Jaku Iban udah lama amai dikena sechara formal kenyau ari jeman Brooke kelia.

Kelia
iya dikena nyadi sebengkah jaku ti diguna dikena ngerembai pengarap sereta nerangka
polisi perintah. Kebuah pia laban tebal agi orang Iban maya nya bedau bisi pelajar formal.
Pemansang jaku tu ngerembai ngagai maya sepengudah Sarawak sama-sama enggau
Malaya, Singapore enggau Sabah numbuhka Serakup Malaysia. Opis Betanam betupi, Opis
Pengerai enggau Opis Pemadah nya agensi perintah kelimpah ari Opis Pelajar ke bisi
ngena jaku Iban dalam pengawa sida.

Dalam bidang pelajar, enti diperatika ari sukut sejarah pemansang jaku tu lubah bendar
ngerembai kelebih agi dalam taun 60an, 70an. Dalam taun 80an jaku Iban mupuk dipasuk
ke dalam sistem pelajar kelebih agi ba sekula sekondari baruh iya nya nengah KBSM.
Entara raban pengajar ke regas ngangkatka jaku Iban nya baka sida Pengajar Janang
Ensiring, Pengajar Jantan Umbat, Pengajar Edward Untie, Pengajar Jimbun Tawai,
Pengajar Jimmy Donald sereta mayuh agi pengajar Iban ke bukai.

Kemaya hari tu jaku Iban terus baka orang ke bejalai mansang nyingkang ke mua agi.
Diatu jaku Iban udah diajar ari tikas primari nyentukka sekondari sereta mega diajar ba tikas
universiti nitihka peminta raban bansa Iban ke sayau ke jaku sereta rindu meda pemansang
iya. Kelimpah ari media chelak, jaku Iban mega sama enggau jaku bukai di dunya
ngerembai sereta mansang dikena ba media internet. Mayuh laman web sereta blog tumbuh
baka kulat maya udah pengujan.

Tang taja jaku Iban nya mansang, enda tentu mayuh orang ibuhka atur sereta sistem ke
dikena lebuh mantaika isi penemu ba surat. Orang ke ada sereta besai maya jeman 60an
ngembuan sistem sereta atur sepil kediri empu. Bisi nya nunda jalai orang putih nyepil jaku
Iban lalu bisi mega nyepil nitih ati sereta dilah diri empu. Enti diperatika ba laman web
mayuh macham chara bala bloggers nyepil leka jaku Iban. Bisi ke nunda sistem ke dikena
ba sekula lalu enda kurang mega ke ngena chara diri empu. Taja baka nya semua sida tu
patut bendar diberi puji ketegal sama-sama ngangkat sereta ngerembaika jaku Iban ba
dunya siber.

Jaku Iban mupuk bisi ngayanka sistem sereta atur ti meruan lebuh Yayasan
Kebudayaan Dayak ngaturka Seminar Budaya dalam taun 1997. Mayuh penulis Iban maya
nya mupuk ngena sistem sereta atur sepil ke udah diperambuka Yayasan Kebudayaan
Dayak. Sekula kelebih lebuh peresa PMR maya nya endang ngena sistem ke udah
diperambuka yayasan tu. Tang pemansang sistem tu enda tentu regas laban iya enda
dipelajar nengah chara formal kelebih agi ngagai sida ke ba luar kandang sekula.

Nya alai berindik ari nya, jaku Iban tu patut bendar digaga standard ari semua sukut
awakka iya entap sereta tegap nitihka ubah pemansang dunya. Nya alai dalam taun 2007,
siti sistem ke dikumbai Sistem Jaku Iban Di Sekula udah dikeluarka Opis Menteri Pelajar di
baruh opis Pusat Perkembangan Kurikulum; diatu dikumbai ngena nama Bahagian
Pembangunan Kurikulum (BPK). Taja pan bup nya udah dikeluarka BPK, semina raban
pengajar enggau nembiak sekula aja ke ditetapka ngena sistem ke bisi berengkah dikena
dalam taun 2007. Sistem tu dikena di sekula laban endang ari pun perambu iya endang
dikena nangkup pelajar sekula. Tuju ti ngaga sistem tu endang meali-ali dikena nisih
pengulih nembiak dalam pelajar jaku Iban maya sida napi peresa PMR enggau SPM.

Kenyau ari taun 2007 mega sistem tu bisi udah diaku, diiru agensi opis perintah bukai
baka Opis Pemadah enggau RTM. Sistem tu mega berengkah dikena ba universiti baka
UPSI enggau UNIMAS berengkah ari taun 2010. Agensi prebet baka majalah Pegari
enggau Sempandai, Buletin Kenyalang enggau surat berita Utusan Borneo enggau Utusan
Sarawak bela ngaku bisi ngena sistem ke dikena ba sekula tang pan enda mungkur semua
atur sepil. Tabi puji mega patut diberi ngagai raban agensi tu mega laban sama-sama
ngerembaika jaku Iban.
 Sistem ke bisi diatu patut bendar dikena ukai semina ba sekula aja tang mega orang ke
luar kandang sekula ngambika jaku Iban dipeda bisi standard sereta ngembuan tikas ke
patut ulih ditemegahka raban bansa Iban laban ulih diangkat nyadi jaku tulis. Penanggul ke
bisi diatu nya autoriti ke bisi kuasa ngerembaika jaku nya ngagai agensi bukai kelimpah ari
opis pelajar. Enti jaku Melayu bisi Dewan Bahasa dan Pustaka (DBP) tang jaku Iban bedau
bisi gerempung ke bekuasa ke atas pemansang jaku Iban. Nya alai taja pan mayuh bala
Iban serebana ninga bala ke bejaku ba radio Iban baik nya penabur (DJ) tauka peninga ke
ngenataika jaku pesan ngena jaku Melayu sereta ngena jalai jaku ke enda engkeman; kitai
nadai kuasa deka madah sida nya salah tauka negur sida.

Taja pan sistem ke bisi diatu amat nya bisi penimpang sereta bedau tegap tang nya ukai
ke dalih bala ke patut ngena nya enggai ngena nya. Siti pengirau nya sekeda bala taja pan
udah besainka sempekat agi bejaku ari belakang mantah sereta mejah pengurang ke bisi
dalam sistem nya. Kitai sama nemu dalam pemayuh kitai dia endang bisi orang ke pandai
kemaya hari tu; pandai ari sukut jaku enggau lingusitik. Tang kekadang jaku Iban enda tentu
ulih disemakaka kitai baka jaku bukai baka jaku English tauka jaku Melayu. Enda semua
teori ke bisi dipansik ba jaku bukai ulih dikena ba jaku Iban. Kitai mega patut ingat dalam
jaku Iban bisi lebas senentang chara nyepil enggau chara nyebut sebaka enggau jaku
Melayu mega. Nya alai enti kitai gawa ke perintah kelebih agi enti kitai nya nyadi pengajar
ke ngajar jaku Iban kitai patut bendar enggau naka ulih nitihka sistem nya seagi-agi iya
bedau dialuska. Enda manah bendar enti kitai gawa enggau perintah tang ngelaban polisi ke
alai kitai gawa.

Enti raban bansa Iban deka meda jaku Iban tu mansang sereta tegap, bisi standard lalu
setipak enggau pemansang jaku bansa bukai dia semua ke bisi daya patut berundingka
chara baka ni tatak kuasa enggau autoriti tu ulih ditumbuhka. Jaku Iban udah mujur bendar
dipelajar nengah chara formal ketegal pengingin politik tauka political will, baka nya mih
pemansang jaku Iban mega ulih mujur nengah chara rama ti bisi pengingin sereta juluk ati
ari semua orang Iban ke rindu sereta sayau ke jaku tu; munyi ku sempama jaku tuai enti
deka alah enda, enti enggai bisi tau mih nadai. Runding sereta perambu ke deka numbuh
komiti tauka gerempung ti bisi autoriti patut bendar nyadika juluk ati raban bansa Iban
nangkanka tu.