Naskah Turi-turian SDN 177070 Galung

Siboru Tumbaga

Di sada huta na margoar si suga-suga adong ma sada ama na mabalu namargoar Raja Guasa.
Adong do dua halak boru nasida,ima namargoar Si Boru Tumbaga dohot Si Boru Buntulon.
alai dang adong anak ni Raja i. Mansai bahat do arta ni raja i rodi pinahan dohot tano
nabidang. Alai nang pe godang artana, dang hea boi sonang roha na ala so adong anakna na
lao manean artanai molo dung marujung ngoluna haduan. Tangkas do di uhum nihalak batak
mandok, naso tupa boi boru nalao manean arta ni amongna. Jala hinorhon ni uhum I sai tarida
do boru naso adong iboto na marhite dang boi paheon ni nasida tintin manang golang di
tangan siamunna.

Ganup ari sai marsak do roha ni Raja Guasa hinorhon ni sitaononna naso atur mar anak i.
Tangkas do tarida arsak ni roha nasida sian ongkol-ongkolna. Alai sai boi do di tabunihon
arsaknai sian boruna anggiat unang marsak roha ni boru na dua i. Sai di tabunihon ma arsak
nirohana marhite sada sullim na sai solot di gontingna pola do mago arsak nirohana molo di
palu sullim i. Sipata sai hera na mangandung do panghuling ni sullim I hinorhon ni arsak roha
nasida.

Alai nangpe sai ditabunihon arsak ni roha nai, boi do dapot roha ni boru buha baju nai arsak
ni roha ni amongna. Tong do sai busisaon roha ni si boru Tumbaga mamingkirhon ise ma na
lao manean arta ni amongna. Ai nunga bot ari pamatang ni amongna. Sai dijujui do nian
among nai lao mangoli anggiat tung adong ibotona, alai dang olo anggo amongna.

Di sada tingki sai busisaon ma boru na nadua i hinorhon ni I tibu ma mulak boru nai sian
hauma. Longang ma roha ni among na ala tibu boru na mulak sian hauma. Ala longang
nirohana laos disungkun ma boru na dua i.

“Ai boasa tibu mulak hamu boru?” ninna amongna

“Ima, among sai busisaon do roha name di balian ala so adong iboto name. Ai ise ma haduan
na lao manean sude arta ni among I molo nga marujung ngolu ni among. Ai takkas do di
uhum ni halak batak naso tupa boi boru na lao manean arta ni amonna” di alusi boruna Siboru
Tumbaga
“Toho doi nanidokmi boruku, jadi tarhira songon dia ma naeng didok roham?” dipatangkas
amongna ma

“Nian rohaku among, mangoli ma muse among anggiat adong muse iboto nami, anggiat
adong na boi manean arta ni among haduan” di ulahi si boru Tumbaga manosoi among nai
lao mangoli.

Alai dang di oloi raja I pangidoan ni boru nai ala takkas diboto nasida pamatangna naung
matua jala satokkin nai bot ma arina. Hinorhon ni alus ni amana naso mangoloi pangidoan ni
roha na, manigor lao ma si Boru Tumbaga tu luat barus lao manjumpangi Datu Partungkot
bosi. Sip ma ibana lao naso pamotoan ni among dohot anggina. Laos pahean ni baoa do
dipahe siboru Tumbaga lao tu Barus ala di tagam rohana parmaraan di dalan. Hira satonga
dalan pajumpang ma si boru Tumbaga dohot Datu Partungkot bosi i. Laos di paboa ma na
suruan ni Raja Guasa do ibana. Jala laos di pasungkuhon ma taringot tu gorak ni among nai tu
Datu i.

Tangkas ma tutu alus ni Datu tudos tu gorak ni amongna. Ai satokkin nai nama asa bot ari ni
among nai. Ia dung dibege alus ni datu I, manigor mulak ma si boru Tumbaga. Dung sahat
nasida dijabu dang jumpangna among nai. Di sukkun ma tu anggina

“Didia among anggi hu?”

“Lao nakkin tu balian lao mamareso akka pinahan angkang” di alusi anggi nai.

Busisaon ma siboru Tumbaga ala lao among nai huhut marningot alus ni datu i. Naeng lao ma
ibana mandapothon maongna tu balian. Alai dang sanga dope si boru Tumbaga borhat,
dibereng ma nga marudur natorop huhut manuhuk among na. Jala laos di paboa natorop i ma
na madabu Raja Guasa di dalan lao tu balian.

Nung dipapeak among na di podoman, laos didok among nai ma tu boru na nadua i.

“Papungu hamu ma inang akka ulos dohot mas na tininggalhon ni inong mu nahinan lao
dihamu nadua Alana nunga manjonok halilu ni inong mu lao mangalap au” ninna

Umbege I laos di ulahon boru na nadua I ma songon nidok ni among nai. Nung simpul
dipapungu nasida, di pareso ma muse among nai, jala di ida ma naung tos do hosa ni
amongna. Hinorhon ni I mangandungi ma nasida nadua laos di paboa ma tu bapa udana ama
ni Buangga ima anggi ni among na. Umbegei mamittor lao ma ama ni Buangga tu jabu ni
Haha nai. Alai dang na lao mampasuman adat permonding ni haha na ibana lao tusi nalao
mangarajai arta ni Haha nai do. Jala laos di dok ma tu natorop i.

“Tanom hamu ma bangke ni da hahang on so sanga hubolonghon I tu pudi-pudian. Ai dang si

tahanon bangke di jabu”

Tarsonggot ma natorop I umbege panuturon ni ama ni Buangga. Ganup ma naro tusi

mangalean sipaingot tu ama ni Buangga asa jolo dipasuman nian adat na hombar tu
parmonding ni abangna tudos tu adat batak. Alai dang ditangihon ama ni Buangga sipasingot
I jala tamba ma rimasna pola do dohonanna naeng seat on na boruna nadua I molo
mangulahon adat tu amana. Umbegei laos borhat ma natorop manghallung bangke ni Raja
Guasa tu udean.

Anggo ama ni Buangga dang dohot jala boru na dua I pe di hurung do dijabu laos disukkun
didia parpeak ni angka mas dohot ulos ala so jumpang nasida be di poti panimpanan. Ala
dang dipaboa si Boru Tumbaga dohot Siboru Buntulon peak niarta i. Tambama rimas ni ama
Buangga. Laos di sarat ma boru na nadua I tu harangan jala di rahut disada hau.

Ditadinghon ama Buangga ma boru na nadua I diharangan I. Mangandungi ma si Boru

Tumbaga dohot si Boru Buntulon huhut mangendehon ende andung-andung hinorhon ni si
taonon nasida. Di na marendei nasida tartoho ma lewat parburu sian tonga niharangan i. Laos
mabiar ma parburu nadua I di rippu rohana begu do namarende i. Alai labu dipatangkas
nasida ma. Tarsonggot ma nasida mangida dua halak borua na di rahut di bona ni hau.
Disukkun nasida ma

“ise ma parroha na jahat nan a mangarahut jala manadinghon hamu di harangan on?”
disungkun parburu I

Laos di paboa siboru Tumbaga ma pangalaho ni bapaudana. Umbegei asi ma roha ni parburu
I mangida si boru laos dipalua ma tali sian tangan na ni si Boru Tumbaga dohot Si Boru
Buntulon. Jala diboan ma mulak tuhutana asa dipasaut nasida gabe ripe na. Asa dung dipasaut
siboru tumbaga gabe ripe na. Laos tubu ma roha nasida mandapothon hula-hulana tu huta ni
Raja Guasa. Asa di tanda hula-hula jala di pasuman partording ni peak ni arta na tininggalhon
ni simatuana.

Dung sahat nasida dihuta ni hula-hulana rappak dohot si boru Tumbaga. Longang situtu ma
roha ni parhuta I mangida ala nungga mulak si boru na tartean i. Laos marpungu ma halaki
umbegesa turi-turian ni siboru tumbaga taringot tu pangalaho ni bapaudana. Umbegesa I
marpungu ma angka natua-tua nihuta lao manghatai uhum taringot tu boru nasu adong
ibotona. Jala mulai sian I di gurathon ma di uhum ni halak batak naso tupa teanon boru naso
adong ibotona. Jala molo marujung amana tu boru nai ma di lehon sude arta nai. Ai sarupa do
anak dohot boru na gabe mangurus natua-tuana molo nunga matua.

Dung simpul ulaon I, mardame ma roha ni ama Buangga laos di paulak ma sude arta ni
hahana tu boru na nadua i.