PAPLAJAHAN 1 SEMBRAMA WECANA

Téks Sembrama Wecana

Wanti Warsa STT Yowana Dharma Shanti

"Om Swastyastu"
Sadurung titiang nglanturang atur pinih riin ngiring dumun sareng-sareng ngaturang
puja pangastuti majeng ring Ida Sang Hyang Widhi Wasa, dumogi ja sangkaning paswécan
Ida parikrama rahinané mangkin prasida mamargi antar tan kapialang.
- Mantuka ring para manggala praja makadi Bapak Prabekel, Bapak Klian Dinas
utawi sané ngangganin dané sané wangiang titiang.
- Para manggala désa makadi Bapak Bendésa Adat miwah Prajuru Adat sané
baktinin titiang.
- Bapak Kelian Adat Banjar sané kusumayang titiang.
- Para Kelian Truna Truni sinamian sawewengkon Adat Nongan sané suksmayang
titiang
- Para truna truni Yowana Dharma Shanti Banjar Ambengan sané tresna sihin
titiang
Kaping ajeng titiang ngaturang suksmaning manah ring sapengrauh Ida Dané para
manggala taler para sameton sinamian, sané sampun pramé lédang nodia pakaryan titiang
sajeroning wanti warsa sané kaping dasa Sekaa
Truna Truni Yowana Dharma Shanti Banjar
Ambengan rainané mangkin.
Kaping kalih titiang nénten lali nunas gung
rena pangampura santukan sampun janten makéh
makakirangnyané inggihan indik genah, panyanggra,
panamyu miwah sané lianan santukan doh wiakti, tan
prasida nagingin sakadi pangarsan Ida Dané.
Salanturnyané atur uningayang titiang ring ida
dané makasami, sajeroning nyanggra wanti warsa
sané kaping dasa puniki kadagingin antuk
makudang-kudang pacentokan, minakadi gotong
royong kebersihan lingkungan, taler kajangkepin
antuk ngaturang punia amatra ring panti werda
majeng ring anak lingsir sané patut polih uratian
iraga sareng sami.
Mungguing prabéa sané kaanggén nyanggra
acara wanti warsa rahinané mangkin wantah saking urunan miwah kas sekaa truna truni,
katambahin antuk paica lascarya saking krama Banjar Ambengan. Mangda taler kauningin,
sekaa truna truni sané iring titiang natak panes tis ring lingkungan banjar iriki akéhnyané
karobelah diri, lanang satus diri, istri séket diri.
Salanturnyané titiang makasami iriki nunas mangda suéca Bapak Prabekel pinaka
manggala praja ngicenin tuntunan, pawisik, pawarah-warah, mangda prasida titiang iriki
salung-lung sabayan taka paras-paros sarpanaya, tur sida ngulati sané mawasta "matuha,
migasa, mawerdya" sayan duur yusané, sayan urati miwah gelitik tur prasida sayan limbak
ring sajeroning sakancan utsaha. Taler jagi aturin titiang Bapak Prabekel jagi motong
tumpeng pinaka cihna acara wanti warsa Sekaa Truna Truni Yowana Dharma Shanti Banjar
Ambengan sampun mamargi.
Titiang pinaka prawartaka wanti warsa ngaturang suksmaning manah antuk uratian Ida
Dané para sameton sinamian taler nénten lali titiang nunas gung rna pangampura antuk
makakirangannyané.

"Om Santhi, Santhi, Santhi Om"

olih Madé Gargita

1.1 Teges Sembrama Wecana

Sembrama Wecana inggih punika bebaosan sané katlatarang sané daging miwah
tetueknyané ngenénin indik nyanggra utawi nyapa para uleman ring sajeroning upacara
adat, agama miwah acara sané lianan.
Wénten makudang-kudang soroh Sembrama Wecana manut tatacarané maktayang
makadi :
 Sembrama Wecana Dadakan, inggih punika rikala maktayang Sembrama Wecana
nénten nganggén téks, riantukan sang sané nyanggra uleman (sané maktayang
Sembrama Wecana) nadaksara kasudi mangda nyanggra para uleman.
 Sembrama Wecana Kawacén, inggih punika Sembrama Wecana sané sampun
kaparidabdabang, sampun maduwé téks, tur rikala maktayang Sembrama Wecana
ngawacén téks, riantukan sang sané maktayang Sembrama Wecana punika sampun
jangkep sareng naskah sané jagi kawedarang .
 Sembrama Wecana Kaapalang, inggih punika Sembrama Wecana sané sampun
kaparidabdabang, sampun maduwé téks, tur sampun kaapalang, raris rikala
maktayang Sembrama Wecana sang sané ngawedar sembrama nénten nganggén
téks utawi ngawacén téks / lisan.
 Sembrama Wecana Ringkesan, inggih punika Sembrama Wecana sané sadurung
kabaktayang sampun nyiagayang naskahnyané sané marupa sesuratan unteng-unteng
Sembrama Wecana kéwanten.

1.2 Wangun Sembrama Wecana

Sajeroning makarya Sembrama Wecana patut uning indik tata cara ngaryanin
Sembrama Wecana punika sakadi :
 Murda : murdan Sembrama Wecanané mangda anut ring topik sané jagi
kabaktayang.
 Pamahbah : pamahbah patut madaging pangastungkara, Pangrastiti ring Ida
Sanghyang Widi, matur pangayubagia majeng ring para uleman sané
sampun ledang rauh.
 Daging : daging Sembrama Wecana, mangda anut ring topik acara sané
kamargiang mangda para uleman tatas uning ring indik miwah
pamargin acarané.
 Pamuput : pamuput patut madaging panyuksma majeng ring para uleman sané
sampun prasida rauh micayang uratian miwah pangrastitiné majeng
ring acara sané kamargiang, matur nunas pangampura antuk
kakirangan ri kala nyanggra para uleman, taler panyineb antuk parama
santih.

1.3 Tetikes Sembrama Wecana

Wenten agem-ageman ri kala maktayang Sembrama Wecana, sané kawastanin tetikes
Sembrama Wecana makadi :
 Wicara inggih punika kawagedan utawi kawikanan ring sajeroning indik daging
bebaosan (penguasaan materi). Rikala maktayang Sembrama Wecana bebaosané
 patut manut ring topik Sembrama Wecana sané kabaktayang, mangdané prasida
nudut kayun para uleman sané miragiang.
 Wirasa inggih punika kawagedan sajeroning ngresepang utawi ngrasayang daging
bebaosan (menghayati). Ritatkala maktayang Sembrama Wecana kacihnayang
antuk pangrasa mangdané para uleman sané sampun rauh rumasa bagia santukan
sampun kasanggra becik.
 Wiraga inggih punika semita miwah laras (gerak tubuh) Sang sané maktayang
Sembrama Wecana, mangda anut ring daging sembrama sané kabaktayang
 Wirama inggih punika intonasi suara, vokal, tanjek bebaosan rikala maktayang
Sembrama Wecana mangda anut ring punggelan lengkara, punika sané ngawinan
lengut kapiragi olih para uleman sami.
 Wesata inggih punika kawagedan ring sajeroning nyobyahan utawi ngalimbakang
daging bebaosan

1.4 Pituduh!
1. Baosang napi sané kawastanin Sembrama Wecana!
2. Telatarang tata cara ngawangun Sembrama Wecana!
3. Wesata teges ipun …
4. Soroh bebaosan sané ngenénin indik agama kawastanin …
5. Napi sané kapertama patut kauningin rikala ngwedar Sembrama Wecana tur napi
mawinan ?.
6. Indayang karyanin contoh-conto murda Sembrama Wecana!
7. Indayang surat indik sané patut kabaosang ring purwakaning Sembrama Wecana!
8. Surat indik sané patut kabaosang ring pamuput Sembrama Wecana!
9. Napi artin krunané puniki : cutetang, ledang, kacumawisang, penyeledi miwah
tambet.
10. Indayang cutetang daging Sembrama Wecana ring ajeng!