Katarongguwan na’-kana’ Ajar E compo’ saabidda mosem Pandemi covid 19

Para pameyarsa se badan kaula amoljaagi. Kalaban kasokan Epon Alllah

Sughanahu Wata’ala, badan kaula saat samangken kaparengan karsa kaangguy
nganggit settong careta sabadhi ajarba’agi katarongguwanna na’-kana’ ajar
ecomo’ saabidda mosem pandemic covid 19.

Para pameyarsa se badan kaula amoljaagi. Saat mangken ampon kalontha

eman-ka’dhimman nagara badhana panyaket se anyar enggi ka’dhinto se
kasambat panyakey covid 19. Ta’ kadinggalan jugan nagara Indonesia. Kalaban
badhana panyaket covid 19 ka’dhinto maka babulangan eman-ka’dhimman
sakola’an sae sebadha neng e SD otaba SMP, SMA tor laen epon ta’ ajalan akadi
se samesthena. Daddi ngabidi badhana mosem panyake’ covid 19 ka’ dhinto
sadaja sakolaan ampon badha pan-saponapan bakto otaba bulan sempat etotop.
La…, manabi sakolaan ka’dhinto etotop, kadi ponapa na’-kana’ mored carana
ajar? Melana gella’ ampon ejabar’agi ja’ babulagan e sadajana sakolaan ka’ dhinto
ta’ ajalan akadi se biyasa. Dhari sabab ka’ dhinto na’-kana’ mored kodu ajar e
compo’na bang-sebang kalaban cara daring otaba onlend. Bila ampon bannya’
ajar e compo’ tanto bisaos bannya’ marlowagi oreng towa kaangguy abarengnge
otaba ngancae. Melana dhari sabab ka’dhinto sebagiyan oreng towa mored
ka’dhinto ango’ngo’an margana gasek adinggalagi kalakowan epon. Salaen dhari
ka’dhinto ngo’ngo’an epon kadi ka’dhinto “baddiyanna molong tor adidi’ na’-
kana’ paneka ta’ gampang marlowagi kalatenan ban kasabbaran”. La… dhari
sabab ka’dhinto jugan sabagiyan oreng towana mored ampon molae apangrasa ja’
molang na’-kana’ ka’dhinto banne kalakowan gampang, ponapa pole pas
kalerressan dha’ka potrana se abak mangan otaba beddhel dining molang otaba
ajar kalaban cara daring otaba onlend ka’ dhinto banne nambai nyaman, namong
nambai ta’nyaman, aponapa margana? Amarga salaen tamba baragat jugan
nombuwagi rassa busen. Kadi ponapa ru-guru carana molang, ponapa kalaban
cara daring otaba onlend terros?. Dining ru-guru semolang salaen kalaban cara
daring otaba onlen jugan dhateng otaba epon rabu dha’ compo’ epon bang-
sebangnga red-mored kalaban cara egilir dhari mored settong ka settongnga tor
manabi compo’na semma’-semma’, maka se kadi ka’dhinto epakalompo’. Dining
ru-guru se dhateng otaba serabu dha’ bang-sebangnga mored ka’ dhinto metorot
kellas tor guru kellas epon bang – sabang. Ponapa kaontonngan dhari hal
ka’dhinto . se sapesan enggi ka’ dhinto guru bias asilaturrahmi dha’ oreng towana
mored, se kapeng dhuwa’ epon ru – guru sareng reng towana red - mored bias
nambai semma’, nambai esto tor atamba ngangcep.

Kadi ponapa ngerenge katarongguwanna na’ – kana’ mored se ajar

saabidda mosem covid 19 ? Alhamdulillah sadaja red – mored ampon padha
taronggu se ajar sanaossa coma ebulang kalaban cara daring otaba onlend, ponapa
pole pas edhatengnge otaba erabuwi ka compo’na, otama epon na’- kana’ se pajat
padha adreng, bajeng tor andhi’ pangngaterro se tenggi.

Salaen dhari ka’dhinto enggi badha jugan se ta’ kongse taronggu, akadi se
ta’ andhi’ HP amarga kakorangan baragat otaba korang balanja. Salaen ka’dhinto
badha pole se ta’ kongse taronngu otama epon na’ – kana’ sepajat ta’ pate bajang
tor ta’ andhi’ pangaterro. Dhari ka’ dhinto malar moga panyake’ se banget babaja
ka’dhinto mandar dhuliya tadha tor duliya elang nyopre red – mored se asakola
ceppet abali pole akadi se sabelunna epon Amin Allahumma Amiin.

Kera epon saka’dhinto sakadar careta se bias eanggit sareng badan kaula
ngengenge bab katarongguwanna na’ – kana’ se aja e compo’ saabidda mosem
pandemic covid 19. Malar moga careta ka’ dhinto abakta peguna monggu dha’
badan kaula sareng dha’ para panjenengngan, tor manabi badha kakorangan tor
kalopodan epon badan kaula anyo’ona sapora tor anyo’ona ma’af setadha’ bates
epon, amarga badan kaula menangka manossa biyasa tor ce’budhuna.

Dhari ka’dhinto manabi badha kasalahan tor kalopodan epon ka’dhinto

karana kabudhuwan badan kaula, tor manabi badha lerres epon ka’ dhinto karana
petodu epon Allah SWT.

Saka’dhinto pamator, kacepot gulana mera sala lopot nyo’o sapora.

Hadanallahu Waiyakum ajma’in tsummassalamu’alaikum Warahmatullahi

Wabarakatuh.
Batopote tgl : 20 November 2020
Eanggit sareng
Guru Batuputih Laok II

Supak, S.Pd.I