Ensera Jelu NubaiRenggat Terubah.

Posted by Sempulang Kenang Kelia by Pematak Kayau Menua.

Nyadi sekali jelu Badak ngelumuka bala jelu bukai lalu mai sida baum nubai. Badak ngasuh bala
kera betesau kin kitu madahka maya baum.
Hari diletak maya baum pan datai, bala jelu pan mupuk mega ayan sebelah tanah enggau puchuk
kayu. Bala pan nyau sampal datai, dia Badak lalu madahka batang aum. Semua bala jelu bukai
gaga bendar ati ninga penemu Badak ke nyadi tuai dalam aum nya. Badak ngeletak hari nurun
nubai, lalu ngasuh sida begigaka tubai dulu. Pia mega, iya ngasuh sida sedia mai sadak,
serampang enggau bekal dikena nubai.
Udah tembu aum, dia bala jelu lalu mulaika diri ngagai palan sida empu. Hari siti sida lalu
ngemas diri. Sida mupuk ngiga tubai enggau pekekas bukai ti diguna diri empu. Sida ngundur
Sungai Kara. Lebuh maya hari ke nubai, dia bala jelu lalu betugung ba tebing sungai, nganti
penatai Badak. Nyau kelama, nya baru iya datai. Iya lalu ngasuh sida nutuk ai tubai. Badak lalu
meri anak ikan ke antu rua, antu rangka, iya nya enselua.
Enda lama udah lepas nya, ikan pan mayuh dipeda mabuk tubai. Bala jelu lalu bekaukka ikan
enggau sadak sida. Bisi sekeda numbuk ikan ngena serampang. Hari pan nyau lemai, ikan mayuh
mega udah ulih sida. Badak lalu mai sida mulaika diri.
Datai di langkau, sida pan mela diri lalu makai. Ikan ke lebih empa, laban bengat mayuh, lalu
disalai sida. Pagi siti, sida lalu nurun nubai baru. Sekalitu, Badak mai nubai ulu Sungai Puak.
Rusa seduai Babi ngibun langkau sida. Apin tentu lama udah nya, dia Babi seduai Rusa lalu
ninga nyawa utai ngangau munyi tu:
Tum ketumba!
Indai Ragum nadai dia!
Nyau nubai Sungai Kara!
Bulih undang empa mata!
Ni asai salai, uchu?
Tum ketumba!
Indai Ragum nadai dia!
Iya ke tuai aku empa!
Iya ke biak aku ma!
Ni asai salai, uchu?
Rusa seduai Babi lalu takut. Seduai nyengau lalu meda Antu Raya. Pending iya mesai chapan.
Mata iya mesai buah terung kanggan. Betis iya mesai putan. Ngeli mesai dekuan.
Rusa seduai Babi, laban kelalu takut, lalu rari. Tinggal seduai rari, dia Antu Raya lalu makai salai
sida dataika abis.

Sehari-hari nya bala jelu beribunka ikan. Kera nyau kerah-kerah gaga meda ikan mayuh ulih diri.
Pelanduk laban tau nyelam bulih agi ikan ari jelu bukai. Perau sida sarat laban ikan.
Hari pan nyau lemai, dia Badak lalu mai sida mulaika diri. Lebuh datai di tebing, bala jelu lalu
ngangkut ikakun ngagai langkau sida. Lebuh bala jelu datai ba langkau, sida nadai meda Rusa
seduai Babi agi dia. Sida mega nemu salai ikan di atas para nyau abis nadai tinggal siku agi.
Mua mih pengerugi kitai. Pegila kitai enda tau enda nurun nubai baru, pia ku Badak.
Bala jelu, sekeda mela ikan ke lauk lemai nya, lalu sida bukai mupuk nyalai ikan. Enda lama
udah nya Rusa seduai Babi lalu mansutka diri. Seduai ngelalaika diri dalam babas semak langkau
sida. Bala jelu bukai enda ibuhka seduai. Sida ringat meda salai ikan nadai agi di atas para.
Nama kebuah seduai ninggalka langkau kitai? Peda semua salai udah abis dichuri orang! pia
ku Badak nganu Rusa seduai Babi.
Uji nuan Babi ngangauka semua jelu bukai ngasuh sida datai kitu, awakka sida ampit berita tu,
pia ku Badak nganu Rusa seduai Babi.
Babi lalu ngasuh semua jelu bukai ngasuh sida datai kia. Lebuh bala jelu udah sampal datai, dia
Rusa seduai Babi madahka pasal Antu Raya ke datai ngagai langkau sida.
Kami duai Babi amat takut ke Antu Raya. Bulu Antu Raya panjai ari bulu kami duai. Tubuh iya
tinggi baka puchuk tapang. Mata iya mirah chinang-chinang. Pala iya bulih mesai tibang. Salai
ikan abis diempa iya tinggal kami duai rari.
Enti tubuh Antu Raya amat ninggi puchuk tapang, awakka kami duai Nyumbuh ngibun langkau
kitai pegila. Enti Antu Raya datai, kami duai lalu niki ngagai pala iya,pia ku Kera.
Nyumbuh pan deka ga nurutka jaku Kera. Badak lalu ngasuh sida pulai ngagai langkau diri. Bala
jelu, laban diatu nyau jauh malam tambah ga lelak, lalu nindukka diri. Badak lalu ngasuh sida
tumu dani, awakka tumu ga nurun nubai baru.
Renggat kedua.
Taja ikan udah mayuh ulih bala jelu, sida agi deka nambahka salai sida. Pagi hari ketiga, dia bala
jelu tumu dani tinduk. Badak ngasuh sida makai dulu enggaika lapar lebuh beribun. Lebuh sida
udah kemas nyikap diri, dia bala jelu pan nurun ngagai sungai ke alai sida deka nubai. Sekali tu,
sida nubai pati Sungai Kara, iya nya Sungai Isu. Sungai nya ari ulu Rantau Mirah Mata ke alai
sida nubai hari keterubah.
Sungai tu enda berapa besai, tang gaya ai baka ke mayuh ikan, pia ku Badak bejaku enggau bala
jelu bukai. Sida lalu malu tubai dia.Pia mega, lebuh ai tubai udah disiuh, dia ikan pan bisi mega
dipeda ngabul, mabuk tubai. Bala jelu agi nganti Badak udah meri antu rua makai ikan, nya baru
beribun. Enda lama udah nya, Badak lalu ngauk ikan siku, nya dibuai iya ke enselua, antu rua
antu rangka.
Diatu bala jelu bekayuh kulu, kili nitihka ikan. Tekura nyelam kin-kitu ngiga ikan dalam ai. Jelu
Ringin laban nyelam bulih amat ikan mit. Rusa, laban nadai perau ngundan iya, nya alai iya
bedarat, nebing sungai. Taja iya lubah, tang iya bulih ikan besai ditumbuk iya enggau gansai.
Nyadi sehari nya, Kera enggau Nyumbuh ngintu langkau enggau salai ikan sida. Seduai udah
madah ngagai jelu bukai malam siti, seduai enda rari enti Antu Raya bisi datai ngagai langkau

sida.
Kira udah ngalih hari udah seduai makai, dia Kera seduai Nyumbuh lalu ninga nyawa utai.
Munyi nyawa agi jauh, tang mansang semak berari.
Kada enda nya munyi Antu Raya ti ku Rusa seduai Babi,pia ku Kera bejaku enggau Nyumbuh.
Kera seduai Nyumbuh lalu niki ngagai puchuk tapang. Seduai nilik kin kitu. Munyi nyawa nyau
mansang semak. Jaku pan nyau didinga. Kera seduai Nyumbuh lalu belalai ba puchuk tapang.
Baka tu munyi jaku Antu Raya didinga seduai:
Tum ketumba!
Indai Ragum nadai dia!
Nyau nubai Sungai Kara!
Bulih undang empa mata!
Ni asai salai, uchu!
Tum ketumba!
Indai Ragum nadai dia!
Iya ke tuai aku empa!
Iya ke biak aku ma!
Ni asai salai, uchu!
Lebuh Kera seduai Nyumbuh nilik, dia dih seduai meda Antu Raya. Kerah,ku Kera nelai
Nyumbuh. Tu mih Antu Raya ku Rusa seduai Babi. Peninggi Antu Raya amat nyau deka
nyentuk ngagai dan tapang ke alai seduai belalai. Antu Raya majak kediri semak agi. Ninga utai
bukai nadai bemunyi, dia iya lalu makai semua salai ikan bala jelu. Kera seduai Nyumbuh lalu
enda berani nurun ari puchuk tapang.
Hari pan nyau mupuk petang, ikan udah ga mayuh ulih, dia Badak lalu ngasuh bala jelu mupuk
mulaika diri. Sida lalu berangkutka ikan ngagai langkau sida. Lebuh datai dia, sida nadai meda
Kera seduai Nyumbuh. Sida ngangauka seduai, tang nadai ga nyaut. Rusa seduai Babi lalu
ngabas salai ikan, tang siku pan nadai ga ikan agi ditemu tinggal di atas para. Nyau kelama, nya
baru Kera seduai Nyumbuh nurun ari puchuk tapang. Seduai lalu nusui Antu Raya ke datai lalu
makai semua salai ikan sida.
Kerah! ku Kera. Amat besai Antu Raya. Sapa berani meda utai mesai nya. Kami duai
Nyumbuh lalu enda kebut-kebut meda iya ngulam ikan kitai, pia ku Kera.
Sapa berani ngerara Antu Raya makai salai. Tak semua ikan ba para siti abis sekali iya mapa
ngagai nyawa. Enti kami duai sema kada nya umbas telan iya sekali, pia ku Nyumbuh.
Enti kita ke biak nya takut ngintu langkau kitai, awakka aku kediri tinggal pegila. Semua kita
nurun nubai magang. Nadai utai dibai pulai, enti salai udah abis. Pegila Gajah nguluka kita
nubai, pia ku Badak.
Bala jelu lalu mela diri makai. Udah nya, sida lalu mupuk nyalai ikan. Nyau jauh malam, nya
baru sida nindukka diri.