Sastra Tutur

Assalamualaikum, Wr. Wb.

Mamak bebek kopek koyong kenalke name aku Ika Ayu Andriani, nga pacak manggel
aku Ayu. Aku ikak dari Bayong Lencer asalku dari Muare Medak yong. Nah Muare
Medak ikak kecamatannye Bayong Lencer, jarak antaro Muare Medak ikak ngen
Bayong Lencer sekisar 15 Km pek, yong, jadi amon aku nak kulu keler dari Muare
Medak ke Bayong Lencer dak pacak pek yong. Jadinye aku di Bayong Lencer ngekos
pek yong, aku ikak sekolahnye di Bayong Lencer tepatnye di SMA Negeri Satu Bayong
Lencer pek yong. Aku kesikak nak becerite tentang doson aku yang rengke nia,
sesuatu ikak yang nak kuceritoke agar kopek ngen koyong tau amon di doson aku kak
maseh alami, maseh besipat mistis pek yong.
Nah jadi, pade jaman dahulu itu, di Muare Medak pek yong ade sepasang suami istri
yang namenye Ki Aji Alek ngen Nyai Aji Alek, mikak bedue ini edopnye sare pek yong.
Gawenye sehari-hari ikak berotan pek yong. Edopnye saree nia nak makan sehari-hari
lagi susah pek yong. Hasel dari die berotan ikak dikumpulkenye untuk muat umahnye
pek yong. Jadi pada suatu arai, hasel die berotan ikak pacak untuk muat umah. Jadi
Ki Aji Alek ikak berencane nak muat umah panggong. Jadi pek yong untuk muat umah
panggung ikak Ki Aji Alek harus ngali lobang untuk tiangnye. Waktu die ngali lobang
ikak yong, die nemuke sesuatu didalam tanah. Diangkatnye setue ikak dak pacak pek
yong. Dang ikak die manggil bininye, dipanggelnye lah datang bininye ikak. Sekali
bininye yang disorohnye ikak ngangkat setue ikak. Dak taunye pacak dengan tangan
kirinye. Setue ikak langsong teangkat pek yong. Dak taunye setue ikak guci. Lame Ki
Aji Alek ngen Nyai ikak bepeker tentang guci ikak. Dak tau ape yang haros
dilakukenye. Dibawaknye guci ikak kekamarnye. Dang tige ari dari situ pek yong, Nyai
Aji Alek ikak bemimpi bahwe yang nunggu guci ikak namenye Tuan Hartono die juge
didatangi tujuh bidadari yang bername Tujuh Gades. Nah pek yong, yang nunggu guci
ikak bekate juge kalu die pacak ngabulke semue permintaan yang dimintak siape saje
asal urang yang nak bemintakan disane harus ngikuti pesaratannye yaitu yang
pertame katek niat untuk ngadu ilmu antare urang ngen guci ikak. Yang kedue harus
mawak minyak putri duyung ngen bunge tujuh rupe. Nah dengan care ngasihke guci
ikak setelah itu meluk guci sesampenye. Kalu seandainye tangan kite nyampe berarti
permintaan kite juge nyampe. Tapi sebaliknye pek yong. Nah dari mimpi ikak lah pek
yong Nyai Aji muktikenye dengan pintaan die nak punye keturunan juge kaye raye.
Singkat cerite permintaannye tekabul, mikak banyak urang bedatangan pek yong. Nah
amon kopek ngen koyong nak ke doson aku mare. Aku akhiri wassalamualaikum
warahmatullahi wabarakatuh.
 SEKAYU SENJANG MUBA
Najor ikan ikan delek
Ikan delek disungai lalan
Sungai lalan ayonyo beso
Dapatnye ikan tapa ngan ikan are
Asek ku dapat paya ngen sare
Kami numpang ngenalke diri
Kami urang muba asli
Wakel dari bayong lencer
Datang Cuma nak besenjang
Muat ati supayo senang
Kalu boleh kami nak becerite
Cerite tentang doson bayong
Doson bayung dosonnye rengke
Dekat dengan sungai lalannye
Ade pule dermaganye
Amon mikak nak ke jambi
Mampir dulu dibayong lencer
Bangunannye la ade merate
Telek bae samping rumah saket
Nak dibangun mall PI
Kota bayong dak kiannye
Banyak nia pembangunan
Kantor camat tingkat due
Kolam renang la ade pule
Taman kota la tebangun
Bapak dewan yang terhormat
Wakel rakyat yang baek ati
Jangan mentengke diri dewek
Kami rakyat butuh bukti
Jangan bapak banyak janji
Memang rakyat butuh bukti
Sabar bae kopek koyong
Kite warge jangan mojokke
Pemerintah la berusahe
Agar muba terbaek gale
Terime kasih bapak bupati
Terime kasih kopek koyong
La ngadeke festival RANDIK
Pacak kami melok besenjang
Doake bae supaye menang
Oy kanti ikak festival randik
Berbagai kecamatan datang lagi
Kami juge pesertanye
Boleh kanti nak menang pulek
Asal juri sportif nilainye
Ay senjang kami besenjang
Ikak kami berenti dulu
Minte maap kalu salah
Apelagi kalu tesinggung
Kalu telewat kalu telali
Kami besenjang belore bae.