Inggih para guru miwah para sisia sane wangiang titiang, pidapdap pemerintahan otonomi daerah

sakadi mangkin, pamargi pendidikane sane sampun kasukserahan ring pemerintah daerah.
Kusumakuta wiadin tanggung jawab pendidikan punika magenah ring tangan Sang Guru Wisesa
daerah kabupaten wiadin propinsi. Sakewanten sujatin ipun, tanggung jawab pendidikan punika,
manut Bapak Pendidikan Nasional Ki Hajar Dewantara , magenah ring trisentra pendidikan
inggih punika : Pemerintah , masyarakat lan orang tua. Indik panglaksananya, wantah ring
sekolah genah ipun. Sekolah punika kamanggehang sakadi mapaguruan, mapanyengker antuk
Wawasan Wiyata Mandala. Sane kamargiang boya wantah kaweruhan lan katrampilan
kemanten, sakewanten taler mangda kawerdian jati ragawangsa, panglaksana miwah locita,
moral lan mental. Sekolah pinaka pasraman Brahmacari mangda prasida ngwangun anak Bali
sane majati raga Bali ring kuuban negara Indonesia. Warga anak Bali sane wikan tur trampil,
purun malomba ring jagat Internasional.
Kawiaktiannya anak Baline nenten ja kasor ring anak dura Negara, yening kawehin pendidikan
sane inggih sapatutnya, kawehin wawasan sane jimbar, kapentengin tur kasangih uteknyane.
Inggih para sisia sane sutresnain titiang sakadi baos titiang iwawu, alit-alite mangda eling ring
pidabdab jagate mangkin, pidabdab kemajuan, pidabdab ( globalisasi ). Para sisia tan dados lali,
tan dados lenga wiadin lipia ring raga, sumengkenang kayune ngetut kemajuan, kemajuan Ilmu
Pengetahuan lan Teknologi, kadulurin antuk stiti bakti ring sang maraga guru. Indike punika
sering kecutetang dados IPTEKTAK. Sampunang nglelemonehang palajahan agama miwah
palajahan Basa Daerah Bali, santukan palajahan puniki prasida nuntun kajati raga anak Bali.
Inggih Ida-dane sinamian kadi asapunika atur panyanggra tiiang menawi ta wenten iwang atur
titiang, titian nunas gung rena pangampura. Inggih, puputang titiang antuk paramasantih.
Om, Santih, Santih, Santih, Om