Liturgi Nutup Buka Tahun

31 Desember 2019- 01 Januari 2020

GBKP Klasis Medan Namorambe

A. Persikapen
Perpulungen nikapken pusuh ras ukur guna ngadap man Tuhan Dibata. Kerina siertugas ersikap guna mabai
kebaktin. Adi simabaisa Pdt, Pt, Dk maka votum, salam ras pemasu-masun la ilakoken.

B. Kebaktin
1. Kata Penaruh
Turang ras senina ibas kekelengen ni Tuhanta Jesus Kristus. Silakoken me enda kebaktin nutup tahun
2019 ras mbuka tahun si mbaru 2020. Arah kebaktin enda ibabai me kita guna mengevaluasi
perdalenen kegeluhenta ibas tahun 2019 ras erbahan perencanan si reh mehulina ibas tahun 2020
enda. Sigejapkenlah tole maka sienda kerina la terlepas ibas keleng ate Dibata simbelin kempak
kegeluhenta. Guna ngejapken keleng ate Dibata enda perlu akap kami perubahen dingen peningkaten
kualitas diri, jabu ras gerejanta si reh dewasana. Mari dage sibengketi me kebaktinna enda arah puji-
pujinta man Tuhan KEE 424:1-2 “I Puji Kami Kam”
 Ipuji kami Kam, Dibata simbelin, Alu ende-enden simeriah
Suari ras berngi kawali kami min, segelah la celus bas percuban
Reff : Sangap kal kalak siernalem baNdu e
Daten tuah ras kesenangen pe }2x
 Dibata sajalah tetap si man pujin, Endeskenlah gluhta man baNa min
Tetap IA simperdiateken kita min, KelengNa man banta la erkerin
Reff : ......
2. Votum Salam
L : Ibas gelar Dibata Bapa sinepa wari-wari, Ibas gelar AnakNa Jesus Kristus simereken kegeluhen
simbaru ras ibas gelar Kesah Si Badia sinemani perdalanen geluh manusia.
Keleng ate Dibata si la ersibar tetap ngarak-ngarak kegeluhenta (ndu), ikawaliNa kita (kam) subuk
suari ras berngi, IA kap simada kuasa seh rasa lalap. Amin.
P : Amin...Amin....Amin. (iendeken)
3. Invocatio : “Katawari pe IA sikap nehken perkuah ateNa man baNdu sabab ktari pe IA ngelakoken si
bujur. Malem me ate kalak siernalem man baNdu (Jes. 30:18b).
Mari dage sipuji Tuhan arah ende-endenta man Tuhan arah KEE 181:1-2
“Segedang-Gedang Geluhku”
 Segedang-gedang geluhku itemani penebus
Labo kai pe lit sikurang, adi tanNa negu trus
Dame surga lit bas aku, iusekenNa bangku.
Kegeluhen jadi senang kai pe lalit sikurang
Kegeluhen jadi senang kai pe lalit sikurang.
 Segedang-gedang geluhku, kubentasi krina e
Di si mberat reh man bangku, IA penahangisa.
Labo pediatNa ndabuh, minter kal iangkatNa
Lalap ijagaiNa aku, iban keleng ateNa }2x

4. Pujin Nandangi Keleng Ate Dibata man Manusia (Perp. Kundul)

L : O Tuhan, O Dibatangku. Pusuhku metedeh nandangi Kam. Mesikel kal aku ngaloken ras
nggejapken pemereNdu simbelin e. Malem kal ateku ersembah man baNdu erkiteken kiniulinNdu
si la erkeri-kerin.
P : Lalap ateku ngataken bujur man Tuhan, kupuji Kam la erngadi-ngadi. Ersurak meriah ukurku muji
gelarNdu.

L : Mari dage sipuji Tuhan arah ende-enden pujinta KEE 399:1-2

“Mari Surak Puji Tuhan”

 Mari surak puji Tuhan, endeken nde enden mriah

O Surga doni ersurak meriah
Mari rende muji IA alu ukur simeriah
Puji gelarNa sibadia
Reff : la erngadi-ngadi kupuji Kam Tuhan
Bas krina dampar kegeluhen
Ersurak mriah pusuhku ibas kam
Terpuji Tuhan rasa lalap
 Mari krina manusia sipuji dage Dibata
Rendelah ersuraklah kita krina
Ersadalah ukurta e mujiken gelar Dibata,
Ersurak dage kita krina
Reff : .......
5. Kinata Kegeluhen Manusia
L : Ngginget uga simparna kiniulin Tuhan kempak kegeluhenta manusia, mari dage siakuken salah
ras dosanta man Tuhan Dibata nintalah bas ukurta sekalak-sekalak: “O Tuhan rusur kal kami la
megiken kataNdu. Ilakoken kami bagi sura-sura doni enda saja, seh maka icurnaken kami gelarNdu
arah perbahanen kami tep-tep wari. La kami metunggung pe igelari anak-anakNdu. La kami
metunggung ndatken perkuah ateNdu. La kami beluh njaga kebadian gelarNdu arah pengelako
kami ibas doni enda.”

Mari dage sibuat paksa teneng alu ngendeken (setengah sora) KEE 363:1-3

“AlemiNdu Aku”

 AlemiNdu aku bas dosangku, AlemiNdu aku bas lepakku,

O Tuhan sasap min, O Yesus, Sasap min, alemi dosangku
 Si la payo, lit ibas geluhku, Ngaku aku baNdu o Yesusku,
O Tuhan sasap min, O Yesus Sasap min, alemi dosangku.
 Ku janari ku baba geluhku, DengkehkenNdu min pingko-pingkoku
O Tuhan sasap min, O Yesus, Sasap min, alemi dosangku
6. Berita pengalemi dosa
L : Ibas Dibata ngenca sidatken perkuah ate dingen pengalemi dosa. Nina Tuhan man banta kerina:
“Desken remang erpagi-pagi, dosandu enggo kulesapken, janah salah pe enggo Kusasapken
desken embun. Emaka mulihlah kam kempak Aku, sebab Aku kap penebusndu.” Amin.
Malem ateta sebab Dibata enggo nasapken salah ras dosanta emaka mari dage supuji Tuhan arah
KEE 391:1-2 “Anem Dosangku Mekelat Megara”
 Anem dosangku mekelat megara,
IsalihkenNdu me jadi mbentar
Kam kap erbanca geluh meherga,
Ku gejap tuhu kelengNdu simpar
Reff: Tendingku ersurak janah
Nembah, ku pakeken me pedah
Kam kap Dibata Bapa si perkuah
Bas kepkepenNdu min aku gelah
 Ukur pinter ras bujur nge pindoNdu,
Pusuh si getem ngena ateNdu
 Demi pusuhku alu liasNdu, gelah
Kupembarken min kataNdu.
Reff : ......
7. Renungen
Tema : Jabu Si Erbuah (Masmur 1:1-3)
Ibas berngi pengujung tahun enda dingen ngaloken tahun simbaru tuhu renungen enda mbabai
kita guna ngejepken maka nggeluh erkiniteken enda labo saja puas enggo meteh melala kerna kata
Dibata, sibuk ngelai dingen ikut ibas dahin pelayanen padahal la lit perubahen kegeluhenta tanda
Kata Tuhan enda enggo erkuasa, ergegeh dingen erbuah ibas kegeluhenta sekalak-sekalak.
Pemasmur sekali enda mabai kita uga ndatken kemalemen ate ibas kegeluhen i doni enda arah
kehadiren jabunta sekalak-sekalak. Pemasmur nuriken maka tanda kalak sierkiniteken man
Tuhan arus nggeluh ermalem ate teridah arah jabu sierbuah ibas kerina dampar kegeluhenna.
Tanda jabu sierbuah enda eme; Pemena (ayat 1), peka, megermet, sensitif nandai teman, apakah e
meneken kita tah nelamatken kita. Melala jabu bene sebab la peka ngidah hal siterjadi ibas jabuna.
Misalna, anak si enggo lalar i darat rumah padahal i rumah seh kal ulina. Peduaken (ayat 2a),
tambah pemeteh ras pengangkan kerna Kata Dibata. Reh ndekahna erkiniteken aturna min reh
mbuena pemeteh kerna Kata Dibata e bas kegeluhenta. Misalna, ngoge dingen ngafal ayat-ayat
Alkitab. Peteluken (2b), enggo reh displinna ertoto ras ersaat teduh. Reh buena ngukuri alu
mbages kata Dibata njadiken kita bijak, pentar, tenang erbahan sikap ras keputusen si lit. Uga pe
masalah sihadapi kita baik ibas jabu tah pe pendahin enggo beluh kita ndungisa alu sikap dingen
mehuli. La pedas muat sikap si salah sebab iukuri alu mbages dingen megegeh. Peempatken (3b),
megegeh dingen megenggeng. Bicara kai pe jadi la melus bulung tupung perlego, la macik batang
tupung perudan, la mbungkar ientam angin meter tah lau mbelin. Urat ras batangna megegeh.
Tanda batang simegegeh teruji arah mbuena ia mentasi tantangen bas kegeluhenna. La ndauh
beda ras kita pe. Ujin ras persoalen sihadapi kita jadi alat Tuhan guna njadiken kita megegeh
dingen paguh. Pelimaken (3c), pendahin reh sikap dingen ulina. Ibas pendahin terteki, lit
integritasna, kejujurenna, semangatna ras displinna. Kualitas pendahin pe maksimal hasilna ras
cara kerjana. Kerina enda banci lit ibas jabu kalak si er-Dibata sebab Kata Dibata e jadi ulu
gegehna dingen erkuasa ibas kegeluhen jabunta. Marilah, jadikenlah waktu enda muat sada
keputusen pusuhta guna mengevaluasi sidalani kita ibas tahun 2019 enda dingen erbahan rencana
ras keputusen guna ndalani alu sikap tahun 2020 enda erpalasken Kata Dibata. Jadilah jabu
sierbuah. Selamat nutup buka tahun ibas berngi enda. Amin.

8. Pengakun Kiniteken
9. Persembahen
L : Seh paksana siendesken me pengataken bujurta man Tuhan Dibata. Kata Dibata sijadi palas
man banta eme: “IetehNdu uga liasna Tuhanta Jesus Kristus maka aminna bayak gia IA tapi guna
kiniulinndu ipemusilNa baNa gelah arah kemusilenNa e jadi bayak kam.” (2 Kor 8:9).
Sangana kita mpersembahken persembahenta mari dage sipuji Tuhan arah KEE 385:1-2
“Babalah Persembahen Si Merimna”
 Babalah persembahen simerimna, ku adep-adepen Dibatanta
Babalah korban pujin simehaga
Ku lebe altarNa si badia
Glah tetap breNa pasu-pasuNa
Man krina manusia.
Glah tetap breNa pasu-pasuNa
Terpuji gelar Tuhan.
 Babalah persembahen sijilena,
Ku rumah Dibata si Perkuah
Babalah korban pujin si merimanna,
Ku adep-adepen si erkuasa
Glah tetap breNa keleng ateNa,
Ras lias ateNa banta
Glah tetap breNa pasu-pasuNa,
 Segedang-gedang g’luhta.
10. Pertoton Persembahen ras Safaat
11. Perpadanen Man Dibata
L : Ngidah uga mbelinna lias ate Dibata sinemani ras sinaruhken kita kubas tahun simbaru
enda, nggit nge kita tetap ernalem kempak keleng ate Dibata e ibas kita ngaloken ras ndalani
tahun simbaru enda?
P : Erpadan aku Tuhan tetap erdalan ibas dalan ras kebenarenNdu. La ate kami nilah ku kaus ras
kemuhen, nimpang arah kata ajarNdu. Tahun simbaru enda jadi tahun simbaru ibas pusuh kami,
tahun simbaru ibas cara rukur ras pendahin kami, tahun simbaru ibas keluargaku sidem keleng ate
ras sialem-alemen salah. Guna sie kerina pengasup kami o Tuhan.
L+P : Amin
L : Guna mpeteguhi perpadanenta man Tuhan Dibata rende kita arah KEE 258;1-2
“Enggo Me Mentas Tahun Simale”
 Enggo me mentas kap tahun simale
Si ni kupuji Dibata nge jine
Dage kawali lah min kami tole
Gelah terkelin bas paksa erbebe
Reff : Mentasi wari bas tahun si enda
Ola min sada pe lit sibanggerna
Adi oratilah rusur kataNa
Sieteh nge dungna sibenar tah dosa.
 Nggo gia tadingken tahunna simale
Lit simeriah lit ka mge sindele
Lit ka sijore buen denga si kote
Dikiniteken min ola seh mbole
Reff : ......
12. Pertoton Tuhan
13. Pengutusen Ras Pasu-Pasu (Ilakoken dikune lit Pdt, Pt, Dk)
L : Turang ras senina, dalankenlah kegeluhenta (ndu) i teruh penampat Kesah Sibadia, janah
alokenah pasu-pasu idur Dibata nari:
“Patuhlah kam man perentahKU, maka Kupepaler me man bandu kemalemen ate desken lau;
janah kemenangen reh nepet kam desken galumbang siergalun ku tepi lawit.” Amin.

P : Amin, Amin, Amin. (iendeken)

CCC. Acara si salam-salamen dingen sialem-alemen salah ibenai bapa ras nande emaka seh ku anak-anak, kela ra
permain bage pe kempu kerina.