BAHAN SERMON MINGGU KANTATE, 02 MEI 2021

Turpuk : Psalmen 150 : 1 – 6 Tema : Nasa na marhosa mamuji Tuhan

 Di pardalanan ni ngolunta on, tontu hea do ra tapapujipuji sasahalak, somalna pamujion i tubu
hinorhon ni pambahenan manang parulaon ni sasahalak na mansai uli jala denggan situtu di
rohanta. Asa songoni do nang mamuji Tuhanta i. Tapuji Ibana di ngolunta on, tontu ala tangkas
do taida jala tahilala hinadenggan ni pambahenanNa di panggulmiton ni ngolunta. Tapuji Ibana
ala mansai uli luhut na tinompaNa. Mansai lomo do roha marnida pambahenanNa nauli i.
 Turpuk on dibuhai jala diujungi hata “ Haleluya. Hata “haleluya” marharoroan sian dua hata Heber ima:
Hallelu-yah, hallel namarlapatan pujima, jala “yah” sian hata Yahwe, jadi halleluyah namarlapatan pujima
Jahowa. Turpuk Psalmen 150 on ima sosososo laho mamuji pasangap Debata. Tung mansai tangkas do
dihatahon parpesalmen asa pujion ni saluhut na marhosa Debata. Pamujion tu Debata ala ni habadiaonna,
hasangaponna dohot hagogoonna. On do alasan na pinasahat ni parpsalmen tu saluhut namarhosa na adong
di portibion. Molo tarajumi do habadiaon dahot hagogoon ni Tuhan i, tontu sahali patut ma hita mamuji
pasangap goarna nabadia i. Diarahon parpesalmen do asa saluhut jolma mamuji pasangap Tuhan i marhite
ragam ni angka uninguningan. Alat na pinangke ni jolma i laho pasonang roha ni jolma i, laos ido alat
pangkeon ni jolma i laho pasangap Tuhan i.
 Pamujion tu Tuhan i ndang diolati holan di sada ruangan manang holan dibagasan parpunguan, misalna;
partangiangan, parmingguon dohot angka punguan na asing. Alai lobi sian i, disaluhut gulmit ni
parngoluan ni nasa na marhosa ingkon mamuji pasangap Tuhan. Tarbahen hita do mamuji pasangap
Debata sian saluhutna roha, molo boi hita marnida habalgaon dohot hagogoon ni Debata, jala boi taida
saluhut denggan basa ni Debata dingolunta on, asa disi ma tarida pamujiaon na marsitutu jala na ruar sian
ungkap ni roha.
 Asing ni na mamuji Debata di ganup angka parpunguan na pinatupa ni huria dohot angka punguan, tontu
sahali, ingkon pasangaponta do Tuhan i dibagasan parngoluonta di angka ulaonta siganup ari. Asa ingkon
saurdot do pamujian na ruar sian pamangan dohot pambahenan manang parniulaon siganup ari. Molo asing
do pamujion sian pambahenan dingoluon, ima na ni goaranna pamujion na so marimpola manang
sipaulaula (kemunafikan). Isarana rupani; di parmingguon dipuji jala dipasangap do Tuhan i marhite ende
pujipujian dohot marhite angka uninguningan, alai dung simpul marhuria, dung mulak sian gareja, bahkan
sipata di lokasi ni gareja dope, nunga di datdati muse mangulahon angka naso lomo ni roha ni Tuhan i.  
Molo songonon do pamujionta di Tuhan i, tung so tarbahen hita do mamuji pasangap Tuhan i marhite
uninguningan jala molo pe dipuji halak marhite uninguningan Tuhan i, holan tabo begeon ni sipareon ni
jolma i nama i. 
 On do nuaeng  namasa di parngoluon ni hita Kristen , nunga godang be patupa ende pujian, konser, koor
dohot lan angka naasing mardongan uninguningan holan asa tabo begeon ni sipareon ni jolma, ende i
ndang marangkup partondion, alai holan sebatas pasonang sipareonni hajolmaon nama.
 Nungga tung manimbil be nuaeng on pamujion ni jolma i, hape turpukta mandok pujionta ma Jahowa
marhite unginguingan ala ni sude dengganbasana, hasongkalanna dohot hagogoona i, alai balik ma nuaeng
sian pangidoan ni parpsalmen, tujuan ni marende ndang be laho mamuji Debata, alai laho mamuji jolma i
nama. Tutu ingkon adong do sian jolma i roha dohot ungkap ni rohana laho mamuji pasangap Tuhan i, alai
nungga gumodang na manimbil sian hata ni turpuktaon. Debata do sipujion ni jolma i, alai digulut jolma i
ma pamujion i asa mamuji dirina sandiri. Dao umbiar do jolma i sala marende diadopan ni jolma sian,
dijalo Debata do ende pujian i manang na ndang, jala umbagas sian i, ndang adong be tarbortik di roha ni
jolma i tagan marende ibana laho pasangap Tuhan i, holan na marende mangisi acara nama dohot
hasomalan sambing. 
 Asa marhite turpuktaon di sososi parpsalmen do hita mamuji pasangap Tuhan i marhite angka
uninguningan, jala sude na marhosa ingkon mamuji pasangap goarna na badia i. Dibahen i marhite soso ni
hata ni Tuhanta di turpuk on manangkas ma pamujionta mangadop holan tu adopan ni Tuhan i,   unang
tagulut jambar ni Tuhan i, ai holan ibana do na patut pujion ni nasa na marhosa diportibion.
 Minggunta margoar “Kantate”. Kantate lapatanna; “Endehon Hamu Ma di Jahowa Ende Na
Imbaru” (Pslm.98:1) na manjou angka na porsea ima angka siihuthon Kristus laho mamuji Debata
na sun timbul jala na songkal siala pambahenanNa na paluahon hita sian jorgong ni Sibolis, dosa
nang hamatean i marhitehite hamamate dohot haheheon ni Jesus Kristus. Asa dapot haluaon las ni
roha hita nang olopolop sogot di surgo hasonangan i. Ala ni i tama ma angka naung dipalua
mudar ni Kristus i marolopolop mangendehon ende na imbaru. Aha do na didokna ende
naimbaru? Lapatanna disi ndada na menggubah syair lagu na imbaru, manang menciptakan lagu
baru sambing, alai molo didok ende na imbaru ima pamujion na ro sian roha na manghilalahon
ngolu na imbaru siganup tingki nang siganup ari. Jala nang pe taendehon ende naung leleng
diciptahon di Buku Ende nang Kidung Jemaat i, alai gabe imbaru doi hinorhon ni Tuhan i, na sai
mangalehon angka na imbaru di ngolunta on. Amen