Bismillahirohman nirohim-Assalamuallaikum
wr, wb.
Kanthi pepayung budi rahayu saha
hangunjuaken raos suka syukur wonten
pepadaning Gusti Allah ingkang Maha
wicaksana" Mugi Rahayu’a Sagung Dumadi"
tansah kajiwa lan kasarira dhumateng
panjenengan sedaya hangluberana dhumateng
kula.
Nuwun dhumateng Panjenenganipun
para pepundhen, Para sesepuh, pinisepuh
ingkang hanggung mestuti pepoyaning
kautamen. panjenenganipun para tamu kakung
putri ingkang dahat kalingga murdaning
akrami.
Amit pasang aliman tabik mugi
tinebehna ing iladuni myang tulang sarik, awit
kula cumanthaka hanggempil kamardikan
panjenengan sawetawis ingkang tinembe
sekeca wawan pangandikan saha mangun
oneng, Boten ateges ngirangi unggah-
ungguh,subasita menapa dene tatakrama,
ananging kula hangemban dawuh jejibahan
luhur piniji minangka talanging atur saking
panjenenganipun ( Dimas sudadiya) sekalian.
Panjenenganipun Bapa...(Hartanto)
sekalian ingkang pantes hanampi sagunging
sekar pakurmatan. kula minangka duta saking
panjenenganipun ( Dimas Sudadiya) sekalian,
Kapurwakan sepisan: " Ngaturaken salam
taklim katur panjenengan sumrambah
kaluwarga dalasan gotrah.
Jangkep kaping kalih, ing nguni sampun
wonten pirembakan ing antawisipun (Dimas
sudadiya) sekalian ingkang anggadahi putra
kakung kekasihpun Bagus...( Vendi yudha
Pratama) kalian Bapa...(Hartanto) sekalian
garwa ingkang anggadahi kenya siwi sesilih
Rara...(Fernanda Tiyana Hapriliyanti).
Gumolonging pirembakan nedya
hangraketaken balung pisah daging arenggang,
bebasan ngebun-ngebun enjang ajejawah
sonten, ndhodok latar ndhodok lawang
sumedya nginang jambe suruhe, kanthi atur
mekaten karana sampun jumbuh anggenipun
pe-petangan, saha sampun manunggal cipta,
rasa, miwah karsanipun, kanthi menika
panjenenganipun (Dimas sudadiya) sekalian
ngaturaken syarat sarana minangka
jejangkepanipun tatacara salaki rabi. Wondene
ingkang badhe kaaturaken wonten ing ngarsa
Bapa...(Hartanto) sekalian inggih menika:
 sanggan saha majemuk ingkang awujud
maneka warna kanthi pangajab, mugi
boten ningali wujud lan gunggungipun,
ananging kepanggaliha niat ageng tulus lan
suci saking manahipun (Dimas sudadiya)
sekalian garwa, anggenipun kepengin
sanget ngraketaken tangsuling kekadangan
antawisipun keluarga kekalih mugi mboten
saged pisah salami-laminipun.
 kajawi saking menika, panyuwunipun
(Dimas sudadiya) sekalian dhumateng
Bapa..(Hartanto) sekalian garwa, hambok
bileh benjang enjang sampun dumugi
titiwanci tumapaking gati, mugi calon
penganten saget kaijabna saha
kapanggihna miturut agami sah adat widi
widana ingkang taksih lumampah wonten
ing laladan ngriki.
“Puputing atur wabillahi taufik
walhidayah-wass..wr...wb.. matur
suwun” .