1.

0 Pemuka

Semantik iya nya bidang ti mansik sereta nyerenih reti leka jaku enggau ayat dalam
sesebengkah jaku. Leka jaku iya nya utai ke disebut tauka ditulis ti meras sereta
ngembuan reti. Ari jaku mensia ulih madahka buah runding, pengasai ati, penemu,
emosyen, ulah enggau pemanah siku-siku orang. Makin mayuh jaku dikuasa siku-siku
orang, makin mayuh mega idea ti ulih dikenataika. Nya alai, reti tauka ubah reti dalam
sesebengkah leka jaku dikumbai bidang semantik. Nitihka penemu J.W.M. Verhar,
(1996), semantik iya nya chabang linguistik ti bejuraika senentang reti jaku. Abdul Chaer,
(1994), mega madahka semantik iya nya bidang ti mansik reti jaku.

Kelimpah ari nya, Nik Safiah Karim (2001), madahka semantik nya siti bidang ti mansik
sereta bejuraika makna jaku enggau ayat. Sechara spesifik, semantik iya nya pansik
senentang lambang-lambang tauka kelai ti mantaika reti, kaul antara reti enggau reti ti
bukai lalu chara reti tu bekaul enggau komuniti ti ngelinggi. Kaul semantik enggau leka
jaku ulih diperatika ari sukut kaul reti enggau leka jaku sereta kaul reti enggau ayat. Nya
alai aku deka ngaga analisis siti teks ti ngembuan leka jaku ti ngundan reti lalu bisi
ngembuan kelas reti baka reti denotasi, konotasi, emotif, kognitif, refensial enggau
piktorikal lalu ngaga analisis reti leksikal dalam teks iya nya sinonim, antonim, polisem,
homonim, enggau hiponim sereta ubah enggau kelabur reti ba siti teks .

2.0 Kelas Reti

Kelas reti ulih diperati ari beberapa sukut baka sukut reti denotasyen, konotasyen,
emotif, kognitif, referensial enggau piktorikal.

2.1 Reti Denotasyen

Reti denotasyen iya nya reti ti ulih dipeda dalam diksionari. Reti tu mega dikelala
enggau reti leksikal enggau reti konseptual laban ulih ditemu tekala nya. Ba teks
Pengerawang Ati ngembuan leka jaku ti dikategori dalam reti denotasyen.

 Iya pan lalu nurun ngagai perau sida iya ke di ai.

 Makam lalu ngerejang iya ngena sangkuh sumpit ke dipegai ya dia.
 Makam meruan kaus kidus merunsaika salai babi.

1
 Ba ayat ke satu ngembuan leka jaku perau ti diketagori dalam reti denotasi laban
leka jaku perau ulih dipeda dalam diksionari lalu lebuh orang nyebut perau, dia
orang ti macha lalu nemu lalu berundingka perengka pengangkut ti ngembuan
gandung, luan enggau kemudi. Ba ayat kedua mega ngembuan leka jaku
sangkuh lalu leka jaku tu ulih ditemu tekala nya lalu bisi ba diksionari. Ba ayat ti
ketiga mega ngembuan leka jaku ti diketagori dalam reti denotasi iya nya leka
jaku babi lalu leka jaku tu suah dikena lalu nadai ngembuan reti ti bukai.

2.2 Reti Konotasyen

Reti Konotasyen iya nya reti bukai lalu enda sama enggau reti leka jaku ti disebut
tauka ditulis.

 Empai apus sebatang ruku Makam udah tembu makai, dinga iya utai
kekerus datai ari atas.
 Makam pan ngidupka diri empu makai dulu.

Ayat ke satu ngembuan jaku silup iya nya empai apus sebatang ruku. Jaku ti
dikena nya enda sama reti enggau reti jaku nya kebendar iya tang nunjukka reti ti
bukai. Jaku silup empai apus sebatang ruku nunjukka ruku orang ti nginsap
bedau abis lalu dalam reti konotasyen, reti jaku dalam ayat nya madahka jam iya
nya Makam bedau lama baru tembu makai. Ba ayat kedua mega ngembuan reti
konotasyen iya nya ngidupka diri ti mai reti nyendiaka pemakai kediri empu lalu
tu nunjukka pengawa siku-siku orang.

2.3 Reti Kognitif

Reti Kognitif iya nya reti ti ditunjukka ulih pikir runding sereta semak enggau
dunya luar tauka utai ti ngelinggi lalu ulih dipejuraika bepelasarka analisis
komponen iya empu.

 Baka utai ke dibuai ke baruh rumah maya rumah panjai agi begantung
kelia.

Ba ayat di atas nya ngembuan leka jaku rumah panjai ti dikategori dalam kelas
reti kognitif laban leka jaku tu lalu ditemu orang ti macha lalu iya semak enggau

2
 pendiau pengidup kitai. Komponen leka jaku tu mega uih dipejuraika iya nya
ngembuan reti rumah ti betampung lebih ari siti.

2.4 Reti Referensial

Reti referensial iya nya kaul elemen-elemen linguistik ti betukuh leka jaku, rambai
jaku enggau peneleba nonlinguistik. Referensial tu mega lebih ngagai utai ti
nyadi, proses enggau dunya nyata.

 Raya pemesai Kijang ulih di nya Aya.

Ba ayat di atas ngembuan leka jaku Kijang lalu tu dikategori dalam kelas reti
referensial laban leka jaku bisi tukuh iya nya jelu babas ti disebut Kijang.

2.5 Reti Piktorikal

Reti piktorikal iya nya reti ti ayan empas ari leka jaku ti semina ayas lalu empai
nyengala didinga tauka dibacha.

 Bangkai nya lalu ditejuka makam dia.

Ba ayat di atas ngembuan leka jaku bangkai. Lebuh orang ti macha nya, sida
deka meragam utai ti udah mati lalu sida enda nemu sekalika bangkai nya
bangkai jelu tauka bangkai mensia.

3.0 Reti Leksikal

Nitihka Abdullah Hassan (1989), reti leksikal ulih dibagi ngagai beberapa aspek
iya nya sinonim, antonim, polisem, homonim, enggau hiponim. Polisem iya nya
siti leka jaku ti gembuan mayuh reti. Pia mega homonim mai reti leka jaku ti
ngembuan sebut enggau sepil ti sama tang ngembuan reti ti bebida.

3.1 Sinonim
Nitihka Adullah Hassan (2007), sinonim iya nya leka jaku ti ngembuan reti ti
sebaka tauka semak reti enggau pangan diri.
 Jugol mega madah ke Makam, nusi bala sida sebuat nyau sampal ngiga
iya ke tesat.

3
 Ba ayat di atas ngembuan leka jaku madah enggau nusi ti mai reti madahka siti-siti
pekara ngagai orang. Dua iti leka jaku tu sinonim laban ngembuan reti ti semak
enggau pangan diri taja sepil bebida.

3.2 Antonim
Antonim iya nya leka jaku ke belaban tauka besangkal reti enggau jaku bukai.

 Siku seduai nya burak baka orang putih lalu siku chelum mimit tang
penyigat enggau pengering seduai iya lebih kurang enggau pangan diri.

Ba ayat di atas ngembuan leka jaku burak enggau chelum ti enda sama reti. Dua
iti leka jaku tu dikategori dalam antonim betipak laban leka jaku burak semina
betipak enggau leka jaku chelum.

3.3 Hiponim
Hiponim iya nya ngemai reti beberapa iti leka jaku ti disengkaum dalam leka jaku
ti bukai.

 Udah nya, Jugol belabuh niti Kijang enggau Jugam.

Ba ayat di atas nya ngembuan leka jaku Kijang enggau Jugam lalu leka jaku tu
dikategori dalam hiponim laban ulih disengkaum dalam leka jaku ke bukai iya nya
ulih dikumbai jelu.

4.0 Ubah Reti

Dalam aspek ubah reti, reti sekeda leka jaku berubah serarus enggau ubah maya, ubah
taun, ubah jeman sereta berubah nitihka segang pemansang dunya. Ubah reti bisi tiga
iya nya ngerembai reti, ngerupit reti & insur reti. Ngerupit reti iya nya ubah ba sekeda
leka jaku ti ngembuan reti ti semakin sempit, majak mimit ari ti keterubah. Kelimpah ari
nya, insur reti mai reti ubah ke nganti reti leka jakun ti diinjau ari leka jaku bansa bukai.

4.1 Kerembai reti

Pengerembai reti iya nya ubah reti ari reti ti mit ngagai reti ti luas agi. Reti baru
siti-siti jaku lebih besai ari reti lama. (Kursus Jaku Iban 2016).

4
  “Tentu aya Ugol ngalihka salai nya kini” ku ati Makam.
 “Dini di bulih iya aya?” ku tanya Makam.

Ba ayat ke satu ngembuan leka jaku ‘aya’ ti dikena ngangauka orang lelaki ti
lebih tuai agi lalu ba ayat ti kedua leka jaku ‘aya’ ulih dikerembaika agi iya nya
ulih dikena ngangauka orang lelaki ti lebih tuai enggau enda dikelala lalu leka
jaku tu dikena bebasa lebuh ngangauka orang ti lebih tuai.

5.0 Kelabur Reti

Nitihka penemu Abdullah Yusof at.al (2009), kelabur reti iya nya leka jaku,frasa tauka
ayat ti enda temu reti. Kelabur reti ngembuan tiga bansa iya nya leksikal, struktur
enggau figuratif. Reti kelabur reti struktur iya nya reti frasa, klausa enggau ayat ti
disangka lebih ari siti. Kelimpah ari nya, kelabur reti figuratif iya nya reti jaku sempama ti
disangka sereta ngembuan kaul engggau daya idup.

5.1 Leksikal

Kelabur reti leksikal iya nya reti leka jaku ti disangka lebih ari siti.

 Tak baru nyungah di mua pintu langkau, dia Makam meda utai ti chelum
meuram-uram duduk dedugau di atas para.

Ba ayat atas nya ngembuan reti jaku ti kelabur laban jaku nya enda temu reti. Jaku
‘chelum meuram-uram’ ba ayat nya bedau temu reti lalu orang ti macha deka melabaka
leka jaku nya ngayanka jelu tauka mensia laban ba ayat nya bisi leka jaku ‘duduk
dedugau’. Enti orang enda meratika ayat sepengudah leka jaku meuram-uram, sida
deka melabaka utai ti chelum meuram-uram nya sebansa utai tumbuh. Nya alai leka jaku
nya kelabur laban mayuh reti ti ulih melabaka iya.

5
6.0 Analisis Lagu

Lagu Baka Perau Patah Kemudi – Maxwell Franklin Saran.

6.1 Definisyen Sempama

Nitihka penemu Janang Ensiring et.al (2015), sempama tu iya nya jaku pandak ti
tebilang lalu bisi ngundan jaku ajar. Sempama tu mega sebagi ari jaku dalam ti
ngundan reti ti enda terang iya nya belalai, besema, besilup, besuruk tauka
beentelah. Sempama mega sua dikena ba leka lagu lalu bisi fungsyen iya kediri
empu. Nya alai, aku deka bejuraika reti sempama ti bisi ba lagu Maxwell iya nya
‘Baka perau patah kemudi’.

6.2 Reti enggau fungsyen sempama ba lagu Baka Perau Patah Kemudi.

 Baka pisang bebuah dua kali

Sempama ba atas nya mai reti enda kala mujur dalam ngereja pengawa lalu
penusah ti sama datai nuntung. Sempama tu muntang dikena ba leka lagu laban iya
pandak lalu ngembuan reti ti meruan. Leka jaku pisang ti bebuah dua kali mai reti
enda manah laban pisang endang enda kala bebuah dua kali. Nya alai, sempama tu
dikena ngenataika pengasai ati orang ti nyadaka lagu lalu orang ti ninga nemu
pemerinsa ti ditapi sereta orang ulih nyemaka sempama nya enggau pengidup
merinsa berumah tangga lalu penusah ti sama datai ngundang.

Lari ke ribut tetemuka ujan..

Lari ke sungkup tetemuka pendam

Sempama ti kedua ba atas nya mai reti siku-siku orang ti semampai kena tuntung
penusah. Ayat lari ke ribut tetemuka ujan nunjukkan utai ti manah deka datai laban
ribut enggau ujan endang utai ti mai penusah ngagai mensia. Pia mega leka jaku
sungkup enggau pendam mai reti utai ti enda manah laban nya endur orang ti udah
midang. Nya alai, sempama tu dikena ba lagu nunjukka pekara ti enda manah datai
ba pengidup taja iya deka ngelarika diri ari penusah ti ditapi. Sempama tu mega
dikena ngambika leka lagu manah agi didinga laban jaku ti dikena besilup lalu ulih
narit ati peninga.

6
  Sempama baka perau patah kemudi

Sempama ba atas nya mega dikena ba lagu tu lalu mai reti pengawa ti dikereja nadai
pemujur laban nadai orang ngembing. Ayat perau patah kemudi nunjukka perau
deka karam laban nadai kemudi agi dikena ngetanka iya. Nya alai sempama tu
dikena ba lagu ti mai reti pengidup ti nadai tuju laban nadai orang ngembing tauka
ngajar ba pengidup sehari-sehari. Lebuh peninga ninga lagu nya, sida deka nemu
pengidup orang ke ba lagu nya idup dalam penusah lalu enda mujur ngereka
pengawa.

7.0 Simpul penemu

Nyadika simpul, semantik nya mansik jaku enggau silik sereta ulih dipejuraika nyadi
sebengkah bidang ti mansik leka jaku enggau ayat sesebengkah jaku. Artikel
pengerawang ati ngembuan mayuh leka jaku ti ngembuan reti ti bebida lalu reti nya ulih
dikategori dalam kelas jaku baka reti denotasyen, reti kolotasyen, reti kognitif, reti
referensial enggau ukai referensial sereta reti piktorikal. Nya alai, mayuh leka jaku ti
dikena datai ari kelas reti ti bebida lalu orang ti macha mega deka rindu laban leka jaku
ngembuan reti ti bebida lalu reti tu bekaul enggau komuniti ti ngelinggi.

Kelimpah ari nya, kaul semanti enggau leka jaku mega ulih diperatika ari sukut kaul reti
enggau leka jaku sereta kaul reti enggau ayat. Ba artikel ‘Pengerawang Ati’ ngembuan
beberapa terma ti mantaika kaul reti enggau leka jaku iya nya reti leksikal baka sinonim,
antonim enggau hiponim. Reti leksikal tu nunjukka leka jaku ti dikena ngembuan reti ti
sama taja sepil enggau sebut bebida lalu leka jaku tu nunjukka bisi fungsyen iya kediri
empu. Ba artikel nya mega ngembuan ubah reti iya nya leka jaku ti ulih dikerembaika
sereta ngembuan leka jaku kelabur lalu tu nunjukka artikel ngena laka jaku ti bebida.

Kepenudi iya nya sempama ba lagu ‘Baka Perau Patah Kemudi’ mega ngembuan reti ti
bebida lalu fungsyen iya ba siti-siti lagu bebida. Sempama ti dikena nitihka situasyen ba
siti-siti lagu lalu ulih ngemanahka agi leka lagu nya. Nya alai, semantik tu ukai semina
mansik leka jaku tang iya mega mansik kaul reti enggau daya idup.

7
Kereban Sanding

Abdul Chaer. (1994). Linguistik Umum. Jakarta: PT. Rineka Cipta.

Abdullah Hassan. (2007).Linguistik Am. Selangor:PTS Professional.

Abdullah Yusof, Alias Mohd Yatim & Mohd. Ra’in Shaari. (2009). Semantik dan Pragmatik
Bahasa Melayu. Kuala Lumpur: Pustaka Sdn. Bhd.

Janang Ensiring, Jantan Umbat & Robert Menua Saleh. (2015). Bup Sereba Reti Jaku Iban.
Sarawak. The Tun Jugah Foundation.

Kursus Jaku Iban. (2016). Latihan dalam perkhidmatan. Institut Pendidikan Guru Kampus
Rajang.

Nik Safiah Karim. (2001). Bahasa Melayu Kertas 2. Selangor. Fajar Bakti Sdn. Bhd.

Pegari. Iban Production. Sarawak. Volium 61. PPKDN: PPK 325/06/2013 (032818)

Semantik: Perluasan, Penyempitan, dan Perubahan Makna.

http://studentsrepo.um.edu.my/3197/5/BAB3.pdf

Verhaar, J.W.M. (1996). Asas-Asas Lingustik Umum. Yogyakarta: Gadjah Mada University
Press.

8
Lampir

9
Lagu Iban

Baka Perau Patah Kemudi-Maxwell Franklin Saran

Sekumbang aku idup di dunya

Pengidup enda jerih enggau pemerinsa

Berubah tangga enda kala nyadi

Baka pisang bebuah dua kali

Lari ke rebut tetemu ke ujan

Lari ke sungkup tetemu ke pendam

Bakanya penusah ti aku sepi

Puas udah ngelantangka diri

Ai mata ayan nadai rega agi

Kaban belayan suku juru enda peduli

Tinggal aku idup mawa diau kediri

Sempama baka perau patah kemudi

Bakanya penusah ati aku sepi

Puas udah ngelantangka diri

10