengulih
nembiak dalam pelajar Jaku Iban maya sida napi peresa PMR enggau SPM. Taja

13
pia, diatu sistem tu mega bisi udah diaku, diiru opis bukai baka Opis Menteri Pelajar
Tinggi baka ti dikena ba UPSI enggau Unimas, Opis Menteri Pemadah,
Komunikasyen enggau Gaya Idup nengah RTM sekali ke ari churung radio tauka ari
panchar televisyen, sekeda agensi perintah, penyelak surat kabar, penyelak majalah
enggau sekeda ti bukai. Taja pan sida bisi ngembuan sistem tu tang sida enda
semesti iya neritka atur ngena sistem tu. Berindik ari nya, Opis Menteri Pelajar ti
ngaga sistem tu nadai kuasa enggau autoriti ngerara tauka nyalah orang bukai ke
ukai dalam sistem pelajar sekula enti sida bisi enda ngena atur ti dikemisika dalam
sistem tu.

Sepekara agi penekul ti diasaika nya tatak kuasa enggau autoriti ti ngusaika baru
sistem tu ngambi ke iya ulih ditambah manahka agi. Sistem ti dikemisika diatu
endang ditemu agi mayuh penimpang, agi mayuh pengurang. Tang sapa ke beempu
tanggung pengawa ngaga nya baru. Enti semina arapka Bahagian Pembangunan
Kurikulum (BPK), sistem tu disadang enda ulih tetapika guna ti lebih luas bungkur
ngelui ari opis pelajar. Diatu udah datai maya sistem tu patut ulih dikeandalka lalu ulih
dikena semua orang. Berindik ari nya, mesti bisi ‘ruai’ ti entap tegap mekuh sentang
pekara ti ngubah lalu nambah pemanah ngagai sistem tu ke guna ke jemah ila.

6.3 Semengat Bebagi Menua

Penyarut dalam menua udah lama pukas tang sekeda bansa Iban agi balat
ngembuan runding enggau ati ti bebagi ai, bebagi menua siti-siti. Nya alai sida apin
ulih nerima ubah tauka pemansang ti baru ke lebih agi ba sentang ti bekaul enggau
bansa Iban. Penemu enggai alah, enggai saum, enggai serumpu enggau pangan diri
sigi nyadika penanggul. Kenu ku sekeda bansa Iban empu, Sistem Sepil Jaku Iban Di
Seklula (2006) mega bedau standard laban semina ngarika menua siti aja lalu enda
mungkur jaku bansa Iban bap Sarawak. Amat kini penemu tu? Maya ke ngaga sistem
tu suba, bala ke bisi enggau nya amat enda ulih ngarika semua menua enggau ai ba
bap Sarawak tang endang diambi sereta dipilih ari menua siti-siti lalu ukai semina
digaga bala ari siti menua aja munyi ti dipetenah.

Ambi ke banding, sebengkah majalah ti dikarang ngena jaku Iban ti chukup tebilang,
dikeandal sereta dikeangkunka semua bansa Iban bap dunya tu, kala bisi buya
mantah sistem sepil jaku Iban baka tu.

Kitai ENDA PATUT majakka jaku ari sebagi tauka siti menua aja nyadika jaku ke patut
ditemu ditampung rebak ke dudi ila. Enti enda pia, iya tau nyadi penyerekang lalu ukai
nyerakupka bansa IBAN! ….

“Ambika banding leka jaku rapal enggai nyadi dikumbai salah laban iya sama reti enggau
lapar. Baka nya mega baka leka jaku legi enggau lagi, geregar enggau gelegar, tirul
enggau tilur, urul enggau ulur, ural enggau ular. Semua leka jaku nya betul magang laban
chara nyebut ba sebengkah-sebengkah menua enda sebaka.” 14

[ Pegari Vol.4, (2003:6) ]


Ni maya SEPIL JAKU IBAN deka entap terenah enti selalu diubah?!! Patut tauka enda, Jaku
Iban ari menua siti aja ke nyadi jaku ti mesti diambi setindit? ….

“Jaku ari tiap bengkah menua ke patut diperatika ku kami ba jaku kenang dalam Majalah
Pegari Vol. 4 iya nya jaku ke ukai semina tau dikena lebuh nulis dialog tauka dikena nulis
jaku. Kebuah pia, raban kami PEGARI IBAN PRODUCTION datai ari mayuh bengkah menua
baka ari Batang Lemanak, Batang Anap Tatau, Batang Rajang Kanowit, Saratok sereta
Batang Sut, Batang Balleh Kapit. Ari nya , jaku kami bebida lalu kami ngambi pemutus ba
tengah baka idung entara mata, baka dilah entara nyawa, sama setujuka jalai jaku enggau
leka jaku ari tiap bengkah menua MESTI digaga nyadi jaku Iban setindid (standard) lalu
MESTI dikena ukai semina ba dialog, tang mega tau dikena lebuh ke nuliska ayat. Ukai
semina tau dikena berandau besehari-hari tang mega tau dikena nulis, laban nya endang
JAKU ASAL. Chunto SEKEDA ari leka jaku ASAL ti ku kami nya iya nya riur (liur), tirur (tilur),
rapal (lapar), geregar (gelegar), rambal (lambar), urur (ulur), ural (ular), buah purul (buah
pulur), legi (lagi), tanggi (tanggui), ikan kali (ikan kalui), kerabul (kelabur). Semua leka jaku
tu mai reti ke sebaka, tang disebut lalu dikena ba bagi menua ke bebida lalu leka jaku tu
ngena memagang”

[ Pegari Vol. 5 (2003:5) ]

Diatu penemu ti munyi tu nadai agi didinga, nadai agi disada. Majalah tu udah
enggau naka ulih ngeluarka karya sida bepelasarka sistem sepil ti dikena di sekula.
Puji diberi ngagai raban sida tu ketegal ke dulu ari semua bala bukai menatika
pengentap sistem sepil dalam karya sida. Sida udah tebuka ati enggau runding lalu
seruran bekempit rapit enggau bala ke mekuh sistem tu begandin bau
ngemansangka jaku Iban ti standard taja pan bungkur kuasa enggau autoriti semina
nagaka sekula aja.

6.4 Sindrom Liat Berubah

Dalam pemayuh teori sentang ‘Change Management’ nyau deka selampur sida
madahka setiap pekara ti baru dibantai ke guna mensia mayuh sigi enda kala ulih
nyeliahka diri ari ti kena bantah, kena sakal. Sekeda mensia sigi ditemu lembau
nerima sebarang ubah penemu ti baru. Ba atur ti deka ngentapka sistem sepil jaku
Iban penemu ti baka tu endang agi bisi pengamat. Maya ke begempuru bejuraika
penemban sistem tu suba, agi tubah bala (orang bukai ke ari luar sistem pelajar
sekula) ke enda setuju enggau sekeda atur ti udah diputuska komiti ti nangkup
pengawa ngaga sistem tu. Berindik ari nya, sekeda pemutus asal enda dipenyadi lalu
diubah nitihka bantah sida taja pan bantah nya nadai nyengala bepanggai ba prinsip
sistem sepil. Ketebal agi bantah nya bepanggai ba pengasai ati diri. Ambi ke chunto

15
sida mantah sistem sepil enda engkeman laban atur nyepil sekeda leka jaku nya rari
ari sebut enggau sepil ti udah dikena selama jeman taja pan salah ari segi prinsip
atur sepil. Nya kebuah dokumen tu dikumbai Sistem Jaku Iban Di Sekula laban
sekeda orang enda ulih nerima ubah tauka atur ti udah diambi nyadika pelasar maya
ngaga sistem tu. Enti dekaka 1Sistem, 1Jaku, 1Bansa tu nyadi, semua mesti
sanggup nerima ubah lalu ngelengkaka sekeda penemu lama ti nyadi penekul.

6.5 Kurang Pengangkun

Penegap enggau pengentap sistem sepil tu sama sebaka enggau pekara bukai ti
balat bepanggai ba pengangkun enggau pengandal ati sapa bagi orang ke patut
ngemansang lalu ngerembaika iya. Agi mayuh bansa Iban tulin nadai penyiru enggau
jaku diri. Bepelasarka sekeda kereban ti bisi kala ayan sekali ke dalam bup, surat
kabar, majalah, blog, lirik lagu dalam karaoke, mua bup, twitter, sms tauka chara
pengerembai berita ti bukai, sida sepeneka ati nyepil leka jaku ti dikena enggau nadai
bekiraka pemetul tauka penyalah ari segi sepil. Ulah enggau perangai ti baka tu tau
nyerengkap, tau neresap ngagai bala Iban bukai baik ke bala nembiak tauka besai
tuai, ti ngujungka jaku Iban ti lati mudah ditelanjai, mudah dipesundalka sepeneka ati
lalu dikena enggau nadai bepelasarka atur tauka sistem. Gaya ubah ti negatif baka tu
tau ngelelang, tau ngemidangka jaku Iban ke jemah ila enti enda dulu diambat
enggau chara ti engkeman.

6.6 Bepikir Singit [Negatif]

Lebuh mensia nadai pengangkunka pesaka diri, dia iya belabuh dikeruga runding
tauka pikir ti beba, ti bebalut lalu singit nyelelai ngagai ati ti negatif. Dalam jaku Iban,
sekeda orang ke ngembuan perangai tu madahka jaku Iban tu nadai guna, nadai
penguntung, nadai rega komersial, nadai stindid enggau jaku ti nadai tuju.

Betumbuh ari pikir enggau runding ti baka tu sekeda menua enda meras, enda
mentas, enda senganging, enda tekuing ati deka nudukka kelas alai belajarka jaku
Iban taja pan sekula sida nya endang tebal diwan nembiak Iban. Lalu pia mega
sekeda kepala pengajar enggau pengajar bansa Iban enda sanggup ngatur kelas
jaku Iban laban enggai ringga hari enggau jam ti manah agi dikena ngajar subjek
bukai ti ulih meri pemutus peresa ti dikeangkunka perintah dalam peresa UPSR,
PMR enggau SPM. Nitihka rikot ba Opis Pelajar Menua Sarawak, agi mayuh sekula
primari enggau sekondari ti bisi chukup nembiak bansa Iban enda ngaga kelas alai
belajarka jaku Iban. Lebuh Kurikulum Standard Sekolah Rendah (KSSR) dibantai

16
nganti Kurikulum Baru Sekolah Rendah (KBSR) dalam taun 2011 suba, penuduk jaku
Iban dalam sistem pelajar sekula baru bisi meruan pengkalan, meruan penepan ke
nyengala lalu iya dikategori nyadi siti ari mata pelajar Elektif Komunikasyen sebaka
enggau jaku China, jaku Tambi, jaku Kadazandusun enggau jaku Arab. Semua
sekula tauka semua nembiak mesti bisi ngambi siti ari jaku tu belabuh ari primari
satu. Taja pia, naka ke diatu agi mayuh sekula ti diwan majoriti bansa Iban enda
bejalaika atur tu laban sida ngembuan pikir ti singit ngagai jaku Iban.

Kelimpah ari nya, sekeda apai indai nembiak enda ngasuh anak belajarka jaku Iban
taja pan sekula ti alai anak sida sekula nya bisi ngajar Pelajar Jaku Iban laban ti
nadai guna, nadai penguntung, nadai rega komersial, enggau nadai prospek kenu.
Sekeda ke bukai enggai mai anak enggau bini bekomunikasyen dalam jaku Iban
laban ti nadai stindid kenu. Sekeda agi apai indai nadai bepelasarka polisi ‘One
Parent, One Language’ (OPOL). Ke bendar, enti bansa Iban jadi enggau bansa
bukai, dia jaku ti dikena bekomunikasyen nya patut ngena jaku Iban tauka jaku ari
bansa ti nampil nya tang ukai ngena jaku bansa bukai ti ukai jaku ari kedua-dua apai
indai. Penemu ti bansa tu tau ngujungka sekeda bala anak enggau uchu kitai ke
jemah ila enda meretika jaku Iban ti betul.

7.0 KUING TUJU SISTEM SEPIL

7.1 Nyadi Temuku Kereban Sanding

Semua bansa endang ngarapka jaku diri ulih ditampung, ulih diariska ngagai suku
juru, ichit wit ke jemah ila ngambi ke jaku nya enda lelang, enda midang ari dunya tu.
Siti pekara ti enda tau enda dikembuan dikena bejadi juluk ati tu nya sistem ti entap
sereta tegap lalu dikena semua orang. Semina sistem ti tetangkup sereta tetapika
juluk tu tau diambika pugu, diambika temuku nyadika kereban sanding semua orang
dalam semua pekara ti bekaul enggau jaku. Berindik ari penemu tu, bansa Iban mesti
ngembuan siti sistem sepil ti dikumbai SISTEM SEPIL JAKU IBAN.

7.2 Nubu Pemansang Modal Mensia

Jaku selebubu sekeda mensia ke madahka jaku Iban nya nadai guna, nadai
penguntung, nadai rega komersial, nadai standard enggau jaku ti nadai tuju agi ulih
ditingkah, agi ulih disanggah. Kebuah alai pia, kemaya hari tu mayuh anak Iban udah
pansut pegari bulih pemandai, bulih pengawa lalu bulih pangkat ketegal jaku Iban.
Enda kurang ari dua, tiga iku anak kitai Iban udah ngerengkun pemandai ngagai tikas

17
Phd, bebelas ke bukai ngenggam masters degree lalu bepuluh-puluh agi benung
ngeredanas ngulihka degree dalam pelajar jaku Iban. Bala sida tu meh ke nyadi
pesaka bansa lalu dikarapka mangku sekeda pengawa baka ke nyadi pengelicha
(lecturer), nyadi pemesai ba opis, nyadi pengajar enggau sekeda pengawa bukai ti
bekaul enggau pemansang jaku Iban ke jemah ila.

Diatu penyampau nembiak ke bisi belajarka Jaku Iban ba institusyen pelajar tinggi di
Malaysia ari taun 2010-2012 majak nambah. Semua sida tu belajar bepelasarka
Sistem Sepil jaku Iban Di Sekula. Atur ti deka nubuka modal pemansang mensia
baka tu enda ulih dipenyadi enti nadai sistem ti entap dikena. Keba enti ati agi deras,
agi keras deka meda pemansang ti bansa tu ngelui ari ti udah, bansa Iban mesti
ngembuan siti agi sistem jaku ti lebih entap, lebih tegap dikena napi ubah pemansang
tu.

Penyampau Nembiak Belajarka Jaku Iban Ba IPTA

Tempat Program Taun Penyampau


UPSI Minor 2010 20 iku
2011 6 iku
2012 10 iku
DPLI 2011 7 iku
2012 18 iku

IPG RAJANG Bachelor 2011 20 iku


2012 24 iku

UNIMAS Bahasa Ketiga 2010 46 iku


2011 69 iku

7.3 Nanggam Penyerakup Bansa

Jaku Iban ulih nyadi tali penanggam, tali penanchang lalu ulih nyadi simpul temuku
kaul ati dalam komuniti Iban ke udah, ke diatu enggau ke jemah ila. Keba semua
bansa Iban ulih bekomunikasyen enggau mudah entara sida sama sida tauka entara
sida enggau orang bukai dalam jaku Iban. Jaku Iban enggau enda milih ari ai siti-siti,
menua siti-siti sigi ulih ditemu reti maya ti bekominkasyen sekali ke maya bejaku
tauka dalam tulis laban sida sama ngembuan siti sistem jaku ti sama. Semua leka

18
jaku Iban ti disebut lalu dikena ba ai enggau menua siti-siti endang sampal dikena,
sampal dikeangkunka taja pan chara enggau gaya nyebut enggau ngena nya
nyangka bisi bida.

Jaku Iban tu meh siti pesaka tuai, pesaka lama ti agi meruan dikeangkunka semua
bansa Iban. Taja pan bansa Iban mayuh udah pechah belah dalam mayuh aspek
tauka apak jalai pengidup ti bukai tang jaku Iban agi ulih mai semua begempung, mai
semua sama saum ati.

7.4 Nempa Identiti Bansa

‘Bahasa Jiwa Bangsa’ enggau ‘Bahasa Cemerlang, Bangsa Gemilang’ nya sekeda
ari entelian ayat peransang ti suah didinga dikena bansa Melayu ngelagu pemansang
jaku sida. Nama enggi bansa Iban deh? Suah mega kitai ninga sada ti munyi tu,
‘Dikelala buah ari langgu, dikelala basa ari penyiru, dikelala bansa ari jaku’.
Genteran jaku tu enti semina disebut lalu nadai meruan dikukun ngena atur, perambu
pengawa tauka program ti menuku sigi nadai mai empas ti nyengala ngagai bansa
Iban. Abis semina disebut dalam rakup dabung seleka aja.

Nyadi diatu, tuai-tuai bansa Iban enggau sekeda bala Iban ke ngembuan penau
enggau pemandai, ngembuan pengangkun enggau penemegahka jaku Iban udah bisi
ngembuan paradigma baru dalam ngemansangka jaku Iban. Aktiviti baka forum,
simposium, seminar, aum enggau kereja jurai ti bukai majak mayuh diatur. Bansa
Iban endang kenyau ari kelia menya udah mereti semina jaku Iban lati ulih ngasuh
bansa pegari lalu ditemu semua bansa bukai di dunya tu. Jaku Iban tu ke engka
pesaka tuai, pesaka lama ti agi lati dipekunsika semua bansa Iban enggau enda
ngira ai enggau menua siti-siti dalam ampar Pulau Borneo. Pagila lusa bansa Iban
sigi udah sedia meransang diri ngangkatka genteran jaku ‘Jaku Lati, Bansa Pegari’.

8.0 SEKEDA PENYILAP RAMA MAYA NYEPIL

Pansik ti rumpas bisi digaga dikena meratika gaya sekeda penyilap ti suah ditemu maya ti
nulis ngena jaku Iban. Pansik tu bisi diambi ari 50 iti karang ti bisi dianjung ngagai Pekit
Ngarang Esei Kenegaraan taun 2007-2011 ti diatur Opis Pemadah Sarawak, 5 buah blog, 5
buah grup mua bup enggau 5 buah pengkalan twitter ti bekomunikasyen ngena jaku Iban.
Belalauka pansik nya, dia sekeda penyilap rama ti bisi ditemu nya baka tu:

19
8.1 Nyepil Nitihka Sebut Dilah Tilur

Orang Iban endang sebaka enggau bansa bukai tang ke tebal agi orang ke diau di
nusantara ke endang nali jaku Melayu. Ari nya sida enda ulih rari ari ke nyebut
sekeda leka jaku enggau chara ti enda engkeman.

Chunto:

Leka jaku Sebut tilur Sepil ti patut


ular urar (ural/uhal) ular
sayur sayul sayur
rari lari (hahi) rari
selur serur (serul) selur

8.2 Nyepil Ngena Sistem Lama

1. Ubah Pola (Tukuh) Sepil Ti Baru

Sepil Ti Salah Sepil Ti Betul


Pola sepil Chunto Pola sepil Chunto
a–e tasek, maseh a–i tasik, masih
a – e taling ngarey, tambey a–e ngare, tambe
a–o taroh, ngasoh a–u taruh, ngasuh
e taling – a merah i–a mirah
e pepet – o melot, keroh e pepet – u melut, keruh
e pepet – e serey, cheregey e pepet – e sere, cherege
taling taling
e taling – e gelek i–i gilik
pepet
i–e bilek, tilek i–i bilik, tilik
i–o pitoh, sirok i–u pituh, siruk
o–a orang, rosak u–a urang, rusak
o–e boleh u–i bulih
u–e mureh, burek u–i murih, burik
u–o burok, tuboh u–u buruk, tubuh

20
2. Vokal berimbai dua

Lama Diatu Sepil lama Sepil baru


oa ua moa mua
menoa menua
ao au baong baung
remaong remaung
io io beliong beliung
tiong tiung
oi ui maloi malui
nyemboi nyembui
ei e taling serei sere
ngemalei ngemale
ie i entelie enteli
serie seri

3. Vokal berimbai tiga ti berubah chara nyepil

Vokal Sepil lama Sepil baru


aia maia maya
semaia semaya
kemaia kemaya
aio maioh mayuh
sengaioh sengayuh

4. Vokal sengian

Jaku Iban endang ngembuan sekeda vokal sengian ti enda nyengala disebut taja pan
segenda ditulis ba leka jaku. Jaku Iban tulin endang nadai ngembuan turu konsonan
st, rj, rt enggau rb. Lebuh disepil, sida meseti diselepakka enggau vokal e, lalu meri
siti patah sebut ti menuku. Sepil leka jaku ti bansa tu sigi tebalan ditemu dalam bup ti
ditulis urang Putih. Sida nyepil leka jaku tu nitih ke sebut kaul dilah sida empu lalu
enda menatika sebut kaul dilah bansa Iban.

21
Chunto:

Suah Disepil Patut Disepil


brita berita
chermin cheremin
chermat cheremat
driba deriba
grenti gerenti
gertak geretak
germai geremai
kerja kereja
serta sereta
serba sereba
terbai terebai
tringkas teringkas

9.0 SIMPUL ENGGAU TUDUH PENEMU

9.1 Berakup Ngemansangka Jaku Iban

Jaku Iban udah datai ba tikas ti patut nerima paradigma baru ngambi ke iya seraris
enggau pemansang dunya ti balat kena segang umbak dunya globalisasyen. Berindik
ari tu, semua bansa Iban udah datai ba maya ti besengkukut, maya besaup, maya
berakup begandin bau sama-sama menatika pemansang jaku Iban enda ngira latar
pendiau enggau pengidup, enda ngira pengaya enggau pemerinsa, enda ngira
pemandai enggau pengelap, enda ngira ideologi politik lalu enda ngira penatai ari ai
enggau menua siti-siti. Semua bansa Iban beempu tanggung pengawa
ngemansangka jaku Iban. Turuka wang enggau duit ringgit, gelumuka akal enggau
kira, kukun kuasa enggau autoriti sereta temukuka pengering enggau pengeliat ati
dikena ngambat paradigma baru dalam transformasyen sistem jaku Iban.

9.2 Saum Siti Sistem Jaku

Dalam millennium ti balat tujah chabar baka ke diatu, jaku Iban enda ulih rari ari ti
ngembuan siti jaku ti lati, ti sistem ti tuchi sereta enggau siti bansa ti pegari. Udah
datai ba maya semua opis perintah, agensi perintah, gerempung enggau serakup,
kompeni penyelak, media sosial enggau semua ti bukai saum lalu angkunka siti aja

22
sistem jaku Iban ti nyerangkung sistem sepil enggau sistem jalai jaku. Juluk ati ti
deka ngembuan 1Sistem, 1Jaku, 1Bansa mesti deka dipenyadi.

9.3 Daya Besemekih

Peneras pemansang jaku Iban ba dunya kemaya hari tu bepanggai ba pengangkun


semua bansa Iban ke ngena jaku nya dalam komunikasyen sida sehar-hari. Ari ati ti
angkun, ti andal sereta temegah ngena jaku diri empu, nya tau ngujungka jaku Iban
ulih besemekih enggau jaku bukai ti lama udah bisi pengentap, bisi penegap. Kitai
mesti udah besedia ngelipakka diri ari ti suah dipenyati orang bukai ti ngumbai kitai
Iban banyak tai badak, mayuh tai nyumbuh.

10.0 PENUTUP

Jaku Iban endang amat jaku lama, jaku kelia, jaku tuai ti nyadi pesaka diaris ari aki kini jeman
kelia. Kenyau ari jaku tu dibai pindah ari menua asal neresa mayuh jeman, nujah mayuh
menua, iya sigi agi tuchi beresi, agi lati ti ngasuh iya meruan dikeangkun, meruan
dikeandalka bansa Iban nyentuk ke millineum tu. Mayuh ubah enggau pemansang udah
nyadi dalam jaku Iban. Diatu pemansang jaku Iban nyau jauh nyulut enti dibandingka enggau
jeman kelia menya. Kelimpah ari ti dikena bejaku, jaku Iban mega bisi dikena
bekomunikasyen dalam media sosial baka dalam internet, blog, mua bup enggau twitter
tauka dalam media chelak ti nyadi kereban bacha baka bup, majalah, lambar keretas enggau
ti bukai. Berindik ari peneras ubah tu, dia Sistem Jaku Iban Di Sekula ti dikena diatu patut
diserenih, patut ditisih sereta patut ditambah manahka agi ngambi ke iya ukai semuti ulih
nangkup ungkup dalam sistem pelajar sekula tang mega mungkur semua bidang ti bukai.
Jaku Iban patut ngembuan SISTEM JAKU IBAN LATI, siti dokumen menuku ti nyadi kereban
sanding ke semua orang ti belajar sereta belajarka jaku Iban ke jemah ila dalam semua
bidang pelajar ti begunaka iya. ‘JAKU LATI, BANSA PEGARI’.

KEREBAN PENYANDING:

1. Asmah Haji Omar. “Pandangan Terhadap Sistem Ejaan Bahasa Iban Yang
Disediakan oleh Dayak Cultural Foundation: “Atur Sepil Jaku Iban”, 1995.
2. ________________. The Iban Language of Sarawak: A Grammatical Description.
Kuala Lumpur: Dewan Bahasa dan Pustaka, 1981.
3. Howell, William, enggau Bailey, D.J.S. A Sea Dayak Dictionary. Singapore: The
American Mission Press, 1900.

23
4. Scott, N.C. A Dictionary of Sea Dayak. London: School of Oriental and African
Studies, University of London, 1956.
5. Hussein bin Jamil, enggau Henry Gana Ngadi. Handy Reference Dictionary of Iban
and English. Kuala Lumpur: Dewan Bahasa dan Pustaka, 1989.
6. Ismail Dahaman. Pedoman Ejaan dan Sebutan Bahasa Melayu. Kuala Lumpur:
Dewan Bahasa dan Pustaka, 1996.
7. Nik Safiah Karim (Ed). Bahasa Melayu Tinggi. Kuala Lumpur: Dewan Bahasa dan
Pustaka, 1986.
8. Richards, Anthony. An Iban-English Dictionary. London: Oxford University Press,
1981.
9. Sutlive, Vinson, enggau Sutlive, Joanne. Handy Reference Dictionary of Iban and
English. Kuala Lumpur: Ampang Press Sdn. Bhd, 1994.
10. Yayasan Kebudayaan Dayak. Atur Sepil Jaku Iban. Kuching: Yayasan Kebudayaan
Dayak, 1995.

24

Anda mungkin juga menyukai