PARTORDING NI PARMINGGUON

XX DUNG TRITINATIS

Ev. Jesaya 45 : 1 - 7 Ep.Lukas 10 : 21 – 24

TOPIK :
JAHOWA DO MUAL NI HALUAON

HURIA KRISTEN BATAK PROTESTAN

MINGGU 22 Oktober 2023
01. Marende BE. HKBP No. 18 : 1, 4 - 5 “UNGKAP BAHAL NA
UMULI” BL 84
 Ungkap bahal na umuli bagas ni Debatangki
Ai tusi do au naeng muli ganup jumpang minggu i
Hulului do disi, bohi ni Debatangki

 Doshon hauma na dumenggan ma rohangku di joloM

Sai lopokhon ma na denggan tu bagasan rohangkon
Sai tumpahi hataMi asa marparbue i
(...musik ....Jongjong)
 Baen togu haporseaon di bagasan rohangki
Asa unang be rampason ni sibolis artangki
Sai ditogu hataMi ma au on tu surgo i.

02. VOTUM – INTROITUS – TANGIANG :

U : Marhitehite Goar ni Debata Ama, dohot Goar ni AnakNa Tuhan Jesus
Kristus, dohot Goar ni Tondi Porbadia na tumompa langit dohot tano
on. Amen. Kristus Jesus do naung gabe hapistaran sian Debata tu hita,
gabe hatigoran dohot habadiaon dohot haluaon. Haleluya!
R : (Mangendehon BE. HKBP No.852) Haleluya, Haleluya, Haleluya!
U : Martangiang ma hita ! Ale Tuhan Debata Amanami Parasiroha na
sumurung! Sai togihon ma hami tu AnakMu, asa Ibana nampuna
hami. Lehon ma di hami haporseaon na sintong, asa holan Ho sambing
haposannami. Unang loas huriaM marhaposan tu angka na di
hasiangan on, ai holan Ho do haposan dohot haporusan. Sai asi
rohaM, patuduhon tu hami dalan tu hatuaon, asa jumpang hami asi ni
rohaM na godang i ala ni Tuhan Jesus Kristus, Tuhannami. Amen.
(hundul)
03. Marende BE. HKBP No. 501 : 2 - 3 “SAI DITOGUTOGU JESUS”
BL 341
 Sai diiringiring Jesus au na gale situtu
Ditungkoli do langkangku, diparmudu au burju
Molo loja au mardalan nang maheu tondingki
1
 LehononNa aek na tio sian batu mamak i
LehononNa aek na tio sian batu mamak i.

 Sai ditogutogu Jesus au diparhorsihan i

Paima sahat au tu surgo i ma ingananNa i
Jala idaonhu sogot panoguNa i di au
Pujionhu haholongan ni Tuhanta i di au
Pujionnhu haholongan ni Tuhanta i di au.
04. PATIK:
U : Tangihon hamu (tatangihon) ma Patik ni Debata di ari Minggu on, i
ma Patik I - IV: Patik Parjolo: Ahu do Jahowa Debatam, ninna
Debatanta. Ndang jadi marangkup Ahu bahenonmu Debatam.
R : Patik Paduahon: Ndang jadi ganaonmu jala ndang jadi
sumanonmu manang aha na di banua ginjang dohot na di banua
tonga on, ro di na di bagasan aek na di toru ni tano, ianggo tung
gabe sisombaon manang sioloan.
U : Patik Patoluhon: Ndang jadi dohonon goar ni Debata, ianggo so ture
dalanna, ai hona uhumNa do sogot angka na marsineang di GoarNa.
R : Patik Paopathon: Ingot hamu ma pabadiahon ari Minggu i ! Di na
onom ari ma ula hamu nasa siulaonmu; alai anggo ari papituhon
i, ari paradianan ni Jahowa Debatam do i. Ndang jadi ho mangula
anggo di na sadari i, manang anakmu pe manang borum manang
naposom lahilahi manang naposom boruboru, ro di pinahanmu,
ro di isi ni huta ni halak pe na mangebati hutam. Ai di na onom
ari do ditompa Debata langit dohot tano dohot laut dohot nasa
isina, dung i maradian do Ibana di ari papituhon i. Dibahen i do
umbahen na dipasupasu Debata Jahowa ari paradiananNa i jala
diparbadiai.
U : I do sahatna, Antong rap mangido gogo ma hita sian Tuhan Debata!
R : Ale Tuhan Debata, sai pargogoi ma hami mangulahon na hombar
tu PatikMi. Amen.

2
05. Marende BE. HKBP No. 434 : 1 - 2 “TUHAN JESUS BERENG AU”
BL. 388
 Tuhan Jesus bereng au dison, ro ma au marsomba tu joloM
Mansai leleng au manjua ndang tarbahen au martua
Dilului Ho, ale Tuhan au, diihuthon Ho au tu na dao
Naung dapotan au di Ho Tuhan, dison do au
Sae dosangku dibaen Tuhanki, monang au dibaen mudarNa i
Gogo do dilehon Tuhanki, diau, di au
(Jongjong)
 Mago au dibaen portibion, daging, tondi dohot rohangkon
Holan Jesus paluahon saluhut na tinaluhon
Gok do au nuaeng di Tuhanhi sirang ahu sian dosangki
Lam jonok tu Ho ale Tuhan, sai taiti au
Sae dosangku dibaen Tuhanki, monang au dibaen mudarNa i
Gogo do dilehon Tuhanki, diau, di au.

06. MANOPOTI DOSA:

U : Tatopoti ma dosanta, martangiang ma hita : Ale Tuhan Debata, na
badia jala na bonar. Parasi jala Partalup ni roha jala na basar do Ho!
Sai marpangulahi ma rohaM mida hami. Dibahen i sai sesa sude
dosanami! Ndang adong na hupangasahon hami dunghon ni asi ni
rohaM; hatigoran napinatupa ni AnakMu do na hupangasahon hami tu
joloM. Dibahen i pasonang jala apuli ma hami angka na hinophop ni
Tuhan Jesus Kristus, Tuhannami. Amin
Bagabaga ni Debata taringot tu hasesaan ni dosa. Adong do di hita
sintua ni malim na songon i, na hundul di siamun ni habangsa ni hatongamon
di banua ginjang. Dibahen i tarbahen Ibana do pangoluhon ro di ujungna
angka na sandok ro tu Debata marhitehite Ibana; na mangolu do Ibana
tongtong, asa ditangianghonnasida
Hasangapon ma di Debata na di Ginjang
R : Amen. (Hundul ma hita)
08. Marende BE. HKBP No. 527 : 1, 3 “SALUHUT DO HUTADINGHON”
BL. 396
 Saluhut do hutadinghon ala Jesus Tuhanhi

3
 Tung bolong na sian toru, ai hubereng Kristus i
Ditadinghon dongan ahu ala raphon Jesus au
Aleale na sumurung, I do na manjanghon au
Lam jonok do ajalhu, lam, lam bot ne aringki
Tung na sonang do rohangku mandapothon surgo i.

 Ai di surgo idaonhu do aek hangoluan i

Dohot huta na badia, sonang masuk au tusi
SuruanNa do managam au na dangol na dison
Malum au dibaen Tuhanhu, molo sirang sian on
Lam jonok do ajalhu, lam, lam bot ne aringki
Tung na sonang do rohangku mandapothon surgo i.

09. E P I S T E L : LUKAS 10 : 21 - 24
U : Tangihon hamu (tatangihon) ma hata ni Debata turpuk ni ari Minggu
on, tarsurat di Lukas 10 : 21 - 24.
Laos di tingki i ma marolopolop Ibana di bagasan Tondi Parbadia,
mandok: “Hupuji Ho Amang, Tuhan Sigomgom banua ginjang dohot
tano on, ala ditamondinghon Ho i sian jolo ni angka na pistar dohot na
marroha, gabe dipapatar Ho i tu angka siondihononhon. Olo, Amang, i
do dihalomohon rohaM hian.
R : Saluhutna i, nunga dipasahat Damang tu Ahu; jala ndang adong
na mananda Anak i dungkon ni Ama i; Ama i pe, ndang adong na
mananda i ia so holan Anak i, angkup ni na pinodaan ni Anak i
mangihuthon lomo ni rohaNa.”
U : Dung i didompakhon ma pulik angka siseanNa, mandok: “Martua ma
angka mata na marnida na niidamuna;
R : Ai Hudok ma di hamu: Torop do angka panurirang dohot raja
masihol naeng idaonna nian naung niidamuna, hape ndang diida;
jala naeng begeonna naung binegemuna, hape ndang dibege.”

4
 Ido sahatna. Martua do angka na tumangihon Hata ni Debata jala na
umpeopsa.
R : Amen.
10. Marende BE HKBP No. 543 : 3, 5 “BUNI BINGKAS NI HOLONG”
BL. 374
 Buni ulaon ni Tondi i patiur rohangki
Manaiti au tu Jesushi, sitobus jolma i
Alai on do na huboto ditiop Jesus gomos tanganhu
Tondingku do diramoti ro di haroroNa i.
(Jongjong)
 Buni tingki ni Tuhan i manjou au sian on
Na mate manang muba dibaen Jesus daginghon
Alai on do na huboto ditiop Jesus gomos tanganhu
Tondingku do diramoti ro di haroroNa i.

11. MANGHATINDANGHON HAPORSEAON :

U : Tahatindanghon ma haporseaonta i, songon na hinatindanghon ni
donganta sahaporseaon di sandok portibi on. Rap ma hita mandok!
R : Ahu porsea di Debata Jahowa…..
(hundul)
12. TINGTING
13. Marende BE HKBP No. 385 : 1 . . . “DIJOUHON JESUS RO
HAMU” BL. 384 (huhut pasahat pelean Ia, Ib)
 Dijouhon Jesus ro sude hamu na loja i
Hutogutogu do hamu tu hasonangan i
Hamu sude pamanat i hamu ni arahonNa i
Tadinghon niarsakhonmi, dompakhon Tuhan i
Sonang ni roha i, sonang ni roha i
Sonang ni roha i dilehon Jesus i

 Sai bege olopolop ni naung ro tu Jesus i

Malua sian dosa do naung saut tu Jesus ro
5
 Antong so tung tarambat ho marlojong ma tu Jesus ro
Sai golom panghophopNa i, malua ho disi
Sonang ni roha i, sonang ni roha i
Sonang ni roha i, dilehon Jesus i.
. . . . . . . Musik . . . . . . .
 Tibuna salpu tingkimi tu dia nama ho?
Ai tingki parasian i so diargahon ho
So tung ditoishon rohami joujou ni Jesus Tuhanmi
Masuhi ma adian i na sian Tuhan i
Sonang ni roha i, sonang ni roha i
Sonang ni roha i, dilehon Jesus i.

14. JAMITA: Jesaya 45 : 1 - 7

15. Marende BE. HKBP No. 680 : 1 . . . “SAI TOGIHON AU MULAK”
BL. 680 (huhut pasahat Pelean II)

 Sai togihon ahu mulak tu Ama i

Nunga loja ahu di parjalanganhi
Unang loas mago au didosangki
Sai togihon mulak au tu bagas ni Ama i
Sai togihon au, asa mulak au
Ale Tondi Parbadia togihon mulak au.
 Ale Debatangku baen ma au naposoM
Taaiti ma rohangku lao mangoloi Ho
Haporseaonhu baen gomos tu Ho
Ale Jesus togu au asa jonok tu Ho
Sai togihon au asa mulak au
Ale Tondi Parbadia togihon mulak au.

16. TANGIANG PELEAN :

U : Tatangianghon ma peleanta. Ale Debata, Amanami na di banua
ginjang! Ho do haroroan ni saluhut silehonlehon na denggan dohot
nasa ulibasa na mauliutus. Hupasahat hami ma sian na nilehonMi tu
hami, peleannami tu Ho. Sai jalo ma i gabe uap na hushus di joloM.

6
 Pasupasu ma i jala ramoti asa huparhaseang hami pelean on,
patimbulhon harajaonMu di tongatonga ni huriaM dohot di portibi on.
Buhai ma roha nami marhitehite TondiM, asa lam hutanda hami
godang ni silehonlehonMi tu hami, asa lam girgir hami mandok
mauliate tu Ho, marhitehite Jesus Kristus Tuhannami. Amen.

R : (Mangendehon) BE. HKBP No. 204 : 2 “Ndang Tadingkononhu

Ho” BL. 73
 Nasa nanilehonMi, tondi ro di pamatanghu
Hosa dohot gogongki, ro di saluhut artanghu
Hupasahat i tu Ho, na so unsatonhu do.
U : Ale Amanami na di banua ginjang! Sai pinarbadia ma GoarMu! Sai ro
ma harajaonMu! Sai saut ma lomo ni rohaM di banua tonga on songon
na di banua ginjang! Lehon ma tu hami sadari on hangoluan siapari!
Sesa ma dosanami songon panesanami di dosa ni dongan na mardosa
tu hami! Unang hami togihon tu pangunjunan! Palua ma hami sian
pangago!
R : (Mangendehon BE. HKBP No. 841)
 Ai Ho do nampuna harajaon, dohot hagogoon
Ro di hasangapon, saleleng ni leleng na, Amen.
U : Tangiang Pasupasu
R : (Mangendehon BE. HKBP No.845) Amen, Amen, Amen.