Werkudara
Werkudara
GELUNG MINANGKARA cinandhi rengga, endhek ngarep dhuwur mburi. Werdine sang Harya Sena
wus datan kewran marang dununging kawula Gusti.
Pupuk minangka pratandha nggenya ngisep pangawikan saking Hyang Bayu, rineka jaroting asem, sang
Bratasena ngrawit budine pindha jaroting kamal.
Raden Bilawa wus hamengku kawruh panunggalane Hyang Giripati, nanging hanggung sinasapan pinter
api balilu, pramila binasakaken Jaya laga lire jembar budine pindha tebaning Jaladri.
Dupi wus sampat denira ngrasuk busana, sang panenggak gya cancut taliwanda. Cancut ujare wong
acincing, taliwanda ngencengake tali bandhange. Wiwit alit sang Bima lamun lelungan datan nate
nenitih nitih titihan. Karemenanira hamung mlumpat, pramila sang Sena sigra matak aji Bandung
Bandawasa, ungkal bener klawan blabag pengantol-antol. Padha sakala ana angin bayu bajra, sindhung
riwut lan angin garudha ngganda arum. Dyan Wrekodara gya mlintir gumbala, seblak sampur tanjak
wrangka. Sikil kiwa mancat bantala suku tengen den uncalaken, saben sajangkahan sayojana adohe.