ACARA PARTANGIANGAN KELUARGA – MINGGU XVI DUNG TRINITATIS

HKBP AFDELING III MAYANG RESSORT RAJAMALIGAS I

Kamis, 16 September 2021
“Ngolu di Bagasan Panogunoguon ni Debata (Hidup dalam Didikan Tuhan)”
Pangaradeion diri dohot perlengkapan ibadah

1. Martangiang Nahohom (Saat teduh)

2. Marende BE 12 : 1 – 2 “Dipuji Rohangkon do Ho”

 Dipuji rohangkon do Ho, Jahowa Tuhanki.
Huhut hubaritahon do sude pambahenanMi.
 Huboto Ho do mual ni na denggan sasude.
Dilehon Ho do sian i godang di hami be.

3. Tangiang Pamuhai sian Anggota Keluarga (Doa Pembuka)

4. Manjaha Patujolo ni Jamita (Epistel) Partangiangan sian Parjamita 10 : 10 – 15

(Dijaha ma turpuk marsingkatsorin [responsoria] manang marganti sasahalak)

5. Marende BE 695 : 1 “Jesus Tuhanku di Ho ma Au on”

 Jesus Tuhanku di Ho ma au on, asa mangihut tu Ho au tongtong.
Gohi rohangku ingani au on, sonang di Ho tongtong.
O Tuhan togu ma au, o Tuhan togutogu ma au.
Gohi rohangku ingani au on, sonang di Ho tongtong.

6. Tangiang Pamuhai ni Jamita (Doa Pembuka Khotbah)

7. Manjaha Turpuk Jamita (Evangelium) ni Partangiangan sian Lukas 2 : 41 – 52

(Dijaha ma turpuk marsingkatsorin [responsoria] manang marganti sasahalak)

8. Hatorangan ni Turpuk
(Dijahahon Uluan ni Keluarga)
Halak Kristen na manghilalahon panogunoguon ni Debata i ma halak Kristen na
mangolu jala mangula di bagasan panghirimon. Marhitehite na mangula di bagasan
panghirimon, tamba ma gogona, tamba ma las ni rohana nang pe adong tantangan na
ingkon bolusonna. Ai di angka na marhaporseaon jala marpanghirimon di Tuhan Jesus
Kristus, ndang jadi sumurut mulaulaon molo ro parungkilon di ngoluna. Nang pe ndang
pintor manjadi angka na diula i, alai ala di bagasan panghirimon ibana, jumpa ma pos ni
roha paboa na ingkon marparbue do angka na niulana di tingkina.
Tarajumi do na di bagasan panghirimon do si Josep dohot si Maria mangalului Jesus,
Anakna i, pola sahat tolu ari pardalanan lelengna. Nang pe bobonosan alai ndang mandele
nasida, ndang marungutungut, alai benget do nasida mangalului Anakna i mardongan
panghirimon. Dipangot do tongtong tu hita, nang pe marposniroha hita tu Debata, alai
unang hita berpangku tangan marnida na masa di parngoluanta. Tatitiru ma si Josep
dohot Maria, dilului nasida do Jesus jala jumpang nasida ma di bagas joro ni Debata.
Godang do na mambahen jolma gabe mura mandele, mardandi manang mandate di
tongatonga ni angka ulaonna si ganup ari. Tontu marragam do alana. Alai sada na jotjot
1
 mambahen jolma gabe songon i, i ma ala so mian be panghirimon na mangolu di dirina.
Sai mian di rohana na so adong be na rade mangurupi dirina.
Boi do jumpang pangalaho si songon i di tongatonga ni rumatangga. Susa angka
natoras ala pangalaho ni angka ianakhonna. Susa angka na mardongansaripe
pajongjonghon parsaripeon na satia, harmonis, dohot lan angka na asing. Ujungna gabe
masipasombuan, masitondong dalanna be ala ndang masiantusan. Alai hata ni Debata
paingothon angka na porsea asa tongtong benget jala marpanghirimon di tongatonga ni
parungkilon na niadopanna di ganup ari.
Sada parsiajaran na arga jumpang hita sian turpuk i, i ma marparsaoran di bagas joro
ni Debata. Jesus ro tu bagas joro ni Debata, hundulhundul di tongatonga ni angka guru,
huhut mananginangi jala marpanungkun nasida. Songon i do nang natorasNa, si Josep
dohot si Maria, ujungna ro tu bagas joro laho mangalului Jesus. Di tongatonga ni angka
hamaolon na niadopan ni angka na porsea, dijou hataNa do hita asa rade ro tu bagas joro
ni Debata pasahathon alualu ni rohanta i tu adopan ni Debata.
Lungun do rohanta marnida, mambege, manang manjaha angka barita na paboahon
torop halak na mangadopi masalah alai mangalului panombosanna di inganan na hurang
denggan. Ndang pintor marsinggang tu adopan ni Debata, alai justru paloashon dirina
ditogutogu hagogoon ni portibi on. Jala torop do na madabu tu pangunjunan ala lam
bagas ditait portibion rohana.
Borhat sian hata ni Debata di bagasan turpuk on, disungguli do rohanta asa unang
tapangasahon pingkiranta sandiri di na laho mandalani ariari ni ngolunta. Songon si Maria
na mameop di rohana saluhut angka hamaolon na niadopanna, laos tarjou do angka na
porsea i marhagogoon mameop angka na masa di ngoluna mardongan pos ni roha di
panogunoguon ni Debata.
Nunga sahat tu hita barita na uli na manungguli haporseaonta papatarhon ngolu na di
bagasan panogunoguon ni Debata marhitehite na mangula di bagasan panghirimon,
manongtong marparsaoran di bagasan hataNa, jala mameop bagabaga panogonoguonNa
di bagasan pos ni roha. Antong mangasahon asi ni roha ni Tuhanta, sai margogo ma hita
manghangoluhon hataNa hombar tu lomo ni rohaNa.
Amen!

9. Tangiang Panutup ni Jamita (Doa Penutup Khotbah)

10. Marende BE 36 : 1 + 3 “Pasupasu Hami” – Huhut Papungu Pelean

 Pasupasu hami o Debatanami.
Sai sondanghon bohiMi tu na pungu on sude.
 Amen hudok hami, ale Tuhannami,
Na marasi roha i sangap ma di goarMi!

11. Rap Mangidohon di Tangiang Ale Amanami, diuduti Mangendehon: Amen 3x (Sama-sama
Mengucapkan Doa Bapa Kami, dilanjutkan dengan menyanyikan: Amen 3x )