GAGURITAN

DALEM SIDHAKARYA

PUPUH GINADA
1. Pamurwaning atur tityang, Ring ida hyang saraswati,
Pinaka sarining tatwa, Mangda ledang asung, Mapaica
kaweruhan, Lamakaning, Sida tityang mangaturang.

2. Nepacang mungguh ring gita, Sang wiku luwih utami,

Nyeneng maring jawa dwipa, Brahmana keling
kasengguh, Tuhu ida pascat pisan, Ring sedaging, Sastra
aji makabehan.

3. Mangkin ida pacang lunga, Nyelehan lampah ibeli, Kocap

maring bali dwipa, Sampun jenek madeg agung, Nanging
ida durung tatas, Jagat bali, Dijake nika magenah.

4. Wus ida nyurya sewana, Digelis raris memargi, Manut

bawos ring sunia, Kelod kangine kaduluh, Saget ana alas
jimbar, Anak lingsir, Masanekan marerepan.

5. Tandugi raris nyempena, Hyang siwa ledang nedunin,

Mawosan sameton ida, Ring bali purwa malungguh,
Gelgel pura maka ngaran, Budal raris, Mantuk maring
siwa loka.

6. Sang brahmana kapupungan, Ledang kayune tan sipi,

Raris mengaturang sembah, Bhatara siwa ka astu, Tuhu
ratu lintang sweca, Tityang ngiring, Satitah singgih
bhatara.

Gaguritan Dalem Sidhakarya 1

 PUPUH PANGKUR

7. Tan kewarnan lampah ida, Kacarita, Kawentenan ring

bali, Katitah antuk sang prabu, Dalem watu renggong
ngaran, Jenek maring, Gelgel pura punang datu, Tuhu
asih lintang sweca, Sinungsungin panjak sami.

8. Bawosang ring gelgel pura, Ida dalem, Marumang para

patih, Ring paseban ida lungguh, Kasarengin
bhagawanta, Para sutri, Maka sami jangkep sampun, Ida
dalem mangandika, Kadulurin panganjali.

9. Wadwan ingsun makabehan, Warah akna, kehanan

negari, Lamakaning ingsun weruh, Dane patih matur
banban, Kang negari, Yukti kerta tan pakewuh, Ledang
ida myarsayang, Tandugi raris manyawis.

PUPUH GINANTI

10. Mangke ana idep ingsun, Rengen kena apang teling,

Bipraya manangun yadnya, Pangenteg linggih kang nami,
Sida ajeg kang negara, Sukerta rawuh kawingking.

11. Yan sami huwus saigum, Nyungkemin punang pakerti,

Rehning iki yukti rahat, Kadyang punapa kang budi,
Maka sami matur banban, Singgih ratu tityang ngiring.

12. Ida dalem mapaungu, Ring anggan ida sang resi, Sigra
ratu midartayang, Sedaging yadnya puniki, Menyawis
sang resi alad, Jani bapa mengawitin.

Gaguritan Dalem Sidhakarya 2

13. Ngenteg linggihe kawuwus, Ngentegang linggih bhatari,
Sida jenek ring priyangan, Nodya manusane sami,
Sandang patut laksanayang, Reh ida premanan gumi.

14. Wiwitannye mangke katur, Sangkaning tri rna yukti,

Dewa rsi lan pitara, Tan dadi baan ngelidin, Dewa rna ne
kawedar, Utang urip ring hyang widhi.

15. Resi rna mangantur, Utang ring guru sujati, Utang aji
kaweruhan, Tan sida pacang nyasapin, Taler yadnya
muputan, Rsi yadnya maka nami.

16. Pitra rna ne kawuwus, Utang ring pitara jati, Yayah ibu
makadinnya, Pitra yadnya maka titi, Yan ana tong
mangidepang, Yukti manusa durbudi.

PUPUH SINOM

17. Durung puput babawosan, Matur dane gusti patih,

Singgih ratu suryan tityang, Yukti wawu tityang eling,
Yan tan ratu makelingin, Janten tityang natan weruh,
Kotamaning sang meyadnya, Nika lungsur tityang
mangkin, Ledang ratu, Mapica ring sikian tityang.

18. Ledang ida miragiang, Idep cening luwih jati, Jani bapa
manuturang, Apang cening tatas uning, Nyupat lara
kaping siki, Ngardinin jagat rahayu, ping telune mangda
tatas, Yaning matuk tan mawali, Sapuniku, Palaning
manangun yadnya.

19. Agung dosa yan ngengsapang, Mirat dana kawastanin,

Bilih yan pariceda, Menyengkalen sang makerti, Dyastun

Gaguritan Dalem Sidhakarya 3

 numitis ping keti, Tan sida pacang manawur, Kedeh bapa
makelingin, Pisaratang sakeng mangkin, Mapitulung,
Yukti sangkan nekeng tuwas.

20. Parekane raris nimbal, Wenten lungsur tityang malih,

Panca swarane kawedar, Ledang ratu mangesengin, Sang
rsi raris menyawis, Panca lalima puniku, Swara munyi
mautama, Panegul yadnyane yukti, Apang weruh, Jani
bapa manuturang.

21. Kapertama swaran weda, Pujan ida sang sulinggih, Genta

sane kaping ruwe, Suaran kidung kaping tri, Kawewehin
gita santhi, Kakleningan raris ngetut, Gendongane kaping
untat, Pinaka tatenger gumi, Sangkan patut, Yan nepak
tong dadi ngawag.

22. Mewali bapa nuturang, Karya agunge ring puri, Jalan ne

jani dabdabang, Idep bhakti apang nunggil, Sanjata luwih
sujati, Ngawonang sekancan musuh, Rehning ceda ikang
yadnya, Sangkaning manah tan ening, Wastu Sepung,
Ngawenang yadnya nirguna.

PUPUH DURMA

23. Sapunika, Puput sampun peparuman, Ring bancingah

kocap raris, Para panjak mapidabdab, Rehning sampun
panupaya, Anggar kasih dina luwih, ngawit negtegang,
Macihna nanceb taring.

24. Ring pamrajan, Pakaryane sampun nincap, Sanggar

tawang miwah kantil, Asagan lan pamyosan, Sami

Gaguritan Dalem Sidhakarya 4

 lungguh manut genah, Kaiterin klabang mantri, Manut
purana, Kabawos klabang sakti.

25. Sanggar tawang, Pinaka suryaning karya, Genah

mengastawa widhi, Ring bale kantil bawosan, Linggih
bhatarane wantah, Mapupul sinareng sami, Pacang
manodya, Sapolah yadnyane sami.

26. Rikalaning, Panjake ngaturang ayah, Kancit wenten anak

prapti, Tuhu dekil turin nista, Wastu angen sang
ngatonang, Parekane manakenin, Nawegang bapa, Apa
alih teke mai.

PUPUH GINADA

27. Sang brahmana muwus banban, Bapa sakeng tanah jawi,

Sameton ida sang nata, Brahmana keling kasengguh, Yan
jerone tuhu ledang, Manangkilin, Ida dalem ngejabayang.

28. Parekane ngingkel ngucap, Sada banggi menyawurin,

Saja bapa tan pengrasa, Mamunyi mangulah pesu, Dija
unduk ratun tityang, Madwe ari, Jadma dekil kadi bapa.

29. Sang brahmana meneng ida, Rehning parekane nguci,

Saja bapa nista dama, Mirib tong taen masuluh, Pongah
jwari turin pangkah, Teka mai, Ngangken sameton sang
nata.

30. Cutet tityang tan ngiringang, Pangidih bapane sukil,

Sinah dadi kakedekan, Ngawenang purine surud, Lengeh
tityang yan nuwutang, Manimpalin, Jadma buduh turin
punyah.

Gaguritan Dalem Sidhakarya 5

 PUPUH DURMA

31. Tan kawarnan, duka ida sang brahmana, Kone bali dwipa
luwih, Nguda manusane sugal, Alus bapa manuturang,
Duleg cai manimpalin, Tana pengrasa, Saja cai tuna budi.

32. Parekane, manimpalin sada banggras, Cutet tityang tan

ngugonin, Mulih bapa kapondokan, Tilesang ragane tua,
Idupe ngantiang mati, De liu ujar, Awak sintrig mapi
ririh.

33. Yaning keto, Jani bapa mamuktiang, Wireh cai kliwat

banggi, Sawewengkon gelgel pura, Wastu gering tan
milaradan, De pesan cai nyelselin, Yadnyane rusak, Solah
cai agung sisip.

34. Wus umastu, Lumampah sira brahmana, Panepi siring

kaungsi, Parekane tan ngerungwang, Sada ewer tur
manyadcad, Enggalan bapa magedi, Pamastun bapa, Doh
para lakar mabukti.

PUPUH GINADA BASUR

35. Sapatilar sang brahmana, Rimrim jagate premangkin,

Sang hyang surya tanpa teja, Nanging sabehe tan ngetut,
Mawastu jagate bara, saka siki, Pagarubyug panjak ida.

36. Ngangsan lami ngangsan rahat, Gumine kaliput sakit,

Tulya kadi grubug siyap, Seger geleme mangitut, Seger
siki gelem dadwa, Benjang malih, Seger kalih gelem
patpat.

Gaguritan Dalem Sidhakarya 6

37. Ida dalem lintang osah, Meweh ida mikayunin, Grubug
gering tan pegatan, Ngawinang sungsut ring kayun,
Mangen-angen ring pamereman, Dija mirib, Tuna yasa
kertin tityang.

38. Dauh dasi sampun lintang, Saget parekane tangkil, Ida

dalem raris medal, Malinggih ring kerta sampun, Kenken
paman gagesonan, Teka tangkil, Apa mirib ne saratang.

39. Parekane tanpa ucap, Buka jangkrike ketebin, Pragat

nguntul ngurek tanah, Ida dalem raris tedun, Mai paman
dini negak, Nira nyadya, Madingehang rawos paman.

PUPUH MASKUMAMBANG

40. Sinampura, Purun tityang matur mangkin, Mogi ratu

ledang, Agung iwang tityang yukti, Ngawenang iratu
osah.

41. Yan bawosang, Larane nibenin mangkin, Wantah

sangkan tityang, Iwang matur ring sang luwih, Brahmana
keling tan lian.

42. Rehning ida, Ngangken sameton batari, Tityang tan

mangega, Raris mastu anak lingsir, Gelgel pura kabiah
paran.

43. Yaning arsa, Nyadia tityang menangkilin, Mangda ida

prapta, Ledang dalem menampenin, Nanging ana wangsit
ida.

Gaguritan Dalem Sidhakarya 7

44. Uduh paman, Melahang jani menampi, Asing sang
meyadnya, Patapan toyane gisi, Yadin ogah nging tan
obah.

45. Keto paman, Manut babawos sang muni, Geng yasa geng
goda, Musuh awake yanain, Sad ripu sapta timira.

PUPUH SEMARANDANA

46. Angob ida mengatonin, Sang brahmana yukti wikan,

Mula adi tempek ace, Lega ace manarima, Enak lungguh
peparenga, Nyakre werdi lawan ingsun, Gelgel pura mogi
kertha.

47. Mangke ana warah beli, Panjak sami apang tatas, Buat
pejalan adine, Ngalahan sedahan papa, Lamakaning
paripurna, Sida kang karyan ingulun, Mangke ulun
mapaica.

48. Mangke adi kapasihin, Dalem sida karya ngaran, Ngawit

jani pastu ace, Temuang rawuh kawingking, Asing sang
menangun yadnya, Tirta ida patut lungsur,
Ngaksamayang tur muputang.

PUPUH GINANTI

49. Sapunika puput sampun, Pemargin sang meraga lwih,

Mogi wenten pikenohnya, Niki satwa bekel ngipi, Yaning
iwang ampurayang, Puput antuk prama santhi.

=== PUPUT ===

Gaguritan Dalem Sidhakarya 8