ULI ULIENGA PUA RINANGA

RI KAMPONG KALAUSI MENA DANGEA KEJARIENGA ITO MOTOBENAKA. SANGANA MAKACALA DG.
MARUNTU. KAFA SII AJO, SUSUNA DAMPEAPO TENTE LAEMBUSIA. CERITANA, DAMPEAPO UMURU ANE
ENDO RUA, TALU TAUNG RI AJONA JUMAA SEMELAPENA BETANDENG JUMAA, LAKONYAUNG-NYAUNGIA
INONA. ALENGA LAMEKOE LAPALAI MENA RI SAPONA. LEGA JUMAA BEKANDEMO SENGKA INONA
RIDALEKIMO ANA-ANASI PENE. PEKUTAKEKIA RI RANGANA DAENG ITO MOSANIA. ALENGA KAFATI SERE
AJO LEGA MEGERIBI, DAENG BELILINA. MESUSAMO INONA MENGA AMANA, ALENGA TURUNG TANGANGO
ITONA KAMPONG PENTAMBANI PENDALE. PIA PIA AJO PENDALE DAENG HASELENA.

ALAMO AJO, ALAMO BULA, ALAMO TAUNG, KAFA SETEMPO ANE ENDO FALU, SIO TAUNG DAMEA EMBU
MAKO RISAPONA. PENGURUNA RI INONA, YAKUSI DAMEA TOROENG BEERUKU ENSANA ITO METUA
PIARAKU TURI LATUDUKUKANA BELILI PESUNA. LEGA PESUNA, FARE LAPE-LAPE MBELANA LATUDU
ANTARAMO MAKO RI KAMPONGA ITO METUA PIARANA RI NGAPA NANGA. ALENGA ITO METUANA
LATUTUNIA PEMEINGINGA ANANA, REKENGIMIA SIMO LIPA PEKANDE-KANDE. BARI ITO MOPETUTUNI
LIPA. PIA ANGU KELE LEPA-LEPA SARI SAFIKI MAKO.

TOKAFA RITURI, ENDEMO RI BAFO RI BONE PUTI RI TAMBENA LURU2 OGE. KAFA SII AJO LURU2TU
DAMPEAPO, DAENG TAFANA MAUNG SETAKE RI TAMBENA. TAFANA MOMEGUGUTU LAPETAMBUNG LELE
RI LEPENA MBALI-MBALI RITOTONA TENGKE KEMENAENG RI BIFI2. TOKAFA RI TAMBENA LURU2TU ANA2
TUPENE LAKARIA BELA NGGOLU RI PAANA INONA, TUNU NISI2 BAANA. LEGATU LASALEMO AMANA
MENGA INONA JONGKO RI SARINA. LEGATU LATUDU TUNU DUPA. ENDO MELENGO LAPEREMISIMO RI ITO
METUANA, PAUNA YAKU BEKU LIPAMO, TURI PENAMO INO PIARAKU LASALEKUMO. ALENGA
LAMELALOMO MENGA OMBUNA DUPA.

PUA RINANGASI TENTE LALAHERE RI PANARUKANG RI JAWA TIMUR. TENTE LAPESINGKAFA KEKIA ITO
MOSOMBE PIATU ITO KALUMANYANG RI PANARUKANG TURI, ENSANA ENDO MENA LAPESINGKAFAKEKIA
ANE ITO ASLINA KALAU. DAMPEA JAMANINA BENGKA PIATU TENTE PERAMBANG BENGKANATU MENGA
SENAI MENA RI BINONGKO, SANGANA BENGKANATU GUNUNG RINGGI PERANA WARNA BULAFA.

KAFA SII AJO ANE LAKOSANGEENG SUSU2NA LAPAKE PAU MENGKASE, MAUNG ITO ENDO SANI PAU
MENGKASI SESEAJONA.