GEREJA BATAK KARO PROTESTAN (GBKP)

MAJELIS / RUNGGUN TANJUNG SARI – MEDAN

KLASIS MEDAN – KAMPUNG LALANG
Jl. Setia Budi Gg Gereja Karo Tanjung Sari Medan 20132 Telp 061-8220456 Email : gbkptjsarimedan@gmail.com

LITURGI MINGGU, 20 SEPTEMBER 2020

(DARURAT COVID - 19)

Liturgi Kebaktian : Minggu XV Kenca Trinitatis / Minggu Perdamen

(Warna Stola : Meratah)
Introitus / : Tadingkenlah kejahaten, lakokenlah kai si mehuli,
Invocatio
bulatkenlah ukurndu erbahan perdamen
(Msm. 34:15)
Ogen : 2 Samuel 13 : 23 - 29 (Tunggal)
Khotbah : 1 Petrus 3 : 8 – 17 (Tunggal)
Tema : Ngelakoken Perdamen Alu Bulat Ukur

A..PERSIKAPEN
Perpulungen nikapken pusuh ras ukur guna ngadap man Tuhan
Pelayan ibadah ersikap i ruang persikapen
..... Musik .....

B. KEBAKTIN
1. Kata Pengalo-ngalo ras Momo
Turang ras senina i bas Tuhanta Jesus Kristus, selaku serayan Tuhan,
ikataken kami mejuah-juah ras selamat wari Minggu man banta kerina.
Man bandu kekelengen kami si sekali enda denga erkebaktin i bas
gerejanta enda, ikataken kami mejuah-juah. Kerehenndu nambahi
keriahen man banta kerina. I bas bena kebaktinta mari dage si
dengkehken momo kerna perdalanen perpulungen Tuhan, bage pe rencana
pelayanen gerejanta ku bas wari-wari si reh enda. (Ngogeken Momo).

2. Kata Penaruh
Kekelengen ni Tuhan, Minggu enda i gelari Minggu Perdamen, ngingetken
kita kerna perbahenen Jesus Kristus si mereken diriNa, mate i kayu
persilang guna mperdameken kita ras Dibata erkiteken dosa-dosanta. Arah
Hal : 1
 enda me dalanna maka kita erdame ras Dibata. Selaku kalak si enggo
iperdameken ras Dibata maka kita pe maba dame ku sekelewetta. Emaka
si permuliakenlah Tuhan si maba dame e.

 Erkata Lonceng Perp. Tedis

 Rende : ..... (Serayan Kebaktin Bengket ku Mimbar)
KEE No. 3 : 1-2 (Puji Dibata E)
1. Puji Dibata e, Raja mbelin si mulia
Kita kerina erjimpuh ertoto ku Ia
Pulunglah min! Rende ersurak me kin
K’rina me kam manusia
2. Puji Dibata e, si ngrajaisa kerina
E maka kerajang jelma mehuli jadina
Rajanta e, numpak ginemgemNa nge
Em peraten bagidina

3. Votum - Salam
L I bas gelar Dibata Bapa si erngena ate nandangi perdamen, i bas
gelar Jesus Kristus si mperdameken manusia ras Dibata, ras i bas
gelar Kesah si Badia sinampati kita (kam) erdame ras temannta
(ndu) manusia.
Perkuah ate ras dame i bas Dibata Bapa, ras i bas Jesus Kristus nari,
i bas kerembaken Kesah si Badia, ras kita (kam) kerina gelah. Amin.
P Amin...... Amin..... Amin...... (iendeken)

4. Berita Kerna Perbahanen ras Sura-sura Dibata

L Tadingkenlah kejahaten, lakokenlah kai si mehuli,
bulatkenlah ukurndu erbahan perdamen (Msm. 34:15)
Erpalasken Kata Dibata enda, si puji IA alu radu ras kita ngendeken
KEE No. 372 : 1-2 (Pujilah Tuhan si Badia)
1. Pujilah Tuhan si Badia
Puji perbahanenNa si mbisa.
Embus suling, terompet
Cawir ban sorana
Puji Tuhan si Mada k’rina tinepa
Hal : 2
 2. Suraklah o doni kerina
Rende muliakenlah gelarNa
Bujur perbahanenNa
La pedas merawa
Puji Tuhanta ibas lias ateNa

5. Pertoton Pengataken Bujur Man Dibata si Jadi Ulu Kedamen Perp. Kundul
L Marilah kita muji Dibata, erkiteken keleng ate ras kiniulinNa si jadi
Ulu kedamen bas doni enda, nintalah i bas ukurta :
O Tuhan Dibata, Bapa sierkeleng ate man kami, terpujilah gelarNdu
sabab mbelin kiniulinNdu maler man kami. I tepaNdu doni enda alu
serta, dem alu kiniulin, janah kerina tinepaNdu nggeluh alu dame . O
Tuhan Jesus, ipuji kami Kam sabab Kam enggo maba perdamen ku
doni enda. O Kesah si Badia, kataken kami bujur sabab enggo iajari
ras ipengasupNdu kami erdame. Terpujilah Kam seh rasa lalap,
Amin.
Sikataken bujur man Dibata alu ras kita rende : .........
KEE No. 165 : 1-2 (Bas Ia Ngenca Lit Kepe)
1. Bas Ia ngenca lit kepe,
Kek’lengen si mbelin.
Yesus tersilang seh mate,
Lah aku terkelin.
Reff.
Tetap ukurku tek aku baNa
Keleng ateNa mbelin kuasaNa
Ia njagasa geluhku k’rina
Malemna di ras Ia.

2. Man baNa ernalem dage,

Begiken KataNa.
Di meriah tah gulut pe,
Tetap temaniNa.
Reff.

Hal : 3
6. Kecibal Geluh Manusia Iadep-adepen Dibata
L Jesus Kristus enggo mperdameken kita ras Dibata arah
pengorbanenNa i kayu persilang. Gelah kita pe nggeluh erdame ras
temanta manusia. Adi sigargari isi pusuhta, kuga nge kininggitenta
erkorban i bas ndalanken perdamen?
P O Tuhan, ngaku kami maka metahat denga akap kami erkorban
ndalanken perdamen, seh maka kegeluhen kami la jumpa kejuah-
juahen. O Tuhan alemilah kami.

(Paksa Teneng)

L Guna mpebagesi pengakunta, mari siendeken : .....

KEE No. 377 : 1,2 (Kuakuken me dosangku)
1. Kuakuken me dosangku
I lebe Tuhan
Megati aku lalar bas kegeluhenku
Keleng atendu pengarapenku
I teruh perkuahNdu malem me pusuhku
Keleng atendu pengarapenku
I teruh perkuahNdu malem me pusuhku

2. Erlebuh aku baNdu

O Yesus Tuhanku
Alemi min o Bapa salah ras lepakku
Keleng ateNdu pengarapenku
Tedeh ‘teku ngidah belinna perkuahNdu
Keleng ateNdu pengarapenku
Tedeh ‘teku ngidah belinna perkuahNdu

7. Berita Pengalemi Dosa Perp. Tedis

L La meriah iakap Dibata anakNa bene i bas dosa. Tapi meriah kal
ateNa ngidah sekalak anakNa si jera dingen robah i bas dosa-
dosana nari. Emaka selaku persuruhen Dibata, aku nehken KataNa
man banta (ndu) kerina kita (kam) si enggo ngakuken dosanta
(ndu), niNa :
Hal : 4
 “Bagi dauhna Timur i Barat nari, bage me ipedauhNa dosa-dosanta i
bas kita nari. Bagi keleng ate bapa man anak-anakna, bage kal me
pengkelengi Dibata kalak si erkemalangen man baNa.” (Masmur
103:12-13)
I bas keriahenta erkiteken dosanta (ndu) enggo ialemi, si puji dage
Tuhan arah : .........
KEE No. 254 : 1-2 (Isuruh Dibata)
1. Reff.
Isuruh Dibata sikeleng-kelengen
Si sampat-sampaten asa kengasupen
Mbue me kap tuhu si man bahanenta
Radu ras kerina kita ndahikenca
Palasta nampati em ate mekuah
Ngusih Tuhan Yesus enggo kap nampati
Meriah ukurta adi teman pulah
Masap kebiaren ‘je dat ate jadi

2. Reff.
Isuruh Dibata sikeleng-kelengen
Si sampat-sampaten asa kengasupen
Mbue me kap tuhu si man bahanenta
Radu ras kerina kita ndahikenca
Kalak si ngikutken kata Tuhan Yesus
Terangina doni ras k’rina isina
Tegulah temanta gelah ola celus
Si tuduhken dalin gelah ola mampa

8. Kata Dibata Perp. Kundul

a. Ngoge Kata Dibata Bagin Si Pemena:
L Ketuahen kalak simegiken kata Dibata dingen si makekenca i bas
kegeluhenna si tep-tep wari, Haleluya
P Haleluya......Haleluya.... Haleluya...... (iendeken)
b. Khotbah (Ibenaken ras idungi alu pertoton)

Hal : 5
9. Pengakun kiniteken Perp. Tedis

10. Persembahen Perp. Kundul

L Turang ras senina seh me paksa man banta (ndu) guna ngendesken
persembahen pengataken bujur man Dibata, perbahanen Dibata si
jadi palas man banta (ndu) guna ngataken bujur, nina i bas Epesus
2:14 : “Sabap Kristus e kap si ndameken kita, alu njadiken si dua
pihak e jadi sada. Kristus jine alu dareh dagingNa enggo
ngeruntuhken tembok si nirangken bangsa-bangsa e dingen si
erbahanca ia tetap ermusuhen.”

Tupung sisehken persembahenta, mari ras kita rende i bas

KEE No. 281 : 1 (Kek’lengen Yesus kempak manusia)
1. Kek’lengen Yesus kempak manusia
Desken Dibata engkelengi Ia
KekelengenNa maler kap man banta
Adi sipakelah pedahNa
Reff.
Min si keleng-kelengen kita k’rina
Bagi pedahken Yesus bas pustaka
Sababna kai sipindo bas gelarNa
Ib’re Dibata man banta.

Pertoton Syafaat ras Pertoton Persembahen

11. Perpadanen Nggeluh I bas Perdamen Perp. Tedis

L Dibata enggo mereken perdamen man bandu, enda me si jadi tugas
ras tanggungjababta (ndu) selaku anak si enggo iperdameken
Dibata ras diriNa.
P Aku erpadan Tuhan, ngergaken perdamen si enggo kualoken i bas
Kam nari.
L Dibata ndilo kita maba perdamen ku kerina temanta manusia.
P Aku erpadan nggit erdame ras temanku manusia janah tetap
ngelakoken si mehuli gelah teridah perdamen i tengah-tengah
kegeluhen.
Hal : 6
 L I bas kita mpeteguhi perpadanenta, ras kita rende : .......
KEE No. 381 : 1-2 (Sura-sura Yesus bangku)
1. Sura-sura Yesus bangku
Ersinalsal tetap
Nggeluh bujur ras mehuli
Si ngena atena.
Reff.
Ersinalsal terang
Em sinisuraken Yesus
Ersinalsal terang
Ku tetap ersinalsal

2. Sura-sura Yesus Kristus

Nandangi geluhku
Mpehaga turang senina
Sisampat-sampaten.
Reff.

12. Pertoton Tuhan

13. Pengutusen Ras Pasu-pasu Dibata

L Berkatlah kita (kam) ndalani kegeluhenndu, cidahkenlah perdamen
e ku tengah-tengah doni enda, gelah doni enda banci nggeluh i bas
dame, alokenlah pasu-pasu idur Dibata nari : “Dibata si mada
perkuah ate, si enggo nenahken kam ku kemulianNa si rasa lalap i
bas Kristus, njadiken kam serta, tetap, megegeh dingen paguh. Ia
nge si mada kuasa seh rasa lalap.” Amin. (1 Petrus 5:10-11)
P Amin..... Amin..... Amin..... (Iendeken)

Hal : 7