Buah hati limpo bakuruang Ubek jariah palarai damam Sidingin tampa dikapalo Dima kini nak?
Lah tibo pulo bulan puaso
Sabanta lay hari ka rayo Pangana jauah diputiah mato Maingek nak kanduang diperantauan...
Ndak ado kaba ciek pun barito
Ayah manunggu jo ati ibo Apo lah lupo jo ayah kanduang nak? Ibo hati ayah nak..
Kalau diliek dipandangi nak
Dicaliak umua nan tapakai Badan ayah baransua tuo Nyampang tibo saruan Allah Aja sampai angok malayang Ditanah sirah badan tabujua Kain kafan panyalimuik dingin Batu nisan nan tandonyo Apo harus jo takdir kematian tu manyilau ayah nak?
Pulang juo lah nak
Silau lah ayah walau sabanta..
Oh nak kanduang dirantau urang
Jikok rami galeh takambang Galak gadang ati pun sanang Jan lah lupo sawah jo pimatang Ndak elok dipaturuikkan ati gadang Ingek kabun sarato ladang Tampek ayah bakureh mambantiang tulang..
Ndak ayah harok
ameh jo parmato doh nak Nan ayah taragak hanyo badan diri nak Nan ka mambuek batin ko pueh katiko babimbiang tangan karipuik ayah pai sumbayang rayo Hanyo itu nak.. Hanyo itu..
Takalo maso dulunyo nak
awal mulonyo insan kalahia Ayah didalam pasawangan sakik nan indak tatahankan pakiak mamacah haniang malam Lua ka Allah bagantuang indak kamano ka manggapai.
Dek lamo lambek badayuang
sapueh-pueh panangguangan sampailah juo di kualo Tali turun sauh dibuang kapa marapek di tapian balabuah surang pasisianyo Sawajah kapado urang nantun nak mandi darah sakujua badan kaki malajang-lajang taganggam tangan nan duo bunyi pakiak sapanuah kampuang cando pandeka dapek lawan. O.. Nak.. akhianyo lahia juo ka dunia..
Bangga nan ndak dapek dikatokan
Bahagia nan bukan alang kapalang Sakik jo padiah baganti sanang..
Taingek carito lamo
Katiko anak malangkah ka rantau urang Jo linangan aia mato ayah lapeh Tangih nan capek basuruakkan Do'a nan tiok hari basimpuahkan Hanyo itu nan ayah kana nak..
Bukan harok dek baleh jaso nak
Karano itu kewajiban ayah Tapi baa dek ayah sabuik sadonyo nak? Karano hanyo itu untuak kini ko nan bisa marintang rusuah mailangkan ibo hati..
Mandaru kapa tabang dilangik nak
Manapi kapa lauik dipantai Lah lalu lalang pulo oto dari jauah Balinang aia mato ayah mamandangnyo Baharok kok lai anak nan datang Kironyo indak juo doh nak hanyo angan-angan pamenan kapalo