BAHAN SERMON PARHALADO RESSORT RAJAMALIGAS I

EPISTEL (JAKOBUS 2 : 5 – 13)

Topik Minggu XIV Dung Trinitatis: Pir ma Tondim, Unang Ho Tahutan

Pamuhai
Dibuhai do turpuk on di bagasan pandohan “tangihon hamu ma ale angka donganku na
hinaholongan.” Ndang digoari nasida songon dongan sambing, alai dohot marhite hata “na hinaholongan.”
Marhite pamuhai turpuk on tangkas ma dipaandar, ia joujou dohot pinsangpinsang na tolhas ingkon tubu
sian holong ni roha do. Jala boi dohonon asa unang ma masa di huria i parnidaon bohi, i ma sada hataridaan
ni na mangaradoti ruhut holong ni roha.

Hatorangan ni Turpuk
Ayat 5 – 7: Marhite turpuk on dipatuduhon do hajongjongan ni angka na pogos di adopan ni Debata.
Tutu do, ganup hita ndang managam asa ro ma nian hapogoson, baliksa, ragam do dalan tapatupa anggiat
sumisi ngolu sian hapogoson. Deba jolma pola sahat tu na madabu tu rumang ni angka dosa holan laho
pasiding hapogoson. Alai na sala ma i, jala na so sitiruon ma i.
Molo taida manat turpuk on, holong do roha ni Debata marnida angka na pogos. Marhite on do dipaingot
hita, na so mardiaimbar manang ise di adopan ni Debata. Arga situtu do saluhutna jolma diadopanNa, ai
ndada siida bohi Debata.
Ayat 8 – 11: Dipasiaksiak na mora i do halak na pogos uju i jala disaratsarat tu paruhuman, umbahen
ni i do maol ma angka na pogos manguduti parngoluonna. Dipaingot turpuk on do tu hita taringot tu patik
raya ponggol paduahon i, i ma “haholongi ma donganmu jolma doshon dirim.” Alani i, gabe sialo patik ni
Debata do angka siida bohi na lomo rohana pasiaksiakhon halak na pogos. Ingkon mardongan hasintongan
dohot hatigoran do hobasanta nasa donganta, na so tupa marbolatbolat manang marnida bohi.
Ayat 12 – 13: Ndang boi hombar tu giot ni roha hita mangulahon patik (manang na tapilliti dia ma
patik na tumabo [menguntungkan] tu hita). Ganup do patik i laho siradotan. Na patut do hona uhum jolma
ala pangalasionna, alai ala ni asi ni roha ni Debata gabe dipalua hita sian uhuman i.
Didok di ayat parpudi i, “ai uhum na so marasi roha ma na tu na so mangulahon asi ni roha.” Pandohan on
dipasahat tu angka na tumanda Kristus jala tu angka na mian di tonga ni huria, alai sai dihinsu rohana laho
marasi ni roha tu donganna jolma. Hombar tu si, disosoi ma hita marhite turpuk on asa taradoti holong ni
roha hinorhon ni haluaon naung tajalo be sian Tuhanta. Suangsongon i, tapataridahon ma holong ni roha
marhite pambahenan na denggan na so marnida bohi, i do hataridaan ni haporseaon tu Debata Silehon
haluaon i.

Panimpuli
Debata do mual dohot ojahan ni nasa asi ni roha, asa molo taulahon pe asi ni roha maradophon
donganta jolma, sasintongna na tubu sian panghangoluononta di asi ni roha ni Debata sambing do. Asa
mulak tu asi ni roha ni Debata do luhutna asi ni rohanta i.
Pir ma tondim, unang ho tahutan. Lapatanna ganup do hita dihaholongi Debata dohot disarihon
Debata. Ndang siida bohi Debata, ndang diorui holongNa marnida angka na pogos jala na gale. Jala ndang
dihalomohon Debata nasa rumang ni pangalaho na manghasogohon angka na pogos. Ganup do angka na
porsea disosoi asa marasi ni roha tu angka na hurangan. Pos ma rohanta, disarihon Tuhan i do hita saluhutna.
Amen.