Anda di halaman 1dari 7

1.

0 Jaku Pemuka

Jaku Iban nya siti ari jaku ti udah dikena di menua Sarawak kenyau ari kelia. Nitihka
Chemaline enggau Padang (2011), jaku Iban angkat nyadi siti jaku ke dikena enggau
regas sereta pintar di menua Sarawak berengkah urung taun 1800 menya. Jaku Iban tu
dikena ukai semina di menua Sarawak tang mega di menua bukai baka di Sabah, Brunei
enggau di Kalimantan Barat di menua Indonesia. Penyampau tubuh bansa Iban ti udah
majak nambah di Johor mega ngujungka jaku Iban mayuh dikena ba endur nya. Pia
mega, jaku Iban tu udah berengkah dikena kenyau ari jeman perintah Brooke menya.

Lebuh jeman rajah Brooke merintah menua, jaku Iban endang udah nyadi lingua-franca
ba menua Sarawak. Maya jeman tu, jaku Iban mayuh dikena pupu raban bansa di
Sarawak bekomunikasyen enggau pangan diri ba pengawa sehari-hari baka berandau,
bejalaika pengawa perintah, bedaja, bedagang, dikena baum, dikena ngerembaika
pengarap Kristian enggau dikena ba pelajar sekula kelebih agi sekula misyen enggau
sekula ba menua pesisir. Bup jaku Iban mega mayuh ditulis bala orang puith kena
bejalaika pengawa sida ba menua Sarawak.

Jaku Iban tu majak ngerembai maya jeman Koloni British lalu dikena ba pengawa besai
baka dikena ngatur pechara, naburka program ba radio enggau udah nyadi siti Asian
Language dalam peresa Sarawak Junior Certificate of Education dalam taun 1957. Jaku
Iban majak ngerekai lalu nyadi siti mata pelajar ba sekula ba pengawa bukai
sepengudah menua Malaysia merdeka. Mayuh gerempung udah ditumbuhka baka
gerempung Society of Advancement of the Iban Language (SAIL) dalam taun 1964.
Asmah 1981, madahka gerempung ti dikumbai The Society For Formotion of the Iban
Language ditubuhka ngambika bisi pemansang lalu ngerembaika jaku Iban.

Enti dipeda ari pengelama, tentu tiap orang madahka jaku Iban tu sebengkah jaku ti
udah chukup entap sebela enggau jaku bukai baka jaku Inggeris enggau jaku Melayu.
Taja bakanya, jaku Iban nyangka agi jauh kurang ari tikas ti udah dipelabaka. Tajapan
enda punas dikena bekomunikasyen, tang jaku Iban bedau entap, lalu jaku Iban dipeda
majak kurang mansang ba jeman diatu laban pemansang teknologi ti ngena jaku bansa
bukai udah majak meri empas ti mayuh ngagai nembiak rebak diatu. Nyentukka saritu,
jaku Iban agi dipeda tinggal ari jaku bansa bukai ti seperugan enggau iya lalu mayuh
chabar ti ditapi tiap bansa Iban ngemansangka jaku Iban nyadi jaku lelemu baka ba
pelajar sekula, ba pengawa dagang, pengawa perintah enggau ba pemansang teknologi.

1
2.0 Isu Enggau Chabar Jaku Iban
2.1 Jaku Iban ba pelajar

Chabar ti ditapi bansa Iban iya nya negapka jaku Iban ba pelajar sekula. Pengajar
enggau sekeda gerempung ke beratka pemansang jaku Iban bisi bendar pengirau
ngagai pemansang jaku Iban ba nembiak rebak baru diatu. Kebuah pia, laban pendiau
enggau rampa menua nembiak kemaya hari udah jauh berubah bebanding enggau
rebak apai indai sida. Sida diau bekampi enggau bansa bukai di sekula lalu batang jaku
ke dikena sida nya jaku Melayu tauka jaku English. Nambahka nya, sekeda apai indai
kemaya hari tu berat agi bejaku enggau anak sida ngena jaku bansa bukai taja pan sida
endang bansa Iban. Chunto, ba jeman diatu, nyau majak kurang bala nembiak
ngangauka apai indai sida ya ngena leka jaku ‘apai’ tauka ‘indai’. Tebal agi sida ngena
jaku baka leka jaku ‘mummy’, ‘daddy’, ‘mak’ tauka ‘aba’. Nya alai perkara ke baka tu
udah meri empas ti enda manah ngagai pemansang jaku Iban ba sekula.

Nangkanka nya, nembiak ke ngambi mata pelajar jaku Iban ba sekula agi kurang.
Nitihka pansik Merian Sabai (2017) ke gawa ba Opis Pelajar Nengeri, nembiak agi
kurang ngambi mata pelajar jaku Iban ba tikas sekula sekondari iya nya semina 1847 aja
lalu tu agi kurang enti dibandingka enggau jaku bansa bukai ti dipelajar ba sekula.
Pekara ti baka tu nyadi laban mayuh prinsipal sekula ngambi jalai likun enda ngasuh
nembiak ngambi mata pelajar jaku Iban laban enggai pemutus peresa sekula sida
dirampit jai ketegal jaku Iban. Bala pengajar mega madahka jaku Iban deka ngelabuhka
nama sekula ba ranking pemanah entara sekula nyema pemutus peresa jaku Iban enda
manah. Nya alai, jaku Iban ba sekula nadai peluang mansang enti nembiak nadai ditarak
enggau mata pelajar jaku Iban ba sekula.

Kelimpah ari nya, jaku Iban ba sekula agi kurang laban bup dalam jaku Iban agi kurang.
Pengajar Jimbun anak Tawai ngenataika pengirau ati maya ba Forum Jaku Iban 2011
lalu iya madahka penyampau bup cherita dalam jaku Iban agi kurang lalu tu meri empas
ti enda manah ngagai nembiak laban bup cherita ti chukup ulih mantu nembiak sekula
ngenegapka pengelebat jaku sida kelebih agi baka leka jaku, sepil sereta pemereti sida
dalam jaku nya. Bansa Iban agi kurang ngeluarka bup bansa diri ketegal begunaka puku
ti besai laban mayuh pekara ke deka dikira baka permit enggau lisin ari KDN, ungkus
dikena ngeluarka bup enggau ti bukai. Enti sepil enda sama enggau sepil dikena ba
sekula, bala pengajar lubah deka meli kereban nya laban tau nanggul jaku bala nembiak
ba sekula.

2
Jaku Iban ti agi kurang ba nembiak sekula patut diseliahka ngambika jaku Iban bisi
peluang ti chukup besai deka ngerembai lalu ulih nyadi jaku ti standard sebaka enggau
jaku bansa bukai. Nya alai, institusyen pelajar ngembuan tanggung pengawa dalam
bejadika jaku Iban nyadi jaku standard. Chunto iya, sekula patut ngajar nembiak belabuh
ari taun satu ngambika jaku Iban ulih ngerembai lalu bala nembiak deka nemu sereta
landik agi bekenaka jaku Iban dalam randau besari-sari enggau nemu bagi jaku Iban ti
standard. Nembiak ti bisi belajar ke jaku Iban mega enda mudah deka nyampurka jaku
Iban enggau jaku bansa bukai laban sida tu nyau angkunka jaku Iban lalu jaku Iban deka
nyadi jaku lelemu ba menua kitai.

2.2 Jaku Iban ba pengawa perintah

Jaku Iban kurang ngerembai ba pengawa perintah. Enti diperatika maya jeman perintah
koloni suba, jaku Iban udah dikena nulis pemutus pechara ba Native Court sereta dikena
ngaraka adat enggau tusun tunggu ti ditulis ba bup undang-undang Raja Meluan (1936),
Tusun Tunggu Sibu (1952), enggau Tusun Tunggu Simanggang (1961) lalu tu udah
ngasuh jaku Iban ngerembai nyadi jaku surat. Taja pia, pengawa ti ngangkatka jaku Iban
ba pengawa perintah jeman diatu majak kurang. Pekara ti baka tu nyadi ketegal perintah
menua udah ngemeratka agi jaku English enggau jaku Melayu ba pengawa perintah
kelebih maya kitai bejaku lebuh baum, interbiu sereta betulis surat ngagai opis perintah.
Bala pemesai nengeri ngemeratka agi jaku Melayu laban jaku tu tinggi agi penuduk ari
jaku Iban lalu udah nyadi jaku rasmi dikena ba opis perintah. Ketegal ti kurang dikemerat
dibanding enggau dua iti jaku nya, dia jaku Iban semina diungkupka belanja ti mit lalu
pekara tu enda ulih mantu opis pelajar ngangkatka jaku Iban ba tikas ti tinggi.

Nya alai, bala pemesai menua ngembuan tanggung pengawa neguhka jaku Iban ba
pengawa perintah. Chunto iya, bala perintah patut ngaga gerempung enggau
organisasyen lalu meri bantu sereta sukung nengah menteri-menteri besai Iban kena
mekuhka jaku Iban ba pengawa perintah. Kelimpah ari nya, perintah menua patut
ngambi teladan ari Sapit Kepala Menteri, Tan Sri Alfred Jabu ti udah mujur mantu
simposium besai Jaku Iban sereta meri belanja dikena ngatur mayuh agi pengawa ti
ngangkatka jaku Iban. Pengawa tu ulih nyadi pelasar alai bala raban akademik bansa
Iban, nyengkaum bala pemansik sekeda opis perintah, Tun Jugah Foundation, AEDIL,
enggau NGO ke bukai, berandauka alternative ngemansangka jaku Iban ba tikas ti tinggi
kelebih agi ba pengawa perintah.

3
2.3 Jaku Iban ba ekonomi

Chabar ti ditapi ba pengawa ekonomi iya nya ngemansangka jaku Iban ba pengawa
dagang. Bansa Iban agi jauh tinggal dalam pengawa dagang enti dibanding enggau
bansa bukai. Pekara tu nyadi ketegal tikas jaku Iban agi jauh tinggal ba pengawa
dagang. Ambika chunto, bansa Cina udah mansang enggau pengawa dagang taja pan
sida semina ngena jaku sida empu maya bejalaika dagang sida. Tu nunjukka jaku Cina
lebih maju ari jaku Iban laban bansa sida iya angkunka jaku diri empu dalam pengawa
besehari-hari. Nangkanka nya, jaku Iban agi kurang ba pengawa ekonomi ketegal alah
enggau jaku Inggeris enggau jaku Melayu ti masai agi dikena dalam pengawa ekonomi
tu. Bansa Iban mega enda entu kiruhka jaku bansa diri lalu tu ngujungka jaku Iban enda
dikena ba pengawa ti mai pemujur dalam ruang bilik. Nya alai, bansa Iban patut nginjau
jaku ari bansa bukai kelebih agi jaku Inggeris ngambika leka jaku Iban ulih betambah lalu
ulih dikena bansa bukai mega. Pekara ti baka tu ulih ngerembaika jaku Iban lalu deka
nyadi jaku komunikasyen ba raban bansa di Malaysia.

2.4 Bilingual

Jaku bilingual suah dikena ba jeman diatu kelebih agi ba pelajar sekula. Nitihka penemu
Wei (2000:6), The Word ‘bilingual’ primaliry describes someone with the possession of
two language. Resmi (2007:7), mega madahka jaku bilingual iya nya jaku ti dikena
ngajar nembiak sekula lalu udah dipasuk ba dalam kurikulum sekula. Nitihka penemu
tebangkar nya tadi, reti bilingual iya nya turai pelajar ti ngena dua bansa jaku maya
proses belajar enggau ngajar. Jaku bilingual tu udah meri empas ti enda manah ngagai
pengerembai jaku Iban kelebih agi ba nembiak sekula laban sida ngena jaku ti
bechampur maya belajar. Ambika chunto, ba dalam keretas peresa ke diatu udah ngena
dua bansa jaku baka jaku Inggeris enggau jaku Melayu. Pekara ti baka tu udah meri
empas ngagai nembiak maya nyaut peresa jaku Iban. Sida deka muntang agi ngena
jaku bukai maya ngaga karang lalu tu deka ngasuh jaku Iban kurang ngerembai nyadi
jaku lelemu.

Nitihka Mamat (2014), pengawa bechampurka jaku maya beinteraksyen nya siti
fenomena linguistik ke suah nyadi ba orang ke landik bejaku enggau dua tauka mayuh
agi bansa jaku. Fenomena ke baka tu nyadi ba sebarang komuniti bilingual tauka
multilingual. Di Sarawak, bala nembiak Iban ke agi belajar sekalika ba sekula tauka
institut pelajar tinggi suah endar didinga berandau ngena jaku Iban ti bechampur enggau

4
jaku inggeris, jaku Melayu dialek Melayu Sarawak tauka jaku bukai baka jaku Bidayuh,
Melanau, Kayan, China, enggau ke bukai. Kebuah bansa Iban ngena jaku bechampur
iya nya bekau ari segang globalisasyen. Ambika chunto, jaku bechampur udah dikena
dalam komunikasyen ba internet, ba telepon binching ari pengawa pesan pandak (SMS)
tauka dalam pengawa besahari-sehari.

Penanggul ti ditapi bansa Iban tu patut diseliahka ngambika jaku Iban ulih mansang
sama tikas enggau jaku bansa bukai. Nya alai, nembiak rebak baru patut ngembuan
pengerindu macha mayuh macham kereban jaku Iban ti bisi ngembika ulih nambahka
pengaya leka jaku sida. Pekara ti baka tu deka nyeliahka nembiak kena parit jaku
bilingual ti dipelajar ba sekula. Ari pengawa macha mega sida ulih ngelala leka jaku baru
tauka jaku injau ti baru dikena dalam jaku Iban. Nengah chara tu, nembiak ulih nyeliahka
diri ari bekena jaku ti salah dalam pengidup sida lalu tu ulih ngerembaika agi jaku Iban
nyadi jaku lelemu ngagai tikas ti tinggi.

2.5 Sains, Matematik enggau Teknologi ngena jaku Inggeris

Mata pelajar Sains enggau Matematik amat beguna ngagai nembiak sekula lalu udah
nyadi mata pelajar teras ti mesti dipelajarka semua mensia. Taja pia, mata pelajar dua iti
tu udah diajar ngena jaku Inggeris. Pekara tu udah mai empas ti enda manah ngagai
pengerembai jaku Iban kelebih agi ngagai nembiak sekula. Nangkanka nya, jam ngajar
mata pelajar sains enggau matematik ti mayuh agi ari jam ngajar jaku Iban mega udah
ngasuh nembiak masai agi ngena jaku Inggeris maya bekomunikasyen enggau pengajar
lalu sida mega ngena jaku ti bechampur lebuh berandau enggau pangan diri. Ulah ti
baka tu deka ngasuh penulin jaku Iban deka lenyau laban udah bechampur enggau jaku
Inggeris.

Jaku Inggeris mega nyadi jaku ba dalam aplikasyen teknologi kelebih agi teknologi
penerang. Pemansang teknologi penerang dikumbai ulih ngapus tauka ngelenyauka
pemansang sesebengkah jaku baka jaku Iban. (Zulkifli Mohd Aspah, 2005). Ambika
chunto, jaku ti dikena ba talipun mayuh agi ngena jaku Inggeris baka leka jaku ‘receive’,
‘chat’, ‘send’ ‘off’, ‘on’ enggau ‘like’ ti masai agi disebut bala nembiak diatu laban mayuh
udah ngembuan talipun kediri empu lalu tu ngujungka leka jaku Iban majak enda diguna
enggau deka punas. Nya alai, pekara ti baka patut diputar enggaika nembiak rebak dudi
enda nemu jaku diri. Apai indai ngembuan tanggung pengawa ngangkatka jaku Iban ba
anak sida baka melika anak sida bup jaku iban baka bup sereba reti jaku Iban ngambika
nembiak nemu leka jaku Iban ti bendar.

5
2.6 Pemansang Teknologi Pemadah enggau Komunikasyen

Siti agi chabar ti ditapi dalam ngemansang ke jaku Iban iya nya ngetanka jaku Iban ari
segang globalisasyen iya nya ari sukut teknologi pamadah enggau komunikasyen.
Kemaya hari tu, kitai ulih meda mayuh macham kereban teknologi ke baru
ditengkebang. Media massa baka radio, surat kabar, internet enggau mayuh internet
enggau mayuh agi deka nambahka pemayuh leka jaku. Taja pia, teknologi ti bakatu tau
ngujungka nembiak rebak baru enda rinduka jaku diri laban ti kena biuh jaku bansa
bukai. Ambika banding, nembiak rebak diatu mayuh agi ti rinduka jaku Inggeris enggau
jaku Melayu. Pekara tu terang bendar dipeda ari pengerindu sida ke lagu, cherita sereta
filem ti ngena jaku Inggeris enggau Melayu baka ‘Fast and Furious’, ‘Ombak Rindu’
enggau ti bukai.

Nangkanka nya, jaku Iban mega dikena dalam dunya pemerindang. Dunya pemerindang
endang mungkul empa ke besai nyentukka didinga sereta dikerindu bansa bukai baka
stesen radio baka WaiFM, Cats FM, Rasa FM enggau ti bukai. Dunya pemerindang ti
suah ngeluarka program ti ngena jaku bechampur baka cherita Bunyau enggau Mujap ti
dikeluarka radio catFM ti suah ngena jaku Iban bechampur enggau jaku Inggeris. Pekara
ti baka tu udah meri empas ti enda manah ngagai nembiak baka sida nunda jaku ba
radio nya bekomunikasyen enggau pangan diri. Nangkanka nya, penanggul ti nyadi ba
dunya pemerindang bansa Iban iya nya betuliska leka lagu tauka lirik lagu. Sida ti
nengkebang lagu suah ngelanggar sistem jalai jaku baka nyampurka jaku Iban enggau
jaku bansa bukai. Chunto iya baka lagu ‘I love you pengambis ati’, patut iya ‘aku
sayauka nuan pengambis ati’. Taja pan mesej ti deka dikenataika nya positif, tang nya
ulih ngerampit runding orang ke ninga ti ngena jaku nya belama.

Bidang teknologi tu tau nyadika pelasar dikena ngemansangka jaku Iban. Ambika
chunto, kitai ulih ngarang mayuh macham pekara ti bekaul enggau daya idup enggau
jaku Iban dalam facebook, twitter, bolg, enggau mayuh agi. Beserimbai enggau nya, bala
nembiak ulih ngiga informasyen ari karang ke ditengkebang dalam internet. Pia mega
dalam teknologi pemadah, sida patut ngeluarka mayuh agi program jaku Iban ba radio
tauka ba televisyen ti agi kurang kemaya hari tu. Jaku Iban ti mayuh dikena ba teknologi
pemadah tu deka ngasuh jaku bansa Iban deka ngerembai lalu ulih nyadi jaku lelemu
enggau jaku komunikasyen ba dalam komuniti Iban enggau bansa bukai mega.

6
3.0 Simpul Penemu

Kesimpul iya, mayuh isu enggau chabar ti ditapi bansa Iban ba dalam ngerembaika jaku
Iban nyadi jaku lelemu engggau jaku komunikasyen ba tikas ti tinggi. Jaku Iban kurang
ngerembai ba jeman diatu laban bansa Iban udah maju enggau teknologi lalu ulah bansa
Iban ti enda pedulika pemansang jaku diri udah mayuh meri empas ti enda manah ngagai
pengerembai jaku Iban. Nya alai raban rebak baru ngembuan tanggung pengawa ti chukup
berat dalam ngangkatka jaku Iban ngambika enda punas. Nembiak diatu mega mesti
mansang ke mua lalu begempung ngumpul sereta ngaduka semua dokumen ti bekaul
enggau jaku Iban ngambika bisi nyadi malin lalu bisi dikena orang jemah ila belajar, ngetan
sereta ngerembaika jaku Iban. Nya alai, bansa Iban mesti nyikap diri enggau penemu
disiplin ti tinggi ngambika jaku Iban enda mudah diindik bansa bukai.

Ditulis: Catherine anak Loo