GAGURITAN

DALEM BALINGKANG

PUPUH SINOM
1. Om swastiastu ya namah, Ratu hyang maha kawi,
Kalintang suci nirmala, Ledang nuntun tityang ngurit,
Anggen suluh krama sami, Dalem balingkang ne katur,
Nurun sakeng lontar kuna, Prade wenten iwang gurit,
Mogi rastu, Ledang ratu ngampurayang.

2. Ring jagat bali duk kuna, Madeg agung prabu luwih, Jaya
pangus parab ida, Ring panarajon mapuri, Wicaksana
ngenter gumi, Raris wenten encik rawuh, Tatuek ipun
madolan, Sareng istri oka siki, Jegeg ayu, Kang cing wi
wastan sang oka.

3. Maha prabu jaya pangus, Lulut asih ring kang cing wi,
Bagawanta mapiteket, Inggih jaya pangus gusti, Ampura
tityang iwerda, Matur pakeling ring gusti.

4. Sane mangkin tityang nglungsur, Sampunang ngambil

kang cing wi, Drestane nenten matutang, Tereh ratu
sakeng rihin, Tan dados marabi cina, Elingang pisan
puniki.

PUPUH GINADA

5. Sang prabu raris mangucap, Inggih bagawanta luwih, Yan

bawosang indik dresta, Dresta bali lintang kewuh,
Ngawinang kadat pamarga, Cutet mangkin, Kang cing wi
ambil titiang

Gaguritan Dalem Balingkang 1

6. Bagawanta nyawis nimbal, Ratu meled ngambil rabi,
Mangkin purun murug dresta, Janten baya panggih ratu,
Puput matur sapunika, Raris gelis, Sang bagawanta
matilar.

7. Jaya pangus tan kajehan, Kawastonin sang sulinggih,

Raris ida nitah panjak, Ngaryanang wiwaha agung,
Panjake mabriuk ngayah, Puput gelis, Upakara
pawiwahan.

PUPUH PANGKUR

8. Puput natab pawiwahan, Saget wenten, Cihna sane

kawon jati, Tedun sabeh krebek kerug, Metu blabar
kabinawa, Manganyudang, Purin ida maharatu, Tur
nganyudang umah panjak, Urip panjak keh ngemasin.

9. Reh puri anyudang blabar, Raris ida, Ngrereh genah sane

becik, Maring balingkang katuju, Drika nangun puri
anyar, Ida dalem, Balingkang ida kawuwus, Drika ida
nabdab panjak, Sareng rabi dyah kang cing wi.

PUPUH SINOM

10. Sampune swe marabian, Siki tan nedunang waris, Raris

ida mawecana, Uduh adi dyah kang cing wi, Beli jagi
nangun yogi, Maring pucak gunung batur, Dumogi hyang
betara sweca, Ngicen ragan beli waris, Benjang pungkur,
Wenten ngentos madeg nata.

11. Kang cing wi manyawis nimbal, Yan punika kayun beli,

Nika margi becik pisan, Durusang beli mayogi, Mogi

Gaguritan Dalem Balingkang 2

 sueca hyang kawi, Sang prabu garjita tuhu, Mireng bawos
rabin ida, Raris digelis mamargi, Ngungsi gunung, Pucak
batur ne nirmala.

12. Pamargin idane gancang, Maring gunung batur prapti,

Manuju gua nirmala, Genah becik nangun yogi, Ida kagiat
mangaksi, Wenten anak jegeg ayu, Kadaut kayun sang
nata, Ngambil ipun nganggen rabi, Ical tuhu, Kayun ida
nangun yoga.

PUPUH PUCUNG

13. Dabdab alus, Sang prabu raris mawuwus, Sang jegeg

idewa, Sira jerone puniki, Dados purun, Jero wenten driki
ngraga.

14. Istri iku, Nyawis kenyung dabdab alus, Dewi danu

tityang, Mangda jero tatas uning, Drika sampun, Purin
tityange sekala.

15. Ih sang bagus, Tityang taler meled wuruh, Ragan jero

sira, Dados jero wenten driki, Inggih durus, Jerone
mangkin nartayang.

PUPUH SINOM

16. Maha prabu ngeka naya, Apang uning adan beli, Ne beli
dalem balingkang, Beli mlila cita mai, Truna genten ragan
beli, Beli mangkin tanpa bayu, Nyingak kaayon idewa,
Tambanin ja beli mangkin, Mati hidup, Ngiring driki
ngecap tresna.

Gaguritan Dalem Balingkang 3

17. Dewi danu raris ngucap, Yaning keto kayun beli, Tityang
nenten purun tulak, Tur ngawit punika raris, Sang kalih
alaki rabi, Raris mobot dewi danu, Sampun embas putran
ida, Mraga detya anak alit, Tur kawuwus, Ida sang maya
danawa.

PUPUH PANGKUR

18. Kang cing wi mangkin carita, Pageh jati, Nyantos irabi

ring puri, Suwe irabi tan rawuh, Ngayunang rabine
sengkala, Raris nyrepin, Irabi ka pucak batur, Rahina
wengi mamarga, Maring gunung batur prapti.

19. Kang cing wi kagyat manyingak, Rabine lulut asih sareng

nak istri, Raris ida wuwus bangsul, Ih beli dalem
balingkang, Kaden saja, Nangun semadi di gunung, Jeg
dini mademen-demenan, Ngajak anak eluh jalir.

PUPUH DURMA

20. Kabawosang, Istri jalir dewi danu duhka, Raris

mawecana nengkik, Ih nyai luh nista, De nyai ngawag
mapeta, Dewi danu adan kai, dalem balingkang, Ne mula
kurenan kai.

21. Ida dewi danu raris mangregepang, Sakeng netra metu

geni, Kang cing wi kagyat, Ring sor taru ageng mengkeb,
Genine nguber kang cing wi, Murub mangabar, Tur
geseng masmi kang cing wi.

Gaguritan Dalem Balingkang 4

 PUPUH SEMARANDANA

22. Sang prabu kagiat ngaksi, Anggan rabi basmi geseng,

Raris manangis kadalon, Uduh dyah kang cing wi sayang,
Beli ane mula iwang, Ne ngawinang adi lampus, Ledang
adi ngampurayang.

23. Uduh dewi danu adi, Beli ngangken truna genten, Banget
pakayun beline, Manganggen adi kurenan, Pang sida
numbuhang putra, Reh kang cing wi sakeng dumun,
Durung numbuhang sentana.

PUPUH DURMA

24. Mireng bawos, Rabine asapunika, Dewi danu duhka

brangti, Yah tusing madaya, Beli melog-melog tityang,
Kang cing wi kurenan beli, Bakat matiang, Ia tusing
ngelah pelih.

25. Yening keto, Pelih beli gede pesan, Sandang dosan beli
jani, Puput mawacana, Dewi danu nunggal idep, Sakeng
netra metu geni, Dalem balingkang, Pramangkin
kageseng basmi.

PUPUH PANGKUR

26. Panjak ida ring balingkang, Suwe nyantos, Gustine tan

mawali, Raris maserep mabriuk, Maring gunung batur
prapta, Kagyat sami, Wenten layon lanang wadu,
Kajantenang layon punika, Layon sang nata wiakti.

Gaguritan Dalem Balingkang 5

 PUPUH GINADA

27. Dewi danu uningayang, Mabawos ring panjak sami, Uduh

paman jak makejang, Gustin paman suba lampus, Nira
sane ngamademang, Pangkah yukti, Reh melog-melog
manira.

28. Ipanjak matur manimbal, Gusti tityang yukti salit,

Mangkin napi pwaran tityang, Dados panjak tanpa ratu,
Ical genah masayuban, Sampun pasti, Tityang
mangguhang sangsara.

PUPUH PUCUNG

29. Dabdab alus, Mawecana dewi danu, Bhaktin paman saja,

Lintang luwih teken gusti, Eda kewuh, Jani nira ngicen
jalan.

PUPUH DURMA

30. Dewi danu, Manunggalang adnyana, Ngastawa layon

kakalih, Layone raris ical, Dados togog nyalantara,
Ageng-ageng lanang istri, Nika kocapang, Barong
landung lanang istri.

31. Dewi danu, Raris ida mawacana, Uduh paman maka

sami, Apang paman tatas, Ne linggan dalem balingkang,
Seta sura kawastanin, Lan rabin ida, Batari mandul
kwastanin.

32. Keto paman, Pundut jani linggan ida, Sida paman

mangguh santi, Panjak mundut titah, Linggan sang kalih

Gaguritan Dalem Balingkang 6

 kastawa, Dalem balingkang kang cing wi, Sakeng niskala,
Ngenter panjak mangda santi.

33. Sapunika, Gitan ida dalem balingkang, Kwit barong

landung yukti, Ngiring pundut tekek, Anggen ngulati
kakertan, Kirang langkung sinampuri, Ngiring puputang,
Masadana prama santhi.

=== PUPUT ===

Gaguritan Dalem Balingkang 7