Pupuh Sinom : I

1. Jenek ring mèru sarira, kastiti Hyang Maha Suci, mapuspa padmahredaya,
maganta swaraning sepi, maganda ya tisning budi, malèpana sila hayu,
mawija mènget prakasa, kukusing sadripu dagdi, dupan ipun, madipa
hidepè galang.
2. Sabda Parisuda puja, gemeting ajnyana wisik, tegeping saupacara,
dwaning Ida keaastiti, asung lugraha pinerih, mugya manggih marga
lantur, sida sadya panjang yusa, ring papa budi akalis, mangdèn luput, ring
saktining bawacakra.
3. Antuk lengut kaput melah, pakardin sang kawi nguni, tuhu bangkit nudut
manah, ngawe linglung mangresepi, mawinan metu tan èling, ring tambet
kaludan dusun, girang pangkah muruk nyurat, sinom kanggèn
manembangin, mapi nyambung, sukèrtin sang kawi raja.
4. Mamitang gung pengampura, antuk bes lagas mangawi, satwa ngawur tan
pabukta, sok dasar pamrihè becik, nyaratang rahayun gumi, mudita maka
pakukuh, kadi tingkahing kasatyan, adwa tuhu tan kètangin, sok nè tuju,
wasana hayu punika.
5. Maka panembèning satwa, wènten wanwa ngulangunin, ramya dahatning
subiksa, tepeting sila sayukti, manuting gama sastra wit, sahi
mangrembugang tutur, teleb nangun tri yadnya, brata tapa lan samadi,
teka guluk,adung ngawè kretayuga.
6. Undagi pandè lan tukang, asta kosala kosali, akèh tan wènten pakirang,
ngadeg memarga malinggih, mapala hayu nyukanin, tur uning mamagi
dauh, nginganin salwiring karya, sasolahan lan gong gending, tan kaitung ,
luwir ring Indra buwana.
7. Wawangunan dahat katah, gedung-gedong penyengker asri, marga bresih
dahat jimbar, alun-alun ngelangunin, paryangan gopura rawit, maukir
mapatra luwung, mapinda malalampahan,taman halus mangèdanen,
muka kasub, wanwa Wèkreta wastannya.
8. Luwih kala abang wètan, swaran gentanè jangih, anutr maring slokastawa,
kalaning para sulinggih, mangarga ngarcana Widi, amrih kajayan sang
prabu, makadi landuhing jagad, luputing cora bayadi, lara gempung, balik
tampekin kasadyan.
9. Sakatahing wong irika, wènten kajawat kapilih, kaanggèn babungah
satwa, Sang Sucita kawastanin, mula turunan utami, tosning masadya
rahayu, punika mangkin carita, madruwè sawitra becik, sami luut, Sang
Subudi parab Ida.
10. Pada saling kasampura, sami cèngeh ngetus hati, kadi Rama Wibisana, tan
kasah rahina wengi, weruh ring tatwa satanding, rupa sila sami adung,
bilih budi satwa tunggal mapalih dados kakalih, lèdung tedun, mangjadma
ngawè, weruh tuladan.
11. Manuju bulan purnama, mabawos Ida Sang Kalih, tan lyan sane
kabawosang, sariran wèdanè luwih, Wyakarana Jyotisadi Mimamsa
kalpana milu, sada lami mabawosan, tepèn dauh suniya mirib, meneng
patuh kadi mamona brata.
12. Tan asuwè raris ngucap, Sang Sucita sada haris, Sang Subudi belin tityang,
niki sampun banget wengi, bawosè ngiring punggelin, nè lyan anggèn
manyambung, wènten nè tunasang tityang, yogya timbang ngiring beli,
yan kapatut, kadurus pacang margyang.
13. Saking kawit kuningayang, duk tityang marekan rihin, ring Ida Empu
Satwika, murukain kandan dumadi, tingkah utpeti stiti, tekaning pralinan
ipun ngalantur ring moksa tatwa, cepeng tigang warsa wyakti, lamin ipun,
Dang Guru raris ngandika.
14. Bagus sayang Sang Sucita, unduk inanakè dini, mahurukin sarwa tatwa,
nyalanin maguru bakti, tutut tan nahan nulakin, kasidan salwiring tuduh,
wanengènè tigang warsa, suba tutug nto nè jani, yogya mantuk jumah
buwin rasa- rasayang.
15. Kèwala patinget bapa, sadurung nanak mapamit, kadi melid
manyekenang, rèh mula pejalan indik, guru yan tinggalin murid, manggeh
sangsaya ring kayun, takut yan masalin tingkah, kadi mènda yan elèbin;
dadi rusuh, bahan tong ada ngangonang. (TANGGUNG JAWAB GURU)
16. Sangkan da mangutang yatņa, undagan hidepè lingling, da dropon
manyujuh sukla, apan tuhu lintang sulit, apang da dadi tungkalik,
nyudyamreta wisya tepuk, bisa ngukur kemampuhan, yan tan sida
krasèng hati, da mamurung, apang da dadi pangenan.
17. Sajroning itri-kaya, tepetang da manyampahin, ditu Sang Hyang Tri –
 Purusa, linggayang sembah baktinin, hidepang maraga jati, tunasin hidep
rahayu, anggon sarin Atma raksa, sakalayang dina ratri, apang suluk,
hidepè twara bingbang (Teologi Saguna Brahma)
18. Kèto bahan maningkahang, itri-kayanè luwih, nè marti kaya wak manah,
kaya solah kategesin, wak kartinin munyi, manahè mateges kayun nto
tatelu jwa kandayang, kapatutanya marginin, eda cawuh, rèh ento dèwa
sakala (Teologi Sosial).
19. Jani palih midartayang, apang panampinè ngatih, nè apalih buwin
badihang, kaya dadi telung bagi, tan dadi mamati-mati, miwah twara dadi
rusuh, ring luh tan kurenan gelah, barang tong kwasa padidi, da
mamandung, bisayang ngunadikayang.
20. Indik manyuwang kurenan, liyu ngaba unduk rimbit, rèh sanget ngawè
sengkala, yèn iwang bahan nindakin, munah turunan padidi, kadat
utamanè pangguh, mingkin anè madan gamya, nè ngawè letuhing gumi,
sang prabu, yogya ida manyisipang.
21. Nyuwang tumin nyaman bapa, yadin nyaman meme malih, rabin nyaman
meme bapa, somah tugelane malih, mingkin nyama sanggamain, makadi
manyuawang mantu, miwah rabin panabeyan, mingkin nyamah sato
malih, iwang langkung, ento ane madan gamya.
22. Yan lebih teken sanunggal, ngarangkatan istri sawengi, masih agung
pamedannya, Ida Sang Prabu misisip, ngamadwang nyama tan kengin,
nyuwang misan twara luwung, ngambil mingtiga ya iwang, saling jwang
misan tan tis, panes agung, kadi saling juwang nyama.
23. Anak ngaba sakit nglahlah, sakit ila minakadi, saluwir sakit rahat, ne
pacang keweh nambanin, ne keto nyandang kelidin, apang de
ngembahang racun, turunane dadi rusak, kawitane pacang sedih, ngadu
sungsut, pada nemu kasangsaran
24. Yadin ring kurnan gelah, sumingkin nyandang apikin, da ngamu
kadroponan, masanggama masih pilih, purnama tilem kelidin, tanggal
pangelong ping kutus, prawani masih tan wenang, sedek camah minakadi,
da matemu, ngawe santana gring ila.
25. Lontar Cumbana sasana, pepesang nto ngawacenin, apang seken apang
tatas, ring tingkahing ngambil rabi, mangda tan pati purugin, reh agung
 halane panggih, keweh malih mangawitang, ngumbah pelihe nyumunin,
nyesel pangguh, melah yatnain matingkah
26. Ento babagyan kaya palinggan Hyang Brahma luwih, sabdane mapalih
empat, mamunyi banggras impasin, misuna linyok kelidin minakadi da
mamisuh, ditu Hyang Wisnu maraga, manah dadi telung bagi, sa-
mangugu, salwir gawe pacang mabwah
27. Dwa lobane tinggalang, tlu tan mrih halan prani, ento babagyan manah
ane ngranjing darma budi, Sang Hyang Iswara luwih, sujati maraga ditu,
saksat katon kagamelan, ditu manyaksyang diri, mawak ukur, anggon
mamidenin raga.
28. Yaning durung parisuda, kaya wak manahe malih, da nden banya
manegenang, pacang mamangguh ne alih, sangkan ditu jwa yatnain,
kanggowang ulyan tuyuh, lyunang ngawe pangancan, mangden tan labuh
nguliling, eda takut, ngutang tuyuh ngawe melah.
29. Muwuh ingete cedangang, ede bengong ngekoh hati, gibras-gibrasang
pang cedang, rajah tamahe pang lilih, yaning ngundape ulurin, elah
isadripu tumbuh, galak makejang mihalang, tong maang manyujuh suci,
galak ngamuk, tulus benya kapicundang.
30. Nanging yan ingete kuwat, nyalang kadi damar ngendih, uli ditu gampang
medal kalebete jati luwih, sangkan nto anggon matitis, nuju tingkahe
rahayu, wuwuhin buwin entikang, tri kayane mangden bresih, nanak
bagus, kene bahan maingkahang.
31. Ne sakala lan niskala, atepang manden mamesik, reh jati palinggan
tunggal, Hyang Wisesa ngaraganin, da malasang di hati, tingkahe nibakang
unduk kayane patut jalanang, kaniskala mangden pasti, mudra iku,
tikasing parek ring Hyang.
32. Yaning manut marga byasa, kucuping tangane kalih, munggwing selanging
lalata, masih manggo tanda bakti, anteng manyurat galitik, sarwa tuture
rahayu, ngarisakin pamujaan, sakalwir punika sami, soroh mawug,
pabaktyan ring niskala.
33. Kayogyane ring sakala, bisane matata linggih, mamepes matatanganan,
sebeng lan samita manis, tanmari manudut hati, da caluh matingkah
ngagu, apang mangden twara bina, tingkahe mangardi becik, apang
 patuh, sok rupan tingkahe bina.
34. Keto solahe di kaya, ring sabda jani itungin, bakti anteng mangastawa,
ring Ida Hyang maweh hurip, lengkara pang twara pelih, miwah anteng
maca tutur, saha ngrambang darma tatwa, miwah ne mangardi becik,
ento mawug, silan sabda kaniskala.
35. Ane tiba kasakala, papeson munyine manis, getar halus ngawe suka tong
tahen natonin hati, base sor singgih uningin de ngawag mangulah pesu,
mingkin ring sang mautama, ngalap kasore nto gisi, mangden manut, ring
purwa basita krama.
36. Bisane ngandayang sabda, ngunadikayang sor singgih, duweg mangulat
lengkara, lemuh halus seken gampil, pantes patut nudut hati, saha
mawasana ayu, tabuh luwung pangus getar, yan sida bahan nyalanin,
sinah ngunggul, dyastu ragane andapang
37. Yan tabuh gangsul tur rentang, sinted manyakitin kuping, dulur mawasana
hala, tan ngetang sor lawan singgih, yadin kenken ban managih, awake
apang baduwur, miwah mangden kaajumang, sinah kakalah ungkurin,
tabuh ngagu, nampat anake ngajumang.
38. Munyine sanget ngawinang, dadi nista dadi luwih, kapuji miwah kaceda,
keman miwah kaencemin, rawos masih mangawinin, sangkan sang
prajnyan puniku, sang tatas ring gunan sabda, mangrawos tanmari apik,
manis muluk, nudut manah sang mirengang.
39. Yan kaduk byasa agal, magehek sahi nakutin, gangsul tan paharimbawa,
tan wurung manglahlahin, kadang nyama pyanak samai, tan marasa niru
jendul, kuping barengan nebelang, sayan twara ningeh munyi, nagih
ngelur, yaning nguduhang pyanak.
40. Kenehe sahi incepang, sagumi mamanggih becik, olas hatine gedenang,
anak ring iraga tuwi, tekaning isarwa prani, mangdennya rumasa patuh,
sukayang yan anak suka, angenang yan anak sedih, manden tuhu, awake
rumasa tunggal.
41. Bibit sayange pamula, apang kanti sida mentik, kenehe manulung anak,
bani manesang di hati, ngalih ne anggon nulungin, mangda kasidan
rahayu, tan takut manadi bela, matindih mangardi becik, ika tuhu
darmaning sang budi satwa.
42. Ento tingkah kasakala, purukin sahi astiti, munggwing ane kaniskala,
baktine ring Sang Hyang Widhi, kenehe apang mangilis, teher bakti tan
patanggu, jiwa ragane aturang, anggon caru manandangin, hala hayu,
paican Hyang Murbeng jagat.
43. Yadin buwating indrya, indryane ring wong istri, yan suba sangkaning
satya, hidepe jati neptepin, masih rumasa kalilih, melahya sube piturut,
apang de enggalan nilap, apin indryane ngendih, meh mamuwun, sarirane
dadi rusak.
44. Dening twara sabarang, ngalahang indrya sakti, niru ida sang biksuka,
yang an tasaking samadi, sangkan melahang nulekin, pastika sajroning
kayun, yan jati kuwat tumusang, manyukla brahmacari, yan tan mampuh,
tan iwang mangalap rabya.
45. Apan jati twara dadwa, batarane kasungkemin, yan sang wiku grehasta,
madadukuhan ring rabi, ngiyasin rambute gesit, waluya mangkilin pantun,
pangastawane ring dewa, pangrumrume harum manis, swamban ipun,
cacingake nunjung birwa.
46. Susune mamulan kembar, nyangkih puleh liwat bangkit, punika pinaka
sekar, lepana pupure miyik, maganda minyak minyak malati, bawun
sinjange mangrebuk, kalane bahu kungkabang, saksat dupa lintang miyik,
liyat balut, manatit waluya damar.
47. Aduhane kaping mpatan, luwir swaran genta jangih, mawisik klecontan
lidah, kalane masepsep lati, smarane duke mijil, saksat ajnyanane putus,
manunggal maring niskala, tan paawak tan pabumi, mawak suwung, tan
kahanan suka duhka.
48. Aketo bahan mantesang, apang da salah panampi, apang liyu
rurungannya, manunggal ring Sang Hyang Licin, sangkan bapa
mamanjangin, bahan nanak suba luhur, ngawitang pantes kajawat, antuk
Hyang Wirudapati, pacang kadu, ring sang hayu jegjeg nyalang.
49. Kewala masih pinehang, eda twara manut indik, turunanne apang melah,
patute paling abedik, dwang dasa tiban ne becik, tuwuhe mara matemu,
kewala da mangimayang, satonden mangalap rabi, sampun puput, tahu
teken sarwa karya.
50. Da mangutang kawenangan, nyalanin salwir indik, apan yan iwang
 pamarga, tan wurung halane panggih, mangawinang sakit hati,
makawanan da mamurug, catur wargane elingang, ento yogya anggon titi,
sinah lantur, reh nuwut marga utama.
51. Ne maadan Catur Warga, tegesnya mangda uningin, darma arta kama
moksa, pidartanya siki-siki, darma silane luwih, tahu ring patuting hidup,
tan mangimpasin pamongan, ngamong gama sastra aji, sapatuduh, guru
lan ratu da tulak.
52. Ento ne manjing ring darma, artane mateges pipis, yaning kadarmane
bakat, sida bahan manyalanin, ulih ditu ngalih pipis, apang twara pati
purug, yan pipise suba bakat, lawutang kamane alih, sinah luhung, kama
mateges kurenan.
53. Disubane ngelah kurenan, eda bes sanget ngulurin, demene ngadu indrya,
da engsap ken awak mulih, mulih kajagate suci, suci tan palatah lutuh,
hening bresih galang padang, ento moksa keadanin, tegep sampun, ne
maadan catur warga.
54. Disidane patuh bahan, suka duhkane manampi, jati kalis tan sangsaya,
bahan seken kauningin, manahe mawak ngapusin, ento jati bresih mulus,
ento ane madan moksa, uli hidup elah panggih, bareng nutug, kayang
seda mangguh bebas.
55. Amonto tityang nguningang, pawarah sang guru nguni, bilih beli sampun
wikan, ring aptin tityang ne mangkin, Sang Subudi glis nyawurin, patute
beli tan purun, nyinahang ne durung sinah, jani saking magabahin, bahan
caluh, bani ngugu munyin rasa.
56. Mirib adi kena upas, panah Hyang Smara lancip, alise nanggal apisan, nto
mameda krane sakit, lan susune puleh nyangkih, kadi gili kembar halus,
ento maneteh idewa, kudyang nyidayang matangi, lud kelebu, tangkeb
ombak muka bungah.
57. Tangan meros madya lengkyang, kalud cokor putih gading, ibungan
gadung lan pudak, katempur tan purun molih ento nepen mwah ngalilit,
ne kadi taksaka agung, kudang bahan mangelesang, lan pipi putih
ngulapin, peteng libut, twara ngenah pajagatan.
58. Daging beli manyinahang, adi kayun marabi, Sang Sucita gelis nimbal, tan
simpang panarkan beli, apan saksat Wrehaspati, rumaga sarin kaweruh,
 ndikapan iwang swatah, inggih sapunika beli, ne katuju, sok durung
wenten tagonan.
59. Kewala bawu mamanah, nganutin alaki rabi, pangkah minda grehasta,
nanging tambete tan gigis, nika lungsur tityang mangkin, yan sampun beli
mamatut, durus pacang kamargyang, ature menekeng hati, nuli nyawur,
sang Subudi sada kencah.
60. Apan twara larangan, kapatut ban sastra aji, nu madan melanin darma,
sok adi twara ngimpasin, kadi tuduh sanghanya aji, Sastratmaka aran
ipun, dumadak mangda kasidan, ditu mawarangang budi, pang satuwuk,
masarga tong tahen belas.
61. Liyu anak masawitra, pada nuwut keneh padidi, twara manut kecap
sastra, ngawinang matungkas sering, dadi mawasana ganjih, gampang
sugat dadi musuh, awanan beli tan tungkas, reh ngadungin linging aji,
inggih durus, maryang kayun idewa.
62. Nah amonto peragatang, dumadak Ida Hyang Widhi, gelis manywecanin
karma, ne pantes nyandang matanding, rupa hayu budi luwih, prajnyan
tur nangge kasdun, tatas maring kawenangan , tepet nganggen satya laki,
mangden adung, kadi Saci lawan Indra.
63. Buwate matirtayatra, beli suba mangitungin, matitis dinane melah, buwin
abulan ne jani, yan tan wenten mangalangin, jalan payu luwas ditu,
kadung nuju sasih melah, alase sinah ngrenanin, sampun adung, Sang
Sucita pamit budal.
64. Benjang semeng Sang Sucita, lunga katukad ngararis, nyadya
manyuryasewana, tur sampun kalaksannain, wusane raris matangi,
pacang mapakayun mantuk, kaget cingak sekar katah, anyud sareng
kencerik becik, gelis sawup, kaget wenten taruni nyagjag.
65. Adeg nyepek tan pacacad, hayu anom liwat bangkit, encol pemargine
nyagjag, bawu tampek janggel mamargi, antuk wong lanang kaaksi, Sang
Sucita gelis matur, duh dewa sang kadi bulan, boya madu teka manis,
twara duhung teka mangresin manah.
66. Sakadi ring panyumpenan, bahan tembene mamanggih, rupa hayu kadi
gambar, alis lancip manatonin, daeuh intarane lilih, aas tong bani
mamarung, miwah isekar cempaka, jerih ring adeng imanik, kayang
 bakung, takut ring jrijin imirah.
67. Itebu cemeng tan patma, ngeton lambene bes manis, inyuh gading kelapa
bulan, kanti tuh tulah nandingin, susun imirahe nyangkih, kalingke entikan
gadung, bes congah yan purung namgah, madyan iratune ramping, rep
manungkul, kaulangunne samyan.
68. Jeneng imirah kecalan, sangkan sendu sada gipih, yan wantah ledang
mawosang, ndaweg ja tityang ndikain, manawi tityang mamanggih, sinah
katur ring sang hayu, ne istri raris manimbal, masawur rempuh amanis,
duh sang bagus, pamurtining Hyang Smara.
69. Wyakti bas kalintang melah, papupulan harum manis, pantes ratun
kulangunan, turun manodyanin gumi, maraga Hyang Smara patis, mijil
saking sgara madu, paling mider masusupan, nyerepang I Dewi Ratih,
sangkan puput, bagus nyalang tan paceda.
70. Gelis tityang nguningayang, awinan gipih mariki, kawit tityang ngrereh
sekar, saking pituduh iaji, mangge ring pamujan wyakti, polihe durung ja
cukup, sangkan malih mangulahang, kaget angsoka kaaksi, mangerembun,
magenah ring pinggir tukad.
71. Antuk melede sangkan kayatnanne tipis, batu gannjih enjek tityang tur
labuh, ring baya tan wenten eling, ngalibeg batune kancit, tangkajut
tityang tur labuh, sekar kencerik lepas, kasep tityang manyagjagin, antuk
suluk, sangkan mariki nudtudang.
72. Iwawu kantaneng tityang idewa ne trang mangambil. yadyastu
manyewegara, pamanggihe tan pasaksi, saking waluya mamerih, nunas
ledang sang abagus, icenin ja tityang ngudal, anggon jwa sawitra miskin,
mangda sampun, iaji menggah ring tityang.
73. Wireh uning mangawinang, paselang kayun iaji, antuk budal patalanjang,
lungane nganggen kencerik, Sang Sucita manyawurin, inggih ratu sang
ahayu, sampunang malih manjangang, boya nugi tityang lalis, sinah katur,
munggwing drewen imasmirah.
74. Sang Sucita manyekenang, mapitaken sambil kenying, cingak manis
ngimpek manah, ratu ayu liwat bangkit, munggwing pisarat imanik,
tityang sampun tatas weruh, ring parab durung pawikan, yan tan wenten
bes kapingit, ndaweg ratu, ndikayang sampunang ngubda.
75. Nika saksat upah, tuyuh nuduk kambencerik, pacang sungsung jroning
manah, kapetinin antuk aling, kabaktinin syang ratri, sang hayu gelis
masawur, tan pisan tityang mingitang, Ni Karuni tityang kandanin, antuk
iguru, ne maparab dukuh Prajnya.
76. Dyah Parmita ibun tityang, nanging lacur boya kari, wenten sampun
petang warsa, umantuk ring jagad sepi, rawuh layon nora kari, geseng
matemahan kukus, puwunang geni adnyana, sakil wulupuhun mijil,
sangkan lacur, ida seda tanpa sawa.
77. Menab wenten pakayunan, kapondok tityang nyimpangin, tan nyandang
bli sangsaya, reh tityang madrebe aji, tepet ring brata samadi, asih ring
sahanan hidup, durung nahan pangguh duka, wenten adin tityang siki,
truna bagus, wastan ipun I Sugata.
78. Nanging ipun tambet pisan, tan wenten uning brangti, watek ngawe sebet
manah, tan pisan ipun nahanin, bantas uning manyukanin, greteh banyol
maring tamyu, demen mengawenang girang, tiwas ring papineh usil,
kaduk halus, rikuh maningkahang mrekak.
79. Inggih puput sampunika, sadurung bli ngrawuhin, sayaga tityang
ngantosang, ature mangimpek hati, mababoyan cingak lindih, mapasupati
ban kenyung, gempor rasa sang mirengang, masriyep kadi mangipi, rasa
magalet, maring bale pawarangan.
80. Sangkan kadi kapupungan, sawure tan malapanin, mati tityang ratu mirah,
anyudang cingake manis, lwir blabar madu gendis, nyunyur bawose bes
suluk, kudyang tityang malipatan, ne mangkin tityang jeg ngiring, da iratu,
kaimud manampi tityang.
81. Dukuh Pradnyan matwan tityang, Isugata ipah jati, sampunan iratu nolak,
ne mangkin tityang nyimpangin, masadya nunas imanik, reh rabin tityang
iratu, angkepan saking niskala, tityang Smara adi Ratih, sih salulut, tan
pisan dados pasahang.
82. Apan jati juta karma, dewa tan dados ngalangin, kalingke buta manusa,
nggih ngiring mamargi mangkin, tityang ngungkurin imanik, mangden
pemargine lantur, yan tityang pada ihinan, brengkat ceceh tolah-tolih,
meh katanjung, katungkul noleh imirah.
83. Dyah Karuni osek mirengang, wawu rumasa ring hati, eling ring bawose
 iwang, polose tan manut indik, sangkanya seneng katampi, reh caluh
nyimpangan lucu, sangkan matur taterangan, beli sang mustikan luwih,
pineh dumun, ngudyang tan nganggo wiweka.
84. Kecap ajine elingang, napi salwir ne kaperih, sampunang puput ngaraga,
locita margyang ihin, mangden pikolihe becik, saking yatna ngalih luwung,
dropon kayune tinggalang, reh gampang halane panggih, bilih lacur, ane
alih twara bakat.
85. Apan sajronang pamlapan, kapattanne malinngih, munggwing patutte
punika, saksat arca lintang luwih, palinggan Hyang Maha Widi,
manyukanin sang manyungsung, mangawinang sida karya, sangkan
punike sungkemin, yaning tuhu, beli misadyayang melah.
86. Tan kidik satwa nyinahang, dropone mamanggih weci, kayatnane ngawe
suka, nika uger-uger pasti, tan dados uwah uwuhin, yan purug
mamangguh kewuh, punika bli pinehang, yan tutug tityang ne mangkin,
lintang lucu, solahe tan manut krama.
87. Dyastu iaji tan menggah, panglemek halus kicenin, sinah manados
selselan eling ring indike sisip, kadi tingkah istri jalir, ngumbara ngalih
wong kakung, yan beli tuhu pasweca, ring tityang ituna budi, mantuk
dumun, wusanan mangken wilangang.
88. Sang Sucita kayune punah, racun kendarman nibenin, tumuli raris
ngandika, duh Ratu Hyang Saraswati, tuhu maraga sastrawit, sangan
kapranyane mulus, pantes turunan utama, wacanane bes ngulapin, surya
siyu, rasanyang tityang ring manah.
89. Kudyang nyidayang mamapas, sapisan tityang mangiring, kewanten ratu
ampura, atur tityang jadma paling, genin indrya ngebusin, sangkan paling
pati jlamut, adoh saking kapatutan, durusang tityang pisisip, pangda
caluh, ima nampenin imirah.
90. Samalih ratu elingang, yadin tan puput ne mangkin, sok tityang ngawit
mabaja, sarat tityang ring imanik, sampunang tan ngalinggihin, pinunas
tityange pungkur, wireh boya wenten liyan, kanten ring jagate sami, sok
iratu, tingglas gumantung ring manah
91. Bilih tityang maseh gama, pacang magama imanik, rahina wengi ngarcana,
ring tungtung hati kastiti, kastawa ban puh ginanti, mawisik sulinge
 lengut, Ni Karuni raris nimbal, sampunang ja bes mamuji, mantuk dumun,
tityang ugi pamit budal.
92. Yadin ceceh kaandegang, Ni Karuni ngeser mamargi, Sang Sucita bengong
ngatonang, lwir togog masemu jengis, marasa suwung di hati, jiwane kadi
manutug, Ni Karuni raris ical, umputan pandan ngilidin, lami sampun,
kawas ugi tan kacingak