PIDATO PIRAJO

Assalamualaikum Wr.Wb
Awa mulo rundiang ka disabuik__ samo manyarah pado Allah__ samo
mangikuik kato Nabi, Allah ta’ala kayo sungguah, Rasullah Allah Nabi
Muhammad, panghulu sakalian alam, warihnyo nan indak kunjuang ilang__
jajaknyo nan indak kunjuang lipua__ kok siang lai dipatungkek__ malam lai
dipabanta__ In Shaa Allah__ salamiak hiduik dunia akhiraiak

Kabakeh Angku Dt…………………, Angku Dt……………..…, Angku Dt………….………,

Sumarak reno jo tapian, pamenan kampuang jo halaman, ampunlah ambo dek

pangulu, pangulu banyak nan sati, rang gadang banyak nan batuah, tuanku ju
nan kiramaik, disusun jari nan sapuluah, ditakuakan kapalo nan satu, rela jo
maaf banyak-banyak, bakeh angku pangulu nan gadang basa batuah,
dunsanak sudaro ipa jo bisan, adiak jo kako, nan ditanai bumi nan laweh,
dilingkuik langik nan leba, diateh tanah nan sabingkah, dibawah awan nan
sagumpa, nan dilingkuik atok salingka dindiang, nan hadir barkarapatan
ditangah rumah nangko

Angku pangulu nan gadang basa batuah, urang nan cadiak tahu pandai, lagi
arif bijaksano, lauik aka padang kato-kato, pucuak bulek urek tunggang, pusek
jalo pumpunan tali, tali adaik batang limbago, tampuak alua tangkai pusako,
tiang adaik sandi haluan, payuang panji marawa basa, nyawo nagari adaik
kato, pamuncak adaik dalam nagari

Kayu gadang malintang bukik, pucuak bulek silaro kuniang, jatuah talayang ka
tampaiknyo, diam jo adaik jo pusako, mamagang bungka jo naraco, cadiak nan
buliah bakeh batanyo, pandai nan buliah bakeh baguru, aianyo janiah sayaknyo
landai, hukumnyo adia katonyo bana, minuman koto jo nagari.

Sungguahpun iyo bakeh angku pangulu nan gadang basa batuah, sarato
salangkok nyo lah tuanku guru-guru, alim ulama, nan saisi sidang jumaaik, nan
ampek jurai di musajik, nan manjalankan hukum kitabullah, nan mangatahui
sah jo bata, hala jo haram, sunaik jo paralu, aratinyo manjadi suluang bendang
tangah nagari, camin nan tiado kabua, palito nan indak panah padam, salalu
manarangi sakalian alam.

Lampisannya sasudah baliau-baliau nantun, iyolah urang cadiak pandai, acang-

acang dalam nagari, limpapeh rumah nan gadang, pandai mauleh rumin
putuih, buhua pendek ndak mambuku, buhua panjang ndak mangasan, laweh
nan pantang ka tabilai, panjang nan pantang katahubuangi, nan bamato tarang
batalingo nyariang, pilihan sakaji hulu balang, dindiang waja parik nagai, karih
rencong manangah koto, cumanti api dek pangulu, kaki jo tangan dinagari, nan
manantukan dusun jo taratak

Sungguahpun iyo sado itu, naknyo langkok samparono, sarapeknyolah

dunsanak sudaro, ipa jo bisan, adiak kako, sarato kito lah nan rapek
barkarapatan saisi rumah nagko, nan ampeh barih barkaduduakan, nan tigo
langgam parsoalan, sadidih bandua ditapi, salereang bandua ditangah, paran
picak malintang naiak, bandua pilih malintang turun, sabujua rumah nan
panjang, salego rumah nan gadang, turun manyasak papan sariang, tasasak
lalu kapangareh, layua malambai kanagari, nagari bapaga suku, suku bapaga
jurai, dalam jorong ado nan tuo, alam tarantang lah barisi, barakaik
kiramaiknyo puti saidan sadani, badirilah kampuang di tiok tiok nagari, dusun
indah medannyo rami, aia janiah tapiannyo suci, kampuang banamo erak
gombang, taluak banamo siku dato, pulau banamo rangkuah dayuang, labuah
lacah calai tajelo, labuah panjang siku basiku, bapaga pudiang aia ameh,
jiluangnyo barumpun-rumpun, pudiangnyo kuniang babatang batang, raso
karandah rang anjuangan, raso katinggi rang pangkasi, tiok suduik ado baliku,
tiok liku ado batunggu, bapuluah rang manunggunyo, bapiliah rang
manjangonyo, tak buliah rang lalu linteh, itulah nagari nan balingkuang aua,
kampuang nan balingkuang joroang, bapaga jo barih balabeh.

Balai-balai balanggam-langgam, tampaik rang banyak mintak hukuman, aia

janiah talago tanang, tando nyo nagari bajunjuangan, banyaklah puti baragi
ameh, dibaliak talang basulik, disungek anak bidodari, badaun bapantang
rareh, rareh dimakan buruang nuri, babuah bapantang jatuah, jatuah disemba
alang tabang, kapuak petak indak tabilang, makanan si alek datang, makanan
rajo pulang pai, babilang namo kasiaknyo, pambilang namo tanahnyo,
kasiaknyo ameh jo pulai, batato intan jo pundi, bakeh pandeka main padang,
bakeh nan mudo main tondeh, bakeh ambo maantakan sambah jo panitahan

Puntiang talatak dihulunyo, dibawah kumpalan tali, asa kato nan dahulunyo,
tigo limbago nan tajadi, partamo sambah manyambah, kaduo siriah jo pinang
katigo baso jo basi, sambah manyambah dalam adat, tali batali undang
undang, tasabuik jo muluik manih, tapakai jo baso baiak, muluik manih
talempong kato, baso baiak gulo dibibia, dalam cupak nan piawai, banamo
adaik sopan santun

1. Si Rasyad nak rang padang, pandai marauik tangkai tuduang, katuduang

anak si ulando
Mulonyo adaik ka takambang, dikato di pagaruyuang, diundang di balai
janggo
2. Dibalah nibuang di balah, diambiak ka lantai pagu, labiahnyo kalantai
balai.
Sambah disambuang jo lidah, pamuliakan angku jo pangulu, ba itu adaiak
nan bapakai
3. Rasian pamenan lalok, kacimpuang pamenan mandi
Kok indak tabilang taatok, sambah jo simpuah panjalani
4. Sapandai-pandai marambah, rambahkan ka batang bangku
Bangku nan diateh kalupak, kalupak nan babungo pulo
Sapandai pandai manyambah, sambah bakeh angku pangulu
Pangulu nan mamakai cupak, cupak nan pusako pulo
5. Kulereang diateh pinggan, dibaok rang ka malako
Nan ambo renjeang iyolah tangan, nan ambo sambah iyolah kato
6. Daun cambai akanyo cambai, pucuak kurago rang patahan, jatuah tatimpo
batu aia
Bukannyo ambo nan cadiak pandai, limbago kato dipasambahkan, nan tuo
juo dipamulia
7. Ilia karanah bangkahulu, nak lalu kabanda padang, singgah kapasa rang
andaleh
Dipamuliakan angku jo pangulu, pangulu duduak jo undang, duduak jo
bariah jo balabeh
8. Rotan paladai balah sipi, ambiak pangabek laia sereang, buatan anak rajo
tiku
Barih balabeh kok nyo tasipi, bungka naraco kok nyo tateleang, adaik
bamain di pangulu
9. Dari solok ka salayo, nak mambali sambang gatah, singgah sabanta di
kanari
Barih balabeh di nan tuo, warih bajawek di nan matah, jadi pusako lalu
kini
10. Marpati tabang ka koto, anak pipik tabang kapantai
Inggok dirantiang si dalu-dalu, turun manyasok bungo jirak
Artinyo kato nan pusako, baribuik alang jo sewai
Bakicau murai ateh batu, nan bana barubah tidak
11. Ramo-ramo tabang kajiraik, inggok dikapalo nyioua gadiang, basarang
diateh dama
Jikok rajo jalan ba rakyaik, pangulu tagak basisampiang, adaik kato
basutinah

Tukang balukih batiruan, kato basabuik bahiasi

Rang siak di tanah makah, balaia katanah ruhun, naiak baanjuang punai perak,
kabasaran padang nan disabuik, langkah jo ganggang paranakan, manuju lauik
marahullah, tagamang puti dilautan, hilanglah aka sakutiko, ambo nan mudo
mudo matah, manggigia badan dibaok tagak, raso ka kalu lidah manyabuik,
bana nan indak buliah diindakan, jikok tasabuik di nan bana, bak lai takambang
angin tibo, dapek di angin nan salasai, salamaik parahu pulang paii, ganggang
tibo di palabuhan, bak biduak dikayuah hilia, bak pasang masuak muaro,
sananglah hati niniak mamak, sananglah hati nan basamo, jikok tasabuik di
nan bukan, laia takambang angin tak tibo, diliek taluak lah baliku, dipandang
pulau lah gumarau, kilek tibo mato tapajam, mukasuik ilia tasabuik mudiak,
kok tasuo kaji saganok nantun, rela jo maaf banyak banyak, asak dek angku
bakeh nan iyo.

1. Rami galanggangnyo rang kurai taji, naiak juaro nak rang kajai
Sungguahpun ambo tagak badiri, bukannya ambo cadiak pandai

2. Kapuak-kapuak ateh palano, dakak-dakak jatuah kalambah

Kok duduak ambo nak batanyo, kok tagak mambilang sambah

3. Ditutuah bungo baduri, ureknyo palipua-lipua, dilipua jo batang sarai

Sungguahpun ambo tagak badiri, umpamo duduak basimpuah, baitu adaik
nan bapakai

4. Kalo takajuik anak kambiang, malompek kadalam samak, malosoh

kadalam duri
 Bukannyo ambo tagak samiang, alah tapakai di nan banyak, alah taradaik
di nagari

5. Sikaduduak badaun rampak, rantiangyo ambiak kasuluah, bungo cimpago

rang patahkan
Angku duduak ambo pun tagak, disusun jari nan sapuluah, mardeso kato
dipasambahkan

6. Sikoreang manggali lambah, takali sarang biludu gandum

Kok tasereang ambo manyambah, sakali gawa baribu ampun

7. Kunang-kunang di ateh bukik, siturak di dalam sawah, sikulambuak di

ateh pintu
Batanang kito sadikik, ambo nak mandatangkan sambah, ayam bakukuak
ambo lai ragu

8. Anau mudo jolong babuah, kurang rapek runduak-rundukan, diumbuak

diumbi jangan
Nan ambo jolong manyambah, kurang dapek tolong tunjuakan, diupek
dipuji jangan

9. Sibaribuik disungai landai, batuah kayu babuku-buku

Manyabuik sajo ambo nan pandai, pidato datang dari angku pangulu

10. Baburu kapandai sikek, dapek ruso balang kajai

Laii baguru alun dapek, alah baraja alun pandai

11. Antah sapek antah balanak, hiduiknyo dalam lauik

Ditangkok rang payakumbuah, talatak di ateh pinggan
Antah dapek antak tidak, kaji lah lamo ndak basabuik
Jalan lah lamo ndak batampuah, sasek nak mintak ditunjuakan

12. Kaladi ditanam babuah balun, tumbuah diparak ladang

Disiang si gadih ranti, dipupuak si reno bulan
Kok kaji taulang balun, disilau surek lah hilang
Dituruik guru lah mati, kamanolah andak ditanyokan

13. Lah masak padi rang siko, lah buliah digalu-galu,

Tak buliah dicaruah laii, dimasak rang koto tuo
Tasasak padang karimbo, taantak rueh kabuku,
Tak bisa ditangguah laii, bapikua juo malah jadinyo

14. Kain suto banangyo rapek, talatak ateh palano, limpato diateh balai
Bamulo sajo nan dapek, kasudahan baa kaagaknyo, pidato pulang ka nan
pandai

15. Pagi subuah ayam bakukuak, basipongang diateh balai, kukuaknyo buah
babuah
Kurang mintak ditukuak, senteng mintak dibilai, dek angku pangulu nan
gadang basa batuah
16. Kumbuik iyo kuranpun iyo, patah carano patimbokan
Angku iyo tuan pun iyo, sambah kamano ka ditibokan

17. Palito nak rang bangkahulu, banyaknyo duo kali lapan, elok dinyaloi
samuonyo
Baranggo angku jo pangulu, bakinco siak jo baliau, elok disambah
samuonyo

18. Badia sijapun bangkahulu, panembak ondan dalam tabek, dibaok rang
padang lua
Bari maaf ambo dek angku, sambah tibo ka nan rapek, sambah nan
datang dari sipangka

Dituanku nan duo tigo barkaduduakan, dimalin nan ampek jurai dimusajik,
dikitolah nan hadir barkarapatan ditangah rumah nangko, indak tabilang taatok
tajajak tajalani, hanyolah nan kapambilang pa atok panjajak panjalani,
pamuliakan sambah jo panitahan, sambah dikumbalikan pado Allah, panitahan
diparirikan dijumalah angku pangulu nan gadang basa batuah, langkok
sarapeknyolah kito nan barkarapatan ditangah rumah nangko, ujuang sambah
bakeh angku nan sakaji nagari

Aratinyo nan kadibanakan bakeh angku pangulu nan sakaji nagari,

Sasudah takarang rumah nangko, lakek sasak tarawang jajai, lakek darek intan
balapiah, lakek saga langau baguluang, bajalin perak balapiah, tiok suduik
batiang pandak, tiok ruang bacamin cino, sairiang adaik dengan sarak, datang
parintah mahukunnyo.

Rumah gadang sambilan ruang, salajang kudo balari, nan kancang dilauik
lapeh, nan jombang di pulau paco, lakek gonjoangnyo anjuang-anjuangan,
pucuak rabuangnyo ereang ereangan, bak dikarang lampa-lampa, takanak atok
pancuangan turang, salasai dihari nan katigo, parmadani namo hamparan,
banta batakaik bilang buah, barani nan indak manantang lawan, nan bana
dipagang taguah

Lakek ukia babagai bagai, ukia nan suko dilautan, baukia baradun-radun,
bajanang basega dendang, bajalan bagontak-gontak, bagontak bulan jo mato
ari, bukan sakarang nan bak nangko, warihlah turun dari niniak, kito nan utang
mandapati.
.
Tabantang tabia sakuliliang, batirai bakarang maniak, baranggo intan parmato,
tabia sukalaik dari jedah, dari aceh datang kulindan, dari cino datang pinjaik,
kok lah asia sipakaik rumah, bak rajo turun dari langik

Rumah gadang di tangah kampuang, bapaga pudiang aia ameh, basalo bungo
nolan nuri, kamuniang pautan kudo, limau manih saluran madu, siupiak
manumbuak jolong gadang, alu kamuniang jo maharullah, cincin nan sarek
dikalingkiang, nan lunga di jari manih, reno kutiko dinagari.
Mako sarapeknyolah angku pangulu nan gadang basa batuah, nan lah duduak
barkarapatan dirumah nangko, duduaknyo lah sahamparan, tagaknyo lah
sapamatang, carano mukasuik ka ditatiangan, lakek papatah patitiah bak
pantun adih malayu

1. Angguak gawai si alang mania, lilun siganto lilun

Mulonyo adaik kadipakai, asanyo dari binua ruhun

2. Bali timbakau langkok jo santo, disakah dibaok turun

Badiri adaik jo pusako, dari makah kabanua ruhun

3. Disakah dibaok turun, diguluang dalam naraco, talatak diateh paleh-paleh

Dari makah ka banua ruhun, dari ruhun kabanua cino, dari cino ka pulau
andaleh

4. Batabek basawah laweh, basawah babajak kabau, pautan kabau

dihalaman
Dari makah ka andaleh, dari andaleh kaminangkabau, minangkabau
tampek parhimpunan

Tak kalo asa mulonyo, tak kalo asa usuanyo, ado batigo urang badunsanak,
balun bakaduang bakaratan, balun basibak babalahan, ciek bapak ciek
mandenyo, bapak nyo rajo Iskandar, nan manjajah tampuak alam, jajahan
sampai ka bukik hitam, namonyo sampai kasakalian alam, mande nyo puti
Sainur Alam, urang nan pandai malukih manirawang, malukih diateh kain, kain
banamo ulasan suri, dilipek sagadang kuku, dikambang saleba alam, dilipek
dalam talua ayam, disinan adaik mako ka talukih, disinan sarak mako ka
banamo, sarak banamo hukum kitabullah.

Maso kuitiko janjian tibo, bilangan cukuik, etongan sampai, warilah turun
kapado anak, anak lah jadi rajo pulo, batigo rajo saangkatan, suatu kutiko,
mupakaiklah rajo nan batigo, nak balaia kalauik basa, mako dicarilah tukang
buek parahu, disuruah manabang kayu, kayu banamo erang binuang sati, kayu
rabah ka kabilaik matoari tabanam, kayu rabah kabuang patigo, kilek baliuang
lah ka kaki, kilek camin lah kamuko, apo nan katajadi pada rajo nan batigo.

Sasudah parahu dipabuek, dikumpuakan urang nan cadiak-cadiak, dihimpun

urang nan pandai-pandai, di imbau urang nan patuik-patuik, balaia basamo
rajo nan batigo, antaro ewang jo gumewang, antaro pasirak jo paserong,
tampaklah pulau labuah kunik, dihiliakan parau kapantai, turun mandapek
kagunuang gadang, tampek Adam mulo batampo, panek baparantian, palak
bapalinduangan, alah sahari duo hari, habihlah hari tujuah hari, ganok bilangan
tujuah malam, pangana lah balain-lain, pikiran lah ba masiang-masiang,
tumbuah silang jo salisiah, tabiklah bantah jo kalahi, pakaro mangkuto taluak
ameh, taluak ameh jipang suaso, cakak sialah nan kamalarai, silang sialah nan
kamananai, karano rajo katigonyo, nan ratak manjadi pacah, gantiang putuih,
hiduik jo untuang surang-surang.

Nan surang kabanua ruhun, nan banamo St. Simarajo Ali, mahukun tanah
parancih, sampai ka inggirih jo ulando, lalu kamakah kamadinah, itulah nagari
nan dihukunnyo.

Nan surang ka banda cino, nan banamo St. Simarajo Dipang, kudo ameh
cumanti ameh, ambua nan sampai kaudaro, balapuik perak jo ameh, cino
turun baniago, mambaok bunka nan piawai, taraju nan bagatok, mambaok
katian jo timbangan, sakarang kini baitu juo.

Nan surang ka pulau paco, nan banamo St. Simarajo Dirajo, banyaklah urang
mairiangan, mairiangan rajo pai bajalan, saikua kudo nan sati, nan banamo
kudo samburani, mambaok tombak jo padang, sarato alaik pakakehnyo,
sarato mambaok mangkuto sajatinyo, tampuak ameh gagang suaso, bagombak
bagalang kaki, baganto bagiriang-giriang, itulah niniak kito

Mako balaia lah niniak kito, lauik banamo aia asin, pulau banamo lingo puri,
taluak banamo langkok daun, rantau banamo aia kumbang, ditangah lautan
salian, barambuih angin timua jati, sikudano manyisia panah, sikumlabai
pulang manurun, rajo jiin marompak bijo, tampaklah pulau jorok manjorok,
dihiliakan parahu kapulau lewang, pulau andaleh simarusaik, pulau paco janyo
urang, dalam daerah pasisia baraik, dek lamo bakalamoan, tibo dipantai taruih
daratan, mandaki bukik nan tinggi, manuruni lurah nan dalam, panek lah
bakandak baranti, palak lah bakandak palinduangan, dalam pado itu, mako
dilayangkan lah pandangan sakuliliang, candonyo gunuang lah gendeang
mangendeang, candonyo bukuik lah mangabua tidua.

Dilayangkan pandangan kasabalah kida, tampaklah gunuang nan sabana

tinggi, puncaknyo malambai awan, puncak barasok mamarancangkan api,
asoknyo batingkek-tingkek, apinyo malambai-lambai, labiah tarang dari palito
kutiko siang, labiah nyalo dari telong tangah malam, itulah asa mulonyo
banamo gunuang marapi.

Dibuang pandangan sabalah suok, tampaklah talago samsu sikamarulah,

aianyo nan manganduang tigo parkaro, partamo aianya janiah, kadua aia nyo
asin, katigo aia nyo tawa, talago panuah tak malimbak, susuiknyo indak
bakurang, aianyo elok diminum, mainuman sagalo mukaluak alam.

Maso ma engong kabalakang, nampaklah baringin sonsang, pautan kudo

samburani, rupo nan duo sabangso, rangehnyo tujuah sambuangan, gantonyo
tujuah santuangan, ikua panjangnyo sarasah tajun, ikua pendeknyo awan
tagantuang, ulua lidahnyo nago sigulambai, sisunduaknyo samburan alam,
itulah kudo niniak kito
.
Dibuang pandangan kamuko, nampaklah talang nan sabatang, nan banamo
talang parindu, tampeknyo buruang mati inggok, ruehnyo nan panjang-
panjang, batangnyo nan gadang-gadang, di sinan jiin bakakambangan, tampek
setan bakuaso, nago mangguluang diureknyo, upa bakotaik didalamnyo,
batangnyo dipaluik ula lidai, kalo manggigik dirantiangnyo, taduang
mangeoang didaunnyo, labah barayun dibungonyo, bungonyo bapantang
jatuah, jatuah disemba alang tabang, daunnyo bapantang rareh, rareh
disemba anggang lalu, buahnyo bapantang tuo, tuo dimakan buruang nuri.

Loroang kamudian dari pado itu, mako bapikia-pikialah niniak kito, “pikia itu
palito hati “. deklamonyo bapikia, sampailah hari tujuah hari, dingin nan bukan
kapalang, duduak diayun kiro-kiro, tagak diganjua palangkahan, tabik pangana
tumbuah kiro-kiro, supakaik hati jo limpo, sairiang niak jo langkah, manurun
manampuah rimbo.

Mako manurunlah niniak kito, karimbo siguntang-guntang, kapadang

panjariangan, mandapek kagunuang sonsang, basuo rotan nan basaluak, tibo
dilanggundi nan baselo, dibukik nan indak barangin, dilurah nan indak baraia,
basuo dadok silayua-layua, disumua sikalimunti, dirusuak banto nan barayun,
disinan aia babaliak mudiak, dihilia aia nan gamarunciang, disinan puti jamilan
janyo urang, nan mandi batimbo kasiak, disumua pancuang talang.

Sawah gadang satampang baniah, diapik sawah tanjuang alam, diujuang

labuah sibadaun, sinan sirangkak hitam kuku, tampek buayo putiah daguak,
dimudiak galundi nan babandiang, dibawah padang panjariangan, diateh
baringin sonsang, dikiri kalapo nyiua bali, dikanan lantak nan tigo luhak,
tampek pautan binuang sati, tampeknyo taduang baulang mandi, tampek
siamang baulang makan, kadiaman sirajo jiin, nan mahuni rimbo lawang,
disitulah tampek pangajaran sagalo mukaluak Allah, disinanlah dunia takkalo
dijajah, disinanlah tanah takkalo dibingkah, padang takkalo dilaco, mandirikan
cancang latiah, tambilang niniak moyang kito, itulah nagari asa, Pariangan
Padang Panjang.

Siang batuka malam baganti, minggu habih bulan tibo, musim bajalan maso
manunggu, bataun dek lamonyo, bamusim dek masonyo, alam bakalebaran
manusia bakakambangan, sanak sudaro batambah juo, anak kamanakan makin
banyak pulo, mako mupakaiklah saisi nagari, siakolah nan mupakaik, iyolah
salotan marajo, apolah nan ka dimupakaikkan, iyolah nak mandirikan
kabasaran dalam nagari, mako di hari nan elok kutiko nan baiak, dapeklah
rundingan nan saukuran, bulek aia ka pambuluah, bulek kato jo mupakaik,
samupakaik nan basamo-samo mandirikan kabasaran dalam nagari, partamo
Dt. Bandaro Kayo, kaduo Dt. Marajo Basa, itulah urang nan bacarocok madang
giriang, nan manaruah cumaniang manti, nan mamakai simajo indo, nan tidua
dikasua pandak, nan duduak bakalundang bubuik, nan makan bajamba surang,
balun bakuduang bakaratan, balun basimpang basisapiah, balun basibak
babalahan, itulah gadang nan asa mulonyo, sabalun Dt. Katumangguangan,
sabalun Dt. Parpatiah Nan Sabatang.

Dalam pado itu, diateh mandirikan nan sapanjang adaik, mamakaikan nan
sapanjang pusako, mako dipabueklah balai balerong panjang, panjangnya
saratuih atok arab, lebanyo nan tujuah hetongan, batonggak tarek jilatang,
baparan jo aka lundang, bakasau jo umbuik nibuang, babandua jo batang
bayam, batataran saga jantan, batabuah puluik-puluik, bagandang saliguri, nan
bakutindiah jo jangek umo, dibuek ukia babagai bagai, partamo mambang
tangah hari, kaduo sibintang timua, katigo nyamuak manikam, manikam bulan
jo mato ari, buatan angku Datuak Tantejo Gurhano, urang nan mamasak
sadang duduak, nan maatok sadang tagak, jangkauan nan sampai katuturan,
urang nan pandai mambarih mambalabeh, pandai maukua manjangkokan,
pandai maniru manuladan, pandai manarah manilantang, pandai manulih
dibulan kalam, pandai maukia dibulan tarang, pandai marapek dalam aia,
pandai manjanang jo aia liua, itulah parbuatan tukang si olak olai, tukangnyo
sirajo dirajo.
Mako dipahiasi balai balerong panjang, dikambangkan lapiak daun ilalang,
balun bak lapiak rang kini, disinan rajo malimpahkan kato, tampek pangulu
mancuraikan adaik jo ma’adaik, nan bajanjang naiak batanggo turun, nan
babarih babalabeh, mako dipabueklah cupak nan usali, gantang nan pusako,
bungka nan piawai, taraju nan bagatok, itulah nan turun tamurun, nan jawek
bajawek, sampai kini baitu juo

Tatulih dalam tambo, talukih ditirawang, tasabuik di nan banyak, balerong

panjang balerong tuo, tampaik baliau-baliau mancuraikan adaik jo pusako,
mambuek lareh nan duo, luhak nan tigo, langkok sarato jo rantaunyo

Jikok dikato lareh nan duo, partamo lareh budi caniago, katurunan Dt.
Parpatiah Nan Sabatang, sungguahpun enggok nan mancakam, kuku tajam
nan kapaguno, walau manjajah tampuak alam, kato basamo nan paguno, nan
kaduo lareh koto piliang, katurunan Dt. Katumangguangan, wariah nan asa
rajo-rajo, sunduik basunduik anak puti, turun timurun anak rajo, patah
tumbuah hilang baganti, namun pusako disinan juo.

Jikok di kato luhak nan tigo

Nan tuo luhak tanah data, babatu bungo satangkai, basungai bakayu karok,
badusun dibaliak labuah, banamo dusun tuo, balimo kaum didalamnyo, nan
banamo limo kaum, limo kaum duo baleh koto, sambilan koto didalam duo
baleh anak kotonyo, batabek basawah tangah, sawah gadang satampang
baniah, sungai tarab salapan batu, ikua labuah tanjuang sungayang, sijangek
koto badampiang, bapintu kasungai patai, bajanjang ka koto rajo, babasa
ampek balai, pariangan padang panjang, guguak jo sikaladi, simabua jo
sialahan, padang tuo jo turawan, kurawaik jo galo gandang, balimbiang jo
kinawai, simawang jo bukik kanduang, sungai jambu jo sawah tangah, bukik
tambunsu nan pangabisan, mako dinamoi luhak tanah data, bacupak
bagantang panuah, babilang bagantang cukuik, baranjuang petak rumah
gadangnyo, larak jo lereang paralatannyo, buminyo lembang, aianyo tawa,
ikannyo banyak, hukunnyo adia katonyo bana, payuang panji koto piliang

Nan tangah luhak agam, salilik gunuang marapi, salingka gunuang singgalang,
saedaran gunuang pasaman sarato jo gunuang tandikek, sakuliliang danau
maninjau, hinggo lado sirah ujuang, sampai batu sampunan mudiak, sariak jo
sungai pua, batagak batu palano, taluak jo kubang putiah, mato aia jo padang
magek, guguak randah jo guguak tinggi, koto tuo jo koto gadang, sianok jo
sipisang, rambatan jo sungai landia, canduang jo bukik batabuah, masuak
wilayah banuhampu, mako dinamoi luhak agam, babadia basi bapaek licin,
manarah pantang maaluihkan, bakato pantang dibawah, surambi tapian rumah
gadangnyo, adaik jamu namo paralatannyo, buminyo angek, aianyo karuah,
ikannyo lia manyalek-nyalek, bajalan dirusuak dalam, ganggo nan indak iyo
juo, harimau campo koto piliang

Nan bungsu luhak limo puluah, dari sikokoh pinang tuo, sampai kataratak aia
hitam, hinggo sipisak pisau hanyuik, hinggo durian ditakuak rajo, nan salingka
gunuang pasaman, hinggo riak badabua mudiak, kampar kiri jo kampar kanan,
kuok jo bangkinang, salo mudiak jo aia tirih, mako dinamokan luhak limo
puluah, mangatahui nan masak jo nan matah, tahu nan balabiah jo nan
kurang, tanahnyo angek kasiak badarai, kuaik baramban kasiak manumpuak,
kuaik pancang baramban patah, rajo babandiang rumah gadangnyo, cancang
tandeh namo paralatannyo, buminyo sajuak, aianyo janiah ikannyo jinak,
pisaunyo tajam babatu ameh, panuahnyo indak malimbak, dindiang paga koto
piliang.

Mako bapindak-pindah juolah niniak kito, mambaok tombak jo padang, sarato

manyandang padang nan panjang, tampek mamintak kapado rajo, pado cati
bilang pandai, mancari medan nan rami, aia nan janiah, tapian nan suci,

Ka hilia lereng gunuang marapi, manurun karanah lubuak aluang, malereng

kapariaman, lalu kajorong banda padang, taruih ka bunguih ka sigunta, sampai
kabayang kasalido, tibo diranah indropuro, hukumam daulat nan dipatuan,
ditinggakan duo dayang-dayang, surang laki-laki surang parampuan, ka jadi
rajo dibatang rantau, rantau nan tungga janyo urang,

Ka mudiak lereng gunuang marapi, manurun ka padang panggalian, kabaruah

padang panjariangan, dirusuak baringin sunsang, dibawah tataran saga jantan,
mambuek dusun jo taratak dalam nagari pagaruyuang, batigo rajo saangkatan,
barampek basa ampek balai, balimo jo tuan gadang, sapiahan jurai balahan
adaik, maso dalam pagaruyuang, mangaji luhak ndak lupo rantau.

Loroang kamudian dari pado itu, bumi lah basintak naiak, langik lah basintak
turun, lah garik dari pado Allah ta’ala, warihlah turun kapado nabi, turunlah
kitab nan sabananyo, nan banamo kitabullah, manyuruah kito ka islam, halal jo
haram lah bapisah, sunaik jo paralu lah babagi, kapia jo islam lah basisiah,
disinanlah niniak kito, mambacokan kulimah nan dua patah “ ashadualla Illaha
illallah, wa ashyhaduanna muhammadarasulullah”, barakaik kulimah nan duo
patah, barakaik iradaik jo kuradaik, mako mupakaiklah saisi nagari, niniak
mamak, alilm ulama cadiak pandai, tungku tigo sajarang, tali tigo sapilin,
mandirikan musajik ditangah nagari, nan banamo musajik jamiak, tampek
mangarajokan rukun nan limo, tampek mamintak hukum kitabullah, tampek
mampalajari adaik nan kawi, nan kadipakai sagalo umaik manusia.

Lambak lampisannyo dari pado itu, takana pantun hadih malayu

1. Jaik bajaik tapi banta, suji basuji tapi kasua

Jikok raib dari asa, kita kumbali kapado usua

2. Langgundi dipadang bungo, eloklah kito sakahkan

Pangulu duduka basamao, eloklah pidato dipsambahkan

3. Urang kabun mamandikan anak, mandi batimbo carano kanso

Minta maaf ambo kak nan banyak, ambo mambilang pidato rajo

Aso Allah, kaduo bumi, katigo hari nan satu, kaampek pintu simaduai, kalimo
aia sumbayang, kaanam hadih jo dalil, katujuah budak dikanduang wadaniah
Samaso tanah kadikampo jibrail, tanah jali tanah kuniang, tanahnyo nan
barkapa-kapa, tagantuang ditiang areh, tareda diateh kurisi, dihadapan kalia
rabul jallie, dibawah panji rasulullah, pangulu sakalian alam, asa mulonyo
mandirikan pangulu, pusako nan dijawek dari nabi adam, nan bapadoman
pado firman allah, “ Inni jailum fil ardhi khalifah “ , aratinyo kulipah Allah
kaganti Allah diateh dunia, malewakan hukum nan sabananyo, ammar makruf
nahi mungkar, manyuruah sagalo nan baiak, malarang sagalo nan jaek, sagalo
parbuatan manusia

Mako mangaluakan Allah ta’ala kapado bumi nan suci, anak cati nan salapan,
surang banamo cati reno, baik budi elok tabiaiknyo, itulah angkatan sambahan
adaik, satalah alam baisi manusia, didalam lareh nan duo, luhak nan tigo,
mako ditanam pangulu saurang sakoto, untuak mampimpin anak kamanakan,
manjadi pamimpin nagari,

1. Tuan gadang dibatipuah, harimau campo di koto pili

Hiduik didunia kok hutang tumbuah, diakhiraik badan manyasali

2. Anggang lalu aka pun jatuah, pulang padi hari salasa

Pamimpin nagari kok takicuah, kampuang halaman bisa tajua

3. Bajalan bagageh gageh, panek baparantian di nan randah

Pamimpin nagari kok lai tageh, gunuang nan tinggi manjadi randah

4. Sabuang bagalanggang bajuaro, bajanang dialek banyak

Pamimpin nagari kok lai sakato, alamaik mairiang urang banyak

5. Balaia karantau ikia, kamudiak padang sibusuak, singgah sabanta ka

sikabau
Jajni pimpinan koknyo mukia, batitian kok nyo lapuak, bapantangan di
minangkabau

Dalam pado itu, lakek nan bak patatah patitiah

Bagoyang candonyo gampo, balengong kayu dirimbo, bapesong ombak

dilautan, pikiakan juo samo-samo, uliahkan urang aliah aka, bak ibaraik
pantun, sadatuih badia babunyi, manembak ondan dalam tabek, kudo
maringkih kadikakangi, jawi malanguah kadibajakkan, itu kiasan kato rajo

Mandaki gunuang singgalang, dibaliak gunuang tandikek, taganang aia

dimuaro, bandakan ka ladang padi, Kalau dirantang namuahnyo panjang, elok
dipunta naknyo singkek, ambiak sakadar kapaguno, nan kadipakai maso kini

Rumah gadang basandi batu, adaik basandi sarak, sarak basandi kitabullah,
rantau barajo, nagari bapangulu, andiko dari rajo, kabasaran dari pangulu,
panghulu nan gadang basa batuah, dianjuang tinggi diamba gadang, dianjuang
tinggi dek adat, diamba gadang dek limbago , Limbago gadangnyo panghulu
nan gadang basa batuah, duo tigo wajah dikanduangnyo
Partamo gadang manurun nan dijawek, kaduo gadang talatak nan bapakai,
katigo gadang bakarilaan, kaampek gadang disuluang dipusaro,

Tabantang tabia sakulilaing, batirai jo langik langik, ditonggak tuo lambang

kabasaran, dibawah dibawah payuang panjí, tapancang marawa basa,
tapasang marawa ketek, babunyi tabuah larangan, manyauik tabuak nan
banyak, tabuah jumaik panyudahi, bapakaian kabasaran batiru batuladan,
mamakai ereang jo gendeang, jalan utang manuruik, adaik utang mamakai,
dikala kabau nan gadang, darah samo dikacau tanduak samo ditanam, dagiang
samo dilapah, adat diisi limbago dituang, diruruah padi dimandah, dihimpun
urang sanagari, dicurai sarato jo sadakahi, hati gajah samo dilapah, hati
tungau samo dicacah,

Ditantangan angku panghulu kami Andriadi Indra Dt. Sati, bukik lah tinggi,
lurah lah dalam, jauah indak taturuik ampiang indak tajalani, barek indak
tapikua ringan indak tajinjiang, pikia palito hati nanang saribu aka, raso dibaok
naiak pareso dibaok turun, supakaik hati jo limpo, baliau mangulipah jo hati
suci ikhlas lahia batin, suko rila bakarilaan kagadangan, mangumbalikan siriah
kagagangnyo, mamulangkan pinang katampuaknyo, putiah kapeh dapek diliek,
putiah hati bakaadan, lakek hitam di putiah, basasi mamak jo bapak, kaganti
suluah mato ari, kaganti galanggang mato rang banyak

Manuruik warih nan dijawek, pusanko nan dirungguahi, diateh siriah nan
babaliak kagagangnyo, pinang nan pulang katampuaknyo, ditantangan sako
kabasaran, basuo bak pitua diangku panghulu nan gadang basa batuah, biriak
biriak tabang kasamak, dari samak turun kahalaman, malompek katanah bato,
dari niniak turun ka mamak, dari mamak turun ka kamanakan, jawek bajawek
ka bawahnyo

Mako diateh kami anak kamanakan kaum Dt. Sati, mako baiyo iyo adiak jo
kako, batido tido mamak jo kamanakan, ajun maajun jo urang sumando,
ditantangan barek nan ka mamikua ringan nan kamnajinjiang sako kabasaran
Dt. Sati, pandangan jauah dilayangkan pandangan dakek ditukiakaan,
disrerakkan jalo ka nan rapek, di buang umpan ka nan rami, diindang ditampi
tarek dipiliah atah ciek ciek, dihari nan elok kutiko nan baiak, pitunjuak datang
dari Allah, pangaja dapek dari rasul, dapek kato kabulatan, samupakaik kami
nan basamo, saiyo pulo jo niniak mamak barek sapikua, nan banamo Wendi
Ardian bagala Dt. Dikoto, dianjuang tinggi diamba gadang makakaikan sako
kabasaran Dt. Sati, manjadi baliau kami, nan ka mamakai pakaian kabasaran
Dt. Sati, manjadi panghulu kami, mamimpin anak kamanakan, sarato koroang
jo kampuang, manjadi panghulu dalam nagari.

Jikok dikato pakaian kabasaran nan panghulu, duo tigo wajah dikanduangnyo :

Nan partamo, Ikek nan sagelong

Kainnyo kain batiak jambi, balukih motif kaligrafi arab, panjang dikumpa jadi
deta, nan banamo deta bakaruik, laweh dilipek jadi saluak, saluak banamo
saluak batimbo, bajanjang lipek batanggo, ujuang tasimpan tarasio , panjang
tak dapek diukua, leba tak dapek dibilai, leba pandindiang kampuang, panjang
pandukuang anak kamanakan, hamparan dirumah gadang, paraok gonjoang
dalam nagari, salilik salingkaran kaniang, ikek santuang di kapalo, tiok katuak
baundang-undang, tiok liku aka manjala, dalam karuik budi marangkak, tabuak
dek paham tiok lipek, bajanjang naiak batanggo turun, bulek aia kapambuluah
bulek kato jo mupakaik, duduak sahamparan tagak sapamatang

Nan kaduo, Baju gadang

Babaju gadang biludu lakan, baju hitam gadang langan, indak basaku kiri
kanan, pantang basiandok basisuruak, jujur amanah sasuai kulik jo isi, indak
manuruah sipaik dandam, indak pangguntiang dalam lipatan, saiyo muluik jo
hati, sakato lahia jo batin
Lihia nan lapeh tak bakatuak, babalah sampai ka dado, hati lapang paham
salasai, alam laweh padang leba, indak bataratak bakato asiang, bukan
mahariak mahantam tanah, pandai batenggang di nan rumik, pandai bakisa
dinan sampik, tagangnyo bajelo jelo, kanduanyo badantiang dantiang, paik
manih pandai malulua, elok buruak pandai manyimpan, saba jo rila
martabatnyo
Langan tasenseng bukan pambangih, bukan karano dek pamberang, tapi
pangipeh angek nak nyo dingin, pahampeh miang di kampuang, pangikih
sipaik nan buruak, duduak baradaik tagak balimbago, siang bagubalo malam
bajago jago
Langan bamiliak kiri kanan, bamisia makau kuniang ameh, gadang barapik jo
nan ketek, tando rang gadang bapangiriang, dilingkuang adat jo limbago
Siba batanti timba baliak, tatutuik jahik pangka langan, mambayang mauleh
indak mambuku, mambuhua indak mangasan, aianyo janiah sayaknyo landai,
lauik ditampuh tak bariak, padang dituruik tak barangin, pandai maagak
maagiahkan.

Nan katigo, Sarawa cindai

Sarawa gadang sarawa hitam, sarawa cindai bapucuak rabuang , guntiang
banamo guntiang aceh, sarawa hitam baguntiang ampek, kaki gadang
baukuran, bagalombang tapak itiak
Basarawa hitam gadang kaki, kapanuruik alau nan luruih, kapanampuah jalan
nan pasa, kadalam koroang jo kampuang sarato koto ja nagari, langkah salasai
baukuran, martabat nan anam mambatasi, murah jo maha ado tampeknyo,
baiyo mako bakato, batolan mako bajalan
Tanah kudaraik di nan hitam, hitam hakikaik tahan tapo, manahan sudi jo
siasaik. tanyo tuduah jo dakwa, kuma nan indak kalihatan, budi indak tajua,
paham indak tagadai, bapantang kuniang karano kunik, bukan lamak karano
santan, bukiknyo tak runtuah dek kabuik, lauiknyo tak karuak dek ikan, laia jo
batin saukuran.

Nan kaampek, Sisampiang jo cawek suto

Sisampiang sabidang di ateh lutuik, kayo jo miskin alamaiknyo, ado batampek
ciek ciek, luruih dalam tak buliah senteng, patuik senteng tak buliah dalam,
didaun hati tarajunyo, mungkin jo patuik nan baukuran
Sisampiang merah bacukalaik, batabua bintang sakuliliang, mangilek
mangalimantang, tando barani karano bana, ilimu bak bintang batabua,
bapaga sipaik jo makrifaik, sumarak di dalam koto, mancayo masuak nagari,
baratuih batu panaruang, tatagak paga nan kokoh, parik tabantang
mangalangi, baampang lalu kasubarang, badindiang sampai kalangik,
maampang malaluan aia, mandindiang malaluan angin
Cawek suto bajumbai alai, baradai bajumbai jumbai, saheto pucuak
rabuangnyo, saheto pulo jumbai alainyo, panjang nan duo tangah tigo,
kapalilik anak kamanakan, nan tingga dijapuik, nan tacicia dibinjek, nan
taserak dikampuangkan, ka panjarek aka budinyo, kapamauik jiwa jo batinnyo,
nak kokoh lua jo dalam, nan jinak samakin tanang, nan lia jan manjauh.
Kabek sabalik buhua sentak, kokoh tak dapek urang ungkai, tahu rasionyo
larak surang, guyahnyo bapantang tangga, kabeknyo arek arek lungga, lungga
bak caro duduak dihilia, babukak mangkonyo tangga, jo rundiangan mangko
taungkai, kato mupakaik pambukaknyo

Nan kalimo, Kain sandang

Kain sandang kain panghulu, manyandang adaik jo limbago
kain saruang jo kain kaciak, kain saruangnyo saruang bugih, disandang dibahu
malingka kasampiang, untuk sumbayang tiok wakatu, kaganti salimuik kutiko
dingin
Kain kaciak kain tanah liek, kain kaciak ampek sagi, pahapuih paluah
dikaniang, pambungkuih nan tingga bajapuik, pangampuang nan tacicia
babinjek, pambaluik luko dilahia, palampok bariang jo batin, sariat parisai
dado, dirantai kunci tagantuang, pambukak peti kabaragiah, pangunci puro
basiceke, cupak panuah gantang balanjuang, panyingkokan simpanan adaik,
panyimpan kato kabulatan, nak kokoh barih jo balabeh, kato dahulu kato
batapati, kato kamudian kato bacari

Nan kaanam, Karih nan sabilah

Bukan karieh sumbarang karih, kariehnyo karieh kabasaran, di sisampiang jo
cawek tampeknyo, sisiknyo tanam tabuan, tasisik condoang kakida, dikesong
mako dicabuik, bapantang sumbarang sintak, patah karih dipintu mati, patah
lidah dipintu kalah, bukan mudah basisik karih, kapalang tangguang pusako
hilang,
Gembonyo tumpuan puntiang, tunangan ulu kayu kamat, kokok tak tarago dek
ambalau, guyahnyo bapantang tangga, hulunya nan barombak-ombak,
bengkoknyo nan patah tigo, luruih manahan tiliak, bantuak dimakan siku-siku,
luruih dimakan lapeh banang, bungkanyo manahan asah, hukumnyo adia
manahan bandiang
Bamato baliak batimba, sanyao pulo jo gemboknyo, pantang balampeh ka
asahan, tajam tak rago dek bakabuik, haluih tak rago dek balilieh, mamutuih
rambuik diambuihkan, tapi tajamnyo pantang malukoi, tuahnyo turun dari
langik. bisonyo pantang katawaran, jajak ditikam mati juo. kapalawan dayo
rang aluih, panulak musuah di badan

Nan katujuah, Tungkek nan sabatang

Pamenannyo tungkek kayu kamat, ujuang tanduak kapalo perak, pamenan
tangan di nan rami, luruih sabatang tak basimbang, ka panunjuak nan jauah,
pangakok nan dakek, panungkek adat jo pusako, adaik badiri jannyo
condoang, pusako nak tatap di iliran, gantang nak tagak dilanjuangnyo, sumpik
nak tagak jo isinyo, adaik nak tagak jo limbagonyo

Nan ka salapan, Solok capa

Basolok capa kiri kanan, tarompa kulik kato urang, tapaknyo taba tumiknyo
tatinggi, bapalano pangungkuang kaki, aleh tapak tagak bajalan, bajalan
baaleh tapak, bakato baaleh lidah, bajanji baaleh insha allah, jalan salangkah
manantang suruik, sasek diujuang kumbali kapangka, kupua tobaik gawa
maisi, salah kamanusia minta maaf, doso ka tuhan mintak ampun, silaturrahim
salamonyo

Lambak lampisannyo dibaliak itu, nan manjadi sipaik dek pangulu iyolah, urang
nan cadiak candokiyo, urang nan arih budiman, urang cati bijaksano, ibaraik
kayu gadang tangah nagari, manahan galombang galombaik angin, ureknyo
bakeh baselo, batangnyo bakeh basanda, dahannyo bakeh bagantuang,,
daunnyo perak suaso, bungonyo ambiak ka suntiang, buahnyo buliah dimakan,
tampek balinduang katiko hujan, tampek bataduah kutiko paneh, aianyo janiah
sayaknyo landai, alamnyo laweh padangnyo leba, kapaii tampek batanyo,
kapulang tampek babarito, kok kusuik manyalasaikan, karuah mampajaniah,
maundi samo merah, maukua samo panjang, manimbang samo barek,
hukumnyo adia katonyo bana, bapantang bakato duo, duduak dalam
kabanaran, itu warih dari nabi, kok indak tapakaikan sipaik nan saganok
nantun, dimakannyo disumpah bisokawi, qur’an 30 juih, kaateh indak
bapucuak, kabawah indak baurek, ditangah-tangah dilariak kumbang

Surian dibaliak dindiang, dikarek mako diukua, talatak didalam padi

Ringan nak samo kito jinjiang, barek nak samo kito pikua, baitu adaik banagari
Tatanggang nak samo lapa, tarampai nak samo kariang, takuruang nak samo
mati,
utang samo dibaia, piutang samo ditarimo, baitu limbago banagari

Dihari nan sahari nangko, dimalam nan samalam kini, parmintaan dilaluan
bakeh pimpinan karapatan nagari sarato jo panghulu dalam nagari,
ditantangan angku panghulu kami, angku Wendy Ardian Dt. Sati, nak dilakek-
an pati jo ambalau, basisik-an karih kabasaran, lakek hitam di nan putiah,
manjadi panghulu dalam nagari, duduak samo randah tagak samo tinggi, nak
dibaok satandiang duduak sajamba makan, ka ilia sarangkuah dayuang,
kamudiak saantakan galah

Ditantangan barih balabeh nagari, adaik bairi kami pakai, cupak tatagak kami
isi, talatak dalam carano, dibawah tirai balangik langik, dilingkuang tabia
sakuliliang, ditangah karapatan angku angku panghulu nan gadang basa
batuah dalam nagari, iyo nan baliek balengong di angku panghulu nan gadang
basa batuah di nagari, kandak kami minta dibari pintak kami mintak
dipalakukan,

Lambak lampisannyo dibaliak nantun, manuruik nan sapanjang adaik, bakayu

induak bakayu anak, kok ditantangan kayu induak, lah kami laiakan bakeh
angku pangulu nan gadang basa batuah dinagari, kok bunyi alah didanga, kok
diliek iyo alun barupo, kok dipandang iyo alun baroman, baru dalam kiro-kiro,
ditantangan kayu anak, supakaik kami anak kamanakan, satuju pulo baliau
kami :
Nan banamo Hendro Fernando dianjuang tinggi diamba gadang mamakai
kabasaran Dt. Dikoto, panungkek Dt. Sati

Laii gala nan tasabuik dikami silang nan bapangka, karajo nan bajunjuang,
mintak diimbaukan dipasa nan rami dilabuah nan goloang, siriahnyo dicabiak,
pinangnyo digatok, kandak mintak dibari, pintak mintak dipalakuan, sakian
sambah jo titah nak lalu dipuhunkan.

=========== oo0oo ===========