KIDUNG MALAT

Om Awighnamastu, Om swastyastu
1.Dadape pada rinukmi
Arerengga lungsir ijo
Abapang sutra wilis
Tinulis pada lancingan
Limar ijo angrawit
Anggon angone pada linuwih
Babekelan Kebo Tan Mundur
Watang kadi sesapuh
Sumambur rat jininjring
Pada cawet limar suga

Teges:
Punika tamyang prajurite samipateh mecawi antuk perada emas,
Kauperengga/khyasin antuk kain sutra gadang,
Prajurite mabadong antuk kain sutra gadang,
Paturu macelana lancingan matetulisan,
Maselimpat kain sutra gadang becik pisan,
Pepayasane sami sarwa sane becik,
Dane Patih Kebo Tan Mundur sane dados pamucuk,
Senjata tumbake sekadi sampat lidi,
Sane kasambehang ring tanahe pacurenggeh,
Sami macelana perang tur maselimpat barak suga.

2.Abapang taluki randi

Kumram anggon-anggone lewih
Ndan babekelan ipun
Kebo Angun-Angun
Sewu atameng pada lakar
Tatelas saha tewek ajrihi
Pada acawet limar petak
Abapang sutra rakta
Cinitreng jenar
Penganggone patuh semadi kara.

Teges:
Wenten malih prajurit mabadong kain kasa matulis bunga-bunga barak,
Ngeronyoh papayasane sarwa melah,
Sane dados pamucuk nyane,
Dane Patih Kebo Angun-Angun,
 Tameng panyiuan tur manyuryak manyerit,
Masenjata keris uttama manyejehin,
Sami macelana perang maselampat putih sentak,
Wenten malih prajurit mabadong sutra barak,
Masobyok kuning,
Busanane sami pakenyornyor.

3.Babekelane Kebo Prekasa

Pada watang jininjring
Sasorot kuning
Pada akelambi
Taluki kuning.

Teges:
Sane dados pamucuk nyane Dane Patih Kebo Prekasa,
Sami masenjata tombak pacerenggeh,
Soroh kuning,
Patuh kelambine,
Kain kasa kuning.

4.Acawet limar jenar

Pada anganggo mas
Ndan kang ambekel
Aniti turangga
Kakapane rinukmi.

Teges:
Macelana perang maselimpat kuning,
Sami sarwa nganggo sarwa mas,
Sami dados pamucuk,
Nglinggihin kuda,
Kakepuhnyane mecawi maperada mas.

5.Alancingan gringsing ringgit

Abapang peremas ijo
Pada nganggo tumandang mantri
Luir beteling surat
Lalayane pinanding katareng
 Muah wong saking Kahuripan
Anunggang limar
Anganggo sopacara
Babekelane atunggalan astra.

Teges:
Macelana lelancingan gringsing matetulisan wayang,
Mabadong kain peremas wilis,
Sami ngangge pepayasan mantri,
Waluya sekadi ring gegambaran carita,
Ring temboke majejer,
Sapunika pekantenannya iprajurit,
Semaliha prajurit saking Kahuripan,
Nglinggihin gajah,
Penganggene sekadi sane sampun manut,
Sane dados pamucuk pateh masenjata panah.

6.Para satya kadi Gandarwa

Awahana asti
Mantri Gagelang pada liman
Lumaku ing ungkur
Lan Drepati Gagelang
Sira Panji lumaku ing arsa
Pun Jajaka Maruta wahananira
Aparek lan liman ira
Aji ring Malayu
Jajuluk ira pinanding arsa.

Teges:
Para Ksatryane waluya sekadi Gandarwa,
Nglinggihin gajah,
Sapunika taler Mantri Gagelang nglinggihin gajah,
Dane memargi ring ungkur,
Sareng Ida Prabu Gagelang,
Ida Raden Panji memargi ring ajeng,
Sareng Dane Jajaka Maruta,palinggihan dane,
Nenten doh ring palinggihan Ida,
Prabu Malayu,
Kober keagungane lan umbul-umbul nyane makembaran ring ajeng.
7.Angin-angin ira
Angresi tewas
Paran urungane satru
Gempung dening isenging prana
Luir Hyang Hari apalih.

Teges:
Angsengan idane,
Banget mangreresin manah,
Yan rawosang,sapunapi je galak nyane imeseh,nenten pariwangde,
Pacang basmi antuk kesyengan prebawan Idane,
Sane sat waluya sekadi Sang Hyang Wisnu mapalih dados kakalih.

8.Kenyarning warnan ira

Kadi baskara kembar
Mijil saking udaya giri
Tabeh-tabehan ira
Gumirih.

Teges:
Tejan prerain idane,
Sat waluya sekadi suryane kembar,
Sane medal saking pucaking gunung,
Suaran gambelan utawi tetabuhane,
Gumuruh,mangerudug.

9.Asreng lan gentaning asti

Kang anyir aken ati
Krikning turangga amelingi karna
Luir karunguing ambara
Endan wuwusen Ndrepating Mataram
Sampun sira hias enjing
Lan Nrepating Pajalaning Cemara
Kang bala kabeh
Sampun tiasa
Nrepating Lasem sira dereng ahyas.

Teges:
 Suaran gambelane mabarung/madukan kalawan suaran gentan gajahe,
Banget manyejehin manah,
Maliha suaran grigihan jarane mangempengin kuping,
Sekadi kapiragiang rauh saking ambarane,
Sane mangkin kaceritayang Ida Prabu Mataram,
Semeng pisan Ida sampun nabdab payas,busana perang,
Sapunika taler Ida Prabu Pajalaning Cemara,
Rauhing prajurite makasami,
Sampun sayaga pacang lunga mayuda melanin Ida Prabu Lasem,
Sakewanten Ida Prabu Lasem dereng nabdab payas (seantukan rabin idane
Kantun ngatur nguningayang ipian).

10.Lingira Sri Parami Swari

Ala ipen ingsun uni
Sira katon anunggang palwa
Sek ata grahan ira
Karem madyaning pasir
Sampun patikutu sira ajurit
Sri Narendra asawur semita
Tur angol kanta yayi
Arare sira
Duk tan mangkata yen ingsun paratra.

Teges:
Sapuniki aturne Ida Anak Agung Istri majeng ring Ida Prabu Lasem,
Ratu Beli Agung dados kawon pisan ipian tityang inuni wengine,
Ring pangipian cingak tityang Beli Agung ngelinggihin prahu/jukung,
Saget jeg bencar perahune/jukunge sane linggihin Beli Agung,
Raris kalebu Beli Agung ring tengahing segara,
Santukan pracirine kawon,sampunang nyan Beli Agung ampah ring payudan,
Ne mangkin Ida Prabu Lasem nyawis saha kenyem tur mituturin rabinne,
Sinambi ngelut bahun Ida Iari,
Uduh adi sang ajegeg rabin Beline Idewa,
Ne jani sing buungan Beli pacang lunga maperang,yan pradene nyin Beli mati
ring paperangan.

11.Punapeng ngungsi dening prawira

Nging mati ya ajurit
Apan swarga dinunung
 Tur awetning
Ucaping wong kari.

Teges:
Napi punika sane kasaratang olih iprajurit sane prawira,
Wantah purun seda ring payudan melanin gumi,
Seantukan yan seda ring payudan wantah swargane sane pacang kaungsi,
Tur selawasnyane,
Kebawos anak utama(pahlawan) wiakti.

12.Sampun mangrasa sang katong

Yan antakanira
Sarira marlesu
Sengira lutur
Sampun anglong Sanghyang Urip.

Teges:
Wusan mabawos asapunika,Ida Sang Prabu sampun menyet ring raga,
Ring pacang rauh kretasemayan sedan idane,
Jeg premangkin ragan Idane lemet lempor lesu,
Swabawan prerain Idane ucem-kecud,
Sekadi sampun katinggal olih Ida Sang Hyang Atma.

13.Anangis Sri Parami Swari

Sang Nata amisiki
Sarwi angusaping luh
Meneng atma jiwan ingsun
Den tulus sanggup ireng pekasutan
Anutekana kapatin ingsun
Pang sapta angjadma
Sira pangeran rwangan ingsun
Pejah awor
Saka rwanang pendem sumirang.

Teges:
Seantukan makesyeb Ida Sang Prabu,nangis raris Ida Anak Agung Istri,
Raris Ida Sang Prabu mapapasihin/mengasuhin Ida Irabi,
Uduh adi jiwan atman beline idewa,meneng,sampunang nangis,
Elasang kayune,elingang teh pasubayane duk ring pamereman,
 Ring sajeroning pasubayan, Idewa masumpah pacang masatya laki ring Beli,
Sapuniki daging sumpah Idewa,yadiastu ping pitu tiang manumadi,
Sumangdennya Beli Agung sida malih matemu/marabi sareng tityang,
Yan seda mangda sinarengan,
Makekalihan layone pendem dados asiki,sapuniki sumpah Iadi maka tanda bakti ring
beli

14.Sinambut Raden Dewi

Dennira Sri Narapati
Katuon nini tuhuira
Anangis Tuan Galuh
Tumuli ahyas Sri Bupati
Adestar sutra dadu rinukmi
Asuweng papelik asumpang cempaka
Apinggel kana kalih
Kemiten cawininira
Tiningkah bot sabrang.

Teges:
Kaambil tangan Ida Anak Agung Istri tur kaurut-urut,
Olih Ida Sang Prabu,
Uduh Adi sapuniki kasujatian daging sumpah Iadi wyaki,
Tan papegatan tangis Ida Anak agung Istri inggian je sampun kapapasihin,
Wusan amisiki tumuli raris Ida Prabu Lasem ngrangsuk busana perang,
Madestar sutra barak nguda sane maprada emas,
Masubeng anting-anting,saha masumpang sekar cempaka,
Magelang kana tangane makekalih,
Jimate sampun kabuntil ring celana,
Agem idane sekadi wong saking dura nagara.

15.Alancingan grinsing pandawa jaya

Lelengingan ira mlecut
Sira Parami Swari
Amulat
Tan tresneng putri

Teges:
Malancingan kain sutra maotren kejayaan Sang Panca Pandawa,
Busana tanda keagungane sampun keanggen,
 Ida Anak Agung Istri,
Manyingak Ida Sang Prabu ngrangsuk busana,
Pekantennannya Ida Sang Prabu sampun tulus,tan pariangen ring oka,

16.Lingira Sang Katong

Lah pada karya sira
Tur pinekul
Ingaras-aras sira
Para ranten aji.

Teges:
Wusan ngrangsuk busana,mangandika ida,pangandikan Ida Sang Prabu,
Inggih margi pada saling astitiyang,
Saha kapeluk,
Tur kearas-aras ida,
Arin-arin idane.

17.Maring Sira Parami Swari

Angiling-ilingi Sang Katong
Sarwi amekul pakenan
Asemu-semu luh
Duh anom rangda sira atmajiwa
Sang onana sapah reko manira
Marga ingsun swarga
Apan pakanira estri
Pati brata alaki
Edanan sipakanira.

Teges:
Raris ketampekin Ida Anak Agung Istri,
Ida Sang Prabu manyingak manletekang,
Sinambi saha kapeluk Ida Parami Swari,
Mangembeng-ngembeng toyan panon Ida Sang prabu,
Uduh Adi atmanjiwan beline idewa,Iadi pacang balu (dados janda muda),
Sang sane sampun lina mamawosang,kocap,
Pamargin/parurungan beline ngungsi swarga,
Kerana ulian baktin nyane sang istri,
Masatya laki,nglaksanayang pati brata ring rabin nyane,
Raris Ida Anak Agung Istri kaicen pakpakan base-buah(ganten) olih Sang Prabu,
18.Anginang Sri Parami Swari
Tinarima ring latih
Tur sinambut astan ira
Ingusapa kening luh
Kantun tuan sampun tan asih
Sirang anakira kari kawelas asih
Sri Parami Swari angusap
Keris sira kaprabon
Karakna margan ingsun
Kapanggih lanira.

Teges:
Ngajengan ganten Ida Anak Agung Istri,
Ketampenin antuk manah liang,
Raris kagamel tangan Ida Sang Prabu,
Saha nyadsadin toyan panon Ida Sang Prabu,
Sinambi matur Ida Anak Agung Istri,Kari Ratu Beli Agung nenten angen,
Ring icening,sane kantun muatang kasih sayang,
Nglantur Ida Anak Agung Istri ngrawos,
Ngusudin keris keagungane,
Keris punika anggen tiang jalaran,sane ngranayang tityang polih pemargi,
Presida matemu ring Ratu Beli Agung.

19.Henti welasira Sang Katong

Lah mangko aken kadga
Ngarasing malih-malih
Lah kantun Pangeran
Ingsun mijil.

Teges:
Tan wenten malih sane keangenang Ida Sang Prabu,
Wantah keris pusaka keagungane kemanten,
Kearas-aras mewali,
Nggih kari sang Pangeran,
Beli pacang medal.

20.Lunga Nrepati
Maring kang luir
Hyanging Kusuma
 Wontenning pemargan
Alinggih Sang Nrepati.

Teges:
Ida Sang Prabu memargi,
Menampekin Sang Ajegeg sane sekadi
Ratun bungane sane pinih becik,
Sane wenten ring kaputren malinggih,
Ida Sang Prabu raris nangsekang.

21.Sarwi ngucap nabda manis

Pukulun Sang luir Ratih
Kantun ingsun met Pangeran
Niscaya ir ingsun
Mulata ring sira malih
Manawa pejah Sang Pinaran anangis
Munggah neher angineb lawang
Nrepati kerangan
Tur angucap
Lah sakerepira lamun katawan.

Teges:
Sinambi mangandika Ida Sang Prabu,pangandikane alon manis,
Uduh Dewa sang ajegeg waluya Sang Hyang Ratih,
Beli kantun Sang Pangeran,
Beli percaya,
Pacang nyingak ring Idewa malih,
Yan pradene beli pejah ring payudan,raris sang sane kaparanin gelingsing nangis,
Raris munggah kajeroan ngupet lawangan,
Kandugi Ida Sang Prabu kemad tur jengah,
Sinambi mawecana,
Nah kenken je arep Iadi,lamun tan suka dados tawanan.

22.Ken Bayan anyaurin

Duh dewa sukaningsun tan sipi
Andadi jajarahan
Angarepaken mulih
Maring bumi Kaderi
Endan Sri Nrepati raris mijil
 Kasandung sira ring arata
Sri Parami Swari anyerit
Lan Rabi Ajinira
Nrepati anolih tan panangsaya.

Teges:
Ne mangkin panyeroan Ken Bayan raris matur,
Inggih ratu sang prabu,tan kadi-kadi mungguing legan manah tityang,
Bandingan tityang dados tawanan/jejarahan perang,
Becikne tityang mewali budal,
Budal kanegara Kadiri,
Wawu asapunika atur ipanyeroan,tumuli raris Ida Sang Prabu memargi medal,
Ketanjung cokor Ida ring margine asah,
Ida Anak Agung Istri majeritan tangkejut nyingak Sang Prabu kesandung,
Rauhing biang lan ajin idasareng majeritan tangkejut,
Ida Sang Prabu wantah matolihan,nanging manah Idane nenten ja jejeh.

23.Linud sinamber dening paksi

Mutah marus
Lor-wetan sangkan ipun
Mangkin suradira nira
Sri Nrepati.

Teges:
Maliha Ida Sang Prabu kasanderin olih ikedis goak,
Sinambi ngutahang,mejunang getih ipun ikedis,
Saking kelod kangin panekannyane ikedis (punika maka ciri kawon pisan),
Inggian ja sapunika,nanging sayan-sayan maweweh kapurusan Idane,
Sang Prabu.

24.Lingira ih Sang Nilapaksi

Wus weruh ingsun
Balik tuduh akena
Swarganing mati ajurit.

Teges:
Pangandikan Ida Sang Prabu,ih iba kedis goak,
Gelah suba nawang,
Jani suba gantin gelahe mati,
 Mai cai malipetan,tegarang patujuhang,
Swargan iprajurit ane mati di paperangan.

25.Prapti ring Yawi Nrepati

Sesek-siuh penuh punang wong
Tabeh-tabehan gurnita
Bindi gubar asimban
Sang Nateng Lasem angling
Yayi sada mangkata
Punika bala sawaneh
Rumuhun tumuli mangkat
Senjatane lumarap
Punang adadap tan keni winilang.

Teges:
Sepengrauh Ida Sang Prabu ring jaba puri,
Sampun ebek seksek pisan prajurite ngantosang Ida,
Suaran gambelane umyang mabyayuhan,
Swaran bende,kempul,kendang mabarung,
Ida Sang Prabu Lasem mangandika,
Yayi mangkin sampun mamargi,
Puniki prajurit pilihan ( pasukan khusus ),
Raris ring arep/rihinan memargi,
Senjatane nglemlam nyapnyap,
Punika tamyang lan senjatane tan keni antuk ngawilangin.

26.Sira Tumenggung rimihin,

Lan Sira demung Mataram
Babekelanira ginar
Lampahe lumurug
Nrepati munggahing asti
Muwang bangga kakyati
Pada wani jaga kumusuh
Krapeking rangin mapagut
Lan kraceking watang mapagut
Kaget karing payudan.

Teges:
Dane Tumenggung ring arep,
 Sareng Dane Demung Mataram,
Sane keanter olih Ida,sami pada girang,(semangat),
Pamargine pacang magegebug/mayuda,
Ida Sang Prabu ngalinggihin Gajah,
Maliha ida sampun nyager/andel tur kasub,
Sami pada wanen nandingin musuh,
Krentengan suaran senjata sane magatik,
Muah krintingan tumbak magatik,
Pidabdab punika banget nangkejutin ring payudan,

27.Mangkat Nrepati
Sama atunggalan
Samaja saha jajuluk
Pinanding lawan dwaja
Semunira ajerihi.

Teges:
Memargi ida Sang Prabu,
Sareng prajurite sinarengan,
Prajurit Ida mewasta Pasukan Gajah,makober magambar gajah,
Kober Pasukan Gajah punika masanding sareng keagungane,
Swabawane banget manyejehin.

28.Kangawa hana atewon

Pangkrikning turangga
Amelingi karna
Kaya karunguing widat
Luir bubul kapertiwi

Teges:
Sami pakebyakbyak wiakti,
Swaran grigihan jarane,
Ngempengin kuping,
Sakadi kapiragi rauh ring ambarane,
Sapunika taler sekadi sigar/dedek pertiwine.

29.Dauh ro rahuing payudan

Kawuwusen Sira Panji
Sampun atingkah dwarada mata
 Raden Prabangsa
Makadi gading pangiwa
Kalawan Sira Undaka
Maring ta sira ksatrya
Kang mungguing tengen
Sira Aji Malayu
Pinaka dadi yogya tanggehaning bala.

Teges:
Sawetara dauh ro sampun reke rauh ring genah yudane (pasiatan),
Kaceritayang Ida Raden Panji,
Sampun nabdabang pagelaran,sane kawastanin Pasukan Gajah Galak,
Dane Raden Prabangsa,
Pinaka gading gajahe ring kiwa,
Sinareng Sira Undaka,
Punika para Ksatryane,
Pinaka gading Gajahe ring tengen,
Mungguing Ida Prabu Malayu,
Pinaka dados pakukuh nyane iprajurit.

30.Tulale Wong saking Keling

Kebo Tan Mundur angukuhi
Lawan Kebo Prekasa
Sira Panji Ring Sirah
Pinaka buntut Mantri Gagelang
Sri Nrepati kari soring wandira
Asregep punang bala
Tuminggaling lawan Tuan Duta
Katon saking doh
Luir Kusuma Salak.

Teges:
Sane pinaka tamblele gajah, punika prajurit saking Keling,
Dane Kebo Tan Mundur dados pikukuh,
Sareng Dane Kebo Prakasa,
Raden Panji pinaka tenggek gajah,
Sane pinaka ikut gajah Ida Mantri Gagelang,
Ida Prabu Lasem kantun ring sor taru bingine,
Sampun sregep,tyaga punika prajurite sami,
Manyingakin sareng sang sane dados utusan,
Makanten saking doh,
Punika Pasukan Gajah galak,waluya sekadi bungan salak.